María Isabel la neköi thöth ka catre cainöje trootro ngöne la traone ne San Bernardo, götrane kolo jë ne Amerika, ene ngöne la nöje hna hape Chili. Ame angeice me hnepe lapa i angeic, tre, itre atrene la nöje hna hëne ka hape Mapuche. Hnene la hnepe lapa asë cili hna catre hamëne la ixatua i angatre göi troa ce eköthe la ekalesia ka ithanatane la qene Mapuche, hna hëne ka hape Mapudungun.

Ame la kola ithuemacanyine ka hape, tro fe a hane kuca la Drai Ne Amekunën la meci Keriso qene Mapudungun, me thawa trongëne la 2 000 lao pepa ne ihë göi Drai Ne Amekunën ngöne la qene hlapa cili, ame hna amejëne la mekune i María Isabel. Nemene jë la ixatua nyine tro angeice a hane kuca? Mekune jë hi angeice la thangane ka loi qa ngöne la hna cainöje hnene la itre xa Atre Anyipicin thöth kowe la itre sine ini angatr me kowe la itre ka ini angatr. Ame hnei angeice hna ce ithanatane ju me keme me thin, nge ce axeciëne jë hë angatre laka, qanyi María kö mekune la aqane tro angeic a thawa la itre pepa ne ihë ngöne la uma ne ini. Nemene ju hë la hnei angeice hna mekune troa kuca?

Ame la hnapan, hnei María Isabel hna pane sipone kowe la itretre mus ngöne la uma ne ini troa afedrene la ca pepa ne ihë ngöne la hna lö kowe la uma ne ini. Kapa jë hi la sipo i angeic, me qaja aloine la mekuna i angeic. Ame ju hi la ketre hmakany, hene ka tru ne la uma ne ini a ewekë jë ngöne imikoro troa ithuemacanyine la pengöne lai pepa ne ihë!

Thupene lai, hnei Maria hna sipone pena troa wange la hnënge kalas asë ne la uma ne ini. Ase jë hi kapa la sipo i angeice hnene la itretre ini, angeic a hnyingëne jë kowe la itre nekönatre ka ini ka hape, hetre atre Mapuche kö thei angatr. Öni angeic: “Öninge pena kö, ma tro hi a 10 maine 15 lao atre Mapuche ngöne la uma ne ini asë, ngo ala nyimu catre kö angatre hune lai, ke, hnenge hna thawa la 150 lao pepa ne ihë!”

Hnene la ketre föe ka öhne la ipepa ne ihë hna athipe ngöne la hna lö kowe la uma ne ini hna hnyingëne ka hape, tro eahlo a wai drei matre troa qeje pengöne la aliene lai sine pepa. Sesëkötre ju hi eahlo la kola tro xomi eahlo kowe la ketre nekönatre jajinyi ka trene lao macatren! María Isabel a dredrehnyima me hape, “Öni eahlo pena kö, atr ka tru macatren la hnei eahlo hna troa öhn.” Thupene jë hi la hna hamë eahlo la sine pepa ne ihë me qeje pengöne ej, María Isabel a hnyingëne ju lai föe la hnalapa i eahlo matre tro angeice me keme me thine i angeice a wai eahlo göi troa qeje pengöne hnyawa la Baselaia i Akötresie. Ketre tru catre la madrine ne la ala 20 lao itretre cainöj ka qene Mapudungun la kola öhne lai föe memine hmaca fe kö la 26 lao atr ka traqa troa hane sine la Drai Ne Amekunën. Ame hë enehila, ketre ekalesia lai ka tru atren!

Ka tru macatrene ju hë së maine ka co pena, ngo hapeu, hne së fe kö hna hane mekune troa hëne la itre sine ini së maine itre sine huliwa së kowe la Drai Ne Amekunën, maine koi ketre cainöje koi nöjei atr pena, maine tro pena a hane sine la ketre asabele ne distrik? Hnauëne kö laka tha thele kö hnine la itre itusi së la hna kuca ha hnene la itre xa trejine matre atreine fe së hnëkëne la ewekë ka loi nyine kuca, nge ka troa hetre thangan? Ketre mina fe, sipone jë la uati hmitrötre i Iehova jëne la thith, matre troa hetrenyi la trenge catre troa ithanata Nyidrë. (Luka 11:13) E tro epuni a hane kuca tune lai, tro fe hë epuni lai a sesëkötre la etrune la thangane la hnei epuni hna catre hnëkë hnyawa, nge tro lai a thuecatre koi epun.