Ase Hë Ahmitrötrë Nyipunie
Ase Hë Ahmitrötrë Nyipunie
“Ase hë sië nyipunie, me ahmitötë nyipunie.”—1 KOR. 6:11.
NEMENE LA AQANE TRO NYIPUNIETI A SA?
Pine nemene matre loi e tro sa ananyine la itre ka iajojezi?
Nemene la aqane tro sa sajuëne la huliwa i Iehova?
Nemene la ka troa xatua së troa amë panë Iehova ngöne la mele së? Nemene la aqane tro sa thupëne la nyipi pengö së Keresiano?
1. Nemene la hnei Nehemia hna öhne ngöne la angeic a bëeke Ierusalema eë? (Wange ju la pane iatr.)
HNA thixötre hnei angetre Isaraela. Pine nemen? Hna nue la atre icilekeu me Iehova troa lapa e hnine la ketre hnahage ne la ēnē. Tha kuca ha itre Levi la hnëqa i angatr. Ketre tha hna amë panëne hmaca kö hnene la itre tane i angetre Iudra la huliwa i Iehova, ngo angatre pena ha saleme ngöne la drai sabath. Nge ala nyimu la itre hlue i Akötresie ka faipoipo me itre trahmanyi me föe qa ngöne la itre xa nöj. Celë hi itre jole hnei Nehemia hna öhne ngöne la angeic a bëeke Ierusalema eë.—Neh. 13:6.
2. Pine nemene matre ahmitrötrëne jë la nöje Isaraela?
2 Ame ekö, ca thauzane hë lae macatre, hnene la angetre Isaraela hna qaja la aja i angatre troa drengethenge Iehova. Öni angatr: “Tro huni a kuca la nöjei wesi ula asë hnei Iehova hna ulatin.” (Eso. 24:3) Hnei Akötresieti hna ië angatre nyine nöje i Nyidrë, nge aja i Nyidrëti tro angatr a hmitrötre me aisa angatre qaathei angetre ethen. Drei la ketre ewekë ka sisitria catr! Hnei Mose hmaca kö hna amexeje koi angatre thupene la fotre lao macatre, ka hape: “Nöje ka hmitöt’ eö koi Iehova Akötesi ’ö ; hnei Iehova Akötesi ’ö hna ië eö mate nöje atu ka co i nyidë hune la nöjei nöj’ asë ngöne la hune i hnadro.”—Deu. 7:6.
3. Nemene la aqane waipengöne angetre Iudra la nyipi hmi ngöne la kola nyi hnaaluene bëeke hnei Nehemia a tro Ierusalema?
3 Ngazo pe, tha hnene kö la angetre Isaraela hna eatrëne lo hnei angatre hna sisiny. Ngacama hetre itre ka nyi hlue i Akötresieti pala hi, ngo ala nyimu kö la angetre Iudra, itre ka pi mama fë ka hape, itre ka hmitrötre angatr, ngo tha kuca pe la aja i Iehova. Hnei Nehemia hna nyi hnaaluene bëeke hmaca Ierusalema eë, ca hadredre lao macatre thupene lo kola bëeke ekö qaa Babulona hnene la itre thelene i angetre Iudra, göi troa xupe hmaca la traone matre atrunyi Iehova hmaca. Ngo ame ngöne la kola nyi hnaaluene bëeke hnei Nehemia, ame la nyipi hmi, tre tha ewekë hmaca kö hna amë panëne hnene la angetre Iudra ngöne la mele i angatr.
4. Nemene la aqane tro sa thiina ka hmitrötre me amadrinë Iehova?
4 Tune la angetre Isaraela ekö, hnei Akötresieti mina fe hna ahmitrötrëne la Itretre Anyipici Iehova. Itre Keresiano hna iëne ju hë maine itre atrene pena “la ka ala nyimu atraqat,” ngo itre ka hmitrötre angatr, nge angatre a nyi hlue i Iehova hmekuj. (Hna ama. 7:9, 14, 15; 1 Kor. 6:11) Hna luzi la aqane imelekeu ne la angetre Isaraela me Iehova pine la hnei angatre hna tha thiina ka hmitrötr. Tha ajane kö së troa hane traqa tune lai koi së. Haawe, nemene la aqane tro sa thiina ka hmitrötr, me amadrinë Iehova? Kola ini së hnene la tusi Nehemia mekene 13 la foa lao ewekë nyine kuca matre eatrëne lai, kola hape: (1) Ananyine pi la itre sinee ka iajojezi; (2) sajuëne jë la huliwa i Iehova; (3) amë panë Iehova jë; nge (4) thupëne hnyawa kö së la nyipi pengö së Keresiano. Tro sa ce ithanatane enehila la itre ewekë celë.
ANANYINE PI LA ITRE SINEE KA IAJOJEZI
5, 6. Drei lae Eliasiba me Tobia? Hnauëne laka lue treme sineene jë Eliasiba me Tobia?
5 E jë la Nehemia 13:4-9. Kola lapa xötreithi së hnene la itre ka iajojezi nge ka huli së koi ngazo matre troa adronyi së. Tro sa pane ce waipengöi Eliasiba me Tobia. Ame Eliasiba, tre Ate Huuje Ka Sisitia, nge ame Tobia, tre, atre Amona ka huliwa kowe la joxu ne Peresi. Hnei Tobia me itre sinee i angeice hna thele jëne troa thingijë i Nehemia troa xupe la tra etë ne Ierusalema. (Neh. 2:10) Kola icilekeu memine la hna amekötine hnene la Trenge Wathebo i Akötresie e tro la atre Amona a lö hnine la ēnē. (Deu. 23:3) Haawe, pine nemene kö matre Eliasiba a nyi göhne i Tobia ngöne la hnahage ne xeni ne la ēnē?
6 Hetre köni kepin: Ame la hnapan, lue treme sineene Eliasiba me Tobia. Ame la hnaaluen, ame Tobia me nekö i angeic Iohanana, lue ka xomi föe ne Iudra, nge nyimu angetre Iudra ka qaja aloinyi Tobia. (Neh. 6:17-19) Ame la hnaakönin, lue treme enehmun Tobia me Sanebalata, ketre atrene la hnepe lapa i Eliasiba, Atre Huuje Ka Sisitria. Hnene la ketre nekö i api Eliasiba hna xome la nekö jajiny, nekö i Sanebalata, gavena ne Samaria. (Neh. 13:28) Kola mama hnyawa jëne la itre pengöne celë la kepine matre drei Tobia jë hnei Eliasiba, ngacama ame Tobia, tre tha atre Isaraela kö, nge ka icilekeu memine la huliwa ne la nöje i Akötresie. Ngo hnei Nehemia hna amamane la aqane mele nyipici angeice koi Iehova, hnei angeice hna trije la itre ewekë i Tobia qa ngöne la hnahage ne xen.
7. Nemene la aqane troa thupëne hnene la itre atrene la nöje i Akötresie, me itre qatre thupe fe, matre tha tro kö la ketre ewekë a adronyi angatr nge tha hmitrötr pi angatr?
7 Easë la itre atr ka saene koi Akötresie, haawe, ame la nyine tro sa pane kuca ngöne la mele së, tre ene la troa nyipici koi Nyidrë. Ngo ame itre xa ijin, tre, pine pë hë la itre trepene meköti ne la Tusi Hmitrötr nge pane pena ha la itre atrene la hnepe lapa së. Ngo ame pe, e tha mele thenge hë së la itre trepene mekötine la Tusi Hmitrötr, tha hmitrötre hë së lai xajawa i Iehova. Ame la itre qatre thup keresiano a axecië mekun, tre, angatre a xötrethenge la itre mekuna i Iehova, ngo tha qa ngöne kö la sipu mekuna i angatr, maine pena tha qa ngöne kö la hna meku itre xan. (1 Tim. 5:21) Kola thupëne hnyawa hnene la itre qatre thupe matre pëkö tro la ketre ewekë a adronyi angatr wanga tha hmitrötre pi angatr xajawai Akötresie.—1 Tim. 2:8.
8. Nemene la nyine tro sa mekune hnyawa göi itre hne së hna ce mele memin?
8 The thëthëhmine kö lo hna hape, “The iaö nyipunieti kö ; ithanata ka ngazo la ate angazone la thina ka loi.” (1 Kor. 15:33) Ame fe la itre atrene la lapa së, itre ka tro fe hi a hane iajojezi, kola hape, tro fe angatr a hane huli së kowe la ngazo. Hetre ketre ijin, hnei Eliasiba Atre Huuje Ka Sisitria hna nyi tulu ka loi, nge hnei nyidrëti hna ce huliwa me Nehemia troa xupe hmaca la itraetë ne Ierusalema. (Neh. 3:1) Ngo hnei Tobia me itre xan hna ajojezi Eliasiba. Hnei angatre hna uku angeice troa kuca la itre ewekë ka ngazo, nge ka adronyi angeic matre tha hmitrötre hë. Nyipi ewekë koi së troa ce mele memine la itre atr ka thuecatre së troa kuca la itre ewekë ka loi, tune la troa e la Tusi Hmitrötr, me sine la itre icasikeu, me tro kowe la hna cainöje trootro. Eje hi, tru catre la ole së kowe la itre atrene la hnepe lapa së ka thuecatre së troa kuca la loi.
SAJUËNE JË LA HULIWA I IEHOVA
9. Nemene la ewekë ka eje ekö ngöne la ēnē? Nemene la hna kuca matre troa amekötine la ewekë cili?
9 E jë la Nehemia 13:10-13. Tha hnene kö la itretre Levi hna kuca la hnëqa i angatre ngöne la ēnē. Pine nemen? Tha tru hmaca kö la hna ithingë mani hnene la itre atr kowe la ēnē, celë hi matre itre Levi ha tro kowe la itre hnei angatre hna eënyi troa huliwa catre matre hetre nyine xeni thatraqane la hnepe lapa i angatr. Nge ame itre hna acile göi troa hleme la itre hnaaluepin, tre, tha hleme kö angatr, nge tha hnei angatre kö hna iupi fë kowe la ēnē. (Neh. 12:44) Hnei Nehemia hna wange hnyawa matre tro pala hi a hleme la itre hna ithingë, nge hnei angeice hna acile la itre thupëtresije ka huliwa nyipici matre troa upe la itre hnaaluepine koi angetre Levi.
10, 11. Tro sa sajuëne tune kaa la nyipi hmi?
10 Nemene la ini hne së hna xome qa ngöne la ewekë ka traqa celë? Lolo nge kola atrunyi së la kola xome la itre mo së troa sajuëne la huliwa i Iehova. (Ite edomë 3:9) Ame la easa hamëne la itre mo së, easë hi lai a hamëne hmaca kö koi Iehova la itre ewekë i Nyidrë. (1 A. l. ite jo. 29:14-16) Maine co hi la hne së hna hamën, tha tro kö sa mekune ka hape, tha kolo kö lai a atrunyi Iehova. Ngo pine laka, tru la aja së troa hamën, Nyidrëti a kapa madrine la ahnahna së.—2 Kor. 8:12.
11 Traqa koi itre macatre, hnene la ketre keme me thine ka eitre lao ha kuku hna hëne la lue trefëne ka qatre hë, nge ka pionie hut, troa aca ce xeni me angatre e nöjei wiik. Hnene la thine hna majemine qaja lapane ka hape, “ka majemine eahlo kuci ane la ala tren, matre e troa nyixane hnei ala lue, tre pëkö ejolen.” Maine ewekë ka co hi la hna kuca, ngo ame kowe la lue pionie, tre ewekë ka tru lai, nge tru la ole i nyidro! Hnene fe la lue pionie hna hamë ixatua kowe la hnepe lapa cili jëne la hna porotrikëne la itre hna melëne ka ithuecatr, nge ka xatuane fe la itre nekönatre troa tro loi ngöne la nyipici. Ame hë e thupen, hnene asë la itre nekönatre hna nyiqaane la huliwa ne pionie o drai.
12. Nemene la tulu ka loi hna hamëne hnene la itre qatre thupe me itre drikona?
12 Kola ini së fe hnene la tusi Nehemia laka, loi e tro la itre qatre thupe me itre drikona a itre tulu ngöne la hmi Iehova. Ixatua lai kowe la itre xan ngöne la ekalesia. Paulo aposetolo la ketre tulu ka lolo kowe la ekalesia. Hnei angeice hna sajuëne la nyipi hmi, nge hnei angeice fe hna hamë mekune kowe la itre Keresiano göi aqane troa hnëkë nyine ithingë.—1 Kor. 16:1-3; 2 Kor. 9:5-7.
AMË PANË IEHOVA JË
13. Nemene la hna kuca hnene la angetre Iuda ngöne la drai Sabath?
13 E jë la Nehemia 13:15-21. Maine tru menu la traeme së troa meku mo, me huliwa catre matre hetrenyi jë itre ej, tro hë lai a luzi la aqane imelekeu së me Iehova. Kola qaja hnei Esodo 31:13 ka hape, tro angetre Isaraela a xome la Sabathi nyine troa amekunëne la pengöi angatre me Iehova, ke nöje hna iën angatr, hna isan nge nöje ka hmitrötr. Hnene la angetre Iuda ekö hna xome la sabath nyine drai ne tro angatr a ce hmi me hnepe lapa i angatr me thith me mekune ajuine la Wathebo i Akötresie. Ngo hnene la itre xa atre Isaraela ngöne la hneijine i Nehemia hna xome la Sabathi nyine drai ne thele mo kösë ketre drai menu kö. Haawe, qemekëne la drai Sabath hnei Nehemia hna thinge la itre qanahage matre thingi qëhnelöne me upe la itre trehnyiwa ka traqa ne troa salem.
14, 15. (a) Nemene ju hë la ka troa traqa e troa tru catre la traem hne së hna xome troa thele mani? (b) Nemene la aqane tro sa lö kowe la hna mano i Akötresie?
14 Nemene la ini nyine tro sa xome qa ngöne la tulu i Nehemia? Ame la ketre ini qa ngöne la tulu celë tre, tha tro kö a amenu së me aluzine menune la traeme së hnei thele mani. Tro lai a amenu së hnene la huliwa së e tro sa hni catr menu kowe ej. Ngo the thëthëhmine kö së lo hna qaja hnei Iesu ka hape, thatreine kö tro sa ce nyi hluene la lue maseta. (E jë la Mataio 6:24.) Ijiji Nehemia fe hi ekö troa huliwane la mani me traeme i angeice troa ce thele mo me angetre Turo me itre xa ka saleme ju kö. Ngo nemene kö la hnei angeice hna kuca? (Neh. 5:14-18) Hnei angeic hna huliwa catre troa xatuane la itre trejine me angeic, me tro fe a atrune la atresiwa i Iehova. Hnene fe la itre qatre thup me itre drikona hna hane kuca tune lai, hnei angatr hna nue la traeme i angatre me trenge catre i angatre göi troa xatuane la ekalesia. Celë hi matre ka tru angatr kowe la itre atrene ne la ekalesia. Nge ame fe la thangan, tre ihnimikeu me tingetinge me mele xetietë nyipine la nöje i Akötresie.—Ezek. 34:25, 28.
15 Pëhë hna amekötine göi Sabath thene la itre keresiano. Ngo öni Paulo pe: “Qa ngöne lai hna amë pala kö la hna mano sabathi thatraqane la nöjei ate i Akötesie.” Angeic a nyixane hmaca ju me hape: “Qa ngöne lai tro sha cate troa lö kowe la hnamano cili.” (Heb. 4:9, 11) Ame easë itre Keresiano, hetrenyi fe la “hna mano sabathi,” kola hape troa lö kowe “la hnamano cili [hna mano i Akötresie]” ene la troa drengethenge me huliwa thenge la itre mekuna i Nyidrë. Hapeu,hnei epuni fe kö me hnepe lapa i epun hna amë panë Iehova ngöne la mele i epun, ene la troa eatrëne lapane la hmi ne la hnepe lapa me sine la itre icasikeu me tro kowe la hna cainöje trootro? Maine jë tro la maseta i epun me itre sine huliwa i epun a mekune ka hape tha ka nyipi ewekë kö la itre ewekë cili. Ka loi e tro sa amamane hnyawa koi angatr ka hape, ka sisitria catre kö koi së la huliwa i Iehova. Ka ceitu hnyawa hi lai memine lo hna kuca hnei Nehemia lo angeic a upe lo itretre Turo, me thinge la qanahage ne lö kowe la traon. Hnei angeic hna amë panë Iehova ngöne la mele i angeic. Pine laka easë la nöje i Akötresie hna isan me ka hmitrötr, haawe nyipi ewekë tro sa isa waipengö së me hape: ‘Hnenge kö hna amamane jëne la aqane meleng ka hape ka sisitria Iehova koi ni?’—Mat. 6:33.
THUPËNE HNYAWA KÖ SË LA NYIPI PENGÖ SË KERESIANO
16. Hnauëne laka kola ha troa patre la nyipi pengöne la nöje i Akötresie ka hmitrötre me hna isan ngöne la hneijine i Nehemia?
16 E jë la Nehemia 13:23-27. Ame ngöne la hneijine i Nehemia, hnene la itre thupëtresije ne Isaraela hna xomi föe trehnyiwa. Ame lo pane Nehemia a traqa e Ierusalema, hnene la itre qatre hna sisinyi jëne la itre hnei angatre hna cinyihane ka hape, tha tro kö la angetre Isaraela a xomi föe trehnyiwa. (Neh. 9:38; 10:30) Ngo ame hë la kola nyi hnaaluene traqa hnei Nehemia e Ierusalema, angeice hë a öhne la itre trahmanyi ne Iudra a xomi föe trehnyiwa, nge kolo ha troa patre la nyipi pengöi angatr, ene lo nöje i Akötresie hna isan me ka hmitrötr. Ame la itre neköne la itre föe trehnyiwa, thatreine kö nyudreni e tusi qene Heberu, me cinyihan. E tru jë la itre nekönatre cili, ame la mekuna i epun, tre, tro kö angatre lai a mekune ka hape, itretre Isaraela angatr? Maine tro pena angatre a mekune ka hape, itre trehnyiwa angatr, itretre Asedoda, maine Amona, maine Moaba? Maine tha trotrohnine kö angatre la qene Heberu, haawe, thatreine jë kö lai tro angatre a trotrohnine la Trenge Wathebo i Akötresie. Nge jole hë lai koi angatre troa atre Iehova me troa iëne troa nyi hlue i Nyidrë hune la troa nyi hluene la itre haze trehnyiwa hna hmi kow hnene la itre thine i angatr. Celë hi matre canga saqei Nehemia hi kuca la ka ijije matre tha tro kö a patre la nyipi pengöi angatr.—Nehemia 13:28.
17. Nemene la aqane tro la itre keme me thine a xatuane la itre nekönatre troa imelekeu hnyawa me Iehova?
17 Ame enehila, tro sa kuca la ka ijije göi troa xatuane la itre nekö së matre tro fe nyudreni a hetrenyi la pengöne la Keresiano. Itre keme me thine fe, isa hnyinge jë me hape, ‘Troa mama tune kaa koi ni ka hape, itre nekönge a ithanatane la “aqane ewekë ka wië,” ene la itre nyipici ne la Tusi Hmitrötr? (Zef. 3:9) Nge itre trenge ithanata i angatre kö a amamane ka hape hetrenyi thei angatre la uati hmitrötr, maine hna huli angatre pena hnene la itre aja ne fen?’ The ngazohnine kö la kola goeëne la thiina ne la itre nekönatre laka, loi e troa ujë kowe la loi. Ka qeadridri catre lai e troa inine la ketre qene hlapa, nge tro pala kö lai a jole catre e tru hnei nöjei mekun. Fene fe a ukune la itre neköi epuni troa tha drei Akötresie. Haawe, loi e tro epuni a xomihni, me ce kuca me hnëkëne la itre ewekë ngöne la götrane u memine la hnepe lapa matre troa xatuane la itre nekö i epuni troa imelekeu hnyawa me Akötresie. (Deu. 6:6-9) Amekunë angatre hnyawa ju la kepine matre nyine loi koi së la troa isa pengöne memine la fene i Satana. (Ioane 17:15-17) Nge kuca asë jë la hnei epuni hna atreine matre troa ketr la hni angatr.
18. Pine nemene matre itre keme me thine Keresiano kö la ka ijije troa xatuane la itre nekö i angatre troa kökötre matre tro nyudreni a atreine iëne troa sipu nyi hlue i Iehova?
18 Tro la itre nekö së a sipu iëne maine aja i angatre troa nyi hlue i Akötresie, maine tha aja i angatre pena kö. Ngo nyimu aqane tro së, itre keme me thin, a xatua angatr. Tro së a itre tulu ka loi koi angatr, nge qaja hnyawane jë fe koi angatre la pengöne la thiina ka ngazo, nge xatua angatre jë troa trotrohnine la itre ethanyine qa ngöne la aqane xomi mekune ka ngazo. Itre keme me thin, itre nekö i epuni a ajane tro epuni a xatua angatre troa akökötrene thei angatre la nyipi pengöne la Keresiano. Epuni hi la itre ka ijije troa xatua angatre troa kökötre matre tro angatre a atreine iëne troa sipu nyi hlue i Iehova. Nyipi ewekë koi së asë tro sa thupë së hnyawa matre hetrenyi pala hi the së la nyipi pengöne la Keresiano, ene la troa mele thenge la itre trepene meköti Akötresie, nge matre tro sa ceitu memine la atr ka loi koi Nyidrë.—Hna ama. 3:4, 5; 16:15.
TRO IEHOVA A ‘MEKU SË MATRE MANATHITHI SË’
19, 20. Nemene la nyine tro sa kuca matre tro Iehova a ‘meku së matre manathithi së’?
19 Hnei perofeta Malaki hna qaja ka hape, Iehova a meku ‘angetre qoue Nyidrë, me mekune la atresiwa i Nyidë,’ nge Nyidrëti a sija la ëje i angatr ngöne la “tusi ne amekunëne.” (Mal. 3:16, 17) Tha tro jë pi kö Akötresieti a thëthëhmine la angetre xoue Nyidrë, me angetre hnine la atresiwa i Nyidrë.—Heb. 6:10.
20 Hnei Nehemia hna thithi me hape: “Akötesingöti fe, mekua nieti ju mate manathithi ni.” (Neh. 13:31) Angeice a ajane tro Iehova a mekune la aqane nyi hlue i Nyidrë hnei angeic. Tro fe Akötresieti a meku së ngöne la tusi ne amekunën, e tro sa ananyine la itre sinee ka iajojezi, me sajuëne la huliwa i Iehova, me amë panë Nyidrë ngöne la mele së, me thupëne hnyawa la nyipi pengö së Keresiano. Nyipi ewekë tro sa ‘thele e kuhu itre hni së kö ka hape, easë kö ngöne la lapaun.’ (2 Kor. 13:5) Maine tro sa kuca asë la hne së hna atreine matre tro pala hi së a itre atrene la nöje i Iehova hna isan, nge ka hmitrötr, tro Nyidrëti lai a ‘meku së matre manathithi së.’
[Thying]
[Iatr ne la götran 3]
[Iatr ne la götran 5]
Hnei Nehemia hna amamane tune kaa ka hape, atre mele nyipici angeice koi Iehova? (Wange ju la paragarafe 5, 6)
[Iatr ne la götran 7]
Xatuane jë la itre neköi epuni troa imelekeu hnyawa me Iehova (Wange ju la paragarafe 17, 18)
