HNA MELËN

Pine Nemene Matre Ka Hetre Aliene La Mele Së

Kola qeje pengöne hnei Patricia Smith

ASE jë hi ni hnaho Gary, nekönge trahmanyi lo macatre 1958, drenge ju hi ni laka, hetre ketre ewekë ka tha loi kö. Ngo thupene treene lao treu, itre droketre petre hi a öhne la meci nyën, nge thupene faifi lao macatre, kolo fe ha jele nyipicine hnene la itre droketre ne lai mec qaa Ladran. Tru catre hmaca kö la hleuhleu koi ni la eni a hnahone la nekönge jajiny, Louise, naene lao macatre thupei Gary, la kola mama thei angeice la itre hatrene mec, ka ngazo catre hmaca kö hui Gary.

Önine la itre droketre koi ni: “Hna tithe la lue nekö i nyipo hnene la mec hna hëne ka hape LMBB, a ngo ame la engazon, ke, ka pë nyin.” Ame ngöne la ijine cili, tha hna atrepengöne kö lai mec, meci qaathei keme me thin. Hanawange la aqane mama ej, kola ti trootro la lue mek uti hë la tha öhne hnyawa, kolo fe a tru hlepuhlep, kola ketre pengöne la itre hene wanakoime me hene wanakoca, nge meije catre la mekun, nge isa tro kö la mekune me aqane ujë, nge ka diabet, me kökötre ngazo la itre hna itö jun, tune fe la wene thuluhmat. Haawe, ewekë ka hace catre me jole e troa hetrune la lue neköng. Ame la kola mama la etrune la itre ka meci fë la meci cili e Agele, tre, e 125 000 lao atr, ala casi la hna tithe hnyawa, nge tha hna e kö la itre xan hna nango tithe hi.

IEHOVA LA “HUNAPO” HUN

Thupene jë hi la hnenge hna faipoipo, hnenge hna ithanata memine la ketre Atre Anyipici Iehova, nge canga atre ju hi ni laka, nyipici qa hnine la Tusi Hmitrötre la hnei angatre hna inin, ngo tha hna kapa fe kö hnei föeng. Hnene la huliwa i nyidrë, matre tha lapa huti kö nyiho ngöne la ca götran, nge pëkö ekalesia ka ijije tro ni a hane sin. Loi pe, tha mano kö ni e la Tusi Hmitrötr me thithi koi Iehova. Akeukawanyi ni ju hi la eni a e la hna hape, “Tro Iehova a hunapo i ange hna angazon, hunapo ngöne la nöjei drai ne aköt,” nge tha tro pi kö Nyidrëti a “nue tiji angete thele [Nyidrë].”—Sal. 9:9, 10.

Tha öhne hnyawa kö Gary koilo, celë hi matre ame la kola sikisi lao macatrei nyën, upi nyëne jë hi troa ini me lapa ngöne la ketre uma ne ini ka thupëne la itre ka tui nyën, ngöne la götrane kolojë ne Agele. E kola traqa la itre jol, nyëne a hë ni ngöne telefon, qa ngöne lai atreine hi ni troa xatua nyëne jëne la itre trepene meköti qa hnine la Tusi Hmitrötr. Itre hnepe macatre thupene la eni a hnaho Louise, kolo hmaca pena a tithi ni hnei lue meci ka ngazo catr (sclérose en plaques me fibromyalgie). Hnei Gary hna bëeke hmaca kowe la hnalapa, lo kola sikisitrine lao macatre i angeic. Ngo ame la lue meke i angeic, tre, kolo pala hi a tha öhne catre trootro, matre ame hë lo macatre 1975, kolo ha qaja ka hape, ka ti mek angeic. Nge ame lo macatre 1977, hna tro triji huni hnei föeng.

Thupene jë hi la hna bëeke hnei Gary, eahuni a sine la itre huliwa ne la ekalesia, nge ame lo macatre 1974, kolo hi lai a bapataiso ni. Eni a olene kowe la ketre qatre thup, atre xatua Gary matre atreine angeic melëne la itre ewekë ka traqa kowe la ngönetrei angeic ngöne la ijine angeic a thöth. Hna xatua ni fe troa kuca la itre joleng hnene la itre xa sine hming, nge ame hë thupen, ala faifi qaathei angatre la hna amekötine hnei mus me nyi thupene troa xatua ni. Drei la ketre manathithi ka tru!

Lolo la aqane nyipi ewekëne Gary la nyipici, matre hna bapataiso angeice lo macatre 1982. Hnei angeice hna ajane troa pionie ka ixatua, ame hnenge hna ce tro lapaa me angeice ngöne la huliwa cili, nge nyimu macatre ne eni a huliwa tune lai. Ame la ijine kola traqa hnene la atre thupëne la sirkoskripsio, kola tru catre la madrine ne la nekönge la kola hnyingë angeice ka hape, “Gary, hnauëne laka tha xome kö eö la huliwa ne pionie lapa?” Ithuecatre ka lolo catre lai koi Gary, nge ame hë lo macatre 1990, pionie lapa ha angeic.

 Hna alua xöji Gary troa ami faone la lue henetrepë i angeic, ame la hnapan, tre hna kuca lo 1999 nge ame la hnaaluen, tre e 2008, ngo ame pena Louise, tru catre kö la meci nyën. Hna hnaho nyën a ka ti mek, nge ame la eni a öhne la itre hene wanakoime me hene wanakoca a ka ngazo, trotrohnine ju hi ni ka hape, hna tithi nyëne fe hnei LMBB. Thupene la hna waipengöi nyëne hnei itre droketre, mama pi hi laka hetre itre xa igötranene la ngönetrei nyën hna tithi hnei mec. Tro ju pë hë la itre macatre, nge anyimua xöji nyën, nge afaifi lae xöje la lue wene thuluhmati nyën. Nge tui Gary, nyëne fe a diabet.

Atre hnyawa hi nyëne la itre jole ka traqa qa ngöne hna ixöj, ame hnei nyëne hna ithanatane memine la itre ka xötre atr, me itre droketre ka iameköle, me itre ka mus ngöne la pital göi troa thuemacanyi angatre la kepine matre tha aja i nyëne kö troa hamë madra i nyën. Ame la thangane lai, lolo la aqane ce mele nyëne memine la itre ka inyië e pital.

KA HETRE ALIENE LA MELE HUN

Ame la gaa tru ne la hnalapa hun, tre, ene la troa huliwa koi Iehova. Hnenge hna majemine ekö troa e tusi koi Gary me Louise. Traqa pi hi la itre CD me DVD, me itre ewekë hna xome qa hnine www.pr418.com, haawe, ijiji huni asë hë troa isa drenge me xötrethenge la porogarame ne ini Tusi e nöjei wiik, nge loi fe hë koi huni troa hamë mekune ngöne la itre ijine icasikeu ne la ekalesia.

Ame la Gary a hamë mekun, ke, kola qaja la itre mekune hnei angeice hna amë ngöne he, nge ame la itre hnëqa hnei angeice hna cile fë ngöne la Ini Ne Cainöj Qaathei Akötresie, tre, angeic a qaja thenge la sipu aqane ithanata i angeic. Drikona ha angeice qaane lo 1995, nge tru pala hi la huliwa i angeice ngöne la Uma Ne Baselaia, kola kapa la itre atrene la ekalesia, me ixatua cilëne la ikaho.

Hnene la itre trejine hna ce cainöje trootro me Gary, me ukune trongë angeic hune ikatr, ke, akötre la itre hna itö june i angeic. Hnene la ketre trejine hna xatua angeice troa xomiujine la ini Tus memine la ketre atr ka ajan. Hnei Gary fe hna ithuecatrene la ketre trejine ka 25 hë lao macatre ne tha hane cainöj. Ce nyidroti asë hë a sine la itre icasikeu.

Ame la kola naene lao macatre Louise, nyëne hi lai a inine sili drela me qaaqa hmunë, nge hnenge memine la ketre trejine föe ka thupë nyëne hna ini nyëne troa cai sine mano. Hnene laka tru la aja i nyëne troa sili drela, nyëne pë hë a sile ju la sine balaiketre thatraqai itre neköi medreng, me itre qatre me itre qatre föe ne la ekalesia. Hnei nyëne fe hna afedrei iatr ngöne la itre sine kart hnei nyëne hna sipu kuca göi troa nyi ahnahnane koi itre atr. Tru catre la madrinene la itre atr la angatr a kapa la itre sine kart cili. Thöthi pë hë nyën, nge atreine hë nyën lepe tus. Ame enehila, jëne la ixatua qa ngöne la ordinatör, atreine hi tro nyëne a ithewe mekunekeu memine la itre sinee i nyëne jëne e-mail. Hna bapataiso Louise, nge nyëne a 17 lao macatre. Ame lo itre ijine cainöje trootro ka ketre pengöne kö, tru la madrine huni tro asë hi huni a pionie. Tui Gary, hnei Louise mina fe hna hneheene la itre xötre nyine tro nyëne a qaja matre amamane la lapaune i nyëne kowe la fene hna thingehnaeane hnei Akötresie, nge e cili “troa ahlëne la ite lue meke ne la ite timek,” nge “tha tro kö a qaja hnene la ate lapan’ eje, ka hape, Ini a mec.”—Is. 33:24; 35:5.

Atraqatre catre la ole huni kowe la itre nyipici qa hnine la Wesi Ula i Iehova! Tru catre fe la madrine huni kowe la aqane hnimi huni hnene la itre trejine e hnine la ekalesia, ke, maine patre ju la ixatua i angatr, thatreine jë kö tro huni a aeatrëne la itre huliwa hun. Nge tha nyine qaja kö la ixatua qaathei Iehova, ke, celë hi ka hamë aliene la mele hun.

[Ithueamacany]

[Iatr ne la götran 25]

[Hna cinyhan ne la götran 25]

Atraqatre catre la ole huni kowe la itre nyipici qa hnine la Wesi Ula i Iehova!