“Pëkö Nyine Athixöte” Koi Itre Ka Hnimi Iehova
“Pëkö Nyine Athixöte” Koi Itre Ka Hnimi Iehova
“Atraqate la tingetinge koi angete hnine la wathebo i cilie, nge pëkö nyine athixöte koi angat.”—SAL. 119:165.
TRO NYIPUNIETI A SA TUNE KAA?
Nemene iwaja la hna nyenyapëne hnene la itre Keresiano? Nge nemene hë la thupene hne së hna troa kapa, e tro sa nyenyape uti hë la traqa së kowe la hna ie?
Nemene la itre ewekë ka iathixötrë?
Pine nemene matre pëkö ewekë ka troa athixötrëne la itre ka hnime la itre wathebo i Iehova?
1. Nemene la aqane amamane ekö hnene la ketre ka iwaja ka hape, ngacama hna aca hnai angeic, ngo ame pe, tro hmaca kö angeic a iwaja?
AME ngöne lo macatre 1984, ijine kola kuca lo itre elo hna hape, Jeux olympiques, ca atre iwaja, hnene la itre atr hna mekune ka hape, angeice hi la ka troa traqa pa, ke ekö hë angeice iwaja lo nekö jajinyi petre kö angeic. Mary Decker la ëje i angeic. Ame la eqeane la hna iwaja, tre 3 000 met. Ngazo pe, ame ju hi ngöne lai ijine cili, tre wali angeice ju hi, nge kei pi angeic; celë hi matre tha hane pë hë angeice traqa kowe la hna ie. Ame pe, tha hnei angeice kö hna mekune laka, tha tro hmaca kö angeic a hane iwaja. Tha ca macatre ju kö nge angeice hmaca a iwaja, 1 600 met la eqeane la hna iwaja. Ame ngöne la ijine cili, tre kola hai la iatr, ke pë pala kö föe ka hane nyenyape catre tui angeic.
2. Nemene pengöne iwaja hna nyenyapëne hnene la itre Keresiano? Nemene la nyine troa kuca hnene la atre nyenyapëne la iwaja cili?
2 Ame easë itre Keresiano, tre itre ka hane fe së iwaja; easa nyenyape kowe la mele ka tha ase palua kö. Qa ngöne lai, tha tro pi kö sa nue la ketre ewekë troa sewe së tro pala hi a nyenyap. Tha kolo kö lo iwaja laka, tro hmekuje hi la ka nyenyape catr a hun. Nge tha easë pena kö a tune lo itre xan, laka nango nyenyape jë hi, nge mano trootro. Ame la iwaja hne së hna nyenyapën, tre tune lo hna hape, marathon qene faras. Qanyine la atr ka atreine troa catr uti hë la pun, troa nyenyapëne la marathon, matre ijije tro angeic a traqa kowe la hna ie. Öni Paulo ekö koi angetre Korinito ka hape: “Tha ’te kö nyipunie laka ame angete nyenyape ngöne la hna isasaqe hi, te, nyenyape asë, ngo ala casi hi la ka tro ha kepe thupen? Loi e nyenyape tune fe nyipunie mate troa heten.”—1 Kor. 9:24.
3. Drei e angetre iwaja la ka troa kapa la mele ka tha ase palua kö?
3 Celë hi iwaja lai hna upi së troa nyenyapën hnene la Tusi Hmitötr, matre hetrenyi jë së la mele ka tha ase palua kö. (E jë la 1 Korinito 9:25-27.) Ame la eisapengönen memine la itre xa iwaja, tre ene laka, tro asë hi la itre ka catr uti hë la pun a kapa la thupen. (Mat. 24:13) Ame la itre ka tha tro kö a hane kapa la thupen, tre kolo itre ka tha trongëne kö la itre hna amekötine göne la iwaja, memine lo itre ka tha hane pë hë isine troa traqa kowe la hna ie. Casi hi la iwaja ka aijijë së troa hetrenyi la mele ka tha ase palua kö.
4. Pine nemene matre tha ka hmaloi kö la troa nyenyape kowe la mele ka tha ase palua kö?
4 Tha ewekë ka hmaloi kö la troa nyenyape kowe la mele ka tha ase palua kö. Casi hi la atr ka atreine ekö troa nyenyape ngöne la iwaja celë nge ka tha hane kö kei; Iesu Keriso. Ame pë hë së, öni Iakobo ka hape, “menu hë shë asë ngone la ite ewekë ka nyimute.” (Iako. 3:2) Hnene la itre tria së, maine tria i itre xan pena, matre easa tro hmidra ngöne la iwaja, nge ame itre xa ijin, tre pane cile ju hi së. Ame hë e cili, loi e tro sa sipo ixatua, matre tro hmaca kö sa mejë, me nyenyape hmaca. Tha tro kö sa sesëkötre la easa kei ngöne la itre xa ijin, ke pengöne kö lai.—1 Ite jo. 8:46.
MAINE KEI HË NYIPUNIE, MEJË HMACA JË
5, 6. (a) Pine nemene matre “pëkö nyine athixöte” kowe la Keresiano? Nemene la ka troa xatuane la Keresiano ka thixötr troa “mejë hmaca”? (b) Pine nemene matre tha hane pë hë itre xane “mejë hmaca” ngöne la angatr a thixötr?
5 Ame la kola wali së, maine easë pena a kei, tro la aqane ujë së a qajaqaja la nyipi pengö së. Ame itre xan, tre thixötre ju hi angatr, maine kei pena, ngo angatre pë hë a ietra jë me catre nyi hlue i Akötresieti hmaca jë. Ame itre xan, tre tha hane pë hë angatre ietra. Öni Ite Edomë 24:16: “Troa a luengemene la o kei la ate ka meköt, me mejë hmaca ; ngo tro pe la ite ka menu a thixöte hnene la ngazo.”
6 Thixötre ju hë së maine kei pena, ngo ame pe, ijiji së hi troa mejë hmaca. Maine ka mejiune së koi Iehova, tro kö Nyidrëti xatua së ngöne la easa melëne la itre ijine jol, maine ngöne la easa tria pena. Tro Nyidrëti a xatua së troa “mejë hmaca” ke öhne hi Nyidrëti ka hape, hnimi Nyidrëti hi hne së. Ame pë hë la itre atr ka ngazo, tre, tha pi tro kö angatr a “mejë hmaca.” Tha ajane kö angatre la ixatua ne la uati hmitrötr, me ixatua ne la itre hlue i Nyidrë. Ngo ame kö itre ka hnine la wathebo i Iehova, kola qaja hnene la Tusi Hmitrötr ka hape, “pëkö nyine athixöte koi angat.” Trenge ithanata hi lai ka amamane ka hape, ijije hi tro sa mejë hmaca me nyenyapëne la iwaja kowe la mele ka tha ase palua kö.—E jë la Salamo 119:165.
7, 8. Pine nemene matre “kei” jë hi itre xan, ngo nemene la nyine tro angatr a kuca, matre tro kö Iehova a kepe angatr?
7 Ame la itre xan, tre hnene la itre sipu kucakuca i angatr matre kei ju hi kowe la ketre ewekë ka tha ngazo catre kö. Maine jë tro angatr a anyimu a kei kowe la ngazo cili. Ngo xajawa i Iehova, itre ka meköti angatr, e tro hmaca kö angatr a mejë hmaca, ene la troa nyipi ietra, me isine troa kuca la ewekë ka meköt. Ame la angetre Isaraela ekö a tria, me ietrane la itre ngazo i angatr, tre hnei Iehova pala hi hna goeë angatr ceitu me itre atr ka meköt. (Is. 41:9, 10) Ame la mekune ka sisitria ka mama ngöne Ite Edomë 24:16, tre tha ene kö la ngazo hna kuca, ngo ene laka, tro Iehova a xatua së troa “mejë hmaca.” (E jë la Isaia 55:7.) Atre hi Iehova me Iesu ka hape, tro sa kuca asë la hne së hna atrein, celë hi matre nyidroti a ithuecatre koi së troa “mejë hmaca.”—Sal. 86:5; Ioane 5:19.
8 Ame la itre xa ka iwaja, tre ngacama hnei angatre hna kei, ngo maine hnei angatre hna canga mejë hmaca, tre ijije pala kö tro angatr a hane iwaja. Thatre kö së “la drai memine la haua” ne tro ha umuthe la iwaja kowe la mele ka tha ase palua kö. (Mat. 24:36) Ngo maine easa kuca la hne së hna atreine matre tha tro kö sa hane kei, tre hmaloi hi koi së troa nyenyape pala hi, uti hë la traqa së kowe la hna ie. Nemene la nyine tro sa kuca matre tha tro kö sa hane kei?
ITRE KA IATHIXÖTRË
9. Nemene la faifi lao ewekë hne së hna troa ce ithanatan?
9 Faifi lao ewekë ka iathixötrë hne së hna troa ce ithanatan; ene la itre sipu kucakuca së, memine la itre aja i ngönetrei, memine la itre ewekë ka tha meköti kö ka mama hnine la ekalesia, me iakötrë maine icilekeu, memine la itre ngazo hna kuca koi së hnei itre xan. Maine hetrenyi ngöne la itre ewekë celë ka hane athixötrë nyipunie, the thëthëhmine pi kö ka hape, atre xomihni ahoeanyi Iehova, nge tha tro jë kö Nyidrëti a canga nuaxöji nyipunie.
10, 11. Nemene la pengöne kucakuca ka eje thei Davita?
10 Ame la itre sipu kucakuca së, tre ceitune memine la itre neköi wene etë ngöne la gojeny. Lue pengöne kucakuca hna ini së hnene la tulu i Davita Joxu, me aposetolo Peteru. Ame Davita, ke ka thatreine kö angeice xomi hni, nge ame Peteru, tre tru la hnei angeic e itre xa ijin, hna xouene e jelengazo angeice jë hnei itre xan.
11 Tha hnei Davita Joxu kö hna majemine troa xomi hni. Hnene lai kucakuca i angeice cili matre kuci ngazo ju pë hë angeice me Batheseba. Ame hë e thupen, xönë hi tro angeic a lepi Nabala, pine la hna qaqa angeic. Ngacama hnei Davita hna thatreine xomi hni ngöne la itre ewekë celë, ngo ame pe, tha hnei angeice kö hna cile troa thele troa amadrinë Iehova. Ngacama hnei angeice hna ngazo, ngo hnei angeice hna kapa la ixatua qaathei itre xan, matre atreine jë angeice troa “mejë hmaca.”—1 Sam. 25:5-13, 32, 33; 2 Sam. 12:1-13.
12. Ngacama hnei Peteru hna anyimu a tria, ngo nemene la hnei angeice hna kuca matre tro kö angeic a nyenyapëne la iwaja kowe la nyipi mel?
12 Ame pena Peteru, xou i angeice catr e troa jelengazo angeice hnei itre xan. Ngacama hnei angeice hna mele nyipici koi Iesu me Iehova, ngo ame pe hnene la hnei angeice hna xou e itre xa ijin, matre tria ju pë hë angeic. Hnei angeice lo hna a köni a kelikelë Iesu. (Luka 22:54-62) Ame itre xa ijin, tre hnei angeice hna wange atrune la itre xa Keresiano, me wange acone pë hë la itre xan. Ngazo la thiina i Peteru, nge maine jë hna hane nyitipu angeice fe hnene la itre xa atrene la ekalesia. Celë hi kepine matre hna pane haji Peteru hnei Paulo. (Gal. 2:11-14) Hapeu, hnei Peteru kö hna dreng akötrëne la kola haji angeic, me tro trije la iwaja kowe la nyipi mel? Ohea. Hnei angeice hna nyipine la itre ithanata i Paulo, me ujë, me nyenyapëne hmaca kö la iwaja.
13. Pine nemene matre thixötre jë hi itre xan ngöne la kola tithi angatr hnei mec?
13 Ame la itre xa ka troa akucakucanyi së, tre ene la itre sine meci së. Celë hi lai, ka akeinyi itre xan, matre tha nyenyape ju hi angatr. Ame la ketre trejine föe qa Zapo, xomi bapataiso jë hi angeice nge thupene la 17 lao macatre, tithi angeice ju hi hnei mec. Angeice pë hë a nue jëne pi la ewekë cili troa akucakucanyi angeic, ene pe tha sine ju hi angeice la itre huliwa ne la itre Keresiano. Celë hi matre, hna tro la lue qatre thup troa wai angeic me hamë ithuecatre koi angeic. Ame hë la angeic a bëeke hmaca kowe la hna icasikeu, nge kola madri angeice hnene la itre atrene la ekalesia, tre treije jë hi angeic. Ame hë enehila, tre angeice hmaca a hane nyenyap.
14, 15. Nemene la nyine tro sa kuca e traqa ju koi së la itre aja ka ngazo? Qaja jë la hna melëne hnene la ketre trahmany.
14 Ame itre xan, tre hnei angatre hna kei thenge la itre aja i ngönetrei. Maine kola huli së hnene la itre aja ne la ngönetrei së, tre nyipi ewekë tro sa kuca la itre hne së hna atreine matre loi pala hi la itre mekune me itre aqane ujë së, thenge la itre trepene meköt i Akötresie. Öni Iesu ka hape, maine kola athixötrë së hnene la alameke së, tre loi e troa “shea tij,” nge maine kola athixötrë së hnene la iwanakoime së, tre loi e tro sa “thupa tij.” Haawe, trije pi së la itre mekune me aqane ujë ka ngazo, wanga tha hane pi së nyenyape ngöne la iwaja.—E jë la Mataio 5:29, 30.
15 Hna cinyany hnene la ketre trejine trahmanyi hna hiane hnei keme me thine ka Keresiano ka hape, ame angeic, tre tha ka hnimi föe kö, ngo trahmanyi pe. Öni angeice ka hape, e ce angeice hë me itre xan, tre kösë trehnyiwa angeic, nge pëkö madrine i angeic. Ame hë la kola traqa koi 20 lao macatre i angeic, angeice ha pionie lapa, nge hna acili angeic troa xome la hnëqa ne drikona. Ngo ame e thupen, hnei angeice hna kuca la ketre ewekë ka ngazo, ene pe haji angeice jë hi, me xatua angeice hnene la itre qatre thup. Hnei angeice hna thith, me inine la Tusi Hmitrötr, me catr troa hane xatuane la itre xa atr, matre hetre trenge catre i angeice hmaca jë troa catre nyenyap. Ekö hë traqa la ewekë celë, ngo ame pe, öni angeic: “Drenge mina kö ni la kola fetra la itre aja cili ka ngazo, ngo eni pala hi a kuca matre tha tro kö a athixötrë ni hnene lai. Atre hë ni ka hape, tha tro kö Iehova a nue ni troa cile kowe la itupath, e thatreine kö ni cile kow. Qa ngöne lai, maine öni Nyidrëti ka hape, atreine hi ni, haawe, ijije hi tro ni a cile kowe la itre aja ka ngazo cili.” Tha ajane kö la trejine celë troa nue la ketre ewekë troa ajeanyi angeice qa ngöne la iwaja. Atre hi angeice ka hape, ka loi ju kö la tro angeic a xomi hnine la itre jole enehila, matre tro fe angeic a hane mele ngöne la fene ka hnyipixe. Celë hi matre öni angeic: “Eni pë hë la a troa isi uti hë la pun.”
16, 17. (a) Nemene la ka xatuane la ketre trejine ka mekune ka hape, hetre ewekë ka tha meköti kö hna kuca koi angeic? (b) Nemene la nyine tro pala hi sa lapa mekune hnyawa göne la ekalesia, matre tha tro kö sa thixötr?
16 Ame itre xa ijin, tre kola athixötrë së hnene la itre ewekë ka tha meköti kö, ka mama hnine la ekalesia. Hnene la ketre qatre thup qa Faras hna mekune ka hape, hetre ewekë ka tha meköti kö hna kuca koi angeic. Elëhni jë hi angeic, nge tha tro pi hi angeice koi itre icasikeu me koi hna cainöj. Hna tro la lue qatre thup troa wai angeice me drenge hnyawa la angeic a fe la hni angeic. Nyidroti pë hë a ithuecatre jë koi angeice troa lapaune koi Iehova, me amekunë angeice ka hape, ame la ka sisitria catr, tre ene la troa amadrinë Akötresie. Angeice pë hë a drenge ju la itre eamo hnei nyidroti hna hamën, me bëeke hmaca ngöne la iwaja.
17 Nyipi ewekë tro pala hi sa lapa mekune ka hape, ame la hna iëne hnei Akötresie matre He ne la ekalesia, tre Iesu Keriso; qa ngöne lai, tha tro kö sa hnehengazo menu pine la hna ngazo hnene la itre atr ka tha pexeje kö. Kola qaja hnei Tusi Hmitrötr ka hape, ka “tune la ukahlokine la eë” la lue xajawa i Iesu. Atre asë kö nyidrëti hu së, la aqane trongene la itre ewekë ngöne la ekalesia. (Hna ama. 1:13-16) Ame itre xa ijin, öni së jë hi ka hape, hetre ewekë ka tha meköti kö hna kuca hnine la ekalesia, ngo maine jë, easë lai ka mekune menun, maine pena thatre pengöne hnyawa kö së la ewekë ka traqa. Tro kö Iesu Keriso lai a amekötine la itre ewekë ka tria ngöne la ekalesia ngöne la nyipi ijin. Qa ngöne lai, tha tro pi kö sa nue la tria ne la itre xa Keresiano troa athixötrë së, wanga tha nyenyape pi së ngöne la iwaja.
18. Nemene la ka troa xatua së troa mele nyipici ngöne la itre ijine icilekeu maine iakötrë pena?
18 Ame la lue xa ka iathixötrë, tre ene la iakötrë maine icilekeu, memine la itre ngazo hna kuca koi së hnene la itre xa atrene la ekalesia. Ame lo Iesu a qeje pengöne la atre jumi feja, hnei nyidrëti hna amamane ka hape, hetre itre ka troa thixötre pine la “hleuhleu [iakötrë] me iaxösisi” hna kuca kowe la itre hlue i Akötresie. Ame itre xan, tre kola icilekeu maine akötrë angatr pi hmi, hnene la itre sipu sinee i angatr, maine itre ka lapa ezi angatr, maine hnei musi pena. Maine “pëkö wan’ e kuhu hni” ne la ketre atr, kola hape, tha catrecatre kö la lapaune i angeic, nge canga tro hi angeic a thixötr. (Mat. 13:21) Ngo maine tro sa lapa qale catre koi Iehova, tro la maca ne la Baselaia a xatua së troa cia wan ngöne la nyipici, nge matre tro fe la itre iwan cili a catrecatr. Haawe, maine nyipunieti a melëne la itre ijine jol, lapa mekune ju la itre mekune “nyine atrun.” (E jë la Filipi 4:6-9.) Tro kö Iehova a hamëne koi së la trenge catr ka ijije matre tro sa atreine cile catre qëmekene la itre itupath, nge matre tha tro kö sa thixötre ngöne la iwaja.
19. Nemene la ka troa xatua së troa cile catr, e traqa ju akötrë së hnei ketre?
19 Ame la itre xa atr, tre tha nyi hlue i Iehova ju hi angatr, pine la hna ngazo koi angatre hnene la itre xa trejin. Ame pena itre xan, angatr a thixötre ke, ame la ewekë hna jelengazone hnene la mekuthethewe i angatr, tre itre xane pe kö a kuca. (1 Kor. 8:12, 13) Maine akötrë së ju hi hnei ketre, hapeu, tro kö sa tro trije la nyipici pine lai? Kola upi së hnei Tusi Hmitrötr ka hape, tha tro kö sa wai gele i itre xan, ngo tro pe sa nue la itre ngazo i angatr, ngacama easa mekune ka hape, tha easa kö a wesitre menu. (Luka 6:37) Maine akötre koi nyipunie la hna kuca koi nyipunie, isa hnyinge jë ka hape: ‘Eni kö a wai gele i itre xan, thenge la sipu aqane waiewekënge kö? Tro kö ni a tro trije la nyipici, pine la hna ngazo koi ni hnene la itre trejine me eni ka tha pexeje kö?’ Maine ka nyipi hnimi Iehova së, tha tro kö sa nue kowe la ngazo hna kuca koi së, troa sewe së troa iwaja me hane traqa kowe la mele ka tha ase palua kö.
CATRE JË NYENYAPE NGE WANGE PALA KÖ THIXÖTRE PI
20, 21. Nemene hë la nyine tro sa kuca?
20 Pi tro fe kö nyipunieti a hane “umuthe la hnaisasaqe”? (2 Tim. 4:7, 8) Haawe, inine jë la Tusi Hmitrötr, memine la itre sine itusi së, sine thele jë la itre mekune hna e, nge lapa mekune ju fe matre tro nyipunieti a atre ka hape, nemene la itre ewekë ka troa iathixötrë. Sipone jë koi Iehova la uati hmitrötre i Nyidrë, matre hetre trenge catre i nyipunie troa cile catr. The thëthëhmine pi kö ka hape, maine tro nyipunieti a thixötr, maine kei pena, ijije pala kö tro nyipunieti a canga mejë me nyenyape hmaca uti hë la traqa nyipunie kowe la hna ie. Loi e tro sa atreine xomi ini qa ngöne la itre hne së hna tria, matre ijije tro sa nyenyape hnyawa ngöne la iwaja.
21 Kola mama hnine la Tusi Hmitrötr ka hape, maine easa ajane troa hane kapa la mele ka tha ase palua kö, tre loi e tro sa hane iwaja uti hë la traqa së kowe la hna ie; nge qanyi Iehova kö hamëne koi së ‘la tingetinge atraqat.’ (Sal. 119:165) Tro kö Nyidrëti a xatua së ngöne la hnedrai së, nge tro hë Nyidrëti elany a hamëne koi së la itre manathithi ka tru e tro sa nyenyap uti hë la pun.—Iako. 1:12.
[Thying]
[Iatr ne la götran 3]
[Iatr ne la götran 4]
Maine tro epuni a kei, kapa ju la ixatua nge mejë hmaca jë
[Iatr ne la götran 7]
Tha tro pi kö sa nue la ketre ewekë troa sewe së tro pala hi a nyenyap
