Hna Xatua Së Jëne La Wesi Ula i Akötresie, Xatua Itre Xane Jë Tune Lai
Hna Xatua Së Jëne La Wesi Ula i Akötresie, Xatua Itre Xane Jë Tune Lai
“Mekunë hë ni laka meköti asë la ite wathebo i cilie.”—SAL. 119:128.
NEMENE LA AQANE TRO NYIPUNIETI A SA?
Nemene la aqane tro sa huliwane hnyawa la Tusi Hmitrötre ngöne la easa hamë ini kowe la itre atr?
Nemene la aliene la ithanata i Paulo la angeice a qaja ka hape, “eamo”?
Nemene la aliene kowe la itre qatre thupe me kowe la itre keme me thine la troa ihaji “ngöne la thina ka meköt”?
1. Pine nemene matre loi e troa pexeje la mejiune së kowe la Wesi Ula i Akötresie?
QËMEKENE tro la ka inine la Tusi Hmitrötre a nyiqaane cainöje trootro, loi e tro angeice a pane amamane ka hape, angeice a mejiune laka Wesi Ula i Akötresie, la Tusi Hmitrötr. a Loi e tro asë hi sa amamane jëne la itre hne së hna kuca, me itre hne së hna qaja ka hape, ka mejiune së kowe la Tusi Hmitrötr. Maine ka pejexe la mejiune së kowe la Tusi Hmitrötr, nge hne së hna inine troa huliwane hnyawane eje ngöne la hna cainöje trootro, atreine hi tro sa xatuane la itre atr troa atre Iehova, me troa öhne la gojenyine tro kowe la mele ka tha ase palua kö.
2. Pine nemene matre loi e tro sa cile huti ngöne la itre ewekë hne së hna inin?
2 Hnei Paulo aposetolo hna amamane hnyawa ka hape, ka nyipi ewekë catre la Wesi Ula i Akötresie. Hnei angeice hna cinyanyi koi Timoteo, me hape: “Cile huti ju eö ngöne la nöjei ewekë hna ini’ ö.” Ame la itre “ewekë” hnei Timoteo hna inin, tre, kolo itre nyipici qa hnine la Tusi Hmitrötre ka acatrene la lapaune i angeic kowe la maca ka loi. Tro fe la hne së hna inine qa hnine la Tusi Hmitrötre a acatrene la lapaune së. Tro la Tusi Hmitrötre a “ainamacanë [së] kowe la mele.” (2 Tim. 3:14, 15) Ame la hnei Paulo hna qaja hmaca ju, tre, kola amamane ka hape, ka qaathei Akötresie la Tusi Hmitrötr. Ngo nemene la itre xa nyine tro sa atre qa ngöne la itre hna ithanata ngöne 2 Timoteo 3:16? (E jë.) Tro sa ce ithanatane hnyawa la xötre celë, matre catre la mejiuine së laka, “meköti” la nöjei ini qaathei Iehova.—Sal. 119:128.
KA “NYIPI EWEKË TROA ININ”
3-5. (a) Nemene ju hë la ka traqa thupene la hnei Peteru hna hamëne la ketre cainöje kowe la ka ala nyimu catre lo ijine Penetekos, nge pine nemen? (b) Pine nemene matre ala nyimu la angetre Thesalonika ka kapa la nyipici? (c) Nemene la hna öhne hnene la itre atr ngöne la aqane cainöje së?
3 Öni Iesu kowe la nöje Isaraela ka hape: “Ini a upe koi nyipunie la ite perofeta, me ite ka inamacan, me angete cinyihany.” (Mat. 23:34) Iesu hi la a qeje itretre drei nyidrë. Hnei nyidrëti hna ini angatre troa huliwane la Itre Hna Cinyihane ngöne la hna cainöje trootro. Ame lo Penetekos macatre 33, hnei Peteru aposetolo hna hamëne la ketre cainöje kowe la ka ala nyimu catre e Ierusalema. Nyimu xötre hnei angeice hna amexeje qa ngöne la Itre Hna Cinyihane Qene Heberu. Ame la kola drenge hnene la itre atr la aqane qeje pengöne Peteru la itre xötre celë, ala nyimu la angetre ngazohnine la itre huliwa ka ngazo hnei angatre hna kuca. Hnei angatre hna ietrane la itre ngazo i angatr, me sipo Akötresie troa senge itre ej. Ame la drai cili, lö jë hi la ala theri thauzane kowe la hmi Keresiano.—Ite hu. 2:37-41.
4 Tro fe sa xomi ini qaathei Paulo aposetolo lo atre cainöjëne la maca ka loi e tröne e Ierusalema. Ame e Makedonia, ketre traone ne Thesalonika, hnei angeice hna ithanata kowe la itretre Iudra lo angatr a hmi hnine la sunago. Ngöne la köni sabath, hnei Paulo “hna ithanatane me angate la ite hna cinyihan” troa anyipicine laka, ka nyipi ewekë catre tro Keriso a pane akötr, me mele hmaca. Ame hna lö jë la itre xa atre Iudra, me angetre Heleni fe ka ala nyimu kowe la hmi Keresiano.—Ite hu. 17:1-4.
5 Ala nyimu la itre atr enehila ka öhne la aqane atreine së xome la Tusi Hmitrötre troa anyipicine la itre ini hne së hna hamën. Ame la kola e hnene la ketre trejine föe e Suisse la ketre xötre ne la Tusi Hmitrötre ngöne la hna cainöje trootro, hnyingëne jë hi la hmi angeice hnene lai atrekë hnalapan. Önine lai trejin, ame angeice me sine tronge i angeic, tre lue Atre Anyipici Iehova nyidro. Qaja jë hi hnene lai trahmanyi ka hape, angeice a hnyinge menu ngo maine ju tro hi angeic a atre, pine laka Itretre Anyipici Iehova hmekuje hi la ka traqa ne e Tusi Hmitrötre ngöne la hnalapa i angeic.
6, 7. (a) Nemene la aqane tro la itre ka hamë ini ngöne la ekalesia a huliwane hnyawane la Tusi Hmitrötr? (b) Nemene la aqane tro sa huliwane hnyawane la Tusi Hmitrötre ngöne la kola inine la Tusi Hmitrötre memine la ketre atr?
6 Nemene la aqane tro sa huliwane hnyawa la Tusi Hmitrötre ngöne la easa hamë ini kowe la itre atr? Maine hna amekötine koi së troa cile fë cainöj, maine tro pena a kuca la ketre hnëqa, huliwane jë hi la itre xötre ka ijij. The e gufane kö la hna qaja hnene la ketre xötr, maine tro pena a e ngöne itablet maine itre ewekë ka ceitu memin, ngo loi pe troa e hnine la Tusi Hmitrötre i epun. Sipone jë kowe la itre iatrene la icasikeu troa fe la Tusi Hmitrötre i angatre me ce e. Qeje pengöne jë la aliene la itre xötr, nge qaja jë fe la aqane tro la itre xötre a acatrene la imelekeu i angatre me Iehova. The tro kö a xome la itre ceitune ka jole e troa trotrohnin, maine pena itre ewekë hna melëne hnei itre atr nyine hnyiman, ngöne la ijine cili loi pe troa ithanatane la Wesi Ula i Akötresie.
7 Nemene la nyine tro sa mekune ngöne la easa ce inine la Tusi Hmitrötre memine la ketre atr? Ame la easa ini Tusi kowe la atr, the sesë sasaithe kö la itre xötre hna fejane ngöne la itus. Sipone jë la hnainin troa e la itre xötre hna fejan. Ame hë la easa qeje pengöne itre ej, the ithanata hmekuje kö, ngo hane pi nue la hnainine troa hane qaja la hnei angeice hna trotrohnin. Tha tro kö sa qaja kowe la hnainine la itre ini nyine tro angeice a mejiune kow, maine nyine tro pena angeice a kuca, ngo tro pe a eköthe hnyawa la itre hnyinge nyine xatua angeice troa trotrohnine la itre ini qa ngöne la Tusi Hmitrötr. b
KA “NYIPI EWEKË . . . NYINE AMEKÖTIN”
8. Nemene e kuhu hni Paulo la lue ewekë ka ifekethe nyine tro angeice a cile kow?
8 Hnëqa ne la itre qatre thupe ne la ekalesia troa amekötine la itre atr ka kuca la ngazo. (1 Tim. 5:20; Tito 1:13) Ngo nyipi ewekë tro fe së a hane ameköti së. Paulo la ketre Keresiano ka lolo, nge ka wië la mekuthetheu. (2 Tim. 1:3) Ngo ame pe, lue ewekë ka ifekethe ngöne la hni angeic. Öni angeic: “Öhnë hë ni la kete wathebo ngöne la ite hnepe ngöneteing, kola ishi memine la wathebo e kuhu hning, me aponyi ni kowe la wathebo ne la ngazo.” Tro sa ce ithanatane la nyine tro Paulo a kuca matre troa cile kowe la itre hna ajane ka ngazo ne la ngönetrei angeic.—E jë la Roma 7:21-25.
9, 10. (a) Nemene la ketre aja ka ngazo ka eje thei Paulo? (b) Nemene la aqane icilekeu Paulo memine la itre aja ka ngazo ka eje thei angeic?
9 Maine tha hnei Paulo kö hna qaja hnyawa la pengöne la ngazo ka eje thei angeic, ngo öni angeice pe, ka “cate mek” angeice ekö, kola hape ka pi tru, nge ka tha metrötre kö. (1 Tim. 1:13) Qëmekene tro Paulo a Keresiano, tru catre la hnei angeice hna akötrëne la itre Keresiano. Öni angeice lo ka hape, “atraqatepi hë la elëhninge koi angat.” (Ite hu. 26:11) Ngacama hnei Paulo hna inine troa xomihnine la elëhni, ngo tro palakö angeic a catre huliwa troa xomehnöthe la itre mekun, me trenge ithanatana i angeice ka ngazo. (Ite hu. 15:36-39) Nemene la ka xatua angeic?
10 Ame la pane tusi Paulo kowe la angetre Korinito, hnei angeice hna qeje pengöne la hnei angeice hna kuca göi troa xome ameköti angeic. (E jë la 1 Korinito 9:26, 27.) Hnei angeice hna thele catrëne troa nyinyine la itre aja ka ngazo ka eje thei angeic. Eje hi laka, hnei angeice hna thele eamo qa hnine la Itre Hna Cinyihan, me thithi koi Iehova troa xatua angeice troa trongëne itre ej, nge thupene lai hnei angeice hna catre mele thenge. c Tro sa xomi ini qa ngöne la tulu i angeic, ke, casi hi la pengöne la isi së.
11. Nemene la aqane tro sa ‘thele e kuhu ite hni [së] kö” göi troa wange ka hape, easë kö a xötrëne la gojenyi ne la nyipici?
11 Tha tro pi kö sa mekune ka hape, tha tro hmaca kö sa icilekeu memine la itre hne së hna ajane ka ngazo. Loi pe e tro pala hi sa ‘thele e kuhu ite hni së kö’ göi troa xecie hnyawa ka hape, easë pala kö ngöne la gojenyi ne la nyipici. (2 Kor. 13:5) Ame la easa e la Kolose 3:5-10 maine itre xa xötre ka ceitu memin, nyipi ewekë tro sa thele ka hape: ‘Eni kö a catre troa icilekeu memine la itre ajange ka ngazo? Maine pena, eni kö a nyiqaane troa epe kowe lo itre ewekë hnei Iehova hna sisin? Hanawange la ketre ceitun, maine mama pi ngöne ketre site ëternet la itre ewekë ka sis, hapeu hnenge kö hna canga tro trij? Maine ka ajane ni lo itre site ka ngazo?’ Maine tro sa mekune la aqane troa trongëne la itre eamo qa hnine la Wesi Ula i Akötresie ngöne la mele së, ame hë lai “tro sha hmekëne me inamacanepi.”—1 Thes. 5:6-8.
KA “NYIPI EWEKË . . . NYINE EAMO”
12, 13. (a) Nemene la aliene lai kola hape, troa eamo? Nemene la aqane tro sa xötrethenge la tulu ne aqane hamë eamo Iesu? (b) Maine easa eamone la ketre atr, nemene la itre aqane ithanata nyine tro sa hmekën?
12 Ame la Tusi Hmitrötre a qaja ka hape, troa “eamo,” tre, kola hape, troa kuca la ewekë ka loi maine troa hajin. Ame itre xa ijin, easa eamone la ketre atr ka amexeje menune la itre ithanata së maine aqane ujë së. Ame la ketre ceitun, tre, ene lo itre hene hmi i angetre Iudra a qeje gele Iesu pine nyidrëti loi thiina kowe la “ite telona me ite ka ngazo.” Iesu pë hë a ameköti angatre ju me hape: “Tha nyipi kö la tene dösinöe koi angete egöcat, ngo loi koi ange tene mec. Ngo trojë nyipunie, a inine la pengöne la, ka hape, “Ajange la ihnim, ngo tha huje kö.” (Mat. 9:11-13) Hnei Iesu mina fe hna amekötine la mekuna ne la itre atr matre loi la aqane tro angatre a waipengöi Akötresie. Hnei nyidrëti hna ini angatre cememine la xomihni me menyik, me hape, Iehova la “Akötesie, ate utipine me ka ihnim, ate xomi hni ahoean, nge ka tru loi me nyipici.” (Eso. 34:6) Ame hë la thangan, hnene la itre atr ka ala nyimu nge ka ipië hna mejiune kowe la maca ka loi.
13 Ka loi fe tro sa xötrethenge Iesu lo easa thele troa xatuane la itre atr. Tha hna qaja kö ngöne 2 Timoteo 3:16 ka hape, tro sa catrëne la itre atr la kola eamo angatr. Tha hna upi së kö hnene la Tusi Hmitrötre troa ithanata kowe la atr, me tha metrötrëne la itre mekuna ne la hni angeic. Maine tro sa qaja angazone la ketre atr, tro la itre ithanata së a tune la “hna thine hnei taua.” Tro së lai a akötrë angeic, nge pëkö ca ixatua së lai koi angeic.—Ite edomë 12:18.
14-16. (a) Nemene la aqane tro la itre qatre thup a eamone la itre trejine ka ajane troa seijolene la itre ewekë ka traqa koi angatr? (b) Pine nemene matre ka nyipi ewekë catre kowe la itre keme me thin troa xome la Tusi Hmitrötre troa eamone la itre atrene la hnepe lapa i angatr?
14 Nemene la aqane tro sa xomini ahoeany, me thiina ka menyike la easa eamone la atr hnene la Tusi Hmitrötr? Pane mekune jë së la lue trefëne ka iwesitrë lapaa. Nyidroti a sipo ixatua kowe la ketre qatre thup. Tha tro kö la qatre thupe lai a nyixöle i ketre maine ketre, nge ketre tha tro kö angeice lai a hamëne la sipu mekuna i angeice nyine uni jolene la ewekë ka eje thei nyidro. Tro pe angeice lai a xome la itre trepene meköti ne la Tusi Hmitrötre ka troa amamane koi nyidro la nyine kuca matre mano ju hë nyidro iwesitrë lapaa. Ijije hi tro angeice a xome la itre trepene meköti ka eje ngöne la mekene 3 ne lo itus Jëne Madrine Kowe La Fami. Ce ithanatane jë hi angatre la itre trepene meköti cili, ene pe trotrohnine ju hi hnene la lue trefëne ka hape, hetre itre ewekë nyine troa saze ngöne la mele i nyidro. Ame hë e thupen, ka loi tro hmaca lai qatre thupe a hnyingë pengöne la mele i nyidro, nge e nyipi ewekë pala kö, haawe, tro hmaca hamë nyidro la itre xa hnepe ixatua.
15 Tro la itre keme me thine a eamo tune kaa kowe la itre nekö i angatr? Pane mekune jë ka hape, ame la nekö i epuni jajiny, tre, ka hetre sine ce elon. Ngo epuni a mekune ka hape, tha ka nyipi loi kö la itre ewekë hna kuca hnene la sine ce elone la nekö i epun. Ame la ewekë hnapan, loi e tro epuni a atre hnyawa la pengöne la sine ce elone la nekö i epun. Thupene lai, maine nango luelue pala kö epun, ithanata jë me angeic. Ijije hi tro epuni a ce wange me angeice la itre trepene meköti ne la Tusi Hmitrötre ngöne lo itus, Les jeunes s’interrogent — Réponses pratiques, Itus 2. Thupene lai, loi e troa hetre traeme nyine tro epuni a ce thawa me angeic. Loi e tro epuni a wange hnyawa la aqane ujë i angeice ngöne la hna cainöje trootro maine ngöne la hnepe lapa. Maine hetrenyi thei epuni la xomihni me menyik, tro angeice lai a ketre drenge ka hape, kola hnimi angeic, nge hna nyipi ewekë angeice hnei epun. Tro lai a xatua angeice troa trongëne la itre eamo hnei epuni hna hamën göne lo sine ce elo i angeic, me sewe angeice e mekune ju troa kuca la itre ewekë ka ngazo ngöne la mele i angeic.
16 Drei fe la itre ka ajane la ixatua së? Jëne la xomihni me menyik, ijije fe tro sa eamone la itre atr hna akötrëne la mel hnene la itre meci ka traqa koi angatr, ame itre xan, kola mele hleuhleu hnene laka pë hë huliwa i angatr, nge ame itre xan, jole koi angatre troa kapa la ketre ini hna hamëne hnene la Tusi Hmitrötr. Ame la easa xome la Wesi Ula i Akötresie troa eamon, nyimu aqane tro sa kepe thangane qa ngön.
“NYIPI EWEKË . . . NYINE IHAJINE NGÖNE LA THINA KA MEKÖT”
17. Pine nemene matre loi e tro sa olene la easa kapa la itre ihaji?
17 Önine la Tusi Hmitrötr, tha ka amadrinë së kö la ihaji. Nyipici laka, tha ka hmaloi kö e tro sa kapa. Ngo e kapa ha me trongëne ej, tro la ihaji a aijijë së troa hetrenyi la thiina ka meköt. (Heb. 12:11) Önine la itre thupëtresije Keresiano ka tru ngöne la nyipici ka hape, hna xatua angatre hnene la ihaji maine ini hna hamëne hnene la itre keme me thine i angatr. Nge e tro sa kapa la itre ihaji qaathei Iehova hna hamëne hnene la itre qatre thup, tro itre eje lai a tro xomi së ngöne la gojenyi ne mel.—Ite edomë 4:13.
18, 19. (a) Pine nemene matre ka nyipi ewekë catre la hna eamo hnei Ite Edomë 18:13 kowe la itre qatre thup, itre ka troa hajine la itre trejin? (b) Nemene la eloine kowe la itre atr ka kuca la ngazo, e tro la itre qatre thup a hamëne menyikëne la itre ihaji cememine la ihnim?
18 Hnene la itre qatre thupe me itre keme me thine hna inine tune kaa troa hamëne la ihaji ka ijij? Öni Iehova, nyipi ewekë tro sa hamëne la ihaji “ngöne la thina ka meköt.” (2 Tim. 3:16) Kolo lai a hape, nyipi ewekë tro sa xome la itre trepene mekötine la Tusi Hmitrötre troa hajine la itre xan. Kola mama la ketre trepene meköti ka tru ngöne Ite Edomë 18:13: “Ame la ate sa kowe la ewekë nge tha pane ate, te, angeic’ a hmo me hmahma.” Celë hi matre e qaja jë hnene la ketre atr kowe la itre qatre thupe ka hape, hetre ngazo hna kuca hnene la ketre trejine föe maine trahmany, loi e troa pane atre hnyawa hnei angatre la pengöne la itre ewekë hna kuca qëmekene troa hamëne la ihaji. (Deu. 13:14) Thupene hë lai, ijije hë troa hamëne la ihaji “ngöne la thina ka meköt.”
19 Önine mina fe la Tusi Hmitrötre kowe la itre qatre thupe ka hape, troa “amenyikene” la ihaji nyine hamëne kowe la itre trejin. (E jë la 2 Timoteo 2:24-26.) Nyipici laka, tro lai a wangangazo Iehova me akötrëne la itre xa atr hnene la ngazo hna kuca hnene la ketre atr. Ngo maine elëhni jë la ketre qatre thupe la kola hajine lai atr, tha ijiji angeice hë lai troa hamë ixatua. Maine tro la ketre qatre thup a nyitipu Akötresie me ithanata amenyikenyi la angeice a hajine la atre trene ngazo, haawe, tro lai a xatuane lai atr troa ietra.—Rom. 2:4.
20. Nemene la itre trepene meköti nyine troa xötrethenge hnene la itre keme me thin ngöne la angatr a hajine la itre nekö i angatr?
20 Nyipi ewekë tro la itre keme me thine a melëne la itre trepene meköti la angatr a hajine la itre nekö i angatr. (Efe. 6:4) Hanawange la ketre ceitun, nemene la nyine tro la keme a kuca e qaja jë hnei ketre atr la ngazo hna kuca hnene la nekö i angeic trahmany? Loi e tro la keme a atre hnyawa la itre enyipicine la hna kuca qëmeken troa nyithupene kowe la kuku la ngazo i angeic. Nge pëkö ketre ewekë nyine troa kuca cememine la elëhni hnene la ketre atrene la hnepe lapa. “Joxu [Iehova] la ate utipine me hnime atraqat,” nge nyipi ewekë tro la itre keme me thine a nyitipu Nyidrë la angatr a hajine la itre nekö i angatr.—Iako. 5:11.
AHNAHNA KA TRU ALAMEKENE QAATHEI IEHOVA
21, 22. Ame la easa e la Salamo 119:97-104, nemene fe la itre trenge ithanata ka ihmeku hnyawa memine la itre mekuna së göne la Wesi Ula i Iehova?
21 Hna qaja ngöne la ketre ijine hnene la ketre hlue i Iehova la kepine matre hnine jë angeice la wathebo i Iehova. (E jë la Salamo 119:97-104.) Jëne la hnei angeice hna inine la Tusi Hmitrötr, inamacane hë angeic, nge lai me jui la aqane trotrohnine angeice la itre ewekë. Ame la angeice a melëne la itre trepene meköti qa hnine la Itre Hna Cinyihan, angeice hi lai a thigaje ju qa ngöne la itre ewekë ka ngazo hna kuca hnene la itre atr. Hnei angeice hna inine hnyawa la Itre Hna Cinyihane cememine la madrin, nge hetre thangane catre koi angeice qa ngöne la hnei angeice hna trongëne la itre ihaji qa ngön. Ka xecie hnyawa koi angeice laka, tro angeice a melëne la itre wathebo i Akötresie ngöne la mele i angeice ka pexej.
22 Hapeu, hnei epuni kö hna hane wange la Tusi Hmitrötre ceitu me mo ka tru alameken? Celë hi ka troa xatua epuni troa acatrene la lapaune i epuni ka hape, tro Akötresieti a eatrëne la itre mekuana i Nyidrë. Ame la itre eamo i Iehova qa hnine la Tusi Hmitrötr, tre, itre ixatua koi së matre tha tro kö sa kuca la ngazo ka troa tro xomi së kowe la mec. Ka loi fe tro epuni a xome itre eje göi troa xatuane la itre atr matre xötrëne fe angatre me tro huti ngöne la gojenyi ne mel. Ame la easa nyi hlue i Iehova, la Akötresi së ka inamacan, me ka tru ihnimin, loi e tro pala hi sa xome la Tusi Hmitrötre ngöne la nöjei götrane hne hna ce wange hë.
[Ithueamacany]
a Wange ju la itus Organisés pour faire la volonté de Jéhovah, götrane 79.
b Ame la Iesu a inine la itre atr, hnei nyidrëti hna majemine hnyinge koi angatre me hape: “Nemene la mekune i nyipunie?” Thupene lai, nyidrëti a treqe angatre ju troa sa.—Mat. 18:12; 21:28; 22:42.
c Nyimu tusi Paulo ka xatua së troa isi memine la itre aja ka ngazo ka eje the së. (Rom. 6:12; Gal. 5:16-18) Ijije tro sa mekune ka hape, ka hane angeice trongëne la itre eamo hnei angeice hna hamëne koi itre xan.—Rom. 2:21.
[Thying]
[Iatr ne la götran 12]
[Iatr ne la götran 15]
E hetrenyi thene la itre keme me thine la menyik, nge e tro angatre a xome la Tusi Hmitrötre troa eamone la itre nekö i angatr, haawe, angatre hi lai a xatua nyudrene matre atreine nyudrene hmekëne la itre jole ka tru (wange ju la paragarafe 15)
