“The Kucakuca Kö Shë”
“The Kucakuca Kö Shë”
“The kucakuca kö shë ngöne la huliwa ka loi.”—GAL. 6:9.
NYINE TROA SA?
Nemene la hnei Akötresie hna hamë së matre catre së huliwa kowe la nyipici?
Ame la easa mekune la kepine ka tru matre easa sine la itre icasikeu, haawe, nemene la hna upi së troa kuca?
Maine easa ajane troa cile hut me huliwa catre koi Akötresie, nemene la nyine tro sa catre kuca?
1, 2. Nemene la hna upi së troa kuca hnene la itre hna meköle goeëne ka amamane la organizasio i Iehova e hnengödrai me e cëlë fen?
EASA sesëkötre me haine la easa mekune ka hape, easë fe la ketre atrene la organizasio atraqatre ne la hnengödrai me fen. Ame la itre hna meköle goeëne ka amamane la organizasio hne së hna e ngöne Ezekiela mekene 1 me Daniela mekene 7, kola qeje pengöne atrune la aqane huliwa i Iehova matre eatre pi la itre mekuna i Nyidrë. Iesu la ka xomiujine la organizasio i Iehova e celë fen. Nyidrëti a xomiujine eje matre troa eatrëne la huliwa ne cainöj, me inine me thuecatrene la itre ka kuca la huliwa cili, me tro fe a xatuane la itre atr troa hane nyi hlue i Iehova. Ixatua fe lai koi së troa mejiune kowe la organizasio i Iehova.—Mat. 24:45.
2 Hapeu, easë fe kö a hane xötrethenge la tulu ne la organizasio hnene la hna catre huliwa i Akötresie? Maine jë epuni a drenge ka hape, kolo ha nanazije trootro la aqane huliwa i epun. Hna traqa tune fe hi lai kowe lo itre pane Keresiano ekö. Hnei Paulo aposetolo hna amexeje koi angatre la aqane catre huliwa i Iesu göi troa xatua angatre matre tha tro kö a “kucakuca me menumenu la ite hni [angatr].” (Heb. 12:3) Ame lo taane hne së hë hna ce wang, hne së hna ce ithanatane la elolone la hna kuca hnene la organizasio i Iehova enehila. Tune lo aqane thuecatrene la itre pane Keresiano ekö hnene la tulu i Keriso, kolo fe a xatua së enehila hnene la organizasio i Iehova troa huliwa catre me cile huti ngöne la huliwa i Akötresie.
3. Nemene la nyine tro sa kuca matre tha tro kö sa kucakuca? Nemene la hne së hna troa ithanatane ngöne la tane mekune celë?
3 Tha aja së kö troa “kucakuca,” maine tro pena a nanazije ngöne la huliwa i Akötresie, celë hi matre ngacama ka nyipi ewekë tro sa xötrethenge la tulu ne la organizasio i Akötresie, ngo hetre itre xa ewekë hmaca kö nyine tro sa kuca, ke öni Paulo, “The kucakuca kö shë ngöne la huliwa ka loi.” (Gal. 6:9) Tro sa ithanatane la faifi lao ewekë nyine tro sa kuca matre tro pala hi sa huliwa catr, me ce huliwa memine la organizasio i Iehova. Thupene lai, tro së me hnepe lapa së a ce wange la itre ewekë ka loi koi së e troa huliwan.
ICASIKEU NYINE ITHUECATREKEU ME ATRUNYI AKÖTRESIE
4. Pine nemene matre qaja jë së ka hape, ka nyipi ewekë catre pala hi la itre icasikeu ngöne la nyipi hmi?
4 Ka nyipi ewekë pala hi la itre icasikeu kowe la itre hlue i Iehova. Ka icasikeu Iehova memine la itre angela e hnengödrai. (1 Ite jo. 22:19; Iobu 1:6; 2:1; Dan. 7:10) Ame ngöne la itre drai ekö, hnei Akötresie hna qaja kowe la angetre Isaraela troa ce icasikeu “mate deng, me inin.” (Deu. 31:10-12) Ame lo hneijinene la itre pane Keresiano, hnene la angetre Iudra hna icasikeu lapaa ngöne la itre götrane hna hnëkëne göi troa e la Itre Hna Cinyihan. (Luka 4:16; Ite hu. 15:21) Ka nyipi ewekë pala hi la itre icasikeu lo kola xötrei acile la pane ekalesia ne la itre Keresiano, nge ka nyipi ewekë pala hi enehila ngöne la hmi së. Jëne la itre icasikeu, itre Keresiano a “imekunekeune mate troa aciane la ihnimi me ite huliwa ka loi.” Nge nyipi ewekë catre hmaca kö enehila “troa eamo” ketre me ketre maine ithuecatrekeu pine laka easë hë a melëne la itre drai hnapin.—Heb. 10:24, 25.
5. Tro sa ithuecatrekeu tune kaa ngöne la itre icasikeu?
5 Ame la ketre jëne ka nyipi ewekë matre tro sa ithuecatrekeu ngöne la itre icasikeu, tre, ene la troa sa la itre hnyinge me hamë mekun. Kola hape, tro sa sa la itre hnyinge hmekune la paragaraf, maine qeje pengöne la ketre xötr, maine troa qaja la hnepe hna melëne hnene la ketre trejine ka amamane la aqane tro sa kepe ixatua qa ngöne la itre trepene meköti e hnine la Tusi Hmitrötr. (Sal. 22:22; 40:9) Ithuecatre ka tru koi së la nöjei mekune hne së hna drenge ngöne la itre icasikeu, ngacama qaathene ju hë la itre ka tru maine itre ka co pena, maine qaathene fe la itre ka hekö maine itre ka hnyipi lö. Ngo eje hi laka, ame la itre mekune cili ka thuecatre së asë pala hi.
6. Nemene la itre xa ixatua hne së hna kapa jëne la itre icasikeu së?
6 Hetre itre xa ixatua hne së hna hane kapa jëne la itre icasikeu së, me asabele. Kola xatua së troa hetre trenge catr tro pala hi a cainöj, ngacama icilekeu la itre atr ngöne la götrane hne së hna cainöje ngön, maine xele pena kö ma dreng. (Ite hu. 4:23, 31) Kolo fe a acatrene la lapaune së hnene la itre cainöje hna cile fë, nge hna nyi trepene hnene la Tusi Hmitrötr. (Ite hu. 15:32; Rom. 1:11, 12) Ame la easa traqa itronyi memine la itre trejine me easë asë, itre trahmanyi me föe, tre kola tru la madrine së, nge kola akeukawanyi së. (Sal. 94:12, 13) Hnene la Kometr Ne Hamë Ini qa ngöne la Lapa Ne Xomi Meköti hna eköthe la itre ini thatraqane la itre icasikeu ne la itre hlue i Iehova. Ketre pengöne kö la madrine së la easa kapa la ini ngöne la itre icasikeu e nöjei wiik!
7, 8. (a) Nemene la kepine ka tru matre easa tro koi itre icasikeu? (b) Kola isa xatua së tune kaa hnene la itre icasikeu?
7 Tha easë kö a tro koi itre icasikeu göi tro hmekuje hi a kapa. Ame la kepine ka tru matre easa tro koi itre icasikeu, tre göi troa hmi koi Iehova. (E jë la Salamo 95:6.) Ketre ewekë ka tru catre la tro sa nyima ne atrune la Akötresi së ka lolo! (Kol. 3:16) Easë fe a atrunyi Nyidrë jëne la itre mekune hne së hna ce thawa ngöne la itre icasikeu. Ijije me meköti tro Iehova a kapa qaathe së la itre aqane iatrunyi cili. (Hna ama. 4:11) Easa trotrohnine e celë la enyipiewekëne la troa sine lapaane la itre icasikeu së!—Heb. 10:25.
8 Ahnahna qaathei Iehova la itre icasikeu, nge jëne tro së lai a cile hut uti hë la kola apatrene la fene celë. Easë fe kö a hane mekune tune lai? Maine eje hi, catre pi së troa sine la itre icasikeu asë, ngacama tru ju hë hnei nöjei jole së. (Fil. 1:10) The nue pi kö së la ketre icasikeu së; loi e hetre sipu kepin.
CATRE PI TROA CAINÖJ
9. Easa atre tune kaa ka hape, ketre huliwa ka sisitria la huliwa ne cainöj?
9 Maine easa ajane troa ce huliwa memine la organizasio i Iehova, qa së troa catre cainöj. Iesu ekö la ka nyiqaane la huliwa ne cainöje lo nyidrëti petre kö e celë fen. (Mat. 28:19, 20) Qaane ju hi lai, ame la kola cainöje me inine la itre atr, tre celë hi huliwa ka sisitria catre thene la organizasio i Iehova. Ka tiqa hnei itre hna melëne hnene la itre atr ka amamane ka hape, itre angela a sajuëne la huliwa së, me xatua së troa öhne la itre atr ka pi kapa la nyipici. (Ite hu. 13:48; Hna ama. 14:6, 7) Ame la hna thele troa aeatrëne hnene la götrane gaa mama ne la organizasio i Iehova, tre ene la troa hnëkëne me sajuëne la huliwa ne cainöj. Hapeu, Ka nyipi ewekë catre fe kö la huliwa ne cainöje ngöne la mele i epun?
10. (a) Nemene la hna kuca hnene la ketre trejin, matre tro pala hi a catre la ihnim i angeice kowe la nyipici? (b) Isa qaja jë la aqane xatua epuni hnene la huliwa ne cainöje troa acatrene la ihnim i epuni kowe la nyipici.
10 Ame la easa catre cainöj, kolo fe hi lai a tru la ihnimi së kowe la nyipici. Celë fe hi hna melëne lai hnei Mitchel, ketre qatre thup ka pionie lapa. Öni angeic: “Pi tro catre ni a ce ithanatane la nyipici memine la itre atr. Ame la eni a pane mekune la itre tane mekune ka xötrei mama qa ngöne la Ita Ne Thup maine Réveillez-vous !, eni a haine la aqane maca ne la itre mekune hna eköthe me inamacane ka eje e hnine la itre zonal. Ajange troa tro kowe la hna cainöje trootro, ke pi tro ni a wange la aqane ujë ne la itre atr, nge pi tro fe ni a thele jëne troa ketri angatr.” Mitchel fe a qaja ka hape, ame la huliwa ne cainöje trootro, tre kola xatua angeice tro pala hi a amë panëne la itre ka nyipi ewekë catre ngöne la mele i angeic, nge tha tro kö a ajolëne hnei ketre ewekë. Ijije fe hi tro sa hane cile catr, ngöne la itre drai ne la pun, e tro sa catre kuca la itre huliwa i Akötresie.—E jë la 1 Korinito 15:58.
KEPE THANGANE JË LA ITRE ITUSI SË
11. Pine nemene matre loi e tro pala hi sa e la itre itusi së me mekune la aliene la itre hne së hna e?
11 Jëne la itre itusi ka nyimutre, easa kapa qaathei Iehova la trenge catr. Ma mekune pala jë kö epuni la epuni a e la ketre itus, nge öni epuni jë hi, ‘Thatraqange hnyawa hi la! Ka tune lo hnei Iehova hna iupe troa cinyihane la koi ni!’ Hetre kepine matre mekune jë epuni tune lai. Iehova a huliwane la itre itus troa ini së me amekötine la gojenyi së. Öni Nyidrë: “Tro ni a ini ’ö me köjane koi ’ö la jëne qâ i ’ö troa trongën.” (Sal. 32:8) Hne së kö hna thele jëne troa e asë la nöjei itus hne së hna kapa, me mekune la aliene la itre hne së hna e? Tro lai a xatua së troa cile hut, me catre huliwa koi Akötresie ngöne la itre drai ka jole celë hna hape, itre drai ne la pun.—E jë la Salamo 1:1-3; 35:28; 119:97.
12. Nemene la ka troa xatua së troa nyipi ewekëne la itre itusi së?
12 Tro së lai a nyipi ewekëne la itre itus e tro sa mekune la etrune la itre huliwa hna kuca matre hetrenyi pi itre ej. Haawe, ka nyipi ewekë lai troa pane ithel, me cinyihan, me e, me iëne la itre iatr, me ujëne ngöne la itre qene hlapa, maine pena troa amë itre eje ngöne la site Web së. Kometr Ne Cinyihan Ne La Lapa Ne Xomi Meköt la atrekë hnëqane la huliwa cili. Thupene jë hi lai, tro la itre Bethela ka fejane la itre itusi cili a iupi fë itre eje kowe la itre ekalesia ka nyimutre ne la nöj. Pine nemene matre kuca jë la nöjei huliwa cili? Kolo matre tro la itre hlue i Iehova a kapa la itre ini memine la itre hna amekötine ka loi troa acile hutine la lapaune i angatr. (Is. 65:13) Haawe, epi tro pala hi sa kepe thangane la itre itusi hne së hna kapa qaathene la organizasio i Iehova.—Sal. 119:27.
CE HULIWA JË MEMINE LA ORGANIZASIO I IEHOVA
13, 14. Drei e hnengödrai la ka ce huliwa memine la organizasio i Iehova? Nemene fe la aqane tro sa hane ce huliwa memine la organizasio i Iehova?
13 Ame la ketre hna meköle goeëne hnei Ioane, angeic a öhnyi Iesu e të hune la hos ka wië, kola nyenyape ne troa ngaane la itre ka icilekeu me Iehova. (Hna ama. 19:11-15) Hnei angeice fe hna öhne la itre hna iëne hna amelene hmaca e hnengödrai, me itre angela ka mele nyipici hune la itre hos ka nyenyape hutrö i Iesu. Kola amamane hnyawa e cili ka hape, angatr a xatua Iesu, atre weje mekene la tronge i angatr. (Hna ama. 2:26, 27) Hnene la tulu ka loi i angatre hna ini së troa ce huliwa memine la itre elemekene la organizasio i Iehova.
14 Ka ceitu hi lai memine la ka ala nyimu atraqatr, hnei angatre fe hna hane ce huliwa memine la itre hna iëne lo itre ka mele petre kö e celë fen. (E jë la Zakaria 8:23.) Hapeue fe së, hane fe kö së ce huliwa memine la organizasio? Ame la nyine tro sa kuca, tre, ene la troa drengethenge la itre ka elemeken. (Heb. 13:7, 17) E tro sa qaja la itre qatre thupe ne la ekalesia së, tre, hapeu, easë fe kö a thuecatre kowe la itre trejine troa metrötrë angatr, me metrötrëne la itre huliwa hnei angatre hna kuca? Hne së kö hna inine la itre nekö së troa metrötrëne la itre trejine ka mele nyipici cili me drenge la itre ihaji angatr? Hetre itre xa aqane tro sa ce huliwa memine la organizasio. Hne së kö hna ce hnëkëne amë me hnepe lapa së la ahnahna nyine hamëne thatraqane la huliwa ne cainöj? (Ite edomë 3:9; 1 Kor. 16:2; 2 Kor. 8:12) Hapeu, easë fe kö a hane ixatua troa nyi hnyawane la Uma Ne Baselaia? Iehova a goeë së e ce huliwa memine la organizasio ngöne la itre götrane celë, nge hetrenyi së la uati hmitrötre qaathei Nyidrë. Nge kola hamëne koi së la trenge catre ka ijije matre cile huti së ngöne la itre drai celë, itre drai ne la pun.—Is. 40:29-31.
MELE JË GÖI TROA AMADRINË AKÖTRESIE
15. Pine nemene matre tro pala hi sa isine troa kuca la meköt?
15 Maine easa ajane troa cile hut, me ce huliwa memine la organizasio i Iehova, mele jë göi troa amadrinë Iehova. (Efe. 5:10, 11) Satana, me fene ka ngazo celë, me pengö së atr ka ngazo a ajolë së troa kuca la meköt. Ala nyimu la itre trejine me easë ka isine e nöjei drai troa imelekeu hnyawa me Iehova. Iehova a hnimi epuni ke tha ka co kö koi Nyidrë la aqane catre i epun. Ame la easa mele göi troa amadrinë Nyidrë, tre, mingöminge me lolo la mele së, nge ka xecie hnyawa koi së laka, hna kepe së hnei Iehova.—1 Kor. 9:24-27.
16, 17. (a) Nemene la nyine tro sa kuca e traqa ju së kei kowe la ketre ngazo ka tru? (b) Nemene la ini nyine tro sa xome qa ngöne la hna kuca hnei Anne?
16 Ngo nemene ju hë la nyine tro epuni a kuca e traqa ju epuni kei kowe la ketre ngazo ka tru? The thele kö troa juetrën. Canga thele jë la ixatua ka ijij. Pane mekune jë epuni la pengöi Davita lo kola juetrë ngazo. Öni nyidrë: “Ame hna meci la ite junenge hnene la hoköte ni o drai.” (Sal. 32:3) Maine tro sa thele troa juetrë ngazo, tro lai a patre la madrine së, nge goi tro fe a ngazo la aqane mele së koi Iehova. Ngo e qaja amamane hë së, tro ha “hnim[i]” së.—Ite edomë 28:13.
17 Pane mekune jë fe la hna kuca hnei Anne. a Ngöne la Anne a thöth, me pionie lapa, hnei angeice hna nyiqaane kuca la itre ewekë ka ngazo. Ame hë la pun, ngazo hë la mekuthetheu i angeic. Öni angeic: “Patre hë la madrineng, nge hna ajolëne la hninge e nöjei drai.” Ame la ketre ijine icasikeu, ithanatane jë hi la Iakobo 5:14, 15. Trotrohnine ju hi Anne ka hape, ka loi e troa pane xatua angeic. Nemene ju hë la hnei angeice hna kuca? Hnei angeice hna xötrethenge la eamo qa hnine la Tusi Hmitrötr, me ithatanata memine la itre qatre thup. Tha ewekë ka hmaloi kö, ngo öni angeic, kösë ka wezipo angeic, nge hnei Iehova hna hamëne koi angeice la nyin. Öni angeice e qeje pengöne ka hape: “Ame la trepe drösinöe, ngacama ka haitre e troa ulum, ngo hna melen.” Ame enehila, Anne hmaca ha a huliwa catre koi Iehova cememine la mekuthetheu ka loi.
18. Nemene la nyine tro sa catre kuca?
18 Tha tro kö sa thëthëhmine laka, kola nyipi ewekë së la easë ce huliwa memine la organizasio i Iehova ngöne la itre drai celë, lo hna hape, itre drai ne la pun! Epi tro së memine la hnepe lapa së a catre sine lapaane la itre icasikeu, me catre cainöje ngöne la götrane hne së hna huliwa ngön, me kepe thangane ka loi ne la nöjei itusi së. Epi tro fe sa ce huliwa memine la itre elemekene huliwa, me mele göi troa amadrinë Iehova. Maine tro sa kuca la nöjei ewekë cili, easë hi lai a ce huliwa memine la organizasio i Iehova, nge tha tro jë pi kö së lai a kucakuca.
[Ithueamacany]
a Hna saze la ëj.
[Thying]
[Iatr ne la götran 27]
[Iatr ne la götran 29]
[Hna eköhagen götran 29]
AME LA GÖTRANE KA MAMA NE LA ORGANIZASIO I IEHOVA, TRE, KOLA QAJA LA:
1. Lapa Ne Xomi Meköt
2. Itre Kometre Ne La Hnalapa Ne Thewe Huliwa
3. Itretre thupe ka iwai trootro
4. Itre lapa ne la itre qatre thup
5. Itre ekalesia
6. Itretre cainöj
[Iatr ne la götran 31]
Catre jë xatuane la itre atr troa trotrohnine laka, ijiji angatre fe troa hane nyi atrene la organizasio i Iehova
