Iehova La Hnamunë Së
Iehova La Hnamunë Së
“JOXU fe, cilieti la hnamunë i nyihunie ngöne la nöjei xöt.”—SAL. 90:1.
NYINE TROA SA
Nemene la aqane nyi “hnamunë” i Aberahama, me Isaaka me Iakobo hnei Iehova?
Nemene la ini hne së hna xome qa ngöne la tulu i Aberahama?
Tro sa amamane tune kaa ka hape, Iehova la “hnamunë” së?
1, 2. Nemene la hna mekune hnene la itre hlue i Akötresie göne la pengöi angatre ngöne la fene celë? Nemene la pengöne la hnamunë i angatr?
HAPEU, lolo kö me tingetinge la mele i epun ngöne la fene ka ngazo celë tune lo epuni ngöne la hnalapa i epun? Maine tha eje kö, ke, ceitune hi la aqane mekune i epuni memine la itre xa hlue i Iehova. Qaane lo itre drai hnapan, ame la mekuna ne la nöjei ka hni koi Iehova, tre, ceitu i angatre me itre trenyiwa ngöne la fene celë. Casi hi la aqane mekune cili memine la hna mekune hnene la itre hlue i Akötresie ekö, angetre trongëne la nöje Kanana. Öni Tusi Hmitrötr, hnei angatre hna “amaman, ka hape, ite tenyiwa angate me itete tro agö e celë fene hnengödrai.”—Heb. 11:13.
2 E hnengödrai la “nyipi nöje” ne la itre Keresiano hna iën. Ame fe e kuhu hni angatr, tre, “ite tenyiwa me itete hunuma trotro” angatre e celë fen. (Fil. 3:20; 1 Pet. 2:11) Ketre, ame la “ite xa mamoe,” tre “tha itete fene kö angat,” tui Iesu ka tha sine kö nyidrëti la fen. (Ioane 10:16; 17:16) Ngo ame pe, ka hetre hna hunuma ne la nöje i Akötresie. Tha hnalapa kö hna öhne hnei lue mek, nge pëkö ka tune la hnamunë cili, ke, eje e cili la mele xetietë, me ihnim. Nemene la aliene la hnamunë cili? Öni Mose: “JOXU fe, cilieti la hnamunë i nyihunie ngöne la nöjei xöt.” (Sal. 90:1) Iehovah hi la “hnamunë” maine hnalapa ne la itre hlue i Nyidrë ka nyipici. Atre fe hi epuni la aliene la kola hape, Iehova la hnamunë ne la itre hlue i Nyidrë ngöne la itre hneijine ekö? Nemene fe la aliene la kola hape, Nyidrëti la hnamunë ne la itre hlue i Nyidrë enehila? Nge nemene la aliene la kola hape, tro Nyidrëti a nyi hnamunë ne la itre hlue i Nyidrëti elany?
IEHOVA LA HNAMUNË NE LA ITRE HLUE I NYIDRË NGÖNE LA ITRE HNEIJINE EKÖ
3. Hna aceitunë Iehova me nemen ngöne Salamo 90:1, nge pine nemen?
3 Nyimu ijine kola aceitunë Iehova hnene la Tusi Hmitrötre memine la ketre ewekë hne së hna atreine goeën, matre tro sa atreine trotrohnine hnyawa la pengöi Nyidrë. Hanawange la ketre ceitun, hnene la Salamo 90:1 hna aceitunë Iehova me “hnamunë,” maine hnalapa. Maine mekune jë së la hnalapa, mama pi hi koi së la ketre götrane gaa hetrenyi la ihnim, me tingeting, me mele xetietë. Pine nemene matre aceitunë Iehova jë me hnamunë, maine hnalapa? Kola qaja hnene la Tusi Hmitrötre ka hape, Iehova la ihnim. (1 Ioane 4:8) Eje fe a qaja ka hape, Akötresie ne tingetinge Nyidrë, nge Atre thupëne hnyawa la itre hlue i Nyidrë. (Sal. 4:8) Troa mama la enyipicine lai ngöne la easa troa ce wange la aliene matre qaja jë ka hape, Iehova la hnamunë ne la itre hlue i Nyidrë ka mele nyipici tui Aberahama, me Isaaka, me Iakobo.
4, 5. Hnei Akötresie hna amanathithine me thupë Aberahama tune kaa?
4 Ma kolo jë a thele hnei Aberahama la kepine la Iehova a qaja koi angeice ka hape: “Tropi qa ngöne la zi ’ö, me lapa i ’ö, me hnalapa ne la keme i ’ö, kowe la nöje tro ni a amamai ’ö.” Ngo tro ha thuecatrei angeice hnene la itre ithanata i Iehova hnei angeice hna troa drenge e thupen: “Tro ni a celohmë eö mate nöje atraqat, nge tro ni a amanathithi ’ö me atrune la ëje i ’ö.” Nge öni Iehova hmaca jë: “Tro ni a amanathithi angat’ angete amanathithi ’ö, me ëji angate angete ëji ’ö.”—Gen. 12:1-3.
5 Hnei Iehova hna thingehnaeane ka hape, tro Nyidrëti a amanathithi Aberahama me itre matra i angeic, me thupë angatr, ame hnei Nyidrëti hna kuca tune ju. (Gen. 26:1-6) Ame la ketre ceitun, tre, kolo Nyidrëti a thingijëne lo Farao ne Aigupito me Abimeleke joxu ne Gerara troa humuthi Aberahama, me thapa la föi angeic, ene Sara. Ka tune hnyawa fe la aqane thupë Isaaka me Rebeka hnei Nyidrë. (Gen. 12:14-20; 20:1-14; 26:6-11) Öni Tusi Hmitrötr, “tha hnei [Iehova] kö hna nue la kete troa qana angazo angat ; nge hna shewe ite joxu i angat kola hape, The kete kö la ite sianang, nge the angazone kö la ite perofetang.”—Sal. 105:14, 15.
6. Nemene la hna upi Iakobo hnei Isaaka troa kuca? Nemene jë la itre hna mekune hnei Iakobo?
6 Hnei Iehova fe hna thupëne la api Aberahama, ene Iakobo. Traqa ha kowe la ijine tro Iakobo a xomi föe, nge Isaaka, keme i angeic a qaja koi angeice ka hape: “The tro kö eö a xomi föe qa thene la nöjei jajinyi ne Kanana. Cilejë, trojë Padanarama eë, kowe la hnalapa i Bethuela, keme ne la thine i ’ö ; nge xomi fö’ i ’ö ju qa lai qa thene la ite nekö i Labana jajiny.” (Gen. 28:1, 2) Hnei Iakobo hna xötrethenge hnyawa la hna ahnithe hnei keme i angeic. Hnei angeice hna nue pe la hnepe lapa i angeic e Kanana me tro cas Karan eë, itre hadredre lao kilomet la enanyin. (Gen. 28:10) Tro jë angeice lai a mekune ka hape: ‘Uti hë eu la tro jë ni a lapa iananyi memine la lapang? Tro jë kö a madrine la mathinenge troa kepe ni? Tro jë kö ni lai a öhne la ketre föe ka hni koi Iehova?’ Ngo traqa ju hi la ketre ewekë e Luza, 100 kilomet qaa Bere-seba, ka xatua Iakobo matre tha tro hmaca kö angeice a hnehengazo. Nemene la ewekë cili?
7. Nemene la ithuecatre hnei Akötresie hna hamë Iakobo?
7 Ame hë e Luza, kola iamamanyi hnei Iehova koi Iakobo jëne la pu me hape: “Hana wang, ce ini me eö, nge tro ni a thupë eö ngöne la hnei ’ö hna troa tro kow, nge tro ni a ahmacanyi eö kowe la nöje celë ; ke tha tro kö ni a nue eö pi, uti hë ase hë ni kuca la hnenge hna qaja koi ’ö.” (Gen. 28:15) Eje hi laka, hna thuecatrei Iakobo hnene la itre trenge ithanata celë! Thupene lai, Iakobo jë pe hi a lapa, ngo pi tro catre hë angeic a öhne la aqane troa traqa la hna thingehnaeane hnei Iehova. Ma hnei epuni jë hë hna hane trotrije la hnalapa i epuni troa nyi hlue i Iehova ngöne la ketre nöj, nge tui Iakobo, maine jë hnei epuni hna hane hnehengazo. Ngo ame pe, tha sihngödri kö koi epuni la aqane thupë epuni hnei Iehova ngöne la itre götrane ka nyimutre ne la mele i epun.
8, 9. Nemene la aqane nyi “hnamunë” Iakobo hnei Iehova? Nemene la ini hne së hna xome qa ngöne la itre tulu i Aberahama, me Isaaka, me Iakobo?
8 Traqa ha Iakobo e Karan, ame hna kepe angeice hnyawa hnei Labana mathine i angeic, nge e thupene hë, ame hna hamë Lea pi me Rakela nyine föi angeic. Ngo tro ju pë hë la itre drai, nge tha meköti hë la aqane huliwa i Labana koi Iakobo, goi atreene fe lao saze la thupe i angeic! (Gen. 31:41, 42) Ngo hnei Iakobo hna xomihnine la itre jole cili, ke, catre la mejiune i angeic, nge eje hi koi angeice laka, tro Iehova a thupë angeic. Ame la pun, kolo ha amanathithi Iakobo hnei Iehova. Ame lo ijine Akötresieti a abëekë angeice hmaca Kanana eë, “kösaue la hnënge öni e [Iakobo], me ite hlue föe me trahmany, me ite kamela, me asina.” (Gen. 30:43) Atraqatre la ole i Iakobo koi Iehova, ame hnei angeice hna thithi me hape: “Tha ijiji ni kö la tenge ihnimi asë me nyipici asë hnei cilieti hna aleuleunyinëti kowe la hluewa i cilie ; ke hnenge hna tro shashaithe la Ioridano ce fë la sinetöng ; nge enehila lue xötë hë ni.”—Gen. 32:10.
9 Kola amamane hnene la itre tulu celë la enyipicine la itre ithanata i Mose, lo kola hape: “JOXU fe, cilieti la hnamunë i nyihunie ngöne la nöjei xöt.” (Sal. 90:1) Tha saze kö Iehova. Nyidrëti pala hi a hnime me thupën, me nyi hnyawane la itre hlue i Nyidrë ka mele nyipici. (Iako. 1:17) Tro sa ce wange la aqane kuca i Nyidrë.
IEHOVA —LA “HNAMUNË” SË ENEHILA
10. Pine nemene matre troa eje hnyawa koi së laka, tro pala hi Iehova a nyi “hnamunë” ne la itre hlue i Nyidrë?
10 Pane mekune jë së la ewekë ka traqa celë: Epuni ngöne la ketre hnakootre matre troa jele thoine la ketre atr ka inamacan, me atre catr. Ketre atre thoi me ka ihumuth, nge ame angeic, hna huliwa kow hnene la nöjei pengöne atr e cailo fen. Nemene ju hë la pengöi epuni ngöne la epuni a tro qa ngöne la hnakootr e hej? Tro kö epuni a mele xetietë? Ohea! Nyipi ewekë tro epuni a sipone la ketre troa thupë epun. Ka ceitu hi lai memine la Itretre Anyipici Iehova, itretre jele thoine lo ithupëjia me Iehova, ene Satana. (E jë la Hna Amamane 12:17.) Hnei Satana hna thele jëne troa apatrene la nöje i Iehova. Ngo hapeu, hnei angeice kö hna apatrene la nöje i Iehova? Ohea! Pine laka, easa pala hi la a cainöje kowe la itre atr ka nyimutre ngöne la fene hnengödrai. Hna atreine tune kaa? Casi hi la kepine lai: Iehova la “hnamunë” së. Hna thupë së me amanathithi së hnei Nyidrë, nge kola mama catre hnyawa ngöne la itre drai tixenuë ne la fene celë. (E jë la Isaia 54:14, 17.) Ngo tro pala kö Iehova a “hnamunë” së, e tha tro kö sa nue Satana troa iaö së.
11. Nemene la ketre ini nyine tro sa xome qa ngöne la tulu i Aberahama, me Isaaka, me Iakobo?
11 Hetre ketre ini nyine tro sa xome qa ngöne la tulu i Aberahama, me Isaaka, me Iakobo. Ngacama angatre ekö a mele ngöne la nöje e Kanana, ngo hnei angatre hna ananyine la aqane melene la itre atrene la nöj, nge angatre fe a sisine la itre thiina ka ngazo hna kuca hnene la itre atr cili. (Gen. 27:46) Tha nyipi ewekë kö tro angatre a hetrenyi la ketre itusi hna fejane la itre tulu ne aqane mel nyine troa amamane la ewekë ka loi me ewekë ka ngazo. Atre hi angatre la hnei Iehova hna hnin, me hna sisin. Celë hi matre, angatr a catre kuca asë la hnei angatre hna atreine matre tha tro kö angatre a hane nyi sinee ne la fen. Drei la ketre tulu ka lolo koi së! Epuni fe kö a thele catrëne troa xome la tulu ne la itre hlue i Akötresieti celë ka mele nyipici? Amamane fe kö epuni ka hape, xele fe kö epuni ma hane nyi sinee ne la fen hnene la aqane iëne epuni la itre nyine tro epuni a nyi sineen, me itre nyine iamadrinë? Ngazo pe, ame la itre xa atrene la ekalesia, lolo la mele i angatre ngöne la fene i Satana, kösë angatre kö e hnine la sipu hnalapa i angatr. Maine tro epuni a nango mekune tune lai, haawe, loi e troa sipo ixatua thei Iehova jëne la thith. The thëthëhmine kö laka, ewekë i Satana la fene celë, atre ka tha imeku, nge ka tha hnehengazo së kö.—2 Kor. 4:4; Efe. 2:1, 2.
12. (a) Hnei Iehova hna xatuane tune kaa la itre hlue i Nyidrë? (b) Nemene fe la aqane drenge i epuni la ixatua hna hamë së hnei Iehova?
12 Maine xele së troa iaö së hnei Satana, nyipi ewekë tro sa kepe thangane ka loi qa ngöne la nöjei ixatua hna hamëne hnei Iehova kowe la itre hlue i Nyidrë. Ame la ketre ceitun, ene la ixatua hnei Nyidrëti hna hamën jëne la itre icasikeu ne la itre Keresiano, me hmi ne la hnepe lapa, nge itre qatre thup a hamëne la itre ixatua nyine akeukawanyi së me thuecatre së matre atreine së cile catre qëmekene la itre jole ka traqa kowe la mele së. (Efe. 4:8-12) Hnene la ketre trejine me easë George Gangas, ka hane cile ekö ngöne la Lapa Ne Xomi Meköt koi nyimu macatre, hna cinyihane la mekuna i nyidrë ngöne la nyidrë e nyipine la nöje i Akötresie: “Ame la eni e nyipi angatr, kösë eni ngöne la hnalapang, cememine la hnepe lapang.” Hane fe kö epuni drenge e kuhu hni epuni la pengöne celë?
13. Nemene la ketre ini ka tru nyine tro sa xome qa ngöne la tusi Heberu 11:13?
13 Ame la ketre ini nyine tro sa xome qaathei Aberahama, me Isaaka, me Iakobo, tre, ene laka tha tro kö sa xou troa isazikeu memine la itre atr ka lapa xötreithi së. Tune la hne së hna ce e ngöne la paragarafe 1, hnene la itre atr celë ka mele nyipici hna “amaman, ka hape, ite tenyiwa angate me itete tro agö e celë fene hnengödrai.” (Heb. 11:13) Hapeu, epuni kö a amamane ka hape, ka isazikeu epuni memine la itre atrene la fene celë? Eje hi, nango jole e itre xa ijin. Ngo atreine hi tro epuni mele tune lai jëne la ixatua i Akötresie me ixatua qaathene la itre trejin. The thëthëhmine kö ka hape, tha epuni hmekuje kö. Ame la nöjei ka nyi hlue i Iehova, tre, itre ka tro asë hi a cile koi me Satana memine la fene celë! (Efe. 6:12) Ngo atreine hi së troa hun e tro sa mejiune koi Iehova, me xomi Nyidrëti nyine hnamunë së, nge hnë mele xetietë.
14. Nemene lo “lapa” hna treqene hnei Aberahama?
14 Loi e tro fe sa nyitipu Aberahama, nge tha tro kö a thëthëhmine la thupen. (2 Kor. 4:18) Hnei Paulo aposetolo hna cinyihane ka hape: “Hnei [Aberahama] hna teqene la lapa ka hete tepen, nge ame la ate acile me huliwan, te, Akötesie.” (Heb. 11:10) Ame la “lapa” cili, tre, ene la Baselaia i Akötresie. Maine hnei Aberahama hna treqene ekö la “lapa” cili ka troa traqa, ngo ame easë, pë hmaca kö itreqe, ke, cile hë la Baselaia enehila e hnengödrai. Ketre, hnene la itre hna perofetane hnene la Tusi Hmitrötre hna amamane hnyawa ka hape, tha hmitre pe kö matre musinëne jë eje la fene asë. Hapeu, amamane kö epuni hnene la aqane mele i epuni ka hape, epuni a mejiune kowe la Baselaia cili? Epuni kö a amë panëne la Baselaia ngöne la mele i epun, me ananyine la aqane mele ne la fene celë?—E jë la 2 Peteru 3:11, 12.
IEHOVA PALA HI ELANYI LA KA TROA “HNAMUNË” SË
15. Nemene la pune elanyi kowe la itre atr ka mejiune kowe la fene celë?
15 Kolo pala hi a easenyi catre kowe la pun, nge kolo jë petre hi ka hape, jole catre jë la mele ngöne la fene celë. (Mat. 24:7, 8) Nge e nyiqaane jë la akötre atraqatr, tro hmaca kö lai a jole catr la mele ngöne la fen. Ame ngöne la fen asë, troa iapatreny, me imenumenu, nge tro la itre atr a mele hnine la xou. (Hab. 3:16, 17) Önine la Tusi Hmitrötr, patre hë lo itre hnei angatre hna mejiune kow matre kötre mele ju pë hë “ngöne la ite hnaope me ite hnauji ne la ite wet.” (Hna ama. 6:15-17) Ngo pëkö hnaope ka ijije troa juetrë angatr, nge pëkö hna atreine kuca koi angatre hnei angetre kuci mo me kuci politik.
16. Nemene la aqane tro sa wange la ekalesia, nge pine nemen?
16 Tro Iehova a thupë së ngöne la ijine akötre atraqatr. Tui perofeta Habakuka, tro fe së elanyi a madri Akötresie Ate amele së. (Hab.3:18) Nemene la aqane tro Iehova elanyi lai a thupë së ngöne la ijine jole cili? Tro sa lapa treqen me goeën. Ngo pëkö tro sa luelu, ke, e traqa pi la ijine cili, ame la nöje i Iehova, tre, ka hnëkë hnyawa pala hi, me lapa treqene la itre ithuemacanyi qaathei Nyidrë, tune lo angetre Isaraela ekö ka lö pi qaa Aigupito. (E jë la Esodo 13:18; Hna ama. 7:9.) Tro sa kapa tune kaa la itre ithuemacanyi cili qaathei Iehova? Tro kö Iehova elanyi lai a qaja koi së la nyine tro sa kuca jëne la ekalesia. Hnei Isaia 26:20 hna qaja la itre “hnahage” hnë troa zae ngön hnene la nöje i Akötresie. Kola qaja la itre ekalesia ngöne la fene hnengödrai. (E jë la Isaia 26:20.) Ka tru kö koi epuni la itre icasikeu ne la ekalesia? Hnei epuni kö hna kuca pala hi la itre hnei Iehova hna amekötine kowe la ekalesia?—Heb. 13:17.
17. Nemene la aqane tro Iehova a hane “hnamunë” ne la itre ka mele nyipici, nge ka meci hë?
17 Tro fe Iehova a hane “hnamunë” ne la itre ka mele nyipici, nge ka meci qëmekene troa traqa la akötre atraqatr. Troa hnamunë i angatre tune kaa? Tro Nyidrëti a amele angatre hmaca. Itre macatre hë e thupene la hna meci hnei Aberahama, me Isaaka, me Iakobo, hnei Iehova hna qaja koi Mose, ka hape, Nyidrëti pala hi la Akötresie i angatr. (Eso. 3:6) Hnei Iesu hna nyipi ewekëne me amexeje hmaca la trenge ithanata celë me qaja hmaca ka hape: “Tha Akötesieti ne nyidëti la ite ka meci, ngo ite ka mele pe ; ke mele asë hë koi nyidë.” (Luka 20:38) Ame koi Iehova, ame la melehmaca ne la itre hlue i Nyidrë ka mele nyipici, tre, eje hi laka tro lai a traqa, ke ame la itre atr cili, ceitu me itre ka mele hë koi Nyidrë.—Ate cai. 7:1.
18. Nemene la aqane tro Iehova a “hnamunë” ne la itre hlue i Nyidrë ngöne la fene ka hnyipixe?
18 Ame ngöne la fene ka hnyipixe, hetre ketre pengöne aqane tro Iehova a “hnamunë” ne la itre hlue i Nyidrë. Öni Hna Amamane 21:3: “Thei nöjei ate la uma ne heta i Akötesie, nge tro nyidëti a lapa thei angat.” Tro Iehova a nue koi Iesu Keriso troa amekötine la fene kowe la pane ca thauzane lao macatre. Ame hë la pune la ca thauzane lao macatre, ase hë Iesu eatrëne la aja i Keme i nyidrë, nge thupene lai tro hmaca nyidrë a nue la Baselaia koi Iehova. (1 Kor. 15:28) E cili hë, Iehova kö la ka troa musi meköti kowe la atr ka pexej. Drei la ketre mele ka mingöminge elanyi ka troa traqa koi së! Xötrethenge jë la tulu ne la itre hlue i Iehova ekö, ene la tro së enehila a xomi Iehova nyine “hnamunë” së.
[Thying]
[Iatr ne la götran 19]
[Iatr ne la götran 20]
“Tha tro kö ni a nue eö pi”
[Iatr ne la götran 22]
Kola xatuane me thupëne la itre hlue i Iehova hnenen la itre angela i Nyidrë
