ITRE HNA KUCA EKÖ

Itre Ka Cile Huti Ngöne La “Ijine Itupath”

AME ekö lo kola nyiqaane lo Pane Isi Ka Tru, lo macatre 1914, mama pi hi kowe la itre atr ka hape, tha ka hane kö Itretre Anyipici Iehova isi. (Is. 2:2-4; Ioane 18:36; Efe. 6:12) Nemene la hna kuca hnene la itre hlue i Akötresieti e Agele?

Ame lo macatre 1916, hna amekötine hnei mus, ka hape, troa soce la itre trahmanyi ka tha faipoipo kö nge ka 18 lao macatre uti hë koi 40. Ngo maine hna nyi ejolenyi angatre hnene la “hmi maine hnene la itre trepene meköti” pena hnei angatre hna mejiune kow, haawe, tha tro pë hë angatre lai a hane isi, thenge la hna amekötine hnei mus. Goi acile fe hnei musi la itre hna kootr matre troa amekötine ka hape, drei pe la itre atr ka tha tro kö a hane isi, memine la itre nyine troa kuca koi angatr.

Tha hmitre ju kö nge kolo fe hë a umëne ngöne la itre kalabus i soc la 40 lao Itretre Ini Tusi Hmitrötr, me upe la ala 8 kowe la mekene isi e Faras. Qa ngöne lai, hnene la itre trejine qa Agele hna cinyany kowe la ministre Herbert Asquith, nge hnene la 5 500 lao atr hna sija la ketre pepa (pétition), matre troa qaja koi nyidrë ka hape, tha meköti kö la hna kuca.

Ame hë e thupen, kolo ha dreng ka hape, ase hë amekötine laka tro ha kuqane lo ala eitr hna up a tro Faras, pine angatre thipëne troa hane isi. Ngo ame ju hi la kola up lo lai ala eitr lao trejine troa cile xötrë matre kuqanyi angatre pi hë, tre saze hmaca jë hi la hna amekötin; hna upi angatre pena ha troa huliwa mec koi treen lao macatre. Celë hi matre upi angatre hmaca jë hi a tro Agele, matre tro angatr a huliwa ngöne la itre kalabus.

Kolo pala hi a tro la isi, ene pe amekötine ju fe hi hnei musi ka hape, troa hane isi hnene la itre trahmanyi ka faipoipo hë. Ame la ketre droketre, ketre Atre Ini Tusi Hmitrötre hi, tre hna kootrë angeic e Manchester, e Agele. Ame lo 3 Ogas 1916, kola amekötine ngöne la hna kootr ka hape, troa nyi thupene koi angeice la hnei angeice hna tha aeatrëne la hnëqa i angeic, me upi angeice kowe la hna soc. Ame pala hi ngöne la ijine cili, hetre ketre trejine hna kootrën, ngo e Écosse pena. James Frederick Scott la ëjen, nge 25 lao macatre i angeic, ngo hna nue angeice hmaca. Kola mekune ekö hnene la mus i Agele troa kootrë angeic, ngo pine laka kolo fe a troa kootrë Herbert Kipps e Ladran ngöne la ijine cili, haawe, mele pi pe hi James Frederick Scott. Ame hë e Ladran, tre kola amekötine ka hape, troa nyi thupene koi Herbert Kipps la hnei angeice hna tha aeatrëne la hnëqa i angeic, nge tro fe a hane upi angeice kowe la hna soc.

Ame lo Semitrepa 1916, 264 lao trejine trahmanyi ka sipone matre tha tro kö angatr a hane isi. Hna kapa la sipo ne la 5 lao trejin, ngo hna upe pë hë la ala 154 troa huliwa thatraqane la nöj, nge 23 la hna upe troa kuca la itre xa hnepe huliwa ngöne la hna soc, nge 82 la hna upe kowe la hna soc matre troa kootrë angatr e cili, me umëne e kalabus. Tha madrine kö itre atr la aqane axösisine la itre trejin, ene pe xome jë hi hnei musi la itre trejine qa ngöne la kalabus i soc, me amë pena ngöne la itre götrane hnë huliwane la itre atr.

 Pryce Hughes la ka cilëne la hnëqa ne atre thupëne la lapa ne thewe huliwa e Agele thupene la isi. Hnei angeice hna ce huliwa me Edgar Clay ngöne la ketre barrage i tim e Pays de Galles. Ame pena Herbert Senior, tre angeice hi lo ketre ne lo ala eitr hna up a tro Faras, nge hna umë angeice ngöne la kalabus e Wakefield e Yorkshire. Ame pë hë lo munën, tre hnei angatre hna huliwa mec ngöne la kalabus e Dartmoor, nge e cili hi lo gaa tru hna umëne la itre ka tha hane kö isi, pi hmi.

Ame la ketre Atre Ini Tusi Hmitrötr hna upe troa kuca la itre xa hnepe huliwa hna athipe hnei mus, tre qea pi hë la ijine kola pane axösisi angeice e koilo ngöne hna isi. Ame pena Atkinson Padgett, thupene jë hi la kola hë angeic troa hane isi, tha qea ju kö nge angeice fe hë a atre la nyipici; celë hi matre hna hane axösisi angeice hnene la itre hene ne la itre soc, pine angeice thipëne hmaca troa hane isi.

Ngacama thatrepengöne hnyawa kö la itre Keresiano ekö, la kepine matre tha tro kö angatr a hane isi, ngo aja i angatre troa amadrinë Iehova Akötresie. Ame la itre Keresiano hna qaja ngöne la tane mekune celë, tre hnei angatre hna amamai tulu, ke tha hane kö angatre lö hnine la itre isi ngöne la “ijine itupath.” (Hna ama. 3:10)—Itre hna kuca ekö e Agele.

[Iatr ne la götran 31]

Henry Hudson

[Iatr ne la götran 31]

James Frederick Scott

[Iatr ne la götran 31]

Pryce Hughes

[Iatr ne la götran 32]

Hna umëne la Itretre Ini Tusi Hmitrötr e celë hnine la Kalabusi ne Dartmoor

[Iatr ne la götran 32]

Herbert Senior

[Iatr ne la götran 32]

Frank Platt