Nue Pi La Ihaji Iehova Troa Xome Ameköti Epun
Nue Pi La Ihaji Iehova Troa Xome Ameköti Epun
“Tro cilieti a e ni hnene la eamo i cilie, nge thupene lai tro cilieti a xomi ni kowe la lolo.”—SAL. 73:24.
NEMENE LA AQANE TRO NYIPUNIETI A SA?
Nemene la ka amamane ka hape, tha hnei Iehova kö hna musinëne la atr troa xome ameköti angeice hnei Nyidrë, nge tha ka iwangatrehmekunyi atr kö Nyidrë?
Pine nemene matre kola akeukawane la hni së la easa atre ka hape, Iehova a ietra qa ngöne la ewekë hnei Nyidrëti hna mekune troa kuca?
Nemene la nyine tro sa kuca ngöne la kola ameköti së me haji së hnei Iehova?
1, 2. (a) Nemene la nyine tro sa kuca matre loi la aqane imelekeu së me Iehova? (b) Nemene la aqane tro sa kepe thangane la itre tulu qa hnine la Tusi Hmitrötre ka amamane la aqane ujë ne la itre atr kowe la ihaji Akötresie?
“AME ni, loi koi ni troa eashenyi Akötesie ; ase hë ni lapaune koi Joxu Iehova.” (Sal. 73:28) Nemene la ka upe la atre cinyihane la salamo celë troa cinyihane la trenge ewekë celë ka amamane la mejiune i angeice koi Akötresie? Qëmekene tro angeice a cinyihan, hnei angeice hna pane goeëne la tingetinge ne la itre atr ka ngazo, ame hna ngazo ju la hni angeic. Öni angeice jë: “Nyipici gufa kö la hnenge hna nyidrawane la hning, me kölaime ngöne la thina ka pë ethan.” (Sal. 73:2, 3, 13, 21) Ngo lö jë hi angeice kowe “la ēnē i Akötesie,” ame hnei angeice hna saze la aqane waiewekë i angeic, nge angeice hë lai a lapa qale catre ju koi Akötresie. (Sal. 73:16-18) Hetre ini hna melen hna xome hnene la atre cinyihane la salamo celë: Maine tro la ketre atr a ajane troa imelekeu hnyawa me Iehova, loi e tro angeice a hane sine la lapa i Akötresie me kapa me trongëne la itre hna amekötine hnei Nyidrë.—Sal. 73:24.
2 Aja së troa imelekeu hnyawa memine la nyipi Akötresie. Celë hi matre, mele së la troa kapa la itre hna amekötine me ihaji qaathei Nyidrë. Aqane xome ameköti së lai hnei Iehova, ene la Nyidrëti a xatua së troa traqa kowe la atr hmekune la aja i Nyidrë. Ame ngöne la itre ijine hnapan, hnei Akötresieti hna amamane la utipine i Nyidrë kowe la itre atr me itre nöj, ene ngöne lo Nyidrëti a aijijë angatre troa kapa la ihaji Nyidrë. Hna cinyihane la itre tulu cili ngöne la Tusi Hmitrötre “nyine ini shë” me “nyine eamo shë” ngöne la itre drai ne la pune celë. (Rom. 15:4; 1 Kor. 10:11) Tro la tane mekune celë a ithanatane la itre xa tulu cili. Tro sa ce wange la aqane meku ewekë i Iehova memine la aqane tro sa kepe thangane qa ngöne la hnei Nyidrëti hna xome ameköti së.
IEHOVA A HULIWANE LA MUSI NYIDRË TUNE LA ATRE XUPI INEGE
3. Ame ngöne Isaia 64:8 me Ieremia 18:1-6, nemene la aqane qeje pengöne Tusi Hmitrötre la musi Akötresie hune la itre atr? (Wange ju la pane iatr.)
3 Hnene la Tusi Hmitrötre hna aceitunë Iehova memine la atre xupi inege, pine laka, Nyidrëti la Atre musi hune la nöjei atr me nöjei nöj. Öni Isaia 64:8: “Enehila enëtilai la Tetetro i nyihunie, eëhuni la dro ka fed, nge enëtilai la ate xupi inege, nge eëhuni asëjëihë la huliwa ne la lue themie i enëtilai.” Hnene la atre xupi inege hna kuca la mekuna i angeice kowe la dro ka fedr. Tha dro ka fedre kö la ka troa qaja kowe la atre xupi inege la huliwa i angeic. Ka ceitune hnyawa hi lai göne la atr me Akötresie. Tha qanyi së kö troa qaja koi Akötresie la aqane tro Nyidrëti a xome ameköti së, ka tune fe la dro ka fedr, tha tro kö ej a qaja kowe la atre xupi inege la pengöne la inege nyine tro angeice a kuca.—E jë la Ieremia 18:1-6.
4. Hnei Iehova kö hna musinëne la itre atr me itre nöje troa kapa la aqane xome ameköti angatre hnei Nyidrë? Pine nemen?
4 Hnei Iehova hna xome ameköti Isaraela ceitu me ketre atre xupi inege a xupe la dro ka fedr. Ngo nemene la isa pengöi Iehova memine la atre xupi inege? Hnei Iehova hna hamëne kowe la itre atr me itre nöje la ketre ahnahna ka ketre pengön, ene la troa atreine ië ewekë, kola hape, Nyidrëti a aijijë angatre troa isa amekötine la itre sipu aja i angatr. Tha hnei Nyidrëti kö hna kuca la atr matre loi itre xan, nge ngazo itre xan. Tha hnei Nyidrëti pena kö hna huliwane la musi Nyidrë troa musinëne la itre atr troa drei Nyidrë. Ngo, sipu qanyine kö la itre atr iëne troa nue Iehova Atre Xupi angatre troa xome ameköti angatr.—E jë la Ieremia 18:7-10.
5. E tha nue Iehova kö hnene la atr troa xome ameköti angeic, tro ju hë Nyidrëti a kuci nemen kowe la atr?
5 Nemene la nyine troa kuca maine troa xele hnene la ketre atr ka catre he troa nue Iehova lo Atre Xupi Inege Ka Tru troa xome ameköti angeic? Nemene la aqane tro Iehova a huliwane la musi Nyidrë tune la atre xupi inege? Maine jole kowe la atre xupi dro troa kuca la ketre inege hmekune la aja i angeic, tro angeice lai a kuca hmaca pena ha la ketre pengöne inege, maine tro pena angeice a trij. Kola traqa la pengöne cili pine laka, ame la atre xupi inege, tha maca ju kö angeice troa eatrëne la aja i angeic. Ngo ame Iehova, hnei Nyidrëti pala hi hna xome amekötine la itre atr thenge la aja i Nyidrë. (Deu. 32:4) Maine tha hnene kö la ketre atr hna nue Iehova troa xome ameköti angeic, tre, zöne hmekuje hi lai atr. Iehova a amekötine la atr thenge la aqane ujë i angeice ngöne la Nyidrëti a xome ameköti angeic. E tro la atr a drengethenge Iehova, tro angeic a nyipi ewekë koi Nyidrë. Ka tune hi lo itre Keresiano hna iën, angatre la itre “ge nyine loi,” ene lo itre “ge ne ihnim.” Ngo ame la atr ka xele ma kapa la itre hna amekötine hnei Akötresie, tro angatr a itre ge “nyine ngazo” ka pëkö eloin.—Rom. 9:19-23.
6, 7. Nemene la isa aqane ujë i Davita Joxu me Saulo Joxu, lo kola haji nyidro hnei Iehova?
6 Ame la ketre aqane xome amekötine la atr hnei Iehova, tre, ene la Nyidrëti a hamë angeice la itre hna amekötine me itre ihaji. Pane mekune jë së lo Iehova a xome amekötine lo lue pane joxu i angetre Isaraela, ene Saulo me Davita. Hetre pune ka ngazo koi Davita Joxu me itre xane ju qa ngöne lo hnei nyidrëti hna nyixetë me Batheseba. Ngacama ame Davita tre, joxu, ngo catrehnine la aqane haji nyidrë hnei Iehova. Hnei Akötresieti hna upi Nathana perofeta fë la itre trenge ithanata ka catre troa haji Davita. (2 Sam. 12:1-12) Nemene la aqane ujë i Davita? Tru la hleuhleu i nyidrë pine la hnei nyidrëti hna kuca. Haawe, hnene laka ka nyipi ietra Davita, ame hnei Akötresieti hna kepe nyidrëti hmaca ju.—E jë la 2 Samuel 12:13.
7 Tha tui Saulo Joxu kö; tha hnei nyidrëti kö hna drenge la itre hna amekötin. Hnei Iehova hna upi Samuela troa qaja koi Saulo Joxu troa humuthe la nöjei atr asë, me nöjei öni asë ka mele ngöne la nöje ne la angetre Amaleka. Ngo tha hnei Saulo kö hna drengethenge la hna amekötine hnei Iehova. Hnei nyidrëti hna nue amele Agaga, memine fe la itre öni ka loi me ka pipixenyë. (1 Sam. 15:1-3, 7-9, 12) Celë hi matre Iehova a upi Samuela troa haji Saulo. Maine ju tro hi Saulo a drenge la kola haji nyidrë, me kapa la Iehova a xome ameköti nyidrë. Ngo hnei Saulo pe hna xele ma dreng. Kola mekune ka hape, hetre sipu kepine koi nyidrë matre tha nyipi ewekëne pi la itre hna amekötine hnei Iehova. Hnei nyidrëti hna qaja ka hape, nyine huujëne troa nyi ahnahnane koi Iehova la itre öni cili. Ame hnei Akötresieti hna triji Saulo qa ngöne la hna nyijoxu, nge qaane ju hi lai tha loi hmaca kö la aqane imelekeu Saulo me Akötresie.—E jë la 1 Samuela 15:13-15, 20-23.
AKÖTRESIE KA THA IWANGATREHMEKUNYI ATR KÖ
8. Nemene la ini nyine tro sa xome qa ngöne la aqane ujë i angetre Isaraela lo kola xome ameköti angatre hnei Iehova?
8 Hnei Iehova mina fe hna aijijëne la itre nöje troa drengethenge Nyidrë. Thupene la hnei Nyidrëti hna thepe angetre Isaraela qaa Aigupito lo macatre 1513 M.P.K., a ame hnei angatre hna nöje ka sisitria koi Iehova. Ame hna xecie e kuhu hni Akötresie troa xome ameköti angatr. Ngo tha hnene kö la nöje hna drengethenge la kola xome ameköti angatr, nge angatre a kuca catrëne ju la itre ewekë ka ngazo xajawai Iehova. Hnei angatre mina fe hna nyi hlue ne la itre haze ne la itre nöje ka lapa xötreithi angatr. Nyimu ijin, hnei Iehova hna upe la itre perofeta kowe la angetre Isaraela göi troa xatua angatre troa ujë qa ngöne la itre huliwa i angatre ka ngazo, ngo xele kö angatre ma drenge la itre ithuemacanyi qaathene la itre perofeta. (Iere. 35:12-15) Pine laka tha hnei angatre kö hna drengethenge Iehova, ame hnei Nyidrëti hna axulune koi angatre la wameuce ne ihaji. Hnene la angetre Asuria hna lepe apatrene la baselaia i Isaraela götrane kolopi. Ame fe e thupen, hnene la angetre Babulona hna thapa la baselaia i Iuda götrane kolojë. Hetre ini ka tru e celë thatraqa së. Tro ha hetre thangane ka loi koi së la kola xome ameköti së hnei Iehova e tro sa drengethenge hnyawa la aqane ameköti së hnei Nyidrë.
9, 10. Nemene la hna kuca hnene la angetre Nineve la kola kapa la ithuemacanyi qaathei Iehova?
9 Hnei Iehova fe hna aijijëne la angetre Asuria, ene lo traone e Nineve troa drengethenge la itre ithuemacanyi qaathei Nyidrë. Öni Iehova koi Iona: “Cileja tro Nineve eë, la lapa atraqat, me cainöje kow’ ej, ke xulu hë qëmekenge la ngazo i angat.” Ase hë Iehova mekune troa apatrene triji Nineve, ke, tru la ngazo ne la itre atr e cili.—Iona 1:1, 2; 3:1-4.
10 Hnei Iona hna qaja kowe la itre atr la maca i Akötresie, ame hnei angatre hna “kepe Akötesie.” Hnei angatr asë hna amamane la ietra i angatr; hnei angatre hna tha xen, me xetrë ibëek. Hnene fe la joxu hna “mejë qa hune la therone i nyidë, me unapi la ixete i nyidë, me hetë nyidëti kö hnei mano ka tru thenyin, me lapaju ngöne la hnatesij.” Hnene la angetre Nineve hna nue angatre kö matre xome ameköti angatre hnei Iehova, nge hnei angatre hna ietra ju. Ame la thangane lai, tha apatrenyi angatre ju kö.—Iona 3:5-10.
11. Nemene la ini hne së hna xome qa ngöne la isa aqane ujë i Iehova kowe la angetre Isaraela me angetre Nineve?
11 Ngacama nöje ka sisitria Isaraela koi Iehova, ngo hnei Nyidrëti hna hajine me ameköti angatr. Tha nöje ka sisitria kö angetre Nineve koi Iehova, ngo hnei angatre hna drengethenge la kola xome ameköti angatre hnei Nyidrë. Celë hi matre hnei Iehova hna kepe angatre hmaca ju, nge tha apatrene triji angatre ju kö hnei Nyidrë. Tha ka iwangatrehmekunyi atr kö Iehova, ke, Nyidrëti a amekötine la atr thenge la itre huliwa i angeic.—Deu. 10:17.
ATRE KÖ IEHOVA LA IJINE TROA UJË LA MEKUNA I NYIDRË
12, 13. (a) Pine nemene matre ujë jë la mekuna i Akötresieti kowe la atr thenge la aqane ujë i angeice la kola xome ameköti angeice hnei Nyidrë? (b) Nemene la aliene la hna qaja ka hape Iehova a “ietrane” göi Saulo me göi Nineve?
12 Kola ujë la mekuna i Iehova thenge la aqane saze la huliwa ne la itre atr. Hanawange la ketre ceitun, kola qaja koi së hnene la Tusi Hmtrötre ka hape, hnei Iehova hna ietrane la hnei Nyidrëti hna acili Saulo joxu ne Isaraela. (1 Sam. 15:11) Nge ame hë la angetre Nineve a ietrane la itre thiina i angatre me hmaca qa ngöne la itre aqane ujë i angatre ka ngazo, önine hmaca jë hi la Tusi Hmitrötr: “Hnei Akötesie hna ietrane la ngazo lo hnei nyidëti hna ulatine troa kuca koi angat, mate tha kuca kö.”—Iona 3:10.
13 Ame la Tusi Hmitrötre a qaja ka hape Iehova a “ietrane,” kolo lai a hape, kola ujë la mekuna i Nyidrëti göne la ketre atr, maine pena kola ujë la mekune hnei Nyidrëti hna ajane troa kuca. Hna kepe Saulo ekö hnei Iehova. Ngo tha idrei pi hi Saulo, xome triji Saulo jë hi hnei Nyidrëti qa ngöne la hna nyijoxu. Ame la kola xome triji Saulo, tre tha Iehova kö la ka tria la Nyidrëti a ië joxu, ngo Saulo pe la ka tha idrei. Nge ame la angetre Nineve a ietra, saqei Iehova hi ujë qa ngöne lo hnei Nyidrëti hna mekun, ame hnei Nyidrëti hna nue amele angatr. Keukawa jë fe hi la hni së la easa atre ka hape, ka lolo Iehova me ka utipin, nge saqei Nyidrëti hi ujë qa ngöne la hnei Nyidrëti hna mekun troa kuca e tro la atr a hmaca qa ngöne la itre huliwa i angeic!
THE NUETRIJE KÖ LA IHAJI QAATHEI IEHOVA
14. (a) Nemene la hnei Iehova hna huliwane nyine troa xome ameköti së enehila? (b) Nemene la nyine tro sa kuca ngöne la Akötresieti a xome ameköti së?
14 Jëne la Tusi Hmitrötre memine la organizasio i Nyidrë, Iehova enehila a xome ameköti së. (2 Tim. 3:16, 17) Easa madrine la easa kapa la aqane hamëne koi së hnei Nyidrëti la itre hna amekötine me itre ihaji. Maine itre ka bapataiso hë së qaane ekö, maine itre trene hnëqa pena hnine la ekalesia, ngo tro pala hi sa drengethenge la itre hna amekötine hnei Iehova. Maine hne së hna ujë thenge la aqane xome ameköti së hnei Iehova, tro hë së lai a traqa kowe la pengöne atr ka ihmeku memine la aja i Nyidrë.
15, 16. (a) Nemene la hna drenge hnene la atr ngöne la kola ami angeice qa ngöne la itre hnëqa ngöne la ekalesia? Hamëne pi la ketre ceitun. (b) Nemene la ka xatua së troa elë hune la hmahma, me hluehleu ngöne la kola hajine me ameköti së?
15 Nemene la aqane haji së hnei Iehova? Nyidrëti a ini së la itre ewekë nyine tro sa kuca koi Nyidrë, nge Nyidrëti fe a amekötine la itre mekuna së. Ame itre xa ijin, ka loi e troa pane hajine catrë së pine laka hne së hna kuca la ketre ewekë ka ngazo catr. Ame la pune ka ngazo, tro sa aluzine la itre hnëqa së ngöne la ekalesia. Tro sa pane ce wange la pengöne la ketre qatre thupe Denis b la ëjen. Hna pane hajine me ameköti angeice hnene la hna tria la aqane huliwa i angeice ngöne la huliwa ne thele mani. Nemene la pengöi Denis la jidri thupene la hna cile fë ka hape, tha qatre thupe hmaca kö angeic? Öni angeic, kösë ketre ewekë ka akötrëne la meleng. “Ngöne la 30 lao macatre ka ase hë, hnenge hna hetrenyi la itre hnëqa ka nyimutre. Hnenge hna pionie lapa, me huliwa ngöne Bethela, nge hna acili ni troa drikona, nge thupene lai qatre thup. Eue hi lo, hnenge fe hna cile fë la pane cainöjenge ngöne la asabele ne distrik. Aca patre hi la nöjei ewekë cili.” Tru la hmahma i angeic, nge hleuhleu la hni angeic, nge angeice a mekune ka hape, tro hmaca jë kö elanyi la a hane nyipi ewekë angeice ngöne la organizasio.
16 Nyipi ewekë tro Denis a saze la aqane ujë i angeic. Ngo nemene la ka xatua angeice matre elë hune la hmahma, me hleuhleu? Hnei angeice hna axeciëne tro hmaca a inine la Tusi Hmitrötr, me cainöje trootro pala hi, me sine asë la itre icasikeu. Ka tru catre koi angeice la itre ixatua qaathene la itre trejin, me itre itusi së. Öni angeic: “Ame lo tane mekune hna hape, ‘Ijiji Epuni Hmaca Kö Troa Kapa La Itre Hnëqa?’ ngöne la Ita Ne Thup ne 15 Ogas 2009 (qene Wiwi), tre, kösë ketre tusi hna upe mekötine koi ni nyine sa la itre thithing.” Hnei Denis hna inine jëne lai tane mekune celë ka hape, loi e tro angeice a xomi ijine göi troa acatrene catrëne la aqane imelekeu i angeice me Iehova. Hetre thangane ka loi hnei angeice hna kapa qa ngöne la hna hajine me ameköti angeic, nge itre hnepe macatre thupen, kolo hmaca ha a acili angeice troa drikona.
17. Nemene la enyipiewekëne la kola upetröneëne la atre kuca la ngazo? Hamëne pi la ketre ceitun.
17 Ame la kola upetröneëne la atr, tre, kolo lai a haji angeice hnei Iehova. Ihaji lai nyine thupëne la ekalesia wanga apui ngazone jë hnene la atre kuca la ngazo, nge aqane tro fe lai a xatua angeice troa ietra. (1 Kor. 5:6, 7, 11) Hna upetröneë Robert ekö, 16 lao macatre ne angeice e tröne la ekalesia. Ame la itre macatre cili, hnene la keme me thine i angeic, me itre trejine me angeic, hna trongëne hnyawa la itre hna amekötine hnene la Tusi Hmitrötr, nge tha hnei angatre pi kö hna ce mele me angeic, nge tha ibozu fe me angeic. Hna kepe Robert hmaca ha lo itre macatre ka ase hë, nge lolo la mele i angeice hnine la ekalesia. Öni angeice e qeje pengöne ka hape, ame la ka xatua angeice troa bëeke hmaca kowe la nyipici thupene la itre macatre ka nyimutre, tre, hnene la lapa i angeice hna xele ma ce mele me angeic. Öni angeic, maine hnene ju la hnepe lapa i angeice hna ce mele me angeice ngöne la itre hnepe ijine ka xoxopatre hi, maine tro pena a thele troa hnyingëne koi angeice la pengöi angeic, tha tro kö angeice lai a drenge ka hape, nanyi hë angeice qaathei angatr. Celë hi la ka xatua angeice lai troa hmaca koi Iehova, me kowe la nöje i Nyidrë.
18. Nemene la aqane tro sa ujë e xome ameköti së jë hnei Akötresie?
18 Maine jë ame enehila, tha nyipi ewekë kö troa ameköti së tune lai. Ngo loi pe e tro sa mekune la aqane tro sa ujë elanyi e xome ameköti së ju hnei Akötresie, ene la kola hajine me ameköti së. Tro kö së lai a kapa la kola ameköti së, tui Davita? Maine pena tro sa trije tui Saulo? Iehova, Atre Xupi Inege Ka Tru, la Tretretro së. The tro pi kö sa thëthëhmine laka, “ame lo hnei Iehova hna pune hnim, te, nyidëti a hajin, tune la keme a hajine la kuku hnei angeice hna madin.”—Ite edomë 3:11, 12.
[Ithueamacany]
a Ame la aliene la M.P.K., ke, kola hape “Ite macate ka pate pete kö Keriso.”
b Hna saze la itre ëj.
[Thying]
[Iatr ne la götran 24]
[Iatr ne la götran 26]
Hnei Saulo hna tha nyipi ewekëne me trije la itre hna amekötin. Xele kö nyidrëti ma drenge la kola xome ameköti nyidrë (Wange ju la paragarafe 7)
Tru la hleuhleu i Davita, ame hnei nyidrëti hna kapa la hna amekötin. Hnei nyidrëti hna nue Akötresieti troa xome ameköti nyidrë. Tune kaa fe epun? (Wange ju la paragarafe 6)
