Wange Kö Sewe Nyipunieti Jë Troa Xome La Atrun
Wange Kö Sewe Nyipunieti Jë Troa Xome La Atrun
“Tro la ate hni ka ipië a xome la atrun.”—ITE EDOMË 29:23.
TRO NYIPUNIETI A SA TUNE KAA?
Akötresieti a atrune tune kaa la atr?
Nemene la ka troa sewe së troa kapa la atrun qaathei Akötresie?
Tro la aqane xomi hnine së la itre jol a xatuane tune kaa la itre atr troa kapa la atrun qaathei Akötresie?
1, 2. (a) Nemene la aliene la hnaewekë qene Heberu, ka qaja la hna “atrun”? (b) Nemene la itre hnyinge hne së hna troa sa jëne la tane mekune celë?
AME la kola qaja ka hape, hna “atrun,” nemene la mekune ka canga mama koi së? Maine jë tro sa mekune la emingömingöne la itre ewekë hna xupe hnei Akötresie. (Sal. 19:1) Maine pena tro sa mekune la itre atr ka trenamo, me ka inamacan, hna haine me wang atrun. Ame pena thei angetre Heberu ekö, ame la kola qaja la hna “atrun,” tre angatr a mekune la ehacene la mani. Ke e hace la mani, kolo lai a hape, tru la gole maine sileva hna xom nyine kuca lai mani. Haawe, ame la ewekë hna “atrun,” tre ewekë ka tru nge ka sisitria catre kowe la atr.
2 Hnene la itre atr hna pune majemine troa atrune la atr ka cilëne la itre hnëqa ka tru maine ka hlemu pena. Ngo nemene fe la hnei Akötresieti hna goeëne thene la atr hnei Nyidrëti hna mekune troa atrun? Kola sa hnene la tus i Ite Edomë 22:4 ka hape: “Ame la thangane la ipië ene la qoue Iehova, te, mo, me atrun, me mel.” Öni Iakobo fe ka hape: “Aipië nyipunieti ju qëmeke i Joxu, nge tro nyidëti a adraië nyipunie.” (Iako. 4:10) Iehova a atrunyi së tune kaa? Nemene la itre ka troa ajolë së troa kapa la atrun? Nge tro sa xatua itre atr tune kaa troa kapa la atrun?
3-5. Iehova a atrunyi së tune kaa?
3 Ka xecie hnyawa e kuhu hni ne la atre cinyihane la Salamo ka hape, tro Iehova a atrunyi angeic. (E jë la Salamo 73:23, 24.) Iehova a atrune tune kaa la itre atr ka drenge thenge Nyidrë? Nyidrëti a kepe angatr, me amanathithi angatr. Nyidrëti a xatua angatre troa atrepengöne la aja i Nyidrë, nge Nyidrëti a aijijë angatre troa ce sinee me Nyidrë.—1 Kor. 2:7; Iako. 4:8.
4 Iehova mina fe a atrunyi së jëne la ketre hnëqa hnei Nyidrëti hna ahnithe koi së, ene la troa cainöjëne la maca ka loi. (2 Kor. 4:1, 7) Ame la easa qaja aloinyi Iehova ngöne la easa cainöjëne la maca ka loi, tre, ketre Nyidrëti fe hi lai a atrunyi së, nge qa ngöne lai, itre xane fe a hane kepe thangane ka loi. Ke ase hë Iehova ahnithe koi së ka hape: “Tro ni a atrunyi angat’ anget’ atrunyi ni.” (1 Sam. 2:30) Iehova a kapa madrine la itre ka cainöj, nge ka hlemu loi angatr xajawa i Nyidrë; hatrene hi laka Nyidrëti atrunyi angatr. Nge itre atr lai hna hane qaja aloine e hnine la ekalesia.—Ite edomë 11:16; 22:1.
5 Nemene la edrö ne la itre ka drenge thenge Iehova? Kola sa hnei Tusi Hmitrötre ka hape: “Tro nyidëti a adraië eö mate hetenyi eö la nöj ; tro eö a goeëne la kola thupa tije la ite ka ngazo.” (Sal. 37:34) Haawe, tro ha mele epine palua hnene la itre hlue i Akötresie.—Sal. 37:29.
“THA KAPA KÖ NI LA NYINE ATRUNE QA THEI AT”
6, 7. Pine nemene matre ala nyimu la itre atr ka tha lapaune kö ka hape, Iesu la Mesia?
6 Hapeu, hetre itre ewekë kö ka troa ajojezi së troa kapa la atrune qaathei Iehova? Eje hi. Ame la ketre, tre ene la troa wang atrune pala ha la mekuna ne la atr ka tha imelekeu hnyawa kö me Iehova, tune la itre xa ka cilëne la itre hnëqa ka tru ekö, ngöne lo hneijine i Iesu. Öni Ioane aposetolo ngöne la tus i angeice ka hape, ame lo itre xa atr, tre ka lapaune hi angatre koi Iesu, “ngo tha hnei angate kö hna amamane, göi angete faresaio, wanga helë angate qa ngöne la sunago ; ke angat’ a ajane la nyine atrune qa thei ate hune la nyine atrune qa thei Akötesie.” (Ioane 12:42, 43) Tha ka loi kö tro la itre tane la nöj ekö, a wange atrune catrëne ju pë hë la mekuna ne la itre Faresaio.
7 Hnei Iesu hna qaja la kepine matre nyimutre la itre atr ka tha tro pë hë a lapaune ka hape, nyidrëti la Mesia. (E jë la Ioane 5:39-44.) Ekö catre hë treqe Mesia hnene la nöje Isaraela. Ame itre xan, tre nyiqaane pë hë Iesu cainöj, nge trotrohnine fe hë angatr, jëne lo itre trenge ewekë i Daniela perofeta, ka hape easenyi hë troa traqa la Mesia. Goi mekuhnine fe angatr ka hape, Ioane Bapataiso la Mesia. (Luka 3:15) Ngo ame hë la kola mama la Mesia, tre tha lapaune kö lo itre ka inine la hna qaja hnei Tusi Hmitrötr ka hape, Iesu la Mesia. Pine nemen? Kola mama la kepine ngöne la aqane hnyinge i Iesu koi angatre ka hape: “Ateine tune ka nyipunie troa lapaun, angete ikapakeune la nyine atrune qa thei nyipunieti kö, nge tha thele kö la nyine atrune qa thei Akötesieti hmekuj ?”
8, 9. Xome jë le ketre ceitune nyine amamane ka hape, ame itre xa ijin, tre ma tru hë koi së la troa atrunyi së hnei atr, hune la troa atrunyi së hnei Iehova.
8 Ame ngöne la itre xa ijin, tre tru hë kowe la atr la troa atrunyi angeice hnei ketre atr, hune la troa atrunyi angeice hnei Akötresie. Tro sa pane ithanatane la itre ewekë ka melemel, matre tro sa atreine trotrohnine la kepine matre kola ujë tune lai hnene la atr. Nyimutre la itre ewekë ka melemel e koho hnengödrai. Ame la easa gala draië me goeëne la hnengödrai e jidr, nge pëkö iaw, tre easa öhne la itre wëtresij; thatreine kö tro sa e, ke tiqa catr. Ame la easa goeëne itre ej, tre easa hai, ke mingöminge itre ej e caha. (1 Kor. 15:40, 41) Ngo ame la easa lapa ngöne la traon, tre kösë hajihaji koi së la itre wëtresij. Pine nemene jë? Tha hnene kö laka, ka mele catr maine ka mingöminge catre kö la itre laame ka thinaane la itre gojeny, hune la itre wëtresij, me itre hnë kuci elo, maine itre hnalapa pena. Ngo hnene laka, easenyi catre koi së la itre laame cili, celë hi kepine matre, kösë jole hë tro sa öhne la itre wëtresij. Qa ngöne lai, maine easa ajane troa mama hnyawa koi së la itre wëtresiji e jidr, tre loi e tro sa tro ananyine la traon.
9 Ceitune hi lai memine la kola atrunyi së hnene la atr, ijije hi tro ej a aukene la hni së, matre tha nyipi ewekëne hë së la aqane atrunyi së hnei Iehova. Ala nyimu la itre atr ka tha kapa kö la maca ka loi, ke angatr a xouen, wanga qeje angatre jë hnene la itre atrene la hnepe lapa i angatr, me itre sinee i angatr. Maine jë tro fe a hane tune lai hnene la itre ka nyi hlue i Iehova ha. Ka tune la nekö trahmanyi hna up troa cainöje ngöne la ketre götrane hna lapane hnene la itre atr hnei angeice hna atre. Thatre kö hnene la itre atr cili, ka hape Atre Anyipici Iehova angeic; celë hi matre xou i angeic troa tro kowe la götrane cili troa cainöje koi angatr. Ka tune fe hi la atr ka ajane troa huliwa atrunyi koi Iehova, ngo hna hnyima fë hnei itre xan. Maine jë tro angeic a drenge menune la hna qaja hnene la itre ka tha wange atrune kö la huliwa i Iehova, tui angeic. Nge tune kaa fe göne la atr ka kuca la ketre ewekë ka ngazo? Maine jë tro angeic a juetrëne la hnei angeice hna kuca, ke kola xouene wanga ami angeice jë qa ngöne la itre hnëqa hnei angeice hna cilëne e hnine la ekalesia, maine wanga akötrëne jë angeice la itre sinee i angeic, me itre atrene la hnepe lapa i angeic. Ame la nyine tro angeic a kuca matre troa amamane ka hape, sisitria kö koi angeic troa atrunyi angeice hnei Iehova, tre, ene la troa wange la itre qatre thup, me sipo angatre troa xatua angeic, matre lolo hmaca jë la aqane imelekeu i angeice me Nyidrë.—E jë la Iakobo 5:14-16.
10. (a) Nemene la ka troa traqa koi së e tru pala ha la hne së hna wange atrune la aqane goeë së hnei itre atr? (b) Nemene la thangane koi së, e tro sa ipië?
10 Maine jë nyipunieti a mekune ka hape, nyipunieti a catre huliwa matre troa nyipi atr, ngo hetre trejine pala hi ka qaja koi nyipunie ka hape, hetre nyine tro pala kö nyipunieti a saze. Ame hë e cili, qanyi nyipunieti iën: ene la troa kapa la eamo me öhnyi thangane ka loi qa ngön, maine troa drei simin ke pi tru la hni nyipunie, nge xele nyipunieti troa qeje nyipunie, maine pena, nyipunieti a upe kowe la ketre ewekë. Pane mekune jë nyipunieti ka hape, nyipunieti a ce huliwa memine la itre xa trejin. Ngo hapeu, nyipunieti kö a hnyingëne thele ka hape, drei jë la hna troa qaja aloin e nyipunie? Maine nyipunieti a öhne laka, hetrenyi nyipunieti la itre itine celë, the thëthëhmine pi kö ka hape “tro la ate hni ka ipië a xome la atrun.”—Ite edomë 29:23.
11. Nemene la nyine tro sa kuca e traqa ju qaja aloinyi së hnei itre atr? Nge pine nemen?
11 Loi e tro la itre qatre thup me itre trejine trahmanyi ka catre huliwa thatraqane la ekalesia, a thupëne laka, tha angatre kö a thele “la nyine atrune qa thei at.” (1 Thes. 2:6; 1 Tim. 3:1) Nemene la nyine tro la trejine trahmanyi a kuca, e traqa ju itre trejine atrunyi angeice pine la ewekë hnei angeice hna kuca? Atre hi së ka hape, tha tro kö angeice lai a acile la ketre hatrene thatraqai angeic, tune la aqane kuca i Saulo Joxu. (1 Sam. 15:12) Ngo hapeu, tro kö angeic a wange atrehmekune ka hape, ame la atreine jë angeice eatrëne la huliwa, tre hnei Iehova, nge tro pala kö a ie la itre huliwa angeic e tro Iehova a xatua angeic, me amanathithi angeic? (1 Pet. 4:11) Ame la kola qaja aloinyi së hnene la itre atr, tre tro la itre aliene hni së a qajaqaja ka hape, easa ajane troa kapa la atrune qaathei drei.—Ite edomë 27:21.
“PI TRO NYIPUNIE A KUCA LA ITE AJA i KEME i NYIPUNIE”
12. Pine nemene matre thipetrije pë hë hnei itre xa angetre Iudra la maca hnei Iesu hna tro fë?
12 Ame la ketre ewekë ka troa sewe së troa kapa la atrun qaathei Iehova, tre ene la itre aja së ka ngazo. Hnene la itre aja cili ka ngazo hna uku itre xan troa drei simine la nyipici. (E jë la Ioane 8:43-47.) Ka tune lo itre xa angetre Iudra hnei Iesu hna qaja nge ka thipetrije la maca hnei nyidrëti hna tro fë, ke, öni nyidrëti ka hape, pi tro kö angatr a kuca la itre aja ne la keme i angatr, ene Diabolo.
13, 14. (a) Nemene la hnene la itre ka inamacane hna trotrohnin, göne la aqane drenge së la itre ewekë? (b) Pine nemene matre easa iëne troa drei ketre?
13 Ame itre xa ijin, tre hne së hna thë hi troa drei simine la itre xa ewekë. (2 Pet. 3:5) Hnei Iehova hna xupi së troa atreine drei simine la itre xa ewekë. Ngo maine tro nyipunieti a pane cil, me thele troa mekune la nöjei pengöne ewekë hnei nyipunieti hna dreng, tre tro nyipunieti a wange atrehmekune ka hape, hetre itre ewekë tha hnei nyipunieti kö hna drenge hnyawan. Pine nemen? Maine nyipici laka, atreine hi tro sa drenge la nöjei pengöne ewekë, ngo ame pe, atreine fe tro la atuate së a xatua së troa lapa mekune hi la ca ewekë. Ngo ame la easa drenge la ala nyimu e porotrik, jole tro sa mekune hi la ca ewekë. Önine la itre ka inamacane nge ka thele troa trotrohnine la pengöne la atr, ka hape, atreine hi së troa drenge hnyawa la hna qaja hnene la ala cas. Haawe, maine kola porotrike la ala nyim, tre casi hi la atr hnei nyipunieti hna atreine dreng, nge qanyi nyipunieti pë hë lai troa iëne ka hape, drei la hnei nyipunieti hna ajane troa dreng. Ame lo angetre Iudra ne lo hneijine i Iesu, tre pi tro kö angatr a kuca la itre aja ne la keme i angatr, celë hi kepine matre tha ajane pë hë angatre troa drei Iesu.
14 Kola qaja hnei Tusi Hmitrötre ka hape, ame itre xa ijin, tre kola isa ewekë koi së hnei “inamacane” me la “hmo.” (Ite edomë 9:1-5, 13-17) Qa i së pë hë troa isa iëne ka hape, drei la hne së hna troa dreng? Nge tro ha mama jëne la aqane axecië mekune së ka hape, drei la hne së hna ajane troa amadrinën. Maine ketre mamoe i Iesu së, tre tro hë së lai a drei nyidrë, me xome la tulu i nyidrë. (Ioane 10:16, 27) Öni Iesu ka hape, ame la itretre drei nyidrë tre, angatre la itre “ate ne la nyipici.” (Ioane 18:37) “Tha dengate hmekune kö angate la aqane ewekë ne la ite tenyiwa.” (Ioane 10:5) Nge ame la itre atr ka xötrethenge Iesu fë la hni ka ipië, tre troa atrunyi angatre hnei Akötresie.—Ite edomë 3:13, 16; 8:1, 18.
“NYINE ATRUNYI NYIPUNIETI” LAI
15. Pine nemene matre qaja jë Paulo ka hape, nyine atrune la angetre Efeso la tro angeic a xomi hnine la akötr?
15 Tro sa xatuane tune kaa la itre atr troa kapa la atrune qaathei Akötresie? Ame la hnapan, tre jëne la aqane xomi hnine së la itre ewekë. Öni Paulo ngöne la tus i angeice kowe la ekalesia ne Efeso ka hape: “Ini a sipone laka the kucakuca kö ene la ite akötenge thatraqai nyipunie, lo nyine atrunyi nyipunieti pe.” (Efe. 3:13) Hnauëne laka, Paulo a qaja ka hape, nyine atrune la angetre Efeso la angeic a xomi hnine la akötr? Ame la Paulo a huliwa thatraqane la itre trejine me nyidrë, ngacama kola melëne la itre ijine akötr, angeice hi lai a amamane koi angatre ka hape, pëkö ketre ewekë ka sisitria catre kö, hune la troa nyi hlue i Akötresie. Maine nue ju Paulo la itre akötr troa ananazijë angeic, tre ma tha tro ju kö la itre trejine me angeic ekö a nyipine la aqane imelekeu i angatre me Iehova, memine la huliwa hnei Nyidrëti hna ahnithe koi angatr, nge tro ha patre la mejiune i angatr. Hnene la hnei Paulo hna xomi hnine la itre ewekë hnei angeice hna melën, matre mama pi kowe la itre trejine me angeice ka hape, pëkö huuje ka sisitria hune la troa drei Keriso.
16. Nemene la ewekë ka traqa koi Paulo e Lusetara?
16 Tha ka pë thangane kö la hnei Paulo hna catre huliwa, me xomi hnine la akötr, göi troa xatuane la itre trejine me angeic. Easa e ngöne la tus i Ite Huliwa 14:19, 20 la ewekë ka traqa koi Paulo, lo angeic e Lusetara; kola hape: “Traqapi kowe lai, angete Iuda qa Anetioka me Ikonio, a li ewekë kowe la nöj, nge ase hë trânyi Paulo hnei etë, angate pë hë a huli nyidëti pi kowe la tröne lapa, kola mekune laka meci hë nyidë. Nge angete deng’ a cile xöteithi nyidë, ame hna cilejë nyidë, me tro kowe la lapa ; nge elany nyidëti a ce tro me Banaba Derebe eë.” Hane petre hi la ketre trahmany: ase jë hi tranyi angeice hnei etë, a xonë hi troa mec, nge angeic a cile hmaca jë, me trongëne la itre gojeny gaa nany, a traqa koi 100 jë kö lao kilomet!
17, 18. (a) Hnei nemene matre atre jë Timoteo la ewekë ka traqa koi Paulo e Lusetara? (b) Hna xatua Timoteo tune kaa hnene la aqane xomi hnine Paulo la akötr?
17 Thatre hnyawa kö së, maine ce Timoteo jë kö me Paulo ngöne lo ijine kola tranyi angeic, ke tha hna qaja kö hnene la tus i Ite Huliwa. Ngo atre hë Timoteo la ewekë hna melëne hnei Paulo. Hnei Paulo hna qaja koi Timoteo ngöne la tus i angeic: “Hnei ’ö hna xötrethenge hnyawa la hnenge hna ihaji, me thinang.” Atre hi Timoteo ka hape, hna tranyi Paulo e Lusetara, me nue angeice ju pe e tröne Anetioka hnene la angetre Iudra, nge goi thele fe hnene la itre xa atr e Ikonio troa tranyi angeice hmaca.—2 Tim. 3:10, 11; Ite hu. 13:50; 14:5, 19.
18 Atre hi Timoteo ka hape, hnei Paulo hna xomi hnine asë la itre akötr cili. Ame la Timoteo a nekö trahmany, tre tha mano kö angeice xomi ini qa ngöne la tulu i Paulo. Thupene jë hi la ije treu, Paulo a bëeke hmaca jë Lusetara eë, nge drenge hë angeice ka hape, lolo la aqane ini Timoteo ngöne la ekalesia hnei angeice hna huliwa ngön, ke “hna qaja aloinyi angeice hnei ange tejin’ e Lusetara me Ikonio.” (Ite hu. 16:1, 2) Ame hë e thupen, ijiji Timoteo hë troa cilëne la itre hnëqa ka tru catr.—Fil. 2:19, 20; 1 Tim. 1:3.
19. Tro la aqane xomi hnine së la itre akötr a xatuane tune kaa la itre xan?
19 Maine tro sa catre kuca la aja i Akötresie, tro la tulu së a ithuecatre kowe la itre xötre ka co troa hane catre huliwa i Akötresie. Tro nyudreni a goeëne la aqane ithanata së kowe la itre atr ngöne la hna cainöj, memine la hne së hna kuca ngöne la easa melëne la itre hneijine jol, nge tro hë angatre lai a xomi ini qa ngön. Hnei Paulo hna qaja ka hape, hnei angeice hna xomi hnine la itre akötre hnei angeice hna melën, matre troa amamane kowe la itre atr la aqane tro angatr a hane kapa lo mele ka tha ase palua kö.—2 Tim. 2:10.
20. Pine nemene matre loi e tro pala hi sa catre thele troa kapa la atrun qaathei Akötresie?
20 Hetre nyipi kepine matre loi e tro sa catre “thele . . . la nyine atrune qa thei Akötesieti hmekuj.” (Ioane 5:44; 7:18) Tro Iehova a hamëne “la mele ka tha ase palua kö koi angete cile huti ngöne la huliwa ka loi, me thele la hadehadeu.” (E jë la Roma 2:6, 7.) Ketre, tro la aqane xomi hnine së la itre akötr a xatua së troa mele nyipici me hane mele palua. Qa ngöne lai, the nue pi kö së la ketre ewekë troa kapa la atrun qaathei Akötresie.
[Thying]
[Iatr ne la götran 25]
[Iatr ne la götran 28]
[Iatr ne la götran 29]
Tha sihngödri kö koi itre thöth la aqane xomi hni ne la itre Keresiano ka tru
