Wangatrune Jë La Aqane Hame i Iehova Me Atreine i Nyidrë Troa Tulu Ewekë
Wangatrune Jë La Aqane Hame i Iehova Me Atreine i Nyidrë Troa Tulu Ewekë
“Lolo Iehova kowe la nöjei atr asë, nge hune la nöjei huliwa asë i nyidë la utipine i nyidë.”—SAL. 145:9, MN.
ATREINE KÖ EPUNI TROA QEJE PENGÖN?
Nemene la lue thiina i Iehova hna ithanatane ngöne la tane mekune celë?
Nemene la itre aqane tro sa hame tui Iehova?
Nemene la itre aqane tro sa nyitipu Iehova, troa atreine tulu ewekë?
1, 2. Nemene la hne së hna troa kuca uti hë epine palua?
HNENE la ketre trejine föe Monika la ëjen, ka faipoipo hë, traqa ha koi 35 lao macatre hna qaja ka hape: “Atre pengöne hnyawa ni la föeng, nge ketre tui nyidrëti fe. Ngo ame pe, thupene la itre macatre ka nyimutre, hetre ewekë pala hi tro ketre a inine thei ketre!” Kolo fe hi lo aqane ithanata së lai lo easa qaja la föe së maine itre sinee së.
2 Madrine së troa atrepengöne hnyawa la itre atr hne së hna hnim. Ngo sisitria catre la madrine së troa atre hnyawa la pengöi Iehova, Enehmu së ka sisitria catr. Tha ijiji së kö troa atre hnyawa asë la pengöi Nyidrë. (Rom. 11:33) Uti hë epine palua tro pala hi së lai a inine troa atre hnyawa la itre thiina i Iehova, me wangatrune catrëne hmaca kö itre ej.—Ate cai. 3:11.
3. Nemene la hne së hna troa ce wange ngöne la tane mekune celë?
3 Hnene la tane mekune ka ase hë hna xatua së troa wangatrune catrëne hmaca kö la lue thiina i Iehova. Hne së lo hna ce wange ka hape, ka inyipi, nge ka tha iwangatrehmekunyi atr kö Nyidrë. Ame ngöne la tane mekune celë, tro sa ce wange ka hape, ame Iehova ka ham, me ka atreine tulu ewekë. Tro lai a xatua së troa trotrohnine hnyawa ka hape, “Ka jiniati [maine, ka lolo] Iehova kowe la nöjei ewekë asë, nge hune la nöjei huliwa asë i nyidë la utipine i nyidë.”—Sal. 145:9.
KA HAME IEHOVA
4. Nemene la aliene la thiina hna hape, ham?
4 Nemene la aliene la thiina hna hape, ham? Tro lai a xatua së troa sa lai hnyinge hnene la itre trenge ithanata i Iesu ngöne Ite Huliwa 20:35: “Sisitia la manathithi e troa hame hune la troa kapa.” Haawe, ame la atre ham, tre, ketre atr ka ajane catrëne troa hamëne la traeme i angeic, me trenge catre i angeic, me itre ewekë i angeice troa xatuane la itre atr. Ame la atre ham, tre, tha ene kö la ka hamëne la itre ahnahna ka tru thupen, ngo kolo pe lo atr ka hamëne la ketre ewekë qa kuhu hni angeic. (E jë la 2 Korinito 9:7.) Pëkö atr ka atreine weje la aqane hame i Iehova, “Akötesie tene manathith [maine, madrin].”—1 Tim. 1:11.
5. Nemene la aqane amamane Iehova ka hape, ka hame Nyidrë?
5 Nemene la aqane amamane Iehova ka hape, ka hame Nyidrë? Önine la Tusi Hmitrötr: “Lolo Iehova kowe la nöjei atr asë.” Nyidrëti a hamëne kowe la nöjei atr la hnei angatre hna ajan, ceitune hi la atre nyi hlue i Nyidrë memine la ka tha nyi hlue i Nyidrë. Nyidrëti “a axulune la jö i anganyidë hune la nöjei ka ngazo me ka loi, me upe la manie kowe la nöjei ka meköti me ka tha meköti kö.” (Mat. 5:45) Celë hi matre qaja jë Paulo kowe la itre ka tha keresiano kö ka hape, “Kola kuca la loi hnei [Iehova], ene la kola hamë nyipunie la manie qa hnengödrai, me ite ijine ka meledrai, me amejine la ite hni nyipunie hnene la xeni me madin.” (Ite hu. 14:17) Mama hnyawa hi laka, ka hame Iehova kowe la nöjei pengöne atr asë.—Luka 6:35.
6, 7. (a) Drei la hnei Iehova hna ajane troa xatuane cememine la madrin? (b) Hna melëne hnei drei la ka amamane ka hape, Iehova a hamëne la hna ajane hnene la itre hlue i Nyidrë?
6 Ka madrine Iehova la Nyidrëti a hamëne la hna ajane hnene la itre hlue i Nyidrë. Öni Davita Joxu: “Nekönate ni ekö, ngo qatë hë enehila ; nge tha öhne kö ni la ate ka meköti a hna tij, memine la ite matra i angeic’ a sipo xen.” (Sal. 37:25) Tha sihngödri kö kowe la itre Keresiano ka ala nyim, nge ka mele nyipici, la aqane thupë angatre hnyawa hnei Iehova.
7 Hna traqa la ketre jole lo itre macatre ka ase hë koi Nancy, ketre pionie; angeic a ajane troa hetrenyi la 6 072 F. göi thupene uma nyine troa kuiëne la drai thupen. Ngo pëkö mani. Öni angeic: “Hnenge hna thithi fë la jole cili, thupene lai eni a tro ju troa huliwa ngöne la ume xen. Tha mekune kö ni troa kepe mani qaathene la itre ka xeni lai jidri cili, ke, kolo ketre drai ne la wiik, kola co la atr. Ngo eni a sesëkötre la etrune la atr ka traqa troa xeni ngöne la jidri cili. Ame la eni a fenesi la huliwang, e jë hi ni la itre mani hna ole hnene la itre atr, traqa itre eje koi 6 072 F.” Mama hnyawa ju hi koi Nancy ka hape, Iehova la ka xatua angeice troa hetrenyi la hnei angeice hna ajan.—Mat. 6:33.
8. Nemene la ahnahna ka pëkö ka ceitu memin hna hamëne hnei Iehova?
8 Ame la ahnahna ka pë hmaca ju kö ka ceitu memin hna hamë së hnei Iehova, tre, thatraqai nöjei atr asë. Nemene jë? Kolo thupene mel, ene la mele hna huujëne hnene la Hupuna i Nyidrë. Öni Iesu: “Hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Ame la “fene hnengödrai” hna qaja e celë, tre, kola hape, nöjei atr. Haawe, Iehova a hamëne la ahnahna ka pëkö ka ceitu memin koi angetre iëne troa kapa. Ame la atre lapaune koi Iesu, tro hë angeic a hetrenyi la mele ka pë pun! (Ioane 10:10) Celë hi enyipicine ka tru ka amamane ka hape, Atre hame Iehova.
HAME JË TUI IEHOVA
9. Nemene la aqane tro sa hame tui Iehova?
9 Nemene la aqane tro sa hame tui Iehova? Tune la aqane hamë së hnei Iehova la itre ewekë nyine amadrinë së, tro fe së a hane kuca tune koi itre xan matre madrine jë fe angatr. (1 Tim. 6:17-19) Ka madrine së troa hamë ahnahna kowe la itre sinee së me itre hnepe lapa së, memine fe la itre atr ka aja ixatua. (E jë la Deuteronomi 15:7.) Nemene la ka troa upe la atr troa hane ham? Hnei itre xan hna mekune ka hape, ame lo angatr a kepe ahnahna qaathei ketre, ijine tro fe hi angatre lai a hane kuca tune koi itre xan. Ala nyimu ngöne la nöje i Iehova, la angetre amamai tulu ka loi göi troa ham.
10. Nemene la ketre aqane hame ka sisitria?
10 Ame la ketre aqane ka sisitria troa ham, tre, ene la troa huliwane la traeme së, me trenge catre së troa xatuane me thuecatrene la itre xan. (Gal. 6:10) Ka hane fe kö epuni hame tune lai? Loi e tro epuni a sipu waipengöi epuni kö me hape: ‘Eni jë kö a amamane ka hape, hetre ajange troa drenge la itre xan? Maine sipo ni jë hnene la ketre atr troa xatua angeice troa kuca la jole i angeic, maine tro pena a xome la ketre ewekë koi angeic, saqenge kö troa xatua angeic? Eue jë lo eni a hane qaja aloine la ketre atrene la hnepe lapange maine ketre atrene la ekalesia?’ Ame la easa ‘hamë’ ewekë koi ketre, easë hi lai a easenyi catre koi Iehova me kowe la itre sinee së.—Luka 6:38; Ite edomë 19:17.
11. Nemene la itre aqane tro sa hame koi Iehova?
11 Ijije fe tro sa hane hame koi Iehova. Tusi Hmitrötre a thuecatre së troa atrunyi Iehova hnene la “ite nyi [së].” (Ite edomë 3:9) Ame la “ite nyi [së]” hna qaja e celë, tre, ene la traeme me trenge catr, me mani hne së hna xome kowe la huliwa i Nyidrë. Ijije fe tro la itre nekönatre a inine troa hame koi Iehova. Hnei Jason, ketre keme hna qaja ka hape: “Ame la hnepe lapa huni a hamë ahnahna ngöne la Uma Ne Baselaia, hnei nyiho hna hamëne kowe la itre nekö i nyiho troa kuiëne ngöne la trengene mani. Madrine catre nyudren, ke, ame la nyudren a sipu kuië mani, nyudreni hi lai a ‘hamë ewekë koi Iehova.’ ” Maine tro la itre nekönatr a trotrohnine hnyawa e co petre kö angatr ka hape, tro angatre a madrine qa ngöne la hnei angatre hna hame koi Iehova, haawe, tro angatre lai a tru fë la hna majemine cili.—Ite edomë 22:6.
KA ATREINE IEHOVA TULU EWEKË
12. Nemene la aliene lai hna hape, atreine tulu ewekë, maine ka imetrötrë?
12 Ame la ketre thiina ka lolo catre thei Iehova, tre, ka atreine Nyidrëti tulu ewekë. Nemene la aliene lai hna hape, atreine tulu ewekë, maine ka imetrötrë? (Tito 3:1, 2) Ame la ka atreine tulu ewekë, tre tha ka pi hune kö. Nge ka atreine xötrethenge la hna amekötine ngöne la tulu. Tha ka catre fë mekune kö, me ka catre fë mus. Lolo la aqane ujë i Iehova kowe la itre atr, nge Nyidrëti a thele troa trotrohnine la itre ewekë ka jole ka traqa koi angatr. Canga saqe hi Nyidrëti troa drenge la itre xan, nge maine ijij, hnei Nyidrëti hna nue angatre troa kapa maine kuca la hnei angatre hna ajan.
13, 14. (a) Nemene la aqane amamane Iehova ka hape, ka atreine Nyidrëti tulu ewekë? (b) Nemene la hne së hna inine qa ngöne la aqane atreine Akötresie tuluthe la ewekë hmekui Lota?
13 Nemene la aqane amamane Iehova ka hape, ka atreine Nyidrëti tulu ewekë? Nyidrëti a mekune la aja ka eje ngöne la hni ne la itre hlue i Nyidrë, nge nyimu ijine Nyidrëti a nue angatre troa kuca la hnei angatre hna mekun. Hanawange la ketre ceitun, mekune jë lo aqane ujë i Iehova koi Lota, ketre thupëtresije ka meköt. Ame la Iehova a mekune troa apatrene trije la lue traon e Sodoma me Gomora, hnei Nyidrëti hna qaja hnyawa koi Lota troa kötre kowe la itre wetr. Ngo ma hetre kepine jë, matre sipone jë Lota koi Iehova troa kötre kowe la ketre götrane kö. Pane mekune ju së la ewekë celë! Lota a sipo Iehova troa saze la itre hnei Nyidrëti hna amekötin!—E jë la Genese 19:17-20.
14 Ame la epuni a e la pengöi Lota e celë, ma tro jë epuni a mekune ka hape, pë hë lapaune i Lota, maine kolo pena a tha idrei. Eje hi laka, atreine hi tro Iehova a thupë angeice matre mel. Haawe, pëkö nyipi kepine matre troa xou hnei Lota. Ngo eje hi laka Lota a xou, ame hnei Iehova hna metrötrëne la itre mekune ka eje ngöne la hni Lota, hnei Iehova hna nue Lota tro pena a kötr kowe la ketre traon, ngacama pi tro fe hi Iehova a apatrene lai traone cili. (E jë la Genese 19:21, 22.) Mama hnyawa ju hi ka hape, tha ka catre fë mekune kö Iehova maine ka catre fë mus pena. Ka atreine pala hi Nyidrëti tulu ewekë.
15, 16. Nemene la aqane amamane hnene la Trenge Wathebo hnei Iehova hna hamëne koi angetre Isaraela ka hape, ka atreine Nyidrëti tulu ewekë? (Wange ju la pane iatr.)
15 Kola mama fe ngöne la Trenge Wathebo hnei Iehova hna hamëne koi angetre Isaraela ka hape, ka atreine Iehova tulu ewekë. Hanawange la ketre ceitun, maine puafala la atre Isaraela, nge tha ijiji angeice kö troa traqa fë la neköi mamoe maine ketre neköi gootr nyine huujën, ijije hi tro angeice a hamëne la lue piny maine lue neköi meketrë nyine huuj. Ngo maine ka puafala catre la atre Isaraela matre goi tha ijiji angeice fe troa traqa fë la lue neköi meketrë, tro ju hë angeice a kuci nemen? Hnei Iehova hna aijijë angeice troa hamë falawa, ene la farin. Ngo tha ajane kö Iehova troa hamë farine hmekuj. Önine la Trenge Wathebo, troa hamëne lo “falawa [maine, farin] ka loi,” lo hna xome hnene la angetre Isaraela kowe la itre atr ka tru hnei angatre hna hëne troa xen. (Gen. 18:6) Nemene la aqane amamane hnene la pengöne celë ka hape, ka atreine Iehova tulu ewekë?—E jë la Levitiko 5:7, 11.
16 Pane mekune jë, maine epuni hi la ketre atre Isaraela ka puafala catr. Ame la epuni a traqa memine la farine i epun ngöne la itane huuj, tre, ce traqa ju hi epuni memine la itre xa atre Isaraela ka trene mani catr, kola traqa fë la itre öni nyine tro angatr a huujën. Tro jë epuni lai a nango hmahma pine la neköi huuje i epun. Ngo the thëthëhmine kö ka hape, ame koi Iehova, tha ka co kö la huuje i epun. Pine nemen? Trenge Wathebo i Iehova a amekötine tro epuni a traqa fë “falawa ka loi,” farine ka sisitria. Ceitu me Iehova a qaja koi epuni ka hape: ‘Atre hi ni ka hape, thatreine kö eö huujëne la ewekë tha hnei eö hna hetreny, ngo atre mina fe hi ni ka hape, atreine hi eö troa hamën la ewekë i eö ka sisitria.’ Kola amamane hnene la ewekë celë ka hape, ka atreine Iehova tulu ewekë. Tha hnei Nyidrëti kö hna sipone kowe la itre hlue i Nyidrë la hnei angatre hna thatreine hamën.—Sal. 103:14.
17. Nemene la hmi hna kapa hnei Iehova?
17 Kola thuecatre së la easa atre ka hape, ame Iehova, ka atreine tulu ewekë, nge ka kapa Nyidrëti la hmi së e tro sa hamë Nyidrë la götrane ka sisitria ne la mele së. (Kol. 3:23) Hnei Constance, ketre trejine ka qatre föe hë, atre Itali hna qaja ka hape: “Ame la ewekë hnenge pala hi hna ajane troa kuca catrën, tre ene la troa qeje Iehova Atre Xupi ni koi itre xan. Celë hi matre eni pala hi a cainöje trootro me ini Tusi Hmitrötre koi itre atr. Ame itre xa ijin, kola nango jole la mekunang, pine laka, thatreine hmaca kö ni troa huliwa atrunyi tune ekö qa ngöne la kucakucang. Ngo atre hi ni ka hape, tha sihngödri kö koi Iehova la ka ijije koi ni troa kuca, nge Nyidrëti a hnimi ni, me wangatrune la huliwang.”
LOI E TRO FE SA ATREINE TULU EWEKË TUI IEHOVA
18. Nemene la ketre aqane troa nyitipu Iehova hnene la itre keme me thin?
18 Nemene la aqane tro sa atreine tulu ewekë tui Iehova? Pane mekune hmaca jë la aqane ujë i Iehova koi Lota. Maine ju tro hi Iehova a musinë Lota troa tro kowe la götrane hnei Nyidrëti hna mekun. Ngo lolo la aqane ujë i Iehova; Hnei Nyidrëti hna drei Lota lo angeice a qaja la itre mekuna i angeic, ame hnei Nyidrëti hna nue Lota troa tro kowe la götrane hnei angeice hna ajan. Maine hetre itre nekö i epun, tro fe kö epuni a xötrethenge la tulu i Iehova? Loi e tro fe epuni a hane drenge la hna ajane troa kuca hnene la itre nekö i epun, nge e thupene hë, wange ju maine ijije troa saze, amekötine jë thenge la aja i angatr. Nemene la aqane tro epuni a eatrëne lai? Hnene la Ita Ne Thup ne 1 Semitrepa 2007 hna qaja ka hape, ame la itre keme me thin a amekötine la itre ewekë nyine troa kuca hnene la hnepa lapa, loi e tro fe angatr a hane drenge la mekuna ne la itre nekö i angatr. Tune lo keme me thin a sa traemene la itre nekönatr göi troa bëeke koi hnalapa e jidr. Keme me thine la ka troa musinëne la ewekë cili, ngo loi pe tro nyidroti a ce ithanatane memine la itre nekönatre qëmekene troa axeciëne la hawa hna sa. Ame itre xa keme me thin, hnei angatre hna saze, me amekötine la hawa ne troa traqa hnei itre nekönatre e pëkö ewekë ka isazikeu memine la hna qaja hnene la Tusi Hmitrötr. E troa ce ithanatane hnei keme me thine memine la itre nekö i angatre la itre ewekë nyine kuca qëmekene troa ameköti ewekë, canga tro la itre nekönatre lai a trotrohnine hnyawa la itre hna amekötin, nge canga saqei angatre hi troa dreng.
19. Nemene la aqane tro la itre qatre thupe ne la ekalesia a hane atreine tulu ewekë tui Iehova?
19 Loi e tro fe la itre qatre thupe ne la ekalesia a hane atreine tulu ewekë tui Iehova. Atreine hi troa ujë tune e tha hna thue ehnefëne menune kö la itre trejin. The thëthëhmine kö laka, tha ka co kö koi Iehova lo itre huuje ne la angetre Isaraela ka puafala. Ketre tune mina fe, tha tru kö la hawa ne cainöje ne la itre xa trejine hnene la itre kucakuca i angatr, maine hnene laka qatre hë. Nge maine kola nango jole la mekuna i angatr, ke thatreine hmaca kö huliwa tune ekö, nemene la nyine troa kuca? Atreine hi tro la itre qatre thupe a xatua angatre troa trotrohnine laka, Iehova a hnimi angatr, ke, ka tru koi Nyidrëti la itre huliwa ka sisitria hnei angatre hna kuca koi Nyidrë.—Mar. 12:41-44.
20. Nemene la aliene lai kola hape, troa atreine tulu ewekë ngöne la hna huliwa i Akötresie?
20 Eje hi laka, ame la troa atreine tulu ewekë, tre, tha kolo kö a hape, tro sa huliwa hnö koi Iehova me wai së pa. (Mat. 16:22) Tha ajane kö së huliwa hnö, nge atreine hi së troa huliwa atruny. Loi e tro pe së asë a mekune hnyawa lo itre trenge ithanata hna qaja hnei Iesu kola hape: “Catejë nyipunie.” (Luka 13:24) Celë hi matre loi e tro sa atreine waiewekë hnyawa. Easa kuca la hne së hna atreine kowe la huliwa i Akötresie, nge atre hi së lo laka tha hnei Iehova kö hna upi së troa kuca la hne së hna thatrein. Maine tro sa kuca tune lai, eje hi laka, tro Nyidrëti a madrine koi së. Ketre ewekë ka lolo catre la troa nyi hlue ne la Akötresie ka atreine tulu ewekë! Ngöne la tane mekune ka troa xulu, tro sa ce ithanata hmaca la lue xa thiina ka loi i Iehova.—Sal. 73:28.
[Thying]
[Iatr ne la götran 12]
[Iatr ne la götran 13]
Aja i Iehova tro la angetre Isaraela a hame tui Nyidrë (Wange ju la paragarafe 9)
[Iatr ne la götran 14]
“Metötë Iehova jë hnene la ite nyi ’ö.”—Ite edomë 3:9 (Wange ju la paragarafe 11)
“Ame la nöjei ewekë hnei nyipunie hna kuca, kuca hnine ju.”—Kol. 3:23 (Wange ju la paragarafe 17)
