Itre Qatre Thupe Fe, Ithuecatrene Kö Epuni La Itre “Ate Asë Ka Kucakuca”?

Azela, a la ketre trejine föe ka 30 lao macatren, nge ka pë föen, nge kola nango jole la mekuna i angeic, ke, angeic a treqene la itre qatre thup. Tro jë angatr a qeje nemen? Eje hi laka tru hnei icasikeu hnei angeice hna trian, ngo kucakuca catre angeice qa ngöne laka, tru la hnei angeice hna huliwa i maseta, ene la troa thupëne la itre qatr. Nge nyixane hmaca jë kö hnene la itre jole hnei angeice hna melëne e nöjei drai hnene la kucakuca ne la thine i angeic.

Maine epuni ju la qatre thupe ka troa wai Azela, tro epuni a thuecatrene tune kaa lai “ka kucakuca”? (Iere. 31:25) Ngo, nemene la aqane tro epuni a hnëkë matre tro la ketre iwai i qatre thup a ithuecatrene la ketre ka kucakuca?

MEKUNE KÖ LA PENGÖNE LA MELE NE LA ITRE TREJIN

Ame itre xa ijin, tre, kucakuca së qa ngöne la hna huliwa i maseta, maine qa ngöne la hnëqa së ngöne la huliwa i Akötresie. Tui Daniela perofeta, angeic “a kucakuca,” lo kola kapa la ewekë hna meköle goeën, ngo thatre kö la alien. (Dan. 8:27) Hna xatua angeice hnene la hna mama hnei Gaberiela, angela. Hnene la atre traqa fë maca koi Daniela hna hamë trotrohnine i angeic, me hape, ase hë kapa la itre thithi angeic hnei Iehova, nge “hna hanyi” angeic pala hi. (Dan. 9:21-23) Ame la ketre ijine e thupen, hnene la itre trenge ithanatane hna iëne hnyawa hnene la ketre angela hna thuecatrene la perofeta ka kucakuca.—Dan. 10:19.

Celë hi matre qëmekene troa wange la ketre trejine ka kucakuca, pane thele jë troa atre la pengöne la mele i angeic. Nemene la itre jole ka traqa koi angeic? Nemene la aqane akucakucanyi angeice hnene la itre jole cili? Nemene la itre thiina ka loi i angeic? Öni Richard, ka 20 hë lao macatre ne qatre thup,  ka hape: “Ka tru koi ni la troa thuecatrene la itre trejin. Ame la eni a thele troa atrepengöi angatre hnyawa qëmekene troa iwai, tha jole kö koi ni troa hamëne la ixatua hmekune la aja i angatr.” Maine tro la ketre qatre thup a ce tro me epuni troa wange lai trejin, pane ce wange ju epone la pengöne la mele ne lai trejin.

ITHANATA NYINE FE LA HNI NE LA TREJIN

Atre hi epuni lo laka, tha ajane kö së troa qeje së. Hanawange la ketre ceitun: Jole kowe la trejine troa fe la hni angeice kowe la itre qatre thupe ka iwai. Haawe, nemene la nyine tro epuni a kuca matre fe pi la hni angeic? Troa hetre thangane ka loi koi angatre la troa madrine la iqëmeke i epun, me troa ithuecatre la trenge ithanata i epun. Fotre hë lao macatre ne Mikael a qatre thup, hnei angeice pala hi hna nyiqaane la iwai angeice hnene la trenge ithanata celë: “Atre hi eö, ame la ketre ewekë ka tru koi ni ngöne la eni a qatre thup, tre, ene la troa wange la itre trejine ngöne la hnalapa i angatr, matre troa atre hnyawa la pengöi angatr. Celë hi matre eni pe hi a lapa ngo loi e traqa pi la drai celë matre iöhnyi jë ni me eö.”

Ka loi fe hi tro epuni a nyiqaane la iwai hnei thith. Tune lo hna kuca hnei Paulo, hnei angeice hna thithi fë la lapaune me ihnim me xomihni ne la itre trejine me angeic. (1 Thes. 1:2, 3) Ame la epuni a qaja ngöne la thithi la trenge ithanata ka amamane la thiina ka eje thene lai trejin, epuni hi lai a hnëkëne la hni epun, me hni angeice fe göi troa ifekeune la itre mekune ka ithuecatr. Eje hi laka, troa hetre thangane ka loi la trenge ithanata i epun. Önine la ketre ka hekö hë qatre thup: “Ame itre xa ijin, tha mekune hë së la itre ewekë ka loi hne së hna kuca. Ngo ame la kola amekunë së hnei ketre, ithuecatre së hmaca jë hi.”

CE THAWA JË LA KETRE AHNAHNA NGÖNE LA U

Tui Paulo, ce thawa jë la “kete ihnimi ne u,” ene la ketre ahnahna ngöne la götrane la u, maine pena ce xome jë la ketre mekune qa ngöne la ketre xötr. (Rom. 1:11) Maine  jë hnene la ketre trejine hna mekune ka hape, ka pëkö eloi angeic, tune la atre cinyihane la salamo lo angeice a aceitunë angeice me “tengene timi hna athingën,” a fitre hë. (Sal. 119:83, 176) Thupene jë hi la hna qeje pengöne la mekune celë, qaja amamane jë kowe lai trejine la aqane waipengöi angeice hnei epuni, laka “tha [ase kö angeic] thëthëhmine” la itre wathebo i Akötresie.

Ijije fe troa ketr la hni ne la trejine föe ka nanazije hnene lo ceitune ka qaja lo mani ka patr. (Luka 15:8-10) Ame lai mani cili, tre, ceitu me ketre penina, mo ka tru alameken, nge ka patre qa ngöne la fini penina. Qa ngöne la hna ithanatane la ceitune cili, ijije hi troa xatua angeice troa trotrohnine ka hape, mo ka tru alamekene angeice ngöne la ekalesia. Ase jë hi ithanatane la itre ewekë cili me angeic, amamane hnyawa jë epuni la aqane nyipi ewekë angeice hnei Iehova, ke, angeice fe la ketre neköi mamoe i Nyidrë.

Hetre madrinene la itre trejine me epuni troa qaja la mekune i angatre göne la Tusi Hmitrötr. Haawe, loi e troa nue angatre troa hane ithanata! E ase jë e la ketre xötre ka ihmeku memine la jole ka traqa koi angatr, nyi hatrene ju ngöne la xötre cili, la ketre hna ithanata ka sisitria, maine ketre trenge ewekë, nge sipo angatre jë troa qeje pengön. Hanawange la ketre ceitun, thupene la hna e la 2 Korinito 4:16, tro la qatre thupe a hnyinge ka hape, “Öhne hë eö la aqane ahmadradranyi eö, me thuecatrei eö hnei Iehova?” Tro ha “ce akeukawanyi” angatre hnene la aqane tro fë mekune celë.—Rom. 1:12.

Tro fe epuni a thuecatrene la trejine me epuni jëne la mele ne la ketre atr hnine la Tusi Hmitrötre hna pi ithanatane hnei angeic. Maine jë tro la ketre trejine hna akötrëne la hni a pi qeje Hana maine Epaferodito, itretre mele hleuhleu, ngo ka tru alamekene pala hi xajawa i Akötresie. (1 Sam. 1:9-11, 20; Fil. 2:25-30) E ijij, ithanatane jë fe la itre tulu qa hnine la Tusi Hmitrötr.

THE CILE KÖ TROA NYIPI EWEKËN

Kola mama laka, ka nyipi ewekë la itre trejine koi epun, qa ngöne la hnei epuni pala hi hna nyipi ewekë angatr. (Ite hu. 15:36) E pune hë la iwai, isa pui ju pena me angeice göi troa cainöje trootro. Ame la Bernard, ketre qatre thupe ka hekö hë, a öhne hmaca la ketre trejine hnei angeice hna wange hi eue hi lo, angeice a hnyingëne acone ju me hape, “Hapeu, hetre thangane kö lo ithanata i nyiso?” E tro epuni a nyipi ewekëne la trejine tune la, ijije hi tro epuni a wange ka hape, angeice pala kö a aja ixatua.

Enehila hi la ijin, itre trejine a ajane troa nyipi ewekë angatr, me trotrohni angatr, me hnimi angatr. (1 Thes. 5:11) Celë hi matre, itre qatre thup, qëmekene tro epuni a iwai, loi e tro epuni a thele troa atrepengöne hnyawa la mele ne lai trejine me epuni nge thithi jë thatraqai angeic. Iëne jë la itre xötre ka ihmeku memine la pengöi angeic. Haawe, tro hë epuni a hetrenyi la itre trenge ithanata ka ijije troa thuecatrene la itre “ka kucakuca”!

[Ithueamacany]

[Iatr ne la götran 29]

Qëmekene troa iwai, pane mekune ju la pengöne la mele ne la trejin

[Iatr ne la götran 30]

Hetre madrinene la itre trejine me epuni troa qaja la mekune i angatre göne la Tusi Hmitrötr

[Iatr ne la götran 31]

Loi e tro pala hi a nyipi ewekë angatr