“Ka Cate [Kö Epuni] Kowe La Nöjei Huliwa Ka Loi”?
“Ka Cate [Kö Epuni] Kowe La Nöjei Huliwa Ka Loi”?
“Iesu Keriso ; Ate hamë nyidëti kö thatraqai shë, mate tro nyidëti a . . . nyihnyawane thatraqai nyidë la nöje hna iëne ka cate kowe la nöjei huliwa ka loi.”—TITO 2:13, 14.
TRO NYIPUNIETI A SA TUNE KAA?
Pine nemene matre nyine atrunyi së la troa catre kuca la itre ewekë ka loi?
Nemene la aqane amamane Daniela 2:41-45 la kepine matre nyipi ewekë troa tru la aja së kowe la huliwa ne cainöje trootro?
Qeje pengöne jë la aqane tro la thiina ka loi a hule la itre atr kowe la nyipi hmi me koi Iehova Akötresie.
1, 2. Hna wangatrune tune kaa la Itretre Anyipici Iehova? Nge tune kaa fe la mekuna i epuni göne lai?
ITRE atr a drenge ka hape, kola atrunyi angatr, la kola athipi hatre i angatr. Hna majemine fe atrune la atr ka xatuane la lue nöje ka isi troa iloi. Ngo ka sisitria catre pala kö la aqane atrune la atr hna upe hnei Akötresie troa xatuane la itre atr troa iloi me Nyidrë!
2 Easë hmekuje hi, Itretre Anyipici Iehova, la itre hna wangatrune tune lai. Akötresieti me Keriso la ka amekötine la huliwa së matre troa xatuane la itre atr “troa iloi me Akötesie,” ene la troa itre enehmu i Nyidrë. (2 Kor. 5:20) Haawe, Iehova a ce huliwa me easë matre troa theng la itre atr koi Nyidrë. Ame la thangan, itre milio ngöne la 235 lao nöje ka traqa matre enehmu i Akötresieti fe, nge ka mejiune kowe la mele ka tha ase palua kö. (Tito 2:11) Tru la hne së hna catre cainöje trootro, me könëne “la ate ajan” troa atre la nyipici. (Hna ama. 22:17) Easa “cate kowe la nöjei huliwa ka loi,” kola hape, ka tru e kuhu hni së la hne së hna kuca koi Iehova, nge easa kuca la hne së hna atrein. (Tito 2:14) Tro sa wange enehila la aqane tro sa hetre aja atraqatre troa xatuane la itre atr troa atre Iehova. Ame la ketre aqan, tre, ene la troa cainöje trootro.
NYITIPUNE JË LA AJA ATRAQATRE I IEHOVA ME IESU
3. Pine nemene matre kola acatrene la mekuna së hnene “la aja atraqate i Iehova”?
3 Isaia 9:7 a qaja ka hape, tro ha Joxu la Hupuna i Akötresie, nge tro nyidrëti a kuca la itre ewekë ka loi kowe la atr. Tro ha traqa la nöjei ewekë asë cili jëne “la aja atraqate i Iehova ne sabaoth.” Ame la aja atraqatr, tre, ene la trenge aja ka eje thene la atr troa kuca la ketre ewekë. Haawe, ame la hna ithanata ngöne la xötre celë, tre, kola acatrene hnyawa ngöne la mekuna së ka hape, aja i Iehova hnyawa hi troa amelene la atr. Loi e tro sa hetre madrine me hetre aja atraqatre ngöne la hna cainöje trootro, ke, eje thei Iehova la aja atraqatr. Pine laka easa ce huliwa me Akötresie, hne së kö hna kuca asë la hne së hna atreine troa cainöjëne la maca ka loi?—1 Kor. 3:9.
4. Nemene la tulu hna hamën hnei Iesu göi troa amamane pala hi la aja atraqatre ngöne la hna cainöje trootro?
4 Iesu la tulu ka lolo catre göi troa amamane pala hi la aja atraqatre ngöne la hna cainöje trootro. Ngacama tru hnei ka icilekeu ka ajane troa humuthi nyidrë, ngo eje pala hi thei nyidrë la aja atraqatre uti hë la pune la mele i nyidrë e celë fen. (Ioane 18:36, 37) Pine laka atre hë nyidrë ka hape, tha hmitre kö matre akötrë nyidrëti jë me humuthi nyidrë, nyidrëti hi lai a huliwa catre hmaca kö troa xatuane la itre atr troa atre Iehova.
5. Kola aceitunë Iesu tune kaa memine lo atr ka huliwa ngöne lo ceitunene lo hmejieng?
5 Ame lo macatre 32, hnei Iesu hna kuca la ketre ceitun ka qaja la atr trene hmejienge ka tha wawene kö. Thupene köni macatre, upe jë hi la atre huliwa i angeice troa sa trij, ngo hnene lai ka huliwa hna sipone troa nango nue ijine matre tro angeic a tupathe troa nyihnyawane la isinöe matre wawene pi. (E jë la Luka 13:6-9.) Ame lo Iesu a qaja lai, ala xalaithe hi lao la itretre drei nyidrë. Ngo hnene la ceitune i Iesu hna amamane la etrune la aja i nyidrë troa huliwa catre ngöne la itre hnepe ijine ka xoxopatre qëmekene tro nyidrëti a mec. Haawe, hnei nyidrëti hna catre cainöje e Iuda, me Pere, ngöne la sikisi lao treu. Itre hnepe drai qëmekene tro nyidrë a mec, hnei Iesu hna treij, pine laka tru hnei atr ka xele ma kapa la maca hna tro fë hnei nyidrë.—Mat. 13:15.
6. Pine nemene matre loi e tro pala hi a tru la huliwa së ngöne la huliwa ne cainöje trootro?
6 Loi e troa tru la huliwa së ngöne la huliwa ne cainöje trootro pine laka easenyi catre hë së kowe la pun. (E jë la Daniela 2:41-45.) Kola atrunyi së la easa ketre Atre Anyipici Iehova! Easë hmekuje hi la itre atrene la fen ka atreine qaja kowe la itre xa atr la aqane troa nyinyine la itre jole ka traqa kowe la atr. Önine la ketre ka cinyanyin la ketre zonal ka hape, thatreine kö tro sa atre la kepine matre kola traqa la itre ewekë ka ngazo kowe la itre atr ka loi, ngo Tusi Hmitrötre pe a qaja koi së la kepin. Ame la hnëqa së Keresiano, tre, ene la troa thuemacane la itre atr. Loi e “catejë la hni” së, ene la troa tru la aja së troa kuca la huliwa i Iehova. (Rom. 12:11) Tro Iehova a amanathithine la huliwa së, nge tro hë sa atreine xatuane la itre atr troa atre Nyidrë me hnimi Nyidrë.
ITRE HUUJE SË A ATRUNYI IEHOVA
7, 8. Nemene la aqane tro la huuje së a atrunyi Iehova?
7 Hnei Paulo hna catre xomihnine la nöjei pengöne jole ngöne la angeic a cainöje trooto, tune la “ite hmek,” ene la tha meköl, me itre ijine “mecijin.” (2 Kor. 6:5) Ka ceitune hi lai memine la itre hna xomihnine hnene la itre trejine ngöne la hna cainöje trootro. Itre pionie a waipengöne la huliwa ne cainöje ceitu me ketre huliwa ka sisitria ne la mele i angatr, nge ala nyimu qaathei angatr ka huliwai maseta. Nge mekune ju fe la itre mesinare ka huliwa catre troa xatuane la itre atr ngöne la itre nöje trenyiwa. (Fil. 2:17) Itre qatre thupe e itre xa ijin, a triane la itre traeme ne xen, me tha meköle hnyawa, ke, tru la hnei angatre hna nyipi ewekëne la itre atrene la ekalesia. Itre trejine ka qatre hë, me itre trene kucakuca ne la ekalesia, a kuca la hnei angatre hna atrein, matre troa sine la itre icasikeu me hane cainöje trootro. Ketre ithuecatre ka tru la kola wange la aja ne la itre hlue i Akötresie troa hamëne la itre huuje i angatre thatraqane la huliwa ne cainöj. Ngo hnene fe la itre atr e tröne la ekalesia hna wangatrehmekune la aqane nyipi ewekëne së la huliwa ne cainöje trootro.
8 Ame ngöne la ketre zonal ne Royaume-Uni, hetrenyi la ketre tus ka cinyihane la hna qaja hnene la ketre ka tha anyipici Iehova kö, kola hape: ‘Pë hë mejiune ne la itre atr ngöne la hmi. Thatre kö ni la hnei angatre hna kuca ngöne la drai ka pexej. Tha thele kö angatre la itre atr tune lo hna kuca hnei Keriso. Itretre Anyipici Iehova hmekuje hi la ka sikusikune la itre atr, ene la troa thele angatr matre cainöjëne koi angatre la nyipici.’ Ame la itre atrene la fene celë, tha hnehengazone fe kö angatre la itre xan. Ngo ame easë, tru la aja së troa huuje koi Iehova, celë hi matre tru la hne së hna cainöj, aqane atrunyi Iehova Akötresieti hi lai hne së.—Rom. 12:1.
9. Nemene la ka troa xatua së matre tru pala hi la aja së troa kuca la itre ewekë ka loi ngöne la hna cainöje trootro?
9 Nemene la nyine tro sa kuca e patre pi lo trenge aja së kowe la huliwa ne cainöje tune ekö lo? Loi e tro sa mekune hmaca lo itre thangane ka loi hne së hna kapa qa ngöne la huliwa cili. (E jë la Roma 10:13-15.) Troa amelene la itre atr e tro angatr a mejiune koi Iehova, me hëne la atresiwa i Nyidrë. Ngo tro angatre lai a atreine kuca tune e tro sa cainöje koi angatr. Hnene laka, atre hi së la pengöne cili, ene pe tro ha tru la aja së troa xatua angatre matre tru fe la aja i angatre troa kuca la itre ewekë ka loi, nge tro fe sa kuca la hne së hna atreine troa cainöjëne la maca ka loi ne la Baselaia.
THIINA KA LOI LA KA THUE AJANE LA ITRE ATR TROA ATRE AKÖTRESIE
10. Nemene la aqane tro la thiina ka loi së a thue ajane la itre atr troa atre Akötresie?
10 Tha aja ka tru göi troa cainöje trootro hmekuje kö la ka troa thue ajane la itre atr troa atre Akötresie. Ame la hnaaluene ewekë nyine xatua angatr, tre, ene la thiina ka loi the së, itre Keresiano. Hna qeje pengöne hnei Paulo la enyipiewekëne la thiina së, la kola hape: “Pëkö ate hne huni hna athixötëne ngöne la kete ewekë, wanga jele ngazone la huliwa.” (2 Kor. 6:3) Ame la itre ithanata së me thiina së ka loi, tre, celë hi ka thue ajane la atr troa atrunyi Iehova. (Tito 2:10) Eje hi laka, hne së pala hi hna drenge ka hape, itre atr a kapa la nyipici hnene la hnei angatre hna öhnyi së e nyitipu Keriso.
11. Pine nemene matre ngöne la easa thith, nyipi ewekë tro sa mekune hnyawa la thangane la thiina së kowe la itre xa atr?
11 Tune la tro la thiina së ka loi a thue ajane la itre atr troa atre la nyipici, tro fe la thiina ka ngazo a thingijëne la atr troa atre Iehova. Celë hi matre, maine easë ju hë ngöne la hna huliwa, maine ngöne la hnalapa, maine ngöne la hna ini, ngo loi e eje hnyawa koi së ka hape, tha tro kö sa kuca la ketre ewekë ka troa xome ananyine la atr qaathei Iehova. Maine tro sa “kuca la ngazo memine la aja kow,” tro ha luze epine palua la aqane imelekeu së me Iehova. (Heb. 10:26, 27) Kolo lai a amamane ka hape, e tro sa thith, loi e tro sa waipengöne hnyawa la thiina së, me thangane eje kowe la itre xa atr. Kola ngazo catre trootro la thiina ne la fen, nge kola isa mama hnyawa la “ate nyi hlue i Akötesie me ate tha nyi hlue i nyidë.” (Mal. 3:18) Eje hi laka, ame la thiina ka loi ne la Keresiano, tre, aqane tro hnyawa hi lai a xatuane la itre atr troa itre enehmu i Akötresie.
12-14. Tro la aqane cile catre së hnine la icilekeu a xatuane tune kaa la itre atr matre kapa jë fe angatre la nyipici? Hamëne jë la ketre ceitun.
12 Ame ngöne la hnaaluene tusi Paulo koi angetre Korinito, hnei Paulo hna qaja ka hape, hna akötrë angeic, me lepi angeic, me umë angeic ngöne kalabus, pine laka itre atr a icilekeu memine la huliwa i angeic. (E jë la 2 Korinito 6:4, 5.) Qa ngöne la hne së hna catr, e kola traqa la icilekeu, haawe, kapa jë hi la nyipici hnene la itre xa atr. Nyimu macatre hë enehila, hnene la itre xa atr e Angola hna ajane troa apatrene trije asë la Itretre Anyipici Iehova ngöne la nöje i angatr. Hnei angatre hna thaucëne la lue Atre Anyipici Iehova, me 30 lao atr ka hetre ajan, uti hë la kola kuie la ngönetrei angatr me neni la madra. Hnei angatre fe hna thaucëne la itre föe me itre nekönatr. Hnei angatre hna upe la itre xane troa goeën matre xou jë angatr nge matre tha tro hmaca kö angatre a drenge la Itretre Anyipici Iehova. Ngo ame hë e thupen, ala nyimu qaathene la itre atr cili la ka sipone kowe la Itretre Anyipici Iehova troa ini Tusi Hmitrötre me angatr! Ame hë la thangan, kolo pala hi a cainöje e cili, nge tru hnei atr ka lö kowe la nyipici, nge tru la hna amanathithine la itre trejin.
13 Kola amamane hnyawa hnene la itre hna melëne celë ka hape, e kola öhne hnene la itre atr la aqane cile catre së e kola traqa la itre itupath, tro angatre lai a ajane troa kapa la nyipici. Hnene la aqane catre i Peteru me itre xa aposetolo hna thue ajane la itre xane troa hane itre enehmu i Akötresie. (Ite hu. 5:17-29) Ketre, tro la itre sine ini së me itre sine huliwa së, me itre atrene la hnalapa së a kapa la nyipici, qa ngöne la hnei angatre hna öhne la easa cile catre hnine la itre icilekeu.
14 Hetre trejine pala hi hna akötrëne. Ame enehila, ala 40 lao trejine e Armenie hna umëne e kalabus pine xele ma soc. Nge tro hmaca kö a ala nyimu catre e cili ngöne la itre drai ka troa xulu la itre hna troa umën. Ame pena ha e Érythrée, 55 lao Itretre Anyipicin ka lapa kalabus, nge ase hë sasaithe la 60 lao macatre ne la itre xan e angatr. Ame fe Corée götrane kolojë, 700 lao Atre Anyipicin hna umën pine tha soc. Traqa koi 60 lao macatre la kola umëne la itre trejine me easë, nge ala faifi qaathei angatre lao ka mec pine la aqane iaxösisi e cili ngöne lo itre macatre 1970 me itre macatre 1980. Loi e tro sa catre thithi matre tro la aqane mele nyipici ne la itre trejine hna axösisine e cili a atrunyi Akötresie me xatuane la itre xan troa kapa la nyipici.—Sal. 76:8-10.
15. Hamëne jë la ketre hna melëne ka amamane la aqane xatuane la itre atr troa atre la nyipici hnene la thiina së ka meköt.
15 Ame fe la thiina ka meköti së, tre, kolo fe a thue ajane la itre atr troa atre la nyipici. (E jë la 2 Korinito 6:6.) Hnene la ketre trejine föe hna amë la mani angeice hnine la masine ne hamë tikitr, nge önine jë hi la ketre sinee i angeic, tha nyipi ewekë kö troa nyi thupene lai tikitr pine laka tha nanyi kö la hna tro kow. Qeje pengöne jë hi hnene lai trejine ka hape, ame la ka meköt, tre, troa nyi thupene la tikitr, ngacama tha qea kö la hna tro kow. Thupene jë hi lai, uti pi hi la sinee i angeic qa ngöne la kar. Ame hë thupen, xei jë hi lai ka xomi kar troa hnyingëne kowe la trejin ka hape, ‘Atre Anyipici Iehova nyipo?’ Nange jë hi angeic, me qaja ka hape, ‘Hnei nyipë hna atre tune kaa?’ ‘Hnenge hna drenge lo epone a ithanata tikitr, nge atre hi ni ka hape, ame la Itretre Anyipici Iehova, ceitu i angatre memine la itre atr ka ala xalaithe hi ka nyi thupei tikitr, ke ka meköti pala hi la aqane huliwa i angatr.’ Itre treu hë thupen ngöne la ijine icasikeu, tro easenyine jë hi la trejine föe hnene la ketre trahmany me qaja ka hape, ‘Wangatrehmekunyi ni hi hnei nyipo? Eni hi lo ka xomi kar, lo ka ithanata tikitr me nyipo. Thupene jë hi la hnenge hna öhne la thiina ka meköti thei nyipo, eni pë hë a mekune jë troa inine la Tusi Hmitrötre memine la Itretre Anyipici Iehova.’ Ame la itre atr a öhne the së la thiina ka meköt, angatre a mejiune ju kowe la maca ka loi hne së hna cainöjën.
THIINA ME AQANE UJË I EPUNI A ATRUNYI AKÖTRESIE
16. Nemene ju hë la thangan, e hetrenyi the së la xomi hni ahoeany, me ihnim, me menyik? Hamëne pi la ketre ceitune hna kuca hnene la itre hene ne hmi ka huliwa thoi.
16 Ame la easa hetrenyi la xomi hni ahoeany, me ihnim, me menyik, easë hi lai a thue ajane la itre atr troa atre Iehova, me atre la itre mekuana i Nyidrë, me nöje i Nyidrë. Kola atrunyi Akötresie hnene la aqane ujë me thiina ne la itre nyipi Keresiano. Hnene la itre xa hene ne hmi hna amamane ka hape, ka loi la aqane ujë i angatre me thiina i angatr. Ngo angatre a thoi me atrekënö la manie ne la itre sine hmi angatr. Hnei itre xan hna xome lai mani nyine troa itöne la itre uma ka tru thupen, nge ka mingöminge thatraqai angatr. Goi kuca fe hnene la ketre la uma ne la kuli angeic me ami kilimatizörën! Triane kö angatre la hna amekötine hnei Keriso, ka hape, “Hamëne gufane pi.” (Mat. 10:8) Angatre fe a tune lo itretre huuje i angetre Isaraela ka ngazo thiinan. Angatre a hamë ini “göi thupen,” nge tria kö la aqane hamë ini angatre göi Akötresie. (Mika 3:11) Ame la aqane huliwa thoi cili, tre tha aqane ujë kö göi troa xatuane la ketre atr troa enehmu i Akötresie.
17, 18. (a) Tro sa atrunyi Iehova tune kaa jëne la thiina së? (b) Pine nemene matre loi e troa tru la aja së troa kuca la itre ewekë ka loi?
17 Ngo tro la itre atr a ajane troa enehmu i Akötresie e tro angatr a wangatrehmekune ka hape, easa inine la nyipici, me nyipi ewekëne hnyawa fe la itre ka lapa easenyi së. Ame la ketre ceitun, tre, ene la ketre pionie ka ithanata kowe la ketre sine föe ka qatre föe hë, nge ka canga qaja ka hape, xele eahlo. Öni eahlo, ame la kola keciqa la sine paate ne qënehlö, eahlo e koho hune ija, kola saze la laam ne la kecen. Öni angeice jë, “Thaa loi kö tro eapo a kuca caasine lai, wanga eatre jë eapo.” Ase jë hi saze la laam hnene la trejin, angeice a tro hmaca ju kowe la ketre hnalapa. Ame la neköne la föe a atre lai ewekë hna kuca, ketri angeice ju hi, nge angeic a canga xötrethenge ju lai trejin matre troa olen. Ase jë hi lai, kapa jë hi hnene la nekön troa hane inine la Tusi Hmitrötr.
18 Pine nemene matre loi e tro fe a tru la aja së troa kuca la itre huliwa ka loi? Hnene jë laka, atre hi epuni ka hape, e troa tru la huliwa i epuni ngöne la hna cainöje trootro, nge troa loi la thiina i epun, epuni hi lai a atrunyi Iehova me xatuane la itre atr troa hetrenyi la mel. (E jë la 1 Korinito 10:31-33.) Ame la ketre kepine matre troa tru la aja së troa cainöje trootro, me troa loi la thiina së, tre, tru la aja së troa amamane hnyawa la ihnimi së koi Akötresie me kowe la itre xa atr. (Mat. 22:37-39) Maine troa tru la aja së troa kuca la itre ewekë ka loi, tro ha tru la madrine së enehila. Ketre, easa treqene hnyawa la ijine tro la nöjei atr a nyi hluene me atrune cememine la madrine la Atre Xupi së, ene Iehova.
[Thying]
[Iatr ne la götran 8]
[Iatr ne la götran 10]
Ame la epuni a cainöje trootro, epuni hi lai a anyipicine kowe la itre atr ka goeë epun
[Iatr ne la götran 12]
Tha ka sihngödri kö la thiina ka meköt, me aqane huliwa hnyawa i epun
