“Ate Akötesieti Hë Nyipunie”—Nge Nemene Hë La Pengö i Nyipunie Enehila?
“Ate Akötesieti Hë Nyipunie” Nge Nemene Hë La Pengö i Nyipunie Enehila?
“Ate Akötesieti hë nyipunie.”—GAL. 4:9.
NYINE TROA SA
Pine nemene matre loi e tro sa xomi ijine troa wange pala hi lo itre xötre ewekë hne së hna kuca matre traqa pi së kowe la bapataiso?
Pine nemene matre tro pala hi sa kökötre trootro, ngacama traqa ha koi nyimu macatre ne easë hë ngöne la nyipici?
Pine nemene matre loi e tro pala hi sa wai pengöne la lapaune së memine la mele së hne së hna nue koi Iehova?
1. Pine nemene matre tro la pilot a goeëne ngöne la ipepa i angeice la itre ewekë nyine troa kuca thatraqane la avio?
AME la nöjei ijine qëmekene tro la pilot a sesë, nyipi ewekë tro angeice a pane xödrane hnyawa asë la avio i angeic. Hetre ipepa hna fejane thatraqai angeic göi troa goeëne la nöjei nyine troa xödrane ngöne la avio. E tha tro kö angeice a kuca lai, thatreine kö lai troa öhne la ketre hnepe jole ka troa akeine la avio. Ame mina fe lo itre pilot ka nyimu macatre ne huliwa ha, nyipi ewekë pala hi tro angatr a goeëne hnyawa ngöne lo ipepa, la nöjei ewekë hna fejane me nyine xödrane thenge, ngöne la avio la nyine troa kuca.
2. Nemene la nyine tro sa wai pengöne hnyawa?
2 Tune la ipepa ne huliwai pilot, hetre itre ewekë nyine tro fe epuni a goeëne hnyawa me kuca matre xecie koi epuni ka hape, e traqa ju la itre jole, ka catre pala hi la lapaune i epun. Maine ka xötrei bapataiso së maine ka hekö pena, ngo nyipi ewekë tro pala hi sa waipengöne hnyawa la lapaune së. Maine tro sa mekune ka hape, ka catre hë la lapaune së, e traqa ju koi së la ketre itupathi ka tru, ijije hi tro eje a angazone la aqane imelekeu së me Iehova. Tusi Hmitrötre a hmekë së me hape: “Ame la ate mekune laka angeic’ a cile huti, wange kö ke keipi.”—1 Kor. 10:12.
3. Nemene la nyine troa kuca hnene la itre Keresiano ne Galatia?
3 Hetre aqane atre Akötresie hnene la itre Keresiano jëne la thupene mele qaathei Iesu. Ijije fe hë enehila troa iëne la itre atr nyine nekö i Akötresie! Ngo nyipi ewekë tro la itre Keresiano ne Galatia a wai pengöne hnyawa pala hi la lapaune i angatr. (Gal. 4:9) Hnene la itre xa atrene la ekalesia hna qaja ka hape, tro hmekuje hi a meköti la ketre Keresiano e tro angeic a xötrethenge fe la Trenge Wathebo i Mose. Ngo ase hë Akötresieti apatrene la Trenge Wathebo cili, nge ame la angetre Ethen, tha itre ka hane fe kö angatre lapa fene la Trenge Wathebo! Ceitui angetre Iudra hi me angetre Ethen, tro asë hi angatre a kökötre ngöne la nyipici. Nyipi ewekë tro angatr asë a trotrohnine ka hape, tha hnei Akötresieti hmaca kö hna amekötine kowe la nöje i Nyidrë troa xötrethenge la Trenge Wathebo.
ITRE XÖTRE EWEKË NYINE KUCA MATRE TROA ATRE AKÖTRESIE
4, 5. Nemene la eamo hnei Paulo hna hamëne koi angetre Galatia? Nemene fe la enyipiewekëne la eamo cili koi së?
4 Ame la tusi hna cinyihane hnei aposetolo Paulo koi angetre Galatia, tre, kola amekunën kowe la itre Keresiano asë ka hape, tha tro kö a nuetrije la nyipici ne la Tusi Hmitrötre lo hnei angatre hna inin. The hmaca kö kowe la itre ewekë hna nuetrije hë. Tro la tusi koi angetre Galatia a xatua së asë troa mele nyipici.
5 Nyipi ewekë tro pala hi së asë a mekune lo ijine easa nue la mele së koi Iehova. Pane mekune ju la lue hnyinge celë: Mekune hnyawa pala kö epuni lo itre xötre ewekë hnei epuni hna kuca matre traqa pi kowe la bapataiso? Mekune pala kö epuni lo hnei epuni hna kuca matre atre Akötresieti jë hnei epun, me hane drenge ka hape, atre epuni fe hë hnei Akötresie?
6. Nemene la itre ewekë nyine tro sa kuca hne së hna troa ce wang?
6 Naene lao ewekë nyine kuca matre easë pi e hnine la nyipici. (Wange ju la itre mekune hna eköhagen, hna hape “Tro La Itre Xötre Ewekë Nyine Kuca Göi Troa Atre Akötresie a Xatua Së Troa Kökötre Trootro.”) Ka loi e tro sa mekune hnyawa la itre xötre ewekë cili ceitu me ipepa hna fejane la itre ewekë nyine tro sa waipengöne hnyawa matre tha tro kö a enijëne la lapaune së, nge tha tro hmaca kö sa bëeke kowe la itre ewekë ne la fen. Tune la pilot ka waipengöne hnyawa pala hi la itre ewekë nyine tro angeice a kuca qëmekene troa xomi avio, ketre tu së fe, loi e tro pala hi sa wange lapane la itre ewekë nyine tro sa kuca.
KA KÖKÖTRE TROOTRO PALA HI NGÖNE LA NYIPICI LA ITRE HNA ATRE HNEI AKÖTRESIE
7. Nemene “tulu” la nyine tro sa xötrethenge, nge pine nemen?
7 Tune la pilot ka waipengöne pala hi la itre ewekë nyine troa kuca qëmekene troa xomi avio, tro fe hi së a hane tun, ngöne la easa wai pengöne hnyawa pala hi la aqane kökötre së ngöne la nyipici. Hnei Paulo hna cinyihane koi Timoteo ka hape: “Ame la ite tulu ne tenge ewekë ne mele hnei ’ö hna denge qatheng, xölehuje catëne ju ngöne la lapaune me ihnim, lo ka eje thei Keriso Iesu.” (2 Tim. 1:13) Ame la “tenge ewekë ne mele” hnei angeice hna qaja e celë, tre, eje e hnine la Wesi Ula i Akötresie. (1 Tim. 6:3) Ame la easa goeëne la ketre iatr, tre, canga tro atre ju hi së lo ewekë hnene eje hna nyi ahnuen. Ka ceitune mina fe memine la “tenge ewekë ne mele,” kola xatua së troa trotrohnine la itre ewekë hnei Iehova hna ajane tro sa trongën. Tro së enehila a ithanatane la itre xötre ewekë ka tro xomi së kowe la bapataiso, me wange hnyawa pala hi ka hape, easë kö a xötrëne hnyawa la tulu ne nyipici.
8, 9. (a) Pine nemen matre tro pala hi sa kökötre ngöne la atrehmekune me lapaun? (b) Pine nemene matre ka nyipi ewekë la aqane kökötre ne la Keresiano? Pine nemene matre tro hi a ceitu memine la aqane cia ne la ketre sinöe?
8 Ame la pane xötre ewekë nyine tro sa kuca, tre, ene la troa hetrenyi la atrehmekune ka troa aijiji së troa hetrenyi la lapaun. Ngo nyipi ewekë tro pala hi sa hetrenyi la atrehmekune, me aciane catrëne pala hi la lapaune së. (2 Thes. 1:3) Thupene la hna bapataiso së, nyipi ewekë troa akökötrene hnyawa me acatrene catrën la aqane imelekeu së me Akötresie, matre tha tro kö a ajolëne la lapaune së troa kökötr.
9 Ceitune hi lai memine la sinöe ka cia. Nyine haine la easa goeëne la aqane cia la ketre sinöe, me aqane catrene la iwan ej. Drei la ceitun, ame la itre xa arasi ka lolo ne Lebanona, ijije hi tro itre ej a wej la ketre iuma ka 37 m la eqeane draië. Nge ame la etrune la ngöne sinöe, tre ijije troa kanoth hnene la eno ka 12 m. (Ny. i. S. 5:15) E xötrei, canga mama hi la kola cia nyimenyim la isinöe. Hnene laka, tro ipië catre la itre wan, nge itre ej a isa thi ananyine la isinöe, haawe, ngöne sinöe fe lai a kökötre catr me isaisa. Ngo e qea ha, ngacama eje pala hi a kökötre trootro, ngo tha mama hmaca kö. Ka ceitu hi lai memine la aqane kökötrene la itre Keresiano. Nyipici laka, tru hnei ewekë hne së hna saze ngöne la mele së ngöne la easa nyiqaane inine la Tusi Hmitrötr. Easë pë hë a xomi bapataiso ju. Öhne hnyawa hi hnene la itre xa atrene la ekalesia la aqane kökötre së ngöne la nyipici. Easë a xejë ju la huliwa ne pionie, maine xome la itre xa hnëqa ngöne la ekalesia. E qea ha, tha nyipi mama hnyawa hmaca koi itre xan la aqane kökötre së ngöne la nyipici. Ngo ka nyipi ewekë tro asë hi së a kökötre ngöne la atrehmekune me lapaun, matre traqa pi së kowe la “[“nyipi atr,” Les Saintes Écritures — Traduction du monde nouveau (MN)],” ene la tro sa Keresiano ka macaj. (Efe. 4:13) Haawe, ame la aqane kökötre ne la Keresiano, tre, ceitu memine la itine feja ka cia uti hë la isinöe atraqatre ka macaje qez.
10. Pine nemene matre nyipi ewekë kowe la itre Keresiano ka macaje troa kökötre pala hi ngöne la nyipici?
10 Ngo tha tro kö a umuthe e cili la aqane kökötre së. Tro la aqane atrehmekune së ne la Wesi Ula i Akötresie memine la lapaune së a ceitu me itre iwane sinöe, ka kökötre trootro matre cile hut. Nyipi ewekë kowe la itre wane sinöe tro pala hi itre eje a kökötre catr. (Ite edomë 12:3) Ala nyimu la itre trejine ka kökötre tune lai. Hnene la ketre trejin, ngacama 30 hë lao macatre ne qatre thupe nyidrë, ngo tha tro kö nyidrëti a mano hna kökötr. Sisitria catre la madrine i nyidrë troa e la Tusi Hmitrötr enehila hune ekö. Kolo pala hi a mama trootro koi nyidrëti la itre xa aqane troa trongëne la itre trepene meköti ne la Tusi Hmitrötr, nge kolo pala hi a elë catre la madrine i nyidrë troa cainöje trootro.
ACATRENE CATRËNE JË LA AQANE IMELEKEU I EPUNI ME AKÖTRESIE
11. Tro pala hi sa acatrene tune kaa la aqane imelekeu së me Iehova?
11 Maine easë, itre Keresiano a ajane troa kökötr, nyipi ewekë tro pala hi së a easenyi catre koi Iehova. Aja i Nyidrë tro sa atre laka, easa lapa xetietë nge hna hnimi së tune la nekönatre thei keme me thin, me tu së lo easa memine la ehnemu së. Eje hi laka, tro lai a qea la ijine tro sa catre huliwa matre easenyi catre jë së koi Iehova, nge matre drenge jë së ka hape, easa lapa xetietë nge hna hnimi së. Haawe, loi e tha tro kö sa thëthëhmine troa e la Tusi Hmitrötr o drai. Ketre, e jë la nöjei zonale hna hnyipi kapa, me itus, me boroshüre hna hamë së hnei Iehova. Celë hi ka troa xatua së lai troa atre Nyidrëti hnyawa, me acatrene la aqane imelekeu së me Nyidrë.
12. Nemene la nyine tro sa kuca maine easa ajane troa acatrene catrëne la aqane imelekeu së me Akötresie?
12 Ame la itre thith, memine la itre atr hne së hna nyisinen, itre ka tro lai a xatua së troa acatrene la aqane imelekeu së me Akötresie. (E jë la Malaki 3:16.) Ame la kola thithi koi Akötresie hnene la itre enehmu i Nyidrë, Nyidrëti a drenge “la ite thithi angat.” (1 Pet. 3:12) Drenge hi Iehova la itre hne së hna xëwe fë koi Nyidrë ngöne la thithi së, celë hi matre nyipi ewekë tro pala hi sa catre thithi koi Nyidrë. (Rom. 12:12) Thatreine kö tro pala hi sa treme enehmune me Akötresie, e patre kö the së la ixatua i Nyidrë. E tha thithi hë së koi Nyidrë, thatreine kö tro sa hetrenyi la trenge catre ka nyipi ewekë koi së. Maine jë tro la fene ka ngazo celë a akucakucanyi së, maine pena troa huli së troa kuca la ketre ewekë ka ngazo. Ngo ame pe, ame la eloin, tru la aja i Nyidrë troa hamëne la ixatua ka ijije koi së e hne së hna sipo Nyidrë. Epuni kö a hane thithi koi Iehova tune la epuni a ithanata memine la sinee i epuni hnei epuni hna mejiune kow? Ijije kö tro epuni a huliwane hnyawa hmaca kö la itre thithi epun?—Iere. 16:19.
13. Pine nemene matre nyipi ewekë tro sa ce sine lapaane la itre icasikeu?
13 Nyipi ewekë tro sa lapa qale kowe la ekalesia matre tro sa ce mele memine la itre ka nyi enehmu Iehova. Nyidrëti a hnimi angatr, ke, “angete lapaune koi nyidë.” (Nah. 1:7) Pine laka ngazo catre hë la fen, nyipi ewekë tro sa ce mele catre memine la itre trejine me easë. Tro sa itö ixatua matre tro pala hi sa cile catr. Tro angatre lai a hamë trenge catre së troa hnime la itre atr, me kuca la “ite huliwa ka loi.” (Heb. 10:24, 25) Tha ijije kö tro sa xötrethenge la eamo i Paulo e tha hne së kö hna ce mele catre memine la ekalesia. Celë hi matre loi e tro pala hi sa sine lapaane la itre icasikeu, me hane sa la itre mekune nyine ce thawa.
14. Pine nemene matre tro pala hi sa canga saqe ietra me saze la aqane mele së?
14 Qëmekene tro sa Keresiano, tro sa ietra me hmaca qa ngöne la itre huliwa së ka ngazo. Ngo loi e tro pala hi sa canga saqe ietra me saze la aqane mele së. Pine laka, itre atr ka tha pexeje kö së, nge ka hetre aja ka ngazo, haawe, canga saqe së hi kei kowe la ngazo. Ame la ngazo, tre, ceitu me un ka ilapa treqe ne troa thepe tha. (Rom. 3:9, 10; 6:12-14) Celë hi matre thatreine kö tro sa mekune ka hape, patre fe kö the së la aja ka ngazo. Iehova fe a hane xomihni së ahoeany, ngöne la easa isi memine la itre aja së ka ngazo. (Fil. 2:12; 2 Pet. 3:9) Xome jë la traeme i epuni me trenge catre i epuni troa huliwane koi Iehova, hune la troa huliwane itre eje thatraqane la itre sipu mekuna i epun. Atre hnyawa hi hnene la ketre trejine föe hna hetrune ngöne la hmi së laka, ka nyipi ewekë la troa xoue Iehova, ngo ame koi angeic, tha ijije angeice fe kö troa hane amadrinë Nyidrë. Pine laka tha ka imelekeu kö angeice me Iehova, ame hnei angeice hna kuca la itre ewekë ka ngazo ngöne la mele i angeic. Öni angeic, “Tha hnene kö laka tha ka hni kö ni koi Iehova, ngo hnene laka, thatre hnyawa Nyidrëti kö ni.” Ame hnei angeice hna thithi ju troa sipo ixatua koi Iehova, me saze fe la aqane mele i angeic. Öni angeic, “Kösë Iehova a tro xomi ni ceitu me nekönatre hna neköhnimën, me xatua ni troa elë hune la itre ewekë ka iathixötrë, me amamane hnyawa koi ni la nyine tro ni a kuca.”
15. Nemene la hnei Iesu me Iehova hna öhne me madrine the së?
15 Hnene la angela i Akötresie hna qaja koi Peteru me kowe la itre xa aposetolo troa “cainöjëne” la maca ka loi. (Ite hu. 5:19-21) Ame la huliwa ne cainöje së e nöjei wiik, tre, ketre ewekë lai nyine tro së a hane wai pengöne hnyawa göi troa acatrene pala hi la lapaune së. Öhne hi Iesu me Iehova la etrune la lapaune së, nge madrine nyidro kowe la itre hne së hna kuca ngöne la hna huliwa ne cainöj. (Hna ama. 2:19) Loi e troa ka tru la huliwa ne cainöje ngöne la mele së.
16. Pine nemene matre tro pala hi sa mekune hnyawa lo ijine easa nue la mele së koi Iehova?
16 The thëthëhmine pi kö lo ijine epuni a nue la mele i epuni koi Iehova. Ame la imelekeu së me Iehova, celë hi la ketre ewekë ka sisitria ngöne la mele së. Atre asë hi Nyidrëti la itre atre i Nyidrë. (E jë la Isaia 44:5.) Wai pengöne hnyawa jë la aqane imelekeu së me Iehova, me thithi fë jë troa sipo ixatua thei Nyidrë matre troa catre pala hi la lapaune së. Ketre, the thëthëhmine kö lo ijine kola bapataiso epun, nge the thëthëhmine kö la drai ka tru cili. Jëne la hnei epuni hna xomi bapataiso, mama ha koi itre xan laka, ase hë epuni nue la mele i epuni koi Iehova. Kolo ketre mekune ka sisitria hi lai ngöne la mele i epun.
CILE HUTI JË SË MATRE LAPA QALE KOI IEHOVA
17. Pine nemene matre nyipi ewekë tro sa cile hut, e aja së troa lapa qale koi Iehova?
17 Hnei Paulo hna qaja koi angetre Galatia ka hape, the ange kucakuca kö e traqa ju la itre jol. (Gal. 6:9) Ketre tu së fe, nyipi ewekë tro sa cile hut, ke, calemi hë la itre jol, ngo tro kö Iehova a xatua së. The mano kö thithi troa sipone la uati hmitrötre i Akötresie, nge tro Nyidrëti a xatua epuni troa hetrenyi la madrine me tingeting, ngacama tha patre kö la itre jol. (Mat. 7:7-11) The thëthëhmine kö laka, Iehova a thupëne hnyawa la itre waco, ngo ka sisitria pala kö la ihnimi Nyidrë koi epuni hui itre waco. Aja i Nyidrëti troa thupë epuni pine laka, tru la ihnimi epuni koi Nyidrë, nge hnei epuni hna nue la mele i epuni koi Nyidrë. (Mat. 10:29-31) Ngacama troa traqa koi së la itre jol, ngo the kucakuca kö. The nuetrije kö la nyipici matre troa bëeke hmaca kowe lo itre ewekë hnei epuni hna trotrije hë. Tru la itre manathithi hne së hna kapa pine laka, atre së hë hnei Iehova.
18. Nemene la nyine kuca hnene la nöjei ka atre Akötresie enehila?
18 Maine hna hnyipi bapataiso epun, maine ka hekö pena ha, ngo nemene la nyine tro epuni a kuca enehila? Thele jë tro pala hi a atre Iehova hnyawa, me kökötre trootro ngöne la nyipici. Wange kö, the mekune kö ka hape, atre Iehova hnyawa ha hnei epun, nge tha nyipi ewekë hë tro hmaca epuni a acatrene la aqane imelekeu epuni me Nyidrë. Xomi ijine jë troa wange pala hi la itre mekune hne së hna ithanatane ngöne la tane mekune celë göi tro sa lapa qale catre koi Iehova, lo Tretretro së ka ihnim, me Ehnemu së, me Akötresi së.—E jë la 2 Korinito 13:5, 6.
[Thying]
[Iatr ne la götran 13]
[Iatr ne la götran 15]
Ame la isinöe, tro pala hi eje a cia draië me kökötr. Tro fe hi a tune lai la Keresiano
[Hna eköhagen götran 17]
TRO LA ITRE XÖTRE EWEKË NYINE KUCA GÖI TROA ATRE AKÖTRESIE A XATUA SË TROA KÖKÖTRE TROOTRO
1 Hne së hna nyiqaane “ate hmekua” Iehova memine la Hupuna i Nyidrë, Iesu Keriso.—Ioane 17:3
2 Hna kökötre la lapaune së la easa atre Akötresie.—Ioane 3:16
3 Hne së hna thithi lapaa koi Iehova.—Ite hu. 2:21
4 Hne së hna nyiqaane ce icasikeu memine la ekalesia.—Heb. 10:24, 25
5 Hne së hna ietrane la itre ngazo së.—Ite hu. 17:30
6 Hne së hna hmaca qa ngöne la itre huliwa së ka ngazo, me itre hne së hna majemine me itre thiina së ka tha loi kö.—Ite hu. 3:19
7 Hne së hna nyiqaane ithanatane la nyipici kowe la itre atr.—2 Kor. 4:13
8 Hne së hna sipu nue la mele së koi Iehova matre troa xötrethenge Iesu hnyawa.—1 Pet. 4:2
9 Hna bapataiso së hnine la tim.—1 Pet. 3:21
