“Epi Qaja Jë Koi Hun, Troa Traqa Eue La Itre Ewekë Cili ?”
‘Epi Qaja Jë Koi Hun, Troa Traqa Eue La Itre Ewekë Cili?’
“Nemene la hatrene laka cilieti hë la, memine la hneijin ne kola troa nyipune la fen?”—MAT. 24:3, MN.
NEMENE LA AQANE TRO NYIPUNIETI A SA?
Nemene la ewekë ka cas ka traqa ngöne la kola isa eatre lo lue hna perofetane hnei Iesu?
Nemene la thangane qa ngöne la aqane trotrohnine së la ceitune ne la itre mamoe me gootr kowe la aqane goeëne së la huliwa ne cainöj?
Ame ngöne Mataio mekene 24 me 25, eue lo ijine hna qaja hnei Iesu göi traqa i nyidrë?
1. Tune la itre aposetolo, nemene fe la hne së hna pi atre?
TRAQA ha kowe la pune la huliwa ne cainöje i Iesu e celë fen, nge kola pi atre hnene la angetre drenge la ka troa traqa koi angatre ngöne la itre drai ka calemi. Celë hi matre itre hnepe drai qëmekene tro nyidrëti a mec, hnene la eke aposetolo hna hnyinge koi nyidrë me hape: “Epi qaja jë koi hun, troa traqa eue la itre ewekë cili? nge nemene la hatrene laka cilieti hë la, memine la hneijin ne kola troa nyipune la fen?” (Mat. 24:3, MN; Mar. 13:3) Hnei Iesu hna sa jëne la ketre hna perofetane ka tru alien, hna qaja ngöne Mataio mekene 24 me 25. Ame la hna perofetane celë, nyimu ewekë ka tru ka troa traqa hna qaja amë hnei Iesu. Ka tru aliene catre la itre hna ithanata celë koi së, ke, pi tro fe sa hane atre la itre ewekë ka troa traqa ngöne la itre drai ka calemi.
2. (a) Nemene la mekune hne sa thele troa trotrohnine hnyawa ngöne la itre macatre ka nyimutre? (b) Nemene la köni hnyinge nyine tro sa ce wang?
2 Ngöne la itre macatre ka nyimutre, hnene la itre hlue i Iehova hna thele troa atre jëne la thith la aliene la itre hna perofetane hnei Iesu göne la itre drai ne la pun. Hnei angatre hna thele troa trotrohnine hnyawa la ijine troa eatre la itre trenge ithanta i Iesu. Tro sa ce wange la köni hnyinge hna xejë hnene la hna ithanata hna hape, “eue” ka amamane la aqane alaine la trotrohnine së. Eue la kola nyiqaane la “aköte atraqate”? Eue la kola amekötine hnei Iesu la “nöjei mamoe” me “nöjei got”? Eue la kola “traqa” hnei Iesu?—Mat. 24:21; 25:31-33.
EUE LA KOLA NYIQAANE LA AKÖTRE ATRAQATR?
3. Ame ekö, nemene la aqane trotrohnine së göi ijine troa traqa la akötre atraqatr?
3 Ngöne la itre macatre ka nyimutre, hne së hna mekune ka hape, ame la akötre atraqatr, tre hna nyiqaane lo 1914 ngöne lo Pane Isi Ka Tru, nge hnei Iehova hna “axalaithene [. . .] la nöjei drai cili” lo 1918, lo kola fenesi la isi, matre troa nue ijine kowe la thelene la itre hna iëne troa cainöjëne la maca ka loi kowe la nöjei nöj. (Mat. 24:21, 22) Ase jë hi umuthe la huliwa ne cainöj, ame hna apatrene pi la musi Satana. Celë hi matre, hna mekune ekö lo ka hape, hetre köni aqane trongene la akötre atraqatr: troa hetre qaan (1914-1918), thupene lai troa pane patre la akötre atraqatr (qaane lo 1918), nge ase hë troa nyipune e Amagedo.
4. Nemene la mekune ka mama, nge ka tro xomi së troa trotrohnine hnyawa la hna perofetane hnei Iesu göne la itre drai ne la pun?
4 Ngo thupene la hna waipengöne hnyawa la itre hna perofetane hnei Iesu, mama pi hi ka hape, ame la ketre götrane la hna perofetane hnei Iesu göi itre drai ne la pun, tre ka alua eatr. (Mat. 24:4-22) Hna pane eatre ekö koi Iudra qaane lo 33 koi 70. M.K., a nge tro fe a eatre kowe la fene hnengödrai ngöne la hneijine së. Hnene hë la mekune hna trotrohnine hnyawa celë hna fe la lue meke së kowe la itre xa ewekë hmaca. b
5. (a) Nemene la hneijine ka jole ka nyiqaane lo 1914? (b) Ame la hneijine la itre akötr, tre ka ihmeku me nemene ijin ekö?
5 Hne së fe hna trotrohnine ka hape, ame la pane aqane trongene la akötre atraqatr, tre, tha hna nyiqaane kö lo 1914. Pine nemen? Pine laka, kola amamane hnene la hna perofetane hnei Tusi Hmitrötre ka hape, troa nyiqaane la akötre atraqatre hnene la kola lepe apatrene la hmi thoi, ngo tha hnene kö la kola isi la itre nöj. Celë hi matre, ame la itre ewekë ka traqa lo 1914 tre tha kolo kö a nyiqaane la akötre atraqatr, ngo kolo pe lo “ite qane la aköt.” (Mat. 24:8) Ame la itre “aköt” cili tre, kola ihmeku hnyawa memine la ka traqa e Ierusalema me Iudra qaane lo 33 koi 66 M.K.
6. Nemene la ka nyi hatrene la kola nyiqaane la akötre atraqatr?
6 Nemene la ka nyi hatrene la kola nyiqaane la akötre atraqatr? Hna perofetane hnei Iesu ka hape: “E öhnë hë nyipunieti la ewekë ka sis, ate angazon, kola cile ngöne la ga hmitöt, ene lo hna ulatine hnei Daniela perofeta, (trotrohnineju hnei ate e,) tro itete lapa e Iuda a köte kowe la ite wet.” (Mat. 24:15, 16) Ame ngöne lo kola pane eatrën lo hna qaja ka hape “cile ngöne la ga hmitöt,” tre, hna eatre lo 66 M.K. lo itre soce i Roma (“ewekë ka sis”) a lepi Ierusalema, memine lo ēnē (göhnë ka hmitrötre koi angetre Iudra). Ame la troa nyi hnaaluene eatre lai hna qaja ka hape “cile,” tre, ene la tro la Organizasio Ne La Itre Nöj Ka Ce Xöl, ene lo hna hape ONU (“ewekë ka sis” ngöne la itre hnedrai së) a lepe apatrene la Itre Hmi Keresiano Göi Ëjen (lo ka hmitrötre qëmekene la itre Keresiano göi ëjen) memine la thelene la Babulona Atraqatr. Hna qeje pengöne fe la isi celë ngöne Hna Amamane 17:16-18. Tro la ewekë celë a nyiqaane la akötre atraqatr.
7. (a) Hna tune kaa matre hetre ka ‘mele’ pe kö lo hneijine ne lo itre pane Keresiano? (b) Haawe, nemene la hne së hna troa öhne ngöne la itre drai ka calemi?
7 Hnei Iesu mina fe hna perofetane ka hape: “Tro ha axalaithene la nöjei drai cili.” Hna xötrei eatre la ewekë celë lo 66 M.K. lo itre soce i Roma a “axalaithene” la itre drai ne isi angatr. Thupene ju hi lai, kötre jë hi la itre Keresiano hna iëne ne Ierusalema me Iudra matre ‘mele’ pi angatr. (E jë la Mataio 24:22; Mal. 3:17) Haawe, nemene la hne së hna troa öhne ngöne la kola traqa la akötre atraqatr? Tro Iehova a “axalaithene” la itre drai ne tro la ONU a lepe la hmi ka thoi, matre tha tro kö a ce lepe apatrene la nyipi hmi me hmi ka thoi. Hane hi lai ka amamane koi së ka hape, tro pe kö a mele la nöje i Akötresie.
8. (a) Nemene la ewekë ka traqa thupene la pane ewekë hna kuca ngöne la akötre atraqatr? (b) Eue la ijine tro la atrene tixenuë ne la ala 144 000 a kapa la edrö i angeice e hnengödrai? (Wange ju la ithuemacanyi e kuhu pun.)
8 Nemene la ewekë ka traqa thupene la pane ewekë hna kuca ngöne la akötre atraqatr? Kola amamane hnene la itre trenge ithanata i Iesu ka hape, thupene la pane ewekë hna kuca ngöne la akötre atraqatr uti hë Amagedo, tre troa hetre hnepe ijin. Nemene la itre ewekë ka troa traqa ngöne lai hnepe ijine akawane cili? Hanawange la hna sa hnei Ezekiela 38:14-16 me Mataio 24:29-31. (E jë.) c Thupene lai, tro sa öhne la isi Amagedo, ka troa nyipune la akötre atraqatr, kola ihmeku memine lo kola lepi Ierusalema lo 70 M.K. (Mal. 4:1) Isi Amagedo hi la ka troa nyipun, nge, ame la akötre atraqatre ka troa xulu, tre pëkö ka troa ceitu memin, nge “pëkö hna tune kö qa ngöne la qane la fene hnengödrai.” (Mat. 24:21) Ase jë hi lai, nyiqaane jë la Musi Keriso Ka Caa Thauzane Lao Macatre.
9. Nemene la thangane la hna perofetane hnei Iesu göne la akötre atraqatre kowe la nöje i Iehova?
9 Ithuecatre ka tru koi së la hna perofetane celë göne la akötre atraqatr. Pine nemen? Pine laka kola anyipicine koi së ka hape, ngacama troa traqa la itre jol, ngo tro la nöje i Iehova, ene la lapa i Nyidrë a mele pe qa ngöne la akötre atraqatr. (Hna ama. 7:9, 14) Nge e hune la nöjei ewekë asë, troa tru la madrine së, ke ame e Amagedo, tro Iehova a amamane la musi cile i Nyidrë, nge tro Nyidrëti a atrune la atresiwa i Nyidrë ka hmitrötr.—Sal. 83:18; Ezek. 38:23.
EUE LA KOLA AMEKÖTINE HNEI IESU LA NÖJEI MAMOE ME NÖJEI GOOTR?
10. Nemene lo aqane trotrohnine së ekö ka hape, eue la ijine troa eatre lo kola amekötine la itre mamoe me gootr?
10 Tro sa ce wange enehila la ijine troa eatre la ketre götrane la hna perofertane hnei Iesu, ene lo ceitune i nyidrë ka qaja lo kola amekötine la itre mamoe me gootr. (Mat. 25:31-46) Ame ekö, kola mekune ka hape, ame la kola amekötine la itre atr ka ceitu me mamoe maine gootr, tre kola traqa ngöne lo hneiijine ne la itre drai ne la pun, qaane lo 1914 nge enehila pala hi. Hne së lo hna mekune ka hape, ame la angetre trije la maca ne la Baselaia, nge ka meci qëmekene troa nyiqaane la akötre atraqatr, ceitu i angatre me itre gootr, laka gufa ha koi angatre la mele hmaca.
11. Pine nemene matre tha hnei Iesu kö hna amekötine la itre atr ka ceitu me mamoe maine gootre ngöne lo macatre 1914?
11 Ame ngöne lo macatre 1995, hnene la Ita Ne Thup hna waipengöne hmaca la hna qaja ngöne Mataio 25:31 lo kola hape: “E traqa ha la Nekö i ate ngöne la lolo i angeic, ce memine la nöjei angela asëjëihë, nge tro angeic’a të hune la therone ka lolo i angeic.” Atre hi së lo laka cile hë Iesu troa Joxu Ne La Baselaia i Akötresie lo 1914, ngo ame pe tha “të [kö] hune la therone ka lolo i [nyidrë]” göi troa amekötine “la nöjei nöj’ asëjëihë.” (Mat. 25:32; nge pane wange ju fe la Daniela 7:13.) Ngo, hnene la ceitune ne la itre mamoe me gootre hna pane qeje Iesu ka hape, Atre Amekötin. (E jë la Mataio 25:31-34, 41, 46.) Pine laka, tha mama petre kö Iesu ceitu me Atre Amekötine la nöjei nöje lo 1914, tha hnei Iesu kö hna amekötine la itre atr ka ceitu me mamoe me gootre ngöne lo macatre cili. d Ngo tro kö a nyiqaane eu la iameköti Iesu?
12. (a) Eue la ijine tro Iesu, Atre Amekötin a nyiqaane amekötine la nöjei nöje asë? (b) Nemene la itre ewekë hna qeje pengöne ngöne Mataio 24:30, 31 me Mataio 25:31-33, 46?
12 Hnene la hna perofetane hnei Iesu göne la itre drai ne la pun hna amamane ka hape, tro Iesu, Atre Amekötin a nyiqaane amekötine la nöjei nöje asë, e ase jë apatrene la hmi ka thoi. Ase hë lo qaja ngöne la paragarafe 8 la itre ewekë ka troa traqa ngöne la ijine cili, lo itre hna cinyihane ngöne Mataio 24:30, 31. Ame la easa waipengöne la itre xötre celë, öhne ju hi së laka, ceitu hi la hnei Iesu hna qaja ngöne la itre xötre celë memine la itre hnei nyidrëti hna qaja göi itre mamoe me itre gootr. Hanawange la ketre ceitun, hnene la Nekö i atr hna traqa hnine la lolo cememine la itre angela; ame hna icasinekeune la nöjei nöje asë; nge ame ange hna amekötine ka hape mamoe, tre angatr a “galajë,” ke, “mele ka tha ase palua kö” la edrö i angatr. e Ame pë hë la itre hna amekötine ka hape, gootr, angatre a “iteijenyi,” me atrehmekune laka ame la pune koi angatr, tre ene la hna “troa nyi thupene ka tha ase palua kö,” ene la troa apatrene triji angatr.—Mat. 25:31-33, 46.
13. (a) Eue la ijine tro Iesu a amekötine la itre atr, itre ka troa mamoe maine gootr? (b) Nemene la thangane qa ngöne la aqane trotrohnine celë kowe la aqane goeëne së la huliwa ne cainöj?
13 Haawe, nemene ju hë la aqane tro sa trotrohnin? Tro Iesu a amekötine la itre atr ne la nöjei nöje ceitu me mamoe maine gootr, e traqa pi nyidrë ngöne la ijine akötre atraqatr. Thupene lai, troa “nyi thupene,” ene la troa apatrene paluane la itre atr hna aceitunëne me gootr, e Amagedo, lo ka umuthe la akötre atraqatr. Nemene la thangane qa ngöne la aqane trotrohnine celë kowe la aqane goeëne së la huliwa ne cainöj? Tro eje a xatua së troa nyipi ewekëne catrëne la huliwa ne cainöje së. Uti hë la kola nyiqaane la akötre atraqatr, hetre ijine pala kö kowe la itre atr troa saze la aqane waiewekë i angatr, me nyiqaane xötrëne la gojenyi ka ilitre “ne tro kowe la mel.” (Mat. 7:13, 14) Eje hi laka, ame enehila itre atr a amamane la thiina i angatr, itre xan a ceitu me mamoe nge itre xan me gootr. Ngo ame pe, tha tro kö sa thëthëhmine ka hape, ame la ijine troa amekötine tixenuëne ka hape, mamoe la maine gootr, tre, tro lo a traqa ngöne lo ijine akötre atraqatr. Celë hi matre, ijine tro pala kö së la a fe gojenyine la itre atr troa drenge me kapa la maca ne la Baselaia.
EUE LA KOLA TRAQA HNEI IESU?
14, 15. Nemene la eke xötre ka qeje Iesu e traqa ceitu me Atre Amekötin?
14 Hapeu, kolo kö a mama ngöne la hna perofetane hnei Iesu ka hape, tro fe kö a hane ahnyipixene la aqane trotrohnine së göne la ijine troa eatre la itre xa ewekë ka tru ka troa traqa? Tro kö lai hna perofetane a sa koi së. Tro sa ce wang.
15 Ame ngöne la pane götrane la hna perofetane hnei nyidrë ngöne Mataio 24:29–25:46, hnei Iesu hna amamane hnyawa la itre ewekë ka troa traqa ngöne la itre drai ne la pune celë, me ngöne la ijine troa traqa la akötre atraqatr. Ame e celë, eitre lao xötre ka qaja la “traqa” i Iesu. Ame la nyidrëti a qeje akötre atraqatr, öni nyidrë: “Kola goeëne la Nekö i ate kola traqa hune la ite iawe ne hnengödrai.” “Tha’ te kö nyipunie la ijine traqa la Joxu i nyipunie.” “Ngöne la ijine hnei nyipunieti hna tha mekune kö, te, tro ha traqa la Nekö i at.” Nge ame ngöne la ceitune i Iesu göi itre mamoe me gootr, öni nyidrë: “Traqa ha la Nekö i ate ngöne la lolo i angeic.” (Mat. 24:30, 42, 44; 25:31) Ame ngöne la eke xötre celë, tre itre eje asë hi a qeje Iesu e traqa ceitu me Atre Amekötin. Tro sa öhne ekaa la eke xa “traqa” hna cinyihane ngöne la hna perofetane hnei Iesu?
16. Nemene la itre xa xötre ka qaja la traqa i Iesu?
16 Ame lo Iesu a qaja la hlue ka nyipici me ka inamacan, öni nyidrë: “Manathithi hë la hlue cili, e traqa la joxu i angeic’ a öhnyi angeic’ a kuca tune lai.” Ame ngöne lo ceitune i Iesu göi itre jajiny, öni nyidrë: “Angate pete kö a troa itö, ame hna traqa pe la ate xötei faipoipo.” Ame ngöne lo ceitune i Iesu göi itre talan, öni nyidrë: “Thupene la nöjei drai ka nyimute ame hna traqapi la joxu ne la nöjei hlue cili.” Hnene la joxu hna qaja ngöne lai ceitune cili ka hape: “E traqa ni, tro ni a hetenyi hmaca la ewekënge.” (Mat. 24:46; 25:10, 19, 27) Ame ngöne la eke xötre celë ka qaja la traqa i Iesu, tre troa eatre eu?
17. Nemene lo hne së hna qaja ekö göne la traqa i Iesu tune la hna hna qaja ngöne Mataio 24:46?
17 Ame petre kö ekö, hne së hna qaja ngöne la itre itusi së ka hape, ame la eke xötre hne së hna ase ithanatan, tre kola eatre ngöne lo traqa i Iesu lo 1918. Hane hi la ketre ceitun, tro sa xome la hnaewekë i Iesu göne la “hlue ka nyipici me ka inamacan.” (E jë la Mataio 24:45-47.) Hne së lo hna trotrohnine ka hape, ame la “traqa” hna qaja ngöne la xötre 46, tre kola qaja la ijine kola wange hnyawa la pengöi itre hna iëne ngöne la götrane la u lo 1918, nge ame lo kola acile la hlue hune la itre ewekë i joxu, tre kola eatre lo 1919. (Mal. 3:1) Ngo, ame hë la kola wange la hna perofetane hnei Iesu, mama hnyawa ju hi ka hape, nyipi ewekë troa amekötine lo aqane trotrohnine së göne lo ijine troa eatre la itre xa götrane hna perofetane hnei Iesu. Pine nemen?
18. Thupene la hna waipengöne hnyawa la itre hna perofetane hnei Iesu, tre nemene ju hë la hne së hna trotrohnine göne la traqa i Iesu?
18 Ame ngöne la itre xötre qëmekene la Mataio 24:46, ame la hna ithanata “traqa,” tre kola qaja hnyawa pala hi la ijine tro Iesu a traqa troa qaja la hna amekötine me eatrëne eje ngöne la ijine akötre atraqatr. (Mat. 24:30, 42, 44) Ketre, tune la hne së hna ce wange hë ngöne la paragarafe 12, ame la “traqa” i Iesu ngöne Mataio 25:31, tre, casi hi lai ijine cili memine lo ijine kola troa iameköti elany. Celë hi matre, meköti e tro sa qaja ka hape, ame la traqa i Iesu troa acilëne la hlue ka nyipici hune la nöjei ewekë i nyidrë asë hna qaja ngöne Mataio 24:46, 47, tre, tro fe a eatre ngöne la traqa i nyidrë elany, ngöne la ijine akötre atraqatr. Eje hi laka, kola mama ngöne la hna waipengöne la itre hna perofetane hnei Iesu ka hape, kola eatre la eitre lao xötre ka qaja la traqa i Iesu ngöne lo ijine troa iameköti elanyi ngöne la ijine akötre atraqatr.
19. Nemene la itre mekune ka hnyipixe hne së hna ce wange hë; nge nemene la itre hnyinge nyine troa sa ngöne la itre tane mekune ka troa xulu?
19 Nemene lo hne së hna inin? Ame ngöne la qaane la tane mekune celë, köni hninge hna nyiqaane hnei “eue” hne së lo hna amexej. Hne së lo hna ce wange ka hape, ame lo akötre atraqatr, tre tha hna nyiqaane kö lo 1914, ngo troa nyiqaan, e cile jë la Itre Nöj Ka Ce Xöl, lo hna hape ONU troa lepe apatrenyi Babulona Atraqatr. Ase jë hi, hne së hna ce wange hmaca la kepine matre tha hna nyiqaane kö la iameköti Iesu kowe la itre mamoe me gootre lo 1914, ngo tro pe a traqa ngöne la ijine kola akötre atraqatr. Hne së hna nyipune hnene lo kola ce wange la kepine matre tha traqa kö Iesu troa acile la hlue ka nyipici hune la nöjei ewekë i nyidrë asë lo 1919, ngo troa eatre ngöne la ijine akötre atraqatr. Haawe, ame asë hi la köni “eue,” tro asë hi itre eje a eatre elanyi ngöne la hnepe ijine ka cas, ene la ijine akötre atraqatr. Thupene hë la itre mekune ka hnyipixe celë, nemene hë la aqane trotrohnine së lo ceitune ka qaja la hlue ka nyipici? Nge nemene mina fe la aqane tro sa trotrohnine la itre xa ceitune i Iesu ka eatre ngöne la ijine la pune celë? Tro sa ce wange la itre hnyinge celë ka nyipi ewekë ngöne la itre tane mekune ka troa xulu.
ITHUEMACANYI E KUHU PUN: (Troa e tune lo itre ithuemacanyi hna amë pune ipepa thenge la isa paragarafe hmekun.)
Ithuemacanyi e cahu fen]
a Paragarafe 4: Ame la M.K., tre, kola hape macatre i Keriso.
b Paragarafe 4: Maine epuni a aja itre xa ithuemacany, wange ju la Ita Ne Thup ne 15 Febuare 1994, götrane 8-21 me 1 Mei 1999, götrane 8-20 (qene Wiwi).
c Paragarafe 8: Ame la ketre ewekë hna qaja ngöne la itre xötre celë, tre ene la kola ‘icasinekeune’ la nöjei hna iën. (Mat. 24:31) Haawe, kola mama laka, ame la itre hna iëne ka lapa pala kö e celë fen thupene la pane ewekë hna kuca ngöne la akötre atraqatr, tre, tro angatre a elë hnengödrai eë qëmekene troa nyiqaane la isi Amagedo. Ame la hna qaja celë, tre kola ahnyipixene lo hna cinyihane ngöne la tane mekune hna hape “Kola Hnyinge Hnei Angetre e” ne lo Ita Ne Thup ne 15 Ogas 1990, götrane 30 (qene Wiwi).
d Paragarafe 11: Wange ju la Ita Ne Thup ne 15 Okotropa 1995, götrane 18-28 (qene Wiwi).
e Paragarafe 12: Wange ju la itre mekune ka ihmeku memine la hna qaja ngöne Luka 21:28.
[Thying]
[Iatr ne la götran 3]
[Iatr ne la götran 4, 5]
IJINE AKÖTRE ATRAQATR, NGE E THUPEN
AQANE EATRE ENEHILA
ITRE DRAI NE LA PUN
ITRE EWEKË KA IHMEKU MEMINE LO HNEIJINE NE LA ITRE PANE KERESIANO
Tro la itre Nöje Ka Ce Xöl (“ewekë ka sis”) a lepe apatrene elanyi la Itre Hmi Keresiano Göi Ëjen (“ga hmitröt”) memine la thelene la hmi ka thoi (Hna ama. 17:16-18)
KOLA LEPE APATRENE LA HMI KA THOI
Hnene la itre soce i angetre Roma (“ewekë ka sis”) hna lepe apatrenyi Ierusalema memine lo ēnē (“ga hmitröt”)
“Ewekë ka sis, . . . kola cile ngöne la ga hmitöt” (Mat. 24:15, 16)
(Wange ju la paragarafe 6)
Tro Iehova a “axalaithene” la itre drai ne troa lepe apatrene la hmi ka thoi;
Troa mele pe la nöje i Akötresie
Hnene la itre soce i angetre Roma hna axalaithene la itre drai ne isi angatr, itre Keresiano ne Ierusalema me Iudra a kötr
“Tro ha axalaithene la nöjei drai cili göi ange hna iën” (Mat. 24:22)
(Wange ju la paragarafe 7)
ITRE IJINE HNA THATRE
LA EQEAN
Tro Iesu elanyi a amekötine la itre atr ne la nöjei nöje ceitu me mamoe maine gootr (Mat. 25:31-46)
(Wange ju la paragarafe 12, 13)
HNEPE IJINE AKAWAN
“Thupene la aköte ngöne la ijine cili . . . ” (Mat. 24:29-31)
(Wange ju la paragarafe 8)
Tro Iesu elanyi a acile la hlue ka nyipici hune la “nöjei ewekë i nyidëti asë” (Mat. 24:46, 47)
(Wange ju la paragarafe 18)
Kola lepe apatrene la nöjei nöj (Hna ama. 16:16)
AMAGEDO
Kola lepe apatrenyi Ierusalema
MUSI KERISO KA CAA THAUZANE LAO MACATRE
[Iatr]
[Iatr]
[Iatr]
[Iatr ne la götran 7]
Uti hë la kola nyiqaane la akötre atraqatr, hetre ijine pala kö kowe la itre atr troa saze la aqane waiewekë i angatr (Wange ju la paragarafe 13)
