Loi E Troa Ifekeune La Itre Mekun, Matre Acatrene La Faipoipo
Loi e Troa Ifekeune La Itre Mekun, Matre Acatrene La Faipoipo
“Ite waucathingene gole hnine la ite tenge sileva la tenge ewekë hna qaja ngöne la ijin’ ej.”—ITE EDOMË 25:11.
NEMENE LA AQANE TRO NYIPUNIETI A SA?
Nemene la eloine koi lue trefëne troa atreine wai ewekë ngöne la nyidroti a ifekeune la hni nyidro?
Pine nemene matre nyipi ewekë tro la lue trefëne a imetrötrekeu?
Nemene la enyipiewekëne la troa hni ka ipië e hnine la faipoipo?
1. Nemene la enyipiewekëne la troa ifekeune me ce ithanata hnene la lue trefën?
ÖNINE la ketre trejine trahmany qa Canada: “Casi fe hi la atr hnenge hna pi lapa memin, a föenge hi.” Hnene laka, nyidroti a ce melëne la itre ijine madrine matre tru la madrine i nyidro; nge ame ngöne la itre jol, tha hace menu kö, ke nyidroti a ce thu. Hnene la ketre thupëtresiji qa Australie hna qaja ngöne la tus i angeic ka hape, “11 lao macatre ne faipoipo hë nyiho, pëkö drai gufa ne tha ithanata ni me föeng.” Ame la catre jë la imelekeu i nyidro hnine la faipoipo, me hetrenyi thei nyidroti la imejiunekeu, tre hnene laka atreine hi nyidro troa ifekeune me ithanata hnyawa. Ame pena la ketre trejine föe ne Costa Rica, öni angeice ka hape, ame la ka aijijë nyidro lue trefëne troa mele madrin, tre ene la troa atreine ifekeune me ithanata hnyawa. Öni angeic: “Eje hi lai ka aeasenyi nyiho hnyawa koi Iehova, me thupë nyiho qa ngöne la itre itupath, me acatrene la ihnimi me aqane mele i nyiho.”
2. Pine nemene matre jole e itre xa ijine koi lue trefëne troa ifekeune la itre mekun?
2 Nyipunieti kö itre trefën a ifekeune la itre mekun? Eje hi laka, ame itre xa ijin, tre jole troa ifekeune la itre mekun, pine laka, lue ka tha pexeje kö la lue trefën, nge isapengöi nyidroti kö. (Rom. 3:23) Ame thene la itre xa ka faipoipo, tre isa qene zine kö la itre trefën, maine isapengöne pena la aqane hia nyidro. Nge qa ngöne lai, isapengöne kö la aqane tro nyidroti a fe la hni nyidro. Celë hi matre, kola qaja hnene la lue ka inamacane ka thele troa atrepengöne la mele ne la lue trefëne ka hape: “Loi e tro la lue trefën a ketre isiine tro nyidroti a atreine ifekeune la itre mekun, matre troa cile huti la faipoipo i nyidro.
3. Nemene la ka xatuane la itre trefën, matre cile huti la faipoipo i angatr?
3 Troa cile huti la faipoipo, e tro la lue trefën a isa catr. Maine nyipici laka jol, ngo ame pe, nyimutre la itre manathithi hnei nyidroti hna troa kapa. Nge tro hë la lue trefëne ka ihnim a ce mele madrin. (Ate cai. 9:9) Pane mekune ju hi së la pengöne la lue ka iaja ekö, ene Isaaka me Rebeka. (Gen. 24:67) Easa öhne e hnine la Tusi Hmitrötr ka hape, tha nanazije kö la ihnim i nyidro lue trefën, ngacama itre macatre ne faipoipo hë nyidro. Nyimutre la itre faipoipo enehila ka cile hut. Nemene la ka xatua angatre troa cile hut? Hnei angatre hna inine troa qaja la mekune i angatr me fe la hni angatr, ngo troa hamëne la itre ithanata cememine la menyik. Hnei angatre hna inine troa hetrenyi la trotrohnin, me ihnim, me metrötr, me ipië. Tro sa ce wange enehila laka, nyipi ewekë la itre thiina cili, matre atreine tro la lue trefën a ifekeune la itre mekun.
LOI E TROA ATREINE ATREPENGÖNE LA ITRE EWEKË
4, 5. Nemene la enyipiewekëne koi lue trefëne troa atreine atrepengöne la itre ewekë? Hamëne jë la itre ceitun.
4 Easa e ngöne Ite Edomë 16:20 ka hape: “Ame la at’ ate pengöne la ewekë, te, troa öhnyi loi.” Kola xatuane la itre ka faipoipo hnene la Wesi Ula i Akötresie troa atreine atrepengöne la itre ewekë, me hetrenyi la inamacane ka ijij, matre tro angatr a madrin. (E jë la Ite Edomë 24:3.) Ame ngöne Genese 2:18, kola qaja ka hape hnei Akötresieti hna xupe la föe nyine ixatua kowe la trahmany. Kolo lai a hape, isapengöne kö la föe memine la trahmany, nge celë hi lai ka aijijë nyidroti troa itö ixatua. Celë hi kepine matre isapengöne kö la aqane fe hnei föe la hni fö, memine la aqane fe hnei trahmanyi la hni trahmany. Ame la fö, tre pi tro catr angeic a qaja la itre aliene hni angeic, me qeje pengöne la itre atr, memine la aqane ce mele hnei angatr. Maine troa hamëne koi angeice la itre ithanata cememine la ihnim, nge itre ithanata ka nyipici, tro hi angeice lai a öhne ka hape, kola hnimi angeic. Ame pena la trahmany, tre tha pi tro fe kö angeic a qaja la itre aliene hni angeic; pi tro kö angeic a qaja la itre hnei angeice hna kuca, me itre jol, me aqane troa nyinyine la itre jole cili. Nge pi tro fe angeic a dreng ka hape, kola metrötrë angeice hnene la itre atr.
5 Kola qaja hnene la ketre trejine föe qa Agele, ka hape: “Ame la föeng, tre canga saqe hi angeice thele nyine la itre jol, ngo tha pane drei ni pe.” Celë hi lai ka aelëhnine la trejine fö, pine laka, ame hi la hnei nyiidro hna ajan, tre ene la tro la fö i nyiidro a drei nyiidro, me thele troa trotrohnine la itre aliene hni nyiidro. Kola qaja hnene la ketre thupëtresiji ka hape: “Ame lo eni me föeng a xötrei faipoipo, ka lapaa majemine ni troa canga thele nyin la itre jole ka traqa kowe la föeng.” Ngo kolo pë hë a trotrohnine e thupene hnene lai thupëtresiji ka hape, tha celë kö la aja ne la fö i angeic, ngo ame la aja i nyiidro, tre loi e tro la fö i nyiidro a dreng la hnei nyiidro hna qaja. (Ite edomë 18:13; Iako. 1:19) Ame la thupëtresiji ka atreine atrepengöne la itre ewekë, tre atrepengöne hi angeice la itre aliene hni ne la föe i angeic, nge angeic a kuca la itre ewekë matre troa atre hnene la föe ka hape, hnimi nyiidro pala hi hnene la trahmany. Kola amamane hnei trahmanyi koi föe ka hape, ka tru koi angeice la itre mekune me aliene hni ne la fö. (1 Pet. 3:7) Nge ame pena la föe ka atreine atrepengöne la itre ewekë, angeic a thele troa trotrohnine la aqane wai mekuna ne la trahmany. Maine tro la trahmanyi me föe a isa kuca la itre hnei Akötresieti hna isa amekötine koi nyidro, tro hë nyidroti a madrin, nge atreine tro nyidroti a ce huliwa matre atreine ië mekune hnyawa.
6, 7. (a) Nemene la ixatua hna hamëne hnene la tus i Ate Cainöj 3:7, kowe la itre ka faipoipo? (b) Maine kola ajane hnene la föe troa porotrike memine la fö i angeic, tro angeic a amamane tune kaa, ka hape, atreine hi angeice troa atrepengöne la fö i angeic? Nge nemene fe la nyine tro la trahmanyi a kuca?
6 Loi e tro fe la lue trefën a atre ka hape, hetre “ijine lapa thaupu, me ijine ewekë.” (Ate cai. 3: 1, 7) Kola qaja hnene la ketre trejine föe ka hape, hnei angeice hna inine troa atrepengöne la ijine troa hamëne la itre xa ithanata kowe la fö i angeic. Maine öhne hi föe ka hape, pë hë ihneimeke ne la trahmany ke tru la huliwa, tre föe a pane itreqe ju. Celë hi lai ka aijijë nyidro troa atreine ifekeune me ithanata hnyawa. Maine tro la föe a treqene hnyawa “la ijin” ka ijij, me ithanata amenyikeny koi föe hmunë, tro hë trahmanyi lai a hmala troa drei angeic.—E jë la Ite Edomë 25:11.
7 Tha tro hmekuje kö la thupëtresiji Keresiano a drenge la hna qaja hnene la föe i angeic, ngo tro fe angeic a hane akötrehnine troa qaja la itre aliene hni angeic kowe la föe i angeic. Kola qaja hnene la ketre qatre thup ka faipoipo koi 27 hë lao macatre enehila ka hape: “Ketre jole ka tru koi ni la troa inine troa hane fe la hninge kowe la föeng.” Kolo fe a qaja hnene la thupëtresiji ka faipoipo koi 24 hë lao macatre enehila, ka hape, tha pi tro fe kö angeic a porotrikëne la itre jole ka traqa koi angeic. Angeic a mekune ka hape, loi e tha tro kö angeic a ithanatane la itre jol, matre tro kö itre ej a patre xan. Ngo öni angeice hmaca jë kö, ka hape: “Ame la atr ka atreine fe la hni angeic, tre tha atr ka meije kö. Ame la eni a thele troa qaja la mekunang, tre eni a pane thithi ju matre sipone koi Akötresie troa xatua ni troa atre la nyine tro ni a qaja, memine fe la aqane tro ni a hamëne la itre ithanata cili. Thupene jë hi lai, eni a pane aca simano pi, nge eni pë hë a qaja jë la mekunang.” Nyipi ewekë tro la itre ka faipoipo a iëne hnyawa la ijine tro nyidroti a ifekeune la hni nyidro; ka tune ngöne la ijine nyidroti a ce wange la topike ne la drai, maine ce e Tusi Hmitrötre pena.
8. Nemene la ka troa xatuane la itre ka faipoipo troa hetrenyi la ajane troa ifekeune la itre mekun?
8 Tha hmaloi kö kowe la lue trefëne troa saze la aqane tro nyidroti a porotrik. Celë hi matre nyipi ewekë tro nyidroti a catre thith, matre sipone koi Akötresieti la uati Nyidrë, nge loi e tro fe nyidroti a hetre aja troa ifekeune la hni nyidro. Ngo tro nyidroti a hetrenyi la aja cili, e ka hnimi Iehova nyidro, me thele troa amadrinë Nyidrë, me goeëne la faipoipo ceitu me ketre ewekë ka hmitötr. Kola qaja hnene la ketre trejine föe ka faipoipo koi 26 hë lao macatre enehila ka hape: “Ka tru koi ni me föeng la aqane goeëne Iehova la faipoipo, celë hi kepine matre, nanyi qaathei nyiho la mekune troa hane isa lapa. Tha ewekë ka hmaloi kö troa ithanatane la itre jole me thele nyine itre ej.” Ame la itre ka faipoipo ka mele nyipici koi Akötresie ngöne la götrane celë, tre troa mele madrine me kepe manathithi qaathei Nyidrë.—Sal. 127:1.
AKÖKÖTRENE JË LA IHNIM I NYIPUNIE
9, 10. Nemene la nyine tro la itre trefën a kuca matre troa kökötre la ihnim i nyidro?
9 Nyipi ewekë catre la ihnim e hnine la faipoipo, ke kola qaja hnene la Tusi Hmitrötr, ka hape, ihnimi la “otene ka nyipi loi.” (Kol. 3:14) Tro ju hë la itre drai, ngo tro pala hi a kökötre trootro la nyipi ihnim; nge celë hi lai ka aijijëne la lue trefëne troa ce melëne la itre ijine madrine me itre ijine ngazo. Ketre, tro hë nyidroti a ieasenyi catr, me madrine troa ce mel. Ame la aqane tro la lue trefën a acatrene catrëne la faipoipo i nyidro, tre tha ene kö la troa aca kuca ngöne la itre xa hnepe ijine la itre ewekë ka tru pala ju pë hë, tune lo hna amamane ngöne la itre film. Ngo hetrenyi la itre hnepe ewekë ka co hi, nyine tro ketre a kuca koi ketre, matre troa cile huti la faipoipo i nyidro. Ka tune la troa ihaluth, me qaja aloinyi ketre, me imeku, me dredrehnyima, maine hnyinge koi ketre ka hape, “Tune kaa nyipo (maine nyipë)?” Eje hi laka, itre hnepe ewekë ka co hi, ngo tru catre la thangane itre ej e hnine la faipoipo. Ame la lue xa trefën, 19 hë lao macatre ne ce mele madrine nyidro, nge öni nyidroti ka hape, ame ngöne la nöjei drai, tre nyidroti a ihë ngöne telefon, maine icinyanyikeu pena, matre troa atre la pengö i nyidro.
10 Maine ka ihnimi la lue trefën, tro nyidroti a akötrehnine troa atrepengöi ketre. (Fil. 2:4) Celë hi lai ka troa akökötrene la ihnim i nyidro, ngacama lue ka tha pexej asë kö nyidro. Troa tro la itre drai, nge troa catre trootro la faipoipo ne la lue trefën, me mele madrin. Qa ngöne lai, maine ka faipoipo nyipunie, isa hnyinge jë ka hape: ‘Atrepengöne hnyawa kö ni la föeng? Trotrohnine hnyawa kö ni la itre aliene hni ne la föeng, me itre mekuna i angeic? Hapeu, eni pala kö a lapa mekune lo itre thiina ka loi hnenge hna öhne thene la föeng, lo itre ka upi ni troa aja angeic?’
IMETRÖTREKEU JU
11. Pine nemene matre ka nyipi ewekë catre la imetrötrekeu e hnine la faipoipo? Qeje pengöne jë la ketre tulu qa hnine la Tusi Hmitrötr?
11 Maine nyipici laka, ijije troa madrine hnene la itre ka faipoipo, ngo pëkö faipoipo ka pexej, ke isa mekune i lue trefëne kö e itre xa ijin. Celë fe hi lai hna hane melëne hnei Aberahama me Sara. (Gen. 21:9-11) Ngo tha celë kö lai la ka angazone la aqane mele i nyidro, lue trefën. Pine nemen? Pine laka, lue ka imetrötrekeu nyidro. Celë hi lai ka mama ekö ngöne la aqane ewekë i Aberahama koi Sara. (Gen. 12:11, 13) Ketre ame Sara, tre ka drei Aberahama nyiidro, nge nyiidroti a hë Aberahama e kuhu hni nyiidro, ka hape, “joxung.” (Gen. 18:12) Ame la lue trefëne ka ithanata akökötreny, tre lue ka tha imetrötrekeu kö nyidro. (Ite edomë 12:18) Nge maine tha ka imetrötrekeu kö la lue trefën, tre tro ha jole la faipoipo i nyidro.—E jë la Iakobo 3:7-10, 17, 18.
12. Pine nemene matre nyipi ewekë tro la itre ka xötrei faipoipo a isiine troa inine troa ithanata amenyikeny me imetrötrekeu?
12 Ame la kola xötrei faipoipo hnene la lue trefën, tre ketre jole lai ka tru koi nyidro troa inine troa ithanata amenyikeny, me imetrötrekeu. Ngo celë hi lai ka troa xatua nyidro troa atreine ifekeune hnyawa la hni nyidro. Kola qaja hnene la ketre thupëtresiji ka hape, ame lo nyidro a xötrei faipoipo, tre jole koi nyidro troa trotrohnine la aliene hni ketre me ketre, memine la itre hna majemin, me itre aja. Celë hi kepine matre kola traqa la itre xa hnepe ijine iwesitrë. Ngo ame pe, hnei nyidroti pala hi hna thele troa hetrenyi la aqane wai ewekë ka loi, me atreine ihnyima. Angeice fe a wange atrehmekune ka hape, nyipi ewekë la ipië, me xomihni ahoeany, me mejiune koi Iehova. Drei la itre eamo ka lolo koi së asë!
LOI E TROA HETRENYI LA IPIË
13. Pine nemene matre nyipi ewekë kowe la lue trefëne troa hetrenyi la ipië?
13 Tro la lue trefën a atreine ithanata amenyikeny me thele tingeting, e lue ka “hni ka ipië” nyidro. (1 Pet. 3:8) Kola qaja hnene la ketre trejine trahmanyi ka faipoipo koi 11 hë lao macatre enehila, ka hape, nyipi ewekë la ipië, ke kola upe la lue trefëne troa qaja ka hape, “Menu hë ni,” matre nyinyine jë la itre jol. Önine fe la ketre qatre thup ka faipoipo koi 20 hë lao macatre enehila ka hape, “Ame ngöne la itre xa ijin, ma lolo ju kö la troa qaja ka hape, ‘Menu hë ni’ hune la troa qaja ka hape, ‘Hniminang.’ ” Hnene la thithi hna xatua nyidroti troa inine troa ipië. Öni angeic: “Ame la eni me föeng a ce thithi koi Iehova, mekune hmaca jë hi nyiho ka hape, lue atr ka tha pexeje kö nyiho, nge Akötresieti ka ihnimi Iehova.” Celë hi lai ka xatua nyidro troa wang atrehmekune ka hape, tha ka sisitria kö ketre hui ketre, me hetrenyi la aqane waiewekë ka loi göne la jole hna ixelë memin.
14. Nemene la ethane kowe la faipoipo e troa pi tru?
14 Maine lue ka pi tru la trahmanyi me fö, tre troa hace catre koi nyidroti troa ifekeune la hni nyidro, me nyinyine la jole hnei nyidroti hna ixelë memin. Ame la atr ka pi tru, goi thatreine fe angeice qaja ka hape, “Menu hë ni.” Hetre nyine tro pala hi angeic a qaja, maine upe zöne pena. Maine akötrë angeice jë hi hnei ketre atr, tre tha angeice fe kö a thele tingeting. Angeice pe a sa akötrën, maine thipi ihneqë. (Ate cai. 7:9) Canga tro hi a ethitre la faipoipo ne la lue trefëne ka pi tru. Loi e tro pala hi sa lapa mekune ka hape, “Akötesieti a thipe tije la itete pi tru, ngo kola hamëne la ihnimi gufa koi angete ipië.”—Iako. 4:6.
15. Nemene la ixatua hna hamëne hnene la tus i Efeso 4:26, 27 kowe la itre trefën?
15 Maine troa traqa la itre ijine iwesitrë kowe la lue trefën, loi e tro nyidroti a canga thele nyine la jole hnei nyidroti hna ixelë memin, hune la troa pi tru. Öni Paulo kowe la itre Keresiano: “The lö kö la jö hune la wesite i nyipunie.” (Efe. 4:26, 27) Nemene la thangan e thipëne kö hnei lue trefëne la itre eamo hna hamëne hnene la Wesi Ula i Akötresie? Kola sa hnene la ketre trejine föe ka hape: “Tha meköle hnyawa kö ni e jidr!” Celë hi matre, loi kowe la lue trefën troa canga nyinyine la jole cememine la hni ka menyik. Ngo ketre, loi e tro nyidroti fe a treqene troa pane trotro lapa la trenge hni nyidro, qëmekene troa ithanatane lai jole cili. Loi e tro fe nyidroti a sipo ixatua thei Iehova, matre hetrenyi nyidroti la hni ka ipië. Celë hi lai ka troa xatua nyidro, matre tha tro hmaca kö nyidroti a wang atrune pala ha la itre aliene hni nyidro, ngo tro pe nyidroti a isine troa nyinyine la jol.—E jë la Kolose 3:12, 13.
16. Maine hetrenyi lue trefëne la hni ka ipië, tro hë nyidroti a goeëne tune kaa la itre thiina ka lolo me itre hna atrein hnei ketre?
16 Maine hetrenyi thene la lue trefëne la ipië, tro hë nyidroti a wang atrune la itre thiina ka loi me itre hna atreine hnei ketre. Maine jë, hetre hna atreine kuca hnei fö, nge ka hetre thangane ka loi kowe la itre atrene la hnepe lapa. Maine hetrenyi thei trahmanyi la hni ka ipië, tha tro kö angeic a thele troa nyi ka atreine catre kö hune la föe i angeic, ngo tro pe angeic a ithuecatre koi nyiidro troa kuca pala hi la hnei nyiidro hna atrein. Aqane tro hi angeice lai a amamane ka hape, angeic a hnimi me wang atrune la föe i angeic. (Ite edomë 31:10, 28; Efe. 5:28, 29) Nge ame pena la fö, tre tha tro kö nyiidro a hnyima sai trahmany, e thatreine kö angeice kuca la hna atreine hnei nyiidro. “Ca ngönetei” hë nyidroti lo, tha tro kö nyidroti a xome la itre aqane ujë celë ka pi tru, wanga akötrë nyidroti jë.—Mat. 19:4, 5.
17. Nemene la ka troa aijijëne la itre ka faipoipo troa madrine me atrunyi Akötresie?
17 Maine jë, pi tro fe nyipunie itre ka faipoipo, a tui Aberahama me Sara, maine Isaaka pena me Rebeka. Nyipunieti a ajane troa madrine me cile huti la faipoipo i nyipunie, matre atrunyi Iehova. Haawe, xome jë nyipunieti la aqane wai ewekë i Akötresie. Thele jë la inamacane qa hnine la Wesi Ula i Nyidrë. Wang atrune ju la itre thiina ka lolo ne la itre fö i nyipunie, matre kökötre pala hi la ihnimi nyipunie itre ka faipoipo. (Ny. i S. 8:6) Catre pi troa hni ka ipië. Metrötrëne ju la fö i nyipunie. Aqane tro hi nyipunieti lai a kepe madrine qa ngöne la faipoipo i nyipunie, me amadrinëne la Tretretro i nyipunie. (Ite edomë 27:11) Hna qaja hnene la ketre trejine trahmany ka faipoipo, 27 hë lao macatre enehila, ka hape: “Thatreine kö ni troa mekune laka, tro pë hë ni a lapa casi pe. Kolo pala hi a catrecatre la faipoipo i nyiho. Hnene hi la etrune la ihnim i nyiho koi Iehova, memine la hnei nyiho hna majemine ifekeune la hni nyiho.” Nyipunieti fe, ijije hi troa hane acatrene la faipoipo i nyipunie!
[Thying]
[Iatr ne la götran 14]
[Iatr ne la götran 16]
Itre ewekë ka co hi, ngo ka tru aliene pe kowe la mele i nyidro, lue trefën
[Iatr ne la götran 17]
Nyipi ewekë troa ifekeune la itre mekun
