Ië Ewekë Hnyawa Jë Matre Thupëne La Edrö Së
Ië Ewekë Hnyawa Jë Matre Thupëne La Edrö Së
“Sisinejë la ngazo ; nge fedeju kowe la loi.”—ROM. 12:9.
TRO NYIPUNIETI A SA TUNE KAA?
Nemene la edrö së qaathei Iehova?
Nemene la ini hne së hna xome qa ngöne la aqane waipengöne Esau la edrö i angeic?
Tro sa thupëne tune kaa la edrö së?
1, 2. (a) Nemene la ka xatua epuni troa iëne troa nyi hlue i Akötresie? (b) Nemene la itre hnyinge göne la edrö së qaathei Iehova hna troa sa ngöne la tane mekune celë?
ITRE milio lao atr a ië ewekë hnyawa troa nyi hlue i Iehova Akötresie me xötrethenge la tulu i Iesu Keriso. (Mat. 16:24; 1 Pet. 2:21) Ame lo hne së hna sa xepu koi Akötresie, tre, tha nyine tro kö a wangacon. Tha hne së kö hna iëne la ewekë cili thupene hi la hna inine la itre hnepe nyipici ka co qa hnine la Tusi Hmitrötr. Ngo hne së hna pane inine hnyawane la Tusi Hmitrötr, me acatrene hnyawa la lapaune së kowe la edrö hnei Iehova hna thingehnaeane koi së. Tro Nyidrëti a hamëne la edrö cili kowe asë hi la itre ka inine hnyawa troa atre Nyidrë me Iesu Keriso.—Ioane 17:3; Rom. 12:2.
2 Maine aja së troa loi la aqane imelekeu së me Iehova, nyipi ewekë tro pala hi sa iëne hnyawane la itre ewekë nyine amadrinë Nyidrë. Tro la tane mekune celë a sa la itre hnyinge celë ka nyipi ewekë catr: Nemene la edrö së? Nemene la enyipiewekëne eje koi së? Nemene la nyine tro sa kuca matre tha tro kö a trianyi së la edrö cili? Nemene la ka troa xatua së troa ië ewekë hnyawa?
NEMENE LA EDRÖ SË?
3. (a) Nemene la edrö nyine troa kapa hnene la itre hna iën? (b) Nemene la edrö nyine troa kapa hnene la “ite xa mamoe”?
3 Ala xalaithe hi la itre Keresiano ka mejiune troa kapa la edrö, ene la mel e koho hnengödrai, nge tha tro hmaca kö a hane mec. Tro angatr a cilëne la ketre hnëqa koi angatre hmekuj, ene la troa ce joxu me Keriso ngöne la Baselaia i nyidrë. (1 Pet. 1:3, 4) Ame la itre ka troa kapa la edrö cili, tre itre hna “hnahone hmaca.” (Ioane 3:1-3) Nge tune kaa fe lo itre milio lao atr, “ite xa mamoe” i Iesu,” ka ce huliwa memine la itre hna iëne troa cainöjëne la maca ka loi ne la Basealaia i Akötresie? (Ioane 10:16) Tro la itre xa mamoe a kapa la ewekë hna apatrene hnei Adamu me Eva, ene la mele ka tha ase palua kö e celë fen, gaa pë akötr, me mec, me hace hni. (2 Pet. 3:13; Hna ama. 21:1-4) Ame lo Iesu a thip ngöne la sinöe ne iaxösisi, hnei nyidrëti hna thingehnaeane kowe la atre thip ezi nyidrë troa kapa la edrö cili. Öni Iesu: “Nyipici ini a qaja koi ’ö [“ngöne la drai celë,” MN] tro eö a ce me ini ngöne la paradaiso.”—Luka 23:43.
4. Nemene la itre manathithi hne së hë hna kapa?
4 Ngo ame la edrö së, tre kolo fe a qaja la itre manathithi hne së hë hna kapa enehila. Pine laka, lapaune së kowe la “hna itö mele hnei Keriso Iesu,” tingetinge la mele së nge loi la aqane imelekeu së me Akötresie. (Rom. 3:23-25) Trotrohnine hnyawa hi së la itre hna thingehnaeane hnene la Tusi Hmitrötre kowe la itre drai ka calemi. Ketre madrine ka tru catre koi së la ihnimi hna ithawakeune hnene la itre trejine trahmanyi me föe ngöne la fene hnengödrai. Nge ketre ewekë ka tru la troa anyipici Iehova. Eje hi laka, nyipi ewekë troa mama la ole së kowe la edrö së!
5. Nemene la hnei Satana hna thele troa kuca kowe la itre hlue i Akötresie? Nemene la ka troa xatua së troa neëne la itre ihnö i Satana?
5 Loi e tro sa hmekëne la itre ihnö i Satana wanga luzi pi la edrö së. Hnei Satana pala hi hna iaöne la itre hlue i Akötresie matre ngazo jë la aqane ië ewekë i angatr, ame hna luzi pi la edrö i angatr. (Num. 25:1-3, 9) Atre hi Satana ka hape, tha hmitre pe kö matre apatrenyi angeice pi, celë hi matre angeice a uku së troa kei hnine la ngazo. (E jë la Hna Amamane 12:12, 17.) Maine easa ajane “troa thipe tije la ite nyinyithina i diabolo,” loi e tro pala hi sa wangatrune la edrö së. (Efe. 6:11) Loi e tro fe sa xomi ini qa ngöne la aqane waipengöne hnene la neköne haetra i Isaaka la edrö i angeic.
THE TUI ESAU KÖ
6, 7. Drei lae Esau? Nemene ekö la edrö nyine tro angeice a kapa?
6 Traqa ha enehila kowe la 4 000 lao macatre, thupene la hnei Rebeka hna hnahone la lue fini, Esau me Iakobo. Kola tru trootro la lue fini, nge kola isa mama la pengöi nyidro. “Ate ateine Esau troa weje öni, me ate ne hnit,” ngo “ate thina ka menyike pe Iakobo, me ate ne hnalapa.” (Gen. 25:27) Hna hë Iakobo ka hape, ka menyik, pine laka, ka nyipici la hni angeic, nge ka sisine la ngazo.
7 Ame la kola isa 15 lao macatre i Esau me Iakobo, kolo hi a meci hnei Aberahama, qaaqaa i nyidro. Ngo tha thëthëhmine kö Iehova lo hnei Nyidrëti hna thingehnaeane koi Aberahama. Ame hë e thupen, Iehova a amexeje hmaca jë koi Isaaka. Öni Akötresie, tro ha manathithi la nöjei nöje ne la fen jëne la matra i Aberahama. (E jë la Genese 26:3-5.) Jëne la hna thingehnaeane celë, Akötresieti a amamane koi Aberahama ka hape, tro la ketre matra i angeic a eatrëne lo “matra[n]” hna qaja ngöne Genese 3:15, ene la Mesia. Pine laka, Esau la neköne haetra i Isaaka, angeic la ka ijije troa kapa la edrö hna thingehnaeane hnei Akötresie koi Aberahama. Maine ju tro la Mesia a xulu qa ngöne la itre matra i Esau. Ketre edrö ka lolo catre koi Esau. Ngo hnei angeice kö hna nyipin?
8, 9. (a) Nemene la hnei Esau hna iëne troa kuca memine lo edrö i angeic? (b) Nge e itre macatre thupene hë, nemene la aqane waipengöne Esau lo hna ië ewekë hnei angeic? Nemene ju hë la pun?
8 Ame ngöne la ketre drai ne Esau a bëeke qaa helep, traqa angeice a öhnyi Iakobo “a öle xen.” Esau hi lai a sipo xeni ju, me hape: “Thu ange lai tepe ka paluluxöt, ke kucakuca ha ni.” Öni Iakobo jë hi: “Itö haetra ju eö me ini ngöne la drai celë.” Nemene la hna iëne hnei Esau? Öni angeic, tha nyipi ewekë kö koi angeic la edrö ne la haetra, ame hnei angeice hna iëne ju la trepe xen hune la edrö ne la haetra! Hnei Iakobo hna pi wange hnyawa ka hape, Esau kö a nyipi salemëne la edrö ne la haetra, angeice a sipone ju troa isisinyikeu. Öni Iakobo: “Sisinyijë koi ni ngöne la drai celë!” Tha pane lapa kö Esau troa mekun, ngo hnei angeice hna canga salemëne la edrö i angeic. Thupene jë hi, “Ame hnei Iakobo hna hamë Esau la areto me ite adase hna ölen ; nge angeic’ a xeni me ij, me cil’ a tro.” Mama ju hi ka hape, hnei Esau hna wangacone me xanadrone la edrö ne la haetra thatraqai angeic.—Gen. 25:29-34.
9 Tro ju pë hë la itre macatre, nge easenyi hë matre meci pi Isaaka, ame hnei Rebeka föi angeice hna thelejëne ju matre eje hnyawa laka tro Iakobo a kapa la edrö ne la haetra. Ame la Esau a öhne laka, ka menu la aqane ië ewekë i angeic, ame hnei angeice hna thele ju troa qeje menu koi Isaaka me hape: “Kaka, amanathithi ni jë fe, ene ini. . . . Tha hna amë pe kö hnei nyipë la manathithi thatraqai ni fe?” Ame la Isaaka a qaja koi Esau ka hape, thatreine hmaca kö tro nyidrëti a thapa qaathei Iakobo la manathith, treije catre ju pe hi Esau.—Gen. 27:30-38.
10. Nemene la aqane isa waipengöi Esau me Iakobo hnei Iehova, nge pine nemen?
10 Nemene la ini nyine troa xome qa ngöne la aqane ujë i Esau? Hnei angeice hna amamane ka hape, sisitria kö la itre ajane ngönetrei koi angeice hune la itre manathith, ene la edrö i angeic hna thingehnaeane hnei Iehova. Tha ka tru kö koi Esau la edrö ne la haetra, kolo lai a hape, co hi Iehova koi angeic. Tha hnei Esau kö hna mekune la itre ethanyine la aqane ië ewekë i angeice kowe la itre matra i angeic. Ngo tha ceitu kö me Iakobo, atre wangatrune lai edrö, me thupëne hnyawa jëne la aqane ië ewekë. Ame la ketre ceitun, tre hnei Iakobo hna xötrethenge la hna amekötine hnei keme me thine i angeice göi troa xomi föe. (Gen. 27:46–28:3) Ngacama tha ka hmaloi kö koi angeic, ngo ame la thangan, hnei Iehova hna amanathithine la idrengethenge i angeic hnene la hna xulu la Mesia qaathene la itre matra i Iakobo. Nemene la aqane isa waipengöi Esau me Iakobo hnei Iehova? Öni Iehova: “Hnenge hna hnimi Iakobo ; Nge hnenge hna xele Esau.”—Mal. 1:2, 3.
11. (a) Pine nemene matre loi e tro la itre Keresiano a xomi ini qa ngöne la tulu i Esau? (b) Ame la Paulo a qaja la ngazo hna kuca hnei Esau, pine nemene matre qaja jë fe angeice la kuci ngazo?
11 Ijije hi tro sa xomi ini qa ngöne la tulu i Esau. Hnei Paulo aposetolo hna thuemacane la itre Keresiano troa hmekën matre tha tro kö a “hete ate kuci ngazo, me ka tha nyipine tui Esau, lo ate hamëne la edö i angeice haetra troa itöne la tepe xen.” (Heb. 12:16) Loi e tro sa wangatrune la ithuemacanyi celë, ene la tro pala hi sa wangatrune la itre ewekë i Akötresie matre cile catre së hnine la itre itupath, nge atreine fe së thupëne hnyawa la edrö së. Ame la Paulo a qaja la ngazo hna kuca hnei Esau, pine nemene matre qaja jë fe angeice la kuci ngazo? Pine laka, maine tro sa ujë tui Esau me nue la itre ajane la ngönetrei troa huli së, canga tro hi së lai a kei kowe la ngazo, tune la kuci ngazo, nge ame la thangan, tro ha luzi la edrö së.
HNËKËNE JË LA HNI SË ENEHILA
12. (a) Nemene la aqane tupathi së isa ala cas hnei Satana? (b) Nemene la itre tulu qa hnine la Tusi Hmitrötre ka troa xatua së e traqa ju la itupath huli së kowe la ngazo?
12 Ame së, itre hlue i Iehova, easa hmekëne catrëne wanga tro la itre itupathi a huli së kowe la itre ewekë ka sis. Nge maine troa hetre atr ka tupathi së, canga saqe së hi thithi koi Akötresie matre troa xatua së troa cile catr hnine la itupath. (Mat. 6:13) Ngacama easa thupëne tha tro kö a nyi ethanyine la mele së, ngo tha mano kö Satana thele troa angazone la aqane imelekeu së me Iehova. (Efe. 6:12) Satana la haze ne la fene celë, nge atreine catre angeice akeine la itre atr kowe la itre aja i angatre ka ngazo jëne la itupath. (1 Kor. 10:8, 13) Angeic a thele troa kuca tune lai koi së, isa ala cas. Nge tune kaa ju hë e tupathi së jë troa kei thenge la aja së ka ngazo? Tro ju hë së a kuci nemen? Troa tui Esau, canga tro hi a kei thenge la aja ka ngazo? Maine pena troa cile kow me kötrene trij, tune la hna kuca hnei Iosefa nekö i Iakobo, lo kola tupathi angeice hnene la föi Potifara?—E jë la Genese 39:10-12.
13. (a) Nemene la aqane xötrethenge enehila hnene la ka ala nyim la aqane ujë i Iosefa, ngo nemene la aqane nyitipu Esau hnene la itre xan? (b) Nemene la nyine tro sa kuca matre tha tro kö sa ujë tui Esau?
13 Tru catre hnei trejine ka cile kowe la itre itupath, matre angatr a ië ewekë, troa ujë tui Esau maine tro pena a tui Iosefa. Hnei angatre hna ujë cememine la inamacan, me amadrinëne la hni Iehova. (Ite edomë 27:11) Ngo hnei itre xan hna iëne la tulu i Esau, matre thatreine ju kö angatre thupëne la edrö i angatr. Ala nyimu la ange hna hajine me upetrön eë e nöjei macatre, itre hna amekötine pine la hna kuci ngazo. Nyipi ewekë catre tro sa hnëkëne la hni së enehila, matre atreine së troa cile catre e traqa jë la itre itupath elany! (Sal. 78:8) Lue ewekë nyine tro sa ithanatane göi troa hnëkëne la hni së matre tro sa atreine cile kowe la itupath, me ië ewekë hnyawa elany.
MEKUNE JË, ME HNËKË
14. Nemene la itre hnyinge ka troa xatua së troa sisine la ngazo me hnine la loi?
14 Ame la hnapan, tre, ene la troa mekune la itre ethanyine la ngazo. Maine troa tru la aqane hnimi Iehova hne së, tro fe lai a nyipi ewekë koi së la edrö së. Maine hnime së la ketre atr, tha tro kö së lai a akötrë angeic. Ngo tro pe së lai a thele troa amadrinë angeic. Celë hi matre tro sa mekune hnyawa la itre ethanyine la ngazo, kola hape, tro sa mekune la aqane troa angazo së me angazo itre xane fe e kei ju së kowe la ngazo. Loi e tro sa isa thele ka hape: ‘Nemene la aqane tro la thinange ka tha imeku a angazone la aqane imelekeunge me Iehova? Nemene la aqane troa apuingazone la hnepe lapange hnene la ngazo? Nge tro fe a hane apuingazone tune kaa la itre trejine ngöne la ekalesia? Hnenge kö hna athixötrëne la itre xan hnene la thinang?’ (Fil. 1:10) Isa mekune hnyawa jë fe ka hape: ‘Nemene la eloine e troa madrine ngöne la itre hnepe ijine ka xoxopatre nge troa xeni pune e thupen? Pi tro fe kö ni a tui Esau, troa treije catr lo kola xeni pune la aqane ujë i angeic ka ngazo?’ (Heb. 12:17) Maine tro sa mekune hnyawa la itre hnyinge celë, tro hë së lai a atreine sisine la ngazo, me hnine la loi. (Rom. 12:9) Maine tro sa hnimi nyipici Iehova, tro së lai a huliwa catre matre thupëne hnyawa la edrö së.—Sal. 73:28.
15. Nemene la ka troa xatua së matre atreine së hmek e kola traqa la itupath, me atreine së thupëne la aqane imelekeu së me Akötresie?
15 Ame la hnaaluen, tre, ene la tro sa sipu hnëkë së troa cile catre hnine la itupath. Nyimu aqane hnëkë së hnei Iehova troa cile catre hnine la itupathi ne la fen, matre atreine së thupëne la aqane imelekeu së me Nyidrë. Hnei Nyidrëti hna amamane la thangane ka loi e tro sa inine la Tusi Hmitrötr, me sine la itre icasikeu, me cainöje trootro, me thith. (1 Kor. 15:58) Ame ngöne la nöjei ijine easa fe la hni së koi Iehova jëne la thith, me nöjei ijine easa huliwa catre ngöne la hna cainöje trootro, easë hi lai a sipu hnëkë së troa cile catre hnine la itupath. (E jë la 1 Timoteo 6:12, 19.) Nyipi ewekë tro sa catre kuca la nöjei ewekë cili, e ajane së troa hmeke e traqa pi la itupath. (Gal. 6:7) Kolo hna qaja lai ngöne la mekene hnaaluene ne la itusi Ite Edomë.
CATRE JË “THEL’ EJE”
16, 17. Nemene la ka troa xatua së troa ië ewekë cememine la inamacan?
16 Ite Edomë mekene 2 a thuecatre koi së troa huliwa catre göi troa hetrenyi la inamacan, me atreine waiewekë. Ame la itre thiina cili hna hamëne hnei Iehova, itre ka tro lai a xatua së troa atreine waipengöne la loi me ngazo, nge tro fe itre eje a xatua së troa xomihnine la itre aja së ka ngazo hune la troa kei thenge itre ej. Ngo tro sa traqa kowe lai, e tro sa catr. Öni Tusi Hmitrötr: “Neköng, maine tro hmunë a xome la ite tenge ewekëng, me amë thei hmunë la ite wathebong ; mate hnangenyëne kowe la inamacan, me hnine troa trotrohnin ; nge maine eö a hëne la inamacan, me qaja draië kowe la trotrohnin ; maine eö a thel’ eje kösë sileva, me thel’ eje kösë tenga mo hna juetën ; ame hnei ’ö hna troa trotrohnine la qoue Iehova, me ate Akötesie. Ke tro Iehova a hamëne la inamacan ; qa ngöne la ineula i nyidëti la troa ate hmekune me trotrohnin.”—Ite edomë 2:1-6.
17 Maine tro sa xötrethenge la itre hna qeje pengöne ngöne la itre xötre celë, tro sa atreine ië ewekë cememine la inamacan. Nge maine tro sa nue la itre trenge ewekë i Iehova troa saze la hni së, nge tro sa thith troa hetrenyi la ixatua qaathei Akötresie, me thele lapane la atrehmekune qaathei Nyidrë tune la easa thele la trenga mo hna juetrën, tro hë sa atreine cile catre hnine la itupath.
18. Nemene la nyine tro sa catre kuca, nge pine nemen?
18 Iehova a hamëne la atrehmekune, me atreine waiewekë, me trotrohnin, me inamacane kowe la angetre thele catrë Nyidrë. E tro sa thele catrëne itre ej, me melëne hnyawa itre ej, tro ha catrecatre la aqane imelekeu së me Iehova Akötresie. Haawe, tro la aqane imelekeu së me Nyidrë a thupë së ngöne la itre itupath. Maine tro sa lapa qale koi Iehova, me xoue Nyidrë, tro hë së lai a catre hmekëne la ngazo. (Sal. 25:14; Iako. 4:8) Tro la aqane imelekeu së me Iehova memine la inamacan qaathei Akötresie a xatua së troa ië ewekë hnyawa me amadrinë Nyidrë, nge tro hë së a atreine thupëne la edrö së.
[Thying]
[Iatr ne la götran 26]
[Iatr ne la götran 28]
Wange kö, ke luzi pi la edrö i epun
[Iatr ne la götran 30]
Tro la ini qa ngöne la Wesi Ula i Akötresie a xatua së troa cile catre ngöne la itupath
