E Hna Akeukawanyi Së—Akeukawanyi Itre Xane Jë Fe

Pine laka easë la itre atr ka tha pexej, hna tithi së asë hi hnei kucakuca, nge ame itre xan, pë hë nyin la itre meci angatr. Ame la easa mele e hnine la itre jole cili, nemene la aqane tro sa xomihnin?

Ame la ketre ixatua ka tru, tre, ene la troa akeukawanyi së hnene la itre atrene la hnepe lapa së, me itre sinee së me itre sine hmi së.

Ame la itre trenge ithanatana hna qaja ce memine la ihnim hnene la ketre sinee, tre, ceitu me ketre wakacu nyine axaponyi së me aegöcatrenyi së. (Ite edomë 16:24; 18:24; 25:11) Ame la itre nyipi Keresiano, tre tha angatre kö a thele tro hi a akeukawanyi angatre hmekuj. Ngo angatre a sipu tro pe troa “akeukawa angat’ angete aköt, hnene la keukawa hna akeukawa [angatr] hnei Akötesie.” (2 Kor. 1:4; Luka 6:31) Hnei Atonio fe hë, ketre atre thupëne la distrik nge qatre thupe ne Meksik, hna melëne la ewekë celë.

Ame la kola öhne la meci Atonio, nge kola mama la mec hna hëne ka hape, lymphome, kaaser ne madra, atraqatre la hace e kuhu hni angeic. Ngo ame pe, hnei angeice hna xomihnine la hace i angeic. Hnei angeice hna xomihnine tune kaa? Hnei angeice hna thele catrëne troa mekune hmaca lo itre nyima ne atrunyi Iehova, me thinge itre eje göi troa drenge me mekune ajuine la aliene la itre trenge ewekën. Ame la kola thithi draië, me e la Tusi Hmitrötr, tre, itre xa ka akeukawane atrunyi angeic.

Atonio mina fe a atrehmekune enehila laka, ame fe la ketre ixatua ka tru hnei angeice hna kapa, tre, qaathene la itre sine hmi angeic. Öni angeic: “Ame la kola traqa koi ni me ifënekönge la itre hace, hnei nyiho hna sipone kowe la ketre sinee i nyiho, nge qatre thupe ngöne la ekalesia, troa traqa matre ce thithi me nyiho. Celë hi ka akeukawanyi nyiho me axapone la hni nyiho. Öni angeice hmaca jë kö; “Eje hi laka, jëne la ixatua qaathene la itre atrene la hnepe lapa i nyiho me itre trejine ngöne la ua, tha qea ju kö, nge nyiho fe hë a mejë qa ngöne la itre mekune ka akötrëne la mele i nyiho.” Atraqatre la ole i angeice kowe la aqane hnimi angeice me nyipi ewekë angeice hnene la itre sinee ka tune lai!

Ame la ketre ixatua koi së ngöne la itre ijine akötr, tre, ene la uati hmitrötre hna thingehnaean. Öni Peteru aposetolo ka hape, ame la uati hmitrötre i Akötresie, tre, ketre “ahnahna.” (Ite hu. 2:38) Mama hnyawa ju hi la enyipicine lai, lo uati hmitrötre a iëne la ka ala nyimu lo Penetekos macatre 33 M.K. a Ame la uati hmitrötr, tre, ngacama ahnahna thatraqane la itre hna iën, ngo nyine thatraqa së asë fe. Ame la ahnahna cili, tre, trenge catre ka tha ae kö, haawe, catre jë sipone matre mana fe thei epun.—Is. 40:28-31.

AMAMANE JË LA EJUINE LA IHNIMI EPUNI KOWE LA ITRE KA AKÖTR

Hnei Paulo hna xomihnine la itre akötre ka nyimutre, uti fe hë la maine mec. (2 Kor. 1:8-10) Tha hna axouenyi Paulo hnene la mec. Hna akeukawanyi angeice hnene laka, atre hi angeice ka hape, Akötresieti la xöle i angeic. Öni angeic: “Qaja aloinyi Akötesie me Tetetroti ne la Joxu shë Iesu Keriso, ene la Tetetroti ka ihnimi me Akötesieti ate akeukawan’ asë ; Lo ate akeukawa huni ngöne la aköte huni asë.” (2 Kor. 1:3, 4) Tha hnei Paulo kö hna nue la itre akötre troa hnyiji angeic. Ngo hnene pe la itre itupathe ka traqa koi angeice hna xatua angeice troa akökötrene thei angeice la atreine imeku, celë hi matre atreine hnyawa angeice troa akeukawane la itre xane ngöne la ijine angatre a mele hnine la itre akötr.

Ame hë la kola loi la meci Atonio, bëeke hmaca jë hi angeice kowe la huliwa ne iwai trootro. Hnei angeice hna nyipi ewekëne hnyawa pala hi la itre sine hmi angeic, nge thupene hë lai, hnei angeice me föi angeice hna catre wange la itre trejine ka wezipo. Hanawange la ketre ceitun, thupene la hnei Atonio hna wange la ketre trejine ka trene mecin, atre jë hi angeic ka hape, xele kö la trejine ma tro kowe la hna icasikeu. Hnei Atonio hna qeje pengöne ka hape: “Tha hnene kö ka hape, tha hnimi Iehova ha hnei angeic, me itre trejine me angeic, ngo pine laka tru la hna lepi angeice hnei mec, haawe, kösë ame koi angeic, ceitu i angeice pe hi me atr ka hleuhleu.”

Ame la ketre ewekë hna kuca hnei Atonio göi troa thuecatrene la trejine ka wezipo, tre hna sipo angeice troa thithi göi troa olene la xeni ngöne la ketre ijine angatr a ce pui ne xen. Ngacama kola mekune hnene la trejine ka hape tha ijiji angeice kö, ngo hnei angeice hna kapa la hna sipon. Qeje pengöne jë hi Atonio me hape: “Lolo catre la aqane thithi angeic, nge thupene lai saze pi hi la pengöi angeic, ke, drenge hë angeic ka hape, ka nyipi ewekë pala hi angeic.”

Eje hi laka, hna tithi së asë hi hnei mec, co la aqane tithi itre xan, nge tru itre xan. Ngo tune la hna qaja hnei Paulo, tro lai a aijijë së troa akeukawane la itre xane ngöne la itre ijine angatr aja ixatua. Haawe, imele goeë jë ngöne la itre ijine akötr, nge nyitipu Iehova Akötresieti jë, ene la tro së a hane akeukawanyi itre xan.

[Ithueamacany]