Tru La Thangane La Hna e La Tusi Hmitrötr

“Ini a madine la wathebo i Akötesie.”—ROM. 7:22.

PANE WANGE HMACA JË LA ITRE MEKUNE CELË

Maine tha tro kö epuni a e nyimenyimëne la Tusi Hmitrötr, nge tro fe a e hnyawa, nemene la thangane koi epun?

Nemene la aqane tro epuni a atre la itre xötre nyine tro epuni a xome göi troa xatuane la itre atr?

Troa thupë epuni tune kaa hnene la hnei epuni hna e la Tusi Hmitrötr?

1-3. Troa xatua së tune kaa hnene la hne së hna e me trongëne la hna ini së hnene la Tusi Hmitrötr?

 HNA qaja hnene la ketre trejine föe ka qatre föe hë ka hape: “Hnenge hna olene koi Iehova e nöjei hmakanyi pine la aqane xatua ni hnei Nyidrë troa trotrohnine la Tusi Hmitrötr.” Ngacama afootre hë lao e eahlo la Tusi Hmitrötr, ngo tha mano kö eahlo e. Hnene la ketre trejine föe hna cinyihane ka hape, ame la angeic a e la Tusi Hmitrötr, tre, hna xatua angeice troa atrepengöne hnyawa ka hape, ame Iehova, tre, Akötresie ka ej, nge hna xatua angeice fe troa ce mele hnyawa me Nyidrë. Öni angeic, “Eni petre hi la a hane madrine tune la!”

² Hnei Peteru aposetolo hna ini së ka hape, nyipi ewekë tro sa hnine la nyipici qa hnine la Wesi Ula i Akötresie. (1 Pet. 2:2) Ame la easa inin, me trongëne la itre ini qa hnine la Tusi Hmitrötr, tre, lolo la mekuthetheu nge hetre aliene la mele së. Tro eje a xatua së troa atreine ce mel me itre atr ka hni fe kowe la nyipi Akötresie me nyi hlue i Nyidrë. Celë hi itre sipu kepine matre tro sa “madine la wathebo i Akötesie.” (Rom. 7:22) Nemene hmaca kö la itre xa aqane tro la ini Tusi Hmitrötre a xatua së?

³ Easë pala hi a thele catrëne troa atre Iehova me Iesu, nge kolo fe lai a kökötre catre la ihnimi së koi nyidro me itre atr. Ketre, Tusi Hmitrötre mina fe a ini së la aqane tro Akötresie a amelene la itre atr ka meköt e apatrene pi Nyidrë la itre ka ngazo. Ame ngöne la hnei epuni hna cainöje trootro, hetre maca ka loi hnei epuni hna qaja trongëne kowe la itre atr. Nge eje hi laka, tro Iehova a xatua epuni ngöne la epuni a ce thawa me itre atr la itre ini hnei epuni hë hna kapa.

E JË ME MEKUNE LA ALIENE

4. Pine nemene matre tro sa mekune hnyawa la aliene la itre hne së hna e?

⁴ Aja i Iehova tro sa hnëkë ijine göi troa mekune hnyawa la aliene la hne së hna e ngöne la Tusi Hmitrötr. Öni Nyidrëti  koi Iosua: “Tha tro kö a pate la tusi wathebo celë qa ngöne la qe i ’ö, ngo tro eö a mekune ngön’ ej’ e lai me jid.” (Ios. 1:8; Sal. 1:2) Ame la easa mekune la aliene la itre hne së hna e, tre, aqane tro lai a xatua së troa wangatrune la itre xötre ka ithuecatre koi së, nge nyine tro sa trongën. Ame la epuni a öhne la itre mekune me itre hna qeje pengöne ka thuecatrei epun, the e nyimenyimëne kö, ketre mina thele jë troa qaja hnyawa la itre trenge ithanatana. Haawe, ijije hi troa ketr la hni epuni hnene la hnei epuni hna e. Pine nemene matre ka nyipi ewekë lai? Pine laka ame la easa trotrohnine hnyawa la itre ihaji qaathei Akötresie, ene pe, pi tro jë hi së lai a mele thenge.

5-7. Hamëne jë la itre ceitune ka amamane ka hape, e tro sa e hnyawa la Tusi Hmitrötr, tro lai a xatua së troa (a) drengethenge la itre wathebo i Akötresie; (b) menyike la aqane ithanata kowe la itre atr; (c) mejiune koi Iehova ngacama traqa ju hë la itre ijine jol.

⁵ Ame la easa e la itre tusi ne la Tusi Hmitrötre hne së hna mekune ka hape, ka jole e troa trotrohnin, ketre ixatua la tro sa e hnyawa, nge tha tro kö a e nyimenyimën, matre ijije tro sa mekune hnyawa la aliene la hne së hna e. Hanawange la pane ceitun, pane mekune jë la kola e hnene la ketre thöth Keresiano nekö trahmanyi la tusi Hosea. Ame ngöne la mekene 4, pane cile ju hi angeice troa mekune la aliene la hnei angeice hna e ngöne la itre xötre 11 koi 13. (E jë la Hosea 4:11-13.) Pine nemene matre pane mekune atrune jë angeice la itre xötre cili? Tha ekö catre kö la kola traqa la itupathi koi angeice ngöne la uma ne ini troa kuca la ketre ewekë ka sis. Ngo ame la angeice a e la itre xötre celë, ketre öni angeice jë hi: ‘Tha sihngödri kö koi Iehova la itre ewekë ka ngazo hna kuca hnene la itre atr ngacama pëkö ka goeë angatr. Tha ajane kö ni tro Nyidrëti a hleuhleu hneng.’ Ame la ka xecie koi angeice ngöne la itre drai ka troa xulu, ene la troa mele thenge la itre wathebo i Iehova.

⁶ Ame la hnaaluene ceitun, tre, tro sa pane mekune la ketre trejine föe la angeice a e la tusi Ioela, nge kola traqa kowe la mekene 2, xötre 13. (E jë la Ioela 2:13.) Hnene la xötre celë hna amamane koi angeice la enyipiewekëne la troa nyitipu Iehova, Atre “ihnimi gufa, me utipin, me hmite troa elëhni, nge tru la ifetesie.” Ajane jë hi angeice troa saze pine laka ka majemine angeice ithanata angazonyi me wesitre lapa kowe la föi angeice me koi itre xa atr fe.

⁷ Ame la hnaakönine ceitun, tre, tro sa mekune la ketre trejine thupëtresij, ka hetre föen me ha nekön. Pë ju hi huliwa i angeic, nge kola hnehengazone ka hape, tro angeice a thupëne tune kaa la hnepe lapa i angeic. Ame la angeice a e hnyawa la tusi Nahuma, nge traqa ju hi ngöne mekene 1 xötre 7, öhne ju hi angeice ka hape, tha sihngödri kö koi Iehova la angetre mejiune koi Nyidrë, nge tro Nyidrëti a thupë angatre “ngöne la drai ne aköt.” Celë hi ka xatuane la trejine troa trotrohnine ka hape, Iehova a hnimi angeice me hnepe lapa i angeic, ame enehila tha hnehengazo menu hmaca kö angeic. Thupene lai, angeice a e hnyawa pena ju la xötre 15. (E jë la Nahuma 1:15.) Trotrohnine ju hi angeice laka, tro angeice a amamane la mejiune i angeice koi Iehova, ene la troa cainöjëne la maca ka loi ngacama traqa ju hë la itre jol. Haawe, ame la ijine angeic a thele huliwa, angeice fe kö lai a ketre catre cainöje trootro ngöne la wiik.

8. Qeje pengöne ahopatrene ju hi la ketre mekune hnei epuni hna trotrohnine ngöne la epuni a e la Tusi Hmitrötr.

⁸ Ame lo itre ceitune ka ithuecatre hne së hna ithanatan, tre, ka xulu qa ngöne la itre tusi hnine la Tusi Hmitrötre ka jole e troa trotrohnine hnene la itre atr. Ngo ame la epuni a öhne la itre xötre ka ithuecatr, kökötre jë hi thei epuni la ajane troa e lapane la itre tusi cili. Itre eje a akeukawanyi së me ainamacanë së. Ka tune hi lai la nöjei tusi asë ne la Tusi Hmitrötr. Ame la Wesi Ula i Akötresie, tre, ka ceitu me ketre hnepadro gaa hetre itre samira ka nyimutre, nge jui e troa traqa kow. Ame la easa e asë la Tusi Hmitrötr, thele jë troa traqa kowe la itre “samira,” ene la itre hna amekötine me itre ixatua ka eje e hnin!

 THELE JË MATRE TROTROHNINE

9. Nemene la nyine tro sa kuca matre troa trotrohnine hnyawa la Tusi Hmitrötr?

⁹ Ka nyipi ewekë catre la troa e la Tusi Hmitrötr o drai. Ngo loi fe e troa xecie koi epuni ka hape, trotrohnine hnyawa hi epuni la hnei epuni hna e. Haawe, loi e troa thele ngöne la itre itusi së, troa atre la itre atr, me itre götran, me aqane traqa ne la itre ewekë hnei epuni hna e. Maine tha mama kö koi epuni la aqane troa melëne la ketre mekune hnei epuni hna e hnine la Tusi Hmitrötr, sipo ixatua jë kowe la ketre qatre thup maine ketre trejine trahmanyi me föe ka macaj. Ame la hneijine ne la itre pane Keresiano, hnene la ketre trejine hna aja ixatua troa trotrohnine hnyawa la nyipici. Apolo la ëje i angeic.

10, 11. (a) Hnei Apolo hna kapa tune kaa la ixatua matre tro angeice a atreine hnyawa tro fë la maca ka loi? (b) Nemene la ini hne së hna xome qa ngöne la tulu i Apolo? (Wange ju la itre mekune hna eköhagen “Hapeue La Itre Ini Hne Së Hna Hamën, Ka Meköti Pala Kö Itre Ej?”)

¹⁰ Apolo la ketre atre Iudra Keresiano ka atre hnyawa la Itre Hna Cinyihan, nge ka catre cainöj. Önine la tusi Ite Huliwa ka hape, angeice a cainöje troa qeje Iesu. Ngo tha trotrohnine kö angeice ka hape, hetre ini ka hnyipixe hnei Iesu hna hamëne kowe la itretre drei nyidrë göi bapataiso. Hnene la lue trefëne Keresiano, Peresila me Akula hna drei Apolo e hamë ini koi angetre Efeso, nge nyidroti a qaja ju “koi angeice la pengöne la kala i Akötesie.” (Ite hu. 18:24-26) Nemene la thangane koi Apolo?

¹¹ Ame la Apolo a tro hmaca pena ha Akaia eë, angeice a sisedrëne hmaca kö la huliwa ne cainöje i angeic. Hnei angeice hna xome la Itre Hna Cinyihane troa anyipicine kowe la angetre Iudra laka, ka tria angatr, nge Iesu hi la Keriso. Hnei angeice hna xatuane la angetre lapaune kowe la maca ka loi. (Ite hu. 18:27, 28) Trotrohnine hnyawa ha angeice la aliene la bapataiso i itre Keresiano, ame hnei angeice “hna xatuan’ atrune” la itre ka hnyipi lö troa kökötre trootro ngöne la nyipici. Nemene fe la ini thatraqai së? Tro sa xötrethenge la tulu i Apolo, ene la troa catre thele troa  trotrohnine la hne së hna e qa hnine la Tusi Hmitrötr. Ngo nyipi ewekë fe tro sa kapa cememine la ipië me ole la itre mekune hna hamëne nyine xatua së, troa itre ka hamë ini ka maca.

HULIWANE JË LA HNE SË HNA ININE TROA XATUA ITRE XAN

12, 13. Nemene la aqane tro sa huliwane hnyawane la Tusi Hmitrötre matre troa xatuane la ketre atr ka inine la Tusi Hmitrötre troa kökötre ngöne la ua?

¹² Tui Peresila, me Akula, me Apolo, ijiji së fe troa xatuane la itre atr. Ame la epuni a xatuane la ketre atr ka trene aja troa saze la mele i angeice me kökötre ngöne la nyipici, nemene la hnei epuni hna drenge e kuhu hni epun? Maine qatre thupe pena epun, nemene la hnei epuni hna drenge la kola olene koi epuni hnene la ketre Keresiano pine la itre ixatua hnei epuni hna hamë angeice qa hnine la Tusi Hmitrötr, lo angeic a mele hnine la akötr? Ketre madrine ka tru koi së la easa huliwane la Tusi Hmitrötre troa xatuane la itre atr troa saze la mele i angatr. a Nemene la aqane tro sa aeatrëne lai?

¹³ Ame ngöne la hneijine i Elia, tha ase kö la angetre Isaraela iëne la hmi nyine troa xötrethenge, nyipi hmi maine hmi ka thoi. Nemene lo hnei Elia hna qaja kowe la angetre Isaraela ka troa xatuane la ketre atr ka ini Tusi Hmitrötre ka tha mekune petre kö troa nyi hlue i Iehova? (E jë la 1 Ite Joxu 18:21.) Maine jë pena, kola xou hnene la ketre atr ka hetre ajan wanga tro la itre sinee i angeic me itre atrene la hnepe lapa i angeice a qeje angeice pine la hna ini Tusi Hmitrötr. Ijije hi tro epuni a xatua angeice matre mekune jë angeice troa nyi hlue i Iehova jëne la itre trenge ithanata hna qaja ngöne Isaia 51:12, 13.—E jë.

14. Nemene la ka troa aijijë epuni troa mekune hmaca la itre xötre ne la Tusi Hmitrötr göi troa xatuane la itre atr?

¹⁴ Tru catre hnei mekune hnine la Tusi Hmitrötre ka ithuecatre së, me ameköti së, me aegöcatrenyi së. Ngo ma epuni jë a thele ka hape, nemene la itre xötre ne la Tusi Hmitrötre ka ihmeku memine la hnei epuni hna ajan. E jë la Tusi Hmitrötr e nöjei drai, nge sine thele jë la aliene la hnei epuni hna e. Tro hë epuni atrepengöne trongëne la Tusi Hmitrötr, nge tro Iehova, jëne la uati hmitrötre i Nyidrë, a xatua epuni troa mekune hmaca la hnei epuni hë hna e.—Mar. 13:11; e jë la Ioane 14:26.

15. Nemene la ka troa xatua epuni troa trotrohnine hnyawa la Wesi Ula i Akötresie?

¹⁵ Tui Solomona Joxu, thithi jë koi Iehova troa hetrenyi la inamacan. Ka nyipi ewekë catre koi epuni la inamacane ngöne la huliwa ne cainöje me ngöne la huliwa ne la ekalesia. (2 A. l. ite jo. 1:7-10) Nyitipune jë la itre perofeta, ene la troa sine thele la Wesi Ula i Akötresie. Hane hi lai ka troa xatua epuni troa atre la nyipici göi Iehova memine la aja i Nyidrë. (1 Pet. 1:10-12) Hnei Paulo aposetolo hna qaja koi Timoteo troa inine “la nöjei wesi ula ne la lapaun, memine la ini ka loi.” (1 Tim. 4:6) E tro epuni a inine lapaane la Tusi Hmitrötr, tro hë epuni lai a trotrohnine hnyawa ej, me atreine huliwane eje göi troa xatuane la itre atr. Nge tro fe hë lai a kökötre catre la lapaune i epun.

KOLA THUPË SË HNENE LA TUSI HMITRÖTR

16. (a) Nemene la thangane hna kapa hnene la angetre Berea qa ngöne la hnei angatre hna e la Itre Hna Cinyihan o drai? (b) Pine nemene matre ka nyipi ewekë catre koi së troa e la Tusi Hmitrötre e nöjei drai?

¹⁶ Hnene la angetre Iudra ne Berea ekö hna e hnyawa la Itre Hna Cinyihan e nöjei drai. Ame la Paulo a cainöje koi angatr, hnei angatre hna drenge la itre hnei angeice hna qaja me wange ka hape, ka ihmeku kö memine la itre hnei angatre hna atre qa hnine la Itre Hna Cinyihan.” (Ite hu. 17:10-12) Ketre ini lai koi së laka, ame la troa e la Tusi Hmitrötre o drai, tre, nyine xatua së troa acatrene catrëne la lapaune së koi Iehova. Nyipi ewekë troa catre la lapaune së e pi tro së elanyi a itre hna amelene pe ngöne la fene ka hnyipixe i Akötresie.—Heb. 11:1.

17, 18. (a) Tro la lapaune ka catre me ihnim a he tune kaa la hni së? (b) Troa thupë së tune kaa hnene la mejiun?

 ¹⁷ Hnei Paul hna qeje pengöne ka hape, nyipi ewekë koi së tro sa hetrenyi la lapaun, me ihnim, me mejiun. Öni angeic: “Nge ame shë ite ate ne la lai, inamacanepi shë, kola xetëne la ixete ne mano ne la lapaune me ihnim, memine la itrapete ne ishi, ene la mejiune la mel.” (1 Thes. 5:8) Ame la ipetr, tre, nyine petrëne la imano ne la soc göi troa he la wenethëhmi angeic. Ame la hni së lo ka nyi hatrene lo wenethëhmi, tre, ka nyipi ewekë mina fe troa he. Ame la kola eköthe acatrene hnene la Keresiano la lapaune i angeice hune la itre hna thingehnaeane hnei Akötresie me hnime catrë Nyidrë me hnime fe itre atr, angeice hi lai a he la hni angeic. Tro angeice lai a catre kuca la hnei angeice hna atreine matre kepe angeice hnei Iehova.

¹⁸ Hnei Paulo mina fe hna qaja la hna nyi hatrene hnene la itrapetre e tro sa petrën, kola qaja “la mejiune la mel.” Ame la itre sooci ngöne la itre drai hnapan, tre, angatr a xome la itrapetre nyine petrëne la he i angatr. Ame la easa acatrene la mejiune kowe la mene i Iehova troa amele së, tro la mejiune së a thupëne la itre mekuna së. Tro la mejiune së ka catre a xatua së matre atreine së hmekëne la itre ka iamenumenu, memine la itre ihaji ka ngazo, lo itre ka troa apui ngazone nyimenyimëne la ekalesia ceitu me meci ka solesol. (2 Tim. 2:16-19) Tro fe la mejiune së a aijijë së troa cile catr, me xatua së troa neëne la thiina ka ngazo.

GOJENYI NE MEL

19, 20. Pine nemene matre tru la ole së kowe la Wesi Ula i Akötresie? Tro sa amamane tune kaa la ole së? (Wange ju la itre mekune hna eköhagen “Iehova a Hamë Ni La Ka Nyipi Ewekë Koi Ni.”)

¹⁹ Ame la easa melëne la itre drai ne la pune la fene celë, nyipi ewekë tro sa lapa fedre catre kowe la Wesi Ula i Iehova. Celë hi ixatua koi së matre loi ju hë hne së kuca lo itre huliwa hne së hna majemine ka ngazo, me atreine së troa cile kowe la aja së troa kuca la ngazo. Celë hi ka troa akeukawanyi së me thuecatre koi së matre atreine kö së cile catre nyipine la itre itupathi ka traqa koi së qaathei Satana memine la fene i angeic. Tro la itre ithuemacanyi qa hnine la Wesi Ula i Iehova a xatua së troa xötrëne hnyawa la gojenyi ne mel.

²⁰ Aja i Akötresie kowe “la nöjei ate asëjëihë troa mele.” Kola qaja la nöjei hlue i Nyidrëti asë, me itre atr ka ajane troa drenge la easa cainöjëne koi angatre la maca ka loi me ini angatr. Ngo ame asë hi la angetre ajane troa mele pe ngöne la pune la fene celë, qa i angatre troa hetrenyi la “wangate hmekune la nyipici.” (1 Tim. 2:4) Hnëqa së troa e la Tusi Hmitrötre me trongëne la itre hna amekötine hnene eje e ajane së troa mele pe. Tro la aqane e së o drai la Tusi Hmitrötre a amamane la etrune la aja së kowe la Wesi Ula i Iehova.—Ioane 17:17.

[Ithueamacany]

[Thying]

[Iatr ne la götran 7]

[Hna cinyihan ne la götran 9]

HAPEUE LA ITRE INI HNE SË HNA HAMËN, KA MEKÖTI PALA KÖ ITRE EJ?

Loi e troa xecie hnyawa koi së ka hape, ame la itre ini hne së hna hamën, tre, ka meköti pala kö. Kola hape, tro fe sa hamëne kowe la itre atr, la itre ini ka hnyipixe qa ngöne la itre itusi së. Ame la aqane huliwa cili, tre, kola xatuane la itre atr troa hetrenyi la nyipi atrehmekun. Hanawange la ketre ceitun nyine xatua së troa waiewekë ngöne la itre hnyinge celë:

▪ Nemene la aliene la hna hape, “xöte celë” hna qaja hnei Iesu ngöne Mataio 24:34?—Ita Ne Thup ne 15 Eiperem 2010, götrane 10-11 (qene Faras).

▪ Eu la troa ijene la itre “mamoe” qa ngöne la itre “got” tune la hna qaja ngöne Mataio 25:32?—Ita Ne Thup ne 15 Okotropa 1995, götrane 21-23 (qene Faras).

▪ Eu lo ijine tro la itre atr a “qou, me hnëkë teqene” tune la aqane qaja ngöne Luka 21:26?—Ita Ne Thup ne 15 Febuare 1994, götrane 19-20 (qene Faras).

Maine tro sa e la Tusi Hmitrötre o drai, nge thupene lai tro sa inine troa trotrohnine hnyawa la hne së hna e, tro hë së lai a atreine xatuane la itre atr troa atre la itre nyipici hnei Iehova hna amamane koi së enehila.—Ite edomë 4:18.

[Foto]

Hnei Apolo hna kapa la ixatua matre maca angeice ngöne la hna cainöje trootro

[Hna cinyihan ne la götran 11]

‘IEHOVA A HAMË NI LA KA NYIPI EWEKË KOI NI’

Hna cinyanyine hnene la ketre nekö jajinyi Keresiano ka hape, tru la ole i angeice koi Iehova qa ngöne la hnei Nyidrëti hna amexeje lapaane la enyipiewekëne la troa e la Tusi Hmitrötre o drai. Lolo catre la mele i angeice qa ngöne la hnei angeice hna e Tus. Öni angeic: “Hnenge hna nyiqaane e la Tusi Hmitrötre lo macatre ne eni a fenesi qaa Lycée, nge ngöne la lue macatre, eni a umuthe asë e. Ame ngöne la ijine cili, öhne hë ni la nöjei ewekë ka loi göi tro ni a amekötine la ka loi kowe la meleng. Eni enehila a nyi hnaaluene e la Tusi Hmitrötr. Ngo kösë lo eni a öhne la itre ewekë tha ka mama kö koi ni ekö. Ceitune hi la elolone la eni a e la Tusi Hmitrötr enehila me ekö lo. Nge kösë lo ka lolo catre hmaca kö enehila! Kola mama catre koi ni laka, Iehova a hamë ni la ka nyipi ewekë koi ni.”