The Nuetrije Pi Kö La Mejiune i Epun!

Hapeu, ketre Atre Anyipici Iehova epun, a traqa ha koi itre macatre enehila, nge ka ajane tro fe la föi epuni a hane atrunyi Iehova?

Maine pena, hna ananazijë epuni kö, hnene laka ame lo ka ini Tus me epun, tre, ajane jë hi lo xötrei nge xele hmaca ju hi ma xötrethenge la nyipici?

 Troa xatua epuni hnene la itre hna melëne hnene la itre xa atr qa Agele, troa trotrohnine la kepine matre tha tro pi kö epuni a nuetrije la mejiune i epun. Ketre, tro fe epuni a trotrohnine la nyine tro epuni a kuca, matre tha tro kö epuni a mano ‘kuiëne la areto i epun kowe la hneopegejë,’ göi troa xatuane la itre ka tha kapa petre kö la nyipici.—Ate cai. 11:1.

CILE HUTI JU—KETRE EWEKË LAI HNA MELEN

Ame la ketre ewekë hna melen, ene la troa catre fë la nyine kuca. Nyipi ewekë tro epuni a fedre kowe la nyipici me lapa qale koi Iehova. (Deu. 10:20) Hna kuca tune hi lai hnei Georgina. Ame la angeic a nyiqaane inine la Tusi Hmitrötre memine la Itretre Anyipici Iehova lo macatre 1970, elë jë hi la hni Kyriacos föi angeic. Hnei angeice hna thele jëne troa apëne la ini Tusi ne la föi angeic, me xele ma alöne la Itretre Anyipici Iehova kowe la hnalapa i angeic, me trije la itre itus i angatr.

Ame hë la Georgina a nyiqaane sine la itre icasikeu ne la ekalesia, elë catre hmaca jë hi la hni Kyriacos. Ame ngöne la ketre drai, hnei angeice hna tro kowe la Uma Ne Baselaia troa thele iwesitrë. Ame la kola öhne hnene la ketre trejine föe laka, ka maca catre kö koi Kyriacos troa qene Heleni hune la qene Papale, eahlo hi lai a telefone ju kowe la ketre trejine ka qene Heleni ngöne la ketre ekalesia matre troa xatua Kyriacos. Madrine Kyriacos la aqane ujë ne la trejin, celë hi matre hna kepe angeic hnyawa hnei Kyriacos, ame hnei nyidroti hna ce ini Tusi Hmitrötre jë koi itre treu. Ngo ame ju hi e thupen, nue hmaca pi Kyriacos la ini Tusi angeic.

Köni macatre ne Georgina kö a pane mele hnine la icilekeu. Öni Kyriacos, e xome hë föi angeice la bapataiso, nyidroti hë a itrij. Traqa ha kowe la drai ne bapataiso, nge Georgina a thithi fë catrëne koi Iehova matre tha tro kö a triji angeice hnei Kyriacos. Ame la kola traqa hnene la Itretre Anyipici Iehova troa tro thei angeic kowe la hna asabele, öni Kyriacos koi angatr: “Ange tro pa jë, tro fe hi nyiho a ixötrethenge me loto i nyiho.” Hnei angeice hna sin la icasikeu ngöne la hmakanyi ka pexej uti fe hë la kola bapataisone la föi angeic!

Thupene hë, lapa kötre trootro hë la icilekeu i Kyriacos, nge kolo pala hi a lolo trootro la aqane saze i angeic. Kola traqa kowe la 40 lao macatre qaane lo Georgina a xötrei sine la itre icasikeu ne la Itretre Anyipici Iehova, nge föi angeic a xome la bapataiso! Nemene la ka xatua Kyriacos? Öni angeic: “Tru la madrine i angeice koi Georgina hnene la aqane cile hutine la lapaune i angeic.” Ketre öni Georgina fe: “Ngacama hna icilekeu hnene la föeng, ngo pëkö ka troa thingijëng troa nyi hluene la Akötresing. Ame asë hi ngöne la itre ijine cili, hnenge hna catre thithi koi Iehova, nge tha hnenge pi kö hna nuetrije la mejiuneng.”

ENYIPIEWEKËNE LA TROA HETRENYI LA ATR KA HNYIPIXE

Ame la ketre aqane tro epuni a xatuane la föi epun, tre, ene la troa kökötre thei epuni la thiina ne Keresiano. Hnei Peteru hna thuemacane la itre föe keresiano ka hape: “Loi e tune fe nyipunie ite fö, denge thenge ju la ite fö’ i nyipunie ; thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula.” (1 Pet. 3:1) Ngacama hnei Christine hna melëne la eamo celë, ngo tha hnei föi angeice kö hna canga kapa la nyipici, hna lö pë hë thupene la itre macatre ka nyimutre. Ame lo angeic a xötrei kapa la nyipici laka 20 hë lao macatre enehila, ame petre kö ngöne la ijine cili tha lapaune kö John koi Akötresie. Tha ajane kö John troa lö hnine la ketre hmi, ngo ame pe öhne hi angeic la hmi ka hnyipixe ngöne la mele i Christine. Öni angeic: “Öhne hi ni laka, hetre madrine i angeice qa ngön. Atreine hë angeice cile kowe la itre jole ka traqa, nge kola xatua ni fe troa qëmeke kowe la itre jole ka nyimutre.”

Tha hnei Christine pi kö hna ihuline la hmi angeic, öni föi angeice jë kö: “Atre hi Christine ka hape, tha nyipi ewekë kö troa ithanatane me eni la hmi, ngo hna nue ni pe troa inine thenge la atreine ka eje theng, me thenge la ajang.” Ame la Christine a öhne la itre tane mekune ngöne la Ita Ne Thup me Réveillez-vous ! hna troa pi e hnei John, tune la itre ka qeje pengöi Sias me nöjei ewekë ka mele xötreithi së, angeice hi lai a amamane ju la itre mekune cili me hape, “Hane hi lo la itre hnei eö hna pi e.”

Itre macatre hë e thupen, reteret hë John, nge angeice fe hë a eëny. Hetre ijine i angeice hë troa mekune ajuine la itre ewekë ka tru ka traqa kowe la mele ne la atr, matre öni angeice jë hi ka hape, ‘Hapeu, itre ka xulu xane së, maine hna xupi së thenge la mekuna ne la Atre Ixup?’ Ame ngöne la ketre ijin, önine jë hi la ketre trejine hnei John hna ce porotrike memin ka hape, “Tune kaa e tro nyiso a ini Tus?” Öni John: “Hnene laka eni ha nyiqaane lapaune koi Akötresie, ame hnenge hna kapa ju.”

Lolo catre la aqane ujë i Christine, tha hnei angeice kö hna nuetrije la mejiun! Thupene la 20 lao macatre ne thithi sai John hnei Christine, angeice a kapa ju la nyipici me xome la bapataiso. Ame enehila, lue ka catre nyidro ce nyi hlue i Iehova. Öni John: “Lue ewekë ka ahmalane la hning, ene la thiina ka loi me aqane hnimi sinee ne la Itretre Anyipici Iehova. Ame la epuni a faipoipo memine la Atre Anyipici Iehova, tre, epuni lai a hetrenyi la trahmanyi maine föe ka atreine mele nyipici, me nyine mejiune kow, nge ka atreine wangatrune la itre aja i epun.” Eje hi, hnei Christine hna melëne la trenge ewekë ngöne 1 Peteru 3:1, nge ka lolo la thangane qa ngön!

 KOLA WAWENE LA ITRE FEJA THUPENE LA ITRE MACATRE KA NYIMUTRE

Ame lo itre ka ini Tusi Hmitrötr nge ka nue hmaca a thatre kö la kepin, tre, tune kaa la pengöi angatr? Hnei Solomona hna cinyihane ka hape: “E hmakanyi traneju la ite feja i ’ö, nge e heji the shawa kö la iwanakoime i ’ö, ke tha ’te kö eö la ka troa cia, maine celë maine cili, nge maine troa ce loi lu’ ej.” (Ate cai. 11:6) Ame itre xa ijin, traqa koi itre macatre thupene la hna jume la ketre feja, nge eje petre hi a cia. Kolo petre hi a trotrohnine ngöne la ijine cili hnene la atr, la enyipiewekëne la tro angeic a easenyi koi Akötresie. (Iako. 4:8) Eje hi laka, troa traqa la ketre ijine tro epuni a sesëkötre madrin.

Tro sa pane ce ithanatane la pengöi Ales, ketre föe ka feke qaa Ëde troa mele e Agele. Ame lo macatre 1974, hnei angeice hna nyiqaane inine la Tusi Hmitrötr. Ka ithanatane angeice la Hindi, ketre qene hlapa ne Ëde, ngo angeic a ajane troa maca ngöne la qene Papale. Hnei Ales hna inine la Tusi Hmitrötre koi itre macatre, nge nyimu icasikeu hnei angeice hë hna hane sine ngöne la ekalesia ka qene Papale. Atre hi angeice laka, nyipici hi la hnei angeice hna inin, ngo tha hnei angeice pe hna nyipi ewekën. Ame la engazon, tre, tha ca mekune i angeice kö, ke, ka pi aja mani, me ka kuci feet. Ame hë e thupen, xele ju hi ma ini Tus.

Thupene la 30 lao macatre, kapa jë hi Stela, lo ka ini Tusi ekö koi Ales, la ca tus qaathei Ales. Hna cinyihane e hnin ka hape: “Eje hi laka, tro eö a sesëkötre e atre jë eö ka hape, ame lo hnei eö hna ini Tusi Hmitrötre kow lo macatre 1974, tre, ase hë bapataisone lo asabele ne distrik ka ase hë. Eö la ketre ka hamëne la ixatua ka sisitria ngöne la meleng. Hnei eö hna traane e kuhu hninge la itine la nyipici, nge ngacama tha ijine tro petre kö ni a nue ni koi Akötresie, ngo ka jilapa pala hi ngöne la mekunang, me e kuhu hninge la itine nyipici cili.”

Nemene la ewekë ka traqa? Öni Ales e qeje pengöne ka hape, hna traqa koi angeice ekö la ketre mec, kolo itre mekune ka akötrëne la mele i angeic hna lapa fë e kuhu hni, thupene la hna meci la föi angeice lo macatre 1997. Hnei angeice hna thithi koi Akötresie. Tha traqa ju kö kowe la treene lao menetr, nge traqa ju hi la lue Atre Anyipicin ka qene Punjabi, ketre qene hlapa ne Ëde, troa ithanata me angeic, me amë pe la tarak hna hape Nemen La Mejiun Göi Itre Ka Meci Hë Hne Së Hna Hnim? Mekune jë hi Ales laka, ase hë kapa la thithi angeic, ame hnei angeice hna mekune troa ce hmi memine la Itretre Anyipici Iehova. Ngo tro angeic a öhnyi angatre ekaa? Öhne ju pe hi angeice la ketre karne hna fejane la itre hune tus, lo hna hamë angeice ekö hnei Stela matre troa hane sine la itre icasikeu ngöne la ekalesia ka qene Punjabi. Hnei Ales hna tro kowe la Uma Ne Baselaia, nge loi la aqane kepe angeice hnene la itre trejine trahmanyi me föe ka qene Punjabi. Öni Ales: “Ketre drenge kö ni la ihnimi ne la itre trejin, nge uti hë la lö hmaca ni qa ngöne la Uma Ne Baselaia thupene la icasikeu, tha patre kö la ihnimi cili e kuhu hning, nge celë hi ka axapone la hning, me xeji ni qa ngöne la mecing.

Hnei angeice hna sine hmaca la itre icasikeu, nge tha ase kö angeice trian, nge hnei angeice hmaca hna inine la Tusi Hmitrötre memine la ketre trejin, me inine ithanatane me e hnyawa la qene Punjabi. Hna bapataiso angeic lo macatre 2003. Hanawange la aqane nyipune la tusi koi Stela: “Oleti atraqatre lo itre itine feja hna traane ekö laka, 29 hë lao macatre enehila, nge oleti lo tulu nyine tro ni a xötrethenge.”

Nemene la ini nyine tro sa xome qa ngöne la itre hna melëne celë? Qea ju hë la itre macatre ne tro sa itreqe, ngo e ka mejicine la atr ngöne la götrane la ua, nge e eje thei angeice la ipië me hni ka nyipici, tro kö Iehova lai a aciane la itre itine nyipici ngöne la hni angeic. Mekune i epuni lo itre ithanata i Iesu ngöne la ketre ceitune i nyidrë: “Ame hna ciajë la zine me hoeajë, ngo tha ’te kö [la atre traan] la pengön. Nge hnadro a aciane la xeni hnei nyëne kö, pai zin, mate engepi, ame hna pexejejë la wen.” (Mar. 4:27, 28) Ame la aqane cia cili, tre, ka hetre ijine kö, ngo thatre pe së, nge eje a cia “hnei nyëne kö.” Eje hi laka, pëkö atre cainöje ka atreine troa atrepengöne la aqane trongen. Celë hi matre catre pi së troa traane atrun. Nge ketre tro kö së lai a menuëne atrun.

Nge the thëthëhmine pi kö la enyipi ewekëne la thith. Hnei Georgina pala hi me Christine hna catre thithi koi Iehova. Maine tro epuni a “thithi iele” nge tha tro pi kö epuni a nuetrije la mejiune i epun, “thupene la ite drai ka nyimute,” tro hmaca kö epuni a öhne lo “areto” hnei epuni hna kuiëne hune la hneopegejë.—Rom. 12:12; Ate cai. 11:1.

[Iatr ne la götran 30]

[Iatr ne la götran 30]

[Iatr ne la götran 30]

[Iatr ne la götran 30]

Kola traqa kowe la 40 lao macatre qaane lo Georgina a xötrei sine la itre icasikeu ne la Itretre Anyipici Iehova, nge föi angeic a xome la bapataiso

[Iatr ne la götran 30]

Kola qaja hnene la tusi Ales hna kapa hnei Stela ka hape: “Eje hi laka, tro eö a sesëkötre e atre jë eö ka hape, ame lo hnei eö hna ini Tusi Hmitrötre kow lo macatre 1974, tre, ase hë bapataisone lo asabele ne distrik ka ase hë”

[Hna cinyhan ne la götran 32]

“Oleti atraqatre lo itre itine feja, hna traane ekö laka, 29 hë lao macatre enehila, nge oleti lo tulu nyine tro ni a xötrethenge.”—Ales