Hmekëne Hnyawa Kö La Itre Aliene La Hni

Önine la Tusi Hmitrötr, “Ate nyipi iaö la hni hune la nöjei ewekë asëjëihë, nge nyipi ngazo ej.” (Iere. 17:9) Ame la kola piine catrëne la ketre ewekë hnene la hni së, tre hne së hna pune majemine troa thele nyine tro pala hi sa upe kow, matre tro sa eatrëne la itre aja ne ej.

Kola hmekë së hnei Tusi Hmitrötre ka hape: “Kola löpi qa kuhu hni la meku ngazo, me humu at, me nyi xetë, me kuci ngazo, me ënö, me atë la thoi, me jele ngazon.” (Mat. 15:19) Haawe, atreine hi tro la hni së a iaö së, me uku së troa kuca la ewekë ka isazikeu memine la aja i Akötresie. Celë hi matre ame itre xa ijin, goe pë hë së, nge ase hë së kuca la ewekë ka ngazo. Ngo nemene la ka troa xatua së troa canga wange atrehmekune ka hape, kolo ha troa uku së koi ewekë ka ngazo hnene la hni së?

THELE JË TROA CANGA WANGE ATREHMEKUNE LA ITRE ALIENE LA HNI

Troa e Tusi Hmitrötr ngöne la nöjei drai, me lapa mekune la hna e. Hnei Paulo ekö hna cinyihane ka hape, “mele la wesi ula i Akötesie, me men, me ka idei hune la taua ka lue qenön, kola thine me thupa luëne la hni me u.” Atreine hi tro la trenge ewekë ne la Tusi Hmitrötr a “amekötine la ite mekune me ite aja ne la hni.” (Heb. 4:12) Ame la easa thele troa atre la nyipi pengö së jëne la Tusi Hmitrötr, tre mama pi hi koi së la itre aliene hni së. Celë hi kepine matre, emele së hi la troa e Tusi Hmitrötre ngöne la nöjei drai, me lapa mekune la hne së hna e, ke jëne tro hi së lai a atre la mekuana i Iehova, memine la aqane wai ewekë i Nyidrë!

Hetre thangane kowe la atre “anyipici” së, ene la mekuthethewe së, e tro sa kapa la itre eamo, me trongëne la itre trepene meköti ne la Tusi Hmitrötr. (Rom. 9:1) Mekuthethewe hi la ka troa xatua së, matre tha tro kö sa majemine troa thele nyine tro pala hi a upe kow. Ketre, hetre itre tulu e hnine la Tusi Hmitrötr, “nyine eamo shë.” (1 Kor. 10:11) Maine tro sa xomi ini hnyawa qa ngöne la itre tulu cili, haawe, tha tro hë sa axecië mekune menu. Ngo nemene fe la nyine tro sa kuca?

 Sipo Akötresieti jë troa xatua së troa wange atrehmekune la itre aliene hni së. Iehova la atre “telëtine la hnatesie [thelethele la hni].” (1 A. l. ite jo. 29:17) “Sisitia kö [Nyidrë] hune la ite hni shë, nge kola wangate hmekune la nöjei ewekë asëjëihë.” (1 Ioane 3:20) Thatreine kö troa iaö Akötresieti hnei ketre. Maine tro sa fe la hni së koi Iehova, ene la troa qaja koi Nyidrëti la itre hne së hna hnehengazon, me hna dreng e kuhu hni së, me itre hne së fe hna ajan, tro hë Nyidrëti lai a xatua së troa wange atrehmekune la nyipi aliene hni së. Ijije fe tro sa sipone koi Iehova troa ‘xupe koi së la hni ka wië.’ (Sal. 51:10) Eje hi, maine easa ajane troa atrepengöne la aliene hni së, haawe, the tro pi kö sa wange acone la emenene la thith.

Loi e troa drenge hnyawa la itre hna qaja ngöne la hna icasikeu. Tro la itre ini hne së hna kapa ngöne la hna icasikeu a xatua së troa atrepengöne la itre aliene hni së, e hne së hna drenge hnyawa la itre hna qaja. Maine nyipici laka, tha easë kö a kepe itre ini ka hnyipixe ngöne la nöjei ijine icasikeu, ngo ame pe, e cili la hna amexeje koi së la nyine tro sa kuca matre tro sa atrepengöne la itre aliene hni së. Kolo fe a ini së e cili la aqane tro sa trongëne hnyawa la itre trepene meköti ne la Tusi Hmitrötr. Kola xatua së hnene la itre trejine me easë troa atrepengöne la itre aliene hni së. (Ite edomë 27:17) E tha tro hë së kowe la itre icasikeu, easë hë lai a ananyine la itre trejine me easë, nge tro hë së lai a kepe thangane ka ngazo. Tro hë sa ‘thele la [sipu] aja’ së kö. (Ite edomë 18:1) Qa ngöne lai, loi e tro sa isa hnyinge ka hape, ‘Hnenge kö hna majemine troa sine la nöjei icasikeu asë, me thele troa kepe thangane ka loi qa ngön?’—Heb. 10:24, 25.

KOLA HULI SË A KOI NEMEN HNENE LA HNI SË?

Nyimutre la itre ewekë hnene la hni së hna huli së kow. Ngo tro hi sa ithanatane la foa lao ewekë; ene la mo, me kahaitr, me itre sinatro, memine fe la itre nyine thele madrin.

Pengöne la troa nyenyape thele mo. Nyipici laka, ame la kola hnahone la atr, tre hetrenyi hë thei angeice la aja troa thele la itre ewekë ka sisitria thatraqane la mele i angeic. Ngo ame pe, hnei Iesu hna amamane la engazone la troa hni koi mo jëne la ketre ceitun. Hnei Iesu hna qeje pengöne la ketre atr trenamo ka trene uma të. Ame ngöne la ijine menu, tre nyidrëti a öhne laka, ka mele la hlapa i nyidrë; ngo ngazo pe, tha ase petre kö menuëne asë la hlapa nge pëhë göhnene la itre xen, ke tiqa hnyawa ha la itre uma të i nyidrë. Öni nyidrëti jë hi ka hape, tro ha thë la itre uma të, me xupe pena la itre xa uma të ka tru catre kö. Öni nyidrë: “Tro ni a xawan’ e cili la ite qazing, me ite ewekëng. Nge tro ni a qaja kowe la ung, ka hape, Unge fe, kösaue la nöjei ewekë hna xawane thatraqai ’ö ngöne la nöjei macate ka kösau ; ea manoju, xeniju, me iji me madin.” Ngazo pe, thëthëhmine hë nyidrëti lo ketre ewekë ka troa traqa koi nyidrë; ame ju kö ngöne lai jidr, tre nyidrëti a mec.—Luka 12:16-20.

Ame la kola nyiqaane uti ipië trootro la itre xa Keresiano, tre maine jë angatre ha hnehengazone göne la drai elany e qatre hnyawa ha angatr, wanga tha ijije ju la manie göi troa itöne la ka nyipi ewekë thatraqane la mele i angatr. Nge maine jë, tro hë angatr a upe kowe la ewekë cili, matre troa qeje kepine la angatr a huliwa jidri ngöne la itre ijine icasikeu, maine ngöne la angatr a tha eatrëne pena la itre hnëqa i angatr ngöne la ekalesia. Hmekëne hnyawa kö së, wanga kei pi fe së kowe la ewekë cili. Ame pena itre thöth, tre atre hi angatr ka hape, pëkö huliwa ka lolo catr hune la troa pionie lapa, ngo maine jë tha canga xome kö angatre la huliwa cili, ke angatr a mekune laka, ma loi e troa pane ami mani. Ngo nemene jë la ewekë ka sisitria nyine tro sa kuca ngöne la hnedrai së? Tha ene jë kö la troa trenamo xajawa i Akötresie? Nga drei fe la ka hane atrepengöne la drai elany?

 Hmekëne kö la aqane iji kahaitr. Öni Ite Edomë 23:20: “The ce me itete xömai waina” kö. Ame la itre xa Keresiano, maine ka pi iji kahaitr catr angatr, tre maine jë tro angatr a thele troa qeje kepine la angatr a iji lapa. Maine jë tro angatr a qaja ka hape, angatre hi a iji ne troa nango fie hna xen, ngo tha kolo kö a iji uti hë la troa hmo. Ngo maine ketre hne së lai hna majemin, ene la troa lapa fie hna xen, tre loi e tro sa canga waipengö së ka hape, nemene jë la nyipi aliene la hni së?

Iëne hnyawa jë së la itre sinatro. Atre hnyawa hi së itre Keresiano ka hape, thatreine kö tro sa tha iöhnyi memine la itre atr ne fen, ke ce easë pala hi me angatr ngöne la hna ini, me ngöne la hna huliwa i maseta, nge easë fe a öhnyi angatre ngöne la hna cainöje trootro. Ngo ame pe, ketre kö la troa ce huliwa maine ce ini me angatr, nge ketre kö la troa majemine tro lapa koi angatr. Ngo hapeu, hne së kö hna majemine tro lapa koi angatr, hnene laka, ka lolo la thiina i angatr? Kola hmekë së hnei Tusi Hmitrötr ka hape: “The iaö nyipunieti kö ; ithanata ka ngazo la ate angazone la thina ka loi.” (1 Kor. 15:33) Mekune ju la ketre ceitun: maine tro hi a nango xölane la neköi wamine poizine ka co ngöne la tim, tre ka ngazo hë lai tim. Ceitune hi lai memine la easa ce sinee memine la itre atr ka tha melëne kö la itre trepene meköti ne la nyipi hmi. Tro ha ngazo la aqane mele së ngöne la götrane ua, nge tro fe hë së lai a hane ixomi thiina, ene la troa xome la aqane waiewekë i angatr, me aqane heetr, me aqane ithanata, me aqane ujë i angatre fe.

Aqane iëne së la itre nyine thele madrin. Ame enehila, tre kola elë la ketre pengöne nyine iamadrinë, jëne lo hna hape, technologie. Ngazo pe, hetre itre xa nyine iamadrinë ka tha loi kö kowe la Keresiano. Hnei Paulo ekö hna cinyihane ka hape, ‘ame la ite thina ka sisi asë, te the qaja hmaca [kö] thei nyipunie.’ (Efe. 5:3) Ngo nemene la nyine tro sa kuca, e huli së jë hi hnene la hni së tro drenge maine goeëne pena la ketre ewekë ka sis? Maine jë tro sa qaja ka hape, ketre nyine iamadrinë hi lai, nge isa qanyi së kö iëne la itre nyine iamadrinë thatraqai së. The thëthëhmine pi kö së la eamo i Paulo, nge the nue pi kö kowe la itre ewekë ka sis troa lö kowe la hni së, jëne la hne së hna goeën, maine hna drenge pena.

IJIJE HI TRO SA HANE SAZE

Maine easë fe la ka hane jötre pine la aqane iaö së hnene la hni së, nge maine hne së fe hna hane majemine troa qeje kepine la easa kei kowe la itre ewekë ka tria hne së hna kuca, tre ijije hi tro sa hane saze. (Efe. 4:22-24) Kola anyipicine lai hnene la lue tulu hne së hna troa pane ithanatan.

Miguel a la ëje ne la ketre, nge hnei angeice hna saze la aqane goeëne angeice la mo. Öni angeic: “Ka tru ni me ifëneköng, me nekö i nyiho ngöne la nöje ka wange atrune la atr ka pane itöne la itre mo ka hnyipixe. Celë hi matre, eni fe la ketre ka hane huliwa göi troa kapa la nöjei pengöne mo ka hnyipixe. Nge öninge pena kö ka hape, atre hi ni la hnenge hna kuca; ngo tha tro jë pi kö ni lai a hni koi mo. Ngo ame hë e thupen, eni a wange atrehmekune ka hape, ame la eni nyenyape thele la itre ewekë cili, tre kösë lo eni a lapa xen, ngo tha meji kö ni. Qa ngöne lai, eni pë hë a thithi fë jë koi Iehova la itre aliene la hning, me qaja koi Nyidrëti la aqane waiewekëng. Öninge koi Nyidrëti ka hape, ame la hne hun, lapa ka cahae hna ajane catrën, tre ene la tro huni ala köni a cengöne nyi hlue i Nyidrë. Eahuni pë hë a ce axeciëne jë ka hape, tro huni a melëne hi la ka ijij, me tro kowe la itre nöje gaa aja ka cainöj. Tha hmitre ju kö, nge eahuni fe a hane pionie. Ame e cili, tre mama pi koi huni laka, tha nyipi ewekë kö tro sa hetrenyi la nöjei pengöne mo matre tro sa mele madrin, me atrepengöne la nyipi mel.”

Kola troa amamane hnene la hna melëne hnei Lee, ka hape, nyipi ewekë fe troa waipengöne hnyawa la hni së matre troa nuetrije la itre sinatro ka ngazo thiina. Öni Lee, ka hape: “Ame e koilo hnenge hna huliwa, tre ce eni pala hi memine la itre atr ne la itre xa nöje ka traqa ne troa ithue nyine tro la setroa huni a salemën. Atre hi ni ka hape, ame ngöne la itre ijine icasikeu, tre tru pe hi la hne huni hna troa iji kahaitr, ngo pi tro catre ni a hane tro kowe lai hna icasikeu cili. Celë hi matre, xönë pala hi ni troa hmo hnei kahaitr, ngo ame pe e thupen, tre eni a hacehnine la ewekë hnenge hna kuca. Qa ngöne lai, eni pë hë a thele jë troa waipengöne la itre nyipi aliene la hning. Nge hnene la Wesi Ula i Akötresieti memine la itre qatre thup hna xatua ni troa wange atrehmekune laka, ka pi ce tro catre ni memine la itre atr ka tha hnimi Iehova kö. Ame pë hë enehila, maine ijije hi, tre eni pë hë a hë jë ngöne telefon, göi troa eatrëne la götrane qang. Nge maine nyipi ewekë tro ni a ce traqa itronyi memine la itre sine huliwang, tre ini a isine troa kuca hi la ka ijij, ngo tha tro kö a aqeane menune me angatr.”

Nyipi ewekë tro sa nyipici ngöne la easa thele troa atrepengöne la itre aliene hni së. Celë hi matre nyipi ewekë fe tro sa sipone la ixatua i Iehova jëne la thith, ke atre hi së ka hape “ate kö nyidëti la ite ka sihngödi e kuhu hni.” (Sal. 44:21) Hnei Akötresieti mina fe hna hamëne koi së la Wesi Ula i Nyidrë, matre kösë nyine tro sa thuluëne la pengö së. (Iako. 1:22-25) Nyipi ewekë fe la itre ini hna amexeje me itre eamo hna hamëne koi së jëne la itre itus, me itre icasikeu së! Itre jëne tro hi së lai a thupëne la hni së, me thele troa catre xötrëne la gojenyi ka meköt.

[Ithueamacany]

[Iatr ne la götran 22]

[Iatr ne la götran 23]

Nemene la eloine kowe la hni së, e tro sa e la Tusi Hmitrötr ngöne la nöjei drai?

[Iatr ne la götran 23]

Nyipi ewekë fe la troa thith, matre troa xatua së troa atrepengöne la itre nyipi aliene hni së

[Iatr ne la götran 23]

Kola xatua së fe hnene la itre icasikeu troa atrepengöne la itre nyipi aliene la hni së