Itre Hnyinge ne la Itre ka e

Drei lo itre “nekö i Akötesie” hna qaja ngöne Genese 6:2, 4 qëmekene lo Iwë Ka Tru?

▪ Hetre sipu kepine matre kola qaja ka hape, ame la hna ithanata celë tre, kola qaja lo itre nekö i Akötresie. Ngo nemene la enyipicin?

Kola e ngöne la qaane la xötre celë ka hape: “Öhnë hë la nöjei nekö i Akötesie la ite neköne la nöjei ate jajinyi laka lolo angat ; ame hnei angate hna xome nyine ite fö’ i angate lo hnei angate hna isa ajan.”—Gen. 6:2.

Ame la hna ithanata hna hape “ite nekö i Akötesie,” tre, celë hi ka mama ekö ngöne la itre hna cinyihane panëne qene Heberu tune ngöne la Genese 6:2, 4; me Iobu 1:6; 2:1; 38:7; me Salamo 89:6. Nemene la hna amamane hnene la itre xötre celë lo hna ithanata hna hape, “ite nekö i Akötesie”?

Mama hnyawa hi laka, ame lo “ite nekö i Akötesie” hne së hna e ngöne Iobu 1:6, kolo hi lo itre u hna xup e hnengödrai, angetre ce icasikeu xajawa i Akötresie. Satana fe hi e nyipi angatr, kola traqa qa “hna nyenyapëne la fen.” (Iobu 1:7; 2:1, 2) Ka ceitu hi memine lo hne së hna e ngöne Iobu 38:4-7, kola hape “ite nekö i Akötesie” a “ce hë madine,” lo ijine Akötresie a “amë la etë nyine xomexöte” ne la ihnadro. Itre angela, nekö i Akötresie angatr, ke, tha ase pala kö xupe la itre atr ngöne la ijine cili. Eje hi laka, ame la itre “nekö i Akötesie” hna qaja ngöne Salamo 89:6, hna hape “nekö i haze” ngöne la Tusi Hmitrötre qene Drehu, tre kolo itre xupuna i Akötresie e hnengödrai, tha itre atr kö.

Drei lo lai “nekö i Akötesie” hna qaja ngöne Genese 6:2, 4? E troa tro thenge lo itre xötre ne la Tusi Hmitrötre hne së hë hna ce wang, eje hi laka, ame la itre hna qaja e cili, tre, kolo itre u, ene lo itre nekö i Akötresie ka uti ekö qa hnengödrai kowe la fen.

Jole koi itre xane troa mekune ka hape, ka ajane fe la itre angela troa kuci ngazo. Kola amamane hnene la trenge ithanata i Iesu ngöne Mataio 22:30 ka hape, ame la faipoipo, me ce meköle trefën, tre, tha itre ewekë kö nyine troa hane kuca e hnengödrai. Ngo ame pe, hnene lo itre angela hna nyi ngönetrei ne atr, me ce xen, me ce ije memine la itre atr. (Gen. 18:1-8; 19:1-3) Celë hi matre, ijije hi tro sa mekune ka hape, e xomi ngönetrei ne atr hë, atreine hi angatre lai troa hane kuci ngazo me itre föe.

Hetre itre mekune qa hnine la Tusi Hmitrötre ka amamane ka hape, hnei angatre hna kuca la itre ewekë cili. Hnei Iuda 6, 7 hna aceitunëne la ngazo ne la angetre Sodoma ka weje la itre aja i ngönetrei, memine la ngazo ne “la nöjei angela angete tha cile huti ngöne la aqane joxu angat, ngo hna nue tije la nyipi hnalapa i angat.” Ame la ewekë ka ceitu hnei itre angela me angetre Sodoma hna kuca, tre, ene la kola “kuci ngazo, me xöte thenge ite xa ngönetei kö.” Ame la ketre mekune ka ceitu memin, tre, eje ngöne 1 Peteru 3:19, 20, kola ihmeku memine la hna kuca hnene la itre angela ka tha idrei ngöne lo “ijine i Noa.” (2 Pet. 2:4, 5) Celë hi matre, ame la aqane ujë ne la itre angela ne la ijine i Noa, tre, ka tune hnyawa hi la ngazo ne la angetre Sodoma me Gomora.

Troa hetre aliene la itre mekune celë, e tro sa mekune ka hape, ame la “ite nekö i Akötesie” hna qaja ngöne Genese 6:2, 4, tre kolo itre angela ka xomi ngönetrei ne atr, göi troa kuci ngazo me itre föe.

Tusi Hmitrötre a qaja ka hape, hnei Iesu hna “cainöje kowe la nöjei u hnine la kalabus.” (1 Pet. 3:19) Nemene la aliene lai?

▪ Hnei Peteru aposetolo hna wangatrehmekune la itre u cili, ene “lo angete tha idei ekö, ngöne la ijine hna teqene hnene la xomihni ahoeanyi Akötesie ngöne la ijine i Noa.” (1 Pet. 3:20) Mama hnyawa hi la ka hape, Peteru a qaja lo itre u hna xup, angetre ce tro me Satana ngöne la icilekeu. Hnei Iuda hna qaja la itre angela ka “tha cile huti ngöne la aqane joxu angat, ngo hna nue tije la nyipi hnalapa i angat,” nge öni Iuda hmaca jë, Akötresieti “a thupë angate hna othe ngöne la jidi ka epine palua, uti hë e troa amekötine ngöne la drai atraqat.”—Iuda 6.

Hna tha idrei tune kaa la itre u hna xup ngöne la hneijine i Noa? Qëmekene la Iwë Ka Tru, hnene la itre u ka ngazo hna xomi ngönetrei ne atr; ewekë lai tha hnei Akötresieti kö hna amekötine koi angatr. (Gen. 6:2, 4) Ketre mina, ame la itre angela a kuci ngazo memine la itre föe, tre, angatre a kuca la itre ewekë ka tha ijiji angatre kö. Tha hnei Akötresieti kö hna xupe la itre u matre troa hane ce meköle trefëne memine la itre föe. (Gen. 5:2) Tro Akötresieti a apatrene la itre angela ka tha idrei ngöne la ijine hnei Nyidrëti hna amekötin. Ngo ame enehila, öni Iuda, angatre a ilapa treqe ngöne “la jidi ka epine palua,” ene la kalabus ngöne la götrane u.

Eue nge tune kaa la aqane cainöje Iesu kowe la itre “u hnine la kalabus”? Tune la aqane cinyihane Peteru göi Iesu, hna traqa lai thupene lo “hna amelene ene la u.” (1 Pet. 3:18, 19) Kolo fe a qaja hnei Peteru ka hape, hnei Iesu “hna . . . cainöje.” Hna amamane hnene la aqane cinyihane la trenge ewekë celë “hna . . . cainöje,” laka ketre ewekë hna kuca ha la ijine Peteru a cinyihane la pane tusi angeic. Haawe, kola mekune ka hape, ame la ijine nyidrëti a qaja koi angatre la pune nyine tro angatre a kapa pine la ngazo i angatr, tre e thupene hë la melehmaca i Iesu. Ame la maca celë, tre tha nyine tro kö a hamë mejiune i angatr, ngo kolo pe a ëji angatr. (Iona 1:1, 2) Thupene hë la Iesu a amamane la lapaune me nyipici Nyidrë uti hë la mec, nge mele hmaca ha nyidrë, itre ewekë lai ka amamane ka hape, pëkö hune i Diabolo hui Iesu, nge nyidrëti la ka ijije troa qaja la iëji celë.—Ioane 14:30; 16:8-11.

Ngöne la itre drai ka troa xulu, tro Iesu a othe me kuië Satana me itre angela ka xötrethenge angeic kowe la hnaop. (Luka 8:30, 31; Hna ama. 20:1-3) Ngo qëmekene lai, kola ilapa treqe hnene la itre u ka tha idrei ngöne la jidri ka epine palua ngöne la götrane u, nge eje hi laka, tro ha apatrene palua angatr.—Hna ama. 20:7-10.