“E Ka La Hlue Ka Nyipici Me Ka Inamacan?”
“E Ka La Hlue Ka Nyipici Me Ka Inamacan?”
“E ka la hlue ka nyipici me ka inamacan, lo hnene la joxu i angeice hna acile troa musinëne la hnalapa i nyidë?”—MAT. 24:45.
TUPATHE JË TROA SA:
Drei jë lo lai hlue ka nyipici me ka inamacan?
Drei la itre atrene la hnalapa, nge eue la Iesu a acile la hlue ka nyipici hui angatr?
Eue la tro Keriso a acile la hlue ka nyipici hune la nöjei ewekë i nyidrë asë, nge nemene la itre ewekë i nyidrë cili?
1, 2. Jëne drei la Iesu a thewe xeni koi së enehila, nge pine nemene matre jëne mele së la tro sa wangatrehmekune?
“ANGE trejin, thatreine kö ni troa e la etrune la itre ijine eni a kapa la itre tane mekune ka tru koi ni, nge ka traqa ngöne la nyipi ijin.” Hane hi lai trenge ithanata ne la ketre trejine föe ngöne la tusi angeice kowe la itre trejine ka huliwa ngöne la hnalapa ne xomi meköt. Nge tune kaa fe la pengö së? Eje hi laka, ala nyimu qaathe së la ka hane tui angeic. Matre hapeu, tro kö së lai a sesëkötr? Ohea.
2 Ame la xeni ne la u hne së hna kapa, tre, nyine anyipicine ka hape, Iesu, He ne la ekalesia a eatrëne la hnei nyidrëti hna thingehnaeane troa ithua së. Jëne drei la nyidrëti a kuca la huliwa cili? Ame lo Iesu a qaja la hatrene laka nyidrëti hë la, hnei nyidrëti lo hna qaja ka hape, tro nyidrëti a huliwane la “hlue ka nyipici me ka inamacan” göi troa thawa la “xeni koi angate [hnalapa i nyidrë] ngöne la nyipi ijin.” a (E jë la Mataio 24:45-47.) Ngöne la hneijine la pune celë, Iesu a ithuane la itretre drei nyidrë jëne la hlue ka nyipici cili. Mele së la troa wangatrehmekune la hlue ka nyipici. Eje hi laka, jëne la gojenyi cili, tro lai a loi la mele së ngöne la götrane u, nge tro fe sa ce imelekeu hnyawa me Akötresie.—Mat. 4:4; Ioane 17:3.
3. Nemene la hna qaja ekö hnene la itre itusi së göne lo ceitune göi hlue ka nyipici?
3 Haawe, tro sa trotrohnine tune kaa la ceitune i Iesu göne la hlue ka nyipici? Ame ekö, hnene la itre itusi së hna qaja ka hape, ame lo Penetekos 33 M.K. hnei Iesu hna acile la hlue ka nyipici hune la itre atrene la hnalapa i nyidrë. Nge ame la hlue, tre ene la lapa ne la itre Keresiano hna iëne asë e celë fen, ka mele ngöne la nöjei pengöne hneijine qaane lo 33 M.K., uti hë enehila. Ame la itre atrene la hnalapa, tre, kola qaja pala hi lo itre hna iën, ngo angatre pe isa ala cas. Ame lo 1919, hnei Iesu hna acile la hlue ka nyipici hune “la nöjei ewekë i nyidëti asë,” ene la nöjei ewekë i nyidrë e celë fen göne la Baselaia. Ngo, kola amamane jëne la hna inine me mekune ajuine la trenge ithanata i Iesu jëne la thith, ka hape ame la trotrohnine së göne la hlue ka nyipici me ka inamacan, tre nyipi ewekë troa amekötine hmaca. (Ite edomë 4:18) Tro sa ce wange la ceitune celë memine la aqane ketri së, ngacama tro itre xan a elë hnengödrai eë maine itre xane pë hë a mejiune kowe la mele e celë fen.
EUE LA KOLA EATRE LA CEITUNE CELË?
4-6. Pine nemene matre meköti e tro sa qaja ka hape, ame la ceitune i Iesu göi hlue ka nyipici, tre troa eatre e thupene lo itre drai ne la pun ka nyiqaane lo 1914?
4 Kola amamane hnene la itre xötre xötreithe la ceitune göi hlue ka nyipici me ka inamacane ka hape, tha hna nyiqaane eatre kö lo Penetekos 33 M.K., ngo enehila pe ngöne la hneijine ne la pun. Tro sa ce wange la aqane tro xomi së hnene la itre xötre ne la Tusi Hmitrötre matre traqa pi kowe la mekune celë.
5 Ame la ceitune göne la hlue ka nyipici, tre ketre götranene hi lo hna perofetane hnei Iesu göne “la hatrene laka [nyidrëti] hë la, memine la hneijin ne kola troa nyipune la fen.” (Mat. 24:3, MN) Ame la pane götrane la hna perofetane ngöne Mataio 24:4-22, tre, lue ijine kola eatr, hna pane eatre lo 33 M.K., uti hë lo 70 M.K., nge ame la hnaaluen, tre, troa eatre atrunyi ngöne la hneijine së. Hapeu, tha kolo kö lai a amamane ka hape, ame fe la hna qaja hnei Iesu göne la hlue ka nyipici, tre, tro fe a hane alua eatr? Ohea.
6 Ame la Iesu a nyiqaane la trenge ithanta i nyidrë ngöne Mataio 24:29, hnei nyidrëti hna amamane hnyawa la itre ewekë ka troa traqa ngöne la hneijine së. (E jë la Mataio 24:30, 42, 44.) Ame la nyidrëti a qaja la itre ewekë ka troa traqa ngöne la ijine akötre atraqatr, öni nyidrë, tro la itre atr a “goeëne la Nekö i ate kola traqa hune la ite iawe ne hnengödrai.” Thupene lai, ame koi angetre mele ngöne la itre drai ne la pun, hnei nyidrëti hna hmekë angatre me hape: “Tha’ te kö nyipunie la ijine traqa la Joxu i nyipunie” nge, “ngöne la ijine hnei nyipunieti hna tha mekune kö, te, tro ha traqa la Nekö i at.” b Ame ngöne la itre xötre celë, lo Iesu a qaja la itre ewekë ka troa traqa ngöne la itre drai ne la pun, tre, nyidrëti fe hi lai a qaja la ceitune göi hlue ka nyipici. Haawe, meköti e tro sa qaja ka hape, ame la itre trenge ithanata i Iesu göi hlue ka nyipici, tre troa eatre e thupene lo itre drai ne la pun ka nyiqaane lo 1914. Ka hetre aliene la mekune celë. Pine nemene lai?
7. Ame la kola nyiqaane la hneijine menue, nemene la hnyinge ka tru hna amejën, nge pine nemen?
7 Pane mekune hnyawa jë së la hnyinge celë: “E ka la hlue ka nyipici me ka inamacan?” Ame ngöne lo hneijine lo itre pane Keresiano, hetre nyipi kepine matre troa hnyinge tune la. Tune la hne së hna wange ngöne lo tane mekune ka ase hë, hnene la ange aposetolo hna kuca la itre iamamanyikeu, me hamëne koi itre xane la atreine cili, nyine anyipicine ka hape, itre manathithi lai qaathei Akötresie. (Ite hu. 5:12) Haawe, tha sihngödri kö kowe la nöjei atr ekö ka hape, drei la hna acile hnei Keriso troa elemekene la huliwa. Ngo ame pe lo 1914, ketre pengöne kö la aqane trongene la itre ewekë. Hna nyiqaane la hneijine menue la macatre cili. Traqa ha la ijine troa xome trije la itre zizania qa ngöne la itre qitr. (Mat. 13:36-43) Ame la kola nyiqaane la hneijine menue, hetre hnyinge ka tru hna amejëne kola hape: Ame hnine la itre Keresiano göi ëjen ka ala nyimu, tro sa wangatrehmekune tune kaa la qitr, ene la itre Keresiano hna iën? Hnene la ceitune göi hlue ka nyipici hna sa lai hnying. Itre Keresiano hna iëne hi la ange hna ithuane hnyawane ngöne la götrane u.
DREI LA HLUE KA NYIPICI ME KA INAMACAN?
8. Pine nemene matre ka meköti hi e troa qaja ka hape, hna nyiatrene la hlue ka nyipici hnene la itre Keresiano hna iën?
8 Ame la hlue ka nyipici, tre, hna nyiatrene hnene la itre Keresiano hna iëne e celë fen. Hna hëne la itre atr cili ka hape “xötete huje joxu,” nge hna ahnithe koi angatre troa qaja “amamanepi hnei [angatr] la nöjei thina ka loi nyidë ate hë [angatr] qa ngöne la jide kowe la lai nyidë nyine hain.” (1 Pet. 2:9) Haawe, ka meköti hi e troa qaja ka hape, itre atrene la “xötete huje joxu” a inine la nyipici kowe la itre trejine me angatr.—Mal. 2:7; Hna ama. 12:17.
9. Hapeu, itre hna iën asë hi la ka nyiatrene la hlue ka nyipici? Qeje pengöne jë.
9 Hapeu, itre hna iën asë hi la ka nyiatrene la hlue ka nyipici? Ohea. Eje hi laka tha nöjei hna iën asë kö la atrekë hnëqane la troa thewe xeni ngöne la götrane u kowe la itre trejine me angatre e cailo fen. Ame thene la itre qitr, tre, hetrenyi la itre hna iëne ka qatre thupe maine ka drikona ngöne la itre ekalesia i angatr. Angatre a hamë ini ngöne la itre hnalapa trootro, me hnine la itre ekalesia i angatr, nge angatre a sajuëne la itre hna amekötine qaathene la hnalapa ne xomi meköt. Ngo tha ka sine fe kö angatre la huliwa ne thewe xeni ngöne la götrane u kowe la itre trejine e cailo fen. Nge ame la itre trejine föe ka hni ka ipië qaathene la itre hna iën, tha angatre pi fe kö lai a mekune troa hane xome la hnëqa ne hamë ini ngöne la ekalesia.—1 Kor. 11:3; 14:34.
10. Drei lo lai hlue ka nyipici me ka inamacan?
10 Drei jë lo lai hlue ka nyipici me ka inamacan? Maine troa wange lo tulu i Iesu göi troa thuane la ka ala nyimu jëne la ka ala xalaith, ame la itre ka nyiatrene lai hlue, tre, neköi lapa ne la itre trejine trahmanyi hna iën ka hnëkëne me thewe xeni ngöne la götrane la u ngöne la ijine Keriso hë la. Ame ngöne la itre drai ne la pun, hnene la itre trejine hna iën ka nyiatrene la hlue ka nyipici hna ce huliwa ngöne la hnalapa ne xomi meköt. Ame ngöne la itre macatre ka ase hë, tre ka mama hnyawa hi ka hape, ame la hlue, tre kolo Lapa Ne Xomi Meköti Ne La Itretre Anyipici Iehova. Ngo ame pe, ngacama tha ca atr kö la ka nyiatrene lai hlue, ngo ame la kola qeje pengöne ej, kösë casi hi la hlue. Haawe, ame la itre mekune hna xome hnene la Lapa Ne Xomi Meköt, tre itre hna ce axeciën.
DREI LA ITRE ATRENE LA HNALAPA?
11, 12. (a) Nemene la lue götrane qa hna kapa hnene la hlue ka nyipici me ka inamacan? (b) Eue la Iesu a acile la hlue ka nyipici hune la itre atrene la hnalapa i nyidrë, nge drei la hnei nyidrëti hna xome göi troa hlue ka nyipici?
11 Kola mama hnyawa ngöne la ceitune i Iesu, laka lue götrane qa ka isa pengöne hna kapa hnene la hlue ka nyipici me ka inamacan. Ame la hnapan, tre, troa musi hune la itre atrene la hnalapa, nge ame la hnaaluen, tre hune la nöjei ewekëne asë ne la joxu. Pine laka, ame la ceitune celë, tre, tro hi a eatre ngöne la hneijine ne la pun, haawe, ame la lue götrane qa cili, tre troa eatrëne thupene la hna acili Iesu troa joxu lo 1914.
12 Eue la Iesu a acile la hlue ka nyipici hune la itre atrene la hnalapa i nyidrë? Qëmekene tro sa sa la hnying, nyipi ewekë tro sa ithanatane lo kola nyiqaane lo hneijine menue lo 1914. Tune lo hne së hna ce wange hë, ame ngöne la ijine cili, nyimutre la itre lapa ka selëne ka hape, itre Keresiano angatr. Drei la lapa hnei Iesu hna troa iën matre troa acile nyine hlue ka nyipici? Troa sa la hnyinge celë thupene la hna traqa hnei nyidrë me Tretretro i nyidrë troa waipengöne la ēnē, ewekë ngöne la götrane u hna hnëkëne thatraqane la hmi, qaane lo 1914 uti hë la kola xejë la macatre 1919. c (Mal. 3:1) Madrine nyidro la kola öhne la ca neköi lapa ne la Itretre Ini Tusi Hmitrötr ka nyipici, nge ka amamane ka hape, ka pexeje la hni angatre koi Iehova me kowe la Wesi Ula i Nyidrë. Eje hi laka nyipi ewekë fe troa awië angatr, ngo hnei angatre hna kapa hnyawa la kola traqa la ijine kola tupathi angatr, me nyidrawa angatr. (Mal. 3:2-4) Ame la Itretre Ini Tusi Hmitrötr ka nyipici, tre angatre lo itre nyipi Keresiano ka ceitu me qitr. Ame lo 1919, ketre ijine kola xejë hmaca la huliwa ne cainöj, hnei Iesu hna xome la itre trejine trahmanyi hna iëne qaathei angatre matre troa hlue ka nyipici me ka inamacan, me acili angatre troa musi hune la itre atrene la hnalapa i nyidrë.
13. Drei la itre ka nyixane la itre atrene la hnalapa, nge pine nemen?
13 Drei la itre atrene la hnalapa? Kolo itre atr hna ithuan. Ame ngöne la kola xejë la itre drai ne la pun, itre hna iëne hmekuje hi la itre atrene la hnalapa. Nge e thupëne hë, nyixane jë hi la itre atrene la hnalapa hnene la ka ala nyimu ne la itre xa mamoe. Ame enehila, itre xa mamoe la ka mana catre hnine la “hna axö mamoe” ka cas fene la musi Keriso. (Ioane 10:16) Nge lue lapa cili a ce kepe thangane la xeni ngöne la götrane u hna hamëne hnene la hlue ka nyipici ngöne la nyipi ijin. Nge nemene pë hë la pengöne la itre atrene la Lapa Ne Xomi Meköti ka nyiatrene enehila la hlue ka nyipici me ka inamacan? Ame fe la itre trejine cili, nyipi ewekë tro fe a hane ithua i angatre ngöne la götrane u. Haawe, atrehmekune hnyawa hi angatre laka, ame angatre isa ala cas, tre itre atrene fe angatre la hnalapa, tune lo nöjei atre drenge asë ka mele nyipici koi Iesu.
14. (a) Nemene la hnëqa hna athipe kowe la hlue ka nyipici, nge nemene la huliwa i angeic? (b) Nemene la aqane hmekëne Iesu la hlue ka nyipici me ka inamacan? (Wange ju la itre mekune hna eköhagen hna hape, “Maine Önine Lai Hlue Ka Ngazo . . . ”)
14 Hnei Iesu hna athipe la ketre hnëqa ka tru kowe la hlue ka nyipici me ka inamacan. Ame ngöne la itre ijine hna qaja e hnine la Tusi Hmitrötr, ame la hlue hna mejiune kow, tre, ketre atre thupëne me musinëne la hnalapa. (Luka 12:42) Haawe, qa ne la hlue ka nyipici me ka inamacan troa thupëne la hnalapa ne la itre hlue i Akötresie. Ame la hnëqa cili, tre, ene la troa thupëne la itre mo me itre jia ne huliwa, me huliwa ne cainöj, me itre porogarame thatraqane la itre asabele, me troa kuca la itre itusi thatraqane la huliwa ne cainöj, me nyine isa inin, me nyine inine ngöne la hna Ini Tus ngöne la ekalesia. Itre atrene la hnalapa a mele hnene la itre xeni ne la u hna thawa hnene la hlue ka nyipici.
EUE LA KOLA ACILE LA HLUE HUNE LA NÖJEI EWEKË NE LA JOXU?
15, 16. Eue la Iesu a acile la hlue hune la nöjei ewekë i nyidrëti asë?
15 Eue la kola hamëne la hnaaluene götrane qa, ene la troa musi hune la “nöjei ewekë i nyidëti asë”? Öni Iesu: “Manathithi hë la hlue cili, e traqa la joxu i angeic’ a öhnyi angeic’ a kuca tune lai. Nyipici ini a qaja koi nyipunie, tro nyidëti a acilë angeice troa musinëne la nöjei ewekë i nyidëti asë.” (Mat. 24:46, 47) Mama hnyawa hi laka, hnei Iesu hna hamëne la hnaaluene götrane qa thupene la traqa i nyidrë, nge kola öhne la hlue a “kuca tune lai,” ene la kola thawa hnyawa la xeni ne la u. Haawe, hetre hnepe ijine akawane la lue hnëqa hna hamën. Ame göi troa trotrohnine la aqane me ijine tro Iesu a acile la hlue hune la nöjei ewekë i nyidrë asë, tre, lue ewekë nyine tro sa atre hnyawa: eue la traqa i nyidrë, nge nemene la itre ewekë i nyidrë.
16 Eue la traqa i Iesu? Ame la mekune ka sa, tre eje ngöne la itre xötre xötreith. Mekune kö epuni lo itre xötre ka tro pa lo ka qeje Iesu e “traqa,” ame lai hnaewekë cili, tre, kola qaja lo ijine nyidrëti a traqa troa qaja la hna amekötine me eatrëne eje ngöne la pune la fene celë. d (Mat. 24:30, 42, 44) Haawe, ame la “traqa” i Iesu hna qaja ngöne la ceitune göi hlue ka nyipici, tre troa eatre ngöne la ijine akötre atraqatr.
17. Nemene la itre ewekë i Iesu?
17 Nemene la “nöjei ewekë i [Iesu] asë”? Ame la Iesu a qaja la hnaewekë ka hape, “asë,” tre tha göi troa qaja hmekuje kö la itre ewekë e celë fen. Ka tru catre fe kö la musi Iesu e hnengödrai. Öni nyidrë: “Ase hë hamë ni la nöjei musi asë e hnengödrai me celë fen.” (Mat. 28:18; Efe. 1:20-23) Ame la itre ewekë i nyidrë enehila, tre kolo fe a qaja la Baselaia ne la Mesia, hnei nyidrëti hna kapa qaane lo 1914, nge nyidrëti a ce musi memine la itre trejine me nyidrë hna iën.—Hna ama. 11:15.
18. Pine nemene matre madrine Iesu troa acile la hlue hune la nöjei ewekë i nyidrë asë?
18 Nemene la hne së hna trotrohnine qa ngöne la itre mekune hne së hna ce wang? Ame la Iesu elanyi a traqa troa iameköti ngöne la ijine akötre atraqatr, tro nyidrëti a öhne la hlue ka nyipici a thawa hnyawa la xeni ne la u kowe la itre atrene la hnalapa i nyidrë ngöne la nyipi ijin. Celë hi matre, madrine Iesu troa acili angeice hmaca ngöne la hnaaluene götrane qa i angeic, ene la troa musi hune la nöjei ewekë i nyidrë. Tro la itre ka nyiatrene la hlue ka nyipici a kapa la götrane qa celë ngöne la ijine angatre a kapa elanyi la edrö i angatre e hnengödrai, ene la troa ce musi me Keriso.
19. Tro kö a sisitria la edrö ne la hlue ka nyipici e hnengödrai hune la itre xa hna iën? Qeje pengöne jë.
19 Hapeu, tro kö a sisitria la edrö ne la hlue ka nyipici e hnengödrai hune la itre xa hna iën? Ohea. Ame la edrö hna thingehnaeane ngöne la ketre ijine kowe la neköi lapa ka co, tre tro fe a hane kapa hnei itre xan. Pane mekune jë la hnei Iesu hna qaja kowe lo 11 lao aposetolo lo jidri qëmekene tro nyidrëti a mec. (E jë la Luka 22:28-30.) Hnei Iesu hna thingehnaeane kowe la neköi lapa ka co ne la itre trejine trahmanyi ka hape, hetre thupene hna hnëkëne koi angatre pine la aqane mele nyipici angatr. Tro angatre a ce thawa la musi ngöne la therone i nyidrë. Ngo itre macatre thupen, hnei nyidrëti hna amamane ka hape, tro asë hi la ala 144 000 a lapa hune la itre therone me ce thawa la musi nyidrë. (Hna ama. 1:1; 3:21) Ketre tune mina fe, tune la hna qaja ngöne Mataio 24:47, hnei nyidrëti hna thingehnaeane ka hape, tro la neköi lapa ka co ne la itre trejine trahmanyi, ene la itre hna iëne ka nyiatrene la hlue ka nyipici a kapa la hnëqa troa musi hune la nöjei ewekë i nyidrë. Ngo ame la ka mama hnyawa, tre tro la ala 144 000 asë a ce thawa la musi nyidrë e hnengödrai.—Hna ama. 20:4, 6.
20. Pine nemene matre acile jë Iesu la hlue ka nyipici, nge nemene la hne së hna troa catre kuca?
20 Jëne la hlue ka nyipici me ka inamacan, hnei nyidrëti hna ithuane la ka ala nyimu jëne la ka ala xalaith, Iesu hi lai a xötrethenge lo tulu hnei nyidrëti hna acile ekö. Hnei Iesu hna acile la hlue cili ka nyipici matre troa xecie koi nyidrëti ka hape tro la itretre drei nyidrë ka mele nyipici, ene la itre hna iëne me itre xa mamoe, a kapa la xeni ne la u ngöne la nyipi ijin ngöne la itre drai ne la pun. Haawe, catre pi së amamane la ole së kowe la itre hna hnëkëne hnei Iesu göi troa thawa la xeni ne la u, me xatuane la itre trejine trahmanyi hna iën ka nyiatrene la hlue ka nyipici me ka inamacan.—Heb. 13:7, 17.
ITHUEMACANYI E KUHU PUN: (Troa e tune lo itre ithuemacanyi hna amë pune ipepa thenge la isa paragarafe hmekun.)
Ithuemacanyi e cahu fen]
a Paragarafe 2: Hnei Iesu hna qaja la ketre ceitune ka tune lai, hnei nyidrëti hna qaja la “hlue” ka hape, “ate thup.”—Luka 12:42-44.
b Paragarafe 6: Isa pengöne kö la “traqa” i Keriso (qene Heleni, erʹkho·mai) memine la hna qaja ka hape, nyidrëti “[“hë la,” MN]” (pa·rou·siʹa). Ame la nyidrëti hë la, ngo tha mama kö, tre, hna nyiqaane qëmekene la traqa i nyidrëti troa iameköti.
c Paragarafe 12: Wange ju la tane mekune hna hape, “Hana Wang Ini a Ce Me Nyipunie Ngöne La Nöjei Drai Asëjëihë” ngöne la zonale celë, götrane 10-12, paragarafe 5-8.
d Paragarafe 16: Wange ju la tane mekune hna hape, ‘Epi Qaja Jë Koi Hun, Troa Traqa Eue La Itre Ewekë Cili?’ ngöne la zonale celë, götrane 7-8, paragarafe 14-18.
[Thying]
[Iatr ne la götran 20]
[Hna eköhagen ne la götran 22]
TROTROHNINE HË EPUN?
“Hlue ka nyipici me ka inamacan”: Ketre neköi lapa ka co ne la itre trejine trahmanyi hna iën ka hnëkëne me thewe xeni ngöne la götrane la u ngöne la ijine Keriso hë la. Ame enehila, ame la itre trejine trahmanyi cili hna iën, tre itre ka nyiatrene la Lapa Ne Xomi Meköt
Itre atrene la “hnalapa i nyidrë”: Itre hna thewe xeni kow, ange iëne me itre xa mamoe
“Hna acile troa musinëne la hnalapa i nyidë”: Ame lo 1919, hnei Iesu hna xome la itre trejine trahmanyi hna iëne matre troa hlue ka nyipici me ka inamacan
“Tro nyidëti a acilë angeice troa musinëne la nöjei ewekë i nyidëti asë”: Ame la itre ka nyiatrene la hlue ka nyipici, tre tro angatre a kapa la götrane qa celë ngöne la ijine angatre a kapa elanyi la edrö i angatre e hnengödrai. Nge tro angatre a ce thawa la musi nyidrë e hnengödrai memine asë la ala 144 000
[Iatr ne la götran 22, 23]
Maine itre ka mejiune ju hë së kowe la mele e hnengödrai maine e celë fen, ngo itre atrene asë hi së la hnalapa, nge easë asë hi a ajane la xeni ka cas, ene la xeni ne la u ngöne la nyipi ijin
[Hna eköhagen ne la götran 24]
“MAINE ÖNINE LAI HLUE KA NGAZO . . .”
Hnei Iesu hna athipe la itre hnëqa ka tru catre kowe la hlue ka nyipici me ka inamacan, ene la troa thupëne la itre atrene la hnalapa, me thawa la xeni ngöne la u ngöne la nyipi ijin. Atre hnyawa hi Iesu ka hape, ame la itre atr ka tru hnëqan, tre, tro kö a nyi thupene koi angatre thenge la huliwa i angatr. (Luka 12:48) Haawe, hnei nyidrëti hna umuthe la ceitune i nyidrë göi hlue ka nyipici me ka inamacane hnene la ketre ithanata ka catre nyine troa hmekë angeic.
Hnei Iesu hna ithuemacanyi göne la ketre hlue ka ngazo, atre qaja ngöne la hni angeice ka hape, hmitre pala kö la joxu, nge angeice a nyiqaane lepe la itre hlue sine i angeic. Öni Iesu, ame hë la kola traqa hnene la joxu, tro hë nyidrëti a “thupa luë angeic,” ene la troa xeni pune ka ngazo.”—E jë la Mataio 24:48-51.
Hapeu, hnei Iesu kö hna qaja amë ka hape, troa hetrenyi la ketre lapa ne la hlue ka ngazo ngöne la itre drai ne la pun? Ohea. Nyipici laka, hetre itre atr ka ujë tune la hlue ka ngazo hna qaja hnei Iesu. Hne së hna hë angatre ka hape, itre ka iamenumenu, itre ka lö qaathene la itre hna iëne, maine qaathene pena “la ka ala nyimu atraqat.” (Hna ama. 7:9) Ngo tha hnene kö la itre atr cili hna nyiatrene la ketre lapa ne la hlue ka ngazo. Tha hnei Iesu kö hna qaja ka hape, tro nyidrëti a acile la hlue ka ngazo. Haawe, ame la itre trenge ithanata i Iesu e celë tre, nyine hmekëne la hlue ka nyipici me ka inamacan.
Öhne hi epuni la aqane nyiqaane Iesu la itre ithanata i nyidrë göi troa hmekëne la hlue, öni nyidrë, “maine.” Kolo hi lai a hape, hna mainëne la ewekë ka troa traqa, ke, tro lai a traqa e hetre ewekë ka ngazo hna kuca. Haawe, Iesu hi lai a qaja ka hape: ‘E tro la hlue ka nyipici me ka inamacan a lepe la itre hlue sine i angeic, tre tro hë lai joxu a nyipune koi angeice tune lai e traqa pi nyidrë.’ (Wange ju fe la Luka 12:45.) Ngo ame pe, hnene pala hi la hlue ka nyipici me ka inamacan hna catre hmek, me thawa la xeni ne la u.
Atre hnyawa hi la itre trejine trahmanyi hna iën, ka kuca la huliwa ne la hlue ka nyipici, laka, tro la Joxu a hnyingë pengöne la huliwa hna upi angatre troa kuca, ene la troa thupëne la itre atrene la hnalapa i nyidrë. Ame la trenge aja ne la itre hna iëne celë, tre, ene la troa eatrëne hnyawane la hnëqa i angatre matre e traqa pi la Joxu, tro angatre a drenge la nyidrë a qaja koi angatre ka hape, “Ole.”
[Iatr ne la götran 25]
Tro asë hi la ala 144 000 a ce thawa la musi atraqatre i Iesu e hnengödrai (Wange ju la paragarafe 19)
