Celë Hi Edrö Së Ngöne La Ua
Celë Hi Edrö Së Ngöne La Ua
“Celë hi edö ne la ite hlue i Iehova.”—IS. 54:17.
NEMENE LA AQANE TRO NYIPUNIETI A SA?
Nemene la hnei Akötresieti hna kuca matre tro sa hetrenyi la Tusi Hmitrötr?
Nemene la aqane thupëne Iehova matre tro la itre hlue i Nyidrë a atre la atresiwa i Nyidrë?
Nemene la aqane thupëne Iehova matre tro sa atre la nyipici enehila?
1. Nemene la hnei Iehova hna hamëne kowe la nöjei atr nyine loi koi angatr?
KA EPINE palua la mele i Iehova, nge Nyidrëti a qaja koi së la nyine tro sa kuca matre tro sa mele epine palua. Tha saze kö la itre hna amekötine cili. Öni Tusi Hmitrötr: “Ka cate huti epine palua la wesi ula i Joxu [Iehova].” (1 Pet. 1:23-25) Tro sa olene koi Nyidrë pine laka hnei Nyidrëti hna hamë së la Tusi Hmitrötr me itre ithuemacanyi ka nyipi ewekë.
2. Nemene la hnei Akötresie hna ajane tro sa atre göi Nyidrë?
2 Iehova a ajane tro asë hi së a atre la atresiwa i Nyidrë. Hna nyiqaane qaja la atresiwa i Iehova hnene la Tusi Hmitrötre lo kola qeje pengöne la aqane xupe Nyidrë la hnengödrai me fen. (Gen. 2:4) Ame fe lo Akötresieti a hamë Mose la Treen lao Wathebo jëne la iamamanyikeu, anyimua sija Nyidrë la atresiwa i Nyidrë hune la sine etë. Hanawange la ketre ceitun, ame lo pane wathebo, hna nyiqaane tune la: “Iehova ni Akötesi ’ö.” (Eso. 20:1-17) Hnei Diabolo hna thele jëne troa apatrene la Tusi Hmitrötr matre tha tro kö sa atre Akötresie memine la atresiwa i Nyidrë. Ngo tha hnei Iehova kö hna nue troa eatrëne lai.—Sal. 73:28.
3. Nemene fe la ketre ewekë hnei Akötresie hna ajane tro sa atre qa hnine la Tusi Hmitrötr?
3 Ala nyimu la angetre qeje pengöne menu Akötresie. Ngo aja i Iehova pe tro asë hi së a atre la nyipici. Tru la madrine së pine laka Tusi Hmitrötr a qaja hnyawa koi së la ka nyipici. (E jë la Salamo 43:3, 4.) Kösë easa ngöne la lai, nge fene a ethenyi ngöne la jidr.—1 Ioane 1:6, 7.
HETRENYI SË LA KETRE EDRÖ KA KETRE PENGÖNE KÖ
4, 5. Nemene la ketre ewekë ka tru hne së hna kapa lo macatre 1931?
4 E tro sa goeëne la itre atrene la ketre nöj, kösë ceitu hi la aqane ujë i angatr me qene nöje i angatr, aqane mele i angatr, nge itre xötre ka tro pa a inine la itre xötre ka tro pi. Edrö i angatre hi lai. Ka ceitu hi lai me easë Itretre Anyipici Iehova. Hnei Iehova hna xatuane la nöje i Nyidrë troa trotrohnine la Tusi Hmitrötre memine la nyipici göi Nyidrë, me itre aja i Nyidrë. Hnei Nyidrëti fe hna atrunyi së ene la hna ati ëje së hnene la atresiwa i Nyidrë.
5 Hne së lo hna kapa la ëje së lo ijine kovasio e Etazini, Columbus, Ohio, lo macatre 1931. Ame la lue mataitus “JW,” tre, hna fejane ngöne la iporogarame ne la kovasio. Önine la ketre trejine föe, hnene la itre trejine föe me trahmanyi hna isa qeje mekune troa qaja la aliene lai lue mataitus.” Hna hë së ekö lo ka hape, Itretre Inine La Tusi Hmitrötr, ngo ame la kola cile fë la cainöje ka ketre pengöne lo drai 26 Julai, macatre 1931, haawe, kapa asë jë hi hnene la iatrene la icasikeu troa hë angatre qaane la drai cili ka hape, Itretre Anyipici Iehova (Jehovah’s Witnesses qene Papale). Atraqatre la madrine ne la itre atr ngöne la drai cili, pine lai ëje ka hnyipixe hna xome qa hnine la Tusi Hmitrötr. (E jë la Isaia 43:12.) Önine la ketre trejine trahmanyi ka hape: “Thatreine kö ni troa thëthëhmine la kola isuenyi la itre atr, me xeexe.” Pëkö atr e celë fen ka ajane la ëje cili, ngo hnei Akötresie hna aijijëne troa ati ëje së hnene la atresiwa i Nyidrë, ase hë sasaithe enehila la 80 lao macatre.
6. Nemene la itre ithuemacanyi ka eje e hnine la edrö së?
6 E hnine fe lo lai edrö së la itre ithuemacanyi ka meköt, nge ka nyipi ewekë qa hnine la Tusi Hmitrötre göne la itre hlue i Akötresieti ekö. Ame la ketre ceitun, tre, ene la kola qeje pengöne koi së hnene ej la ka traqa koi Aberahama, me Isaaka, me Iakobo. Hnei angatre jë hna majemine ithanatane memine la hnepe lapa i angatr, la pengöne mele hna kapa hnei Iehova. Hnene la itre ithanata ka tune lai hna xatua Iosefa troa thipetrije la kola thele hnene la föi Potifara troa nyixetë me angeic. (Gen. 39:7-9) Ame ngöne lo itre macatre thupei Keriso, hnene la itre Keresiano hna ithawakeune la itre ithuemacanyi göi Akötresie. Hnei Paulo hna qaja kowe la ekalesia la hnei Iesu hna amekötine göne la Heji Ne Pui Ne Xeni Ne La Joxu. (1 Kor. 11:2, 23) Eje asë e hnine la Tusi Hmitrötr la itre ithuemacanyi cili matre tro sa atre la aqane troa atrunyi Akötresie. (E jë la Ioane 4:23, 24.) Ngacama atreine hi la Tusi Hmitrötre xatuane la nöjei pengöne atr, ngo ame easë, Itretre Anyipici Iehova, tro pala kö a tru catre la hni ne ole së kowe ej.
7. Nemene la ewekë hna thingehnaeane ka eje e hnine la edrö së?
7 Iehova mina fe a xatuane la itre hlue i Nyidrë ngöne la hneijine së. (Sal. 118:7) Hetrenyi e hnine la itre itusi së la hnei Nyidrë hna kuca matre troa thupë angatr. Kola atingetingëne la hni së ngacama traqa ju la itre iakötrë. Tusi Hmitrötre a thingehnaeane ka hape, pëkö troa hun la ketre ewekë hna kuca nyine isi me epun, maine nyine akötrë epun. Nge maine troa qaja angazone la nöje i Iehova ngöne la itre hnakotr, tro hë lai a mama e thupen ka hape, itre ka thoi angatr, ke, qaathei Iehova la meköti së. Celë hi ketre götranene la edrö së lai. (Is. 54:17) Thatreine jë pi kö Satana troa angazone palua së.
8. Nemene la itre hne së hna troa ithanatane ngöne la tane mekune celë, memine la ka troa xulu?
8 Hnei Satana pala hi hna thele jëne troa apatrene la Tusi Hmitrötr, me sawa la itre atr troa atre la ëje i Iehova, me juetrëne la nyipici koi angatr. Ngo tha hune ju kö Satana. Ame ngöne la tane mekune celë, memine la ka troa xulu, tre tro së ithanatane la (1) aqane thupëne Akötresie la Tusi Hmitrötre me itre ithuemacanyi hna qatrenge hnine ej; me (2) aqane thupëne Iehova matre tro la nöje i Nyidrë a atre la atresiwa i Nyidrë; me (3) aqane thupëne Akötresie matre ijiji së troa atre la nyipici enehila.
AQANE THUPËNE AKÖTRESIE LA TUSI HMITRÖTRE ME ITRE ITHUEMACANYI HNA QATRENGE HNINE EJ
9-11. Nemene aqane thupëne Iehova la Tusi Hmitrötr?
9 Ngacama hna thele catrëne hnene la itre atr troa apatrene trije la Tusi Hmitrötr, ngo hnei Iehova hna thupëne hnyawa ej. Hnene la hmi Katolik hna thingijëne la itre atr troa e la Tusi Hmitrötr. Hna qaja hnei paapaa, hene ne hmi katolik, ka hape, troa hetre ethanyine kowe la itre atr e tro angatr a e la Tusi Hmitrötr. Ame lo macatre 1242, hnei hmi hna acile la ketre wathebo me hape, troa dreuthe trije la nöjei Tusi Hmitrötr hna ujëne ngöne la itre qene hlapa hna trotrohnine hnene la itre atr. Itre macatre thupen, amexeje hmaca jë hi la itre wathebo cili, itre eje a ce tro memine la hna amekötine hnene la itre paapaa lo macatre 1816, me 1824, me 1832.
10 Ngacama pi tro catre la itre atr a apatrene trije la Tusi Hmitrötr, ngo hnei Iehova pala hi hna thupëne hnyawan ej. Ame lo macatre 1382, kola fenesi hna ujëne hnei John Wycliffe la pane Tusi Hmitrötre qene Papale. Hnei William Tyndale fe hna hane ujëne la Tusi Hmitrötre qene Papale. Ame la pune koi angeic, hna humuthi angeic lo macatre 1536. Hna athipi angeic ngöne la sinöe, nge angeic a sue jë me hape: “Joxu fe, fe pi la lue mekene la joxu ne Agele.” Thupene jë hi la hna öje amecinyi angeic, ame hna dreuthi angeic.
11 Ame lo macatre 1535, hnei Miles Coverdale fe hna ujëne la Tusi Hmitrötre qene Papale. Hnei angeice hna xome la Tusi Hmitrötre hna ujënë hë hnei Tyndale göi troa ujëne la ca götrane la Tusi Hmitrötre i angeic, nge ame la ketre götrane, hna ujëne qa ngöne la Tusi Hmitrötre qene Latin me Tusi Hmitrötre qene Alema hna ujëne hnei Martin Luther. Hetre Tusi Hmitrötre ne la Itretre Anyipici Iehova enehila, Les Saintes Écritures — Traduction du monde nouveau [MN]. Ketre madrine ka tru koi angatr, ke, hetrenyi la Tusi Hmitrötre cili, ka maca e troa e, nge ka meköt, nge tha jole kö e troa huliwane ngöne la hna cainöje trootro. Eje hi laka thatreine kö Satana me itre atr troa apatrene trije la Tusi Hmitrötr.
AQANE THUPËNE IEHOVA MATRE TRO SA ATRE LA ATRESIWA I NYIDRË
12. Nemene la aqane xatuane la itre atr hnene la Traduction du monde nouveau troa atre la atresiwa i Iehova?
12 Hnei Iehova hna thupën matre thatreine kö troa apatrene asë la atresiwa i Nyidrë qa hnine la itre Tusi Hmitrötr. Ame ngöne la kola ujëne la Traduction du monde nouveau, hnene la itre trejine hna fejane la atresiwa i Iehova ngöne la nöjei götrane hna cinyihane ej ngöne la itre pane tusi ne la Tusi Hmitrötre ekö. Traqa koi 6 973 la etrune la hna fejane la atresiwa i Iehova ngöne la Itre Hna Cinyihane Qene Heberu, nge 237 la etrune Qene Heleni. Ame la Traduction du monde nouveau, tre, hna ujëne koi 116 lao qene hlap. Ase hë sasaithe la 178 545 862 etrune la hna fejan.
13. Hne së hna atre tune kaa ka hape, qaane lo lue pane atr ekö, atre hi la atr la atresiwa i Akötresie?
13 Atre hnyawa hi hnei Adamu me Eva, lue pane atr, la atresiwa i Iehova, nge hnei nyidroti hna hë Nyidrëti hnene la ëje cili. Hnei Noa mina fe hna qaja la atresiwa i Iehova, lo kola hape: “Qaja aloinyi Iehova Akötesi Sema.” (Gen. 4:1; 9:26) Hnei Akötresie hna sipu qaja amamane la ëje i Nyidrë la Nyidrëti a ithanata kowe la itre atr. Öni Nyidrë: “Iehova ni, nge pëkö kete ; nge pëkö xa Akötesie, ngo ini hi ; hnenge hna oteëne la gö i ’ö, ngo tha ’te ni kö hnei eö.” (Is. 42:8; 45:5) Hnei Iehovah hna kuca matre tro la nöjei atr e celë fen a atre la atresiwa i Nyidrë. Tru la madrine së la tro sa qaja la atresiwa i Iehova, me nyi hlue i Nyidrë! Celë hi hna qaja lai hnei Tusi Hmitrötr: “Tro huni a . . . acile la hatene hnene la atesinëti [atresiwa] la Akötesi shë.”—Sal. 20:5.
14. Maine tha hnine la Tusi Hmitrötre hmekuje kö la kola mama la atresiwa i Akötresie, kola öhne ekaa fe?
14 Tha ngöne Tusi Hmitrötre hmekuje kö la kola mama la ëje i Akötresie. Ame la nyine anyipicin, tre, kola mama ngöne Sine Etë Ne Moaba, lo hna öhne e Dibona, 21 lao kilomet ngöne la götrane kohië ne la Opegejë Ka Haitr. Hna cinyihane hune la sine etë la pengöi Omeri, Joxu ne Isaraela, nge hna cinyihane fe la hna qaja hnei Mesa Joxu ne Moaba lo aqane trongëne la isi angatre me Isaraela. (1 Ite jo. 16:28; 2 Ite jo. 1:1; 3:4, 5) Hna cinyihane fe hune la sine etë cili la atresiwa i Iehova, hna sija eje jëne la eke mataitus qene Heberu YHWH. Kola mama fe la itre mataitusi cili qene Heberu YHWH ngöne la itre tus hna öhne e Lakisa.
15. Nemene la Septante, nge pine nemene matre ka nyipi ewekë ej?
15 Ase hë sasaithe enehila la 2 000 lao macatre ne ujëne la Itre Hna Cinyihane Qene Heberu koi qene Heleni, lo hna hëne ka hape, Septante. Pine nemene matre nyipi ewekë troa ujëne koi qene Heleni? Hna po hnene la angetre Iudra e Babulona koi 70 lao macatre. Ame la kola nue angatre hmaca lo macatre 537 qëmeke i Keriso, hnene pë hë la itre xan hna ajane troa lapa pe e Babulona. Ngo tro ju pë hë la itre macatre, nge mekune jë hi itre xan troa feke Aigupito eë me lapa ngöne la traone e Alesanedria, nge e cili itre atr a ithanatane la qene Heleni.
16. Jëne la ketre ceitun, qaja jë la aqane mama la atresiwa i Akötresie hnine la pane itusi hna fejane lo macatre 1640?
16 Ame la pane itusi hna fejane ngöne la itre nöje e Amerika, kolo tusi Salamo, nge e hnine la itusi cili la atresiwa i Akötresie. Hna ujëne la tusi cili qa ngöne la qene Heberu koi qene Papale. Hëne jë pë hë eje ka hape, Bay Psalm Book, nge hna fejane la pane tusi lo macatre 1640. Ame la ketre götrane hna mama la atresiwa i Akötresie, Iehova, tre, ngöne Salamo 1:1, 2. Kola qaja ka hape, ame la atr ka manathith, tre, tha ka drengethenge kö la atr ka ngazo, ngo angeice pe a madrine la “wathebo i Iehova.” Maine epuni a aja itre xa ithuemacany göne la atresiwa i Akötresie, wange ju la itus Nemene La Nyipi Ini Hna Hamën Hnei Tusi Hmitrötr?, Itre Xaa Mekun g. 195-197.
AQANE THUPËNE AKÖTRESIE MATRE IJIJI SË TROA ATRE LA NYIPICI
17, 18. (a) Nemene la aqane tro epuni a qejepengöne la nyipici? (b) Nemene la itre xa ewekë ka meköt nge ka ej e hnine “la enyipici ne la evangelia”?
17 “Iehova fe, Akötesieti ka nyipici,” easa a nyi hlue i Nyidrë cememine la madrin. (Sal. 31:5) Nemene la nyipici? Ene la itre ewekë ka meköt nge ka ej. Ame ngöne la itre qene hlapa hna nyiqaane cinyanyine ekö la Tusi Hmitrötre ngön, tre, hna ujëne la hna ithanata “nyipici” hnene la itre trenge ithanata ka qaja la ketre ewekë ka nyipici, me meköt, me nyine mejiune kow.
18 Hnei Iehova hna thupëne matre tro sa atre la nyipici enehila. Nge Nyidrëti pala hi a xatua së troa atre hnyawa la pengöne la nyipici. (2 Ioane 1, 2) Celë hi hne së hna öhne ngöne la Ite Edomë 4:18, kola hape: “Ame la jëne la ite ka meköti, te, tune la lai ka hadehadeu, kola lai trotro uti hë e hnaipajö.” Öni Iesu lo nyidrëti a thithi koi Akötresie: “Wesi Ula i cilie la nyipici.” (Ioane 17:17) Hetrenyi e hnine la Tusi Hmitrötre “la enyipici ne la evangelia,” ene la nöjei ewekë ka meköt nge ka ej hne së itre Keresiano hna mejiune kow. (Gal. 2:14) Nemene la itre xan e itre ej? Ene la nyipici göne la atresiwa i Iehova, me musi cile i Nyidrë, me thupene mele qa ngöne lo mele hna huujëne hnei Iesu, me mele hmaca, me Baselaia. Tro pe sa ce wange enehila la aqane thupëne Akötresie la nyipici, ngacama hnei Satana hna thele troa juetrën ej.
IEHOVA A THINGIJË I SATANA TROA JUETRËNE LA NYIPICI
19, 20. Drei lae Nimeroda? Nemene la hna thele troa kuca hnene la itre atr ngöne la ijine angeic a mus?
19 Thupene la Iwë Atraqatr, hetrenyi la ketre atr ka catre weje öni, Nimeroda la ëjen, atre icilekeu me Iehova. (Gen. 10:9) Pine laka Nimeroda la atre icilekeu me Iehova Akötresie, angeice hnyawa hi a nyi hlue i Satana. Hna tui Nimeroda hnene lo angetre icilekeu e thupen, memine la Nekö i Akötresie. Hnei Iesu hna qaja la pengö i angatr me hape: “Keme i nyipunie la diabolo, nge pi tro nyipunie a kuca la ite aja i keme i nyipunie,” atre “tha cile huti kö ngöne la nyipici.”—Ioane 8:44.
20 Hnei Nimeroda hna musi e Babela memine lo itre xa traone nyipine la hneopegejë ne Hidekela me Euferate. (Gen. 10:10) Angeice jë hi lo ka nyiqaane xupe la Babela ngöne lo macatre 2269 qëmeke i Keriso. Tha aja i Iehova kö tro la atr a lapa ngöne la casi hi la götran, ngo önine la itre atr ka xupe la Babela ka hape: “We, tro sha acile thatraqai shë la lapa me ita, me ahoeane la hene hnengödrai ’ë ; nge tro sha ahlemune la ëje shë, wanga haöthepi shë la hune i hnadro asë.” Tha umuthe ju kö angatre la ita cili, ke, hnei Iehova hna “amenumenun’ e cili la qene hlapa ne la fene hnengödrai asë.” Haawe, isa ije pi hi la itre atr qaa Babela. (Gen. 11:1-4, 8, 9) Aja i Satana troa apatrene trije la nyipi hmi me kuca matre tro la nöjei atr a thili koi angeic. Ngo hnei Iehova hna thupëne la nyipi hmi, nge ame enehila, kola tro la itre drai, nge kola traqa tretr trootro la itre atr ka xötrei lö troa nyi hlue i Nyidrë.
21, 22. (a) Pine nemene matre pë jë kö ka atreine troa apatrene la nyipi hmi? (b) Nemene la hne së hna troa wange ngöne la tane mekune ka troa xulu?
21 Pë jë kö ka atreine troa apatrene la nyipi hmi. Pine nemen? Pine laka, hnei Iehova Atre Ini së Ka Tru hna thupëne matre tro sa hetrenyi la Tusi Hmitrötr, me atre la atresiwa i Nyidrë, nge tro sa atre la nyipici. (Is. 2:3) Qa ngöne laka easa nyi hlue i Akötresie thenge la aja i Nyidrë, haawe, hane hi lai kepine matre hetrenyi së la nyipi madrin. Ngo loi e tro pala hi sa hmeke matre tro hi së a mejiune kowe la ewekë ka nyipici, me xötre thenge la ixatua hne së hna kapa qa ngöne la uati hmitrötre i Nyidrë.
22 Ame ngöne la tane mekune hne së hna troa ce wang, tro sa öhne e cili la aqane tria ne la itre ini hna hamëne hnene la itre hmi göi Akötresie. Tro fe sa öhne e cili laka, patre kö ngöne la Tusi Hmitrötre la itre ini cili. Ketre, tro mina fe sa öhne laka, kola amanathithi së hnei Iehova, ke, hnei Nyidrëti hna hamëne koi së la itre nyipi ithuemacanyi göi Nyidrë. Ame asë la itre ewekë cili, tre, ketre edrö së lai ka sisitria nge ka ketre pengöne kö.
[Thying]
[Iatr ne la götran 3]
[Iatr ne la götran 4]
Hne së hna kapa la atresiwa i Iehova ka ketre pengöne kö, hna hape Itretre Anyipici Iehova ngöne la kovasio lo macatre 1931
[Iatr ne la götran 5]
Hnei Tyndale me itre xan hna ujëne la Tusi Hmitrötr, ngacama atre hi angatre ka hape, troa humuthi angatre pin
[Hna xome ngön la foto]
From Foxe’s Book of Martyrs
