Wangatrune Jë La Lue Thiina i Iehova, Ka Nyipici Me Atre Seng
Wangatrune Jë La Lue Thiina i Iehova, Ka Nyipici Me Atre Seng
“Ke ka loi cilieti, Joxu [Iehova], me ate sheng, me ka mana ihnimi koi angat’ asëjëihë angete hë koi cilie.”—SAL. 86:5.
ATREINE KÖ EPUNI TROA QEJE PENGÖN?
Tro sa nyitipune tune kaa la aqane nyipici Iehova?
Tro sa nyitipune tune kaa la aqane senge Iehova la itre ngazo së?
Pine nemene matre aja së fe tro pala hi a inine la itre thiina Iehova me mele thenge itre ej?
1, 2. (a) Pine nemene matre tro sa wange atrune catrëne la itre sinee së ka nyipici me ka atreine nuetrije la itre tria së? (b) Nemene la itre hnyinge hna sa hnene la tane mekune celë?
NEMENE la aqane tro epuni a qeje pengöne la sipu sinee i epun? Öni Ashley, ketre trejine föe ka hape, ame la nyipi sinee së, tre, ka saqei angeice pala hi xatua së, me nuetrije la itre tria së. Ka tru koi së asë la itre sinee ka tune lai. Angatre a xatua së troa mele tingeting, me troa drenge ka hape, easë la itre hna hnim.—Ite edomë 17:17.
2 Iehova la nyipi Sinee së ka sisitria catr, ka nyipici me Atre Seng. Pengöi Nyidrëti lo hna qaja hnene la atre cinyihane la salamo la kola hape: “Ka loi cilieti, Joxu [Iehova], me ate sheng, me ka mana ihnimi koi angat’ asëjëihë angete hë koi cilie.” (Sal. 86:5) Kola hapeue lai hna hape, troa nyipici me troa seng? Nemene la aqane amamane Iehova la lue thiina cili? Tro sa nyitipune tune kaa la tulu i Nyidrë? Ame hë la easa atre la kola sa la itre hnyinge celë, tro hë lai a acatrene catrëne la ihnimi së kowe la Sinee së ka sisitria catr, Iehova. Nge tro lai a acatrene catrëne fe la aqane imelekeu së me itre trejin.—1 Ioane 4:7, 8.
IEHOVA ATR KA NYIPICI
3. Nemene la aliene la hna hape, troa nyipici?
3 Ame la atr ka nyipici, tre, ene la ka huliwa meköti kowe la hnei angeice hna hnim. Angeice a amamane la ihnimi angeice hnene la aqane catre xatuane angeice lai atr me sajuën. Tha hna kuca hmekuje kö ngöne la itre ijine loi, me ngöne fe la itre ijine jol. Hnene la Tusi Hmitrötre hna qeje pengöi Iehova ka hape, “Meköti [maine, ka nyipici] cilie.” Pëkö Atr ka nyipici tui Nyidrë.—Hna ama. 16:5.
4, 5. (a) Nemene la aqane amamane Iehova ka hape, ka nyipici Nyidrë? (b) Pine nemene matre kola thuecatre së hnene la easa mekune laka, ame Iehova, tre, ka nyipici?
4 Nemene la aqane amamane Iehova ka hape, Akötresieti ka nyipici Nyidrë? Hnei Nyidrëti pala hi hna sajuëne la itre hlue i Nyidrë ka mele nyipici. Hnei Davita Joxu hna qaja atrunyi Iehova pine la aqane nyipici Iehova koi Davita. (E jë la Salamo 101:6.) Ame ngöne la itre ijine Davita a mele hnine la itre itupath, hnei Iehova hna nyipici koi nyidrë lo kola eatrongë nyidrë, me thupë nyidrë, me amele nyidrë. (2 Sam. 22:1) Hnei Davita hna sipu öhne ngöne la mele i nyidrë laka, Iehova a nyipici kowe la itre hlue i Nyidrë, tha hnei hna qaja hmekuje kö, ngo hnei hna kuca, ke hnei Nyidrëti hna xatuane la itre hlue i Nyidrë. Pine nemene matre hnei Iehova hna nyipici koi Davita? Pine laka hnei Davita hna nyipici koi Nyidrë. Iehova a hnime la itre hlue i Nyidrë pine la aqane nyipici angatr, nge ka nyipici pala hi Nyidrë kowe la atre nyipici koi Nyidrë.—Ite edomë 2:6-8.
5 Ame la easa goeëne la aqane nyipici Iehova kowe la itre hlue i Nyidrë, thuecatre së jë fe hi. Hnei Reed, ketre trejine trahmanyi ka mele nyipici, hna qaja ka hape, aja i angeice catre troa e la aqane xatua Davita hnei Iehova ngöne la itre ijine kola traqa koi angeice la itre jole ka nyimutre. Öni angeic: “Ngöne la ijine Davita a kötre mele me zae ngöne la itre ngönemenyi, hnei Iehova pala hi hna thupë nyidrë. Eje hi laka, ketre ewekë lai ka thuecatreng! Kola amekunë ni ka hape, ngacama troa traqa koi ni la ketre jol, maine ketre ewekë ka troa ahleuhleune la meleng, ngo tro Iehova a ce me eni e tro pala hi ni a nyipici koi Nyidrë.” Ma tro jë fe hi epuni a hane mekune tune lai.—Rom. 8:38, 39.
6. Nemene la itre xa aqane amamane Iehova ka hape, ka nyipici Nyidrë? Nemene la aqane kepe eloine lai hnene la itre hlue i Nyidrë?
6 Nemene la itre xa aqane amamane Iehova ka hape, ka nyipici Nyidrë? Ame la ketre aqan, tre, ka metrötrëne pala hi Iehova la itre trepene meköti Nyidrë. (Is. 46:4) Ame la nöjei mekune nyine tro Nyidrëti a eatrën, tre, hna nyi trepene itre eje hune la itre trepene meköti Nyidrë, nge ka huti la itre trepene meköti cili. (Mal. 3:6) Ame la ketre aqane amamane Nyidrë la thiina i Nyidrë ka nyipici, tre, ka eatrëne pala hi Nyidrëti la itre hnei Nyidrëti hna thingehnaean. (Is. 55:11) Hnene laka ka nyipici Iehova, itre hlue i Nyidrë asë a kepe eloin. Tune kaa jë? Ame la easa kuca la hne së hna atreine göi troa drengethenge Iehova, eje hi laka tha tro kö Nyidrëti lai a triane la hnei Nyidrëti hna thingehnaean, ene la troa amanathithi së.—Is. 48:17, 18.
NYIPICI JË TUI IEHOVA
7. Nemene la ketre aqane troa nyipici tui Iehova?
7 Nemene la aqane tro sa hane nyipici tui Iehova? Ame la ketre aqan, tre, ene la tro sa kuca la loi kowe la itre ka mele hnine la akötr. (Ite edomë 3:27) Hetre trejine kö hnei epuni hna atre, ka kucakuca qa ngöne laka hna tithi angeice hnei mec, maine qa ngöne la hna icilekeu me angeice hnene la itre atrene la hnepe lapa i angeic, maine qa ngöne la hna huli angeice hnene la itre sipu aja ka ngazo ne la ngönetrei angeic? Xatua angeice jë jëne la itre “tenge ewekë ka loi, me tenge ewekë nyine akeukawan.” (Zaka. 1:13) a E kuca ha epuni tune lai, epuni hi lai a amamane ka hape, epuni la nyipi sinee i angeic, ka nyipici koi angeic, nge ka “fede cate hune la hnei tejin.”—Ite edomë 18:24.
8. Nemene la aqane tro sa nyipici e hnine la faipoipo?
8 Hetre itre xa aqane tro sa amamane la nyipici së kowe la itre hne së hna hnim. Ame la ketre aqan, tre, maine ka faipoipo së, tro sa nyipici kowe la föe së. (Ite edomë 5:15-18) Celë hi matre ka nanyi hë lai troa nyixetë. Ngo loi e tro pe a canga hmekëne la ewekë ka troa tro xomi së kowe la nyixetë. (Mat. 5:28) Ketre, tro sa amamane la nyipici së kowe la itre trejine me easë e tha tro kö sa qaja angazo angatr, maine pena troa atë la thoi hui angatr. Nge loi e tro sa kötrene la itre ithanata ka tune lai.—Ite edomë 12:18.
9, 10. (a) Tro pala kö sa nyipici catre koi drei? (b) Hapeu, tha ka jole kö e tro sa nyipici koi Iehova? Hamëne jë la ketre ceitun.
9 Loi e tro pala kö a sisitria catre la nyipici së koi Iehova. Troa tune kaa? Ene la tro sa hnine la itre ewekë hnei Iehova hna hnin, me sisine la itre ewekë hnei Nyidrëti hna sisin. Haawe, nyipi ewekë tro sa mele thenge la aja i Iehova. (E jë la Salamo 97:10.) E tro sa inine troa atre la itre aqane meku ewekë i Iehova, tro hi së lai a saqe idrengethenge.—Sal. 119:104.
10 Eje hi laka, tha ka hmaloi kö e tro pala hi a drengethenge Iehova. Tro së lai a catre matre troa huti la nyipici së koi Nyidrë. Hanawange la ketre ceitun, ma kola ajane hnene la ketre trejine föe troa faipoipo, ngo pëkö trejine trahmanyi hmekui angeic hnei angeice hna öhn. (1 Kor. 7:39) Ame pena ha ngöne la hna huliwa i maseta, itre sine huliwa i angeic ka tha hmi kö a uku angeic troa iatre me ketre. Ame ngöne la ketre götran, hace hë koi angeice e troa mele cas. Ngo ame la ka tru ngöne la hni angeic, tre, tha tro pi kö a iatre maine faipoipo pena memine la ketre atr ka tha nyi hlue i Iehova kö, ke, ka tru koi angeice la troa nyipici koi Iehova. Ame itre Keresiano ka tune lai trejine föe, tre, itre tulu ka lolo catre göi troa nyipici. Tro Iehova a amanathithine la itre ka catre nyi hlue nyipici koi Nyidrë ngöne la itre drai ka jol.—Heb. 11:6.
IEHOVA ATRE SENGE TRIJ
11. Nemene la aliene la kola hape, senge trije maine nuetrije la tria?
11 Nemene la aliene la kola hape, senge trije maine nuetrije la tria? Ame la ka atreine nuetrije la tria i ketre, tre, tha ka lapa fë hutine kö la wesitre pine lai tria hna kuca koi angeic. Tha kolo kö lai a hape, angeic a kapa la tria hna kuca koi angeic, maine kolo pena a kelikelën. Ngo ame pe öni angeic, tha tro kö angeic a lapa fë wesitr. Ame la ketre thiina i Iehova ka lolo catr, tre, Nyidrëti la Atre Senge trij. Tusi Hmitrötre a qaja ka hape, Iehova la “Ate sheng” la itre ngazo ne la itre ka ietra.—Sal. 86:5.
12. (a) Nemene la aqane senge trije Iehova? (b) Nemene la aliene lo Peteru a qaja ka hape, ijije hi troa “köle tij” la ngazo ne la atr?
12 Nemene la aqane senge trije Iehova? Önine la Tusi Hmitrötr, Iehova a “köle tij asë.” Kola hape, pexeje nge uti hë epine palua la aqane senge trije Nyidrë. (Is. 55:7) Easa atre tune kaa ka hape, pexeje la aqane senge trije Iehova? Pane mekune ju la hna thingehnaeane ngöne Ite Huliwa 3:19. (E jë.) Öni Peteru aposetolo, e nyipici la aqane ietra ne la atre kuca la ngazo, tro angeice lai a hleuhleu pine la tria i angeic. Nemene la aqane tro Iehova a senge trije la ngazo ne la atre kuca la ngazo? Öni Peteru, “ietraju” me “ujëjë.” Eje hi e kuhu hni ne la atre nyipi ietra laka, pë hmaca kö tro angeice a kuca la ngazo hna seng. (2 Kor. 7:10, 11) Angeice hi lai a ujë jë, kola hape, tha tro hmaca kö angeic a kuca la ngazo, nge angeic a kuca ju pe la nöjei ewekë nyine amadrinë Akötresie. Haawe, tro hë lai a “köle tij” la itre ngazo i angeic. Ame la kola hape köle trij, tre, ene la kola apatrene maine xome trij. Haawe, ame la Iehova a senge trij, kola hape, Nyidrëti a xome trije la ngazo i angeic. Ame la thangan, tro ha senge apexejene la ngazo i angeice hnei Iehova.—Heb. 10:22; 1 Ioane 1:7.
13. Nemene la hne së hna inine göi Iehova qa ngöne la itre trenge ithanata celë, “Tha tro hmaca kö ni a hnine la ite ngazo i angat”?
13 Easa atre tune kaa ka hape, Iehova a senge trije la itre ngazo së uti hë epine palua? Atreine hi së troa atre la aqane senge trije Iehova la ngazo qa ngöne la itre trenge ithanata i Nyidrë koi Ieremia ngöne la ketre hna perofetane göi itre Keresiano hna iën. (E jë la Ieremia 31:34.) Öni Iehova: “Tro ni a nue la thina i angate ka ngazo, nge tha tro hmaca kö ni a hnine la ite ngazo i angat.” Haawe, ame la Iehova a seng, tre, tha mekune hmaca kö Nyidrë la itre ngazo së, nge tha tro hmaca kö Nyidrëti a e koi së me nyi thupene itre eje koi së. Nyidrëti a senge trije la itre ngazo së uti hë epine palua.—Rom. 4:7, 8.
14. Pine nemene matre kola akeukawanyi së la easa mekune ajuine la aqane senge trije Iehova la ngazo ne la atr? Hamëne jë la ketre ceitun.
14 Kola akeukawanyi së la easa mekune ajuine la aqane senge trije Iehova la ngazo ne la atr. Tro sa pane ce ithanatane la mele ne la ketre trejine föe, Elaine. Ekö catre hë la kola upetröne eë angeic. Nge thupene la itre macatre cili, kolo hmaca ha kepe angeic hnine la ekalesia. Ngacama hna kepe angeice hë, ngo ame koi angeic, kösë lo tha hnei Iehova kö hna senge trije la ngazo i angeic. Angeice a mekune ka hape, tru kö la ihnimi Iehova koi itre xan hui angeic. Ngo hna akeukawanyi Elaine qa ngöne la hnei angeice hna mekune ajuine la hna qeje pengöne hnei Tusi Hmitrötre la aqane senge trije Iehova la ngazo. Tune la hnei angeice hna e laka, ame la Iehova a senge trije la ngazo, tre, ceitu me Nyidrë a awiëne la itre ngazo së. Tha tro kö itre eje a angazone hutine la hni së. b Öni Elaine hmaca jë: “Hnenge hna mekune ekö ka hape, ma tha tro jë kö Iehova a senge apexejene la itre ngazong, nge ma ehnefenge pë hë lai uti hë la pune la meleng. Atre hi ni ka hape, tha tro kö a canga patr la mekune cili qaatheng, ngo ame pe, drenge hë ni enehila laka, eni ha easenyi trootro koi Iehova, nge hmaloi hë la ehnefeng.” Eje hi laka, Iehova la Akötresie ka tru ihnimin, nge Atre Seng!—Sal. 103:9.
NYITIPUNE JË LA AQANE SENGE IEHOVA
15. Tro sa nyitipune tune kaa la aqane senge Iehova la itre ngazo së?
15 Tro sa nyitipu Iehova e ka xecie hnyawa e kuhu hni së troa nuetrije la ngazo i ketre. (E jë la Luka 17:3, 4.) The thëthëhmine kö së laka, e tro Iehova a senge la ngazo së, tha mekune hmaca kö Nyidrë lo ngazo hne së hna kuca. Ketre tune mina fe la easa nuetrije la ngazo i itre xan; tha tro hmaca kö sa mekune la itre ewekë ka ngazo hna kuca koi së, nge tha tro hmaca kö së elanyi a amexeje la itre ewekë cili.
16. (a) Nemene la aliene la kola hape, troa nuetrije la ngazo i itre xan? Nge tha kolo kö lai a qeje nemen? (b) Nemene la nyine tro sa kuca maine easa ajane tro Iehova a senge trije la ngazo së?
16 Ame la kola nuetrije la ngazo i itre xan, tre, tha kolo kö lai a hape, easa kapa la aqane huliwa ka tria, maine pena aja së troa kuca la ewekë ka tria koi së. Ohea. Kolo lai a hape, ase hë së mekune ka hape, tha tro kö sa lapa fë hutine la wesitre së koi angeic. Ketre, nyipi ewekë tro sa mekune laka, maine aja së tro Iehova a senge trije la itre ngazo së, loi e tro fe sa nuetrije la ngazo i itre xan. (Mat. 6:14, 15) Atre hnyawa hi Iehova ka hape “so ne hnadro shë.” Atrehmekune hi Nyidrëti laka, atre ka tha pexeje së. (Sal. 103:14) Haawe, ame la kola qaja maine kola kuca koi së la ketre ewekë ka tria, tha tro kö sa thëthëhmine laka ceitune hi la aqane tha pexeje i angeice me easë, nge loi e tro sa nuetrije nyipicine la tria i angeic.—Efe. 4:32.
17. Nemene la ka troa xatua epuni troa nuetrije la ngazo ne la ketre atr ka akötrë epun?
17 Nyipici laka, tha ka hmaloi kö la troa nue la ngazo hna kuca koi së. Hnene mina fe la itre Keresiano hna iëne ngöne la hneijine i Paulo hna aja ixatua göi troa nyinyine la itre jole ka eje nyipi angatr. (Fil. 4:2) Maine hna kuca hnene la ketre trejine la ketre ewekë nyine akötrë epun, nemene la ka troa xatua epuni troa nuetrije la tria i angeic? Pane mekune ju lo ewekë ka traqa koi Iobu. Kolo pena kö a mekune ka hape, ame Elifaza, me Biledad, me Zofar, tre, itre sinee i Iobu. Ngo hnei angatre hna qaja koi Iobu la itre ithanata ka akötr, me upe zö angeice la itre ewekë ka ngazo ka traqa koi angeic. Hna akötrëne la hni Iobu. (Iobu 10:1; 19:2) Ame la pun, hnei Iehova hna qaja kowe la köni thupëtresiji cili ka hape, ka tria catre la aqane ujë i angatr, nge tro angatre a tro koi Iobu, me huujëne la itre öni thatraqane la ngazo i angatr. (Iobu 42:7-9) Nge hnei Iehova fe hna qaja koi Iobu troa kuca la ketre ewekë. Nemene jë? Hnei Nyidrëti hna qaja koi Iobu troa thithi thatraqane lai köni thupëtresij. Iobu a kuca tune jë, ame hnei Iehova hna amanathithi angeice qa ngöne la hnei angeic hna nuetrije la ngazo i angatr. (E jë la Iobu 42:10, 12, 16, 17.) Nemene la ini koi epun? Ame la epuni a thithi fë nyipicine la ketre atr ka akötrë epun, tro lai a hmekë epuni matre tha tro kö epuni a lapa fë hutine la wesitre i epun kowe lai atr.
CATRE JË ININE ME NYITIPUNE LA ITRE THIINA I IEHOVA
18, 19. Nemene la hne së hna ajane tro pala hi sa kuca?
18 Tru la madrine së troa atre hnyawa la itre thiina i Iehova. Hne së lo hna inine ka hape, ame Nyidrë, ka inyipi, nge ka tha iwangatrehmekunyi atr kö, nge ka ham, me ka atreine tulu ewekë, nge ka nyipici, me Atre Seng. Eje hi laka, nyimu ewekë nyine tro sa inine göi Iehova. Troa tru la madrine së troa inine uti hë epine palua la itre ewekë ka qeje Nyidrë. (Ate cai. 3:11) Casi hi la mekuna së memine la hna cinyihane hnei Paulo, ka hape: “Ekölö hi ni la ejuine la inamacane ka sisitia memine la ate pengöne i Akötesie!” Tro fe së a hane qaja tune lai göne la ihnimi Akötresie, memine lo sikisi lao thiina i Nyidrë hne së hna ce wange ngöne la itre tane mekune celë.—Rom. 11:33.
19 Haawe, thele jë troa atre hnyawa la itre thiina i Iehova, me mekune ajuin, me mele thenge itre ej. (Efe. 5:1) Ame la thangane lai, troa ha tru catre la ihnimi së koi Iehova, nge tro sa lapa qale catre koi Nyidrë. Nge casi hnyawa ha la mekuna së memine la atre cinyihane la salamo, lo atre nyimane ka hape: “Ngo ame ni, loi koi ni troa eashenyi Akötesie.”—Sal. 73:28.
[Ithueamacany]
a Tro epuni a öhne la itre mekune nyine ixatua hna qaja ngöne la itre tane mekune hna hape “Hnei Epuni Kö Hna Hamë Ithuecatre Kowe La Ketre Atr Lo Itre Drai Ka Ase Hë” ngöne la Ita Ne Thup ne 15 Januare 1995 (qene Wiwi), me “Nemene La Aqane Tro Sa Huliwane La Hni Së Matre Tro Sa Hetre Ihnim Me Troa Hetre Ajane Troa Kuca La Loi?” ngöne la Ita Ne Thup ne 1 Eiperem 1995 (qene Wiwi).
b Wange ju la paragarafe 10 ngöne la mekene 26 ne la itus Approchez-vous de Jéhovah.
[Thying]
[Iatr ne la götran 17]
[Iatr ne la götran 19]
“Hete ate ihnimi kola fede cate hune la hnei tejin.”—Ite Edomë 18:24 (Wange ju la paragarafe 7)
‘Inue aloinekeune jë.’—Efe. 4:32 (Wange ju la paragarafe 16)
[Iatr ne la götran 21]
Thithi fë nyipicine jë la atre akötrë epun (Wange ju la paragarafe 17)
