Ketre Sinee i Kaiafa Angeic
Ketre Sinee i Kaiafa Angeic
Ame itre xa ijin, kola aijijë së troa jele nyipicine la hna qaja e hnine la Tusi Hmitrötr, hnene la itre ewekë hna öhne hnene la itre ka thele troa atrepengöne la aqane mele ne la itre atr ekö. Celë hi lai hna kuca hnene la itre ka ithele qa Isaraela, matre feja itusi jë pë hë ngöne lo macatre 2011, göi troa ithuemacany ka hape, öhnë hë angatre la ketre ewekë. Hnei angatre hna öhne la ketre hnë ami wezipo ka 2 000 hë lao macatren enehila; kösë lo pua etë la trengen, nge hna siji hatrene nyine amingömingön. Hnene la itre atr ekö hna pane treqene matre hnyeqetre pi la wezipo, matre e thupen, kolo ha amë la itrapa june ngöne lai trengen.
Hanawange la hna sija e cili ngöne lai hna ami wezipo: “Miriama nekö i Yesua nekö i Kaiafa, atre huuje ne Maazia atre Beth ʹImri.” Ame lo tane i angetre huuje ekö ka hane ce thë me itre xa atr troa kootrë Iesu me humuthi nyidrë, tre ka sine fe angeice la lapa i Kaiafa. (Ioane 11:48-50) Angeice hi lo “Iosefa, hna hëne fe ka hape Kaiafa,” hna qaja hnene la ketre atr ka thele troa atrepengöne la aqane trongene la mele ne la atr, ene Flavius Joseph. Qa ngöne lai, ame lo lai pua, tre, celë hi göhnene la ketre sinee i Kaiafa. Ame lo ketre pua ne ami wezipo hna pane öhne hë, tre kola mekune ka hape, pua ne lo tane i angetre huuj, pine laka hna sija ngöne lai pua ka hape, “Yehosef bar Caiapha,” pengön, Iosefa, nekö i Kaiafa. a Qa ngöne lai, ma ame jë la Miriama celë, tre ketre sinee i Kaiafa jë hi.
Hetrenyi la ketre organizasio ka thele troa atre la aqane mele ne la itre atr ekö, hna hëne ka hape, Israel Antiquities Authority (IAA). Öni angatre göne la pua hnë ami Miriama ngön ka hape, hna thapa hmaca qaathene la itre atrekënö ka thi hua. Ngo ame hë thupene la kola goeëne hnyawa lai pua, me öhne lai hna sija, tre angatr a trotrohnine ju ka hape, nyipi pua i Miriama hi.
Hetre ketre ithuemacany ka hnyipixe fe hna hamëne koi së hnene lo hna sija ngöne lai pua ne ami wezipo. Kola qeje “Maazia,” ene lo lapa tixenuë ne lo 24 lao lapa i angetre huuj, hna thawa matre troa ithöeëne la huliwa hnine la ēnē e Ierusalema. (1 A. l. Ite jo. 24:18) Celë hi matre easa trotrohnine jëne la hna qaja hnene la IAA, ka hape, ame la “lapa i Kaiafa, tre angatre hi la ka hane sine la lapa i Maazia.”
Hna hane fe sija e cili ngöne i pua la ketre ëj, ene Beth ʹImri. Lue ewekë la hna mekuhnine hnene la IAA, ngöne la angatr a goeëne lai ëje cili. “Ame la mekune hnapan, tre ene laka, ketre lapa i angetre huuj la Beth ʹImri, itre ka fetra qaathei Imer. (Ezera 2:36-37; Neh. 7:39-42) Nge ame la lapa i Maazia, tre itre ka fetra hi angatre lai qaathei Imer. Nge ame la hnaaluen, tre kola mekune ka hape, ame la [Beth ʹImri] tre celë hi götrane hna mele ngön hnene lai wezipo, maine hnene la lapa i angeic asë.” Thatre pengöne hnyawa kö së ka hape, ekaa la ka nyipici ngöne la lue mekune cili, ngo ame pe, atre hi së jëne la pua hnë ami Miriama ngön ka hape, ame la itre ëje hne së hna öhne ngöne la Tusi Hmitrötr, tre ëje ne la itre atr ka mele ekö.
[Ithueamacany]
a Ame göne la pua ne wezipo hnë ami Kaiafa, wange ju lo tane mekune hna hape “Angeice lo Tane i Angetre Huuje Ka Kootrë Iesu,” ngöne la Ita Ne Thup qene faras ne 15 Januare 2006, götrane 10-13.
[Iatr ne la götran 30]
E cili trön: Ngönemenyi hnë amë la itre pua ne la itre ka mec
[Hna xome ngön la foto]
Todd Bolen/BiblePlaces.com
[Iatr ne la götran 30]
[Hna xome ngön la foto]
Boaz Zissu, Bar-Ilan University, Israel
