Hetre Madrine i Epuni Kö Qa Ngöne La Itre Ewekë Ne La Ua, Edrö i Epun?
Hetre Madrine i Epuni Kö Qa Ngöne La Itre Ewekë Ne La Ua, Edrö i Epun?
“Hnei Akötesieti hna pane xöji angete ethen, troa xome qa thei angate la nöje thatraqane la atesiwa i nyidë.”—ITE HU. 15:14.
TRO NYIPUNIETI A SA TUNE KAA?
Nemene la itre ini ka thoi hna mejiune kow hnene la itre atr? Hna thupë së tune kaa qa ngöne la hne së thipetriji la itre ini ka thoi cili?
Hna thepe së tune kaa qa ngöne la ngazo me mec?
Tune kaa la mekuna i epuni göne la musi cile i Iehova? Tune kaa la mekuna i epuni göi troa mele nyipici koi Iehova?
1, 2. (a) Nemene la aliene lai hna hape, “uma ne hunuma i Davita”? Nge kola hapeue lai hna hape tro hmaca ha a xupe eje? (b) Drei la angetre ce nyi hlue i Iehova enehila?
AME ngöne la ketre icasikeu ne la lapa ne xomi meköti e Ierusalema lo macatre 49 thupei Keriso, Öni Iakobo: “Ase hë Simona amamane la hnei Akötesieti hna pane xöji angete ethen, troa xome qa thei angate la nöje thatraqane la atesiwa i nyidë. Nge casa hi lai memine la tenge ewekë i ange perofeta ; tune lo hna cinyihan, ka hape, ‘Thupene la ite ewekë cili tro ni a hmaca, nge tro ni a xejë la uma ne heta i Davita ka kei ; me xupe hmaca la ite hnepe ga ethite ne eje me acil ; mate troa thele la Joxu hnene la ite thelene la nöjei ate, me nöjei etheni asë, lo ite hna ati ëjene qa ngöne la ëjeng, öni Joxu, ate amamane la nöjei ewekë cili qan’ ekö qa.’ Ate hmekune kö Akötesie la nöjei huliwa i nyidëti asëjëihë qan’ ekö qa.”—Ite hu. 15:13-18.
2 Ame la “uma ne hunuma i Davita,” tre, kola qaja la itre joxu ka xulu qa ngöne la lapa i Davita. Hnene eje hna “kei” lo kola ukapiëne triji Zedekia, joxu tixenuë ne Iuda. (Amosa 9:11) Ngo önine la hna perofetane celë ka hape, tro Akötresieti a “xupe hmaca eje.” Kola hape tro hmaca lai a hetre ketre joxu, ene Iesu matra i Davita. (Ezek. 21:27; Ite hu. 2:29-36) Hnei Iakobo hna amamane ka hape, hnene la hna perofetane celë hna thingehaeane laka, tro fe a hane hetre hna iëne qaathei angetre Iuda me angetre Ethen matre troa ce joxu me Iesu e hnengödrai. Ame enehila, itre hna iën, me itre milio lao itre “xa mamoe” i Iesu a ce cainöjëne la nyipici.—Ioane 10:16.
HNA APONYI ANGETRE IUDA
3, 4. Nemene la ka xatuane la angetre Iudra e Babulona troa lapa qale koi Iehova?
3 Ame la kola aponyi angetre Iudra e Babulona, ke, mama pi hi ka hape, kei hë la “uma ne hunuma i Davita.” Nyimutre catre la itre hmi thoi ne la angetre Babulona. Haawe, nemene jë la aqane cile catrene la lapaune ne la nöje i Akötresie ngöne la 70 lao macatre ne angatre ekö e Babulona? Hnei angatre hna cile catre tune la aqane cile catrene la lapaune ne la nöje i Iehova enehila ngöne la fene i Satana. (1 Ioane 5:19) Hetre edrö ka ketre pengöne kö ka xatuane la itre hlue i Iehova troa cile catre ngöne la lapaun.
4 Hetrenyi hë së enehila la Tusi Hmitrötre ka pexej, hane hi lai ketre götranen la edrö së. Pë petre kö ekö thene la angetre Iudra e Babulona la Tusi Hmitrötre ka pexej. Ngo atre hë angatre la Trenge Wathebo i Mose cememine lo Treen Lao Wathebo. Nge atre fe hë angatre la itre “nyima ne Ziona” me wenge edromë. Nge hetre atr hnei angatre hna atre ekö ka nyi hlue nyipici koi Iehova. Hnene la itretre Iudra hna treij, ke, angatre a pi bëeke hmaca kowe la zi angatr, nge thatreine kö angatre thëthëhmi Iehova. (E jë la Salamo 137:1-6.) Hnene la nöjei ewekë cili hna xatua angatre troa lapa qale koi Iehova, ngacama angatre a lapa nyipine la itre ini me huliwa ka thoi ne la angetre Babulona.
THA INI KA HNYIPIXE KÖ LA TIRINITE
5. Drei lai itre haze ka tirinite hna mejiune kow hnei angetre Babulona me Aigupito?
5 Itre haze ka tirinite la hna atrune ekö, kola hape, hna acasine la haze ka könitre. Hane hi la ketre ceitun, ame la ketre haze ka könitre hna atrune hnene la angetre Babulona, tre, kolo haze ne la treu, me haze ne la jö, me haze föe ne troa hnaho atrun, me isi. Ame fe angetre Aigupito, angatre a thili kowe la itre haze ka könitre qa ngöne la ca lapa, ene kem, me thin, me nekön. Ngacama ka tirinite la haze cili, ngo tha hna wange kö ka hape casi hi la etru i angatr. Ame la ketre tirinite ne Aigupito, tre, Osiris, me Isis haze föe, me Horus nekö i nyidro.
6. Nemene la Tirinite, nge pine nemene matre tha mejiune kö la nöje i Iehova kowe la ini cili?
6 Ame la Tirinite, maine Akötresie la Tretretro, me Akötresieti la Hupuna, me Akötresieti la uati hmitrötre, tre, ini hna hamëne hnene la itre hmi ka sipu selëne ka hape itre Keresiano angatr. Ngo ame la ini cili, tha mama ha ka hape, ame Iehova, tre, ka pucatin asë, pine laka hna ce thawa ha la etru i Nyidrë. Tha hna ketr kö la nöje i Iehova hnene la ini ka thoi celë. Hne së lo hna inine ka hape, ame “Iehova Akötesi shë, te, Iehova ka cas.” (Deu. 6:4) Hna amexeje hmaca la trenge ithanata celë hnei Iesu, nge itre nyipi Keresiano a mejiune kowe la itre hnei nyidrëti hna qaja.—Mar. 12:29.
7. Nemene la pengö i Akötresie nyine troa mejiune kow hnene la atr ka xomi bapataiso matre Keresiano pi?
7 Hnei Iesu hna qaja kowe la itretre drei nyidrë ka hape: “Trojë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me [u]ati [h]mitöt.” (Mat. 28:19) Kola hape ame la atr ka ajane troa xome la bapataiso matre Keresiano pi me Atre Anyipici Iehova jë, tre, nyipi ewekë tro angeice a mejiune ka hape, Iehova la Tretretro, atre musi hui Iesu, nge Iesu la Nekö i Akötresie, atre traqa kowe la fene nyine thupene mele së. Tha tro kö la atre cili a mekune ka hape, ame la uati hmitrötr, tre, ketre götranene la Tirinite. Ngo trenge catre i Akötresieti pe. (Gen. 1:2) Ketre götranene la edrö së la tro sa atre ka hape ame la Tirinite, tre, ini ka ahleuhleunyi Akötresie nge ka thoi.
KUCI HAZE
8. Nemene la hna mekune hnene la angetre Babulona göi itre haze me itre dremoni?
8 Tha hna lapaune hmekuje kö hnene la angetre Babulona ekö kowe la itre haze i angatr, ngo angatre a lapaune fe kowe la itre dremoni me kuci haze. Hnene la ketre itus (The International Standard Bible Encyclopaedia) hna qaja ka hape, hna mekune hnene la angetre Babulona laka, atreine hi tro la itre dremoni a angazone la itre atr. Hnene la itre atr hna thithi kowe la itre haze i angatre me sipone troa thupën, wanga angazo angatre pi hnene la itre dremoni.
9. (a) Hnei nemene matre hetrenyi thene la angetre Iudra la itre ini ka tria? (b) Hna thupë së tune kaa qa ngöne la itre ethanyine la kuci haze?
9 Ame lo angetre Iudra petre kö ekö e Babulona, hnei angatre hna inine la itre mekune ka tria. Thupene hë, ala nyimu la angetre Iudra, ka mejiune kowe la itre ini ne la angetre Heleni ka hape, hetre dremoni fe ka lolo. Ngo hnei Akötresieti pe hna qaja koi së ka hape, ame la kuci haze, maine tro pena a thele troa ithanata me itre dremoni, tre ka ngazo nge hna mecin. Ame la nyipici cili, tre, ketre götranene fe hi la edrö së lai ka ketre pengöne kö. (Is. 47:1, 12-15) Haawe pëkö ethanyine koi së pine laka hne së hna thipetrije la kuci haze tune la aqane amekötine Iehova koi së.—E jë la Deuteronomi 18:10-12; Hna Amamane 21:8.
10. Nemene la nyine tro sa qaja göne la itre huliwa me ini i Babulona Atraqatr?
10 Ketre tune mina fe, ala nyimu la itre atr e hnine la itre hmi thoi ka kuci haze, tune lo itre atr ekö e Babulona. Celë hi matre Tusi Hmitrötre a hëne la itre hmi ka thoi asë e cailo fen ka hape, Babulona Atraqatr. (Hna ama. 18:21-24) Ame la itre hmi ka thoi cili, tre, ka tune lo itre hmi ekö e Babulona, ke, iwane la itre ini ka tria me itre huliwa ka ngazo. Pine la kuci haze, me idrola, me itre xa ngazo ju kö, easenyi catre hë matre apatrene triji Babulona Atraqatre pi.—E jë la Hna Amamane 18:1-5.
11. Nemene la itre ithuemacanyi ka eje hnine la itre itusi së göi kuci haze?
11 Öni Iehova, “tha ajane kö ni” la kuci haze. (Is. 1:13, MN) Ame lo itre macatre 1800, tru hnei atr ka kuci haze. Celë hi matre hnene la Ita Ne Thup Ne Ziona (qene Papale) ne lo treu Mei 1885 hna ithanatane la pengöne cili. Kola qaja ka hape, hnene la itre hmi ekö hna inine ka hape, ame la atr a mec, tre, hetre ketre mele i angeice kö, nge ame la itre ifejicatre me itre qene nöje ne la nöjei nöje asë, tre, hna nyi trepene itre eje hune la mekune ka hape, itre ka mec a mele ngöne la ketre nöje kö, zi angatr. Kolo fe a qaja ka hape, ame la itre dremoni, tre, kösë angatr a nyi u ne ka mec ka thele troa iamamanyi kowe la itre ka mel, me löthe la itre mekune me itre huliwa ne la ka ala nyim. Hetrenyi la itre xa ithuemacanyi ka tune lai hna hamëne hnene lo pane sine boroshüre hna hape, “Nemene La Hna Qaja Hnei Tusi Hmitrötre Göi Kuci Haze (qene Papale)?,” me e hnine fe la itre xa itusi së ka hnyipixe.
KOLO KÖ A AKÖTRE HNENE LA ITRE KA MEC NGÖNE LA ZI ANGATR?
12. Nemene la hnei Solomona hna qaja göi itre ka mec?
12 Ame asë hi la itre ka “hane ate la nyipici,” tre, atre hnyawa hi angatre ka hape, tha drei akötre hmaca kö la itre ka mec. (2 Ioane 1) Hnei Solomona hna qaja la pengöi itre ka lapa ngöne la “hua.” “Loi la vailai ka mele hune la liona ka mec. Ke ate hë la ite ka mele laka tro angat’ a mec ; ngo tha ’te kö la kete ewekë hnei ite ka meci hë . . . Ame la hna öhne hnei lue iwanakoime i ’ö troa kuca, te, kucajë eö hnene la egöcate i ’ö ; ke pëkö huliwa, me mekun, me wangate hmekun, me inamacan, ngöne la hua eö a tro kow.”—Ate cai. 9:4, 5, 10.
13. Nemene la ini hna kapa hnene la angetre Iudra qa ngöne la hmi me qene nöje ne la angetre Heleni?
13 Hnei Iehova hna qaja kowe la itretre Iuda la nyipici göi itre ka mec. Ngo ame la angetre Heleni a mus hui Iuda me Suria, hnei angatre hna traqa fë la hmi me qene nöje i angatr. Thupene jë hi lai, angetre Iudra fe hë a mejiune ka hape, hetre ketre götrane ne la atr ka tha mama kö, nge ka tro pe kö a mele thupene la hna mec. Angatr a mekune ka hape, ame lai götrane ka tha mama kö ne la atr, tre, ka tro pë hë kowe la zi ne la itre ka mec, nge e cili troa axösisi angatr. Tha angetre Heleni kö la itre ka pane mejiune kowe la ketre götrane gaa iaxösisi. Önine la itusi ka qaja la itre hmi ekö (The Religion of Babylonia and Assyria) ka hape, ame la mejiune ka eje thei angetre Babulona, tre, hetre ketre götrane hna mele ngön hnene la itre haze ka catr me itre dremoni ka iaxösisi. Eje hi laka, ame thei angetre Babulona, hetre ketre götrane ne la atr ka tro pe kö a mele thupene la hna mec.
14. Nemene la hna atre hnei Iobu me Aberahama göi mec me melehmaca?
14 Ngacama patre petre kö la Tusi Hmitrötre thei Iobu, ngo atre hnyawa hi angeice la pengöne la atr ka mec. Ketre atre mina fe hi angeic ka hape, maine tro angeic a mec, tro Iehova Akötresi angeic ka tru ihnimin a canga ajane troa amele angeice hmaca. (Iobu 14:13-15) Aberahama mina fe la ketre atr ka mejiune kowe la melehmaca. (E jë la Heberu 11:17-19.) Eje hi laka, tha ka mejiune fe kö la lue atr celë kowe la ketre götrane hnë mele ngön hnene la itre ka mec. Thatreine jë pi kö troa amelene hmaca la ketre atr e tha ka meci kö. Hnene la ua i Akötresie hna xatua Iobu me Aberahama troa lapaune kowe la melehmaca. Ame la itre nyipici cili, tre, ketre götranene hi lo edrö së lai.
NYIPI EWEKË KOI SË LA “HNA ITÖ MELE”
15, 16. Hna thepe së tune kaa qa ngöne la ngazo me mec?
15 Tro sa olene koi Akötresie la hnei Nyidrëti fe hna qaja koi së la aqane thepe së hnei Nyidrë qa ngöne la ngazo me mec. (Rom. 5:12) Atre hi së lo laka, “tha traqa kö la Nekö i ate [Iesu] troa hete hlue i angeic, ngo tro pe a hlue, me hamëne la mele i angeice nyine thupene mele ne la nöjei ala ka kösau.” (Mar. 10:45) Ketre ewekë ka lolo catre e troa atre ka hape, “hna itö mele hnei Keriso Iesu”!—Rom. 3:22-24.
16 Ame lo hneijine ne lo itre pane Keresiano, tre, nyipi ewekë tro la itre atr a ietrane la itre ngazo i angatr me lapaune kowe la thupene mele hna huujëne hnei Iesu, e ajane angatre troa nue la itre ngazo i angatr. Ketre tui easë fe hi enehila. (Ioane 3:16, 36) Maine tro la ketre atr a mejiune kowe la itre ini ka tria, tune la Tirinite, maine u ka mele pe kö e thupene la hna mec, tha ijiji angeice kö troa hane kepe thangane la thupene mel. Ngo ame pe së ijij, pine laka atre hë së la nyipici göne la Nekö i Akötresie, “göi [jëne] nyidëti hne shë hna hetenyi la hna itö mel, ene la troa nue tije la nöjei ngazo.”—Kol. 1:13, 14.
CATRE PI SË NYI HLUE I IEHOVA!
17, 18. Ekaa la hne së hna inine la itre ewekë hna melëne hnene la Itretre Anyipici Iehova? Pine nemene matre ka nyipi ewekë troa atre la itre ewekë cili?
17 Ame lo edrö së ka ketre pengöne kö, tre, tha ene hmekuje kö la itre ini hne së hna kapa qaathei Akötresie, ngo ene mina fe la itre hna melëne hnene la itre hlue i Akötresie, me itre xa manathithi kö hne së hna kapa ngöne la götrane ua me ngönetrei. Hnene la itre itusi së hna hape, Annuaire hna qaja la aqane catre nyi hlue Iehova hnene la itre hlue i Nyidrë e cailo fen. Ijije hi tro sa atre la pengöne la Itretre Anyipici Iehova jëne la itre video La foi en action, 1re partie me 2ème partie, me e hnine fe la itre itusi ka tune la Les Témoins de Jéhovah : Prédicateurs du Royaume de Dieu. Ketre mina, itre zonale së fe a hane qaja la itre hna melëne hnene la itre trejine me easë, trahmanyi me föe.
18 Nyipi ewekë koi së troa atre la pengöne la Itretre Anyipici Iehova, tune lo aqane nyipi ewekë ekö kowe la nöje Isaraela troa atre la aqane xatua angatre hnei Akötresie. (Eso. 12:26, 27) Ame hë la qatre hë Mose, öni nyidrë kowe la angetre Isaraela: “Mekuneju lo ite drai ekö, trotrohnineju la ite macate ngöne la nöjei xöt ; hnyingënejë la keme i ’ö, nge tro angeic’ a thue macanyi ’ö ; nge hnyingënejë fe la ite qate i ’ö, nge tro angat’ a qaja koi ’ö.” (Deu. 32:7) Easë asë hi a atrunyi Akötresie cememine la madrin, me qaja kowe la itre atr la itre huliwa i Nyidrë. (Sal. 79:13) Tro la itre ini hne së hna xome qa ngöne la itre ewekë hna melëne hnene la nöje i Iehova a xatua së troa catre nyi hlue i Nyidrë.
19. Pine laka atre hë së la nyipici, nemene la nyine tro sa kuca?
19 Ame ngöne la fene ka ngazo celë, easa olene laka, easa kapa la nyipici qaathei Akötresie. (Ite edomë 4:18, 19) Celë hi matre catre pi së troa inine la Wesi Ula i Akötresie me cainöje kowe la itre atr. Casi hi la mekuna së memine la atre cinyihane la salamo la kola hape: “Tro ni a qaja la thina ka meköti cilie hmekuj. Akötesieti fe, hnei cilieti hna ini ni qan’ e thupëtesiji ni ; nge hnenge hna amamane uti hë enehila la ite huliwa i cilie nyine hain. Nge dei fe la, Akötesieti fe, the nue ni kö e qatë hë ni, me qia ha ni, pane tro ni a amamane la themie i cilie kowe la xöte celë, memine la mene i cilie koi ange ka troa traqa.”—Sal. 71:16-18.
20. Nemene la hne së hna amamane hnene la aqane mele nyipici së koi Iehova? Tune kaa la mekuna i epuni la kola atre ka hape, Iehova casi hi la ka ijije troa mus me ka meköti e troa atrun?
20 Ame la easa nyipici koi Iehova, tre, easë hi lai a amamane la mejiune së ka hape, Nyidrëti la ka ijije troa mus koi së nge ka meköti e troa atrun. (Hna ama. 4:11) Iehova a hamë së la uati Nyidrë matre tro sa qaja la maca ka loi kowe la itre atr, nyine akeukanyi angatre me hamë mejiune i angatr. (Is. 61:1, 2) Tha tro jë pi kö lai a nue Satana troa musi kowe itre hlue i Iehova me kowe la nöjei atr asë. Tro la edrö së ngöne la ua a acatrenyi së, me aeasenyi së catre koi Iehova matre tro sa nyi hlue i Nyidrë enehila, me epine palua.—E jë la Salamo 26:11; 86:12.
[Thying]
[Iatr ne la götran 8]
[Hna eköhagen götran 11]
Hna Thupë Së Qa Ngöne La Itre Ini Ka Thoi
“Isaraela fe, dengeju, ame Iehova Akötesi shë, te, Iehova ka cas.”—Deu. 6:4
“Tha ajane kö ni la [“kuci iöni,” MN].”—Is. 1:13
“Tha ’te kö la kete ewekë hnei ite ka meci hë.”—Ate cai. 9:5, 10
[Foto]
[Foto]
[Foto]
You May Also Like
ITA NE THUP—NYINE ININ
Catre Jë Mejiune Kowe La Hna Huliwa Kow Hnene La Baselaia
Hnei Iehova hna jëne la seven lao isisinyikeu matre traqa pi la Baselaia ka troa eatrëne la aja i Iehova kowe la fen. Tro ha acatrene tune kaa la lapune së hnene la itre isisinyikeu celë?
