1-3. (a) Nemene la aqane melëne la itre atr la itre ewekë hnei angatre hna kuca maine tha kuca pena? Ame la easa mekune hmaca lo itre ewekë ka ngazo hne së hë hna kuca ekö, nemene hë la thangane lai koi së? (b) Nemene la ini hne së hna xom qa ngöne la tulu i Paulo?

 ÖNINE la ketre atre cinyany ka hape, ame la trenge ewekë ka qajaqaja hnyawa la aliene hni ne la atr ka akötr, tre ene lo hna hape, “Maine tune ju ni la.” Celë hi trenge ewekë ne la atr ka thë fë hni, pine laka, hetre ewekë hnei hna kuca, maine tha hna kuca pena. Ewekë lai hna melëne hnene la nöjei atr asë. Ngo ame itre xa atr, tre hace hnine pala ju pë hë angatre la ewekë hnei angatre hna kuca maine tha hna kuca pena. Hapeu, ka tui nyipunieti fe hi?

² Ame la itre xa atr, hetre itre ewekë ka ngazo catre hnei angatre hna kuca. Ame itre xan, tre thatre kö angatre ka hape, ka loi jë kö la aqane axecië mekune i angatr? Nge ame pena itre xan, tre atreine hi angatre troa thëthëhmine la itre ewekë hnapane ka traqa ngöne la mele i angatr. Hetrenyi fe la itre atr ka mekune la itre ewekë hnei angatr hna kuca ekö, me qaja ka hape, ‘Maine tha kuca ju ni la ewekë cili!’ (Sal. 51:3) Nemene fe la mekuna i nyipunie? Aja i nyipunieti kö troa huliwa hnyawa koi Akötresie, me thëthëhmine la itre tria i nyipunie? Hetre atre kö hna qaja hnei Tusi Hmitrötr, nge ka hane melëne hë la ewekë cili? Hetrenyi hi, Paulo aposetolo la ëjen.

³ Hetre itre ewekë ka ngazo catre hnei Paulo hna kuca, ngo ka loi mina fe la hnei angeice hna axecië mekun. Hnei angeice fe hna pane hace hnine la itre ewekë ka ngazo hna kuca, ngo ame pe, hnei angeice fe hna inine troa mekune catrëne la huliwa i angeice koi Akötresie. Tro sa ce ithanatane la itre ini hne së hna xome qa ngöne la tulu i angeic.

4. Nemene la itre ewekë Paulo a ajane laka, epi tha kuca ju angeice ekö?

⁴ Ame ekö lo Paulo a nekö trahmanyi nge kolo petre kö a hë angeice ka hape, Saulo, tre ketre Faresaio angeic. Hetre itre ewekë hnei angeice hna kuca, nge öni angeice pë hë ka hape, epi a tha kuca ju kö angeice la itre ewekë cili. Hnei angeice hna axösisine la itretre drei Keriso. Kola qaja hnene la Tusi Hmitrötre ka hape, ame ju hi la kola ase humuthi Setefano, Saulo ha  “angazone la ekalasia, me lö kowe la nöjei uma, me hule la ite trahmanyi me fö, me ami angat’ e kalabus.” (Ite hu. 8:3) Öni Albert Barnes, ketre atr ka ini, ka hape ame la easa e hnine la Tusi Hmitrötr ka hape hnei Saulo hna “angazone” la ekalesia, tre kolo hi lai a qaja ka hape kösë lo aqane iangazo ne la “öni ka ses.” Saulo ekö la ketre atr ka catre fë la hmi angetre Iudra, nge ka xecie hnyawa e kuhu hni angeic ka hape, aja i Akötresieti troa lepe apatrene la ekalesia i Keresiano. Celë hi kepine matre angeice a axösisine jë la itre Keresiano, me thele jëne troa humuthe “la ite trahmanyi me fö.”—Ite hu. 9:1, 2; 22:4. a

5. Drei la ka sewe Paulo troa axösisine hmaca la itretre drei Iesu, me upi angeic troa nyiqaane cainöjë Keriso?

⁵ Ame hë e thupen, Paulo ha mekune troa tro Damaseko, me hul la itre Keresiano qa ngöne la itre hnalapa i angatr, me bëeke sai angatr Ierusalema eë, matre troa kootrë angatr e cili ngöne la hna kootre ka tru i angetre Iudra. Ngo hnene la He ne la ekalesia i Keresiano, ene Iesu, hna sewe angeic. (Efe. 5:23) Ame hë e kuhu jëne tro Damaseko, Iesu ha iamamanyi koi angeic, ame hna ti ju la lue meke i Saulo hnene lo ehudrume ne la lai ka xulu qa hnengödrai. Thupene jë hi lai, Iesu ha upi angeic Damaseko eë, ke kola troa hamë angeice e cili la itre xa ithuemacany. Atre hi së la aqane trongene pë hë la itre ewekë e thupen.—Ite hu. 9:3-22.

6, 7. Nemene la ka amamane laka, wange atrehmekune hi Paulo ka hape, ngazo catre la hnei angeice ekö hna kuca?

⁶ Ame ju hi la Paulo a trotrohnine laka, ngazo la hnei angeice hna kuca, tha axösisine ju hi angeice la itretre drei Keriso, ngo angeice pe a nyiqaane catre cainöjë Keriso. Ngo ame pe tha thëthëhmine kö Paulo la itre hnei angeice hna kuca. Ke hanawange la hna cinyihane hnei angeice ka hape: “Dengë hë nyipunie la thinange ekö ngöne la hmi angete Iuda laka, atraqate pala pi hë la hnenge hna thaijene la ekafesia i Akötesie, me hna aene trotro ej.” (Gal. 1:13) Hnei angeice hna hane qaja koi angetre Korinito, me angetre Filipi, me koi Timoteo mina fe la itre ewekë hnei angeice hna kuca ekö. (E jë la 1 Korinito 15:9; Fil. 3:6; 1 Tim. 1:13) Hnei Paulo hna hmahmane la itre ewekë hnei angeice hna kuca, nge tha hnei angeice kö hna wange acone la itre ewekë cili. Wange atrehmekune hnyawa hi angeice laka, ngazo catre la hnei angeice hna kuca.—Ite hu. 26:9-11.

⁷ Kola qaja hnene la ketre ka ini, ka hape, ame la easa thele troa pane mekune la aqane axösisine hnei Paulo lo itre Keresiano, tre kösë lo ketre drenge ju hi së la akötr hnei Paulo hna dreng e kuhu hni angeic, pine la ewekë hnei angeice hna kuca, nge drei jë kö ekö la kola xöjetriji angeice hnene la itre atr. Maine jë, ame la Paulo a traqa kowe lo itre ekalesia hnei angeice hna troa wang, tre ma hetre itre Keresiano e cili ka xötrei iöhnyi me Paulo, me qaja koi angeice ka hape: ‘Eö la Paulo? Eö hi lo ka axösisi hun!’—Ite hu. 9:21.

8. Nemene la thangane la hnei Iehova hna utipine me hnimi Paulo? Nemene la hna ini së hnene la tulu i Paulo?

⁸ Wange atrehmekune hi Paulo laka, ame laka, cile jë angeice troa aposetolo, tre hnene la ihnimi gufa i Akötresieti koi angeic. Ame hnine lo 14 lao tus i angeic, a 90 jë kö lao qaja Paulo la thiina i Akötresieti cili, nge pëkö hna hane mama tune lai ngöne la itre xa igötrane ne la Tusi Hmitrötr. (E jë la 1 Korinito 15:10.) Madrine catre Paulo kowe la aqane hnimi angeice hnei Akötresie, celë hi kepine matre hetre aja i angeice troa amamane la hni ne ole i angeice koi Akötresie. Qa ngöne lai, ase petre hi Paulo catre huliwa koi Akötresie, pëkö ketre aposetolo ka hane huliwa tui angeic. Nemene la hna ini së hnene la hna melëne hnei Paulo? Maine hetre lapaune së kowe la mele hna huujëne hnei Iesu, nge maine tro sa qaja amamane la itre tria hne së hna kuca, me tro trije la itre aqane ujë ka ngazo, tro hë Iehova lai a nuetrije la itre ngazo së, ngacama ka tru ju hë. Haawe, maine öni nyipunieti laka, tha ijije kö la mele hna huujëne hnei Keriso troa he la itre ngazo i nyipunie, tre meku Paulo ju hi. (E jë la 1 Timoteo 1:15, 16.) Ngacama hnei Paulo hna akötrë Iesu, ngo öni Paulo ka hape, angeice hi la hna hnime hnei Iesu, me nue mele kow. (Ite hu. 9:5: Gal. 2:20) Ngacama hetre itre ewekë hnei Paulo hna kuca ekö, ngo hnei  angeice hna inine laka, ka loi pe troa catre huliwa i Akötresie, matre casi ju hi la ewekë hnei angeice hna hace hnin.

9, 10. (a) Nemene la itre ewekë ka ahacene la hni së? (b) Pine nemene matre ngazo troa mekune lapane la itre ewekë ka ngazo hne së hna kuca ha ekö?

⁹ Hetre itre ewekë kö hnei nyipunieti hna kuca ekö, nge hnei nyipunieti pë hë enehila hna lapa fë? Maine jë, hetre itre ewekë hnei nyipunieti hna kuca ekö, ngo nyipunieti pë hë enehila a mekune ka hape, ka loi ju kö ekö tro nyipunieti a huliwane hnyawane la traeme me trenge catre i nyipunie göne la itre ewekë ka sisitria. Maine jë, hnei nyipunieti hna akötrëne la itre xa atr, maine kuca pena la itre xa ewekë, nge kolo pala pë hë a lapane la mekune i nyipunie hnene la itre ewekë cili. Hetre nyine kö lai?

¹⁰ Ame la itre xa atr, tre ka hnehengazo pala pe hi angatr! Ka hleuhleu pala hi me treije la hni angatr pine la itre ewekë ka ngazo hnei angatre hna kuca ha ekö, ngo tha patre kö qa ngöne la mekuna i angatr. Ngo hapeu, aqane tro kö së lai a nyi nyine la itre jole së? Ohea, ke aqane ujë ne la atre lai ka të hune icea ka hetre iwilen, nge ka ajane troa easenyine la laulau, ngo tha tro meköti kö kowe lai laulau, ngo emo cile ju kö e cili hune icea! Tru pe hi la trenge catre hnei angeice hna aluzine menun, ke tha enije kö angeice qa cili göhne i angeic. Haawe, the tro kö sa seseu menu, ngo tro pe sa thele la aqane troa nyi nyine la jole hne së hna cile kow. Maine hetre atr hnei nyipunieti hna akötrën, qeje menu jë koi angeic, nge thele jë troa iloi hmaca me angeic. Thele jë la kepine matre nyipunieti a tria, matre tha tro hmaca kö nyipunieti a kei kowe la ngazo cili. Maine nyipunieti pena a xeni pune la itre ewekë ka ngazo hnei nyipunieti hna kuca, haawe, inine jë troa xomihnine la itre ewekë cili, ngo the mekune lapane kö la itre ngazo hnei nyipunieti hna kuca ha ekö, ke tha celë kö lai ka troa xatua nyipunie. Tro pe la aqane ujë cili a sewe nyipunie troa huliwa hnyawa koi Akötresie.

11. (a) Nemene la nyine tro sa kuca matre tro Iehova a utipi së me hnimi së? (b) Thenge la hna qaja hnei Tusi Hmitrötr, nemene la nyine tro sa kuca matre tha tro kö a nyi zö së menu pala ha hnene la itre ngazo hne së hë hna kuca ekö?

¹¹ Ame la itre xa atr, tre öni angatre ka hape, tha  tro pë hë Akötresieti a hane utipi angatr, ke a nyimu a tria ha angatr. Angatr a mekune ka hape, ka ngazo catre pala ha la hnei angatre hna kuca, maine a nyimu ngazo pena. Ngo tha ka loi kö troa mekune tune lai, ke ngacama hetrenyi la itre tria së ekö, ngo ame la nyipi ewekë, tre ene la troa kapa ka hape, tria ha së, nge thupene lai, tro sa thele troa saze, me sipo Akötresieti troa nue la ngazo së. (Ite hu. 3:19) Tro fe Iehova a utipine la itre atr cili, tune la aqane utipine Nyidrëti la itre xa atr ka tria ekö. Tro Iehova a nuetrije la ngazo ne la atr ka ipië, me ka kapa ka hape, tria ha angeic, me ka nyipi ietra. Hnei Iehova ekö hna nuetrije la ngazo i Iobu, ke ka nyipi ietra angeic. (Iobu 42:6) Ase hë Tusi Hmitrötr qaja la nyine tro sa kuca matre tha tro kö sa nue la itre ngazo së hna kuca ekö troa nyi zö së, ngo tro pe sa nue hnei tingeting; kola qaja hnene eje ka hape: “Ame la ate juetëne la ite hnei nyëne hna shashaith, te, tha tro kö a manathith ; ngo troa hnime la ate amamane me tij’ it’ ej.” (Ite edomë 28:13; Iako. 5:14-16) Nyipi ewekë tro sa qaja amamane la itre ngazo së koi Akötresie, me sipo Nyidrëti troa nue la ngazo së, me kuca asë la hne së hna atreine matre troa amamai Nyidrëti ka hape, menu hë së. (2 Kor. 7:10, 11) Nge tro Iehova Akötresieti ka “nyipi köle tij’ asë,” a utipi së.—Is. 55:7.

12. (a) Maine kola jelengazo së hnene la mekuthethewe së, nemene la aqane tro sa xötrethenge la tulu ka loi Davita? (b) Pine nemene matre Tusi Hmitrötr a qaja ka hape hetre hnei Iehova “hna ietran”? Pine nemene matre kola ithuecatre së hnene la mekune ka sa la hnyinge celë? (Hane ju fe goeëne lo itre mekune hna eköhagen.)

¹² Ame la thith, tre celë hi ketre jëne ka loi ne tro sa sipo ixatua thei Akötresie. Kola mama ngöne la Salamo hna cinyihane hnei Davita, la lapaune i angeic kowe la Akötresieti ka sa la itre thithi angeic. (E jë la Salamo 32:1-5.) Qëmekene tro Davita a qaja amamane la itre ngazo i angeic koi Akötresie, hna huliwa la mekuthethewe i angeic, matre tha lapa hnyawa ha angeic. Angeice a hace hni, me wezipo, nge tru la kucakuca i angeic. Ngo ame ju hi la Davita a qaja amamane koi Akötresieti la itre ngazo i angeic, tre Akötresieti a kapa ju la hnei angeice hna qeje menu, ene pe uqa pi angeic. Hnei Iehova hna kapa la itre thith i Davita. Hnei Nyidrëti hna xatua Davita troa hetre madrine hmaca, me catre kuca la meköt. Haawe, maine nyipunieti a hnehengazo pine la itre ewekë ka ngazo hnei nyipunieti hna kuca, thithi jë koi Iehova me sipone koi Nyidrë troa kapa la hnei nyipunieti hna qeje menu, nge tupathe jë troa ujëne la thiina i nyipunie. Nge lapaune ju laka, ase hë Iehova drenge hnyawane la thith i nyipunie, nge hnei Nyidrëti fe hna kapa la hna qeje menu hnei nyipunie.—Sal. 86:5.

13, 14. (a) Nemene la nyine tro sa lapa mekune hnyawa enehila? (b) Nemene la itre nyine troa isa hnyingëne thel, matre tro sa lapa mekune la itre hne së hna kuca enehila?

¹³ Nyipici laka, ijije hi tro sa xomi ini qa ngöne la itre ewekë ka traqa ha ekö, ngo ngazo e tro pala pë hë së a hnehengazone la itre ewekë cili. Mekune ju hi së la drai enehila me itre drai ka troa xulu. Hnyinge jë ka hape, ‘Maine tro ni a xomi mekune enehila, nge ame hë elany thupene  la itre xa macatre, eni hmaca mekune la aqane axecië mekune hneng, hapeu, tro kö ni a hace hnin? Tro kö ni a qaja ka hape, maine kuca ju ni tune la, ke tha tro kö ni a traqa kowe la ewekë celë? Eni kö a catre huliwa i Akötresie, matre pëkö hnenge hna troa hace hnin elany?’

¹⁴ Easenyi catre hë troa traqa lo akötr atraqatr. Loi e tro sa isa hnyinge ka hape: ‘Hapeu, ijijinge pala kö troa kuca la itre xa huliwa koi Akötresie? Ijijinge kö troa pionie? Nemene la ka sewe ni troa drikona? Eni kö a kuca asë la hnenge hna atrein, matre troa xetrëne lo atr ka hnyipixe? Pi tro fe kö Iehova elany a hane kepe ni ngöne la fene ka hnyipixe?’ The mekune hmaca kö lo itre hnei nyipunieti hna tha kuca, mekune ju pe la hnei nyipunieti hna kuca enehila, nge tupathe jë troa kuca asë la hnei nyipunieti hna atreine ngöne la huliwa i Iehova. Wange hnyawane ju la aqane axecië mekune së enehila, matre tha tro kö nyipunieti a hace hnin hmaca la itre xa ewekë elany.—2 Tim. 2:15.

15, 16. (a) Nemene la itre ewekë hna nue hnene la itre xan, matre aijijë angatre jë troa catre huliwa i Iehova? (b) Pine nemene matre tha tro pi kö sa hace hnin la itre ewekë hne së hna nu, pi Iehova?

¹⁵ Hapeu hetre itre ewekë kö hnei nyipunieti hna tro trij, matre troa huliwa i Iehova ngöne la drai ka pexej? Maine jë, hnei nyipunieti hna nue la ketre huliwa ka loi, matre troa huliwa i Iehova. Maine pena, tha hane pë hë nyipunieti faipoipo, maine hnaho, ke nyipunieti a ajane troa hane huliwa ngöne la Bethela, maine sine la huliwa ne xupi uma ne baselaia e cailo fen, maine troa iwai trootro, maine mesinare pena. Hapeue hë enehila thupene la itre macatre ka nyimutre, nyipunieti kö a hace hnin la aqane axecië mekune i nyipunie? Ame itre xa ijin, tro nyipunieti a hace hnin laka, ma tha nyipi ewekë kö ekö troa nue lo itre ewekë hnei nyipunieti hna tro trij. Maine pena nyipunieti a mekune ka hape, epi a canga xome ju hi ni ekö la huliwa celë! Ngo the tro kö nyipunieti a mekune tune lai.

¹⁶ Hnei nyipunieti hna axeciëne la itre mekune cili, pine laka hnimi Iehova catre nyipunie, nge pi tro mina fe nyipunieti a xatuane la itre atr troa nyi hlue i Nyidrë. The tro kö a mekune ka hape, ma loi ju kö ekö e tha kuca kö nyipunieti la itre huliwa cili. Madrine jë pe, ke lolo la aqane axecië mekune i nyipunie! Hnei nyipunieti hna iëne la aqane troa nyi hlue i Iehova hnyawa. Tha tro jë pi kö Iehova lai a thëthëhmine la aqane nue nyipunieti la itre xa ewekë, pi Nyidrë. Maine tro nyipunieti elany a traqa kowe “la nyipi mel,” ene la mele ka tha ase palua kö me ka pexej, drei jë kö elany la aqane tro Iehova a amanathithi nyipunie!—1 Tim. 6:19; Sal. 145:16.

17, 18. (a) Nemene la hnei Paulo hna kuca matre pë hmaca kö hnei angeic hna troa hace hnin ngöne la mele i angeic e thupen? (b) Tro nyipunieti a xötrethenge tune kaa la tulu i Paulo?

¹⁷ Nemene la hnei Paulo hna kuca, matre pë hmaca kö hnei angeic hna troa hace hnin ngöne la mele i angeic e thupen? Tha hnei Paulo hmaca kö hna mekune la itre ewekë hnapane hnei angeice hna kuca ekö, ngo hnei angeice pe hna catre huliwa matre tro fe angeic a hane kapa la thupene hna hë angeice kow. (E jë la Filipi 3:13, 14.) Tha hnei Paulo kö hna lapa mekune la itre ewekë ka ngazo hnei angeic hna kuca ngöne lo angeic e hnine la hmi angetre Iudra. Ngo hnei angeice pe hna nue asë la hnei angeice hna atrein, me catre huliwa matre troa kapa la mele ka tha ase palua kö.

¹⁸ Nemene la ini hne së hna kapa, qa ngöne la hna qaja hnei Paulo? Tha tro kö sa mekune lapane la itre ewekë hnapan, ke thatreine hmaca kö tro së lai a saze; mekune jë pe së la itre nyine tro sa kuca enehila, matre tro fe sa hane kapa la itre manathithi elany. Maine nyipici laka, thatreine kö tro sa thëthëhmine la itre ngazo hne së hna kuca, ngo ame pe, tha nyipi ewekë kö tro sa nue itre eje troa nyi zö së lapa. The tro kö sa hnehengazone la itre ewekë hnapan, ngo catre jë pe së huliwa koi Akötresie, me mekune la mele ka mingöminge elany!