Itre Hna Kuca Ekö

Hna Traqa Ngöne La Nyipi Ijin, Nge “Thatreine Kö Troa Thëthëhmin”

“THATREINE KÖ TROA THËTHËHMIN!” Celë hi lai hna qaja göne la film hna amamane ekö hna hëne ka hape, “Drame de la Création” qene faras. Hna traqa la ewekë cili ngöne la nyipi ijin, nge ame göi itre ka goeëne lai film cili tre, tha thëthëhmine kö angatr la hnei angatre hna goeën. Nyipici, ase petre hi lai “Drame de la Création” qaja aloinyi Iehova qëmekene tro la mus i Hitler a axösisine itre hlue i Nyidrëti e Erop. Ngo nemene lai ewekë cili, ene lai hna hape, “Drame de la Création”?

Ame ngöne lo macatre 1914, hnene lo itre ka xomi meköti thatraqane la itre hlue i Iehova qa Amerika e Brooklyn e Newe Yok, hna kuca la peleihaus, me hëne ka hape “Photo-Drame de la Création.” Ame la peleihaus, tre itre foto ka nyimu han hna amë wengëne ngöne itre film, nge hna hane ami miuzik fe. Ketre, eitr lao hawa ne troa pane goeëne asë la peleihaus. Itre milio lao atr ka goeëne lai “Photo-Drame” e cailo. Hna hane kuca la ketre peleihaus ka nango hopatre kö hune lo hnapan, me hëne ka hape “Eureka-Drame,” ngöne pala hi lai macatre 1914. Ngo ame hë la kola traqa kowe la itre macatre 1920, ngazo catre hë la itre foto me itre film, nge ngazo fe hë lo peleihaus. Ngo ame pe, tha mano kö itre atr sipone matre troa amamane koi angatre lo lai “Photo-Drame.” Ame e Ludwigsburg e Alema, hnene la itre atr hna hnying ka hape, “Eue hmaca la troa amamane koi huni la ‘Photo-Drame’?” Nemene ju hë la hna kuca?

Ame ngöne lo itre macatre 1920, hnene la kometr ne la Bethela ne Magdeburg e Alema, hna itöne la itre film qa ngöne la ketre hna salemë zonal e Paris e Faras, matre troa kapa la aja ne la itre atr ka pi goeëne la peleihaus. Hnei angatre fe hna hane itöne la itre hnë troa amë la itre foto, qa ngöne la itre xa hna salem ngöne la lue xa traon e Alema, ene Leipzig me Dresde. Angatre pë hë a xome jë la itre film me itre foto ka hnyipixe me itre xan qa ngöne lo “Photo-Drame” hnapane ka loi petre kö, nge angatre pë hë a iacatrenekeune ju.

Ame göi miuzik, tre hnene pë hë la ketre trejine ka atreine elo miuzik, ene Erich Frost, hna kuca matre, e goeëne hë itre atr la peleihaus, tre hetre miuzike fe. Ame la film hna goeën, tre kola amamane la hna qaja ngöne lo itus Création. Celë hi kepine matre, ame hë la kola ase kuca lo peleihaus ka hnyipixe, tre kolo pë hë a hëne ju ka hape, “Drame de la Création.”

Ame la eqeane la film ka hnyipixe tre, eitr lao hawa, tune lo Photo-Drame hnapan, nge hna thawathawa matre nyimu heji ne troa wange ngöne la itre götrane hna isa könën la itre atr kow. Kola amamane hnene la peleihaus la aqane xupi ewekë i Akötresie, memine la itre hna melëne hnene la itre atr hna qaja hnine la Tusi Hmitrötr, me itre atr ne fen, me qajaqaja ka hape, tha hna kuca kö hnei itre hmi ka thoi la hnëqa i angatr. Ase hë amamane la “Drame de la Création” e Autriche, me Alema, me Luxembourg, me e Suisse, me ngöne la itre götrane ka qene Alema.

Öni Erich Frost ka hape: “Ame e koilo ngöne hna goeëne la peleihaus, maine kola pane mano, treqene la kola saze bobin, tre eni mina lai a upe la itre sine huliwang, ene lo itre ka ce elo miuzik me eni, troa trongëne la  itre xötre cea matre troa hamëne trongëne kowe la itre atr la itre sine itus. Tru ju kö la itre itusi hne huni hna hamëne e cili, hune la itre itus hna tro fë ngöne itre hnalapa trootro.” Kola qaja hnene la ketre trejin, ene Johannes Rauthe ka hape, ame la angatr a tro Pologne me République-Tchèque troa amamai peleihaus kowe la itre atrene la itre nöje cili, tre, goi hamëne fe itre atr la itre hune tus i angatr, matre tro la itre trejine a tro troa wai angatre hmaca. Ame e thupen, hetre thangane hë la hnei itre trejine hna tro troa wange la itre atr cili.

Ame hë ngöne lo itre macatre 1930, tre ka catr pala pe hi la itre götrane hna hnëkëne thatraqane lo peleihaus hna hape, “Drame de la Création,” nge tha mano kö itre atr porotrikëne la Itretre Anyipici Iehova. Ame hë hmekune lo macatre 1933, easenyi koi 1 milio lao atr ka wange hë lai peleihaus hna kuca hnene la hnalapa ne thewe huliwa e Alema. Öni Käthe Krauss ka hape, “ame lo lai faifi lao drai ne kola amamai peleihaus, tre hne huni hna pane cili thenge hnaxulu, me trongëne la itre gaa draië, me kuhu thenge itre hnathup, a traqa koi 10 km ne eahuni a pane tro, göne hi matre traqa pi huni troa hane wange la peleihaus.” Ame Else Billharz, tre hnei angeic hna qaja ka hape, “Hnene hi la hnenge hna goeëne lai ‘Drame de la Création’ matre cia jë e kuhu hninge la ihniminge kowe la nyipici.”

Ame pena Alfred Almendinger, öni angeice ka hape, ame ju hi la thine i angeic a ase wange lo peleihaus, tre, hnene laka, “madrine catre eahlo, ene pe traqa ju hi eahlo a itö Tusi Hmitrötr, me thele ka hape, ekaa la hna cinyihane lo hnaewekë hna hape, ‘purgatoire.’ ” Ame ju hi la eahlo a öhne ka hape, patre fe kö e hnine la Tusi Hmitrötr la hnaewekë cili, tha tro ju hi eahlo troa hmi ngöne uma hmitrötr, nge eahlo pë hë a xomi bapataiso jë. Ame Erich Frost, tre mekune jë hi nyidrëti ekö ka hape, “ala nyimu catre ekö la itre atr ka lö kowe la nyipici, hnene la hna goeëne lo ‘Drame de la Création.’ ”—3 Ioane 1-3.

Ame ju hi la kola tru catr la etrune la itre atr ka goeëne la “Drame de la Création,” tre kolo fe hi a ketre catrehnine e Erop la mus i Nazi. Ame hë la kola xejë la macatre 1933, tre kolo ha wathebone hnei musi la huliwa hna tro fë hnene la Itretre Anyipici Iehova e Alema. Qaane ju hi lai macatre cili uti hë la kola umuthe lo hnaaluene isi ka tru lo macatre 1945, ase petre hi axösisine la itre hlue i Iehova e Erop. Kola e la eitr lao macatre ne kola pane umë Erich Frost e kalabus. Loi pe, mele kö nyidrë, nge ame hë e thupen, nyidrëti ha huliwa ngöne la Bethela e Wiesbaden, e Alema. Traqa pë hë la Hnaaluene Isi Ka Tru troa tupath la lapaune ne la itre Keresiano, nge ase hë pane ithuecatre koi angatre hnene la “Drame de la Création!”—Itre hna kuca ekö e Alema.

[Iatr ne la götran 31]

Iatr ne ihë troa wange lo “Drame de la Création,” macatre 1932

[Iatr ne la götran 31]

Hnene la itus Schöpfung (Itre Hna Xup) matre ati ëjen jë pë lo peleihaus ka hnyipixe

[Iatr ne la götran 32]

Erich Frost memine la itre paatr ne miuzik thatraqane la “Drame de la Création”

[Iatr ne la götran 32]