Itre Hnyinge ne la Itre ka e

Hapeu, hnei angetre Isaraela kö hna majemine athipe hune la sinöe la itre ka kuca la ewekë ka ngazo?

▪ Ala nyimu la itre nöje ekö ka athipe hune la sinöe la itre atr ka kuca la ewekë ka ngazo. Ame la angetre Roma, tre angatr a xome la itre atr ka tune lai, me othe ju hune la isinöe, maine jei faone pena. Nge e thupen, angatre pë hë a nuaxöji angeice pi pe koi nyimu drai, matre meci ju kö angeic hnei mecijin, me pi ij, me akötr. Ame koi angetre Roma, nyine hmahmane la troa meci tune lai, ke thatraqane hmekuje hi lo itre atr ka kuca la itre ewekë ka ngazo catr.

Ngo tune kaa fe angetre Isaraela? Hnei angatre fe kö hna hane humuthe tune lai la itre atr ka kuca la ewekë ka ngazo? Easa e ngöne la Wathebo i Mose ka hape: “Maine kete ate a kuca la ngazo ka ijije troa meci pin, mate humuthi nyën, nge eö a athipi nyëne hune la sinö ; tha tro kö a hnene la ngönetei nyëne hune la sinö’ e jid, ngo tro eö a kelem’ eje ngöne la drai cili.” (Deu. 21:22, 23) Haawe, ame ngöne lo hneijine ne la Itre Hna Cinyihane Qene Heberu, ame la atr hna amekötine troa humuth, tre troa pane humuthi angeic, qëmekene troa athipe la ngönetrei angeic hune isinöe.

Celë hi matre kola qaja e hnine la tusi Levitiko 20:22: “Ame la ate Isaraela, me ate ne la kete nöj’ a lapa tenyiwa thei Isaraela, a troa hamëne la nekö i angeice koi Moleka, te, tro ha humuthi angeic ; qâ ne la ite ate ne la nöje troa trânyi nyëne hnei etë.” Ame la itre atr ka “tene u ne ta, maine perofeta thoi” tre, tro fe a hane humuth. Ngo troa humuthe tune kaa? “Troa trânyi nyudeni hnei etë.”—Lev. 20:27.

Easa e ngöne Deuteronomi 22:23, 24: “Maine hmalane la trahmanyi hnene la jajinyi gufa ame hna öhnyi angeice pena hnei kete trahmanyi ngöne la lapa, me ce meköle me angeic, tro nyipunie a tro sai nyido kowe la qanahage ne la lapa cili, me trânyi nyido hnei etë mate mecipi, ene la jajinyi qa ngöne la tha hnei nyëne hna hoköt, nge eje ngöne la lapa ; me trahmanyi fe, qa ngöne la hnei nyëne hna angazone la föe ne la ate lapa eashenyi nyën ; nge tro eö a apatene la ngazo qa thei ’ö.” Ame la troa itranyi hnei etë tre, celë hi lai hna lapaa majemine kuca hnene la angetre Isaraela nyine troa humuthe la itre atr ka kuca la ewekë ka ngazo catr. a

Kola qaja ngöne Deuteronomi 21:23, ka hape maine “hnëjinë hë hnei Akötesie la ate” tre, troa “athip.” Ame la kola amë amamane ekö hune la sinöe la ngönetrei ne la itre hna humuthe pine kuca la ewekë ka ngazo, tre, nyine tulu hi lai koi itre xan.

[Ithueamacany]

[Hna cinyhan ne la götran 13]

Haawe, ame ngöne lo hneijine ne la Itre Hna Cinyihane Qene Heberu, ame la atr hna amekötine troa humuth, tre troa pane humuthi angeic, qëmekene troa athipe la ngönetrei angeic hune isinöe