The Tro Trije Pi Kö Së La Hnathupe i Iehova
The Tro Trije Pi Kö Së La Hnathupe i Iehova
“Iehova a [troa] ishi me ite nöje cili ; tune lo hnei nyidëti hna ishi ngöne la drai ne ishi.”—ZAKA. 14:3.
QEJE PENGÖNE JË
Nemene la aqane tro sa trotrohnine lo trenge ewekë ka hape, “troa thupa luëne la wete Elaio nyipin’ ej”?
Nemene la hna nyihatrene hnene la “hnathupe atraqat”? Nge tro sa amamane tune kaa ka hape, easa zae ngöne la hnathupe cili?
Nemene la hna nyihatrene hnene “la timi ka mel”? Nge drei la ka troa öhnyi thangane ka loi qa ngöne la hna iji la timi cili?
1, 2. Nemene la isi ka troa traqa? Nemene fe la nyine tro sa hane kuca ngöne la ijine cili?
AME ngöne lo 30 Okotropa 1938, nyimutre catre la itre atr e Amerika ka drei ipos. Ame la itre ka ithanata ngöne ipos, tre, angatr a qaja la aqane traqa qa Mars la itre xa pengöne ewekë, a traqa ju i angatr troa haöthe la fen me angazone ej. Ngacama ase hë thuemacane kowe la itre atr ka hape, kola elone lai ewekë cilingo ala nyimu la itre atr ka mekune ka hape, kola nyipi isi. Matre ame itre xaa atr, tre, angatr a ho kötr me kötre mel. Ame itre xan, angatr a nyenyape kowe la itre hnë zae hnei angatr hna sine fene la itre uma i angatr, me hnane la itre kuqa i angatr, maine atuthe la ialameke i angatr hnei itrawel ka hmuhmu, ke kola xou wanga kuë poizinëne jë la eny, ene pe hngölëne jë nge meci ju hi.
2 Calemi hë la ketre isi, nge nyipi isi. Ngazo pe, ala nyimu la itre atr ka tha hnëkë kö kowe la isi cili. Kolo isi hna hëne ka hape, Amagedo, isi Akötresieti memine la fene celë ka ngazo. Tha nyine tro kö së lai a wange acon, pine laka ase hë Akötresieti thuemacanyi së, jëne la Tusi Hmitrötr laka, tro ha traqa la ewekë cili. (Hna ama. 16:14-16) Ngo tha tro pë hë sa hane isi. Tro pe sa öhne la etrune la mene i Iehova ngöne la Nyidrëti a troa thupë së, me amele së.
3. Nemene la hna perofetane hne së hna troa ce ithanatan? Pine nemene matre nyipi ewekë troa atrepengöne la hna perofetane cili enehila?
3 Kola qaja hnyawa koi së hnene la tus i Zakaria mekene 14, la pengöne la isi Amagedo. Ngacama ekö petre kö Zakaria cinyihane la hna perofetane cili, ngo loi e tro pala hi sa wange atrune enehila. (Rom. 15:4) Kola qeje pengöne koi së la itre ewekë ka traqa kowe la itre hlue i Akötresie, qaane lo macatre 1914, ijine Iesu Keriso a nyiqaane musi e hnengödrai. Hetre itre xa ewekë ju kö ka troa traqa, nge hna qaja hnene la hna perofetane cili. Eje fe a qeje pengöne la ketre “hnathupe atraqat” me “timi ka mel.” (Zaka. 14:4, 8) Tro sa ce ithanatane ngöne la tane mekune celë la hna nyi hatrene hnene la hnathupe cili, memine la aqane tro la itre hlue i Iehova a zae ngöne lai hnathup. Ketre, tro sa thele troa atre la hna nyihatrene hnene lo timi ka mel, memine la eloine ej. Maine tro sa atre la alien, tro hë sa öhne la enyipiewekëne lai tim, nge tro fe sa ajane troa ij. Haawe, tro sa pane ce ithanatane la hna perofetane celë.—2 Pet. 1:19, 20.
NYIQAANE HË LA “DRAI IEHOVA”
4. (a) Eue la kola nyiqaane lo “drai Iehova”? (b) Nemene la maca hna tro fë hnene lo itre hna iën, qëmekene lo macatre 1914? Nge nemene la hna kuca hnene lo itre hene ne politik me itre hene ne hmi?
4 Kola qaja ngöne la qaane la tus i Zakaria 14 ka hape: “Tro ha traqa la drai Iehova.” (E jë la Zakaria 14:1, 2.) Ngo nemene jë la drai cili? Kolo hna hëne ka hape “drai Joxu,” ka nyiqaane lo macatre 1914, macatre ne kola acili Iesu ngöne la Baselaia i Akötresieti e koho hnengödrai. (Hna ama. 1:10; 11:15) Hnene la itre keresiano hna iëne hna tro fë la ketre maca, a traqa koi itre macatre; kola qaja ka hape, tro ha nyipune “la ite ijine i angete ethen” ngöne la macatre 1914. Hnei angatre fe hna cainöjëne ka hape, qaane ju hi lai ijine cili, tro ha xulu la nöjei pengöne akötr, laka, tha hna hane kö melëne ekö. (Luka 21:24) Hapeu, nyipine kö “angete ethen” la itre ithuemacany cili? Ohea. Hna hnyima fë la itre hna iëne hnene la itre hene ne politik me itre hene ne hmi, nge hna akötrë angatre fe. Ngo thatre kö la itre hene cili ka hape, angatre hi lai a hnyima fë la Akötresieti Kapucatinasë, ke itre qene qaja ne la Baselaia i Nyidrëti la hnei angatre hna hnyima fë.—Heb. 12:22, 28.
5, 6. (a) Nemene la hna kuca hnene la ithupëjia kowe la itre hlue i Akötresie? (b) Drei la “kete hafe ne la nöj”?
5 Ase petre kö Zakaria perofetane ekö la ewekë hna troa kuca hnene la ithupëjia kowe la itre hlue i Akötresie; öni angeic: “Tro ha thapa la lapa.” Ame la “lapa” hna qaja e celë, ene Ierusalema, tre kolo hi a nyi hatrene la Baselaia i Akötresie. Nge hetrenyi petre kö e celë fene la itre xa ka troa sine la Baselaia cili, itre ka cilëne la itre hnëqa ka tru ngöne la organizasio i Iehova e celë fen. (Fil. 3:20) Hna othi angatr, me umë angatr ngöne la kalabus e Atlanta, e Amerika, ngöne lo ijine lo Pane Isi Ka Tru. E cili hi la kola eatre lo hna qaja ka hape, troa “thapa” la lapa. Hna qanangazone la itre Keresiano hna iën hnene la itre ithupëjia, nge tha meköti kö la aqane iameköti angatr. Nge hnene la itre ithupëjia hna wathebone kowe la itre hna iën troa tro fë itus, me cainöj. Itre ewekë lai hna “thöeëne” maine hna thapa qa ngöne lo lai lapa hna qaja ngöne la hna perofetan.
6 Ngacama hnene la ithupëjia hna qanangazone la itre hlue i Akötresie, me sili trenga thoi angatr, ngo tha apëne ju kö angatr la nyipi hmi. Ketre, mele nyipici ju kö lo itre Keresiano hna iën. Angatre lo “kete hafe ne la nöj” hna qaja hnei Zakaria, nge tha hna “thupa [triji angatre kö] qa ngöne la lapa.”
7. Nemene la tulu hna hamëne koi së hnene la itre Keresiano hna iën?
7 Ame hë la kola ase lo Pane Isi Ka Tru, tre hapeu, hna qanangazone pala hi la itre hlue i Akötresie? Eje hi, tha fenesi pala kö lo iaxösisi hna perofetane hnei Zakaria. (Hna ama. 12:17) Ame hë la kola traqa lo Hnaaluene Isi Ka Tru, hna axösisine hmaca kö la itre trejine me easë; ngo hnei angatre pala hi hna mele nyipici. Nge kola ithuecatre koi së hnene la tulu i angatre troa hane cile catr, ngöne la easa ixelë memine la nöjei pengöne jol. Ame la itre xa jole hne së cile kow, tre ene la kola hnyima sai së hnene la itre sine ini me sine huliwa së, pi hmi. (1 Pet. 1:6, 7) Ngo loi e tro sa isa catre mele nyipici ngöne la isa nöje së, nge tha tro pi kö sa xouene la icilekeu. (Fil. 1:27, 28) Ngo tro sa atreine cile catre tune kaa ngöne la fene celë ka methinë së?—Ioane 15:17-19.
IEHOVA A HNËKËNE LA “HNATHUPE ATRAQAT”
8. (a) Nemene la hna nyihatren e itre xa ijin, hnene la itre wetr hna qaja hnine la Tusi Hmitrötr? (b) Nemene la hna nyihatrene hnene “la wete Elaio”?
8 Atre hë së ka hape, ame lo “lapa,” ene Ierusalema, tre ej a nyi hatrene la Baselaia i Akötresie. Ngo nemene kö “la wete Elaio, hmekun’ e Ierusalema e kohië”? Nge tro sa trotrohnine tune kaa lai kola qaja ka hape, hna “thupa luëne [la wetr] nyipin’ ej”? Nge hnauëne laka, Iehova a hëne lue ej, ka hape, “ite weteng”? (E jë la Zakaria 14:3-5.) Ame la itre wetr hna qaja hnine la Tusi Hmitrötr ngöne la itre xa ijin, tre kola nyi hatrene la itre baselaia me mus. Nge Tusi Hmitrötre fe a qaja ka hape, ame la wetre i Akötresie, tre celë hi hnë zae, nge kola xulu qa cili la itre manathith. (Sal. 72:3; Is. 25:6, 7) Haawe, mus i Iehova la hna nyihatrene hnene la wetre Elaio.
9. Nemene la aqane tro sa trotrohnine lai hnaithanata hna hape, troa thupa luëne la “wete Elaio”?
9 Hna perofetane hnine la Tusi Hmitrötr ka hape, troa thupa luëne la wetr Elaio. Tro sa trotrohnine tune kaa la ithanata celë? Iehova a troa acile la ketre mus, matre troa eatrëne la ketre mekuana i Nyidrë. Mus i Nyidrëti fe hi lai hnaaluene mus, ngo Iesu Keriso pe la ka cilën. Celë hi kepin, matre Iehova a qaja göne la lue musi cili hna nyihatrene hnene la lue wetr, ka hape, “ite weteng.”—Zaka. 14:4.
10. Nemene la hna nyihatrene hnene lo “hnathup atraqat,” akawane la lue wetr?
10 Kola qaja hnene lai hna perofetane ka hape, ame la kola thupa luëne la wetr Elaio, tre ketre sin a tro ailopi, nge ketre a tro ailojë; nge lue waca i Iehova a isa atrëne la lue wetr. Nge ame e cili, akawai lue wetr, fene la lue ca i Iehova, tre mama pi hi la “hnathupe atraqat.” Ngo nemene la hna nyihatrene hnene lai hnathup? Kolo hi a nyihatrene la aqane thupë së hnei Iehova. Ame la itre atr ka mele e nyipine la hnathup, akawane la lue wetr, tre angatr a lapa ngöne la gaa xeut. Ketre tune mina fe, kola mele tingetinge la itre hlue i Iehova fene la mus i Nyidrë, me musi ne la Hupuna i Nyidrë. Nge tro pala kö Iehova a thupën, matre tha tro kö a lepe apatrene la hmi ka wië. Ngo eue la kola thupa luëne lo wetr Elaio? Ene lo macatre 1914, macatre ne Iesu a nyiqaane musi e hnengödrai. Kolo mina fe a qaja koi së hnene lo hna perofetane ka hape, tro la itre hlue i Akötresieti a kötr kowe lai “hnathup atraqat.” Ngo eue la angatr a kötr a tro cili?
KOLO HA NYIQAANE KÖTRE KOWE LA HNATHUP!
11, 12. (a) Eue la kola nyiqaane kötre la itre hlue i Akötresieti kowe lo hnathup? (b) Nemene la ka amamane ka hape, hnei Iehova pala hi hna thupëne la itre hlue i Nyidrë?
11 Hnei Iesu hna thuemacane la itretre drei nyidrëti me hape: “Troa methinë nyipunie hnene la nöjei nöj’ asë pine la ëjeng.” (Mat. 24:9) Kola mama hnyawa la hatrene la imethinë cili qaane lo macatre 1914, ijine kola nyiqaane lo itre drai hnapin. Ame ngöne lo ijine lo Pane Isi Ka Tru, hnene la ithupëjia hna axösisine la itre Keresiano hna iën, ngo tha lepe apatrene ju kö angatre la nyipi hmi. Ame hë lo macatre 1919, mele hë la itre hlue i Akötresie qa ngöne la hmi ka thoi, ene Babulona Atraqatr. (Hna ama. 11:11, 12) a Celë hi macatre ne kola nyiqaane kötre la itre hlue i Akötresieti kowe la hnathup.
12 Qaane ju hi lai macatre 1919, hnei Iehova pala hi hna thupëne la itre hlue i Nyidrë, ka mele e cailo fen asë. Itre macatre ne thele la itre musi troa sawa la Itretre Anyipici Iehova troa cainöj, me tro fë itus. Itre ewekë la hna melëne pala hi enehila hnene la itre hlue i Akötresieti ngöne la itre xa nöj. Ngo tha hnei Iehova kö hna nue la itre musi cili troa lepe apatrene la nyipi hmi. Kuca ju hë hnei itre musi la nöjei pengöne ewekë, ngo tro pala hi Iehova a thupëne la itre hlue i Nyidrëti hnene la ime i Nyidrëti ka catr.—Deu. 11:2.
13. Tro sa lapa tune kaa ngöne la hnathupe i Iehova? Pine nemene matre nyipi ewekë catre enehila troa lapa hnyawa ngöne la hnathupe i Nyidrë?
13 Ame la aqane tro sa lapa ngöne la hnathupe hna hnëkëne hnei Iehova, tre ene la troa mele nyipici koi Nyidrë. Pëkö ka atreine troa thepe së qa ngöne la ime i Iehova me Hupuna i Nyidrë nyidro. (Ioane 10:28, 29) Iehova a xatua së troa nyipici kowe la mus i Nyidrë, me musi ne la Hupuna i Nyidrë. Nge tro pala kö sa öhne la enyipiewekëne tro Nyidrëti a thupë së ngöne la ijine akötr atraqatr elany. Haawe, the tro trije pi kö së la hnathupe i Iehova.
CALEMI HË “LA DRAI NE ISHI”
14, 15. Nemene la ka troa traqa kowe la itre atr ka tha lapa kö fei Iehova, ngöne la ijine Nyidrëti a troa isi memine la itre ithupëjia me Nyidrë?
14 Troa tro la itre drai, nge tro fe a catrehnine catre la aqane icilekeu i Satana kowe la itre hlue i Akötresie, uti hnyawa ha la pune la fene celë ka ngazo. Ngo aca tro pala kö Satana a thele troa lepe la nöje i Akötresie. Ame ngöne la ijine cili, tro Iehova a cile matre isi memine la itre ithupëjia memine la nöje i Nyidrë, me apatrenyi angatr. Celë hi lo “drai ne ishi” Akötresie hna perofetane hnei Zakaria. Tro la isi cili a amamane hnyawa, ka hape, pëkö ketre Atre Isi tui Iehova.—Zaka. 14:3.
15 Ngo nemene fe la ka troa traqa kowe lo itre ka tha zae kö fei Akötresie, ngöne la ijine tro Nyidrëti a isi memine la itre ithupëjia me Nyidrë? Kola qaja hnene lo hna perofetane ka hape, “tha tro kö a mama la lai ka loi” koi angatr. (Zaka. 14:6, 7, 12, 15) Celë hi ithanata lai ka amamane ka hape, tha tro pë hë a hane kepe angatre hnei Akötresie. Ngo önine lai hna perofetane ka hape, tro la “hose, me meul, me kamela, me asina, me nöjei öni asë” a “melöhlemi pe.” Itre trenge ewekë la ka amamane ka hape, pë ju kö traeme ne tro la itre atr a huliwane la itre jia ne isi angatr ngöne la drai Akötresie. Öni Zakaria ka hape, tro Iehova a lepe la itre ithupëjia me Nyidrë hnei “meci ka sholeshol.” Nge “troa ae” la sesepeneqe i angatr me “ea” la itre lue meke i angatre ngöne la ijine cili. Thatre pë hë së ka hape, nyipi meci kö la hna qaja, maine kola nyihatrene la ewekë ka troa traqa. Ngo ame pe, kola mama jëne lai hna perofetane ka hape, pë ju kö ijine tro angatr a lepi së maine qaja angazo Akötresieti pena. (Zaka. 14:6, 7, 12, 15) Tro la “nöjei joxu ne fen, me ite ishi angat” a ce xöle me Satana. Nge tro asë hi angatr a patre qa ngöne la ihnadro. (Hna ama. 19:19-21) “Nge ngöne la drai cili tro la ite tha i Iehova a eje ngöne la kete cane la fene uti hë la kete cane la fen.”—Iere. 25:32, 33.
16. Nemene la hne së hna troa isa hnyingëne thel? Nemene la ka nyipi ewekë troa kuca e traqa ha elanyi la akötr atraqatr?
16 Ame ngöne la nöjei isi, tre akötr asë hi la itre atr, goi akötre fe hnene la itre ka hune ngöne la isi. Haawe, ame ngöne la ijine akötr atraqatr, tro fe sa hane akötr. Maine jë, tro fe sa mecijin, nge tro fe a luzi la itre ewekë hne së hna hetreny. Ketre, maine jë tha tro hë a hane metrötrëne la mele së hnene la itre atr. Ngo nemene la hne së hna troa kuca? Tro kö sa hnehengazo menu? Tro kö sa nanazije me nuetrije la mejiune së? Tro kö sa nuetriji Iehova? E traqa ha elany la akötr atraqatr, catre pi së troa nyipici koi Iehova, ke aqane tro hi së lai a lapa hnyawa ngöne la hnathupe i Nyidrë; nge lapaune jë së ka hape, tro kö Nyidrëti a thupë së.—E jë la Habakuka 3:17, 18.
“TROA DI LA TIMI KA MEL”
17, 18. (a) Nemene “la timi ka mel”? (b) Nemene la hna nyihatrene hnene “la hnagejë e kohië” memine “la hnagejë e kuë”? (c) Nemene la nyine tro pala hi sa catre kuca?
17 Ame hë la kola ase la isi Amagedo, “troa di la timi ka mele” qa ngöne la Baselaia i Keriso. Ame “la timi ka mele” hna qaja e celë, tre kola nyi hatrene la nöjei hnei Akötresieti hna hnëkëne thatraqane la itre atr matre tro angatr a mele epine palua. Ame “la hnagejë e kohië” hna qaja hnene la tus i Zakaria, tre kolo hi a qaja lo hnagejë hna ati ëjen, ka hape la mer Morte nge kola nyihatrene la itre atr ka mec. Nge ame “la hnagejë e kuë,” tre kolo hna hëne ka hape, la mer Méditerranée, nge kola nyihatrene la “ka ala nyimu atraqat” ka troa mele pe qa ngöne la isi Amagedo. (E jë la Zakaria 14:8, 9; Hna ama. 7:9-15) Tro asë hi la itre atr cili, itre ka mec me itre ka mel, a iji “la timi ka mele” ka di qa ngöne “la hneopegejë timi ne mel.” Celë hi lai ka aijijë angatr troa pexeje me mele epine palua.—Hna ama. 22:1, 2.
18 Ame la Iehova a troa apatrene la fene celë ka ngazo, tro Nyidrëti a thupë së, me tro xomi së kowe la fene ka hnyipixe. Methinë së ju hë hnene la nöjei nöje ne la fene celë, ngo ka xecie hnyawa e kuhu hni së laka, tro kö sa mele nyipici kowe la Baselaia i Akötresie, me lapa hnyawa ngöne la hnathupe i Iehova.
[Ithueamacany]
a Wange ju lo itus La Révélation : le grand dénouement est proche ! götrane 169-170.
[Thying]
[Iatr ne la götran 17]
[Iatr ne la götran 21]
The tro trije pi kö së la hnathupe i Iehova
