Mekune Pala Kö Epun?

Ase fe kö epuni e lo itre Ita Ne Thup ne lo itre treu ka ase hë? Haawe, sa jë la itre hnyinge celë:

Nemene la ketre aqane huliwane menune la Tusi Hmitrötr, nge nemene la hna mekune hnene la itre Keresiano göne la huliwa cili?

Ame la ketre aqane huliwane menune la Tusi Hmitrötr, tre, ene la troa xome la Tusi Hmitrötr, nge fe menune pi hi nge ame ju hi lai pane xötre hna goëen, tre, kola mekune ka hape, celë hi ka troa hamë së la ixatua. Tha ka thele ithuemacanyi menu kö la itre Keresiano. Angatre pe a inine la Tusi Hmitrötre matre hetrenyi la nyipi atrehmekune me itre hna amekötine hnei Akötresie.—15/12, götrane 3.

Nemene lo lai “fene hnengödrai” ka troa patr?

Ame la “fene hnengödrai” ka troa patr, tre, kola qaja la fen, ene la itre atr ka tha mele thenge la aja i Akötresie. (1 Ioane 2:17) Tro pe kö a cile huti la ihnadro me amelene la itre atr ka mele nyipici.—1/1, götrane 5-7.

Ngacama meci hë Abela, qa ngöne nemene matre qaja jë ka hape, angeice pala kö a ewekë koi së? (Heb. 11:4)

Angeice a ewekë jëne la lapaun. Loi e tro sa inine la tulu i angeic, me nyitipune la lapaune i angeic. Ka mele pala hi la tulu hnei angeice hna amamane enehila.—1/1, götrane 12.

Nemene la itre xa götrane nyine tro sa thupëne wanga nanyi pi së qaathei Akötresie?

Kola qaja la huliwa i maseta, maine itre nyine iamadrinë ngöne la ijine mano, maine aqane waipengöne së la atrene la hnepe la lapa së hna upetröneën, maine itre ordinatör me itre mo ka hnyipixe, maine aqane thele mele ka loi, maine aqane waipengöne angazone la mani, me aqane wange atrune së la itre mekuna së me itre götrane qa së.—15/1, götrane 12-21.

Nemene la ini nyine tro sa xome qa ngöne la ipië ka eje thei Mose?

Tha hnei Mose kö hna thele troa pi mama fë la musi ka eje thei angeic, hnei angeice pe hna mejiune koi Akötresie. Tha tro pi kö sa pi mama fë la hnëqa maine musi ka eje the së, maine la atreine së, ngo loi pe tro sa mejiune koi Iehova. (Ite edomë 3:5, 6)—1/2, götrane 5.

Troa mele ekaa hnene la itre ka troa mele hmaca?

Troa mele e hnengödrai hnene la ka ala xalaith, ene la ala 144 000. Ngo ala nyimu catre pala kö la itre hna troa amelen hmaca matre troa mele e celë fen, nge tro angatr a hetrenyi la mele ka tha ase palua kö e cili.—1/3, götrane 6.

Nemene la aliene la kola qeje angetre Isaraela, ka hape, “tha hna peritomone la hni”? (Iere. 9:26)

Itre ka catre he angatr, me pi tru, nge nyipi ewekë tro angatr a ahnyipixene la hni angatre ka ngazo, ene la itre mekun, me aliene hni, me itre hnei angatre hna ajane troa kuca ka isazikeu me Akötresie. (Iere. 5:23, 24)—15/3, götrane 9-10.

Nemene la aqane amamane Iesu la tulu ne mele ka hetre alien?

Hetre ewekë hnei nyidrëti hna ajane troa eatrën, ene la troa kuca la aja i Akötresie. Tru catre la ihnimi nyidrë kowe la Tretretro i nyidrë memine fe la itre atr. Qa ngöne lai, atre hi nyidrë laka hna hnimi nyidrë me kepe nyidrë hnei Tretretro i nyidrë. Jëne mele hi lai ka hetre alien.—1/4, götrane 4-5.

Hna eköthe hnei nemene la götrane gaa mama ne la organizasio i Akötresie e celë fen?

Kola qaja la Lapa Ne Xomi Meköt, me kometr ne la itre hnalapa ne thewe huliwa, me itretre thupe ka iwai trootro, me lapa ne la itre qatre thup, me itre ekalesia, me Itretre Anyipicin asë.—15/4, götrane 29.

Pine nemene matre qaja jë së ka hape, tha ka pi ihumuthi kö Akötresie la Nyidrëti a eatrëne la itre hnei Nyidrëti hna amekötin?

Tha hna kapa madrine kö hnei Iehova, la kola meci la atr ka ngazo. (Ezek. 33:11) Hnene la itre huliwa i Nyidrë ekö hna amamane ka hape, qa ngöne la ihnimi Nyidrë, hnei Nyidrëti hna pane thuemacane la itre atr qëmekene troa nyi thupene koi angatre thenge la ngazo i angatr. Kolo lai a hamë mejiune së troa mele pe e nyipune jë elanyi kowe la atr ka ngazo.—1/5, götrane 5-6.

Hapeu, hnei angetre Isaraela kö hna majemine athipe amelene uti hë mec hune la sinöe la itre atr ka kuca la ewekë ka ngazo?

Ohea. Hna kuca tune lai hnene la itre xa nöje ekö, ngo tha angetre Isaraela fe kö. Ame thei angetre Isaraela troa pane trane humuthe la itre atr ka ngazo hnei etë. (Lev. 20:2, 27) Thupene lai athipe jë pë hë la ngönetrei ka mec hune isinöe nyine tulu koi itre xan.—15/5, götrane 13.

Pine nemene matre thatreine kö la atr troa axulune la tingetinge kowe la fen?

Ngacama nyimu ewekë hna atreine kuca hnene la atr, ngo tha hna aijijë angeice kö troa amekötine la jë i angeic. (Iere. 10:23) Satana la ka musi kowe la fen, celë hi matre tha ijiji atr kö troa axulune la tingeting. (1 Ioane 5:19)—1/6, götrane 16.