“Hana Wang Ini a Ce Me Nyipunie Ngöne La Nöjei Drai Asëjëihë”

“Hana wang ini a ce me nyipunie ngöne la nöjei drai asëjëihë uti hë la hneijin ne kola troa nyipune la fen.”—MAT. 28:20, MN.

THELE JË LA AQANE SA LA ITRE HNYINGE CELË:

Pine nemene matre qaja jë së ka hape, qaane lo itre macatre ka ca hadredre M.K. uti hë enehila, pëkö hna pë hna iëne e celë fen?

Nemene la huliwa ne waipengöne hna kuca hnei Iesu qaane lo 1914?

Nemene pala kö la itre ewekë hne së hna treqene hna qaja ngöne lo ceitune i Iesu göi qitr me zizania?

1. (a) Pane amexeje jë la itre hnepe mekune qa ngöne la ceitun ne la qitre me zizania. (b) Nemene la aqane qeje pengöne Iesu la aliene ej?

 AME ngöne la ketre ceitune i Iesu göne la Baselaia, tre, kola qeje pengöne la ketre atre eëny a jume la ite wene ka loi, ene la qitr, nge hnene fe la ithupëjia hna jume la zizania nyipine la itre wene ka loi. Hnene la zizania hna cia thahe la qitr, ngo hnene la atre eënyi hna qaja kowe la itre sinelapa i angeice ka hape, “Loi kö tro lu’ ej’ a ce cia uti hë la troa menue.” Ame hë la ijine menu, troa dreuthe trije la itre zizania, nge troa hleme xawane la itre qitr. Hnei Iesu hna qeje pengöne la ceitune celë. (E jë la Mataio 13:24-30, 37-43.) Nemene la hna amamane hnene la ceitune celë? (Wange ju la itre hna amamane hnene la iatr hna hape, “Qitre Me Zizania.”)

2. (a) Nemene la hna nyi hatrene hnene la itre ewekë ka traqa ngöne la hlapa ne la atre eëny? (b) Nemene la götranene la ceitune nyine tro sa wange hnyawa?

² Ame la itre ewekë ka traqa ngöne la hlapa ne la atre eënyi ngöne la ceitun, tre itre eje a nyi hatrene la aqane me ijine tro Iesu a icasinekeune la lapa ne la itre qitr, ene la itre Keresiano hna iëne ka troa ce musi me nyidrë ngöne la Baselaia i nyidrë. Hna nyiqaane jumi feja lo Penetekos 33 M.K. Troa umuthe la kola icasinekeune la itre hna iëne ka mele petre kö e celë fen ngöne la pune la fene celë, e kapa jë angatre la hna pelehatrene tixenuë, nge thupene lai, angatre pë hë a elë jë hnengödrai eë. (Mat. 24:31; Hna ama. 7:1-4) Tune la hna itënyi ngöne la wetr a aijijë së troa öhne hnyawa la nöjei pengöne ewekë asë, ketre tune mina fe kola aijijë së hnene la ceitune celë troa goeëne hnyawa la aqane trongene la nöjei ewekë ka traqa qaane ekö, nge uti hë enehila, a 2000 hë lao macatre. Qa ngöne la itre ewekë hna goeëne cili, nemene la aqane trongene la nöjei ewekë ka hetre pengöne memine la Baselaia, nge ka mama koi së? Hnene la ceitune celë hna qaja la ijine kola jume la feja, me kola cia, me kola menue. Tro pe la tane mekune celë a qeje pengöne hnyawane la ijine menue. a

 ITRE HNA THUPËNE HNYAWA HNEI IESU

3. (a) Nemene la aqane trongene la itre ewekë thupene lo itre macatre ka ca hadredre M.K.? (b) Tune la hna qaja ngöne Mataio 13:28, nemene la hnyinge hna amejën, nge hnei drei? (Wange ju fe la ithuemacanyi e kuhu pun.)

³ Ame ngöne lo kola xejë la itre macatre tru hadredre M.K., “mamapi fe la zizania” ngöne lo kola nyiqaane mama hnene la itre Keresiano göi ëjen ngöne la hlapa, ene la fen. (Mat. 13:26) Ame ngöne la itre macatre foa hadredr, hna sasaithe la etrune la itre Keresiano hna iën hnene la itre Keresiano hna aceitunëne me zizania. Mekune kö laka ame ngöne lo ceitun, hnene la itre sinelapa hna sipone kowe la joxu i angatre troa feje trije la itre zizania. b (Mat. 13:28) Nemene la hna sa hnene la joxu?

4. (a) Nemene la hna amamane hnene la aqane sa ne la Joxu, ene Iesu? (b) Eue la kola mama hnyawa la itre Keresiano hna aceitunëne me qitr?

⁴ Iesu a qaja ju la qitre me zizania ka hape: “Loi kö tro lu’ ej’ a ce cia uti hë la troa menue.” Kola mama ngöne la trenge ithanata celë ka hape, qaane lo hneijinene lo itre pane keresiano uti hë enehila, pëkö hna pë Keresiano hna iëne hna aceitunëne me itre qitre e celë fen. Kola anyipicine la mekune celë hnene la itre hna qaja hnei Iesu kowe la itretre drei nyidrë: “Ini a ce me nyipunie ngöne la nöjei drai asëjëihë uti hë la hneijin ne kola troa nyipune la fen.” (Mat. 28:20, MN) Celë hi matre, tro Iesu a hmekëne la itre Keresiano hna iëne ngöne la nöjei drai uti hë la hneijine ne la pun. Ngo, pine laka hna cia tranyi angatre hnene la itre Keresiano hna aceitunëne me zizania, thatreine kö së troa atre ka hape, drei la itre atr ka ceitu me qitr ngöne la hneijine ka qea catre cili. Ngo kola ha traqa koi thötre lao macatre qëmekene troa nyiqaane la hneijine menue, mama cile hnyawa pi hi lo lapa ne la itre qitr. Hna mama tune kaa?

ATRE TRO FË MACA A “NYIHNYAWANE LA GOJENYI”

5. Nemene la aqane eatre la hna perofetane hnei Malaki ngöne lo ijine Keriso e celë fen?

⁵ Ngöne la itre macatre ka nyimu hadredre qëmekene tro Iesu a hamëne la ceitun göi qitre me  zizania, hnei Iehova jëne la ua i Nyidrë hna upi Malaki perofeta troa qaja amë la itre ewekë ka troa traqa, nge ka mama ngöne la ceitune i Iesu. (E jë la Malaki 3:1-4.) Ioane Bapataiso la ‘atre tro fë maca ka nyihnyawane la gojenyi.’ (Mat. 11:10, 11) Ame la angeice a traqa lo 29 M.K., easenyi hë la ijine troa amekötine la nöje i Isaraela. Ame la hnaaluene atre tro fë maca, tre Iesu. Hnei nyidrëti hna alua nyidrawane la ēnē e Ierusalema—ame la hnapan, tre ngöne lo nyidrëti a xejë la huliwa ne cainöj, nge ame la hnaaluen, tre ngöne la pune la huliwa i nyidrë. (Mat. 21:12, 13; Ioane 2:14-17) Haawe, ame la huliwa ne nyidrawa i Iesu, tre, hna kuca ngöne la ketre hnepe ijin.

6. (a) Nemene la aqane eatrëne atrune la hna perofetane hnei Malaki? (b) Qaane eu, nge uti eue la Iesu a waipengöne hnyawa la ēnē ngöne la götrane u?

⁶ Nemene la aqane eatrëne atrune la hna perofetane hnei Malaki? Ngöne la itre macatre ka nyimutre qëmekene troa traqa koi 1914, hnei C. T. Russell me itre sine huliwa i angeic hna kuca la ketre huliwa tune la hna kuca hnei Ioane Bapataiso. Hnene la huliwa ka sisitria cili hna acile hmaca la itre nyipici qa hnine la Tusi Hmitrötr. Hnene la Itretre Ini Tusi Hmitrötr hna hamëne la nyipi aliene la thupene mele i Keriso, me jele thoine la ini göi ifereno, me cainöjëne la pune la Hneijine i Angetre Ethen. Ngo tru fe kö hnei hmi ka hane selëne ka hape itretre drei Iesu fe angatr. Celë hi matre nyipi ewekë troa sa la ketre hnyinge ka tru: Drei lai qitre ngöne la itre hmi cili? Ame lo Iesu a nyiqaane waipengöne hnyawa la ēnē ngöne la götrane u lo 1914, tre, mama pi hi ka hape drei. Ame la huliwa ne waipengön me nyidrawa, tre hna kuca ngöne la ketre hnepe ijin, a hna nyiqaane lo 1914 uti hë lo kola xejë la macatre 1919. c

ITRE MACATRE NE WAIPENGÖN ME NYIDRAWAN

7. Ame la Iesu a nyiqaane la huliwa ne waipengöne lo 1914, nemene la hnei nyidrëti hna öhn?

⁷ Ame la Iesu a nyiqaane la huliwa ne waipengöne lo 1914, nemene la hnei nyidrëti hna öhn?  Itretre Ini Tusi Hmitrötr a nue la trenge catre i angatre me itre ewekë i angatre matre troa catre fë la huliwa ne cainöje ngöne la 30 lao macatre nge hetre munën. d Drei la madrine koi Iesu me itre angela la kola öhne la itre ngöne qitr, ngacama ka xalaithe hi, ngo ka catre pe, itre tha hna thahe hnene la itre zizania i Satana! Ngo, nyipi ewekë troa “nyidrawane la ite nekö i Levi,” ene la itre hna iën. (Mal. 3:2, 3; 1 Pet. 4:17) Pine nemene jë?

8. Nemene la aqane trongene la itre ewekë thupene lo 1914?

⁸ Ame lo 1914, kola jole la hni ne la Itretre Ini Tusi Hmitrötr pine laka, tha elë ju kö angatre hnengödrai eë. Ame lo 1915 me 1916, hna traqa la icilekeu kowe la organizasio qaa trön matre hna pane tro hmidra la huliwa ne cainöj. Ngazo catre hmaca jë kö thupene la hna meci hnei Russel lo Okotropa 1916, ke, kolo pena a traqa la icilekeu qa hnine la organizasio. Hnene la ala foa qaathene la sevene lao ka cilë mekene la Watch Tower Bible and Tract Society hna icilekeu memine la hna amekötine ka hape tro Rutherford a cilë mekene la huliwa. Hnei angatre hna thele troa thë la lapa ne la itre trejin, ngo ame ju hi lo Ogas 1917, angatre hi lai a trotrije la Bethela, kolo hi lai a nyidrawane hnyawa! Ketre, ame thene la Itretre Ini Tusi Hmitrötr, hnei itre xane hna xoue atr. Ngo, ame asë pë hë la munën, tre, hnei angatre hna drengethenge la Iesu a kuca la huliwa ne nyidrawa, ame hnei angatre hna ahnyipiexene la aqane waiewekë i angatr. Haawe, hnei Iesu hna wai angatre ceitu me nyipi Keresiano, itre qitr, ngo hnei nyidrëti hna upetrije la nöjei Keresiano göi ëjen, memine fe la iatrene asë la nöjei Hmi Keresiano Göi Ëjen. (Mal. 3:5; 2 Tim. 2:19) Nemene ju hë la ka traqa e thupen? Troa atre lai e tro sa wange hmaca lo ceitune göi qitr me zizania.

NEMENE LA EWEKË KA TRAQA THUPENE LA KOLA NYIQAANE LA IJINE MENUE?

9, 10. (a) Nemene la hne së hna troa ce wange göi ijine menue? (b) Nemene la pane ewekë hna kuca ngöne la ijine menu?

⁹ Öni Iesu: “Ame la menuëne, te, pune la fen “hneijin ne kola troa nyipune la fen.” (Mat. 13:39, MN) Hna nyiqaane la ijine menue lo 1914. Tro sa ce wange la faifi lao aqane trongene la itre ewekë hna perofetane hnei Iesu göne la ijine cili.

¹⁰ Ame la hnapan, tre kola xawane la zizania. Öni Iesu: “Ngöne la ijine menue tro ni a qaja koi angete menue, ka hape, Pane ce xawanejë la zizania, me ukëne.” Thupene la 1914, hnene la itre angela hna nyiqaane ‘ce xawane’ la itre Keresiano ka ceitu me zizania, matre xome triji angatre qaathene “la ite nekö ne la baselaia,” ene la itre hna iën.—Mat. 13:30, 38, 41.

11. Uti hë enehila, nemene la ewekë ka amamane ka hape, isa pengöne kö la itre nyipi Keresiano me itre Keresiano göi ëjen?

¹¹ Kolo pala hi a kökötre trootro la huliwa ne xawan, nge kola mama hnyawa trootro la eisapengöne ne la lue lapa. (Hna ama. 18:1, 4) Mama hnyawa ha lo 1919, ka hape, kei hë Babulona Atraqatr, ke pëhë mene i angeice kowe la nyipi hmi. Nemene la ewekë ka amamane ka hape, isa pengöne kö la itre nyipi Keresiano me itre Keresiano göi ëjen? Huliwa ne cainöj. Hnene la itre ka cilëmekene la Itretre Ini Tusi Hmitrötr hna nyiqaane amamane hnyawa la enyipiewekëne la tro la isa ala casi a catre cainöjëne la Baselaia. Ame la enyipicin, tre, hnene la sine boroshüre hna hape Koi Epun, Itre Hna Ahnithe Kow La Huliwa (qene Papale), hna fejane lo 1919, hna thuecatrene la nöjei Keresiano hna iëne troa cainöje trootro ngöne la itre hnalapa. Eje a qaja ka hape: “Kösë ketre huliwa ka tru e troa wang, ngo huliwa i Joxu lai, nge tro sa eatrëne la huliwa cili jëne la trenge i catre i nyidrë. Ketre edrö së troa hane kuca la huliwa ne cainöj.” Nemene la thangan? Qaane ju hi la ijine cili, hnene la Ita Ne Thup ne 1922 hna qaja ka hape, hna elë la etrune la hna cainöje hnene la Itretre Ini Tusi Hmitrötr. Tha qea ju kö e thupen, nge ame la huliwa ne cainöje trootro, tre, celë hi ka qajaqaja la itre Keresiano ka mele nyipici, nge tha saze kö uti hë enehila.

12. Qaane eue la kola icasinekeune la lapa ne la itre qitr?

¹² Ame la hnaaluen, tre, kola umëne la qitr. Iesu a upe la itre angela me hape: “Umënejë [icasinekeunejë] la qite hnine la uma qazing.” (Mat. 13:30) Qaane lo 1919, hna icasinekeune la itre  hna iëne ngöne la ekalesia i Keresiano hna awiën. Ame kowe la itre Keresiano hna iëne ka mele petre kö e celë fen ngöne la pune la fene celë, troa umuthe la huliwa ne icasinekeu i angatre e kapa jë angatre la edrö i angatre e hnengödrai.—Dan. 7:18, 22, 27.

13. Nemene la pengöi Babulona Atraqatr, ene lo föe ne gojenyi memine fe la itre hmi Keresiano göi ëjen ka mama ngöne Hna Amamane 18:7?

¹³ Ame la hnaakönin, tre kola treije me kiki la inyö. Ase jë hi ukëne la zizania, nemene ju hë la ewekë ka traqa? Ame la Iesu a qaja la lapa ne la itre zizania, öni nyidrë: “Tro ha teije me kiki la inyö e cili.” (Mat. 13:42) Hapeu, kolo kö a eatre enehila? Ohea. Ame enehila, kolo pala kö a qaja hnene la ketre götranene la föe ne gojeny, ene la itre hmi Keresiano göi ëjen, ka hape: “Ini a lapa a joxu, nge tha sine föe kö ni, nge tha tro kö ni a öhne la aköt.” (Hna ama. 18:7) Eje hi laka, itre hmi Keresiano göi ëjene a mekune ka hape, angatre a cile ngöne la itre göhnë ka tru, me mekune ka hape, angatr a “lapa a joxu,” hune la itre tane la politik. Ame enehila, itre hna aceitunëne me zizania a nyitru, ngo tha angatre kö a treij. Ngo tha ka tro kö lai a hut.

14. (a) Eu nge pine nemene matre kola ‘kiki inyö’ hnene la itre Keresiano göi ëjen? (b) Nemene la aqane ihmekune la hne së hna trotrohnine la Mataio 13:42 memine la hna qaja hnei Salamo 112:10? (Wange ju la ithuemacanyi e kuhu pun.)

¹⁴ Ame ngöne la ijine akötre atraqatr, thupene la hna lepe apatrene la nöjei pengöne hmi ka thoi asë, tro la itre atr ka hmi ekö e cili a thele troa kötre mel, ngo pëkö hnë zae i angatr. (Luka 23:30; Hna ama. 6:15-17) Ame hë la angatre a öhne ka hape, pëkö hnë kötre kow, tro hë angatre lai a treije menu pe, me ‘kiki inyö’ hnei elëhni. Tune la hna perofetane hnei Iesu göi akötre atraqatr, ame ngöne la ijine ngazo cili, tro angatre a “iteijenyi.” e—Mat. 24:30; Hna ama. 1:7.

15. Nemene ju hë la ka troa traqa kowe la itre zizania, nge eue la troa eatre la ewekë celë?

¹⁵ Ame la hnaafoan, tre kola kuiëne kowe la hnaope ne eë. Nemene ju hë la ka troa traqa kowe la wenge uke zizania? “Troa kuië angate kowe la hnaope ne eë” hnene la itre angela. (Mat. 13:42) Kolo lai a qaja la troa lepe apatrenyi angatre asë. Haawe, ame la itre atr cili, angetre hmi ekö ngöne la itre hmi ka thoi, tre, tro ha apatrenyi angatre ngöne la pune la akötre atraqatr, e Amagedo.—Mal. 4:1.

16, 17. (a) Nemene la ewekë tixenuë hnei Iesu hna qaja ngöne la ceitune i nyidrë? (b) Pine nemene matre qaja jë së ka hape, ame la ewekë celë, tre tha eatre pala kö?

¹⁶ Ame la hnaafaifin, tre kola hadehadeu la angetre thiina ka meköt. Iesu a umuthe ju la hnei nyidrëti hna perofetane me hape: “Ame hna hadehadeupi la angete thina ka meköti tune la jö ngöne la baselaia ne la Tetetro i angat.” (Mat. 13:43) Troa traqa lai ekaa, nge eu? Easa pala kö la a treqene la troa eatre la itre trenge ithanata celë. Ame la hnei Iesu hna perofetan, tre tha ketre ewekë kö hna kuca enehila e celë fen, ngo ewekë pe ka troa traqa elanyi e hnengödrai. f Tro sa ce wange la lue kepine matre traqa pi së kowe la mekune celë.

 ¹⁷ Ame la kepine hnapan, tre, ene lo hnyinge hna hape, “eue.” Öni Iesu: “Ame hna hadehadeupi la angete thina ka meköti.” Ame laka Iesu a qaja la hnaewekë ka hape, “ame hna,” tre göi troa sisedrëne la itre ewekë ka traqa qëmeken, ene la kola ‘kuiëne la itre zizania kowe la hnaope ne eë.’ Tro lai a eatre ngöne la pune la akötre atraqatr. Haawe, ame fe la kola ‘hadrehadreu’ hnene la itre hna iën, tre, tro ha eatre elanyi ngöne la ijine cili. Ame la kepine hnaaluen, tre, ene lo hnyinge hna hape, “ekaa.” Öni Iesu ka hape, tro la angetre thiina ka meköti a ‘hadrehadreu ngöne la baselaia.’ Nemene la aliene lai? Tro elanyi a pelehatrene tixenuëne la itre hna iëne asë ka mele petre kö e celë fen, e pane eatre pi lo pane götrane ne la akötre atraqatr. Thupene lai, troa icasinekeu angatre e hnengödrai, tune la hna perofetane hnei Iesu göne la akötre atraqatr. (Mat. 24:31) Ame e cili, tro angatre a hadrehadreu “ngöne la baselaia ne la Tetetro i angat,” nge tha hmitre ju kö thupene la isi Amagedo, angatre a traqa koi Iesu ceitu me föe kowe la “ faipoipo i Arenio.”—Hna ama. 19:6-9.

ITRE THANGANE KOI SË

18, 19. Nemene la itre thangane koi së isa ala cas qa ngöne la hne së hna trotrohnine la ceitune i Iesu göi qitr me zizania?

¹⁸ Nemene la itre thangane nyine tro sa kapa qa ngöne la hne së hna öhne asë la nöjei ewekë hna hamëne hnene la ceitune celë? Tro sa wange la köni thangan. Ame la ewekë hnapan, tre, kola ajuine la inamacane së. Hnene la ceitune celë hna amamane la ketre kepine ka tru matre nue pi Iehova la iangazo. Hnei Nyidrëti hna “xomi hnin ahoeane la nöjei ge ne elëhni” göi troa hnëkëne la “nöjei ge ne ihnim,” ene la lapa ne la itre qitr. (Rom. 9:22-24) Ame la ewekë hnaaluen, tre kola acatrene la mejiune së. Kola easenyi la pun, nge kolo fe a tru catre la itre icilekeu qaathene la itre ithupëjia, ngo “tha tro kö a cate” hnei angatr. (E jë la Ieremia 1:19.) Tune la aqane thupëne hnyawa Iehova la lapa ne la itre qitr, haawe, tro fe la Tretretro së e hnengödrai a ce me easë “ngöne la nöjei drai asëjëihë” ka troa xulu jëne Iesu me itre angela.—Mat. 28:20.

¹⁹ Ame la ewekë hnaakönin, tre, kola aijijë së hnene la ceitune troa atrehmekune la lapa ne la itre qitr. Pine nemene matre nyipi ewekë tro sa atrehmekune lai? E troa atre ka hape, drei la itre Keresiano ka tune la qitr, tro hë lai a xatua së troa sa lo hnyinge hna amejëne hnei Iesu ngöne lo hna perofetane hnei nyidrë göne la itre drai ne la pun. Öni nyidrëti lo: “E ka la hlue ka nyipici me ka inamacan?” (Mat. 24:45) Tro pë hë la lue tane mekune ka troa xulu a sa la hnyinge celë.

ITHUEMACANYI E KUHU PUN: (Troa e tune lo itre ithuemacanyi hna amë pune ipepa thenge la isa paragarafe hmekun.)

Ithuemacanyi e cahu fen]

[Thying]

[Iatr ne la götran 9]

[Iatr ne la götran 10, 11]

QITRE ME ZIZANIA

33 M.K., KOLA NYIQAANE JUME LA FEJA

ATRE JUMI FEJA: Iesu

HNA JUME LA ITRE WENE KA LOI: Kola iëne hnene la uati hmitrötr

HLAPA: Itre atr ne la fene hnengödrai

‘Ketre atr a trane la ite wene ka loi ngöne la zi [hlapa] angeic’ (Mat. 13:24)

ITHUPËJIA: Diabolo

NÖJEI ATR A MEKÖL: Kola meci asë la ange aposetolo

‘Kolo pete kö a meköle la nöjei ate, ame hna tro pi la ithupëjia troa traane fe la zizania’ (Mat. 13:25)

QITR: Itre Keresiano Hna Iën

ZIZANIA: Itre Keresiano Göi Ëjen

“Tro lu’ ej’ a ce cia uti hë la troa menue” (Mat. 13:30)

1914 KOLA NYIQAANE MENUE

ITRE SINELAPA/ANGETRE MENUE: Itre angela

Itre Keresiano ka ceitu me zizania, hna xome trije qaathene la itre hna iën, ene “la ite nekö ne la baselaia”

Hna xawane la zizania me othe ukën (Mat. 13:30)

(Wange ju la paragarafe 10, 11)

1919 KOLA UMËNE HNINE LA UMA TË: Hna icasinekeune la itre hna iëne ngöne la ekalesia i Keresiano hna awiën

KOLA MENUE

‘Umëne jë la qitre hnine la uma të’ (Mat. 13:30)

(Wange ju la paragarafe 12)

AMAGEDO

Ame e Amagedo, troa kuiëne la itre zizania kowe la eë

KOLA HADREHADREU

Tha tro ju kö a qea qëmekene Amagedo, nge kolo ha icasinekeune la itre hna iëne ka mele nyipici e hnengödrai

Angetre thiina ka meköti a hadrehadreu ngöne la Baselaia (Mat. 13:43) (Wange ju la paragarafe 16, 17)

Hna kuiëne la zizania kowe la hnaope ne eë (Mat. 13:42) (Wange ju la paragarafe 15)

[Iatr]

[Iatr]

[Iatr]

[Iatr]

[Iatr]

[Iatr]

[Iatr]

[Iatr]

[Iatr]

[Iatr]

[Iatr ne la götran 13]

Easenyi catre hë matre nyipune pi la aqane ce tronge la Itre Hmi Keresiano Göi Ëjen me itre he ne kuci politik (Wange ju la paragarafe 13)