AME ngöne la itre hnepe macatre ka ase hë, lolo catre la mele i Roald me Elisabeth, lue trefëne ka fotre lao macatren ka mele e Bergen, lo hnaaluene traone ka tru ne Norvège. Nyidroti me lue nekö i nyidro, Isabel, la nekö jajiny, nge Fabian, la nekö trahmany a ce huliwa ngöne la ekalesia. Qatre thupe Roald, nge pionie Elisabeth, nge ame Isabel me Fabian lue ka cainöje hë.

Ngo ame lo true Semitrepa macatre 2009, mekune jë hi angatre troa kuca la ketre pengöne aqane tro fë huliwa, ene la troa cainöje koi ca wiik, ngöne la ketre götrane nöje ka lapa cas. Haawe, Roald me Elisabeth me Fabian ka 18 lao macatre a tro ju kowe la ketre hnapet hna hape Nordkyn, ngöne la götrane kolopi pune catre ne Norvège, itre götrane nöje ne Finnmark, ka lapa e koho hune lo hna hape Cercle polaire arctique. Ame e cili, ngöne la traone ne Kjøllefjord, hnei angatre hna ce cainöje trootro memine la itre xaa trejine me angatr ka traqa fe troa hane cainöje ngöne la götrane cili. Öni Roald: “Ame ngöne la kola nyiqaane la wiike cili, madrine catre ni laka hnenge hë hna hnëkëne amë la itre huliwange matre ijijing troa cainöje ngöne la wiike ka pexej.” Ngo ame hë ngöne la pune la wiike cili, ke, nango luelue hë Roald. Hnei nemene jë?

Öni Roald: “Sesëkötre ju hi ni la Mario, ketre pionie e cili e Finnmark a sipo nyiho maine ijije troa mejë kowe la ketre traone hna hape Lakselv, matre troa xatuane e cili la ekalesia ka 23 lao ka cainöj.” Asesëkötrë Roald ju hi hnene lai hna sipo cili. Öni angeic: “Hnenge hë me Elisabeth hna mekune troa huliwa ngöne la ketre götrane gaa aja ixatua atruny, ngo loi e pane isa tru jë me tro jë la lue nekö i nyiho qa ngöne la hnalapa.” Ngo ame ngöne la itre hnepe drai ne cainöje Roald ngöne lai götrane cili ka lapa cas, öhne ju hi angeice la etrune la aja ne la itre atr troa atre Iehova. Nge enehila hi la angatr a aja ixatua, ngo tha elanyi kö. Öni angeice hmaca jë hi e mekune me hape: “Hna huliwane la hnyinge hnene la mekune cili, nge jole hë la mekuthetheweng; nge tha meköle hë ni e jidr. Haawe, ame hë thupen, tro sai Roald jë hë me hnepe lapa i angeic hnei Mario a tro Lakselv, 240 km qaa Kjøllefjord, ngöne la götrane kolojë. Aja i Mario tro kö la itre atr hnei angeice hna tro fë a sipu wange la nekö i ekalesia e cili.

Traqa ha e Lakselv, hna tro sai angatre hnei Andreas, ketre e nyidro lue qatre thupe e cili, troa ihamë ngöne la traone e cili me Uma Ne Baselaia. Keukawa catre la aqane kepe angatre hnene la ekalesia, nge angatre a qaja koi Roald me Elisabeth ka hape, aja i angatre catre tro la hnepe lapa i nyidro a traqa ne lapa e cili göi troa ixatua ne cainöj. Kola dredrehnyima hnei Andreas me qaja ka hape, ase fe hë angeice hnëkëne la huliwa i Roald me Fabian! Nemene ju hë la hna kuca hnene la itre ka traqa ne iwai?

Ame la hna pane qaja hnei Fabian, tre: “Tha ajange kö troa lapa e celë.” Thatreine kö angeice mekun ka hape, tro angeice a nue la itre sinee i angeic hna ce tru memin ngöne la ekalesia, me tro kowe la neköi traone ka co. Ketre mina, tha fenesi pala kö angeice inine huliwa tirisite. Ngo, ame pena ha la kola hnyingë Isabel (ka 21 lao macatre) la hnei angeice hna mekune göi troa fek, sa jë hi angeice me hape: “Celë pala hi hnenge hna ajane troa kuca!” Ngo ase jë hi, öni Isabel hmaca jë: “Ngo mekune ju pë hë ni, nge öninge jë hi ka hape, ‘Ka loi jë kö la mekune celë’? Tro jë kö ni lai a mekune la itre sineng? Hnauëne laka tha lapa hi ni ngöne la ekalesiang, nge ka loi hi la meleng?’ ” Nemene fe la hna mekune hnei Elisabeth thupene la hna ihë? Öni angeic: “Drenge ju hi ni laka, hnëqa huni hi la qaathei Iehova, eni me hnepe lapang, ngo ame pe eni fe a hane mekune la aqane kuca hnyawa hun la uma me itre ewekë hne huni hna xomi alien ngöne la 25 lao macatre ka ase hë.”

Ase jë hi la wiike ka ketre pengön, bëeke hmaca jë hë Roald me hnepe lapa i angeic a tro Bergen, ngo thatreine kö tro angatr a thëthëhmine la itre trejine Keresiano ne Lakselv, 2 100 km la enanyin. Öni Elisabeth: “Hnenge hna anyimua thithi koi Iehova, nge hnenge pala hi hna cinyanyi koi angatr, nge hne huni hna iupi fë fotokeu me icinyanyikeu göi troa iqajakeune la itre ewekë hne huni hna isa melën.” Öni Roald: “Loi e troa pane nue ijine koi ni troa mekune hnyawa ka hape, eje kö laka tro hë ni a tro. Ketre, loi e tro ni a wange ka hape, ijijinge jë kö troa eatrëne la mekune cili. Tro huni a mele tune kaa elanyi e cili? Hnenge hna thithi fë catrëne koi Iehova me ithanatane me hnepe lapang, memine la itre trejine ka atrepengön.” Öni Fabian e mekune hmaca: “Mekune ju pë hë ni la ewekë cili, nge eni a wange hnyawa ka hape, pëkö sipu kepine e tro ni a thipetrije la ewekë cili. Eni pala hi a catre thithi ekö koi Iehova, nge kolo pala hi a tru trootro la trenge ajange troa feke kowe lai götrane ka mama koi ni.” Nge tune kaa Isabel? Hnei angeice hna sipu hnëkë angeic, ene la hna pane xome la huliwa ne pionie ngöne la sipu traone i angatr. Thupene hë la sikisi lao treu ne pionie angeic, me catre ini Tusi Hmitrötr, drenge hë angeice laka, ijije hë tro angeic a fek.

Hnene laka kolo pala hi a kökötre catre la aja i angatre troa huliwa ngöne la götrane gaa aja ixatua göi troa cainöj, ame hna isa thele jëne hnene la hnepe lapa troa eatrëne la aja i angatr. Ka tru la trenge mani hna kapa Roald qa ngöne la hnei angeice hna huliwa, ngo hnei angeice hna sipo troa pane mano koi ca macatre. Ame pe, hnene la maseta i angeic hna sipone tro kö angeic a huliwa, ene la troa huliwa koi lue wiik, nge sikisi lao wiike ne mano. Öni Roald: “Ngacama uti catre hë la thupeng, ngo pëkö ejolen.”

Öni Elisabeth: “Hnei föi eni hna sipo ni troa thele uma e Lakselv, me thele atr troa lapane göi thupen, la uma huni e Bergen. Ngacama itre traeme ka nyimutre me trenge catre hnenge hna xome matre eatrëne jë la itre mekune cili, ngo ame pe hune hë ni.” Öni angeice fe: “Ame fe lue nekö i nyiho e thupen, isa hetre huliwa i nyidroti hë, kola isa huliwa sine drai, nge nyidroti a xatua nyiho göi mani troa nyithupene xen, me itre ejolene gojeny.”

Öni Isabel: “Pine laka, neköi ka co la traone hne huni hna troa mele ngön, ame la ewekë ka jole koi ni, tre ene la troa öhne la ketre huliwa ka troa aijijë ni troa xome la hnëqa ne pionie. Ame itre xa ijin, eni ha nango luelu.” Ngo ame pe, ame la Isabel a xome la naene lao nekö i huliwa ka sine drai ngöne la pane macatre, pë ju kö ejolene e tro angeice a nyithupene la itre nyipi ewekë thatraqane la mele i angeic. Nge tune kaa fe Fabian? Öni angeic: “Tro ni a afenesine  la ining ngöne la ketre hna huliwa ne kuci tirisite. Hnenge hë hna ini huliwa tune lai e Lakselv. E thupene hë, ie hë la hnenge hna ini, nge eni fe hë a hane huliwa sine drai ngöne la ketre hna kuci tirisite.”

Hnei Marelius me föi angeic, Kesia, hna ajane fe troa huliwa ngöne la itre götrane gaa aja ka cainöje trootro. Öni Marelius, thupëtresij ka 29 lao macatren enehila: “Hnene la itre cainöj me itre mekune hna ithawakeune ngöne la itre ijine asabele göi troa pionie hna amejëne la mekunange troa wange hnyawa la aqane tro ni a akökötrene la aqane tro fë la huliwa ne cainöje trootro.” Ngo ame koi Kesia, föe ka 26 lao macatren enehila, jole catre koi angeice troa iananyi memine la hnepe lapa i angeic. Öni angeic: “Kola ngazo la hninge e tro ni a mekune ka hape, tro hë ni a iananyi memine la itre atr hnenge hna hnim.” Ketre mina, ka huliwa Marelius ngöne la drai ka pexej göi troa nyithupene la uma i nyidro. Öni angeic: “Jëne la ixatua i Iehova, me itre thithi nyiho ka nyimutre koi Nyidrë göi troa saze la aqane mele i nyiho, ijiji nyiho hë troa fek kowe la hnei nyiho hna mekune troa tro kow.” Ame la hnei nyidro hna pane kuca, tre, ene la troa xome la itre traeme ka nyimutre troa inine la Tusi Hmitrötr. Thupene jë hi lai, nyidroti a salemëne ju la hnalapa i nyidro, me nue la huliwa i nyidro, nge ame lo treu Ogas macatre 2011, nyidroti hi lai a mejë kowe la traone e Alta, ngöne la götrane kolo pi ne Norvège. Nge ame e cili, Marelius a huliwa comptabilité, nge Kesia a cilë magazë, göi tro nyidroti a pionie, nge hetre manie i nyidro thatraqane la mele i nyidro.

Hna ketri Knut me Lisbeth, lue trefën ka 30 lao macatren, hnene la itus Annuaire, lo kola qaja la itre ewekë hna melëne hnene la itre ka huliwa ngöne la itre götrane gaa aja ka cainöje trootro. Öni Lisbeth: “Hnene la itre hna melëne cili hna huliwane la mekuna i nyiho troa hane tro kowe la ketre nöje trenyiwa, ngo hnenge hna pane luelu, ke, eni a mekune ka hape, ame la huliwa cili, tre, thatreine kö la itre atr ka tunge troa hane kuca.” Ngo ame pe, hnei nyidroti hna thele jëne troa eatrëne la mekuna i nyidro. Öni Knut: “Nyiho pë hë a salemëne jë la hnalapa i nyiho, nge hnei nyiho hna ami mani, nge nyiho pë hë a tro jë troa pane lapa thene la thineng. E thupene hë, hnei nyiho hna fek troa ce huliwa memine la ketre ekalesia ka qene papale e Bergen koi ca macatre, nge hnei nyiho hna lapa thene la thine i Lisbeth. Aqane huliwa i nyiho hi lai matre hnëkë nyiho troa cainöje ngöne la ketre nöje trenyiwa.” Tha qea ju kö thupene lai, nge kolo ha feke hnei Knut me Lisbeth kowe la ketre nöje gaa nanyi catr, Uganda la ëjen. Nge e nöjei macatre, lue treu ne huliwa i maseta nyidro e Norvège matre hetre manie ne tro nyidroti a mele e Uganda, nge matre ijiji nyidroti troa cainöje e drai ka pexej ngöne la munëne la macatre.

Nemene ju hë la ewekë ka traqa kowe la itre ka saene celë? Öni Roald: “Tru ju kö la traeme hnene la hnepe lapa huni hna ce huliwa ngöne la götrane ka lapa casi cili hune e Bergen. Catre hnyawa la aqane imelekeu ne la hnepe lapa hun. Ketre manathithi ka tru la nyiho a wange la kola kökötre hnyawa la lue nekö i nyiho ngöne la ua.” Öni angeice fe: “Ketre, co hë koi nyiho la itre mo. Tha sisitria catre hmaca kö itre eje tune lo aqane waiewekë i nyiho ekö.”

Öhne hë Elisabeth ka hape, nyipi ewekë troa inine la ketre qene hlapa. Pine nemen? Ame la ketre neköi traon hna hape, Karasjok, tre, eje fe e hnine la götrane hna cainöje kow  hnene la ekalesia ne Lakselv, nge ka lapa nyipine la itre ka qaja la qene Sami, qene hlapa lai hna ithanatane hnene la itre sipu atrene la götrane kolopi ne Norvège me Suède me Finlande, me Russie. Celë hi matre, mekune jë Elisabeth troa inine la qene Sami matre ijiji angeice troa ketr la itre sipu atrene la nöje cili. Ame hë enehila, ijiji angeice hë troa nango porotrike memine la itre ka ithanatane la qene hlapa cili. Hapeu, hetre madrine i angeice kö ngöne la götrane hnei angeice hna cainöje ka hnyipixe? Tru catre la madrine i angeice troa qaja ka hape: “Sikisi lao atr hnenge hna ini Tusi Hmitrötre memin. E celë hi la götrane hnenge hna pi mele ngön, nge tha e ketre götrane kö!”

Öni Fabian, pionie nge drikona enehila, ka hape, köni thöth hnei angeice me Isabel hna xatuan ngöne la ekalesia i nyidro ka hnyipixe, itre thöthi lai ka aja ithuecatre matre tro fe angatre a hane ce huliwa memine la ekalesia. Ka tru catre hë enehila la huliwa ne la köni thöthi cili ngöne la hna cainöje trootro. Lue hna bapataisone hë, nge ka xome la huliwa ne pionie ka ixatua lo treu Maac 2012. Hnene la ala cas qaathene lo itre thöth hna olene koi Fabian me Isabel la hnei nyidro hna “thuecatre koi angeic hmaca.” Öni Fabian: “Hna ketri ni hnyawa hnene la hnei angeice hna qaja. Ketre madrine ka tru la tro sa xatuane la ketre atr!” Öni Isabel: “Ame ngöne la hnëqa cili, hnenge hnyawa ha hna ‘drem, nge atre hë ni laka Atre ihnimi Iehova.’ ” (Sal. 34:8) Öni angeice jë fe: “Pëkö ketre madrine ka tru hune la troa huliwa e celë!”

Ame hë enehila, ngacama hnei Marelius me Kesia hna ahmaloeëne la mele i nyidro, ngo mele ka sisitria pe. Ame la ekalesia ne Alta hnei nyidro hna tro kow, tre, ala 41 hë enehila la etrune la itretre cainöj. Öni Marelius: “Ame la eni a mekune hmaca lo meleng ekö, ketre ithuecatre ka tru koi ni la eni a wange la aqane saze la mele i nyiho. Nyiho a olene koi Iehova la hnei Nyidrë hna aijijë nyiho troa pionie e celë. Pë ju kö ketre ewekë ka tru hune la.” Öni Kesia hmaca jë hi: “Hnenge hna inine troa nue apexejeni ni koi Iehova, nge hnei Nyidrëti hna thupë nyiho. Hnenge mina fe hna öhne laka, ame la kola mele ananyine la hnepe lapa së, tre, kola xatua ni troa acatrene catrën la aqane imelekeunge memine la föeng. Tha ase kö ni ietrane la mekune hnei nyiho hna ce xom.”

Matre nemene la aqane kuca i Knut me Lisbeth e Uganda? Öni Knut e qeje pengöne ka hape: “Tru catre la traeme hnenge hna xome matre tro ni a majeme kowe la itre götrane me aqane mele e celë. Kola qaja göi ejolene la tim, me tirisite, me akötre hni; itre ewekë lai laka traqa pi matre patre hmaca ju, ngo ame pe la eloin, tru hnei atr hnei nyiho hna ini Tusi Hmitrötre memin!” Öni Lisbeth: “Tha sine hawa ju kö qaa lai hnei nyiho hna lapa, nge traqa ha kowe la itre götrane tha hna ketr pala kö hnene la maca ka loi. Ngo ame pe la nyiho a traqa kowe la itre atr e cili, angatr a e la Tusi Hmitrötr, nge angatre fe a sipo nyiho matre troa ce inine me angatr. Hane petre hi lai ketre madrine atraqatre e troa ce inine la Tusi Hmitrötre memine la itre atr ka hni ka ipië ka tune lai!”

Drei jë kö lo madrine ne la Atre Weje Mekene la huliwa së, ene Iesu Keriso, la nyidrëti a goeëne qaa hnengödrai la aqane tro fë së la maca ngöne la nöjei pengöne götrane la fen, lo huliwa laka nyidrëti hi la qaan ekö! Eje hi, ame kowe la nöjei hlue i Akötresie, ketre madrine ka tru e kuhu hni angatr la troa sipu saene troa eatrëne lo hna ahnithe hnei Iesu koi angatre troa “inine la nöjei nöj’ asëjëihë.”—Mat. 28:19, 20.