HNA MELËN

 Tru La Manathithi Qa Ngöne La Hna Drengethenge Iehova

Kola qeje pengöne hnei Elisa Piccioli

Önine la kemeng: “Ketre ini ka lolo catre la hna hamë së hnei Noa! Hnei Noa hna drengethenge Iehova me hnime la hnepe lapa i angeic, nge hna amele angatre asë qa ngöne lo Iwë Ka Tru, ke, hnene la hnepe lapa asë hi hna lö troa lapa hnine la aka.”

CELË hi pane ewekë qaathene la kemenge hnenge hna mekune pala hi, ketre thupëtresije ka tha pi mama kö, nge ka huliwa catr. Ketre atr ka ajane catrëne la meköt, celë hi matre canga kapa hi nyidrëti la maca qa hnine la Tusi Hmitrötr, la kola xötrei drenge lo macatre 1953. Thupene jë hi lai, ame la itre hnei nyidrëti hna kapa, tre, nyidrëti a thele jëne ju troa ini huni ju fe, itre nekö i nyidrë. Hna nango xele hnei thinenge ngöne la xötrei ma nue la hmi me itre hna majemine kuca hnei itre Katolik. Ngo e thupene hë, eahlo a kapa ju fe la itre ini qa hnine la Tusi Hmitrötr.

Jole catre kowe la keme me thine huni troa ce ini Tus me eahun. Thatreine kö Nenë e tus, nge ame pena Kaka, tru me qea la hnei nyidrë hna huliwa ngöne la itre hne huni hna eëny. Ame itre xa ijin, hnene laka tru pala ha la hnei nyidrëti hna huliwa, matre nyidrëti a meköle lapa ngöne la ijine eahuni a ini Tus, ngo hetre thangane ka loi qa ngöne la hnei nyidrëti hna catr. Eni hi la haetra, nge hnenge hna ixatua troa hamë ini kowe la itre jining, ca jajinyi me lue trahmany. Hnenge hna ini angatre fe lo hnei Kaka hna amexeje lapane ekö, ene la ihnimi ka tru i Noa kowe la hnepe lapa i angeic, ka mama qa ngöne la aqane drengethenge Akötresie hnei angeic. Ketre mekune lai qa hnine la Tusi Hmitrötre hnenge hna ajane catrën! Qaane ekö catr, hne huni hna sine la itre icasikeu ngöne la Uma Ne Baselaia e Roseto degli Abruzzi, ketre traone ne Itali ngöne la ngöne gejë ne Aderia.

Ame lo 1955, kola 11 lao macatreng, eni hi lai me thinenge a thupa ju la itre wetr götrane kuë matre tro nyiho a hane sine la pane asabele i nyiho e Roma. Qaane ju hi lai, eni a wange ju la itre asabele cili ceitu me itre ewekë ka sisitria ngöne la meleng, ene la mele ne Keresiano.

Ame la macatre thupen, eni ha bapataiso, nge tha qea ju kö, eni fe hë a cainöje e drai ka pexej. Ame hë la kola 17 lao macatreng, eni ha pionie hut e Latina, götrane kolojë ne Roma, nge 300 km qa ngöne la hnalapa hun. Ketre traone ka nango tru pi hë, nge tha ka isemesinee atr kö la angetre mele e cili. Tru la madrinenge memine lai ka ce pionie me eni troa thawa la itre itusi së, ngo pine laka, thöthi petre kö ni, tru la hnenge hna mekune la hnalapang! Ngo sisitria pala kö la ajange troa drengethenge la hna amekötine koi ni.

Hna upi ni e thupen a tro Milan troa ixatua göi troa hnëkëne la Asabele Koi Itre Nöje Ka Nyimutre ne lo macatre 1963 hna hape, “Maca Ka Loi Ka Tha Ase Palua Kö.” Ngöne la ijine asabele,  hnenge hna ce huliwa me itre xa trejin, tui Paolo Piccioli, Ketre trejine nekö trahmanyi qa ngöne la traone e Florence. Ame la hnaaluene drai ne la asabele, hnei angeice hna cile fë la ketre cainöje koi itre ka pë föen, nge ka ketr la itre hni angatr. Matre öninge pena kö, ‘Ka tha tro hmaca kö lai trejine a hane xomi foe.’ Ngo, nyiqaane jë hi nyiho icinyanyikeu, nge kösë ihmeku ju hi la itre mekune i nyiho, tune la itre mekune hnei nyiho hna ajane troa traqa kow, me ihnimi nyiho koi Iehova, me trenge aja i nyiho troa drengethenge Nyidrë. Eni pë hë a föi Paolo jë lo 1965.

KOLA POROTRIKE ME ITRE HENE HMI

Treene lao macatre ne eni a pionie lapa e Florence. Lolo catre la kola goeëne la kola kökötre la itre ekalesia, memine fe la aqane ala nyimu ne la itre thöth. Madrine catre ni me Paolo kowe la itre ijine nyiho a ce ithanatane me angatre la itre mekune ngöne la götrane la ua, memine fe lo itre ijine eahuni a ce kuci madrin, ke ame koi Paolo, e iöhnyi mina angatr, angatr a troa feni balo. Ngacama ka nyipi ewekë catre la tro ni a ce mele memine la föeng, ngo ketre öhne hnyawa fe ni la loi hna kapa hnene la itre thöthi celë me itre hnepe lapa ngöne la ekalesia qa ngöne la aqane nyipi angatre hnei nyidrë me ce thawa nyidrë me angatre la traeme i nyidrë.

Ketre ka ithue madrinenge la eni a mekune hmaca la etrune la itre ini Tus hnei nyiho hna xomiujin. Adriana la ketre hnei nyiho hna ini Tusi kow, atre ithanatane la itre hnei angeice hna inine kowe la lue xa hnepe lapa. Hnei angatre hna ce axeciëne la ketre ijine troa ce porotrikëne la itre hna inine hnei hmi memine la ketre peen Katolik, tune la Tirinite, me u ka tha meci kö. Köni hene hmi ka traqa kowe la hna isapui. Isazikeu catre la itre mekune hnei angatre hna qaja, nge jole e troa trotrohnin, nge mama hnyawa ju hi kowe la itre ka ini Tusi me nyiho laka, tha ihmeku kö memine la itre hna ini qa hnine la Tusi Hmitrötr. Eje hi laka, hetre thangane ka tru qa ngöne la icasikeu cili, pine laka hna lö la ala 15 qa ngöne la lue hnepe lapa cili troa Itretre Anyipici Iehova.

Eje hi laka, ame enehila, isa pengöne hë la aqane cainöje së. Ame ekö, Paolo la ketre atr ka atreine troa ithanata memine la itre peen, nge ala nyimu la itre hnei nyidrëti hna porotrike memin. Mekune pala kö ni la ketre porotrike nyipine la itre atr ka tha nyi hlue i Iehova kö. Eje hi laka ase hë qaja kowe la itre xa atrene la icasikeu troa hnëkëne la itre hnyinge nyine iajolë. Ngo, ujë jë hi koi angatre la huliwa i angatr. Hnyinge jë hi hnene la ketre ka hape, ka loi kö troa kuci politik, tune la hna majemine kuca ngöne la itre macatre ka nyimutre. Hane hi lai kola angazone la hni ne la itre peen. Sesëkötre ju hi hun laka, aca tro pi ju hi la itre laam, nge umuthe ju hi tune lai la icasikeu. Eahuni pë hë a atre ngöne la itre macatre thupen ka hape, hna ce thë hi hnene la itre peen troa apine la itre laam, e tha eatrëne ju la mekuna i angatr.

ITRE XA AQANE HULIWA I AKÖTRESIE

Treene lao macatre thupene la hnei nyiho hna faipoipo, nge kola hë nyiho troa huliwane la sirkoskripsio. Ka  lolo catre ekö la huliwa i Paolo, matre nango jole e troa kapa la hna ihë. Ngo thupene jë hi la hnei nyiho hna pane mekune hnyawa me ce thith, nyiho hi lai a kapa ju la huliwa cili. Tru catre la madrine i nyiho la nyiho a lapa thene la itre hnepe lapa ka kepe nyiho. Ame e hejihej jidr, eahuni a ce ini Tus, nge thupene lai Paolo a xatuane la itre nekönatre troa kuca la itre qa i angatr, ene lo mathématique. Ketre, ka pi e tusi catre Paolo, matre ame la itre hnei nyidrëti hna e ka ketri nyidrë, nyidrëti a ce thawa ju fe me itre xan. Ame Thupene Hmi, hnei nyiho pala hi hna cainöje ngöne la itre traone ka pë Atre Anyipici Iehova ngön, göi troa hëne la itre atr troa drenge la cainöje hna hnëkëne thatraqane la jidr.

Lue macatre thupene la hnei nyiho hna huliwane la sirkoskripsio, nge kola hë nyiho troa huliwa ngöne la Bethela e Roma. Paolo a huliwa ngöne la biero ne cilë göline la hmi qëmekene la mus, nge hna ami ni troa huliwa ngöne la Hna Kuci Zonal. Tha ka hmaloi kö la troa saze huliwa, ngo ame koi nyiho, eje hi laka, loi e tro pala hi a idrengethenge. Tru la madrine i nyiho e kola goeëne la kola atrune catrëne pala hi la Bethela, memine la kola mana la etrune la itre trejine e Itali. Ame ngöne la ijine cili, ase hë kapa la Itretre Anyipici Iehova hnene la mus e Itali. Tru mina fe la madrine i nyiho ngöne la hna huliwa cili.

Nyiho petre kö a huliwa ngöne Bethela, nge kola ithanatane atrune lo hne së hna mekune göi madra e Itali. Ame lo itre macatre 1980, hna traqa la ketre icilekeu ka tru memine la mus. Hna upezöne menune la lue trefën, Atre Anyipici Iehova pine la hna meci hnene la nekö i nyidro jajiny, ngacama ame lai meci ne madra ka tithi nyën, tre, ka hane fe hi traqa kowe la itre atr ka ala nyimu ne la götrane ngöne gejë ne Méditerranée. Hnene la itre trejine trahmanyi me föe ne la Bethela hna ce huliwa memine la itre avocat ka cilëgöline lai lue trefën Keresiano. Hnene la sine boroshür memine la ketre taane mekune hna hnëkëne mekötine ngöne Réveillez-vous ! hna xatuane la itre atr troa atre hnyawa la nyipici, nge tro fe a xatua angatre troa trotrohnine hnyawa la hna qaja hnei Wesi Ula i Akötresie göi madra. Ame la itre treu cili, 16 pala hi lae hawa ne huliwa Paolo, pëkö hna mano. Nge tru fe la hnenge hna xatua nyidrëti ngöne la itre ijine cili.

KETRE PENGÖNE MELE PENA

Truedre lao macatre thupene la hnei nyiho hna faipoipo, nge kola traqa la ketre ewekë koi nyiho. Kola 41 lao macatreng, nge 49 Paolo la eni a thuemacanyi nyidrëti ka hape, ma ka upune ni. Ame ngöne la ipepa ne cinyanyi mekune i nyidrë (agenda), hmekune lo drai ne eni a qaja la upuneng, öhne ju hi ni la itre hna cinyihane celë: “Thith: Maine eje hi lai, xatua nyiho jë tro pala hi nyiho a pionie, me tha nanazije ngöne la götrane la ua, me xatua nyiho fe troa lue keme me thine ka atreine amamai tulu ka loi. Nge e hune la nöjei ewekë cili, xatua ni jë tro ni a trongëne la itre hnepe mekune ka co qa ngöne lo itre hnenge hna cainöjëne qa ngöne la ita ne cainöj, ngöne lo 30 lao macatre ka ase hë.” Öhne hë ni laka, ase hë Iehova sa la thithi Paolo, me eni fe.

Hnene la traqa i Ilaria hna saze la aqane mele i nyiho. Eje hi laka, hna traqa koi nyiho la itre ijine kola nango kucakuca ngacama atre hi nyiho la hna qaja ngöne Ite Edomë 24:10 ka hape: “E eö a kucakuca ngöne la  drai ne aköt, te, co hi la tenge cate i ’ö.” Ngo hnei nyiho pe hna itö ixatua, me mekune catrëne la eloine la troa ithuecatrekeu.

Canga saqe Ilaria hi qaja la madrine i nyën pine la hna hnaho nyën hnene la lue Atre Anyipici Iehova ka cainöje ngöne la drai ka pexej. Tha drenge kö nyën ka hape, hna nue menu nyëne pe hi, ke, hnei nyëne hna tru ngöne la nyipi aqane mele ne la hnepe lapa. Ngöne la drai, eni a thupë nyën. Nge ngöne la hej, Paolo a traqa, ngacama tha fenesi kö la itre huliwa i nyidrë, ngo hetre traeme i nyidrëti pala hi troa ce elo me nyën, me xatua nyëne troa kuca la itre qa i nyën. Hnei nyidrëti hna kuca tune lai, ngacama atre hi ka hape, ka tro pë hë nyidrëti lai a hlë jidr uti hë e 2 h maine 3 h troa afenesine la itre huliwa i nyidrë. Ame la trenge ithanata hna majemine qaja hnei Ilaria, tre, “Kakati la sineenge hniminang.”

Eje hi laka, loi e tro hi a ca jëne la itre ewekë hna amekötin, nge e ase hë qaja, the saze mekune hmaca kö; itre ewekë lai nyine kuca göi troa xatua Ilaria troa melëne la nyipici. Mekune pala kö ni la nyëne a ce elo memine la ketre sinee i nyën, nge hna ngazo la thiina i nyëne kow. Nyiho pë hë a qeje pengöne jë koi nyën jëne la Tusi Hmitrötre la kepine matre tha ka loi kö la aqane ujë cili. Hnei nyiho hna tro sai nyëne troa sipu qeje menu kowe lai sine ce elo i nyëne qëmekei nyiho.

Hnei Ilaria fe hna qaja la etrune la ole i angeice pine la aja ka eje thene la keme me thine i angeice troa cainöje trootro. Ame enehila, faipoipo hë angeic, nge trotrohnine hnyawa ha angeice la enyipiewekëne troa drengethenge Iehova me xötrethenge la itre hnei Nyidrëti hna amekötin.

IDRENGETHENGE NGÖNE LA ITRE IJINE HLEUHLEU

Ame lo macatre 2008, atre jë hi Paolo ka hape, hna tithi nyidrë hnei mec, kolo kaser. Ame ngöne la xötrei, hna mekune ka hape, atreine hi Paolo troa mele fë la meci cili, nge tru la hnei nyidrëti hna ithuecatreng. Hne huni hna thele la itre nyin ka sisitria thatraqane lai mec, nge hne huni fe hna thithi pala hi koi Iehova, me sipone la ixatua ka ijije troa atreine melëne la itre drai ka troa xulu. Ngo eni pena a öhnyi nyidrë, ketre thupëtresiji ekö ka fetra etin me ka huliwa catr, a kolo hmaca pena ha ae trootro la ngön. Ketre akötre atraqatre koi huni la kola meci hnei nyidrëti lo macatre 2010. Ngo hna akeukawanyi ni hmaca la eni a mekune la aqane ce huliwa i nyiho ngöne lo 45 lao macatre ka ase hë. Hnei nyiho pala hi hna hamë Iehova la hnei nyiho hna atrein. Atre hi ni ka hape, ame la huliwa i nyiho, tre ka loi nge ka huti la thangan. Eni a treqene hnyawa la ijine tro Paolo a mele hmaca, tune lo hna qaja hnei Iesu ngöne Ioane 5:28, 29.

Ame e kuhu hning, eni pala hi lo nekönatre jajinyi ekö ka pi drenge la kola qeje pengöne la aqane mele i Noa. Tha saze pi kö la mekunang. Tro pala hi ni a drengethenge la hnei Iehova hna upi ni troa kuca. Eje hnyawa hi koi ni ka hape, ame la itre itupath, me itre ewekë hne së hna huujëne koi Iehova, me itre ewekë hna nuetrije pe, tre, ceitu me pëkö hune la itre manathithi ka tru hne së hna kapa qaathene la Akötresie, Atre hnimi së. Hnenge hna melëne la itre ewekë cili, nge epi tro fe nyipunie a hane mele tun.

[Iatr ne la götran 3]

[Iatr ne la götran 4]

Drai ne faipoipo

[Iatr ne la götran 4]

Madrine catre nyiho troa itronyi memine la itre thöth, ke, ame koi Paolo, e iöhnyi mina angatr, angatr a troa feni balo

[Iatr ne la götran 5]

Ka tru koi Paolo la huliwa i nyidrë ngöne la Bethela

[Iatr ne la götran 5]

Hna majemine qaja hnei Ilaria ka hape, “Kakati la sineenge hniminang”

[Hna cinyhan ne la götran 6]

“Ame e kuhu hning, eni pala hi lo nekönatre jajinyi ekö ka pi drenge la kola qeje pengöne la aqane mele i Noa. Tha saze pi kö la mekunang”

[Iatr ne la götran 6]