NYINE haine la kola goeëne la etrune la itre thöth, angetre ahmaloeëne la mele i angatr matre troa huliwa atrunyi ngöne la hna cainöje trootro. (Mat. 6:22) Nemene la aqane saze angatre la mele i angatr? Nemene la itre jole hnei angatre hna elë hun? E tro sa pi atre, tro sa ce wange la hna kuca hnene la itre ka cainöje trootro e Meksik.

“NYIPI EWEKË TRO NYIHO A SAZE LA MELE I NYIHO”

Hnei Dustin me Jassa lue trefëne qaa Amerika hna faipoipo lo Januare macatre 2007. Tha qea ju kö e thupene, nge eatrë hë la itre mekune hnei nyidroti hna lapa fë—ene la troa itö he, me mele e hnin koi ca macatre. Hna uhnin la he i nyidro ezine Astoria, Oregon, Etazini, ketre traone laka, hna sinöe xötreith, nge itre eje a cia ngöne itre gaa draië, me itre hene wetr hna atuthe hnei kiona, tha nanyi kö qa ngöne la ngöne gejë ne Océan Pacifique. Öni Dustin, “Ame la nöjei götrane hne së hna goeën, tre, ketre pengöne kö la emingömingön!” Hnene la lue trefëne hna mekune ka hape, ka hmaloe hi la mele i nyidro, ke, nyidroti a mejiune koi Iehova. Öni nyidro e isa mekun, ‘Nyiho hi la a mele hnine la he ka 7,9 m la eqean, nge nyiho hi la a huliwa koi sine drai, me sine la ekalesia ka ithanatane la ketre qene hlapa kö, nge nyimu ijine nyiho a xome la huliwa ne pionie ka ixatua.’ Ngo thupene jë hi lai, ketre trotrohnine ju hi nyidro ka hape, tria kö la aqane wai ewekë i nyidro. Öni Dustin, “Tru hmaca ju kö la traeme hnei nyiho hna xome troa kuca hnyawa la he hune la troa ixatua ngöne la ekalesia. Atre hnyawa hi nyiho laka, e tro Iehova a lapa ngöne la göhnë ka sisitria ne la mele i nyiho, nyipi ewekë tro nyiho a saze la aqane mele i nyiho.”

Öni Jassa hmaca jë: “Qëmekene tro nyiho a faipoipo, hnenge ekö hna mele e Meksik, nge ame e cili hnenge hna  lapa hnine la ketre ekalesia ka qene Papale. Ka madrine pala hi ni troa cainöje e cili, nge pi tro hmaca ni a bëek.” Ame ngöne la ijine Dustin me Jassa a hmi hnepe lapa, hnei nyidroti hna acatrene la aja i nyidro troa cainöje ngöne la itre nöje trenyiwa jëne la hna e la itre itusi ka qeje pengöne la mele ne la itre trejine trahmanyi me föe. Angatre lo angetre tro kowe la itre xa nöje troa cainöje e cili, nge tru la madrine i angatre laka, macaje hë e troa menu. (Ioane 4:35) Öni Dustin, “Pi tro fe nyiho a hane madrine tui angatr.” Ame ju hi la nyidroti a drenge qaathene la itre sinee qaa Meksik ka hape, ca gurupe ka hnyipixe ka aja ixatua, pë hmaca ju kö ketre ka ajolë nyidro. Ame hnei nyidroti hna nue la huliwa i nyidro, me he i nyidro, me tro Meksik eë.

“EWEKË KA SISITRIA KA TRAQA KOWE LA MELE I NYIHO”

Hnei Dustin me Jassa hna lapa ngöne la traone e Tekoman—ka easenyi catre hmaca kö kowe la ngöne gejë ne Océan Pacifique, 4 345 km ngöne la götrane kolo jë ne Astoria. Öni Dustin, “Patre hë la enyi ka lepany, me itre wetr hnei nyiho hna majemine goeën, ngo kolo pena ha a nyihnane hnei hedredrei ka catrehnine lo hna hape hneijine wenehmitre, me hnënge lemen, a thatrehmekune la pun.” Ame la nyidroti a xötrei traqa, tha öhnyi huliwa kö nyidro. Co pe hi la sine kemeji nyidro, matre nyidroti pe hi a melë laes me ariko ngöne la lue traeme ne xen o drai, me e nöjei wiik. Öni Jassa, “Ngo ame ju hi la kola troa pë a i nyiho, nge jole hë koi nyiho, traqa fë pi hi hnene la itre hnei nyiho hna ce ini Tusi Hmitrötre memin la itre wene maag, me wahnawa, me waniapo, me itre bëekë wene lemen!” Nge e thupene hë, hetre huliwa i nyidroti hë, nyidroti a ce huliwa jëne ëternet memine la ketre uma ne ini ka ini qene hlapa e Taiwan. Ame la mani hnei nyidro hna kapa enehila qa ngöne la huliwa cili, tre, ijije hi tro nyidroti a mele ngöne la drai.

Nemene la hnei Dustin me Jassa hna mekune göne lai aqane mele i nyidro ka hnyipixe? Öni nyidro, “Ame la nyiho a feke kowe la traone celë, celë hi ketre ewekë ka sisitria ka traqa kowe la mele i nyiho. Ame la aqane ce mele i nyiho me Iehova me aqane imelekeu i nyiho, tre, ka catrehnine catre hmaca kö hune ekö. E nöjei drai, nyimu huliwa hnei nyiho hna ce kuca, tune la nyiho a ce cainöje trootro, me ce ithanatane la aqane troa xatuane la itre atr ka ce ini Tusi me nyiho, me ce hnëkene la itre icasikeu. Ketre mina fe, patre hë thei nyiho lo itre ewekë hnei nyiho hna thue ehnefëne ekö.” Öni nyidroti hmaca jë: “Ame enehila, trotrohnine hnyawa ha nyiho la itre ewekë tha hnei nyiho kö hna atrepengöne hnyawa ekö, ene la nyipici hna thingehnaeane ngöne la Salamo 34:8 kola hape, ‘Demeju, nge atejë laka ate ihnimi Iehova.’ ”

ITRE THAUZANE LAO KA SAEN—NEMENE LA KA UPI ANGATR?

Hna sasaithe la 2 900 lao trejine trahmanyi me föe ka faipoipo me ka pë föen, nge ka truedre me thötre lao macatre, itre ka feke troa cainöje ngöne la itre xa götrane e Meksik gaa aja ixatua. Pine nemene matre kapa jë hnene lai Itretre Anyipici Iehova troa kuca la huliwa ka tru celë? Thupene la hna hnyinge koi angatr, mama pi hi la köni kepine ka tru. Nemene la itre kepine cili?

 Troa amamane la ihnimi angatre koi Iehova me kowe la itre atr. Leticia a xomi bapataiso nge kola 18 lao macatre i angeic. Angeice a qaja ka hape: “Ame la eni a nue la melenge koi Iehova, eni hi lai a trotrohnine ka hape, tro hë ni a nyi hlue i Nyidrë cememine la hni me u ka pexej. Celë hi matre, e troa mama la ihniminge ka pexeje koi Iehova, nyipi ewekë tro ni a xome la traemenge me trenge catrenge troa nyi hlue i Nyidrë.” (Mar. 12:30) Hnei Hermilo, lo ka faipoipo enehila me Leticia hna feke ekö lo kola truedre lao macatre i angeic kowe la ketre götrane gaa aja atr ka cainöj. Hnei angeic hna qaja ka hape: “Eni a öhne hnyawa e cili ka hape, ame la troa xatuane la itre atr troa kökötre ngöne la götrane la ua, tre, celë hi aqane tro ni lai a amamane la etrune la ihniminge kowe la itre atr.” (Mar. 12:31) Celë hi matre, trotrije pi angeice la huliwa i angeice ngöne baak me elolone la mele i angeice e Monterrey, ketre traone gaa hetre mo, matre feke kowe la ketre neköi traone ka co.

Troa melëne la nyipi madrine ka cile hut. Tha qea ju kö thupene la hna bapataiso Leticia, nge angeice fe hë a ce tro memine la ketre trejine föe ka hekö hë pionie kowe la ketre traone ka lapa cas, matre troa cainöje e cili koi ca treu. Öni Leticia e mekune hmaca ka hape: “Ketre pengöne kö la eni a wange la aqane nyipi ewekëne la itre atr la maca ne la Baselaia! Hane hi lai ka atrune catrëne la madrineng. Ame hë la pune la treu, öninge hmaca jë kö, ‘Hane hi la hnenge hna pi kuca ngöne la meleng!’ ” Ketre tui Essly, ketre trejine föe ka pë föen, nge ka truedre lao macatren enehila, hnene la madrine hnei angeice hna goeën hna huli angeice kowe la huliwa cili. Ame la angeice petre kö a ini e Lycée, hnei angeice hna ithanata memine la itre ka catre cainöj, nge ka tro kowe la itre götrane gaa aja ixatua. Öni angeic, “Ame la eni a öhne la madrine ne la itre trejine föe me trahmanyi, ene pe tru jë fe hi la ajange troa hane tui angatr.” Tru hnei trejine föe ka ujë tui Essly. Eje hi laka, ame e Meksik, 680 nge hetre munën lao trejine föe ka cainöje ngöne la itre götrane gaa aja ixatua. Drei lai ketre tulu ka lolo hnei angatre hna hamëne kowe la itre thöth me itre thupëtresij!

Troa hetrenyi la mele ka hetre aliene me ka madrin. Essly petre hi a fenesi qa Lycée, nge kolo fe hë a kepe angeice e Université. Hnene la itre sine ini angeice hna thuecatre koi angeice troa lö kowe la hna ini cili matre tro angeice a “mele ka loi” elany, nge e hetre pepa ha, tha jole hë troa hetre huliwa, me troa itö loto, me troa ihamë ngöne itre xa nöj. Ngo tha hnei angeice kö hna trongëne la itre mekuna i angatr. Öni Essly jë hi: “Nyimu sineenge Keresiano ka thele la itre ewekë cili, nge eni a öhne laka, ame la itre ewekë ne la ua hnei angatre hna mekune ekö me pi traqa kow, tre triane hë. Hnenge fe hna öhne laka, tru hnei jole hnei angatr hna cile kow, nge kolo hmaca a traqa tretre la itre xan qa ngöne laka catrehnine la thele mani. Ame la ajang, tre, ene la troa nue la melenge ka pexeje e thöthi petre kö ni troa nyi hlue i Iehova.”

Nue pi hi Essly lo Université tro pe hi a kapa la itre ini ka ijije göi troa xatua angeice troa hetre huliwa thatraqane la itre ka nyipi ewekë kowe la mele i angeic, matre ijiji angeice jë troa pionie. Thupene jë hi lai, hnei angeice hna  feke kowe la ketre götrane gaa aja ka cainöj. Hetre ketre ewekë ka tru fe hnei angeice hna kuca, ene la troa inine la itre qene hlapa hna ithanatane hnene la itretre Otomi me Tlapaneco. Ame hë la angeice a mekune enehila lo köni macatre ne angeic a cainöje ngöne la itre götrane ka lapa cas, öni angeic: “Ame la eni a cainöje ngöne la itre götrane gaa aja ixatua, tre eni hi lai a kapa la nyipi madrine nge tru la aliene lai kowe la meleng. Nge e hune la nöjei ewekë cili, kola acatrene catrëne la aqane ce melenge me Iehova.” Hna kapa fe la mekune celë hnei Phillip me Racquel, lue trefëne qaa Amerika ka thötre lao macatre, öni nyidroti fe: “Ka saze nyimenyime la pengöne la fen, matre tru hnei ka mekune ka hape, ka tëtë hi la mele i angatr. Ngo ame la easa cainöje ngöne la itre götrane kola drenge la hna qaja hnei Tusi Hmitrötre hnene la itre atr, tre, celë hi ka hamëne koi së la mele ka hetre aliene me ka ithue madrin!”

ITRE JOLE KA TRU—AQANE TROA CILE KOW

Eje hi laka, ame la troa cainöje trootro ngöne la itre götrane gaa aja ixatua, tre, ketre jole ka tru lai nyine troa cile kow. Ame la ketre jole ka tru, tre, ene la troa thele la itre ka nyipi ewekë kowe la mel. Haawe, loi e tro epuni a atreine mele ngöne la nöje hnei epuni hna cainöje ngön. Hnei Verónica, ketre pionie ka hekö hë hna qaja ka hape: “Ame ngöne la ketre götrane hnenge hna cainöje ngön, tre, hnenge hna kuca la itre xeni ka tha tru thupene kö nyine troa salemën. Ame hmaca pena ngöne la ketre götran, hnenge hna salemë iheetr, me xötrei he ne la itre atr. Ame enehila, eni a nyidrawane la ketre hnalapa, me inine la itre keme me thin ka nyiqaane hetre nekönatr, la aqane troa ce ife mekunekeu memine la itre nekö i angatr.”

Ame la ketre jole ka tru nyine troa cile kow, tre, ene la troa ce mele memine la itre atrene la götrane nöje ka lapa cas, nge troa atreine trotrohnine la aqane mele i angatr me qene nöje i angatr. Celë hi la pengöi Phillip me Racquel la nyidroti a cainöje ngöne la götrane nöje ka ithanatane la qene Nahuatl. Öni Phillip, “Isa pengöne catre la isa aqane mele hun.” Nemene la ka xatua nyidroti troa trotrohni angatr? “Nyiho hi a nyipi ewekëne la itre ewekë ka loi hnei nyiho hna öhne thene la angetre Nahuatl, ene la aqane imelekeu ne la itre atr ngöne la hnepe lapa i angatr, me aqane inyipicikeu i angatr, me aqane kapa angatre la itre trenyiwa.” Öni Racquel jë fe: “Tru la nöjei pengöne ewekë hnei nyiho hna atre qa ngöne la hnei nyiho hna ce mele memine la itre trejine e cili.”

AQANE TRO EPUNI A KETRE HNËKË EPUN

Maine epuni a ajane troa cainöje ngöne la itre götrane gaa lapa cas, nemene la nyine tro epuni a kuca qaane enehila göi troa hnëkë epun? Kola qaja hnene la itre trejine trahmanyi me föe ka melëne hë la huliwa celë ka hape: Qëmekene tro epuni a fek, loi e troa pane nyiqaane ahmaloeëne la mele i epun, me inine tro hi a mejihnine la hna hetreny. (Fil. 4:11, 12) Nemene hmaca fe la ketre nyine tro epuni a kuca? Öni Leticia: “Xele ni ma hane kapa lo itre huliwa ka hut, ke ame la ajang, tre, tha tro kö a ajolë ni troa feke kowe la ketre nöje e traqa pi la ijine ka ijij matre tro ni kowe la götrane gaa aja ixatua.” Öni Hermilo: “Hnenge hna inine kuci xen, me waasi mano, me aean.” Öni Verónica fe: “Ame lo eni petre kö ngöne la hnalapa i kaka me nenë, hnenge hna ixatua nyidrawa uma, me inine troa kuca la itre xen ka co thupen. Nge hnenge fe hna inine troa huliwane hnyawane la mani.”

Hnei Levi me Amelia qaa Amerika ka eitre hë lao macatre ne fapoipo, hna qaja la aqane xatua nyidro hnene la aqane thithi fë la itre mekune hmekune la aja i nyidro göi troa hnëkë nyidro troa cainöje e Meksik. Öni Levi: “Hnei nyiho hna ce wange la etrune mani ka ijije koi nyiho troa cainöje koi ca macatre ngöne la ketre nöje trenyiwa, nge thupene lai hnei nyiho hna thithi fë koi Iehova troa xatua nyiho matre ijiji nyiho troa hetrenyi la etrune mani cili.” Ngöne la itre treu ka xoxopatre hi, traqa ha nyidro kowe la etrune mani hnei nyidro hna thithi fë, nge nyidroti fe hi lai a feke ju. Öni Levi: “Ase hë Iehova kapa la itre mekune hnei nyiho hna thithi fë, nge ame enehila nyiho pë hë a troa kuca la qa i nyiho.” Amelia a qaja ju fe ka hape: “Nyiho ekö a mekune ka hape, tro hi nyiho a lapa koi ca macatre, ngo sevene hë lao macatre i nyiho e celë, nge tha ase kö nyiho mekune troa feke hmaca qaa la! Ame la nyiho a mele e celë, tre, kola xatua nyiho troa melëne la itre ixatua qaathei Iehova. E nöjei drai, tha sihngödri kö koi nyiho la ejuine la ihnimi Nyidrë.”

Hnene la lue trefëne qaa Amerika, Adam me Jennifer, ka cainöje e Meksik ngöne la ketre götrane hna lapane hnene la itre atr ka qene Papale hna qaja ka hape, thithi la ketre ewekë ka sisitria catr. Nyidroti a hamë ixatua me hape: “The treqene kö troa pë ka ajolë epun. Ame la aja i epuni troa cainöje ngöne la nöje trenyiwa, tre, nyine tro lai a thithi fë lapaan. Ahmaloeëne jë la mele i epun, nge cinyanyi jë kowe la Bethela ne la nöje hnei epuni hna ajane troa cainöje ngön, nge thupene lai pane lapa ju troa e la thupen, nge e traqa ha kow, feke jë hë!” a E tro epuni a kuca tune lai, tro epuni a mele madrin, nge tro fe a mana la mele i epuni ngöne la götrane la ua.