The Tro Kö a “Elëhni Koi Iehova”
The Tro Kö a “Elëhni Koi Iehova”
“Ame la qene hmo ne la at, te, kola aqaline la jë i nyën ; nge tro la hni nyën’ a elëhni koi Iehova.”—ITE EDOMË 19:3.
NEMENE LA AQANE TRO NYIPUNIETI A SA?
Hnei nemene matre traqa pi koi së la “elëhni koi Iehova”?
Nemene la faifi lao ewekë ka xatua së matre tha tro kö sa “elëhni koi Iehova”?
Nemene la nyine tro sa mekune hnyawa e traqa pi koi së la itre jol?
1, 2. Pine nemene matre tha tro pi kö sa upe zöi Iehova la itre jole ka traqa e celë fen? Nemene la ceitune nyine tro sa xome matre troa qeje pengöne la jole celë?
PANE mekune jë la kola traqa hnene la ketre thupëtresije ka hetre föen ngöne la hnalapa i angeic. Traqa ha angeice a öhne la nöjei ewekë i angeic, a ase asë hë thë. Ame la itre iseife me itre kape me peleitr, mudromudro asë hë, nge ame la itre ixöe, zezenyi asë hë. Ame lo hnalapa i angeic ka mingöming, kösë lo hna angazone hnei sa. Tro angeice lai a upe zö drei? Tro jë kö angeice lai a qaja ka hape, “Hnauëne laka föenge a kuca la ewekë celë?” Ohea, tro pe angeic a qaja ka hape, “Zöi drei la ewekë celë?” Atre hnyawa hi angeice ka hape, tha tro jë pi kö la föi angeice a thë tune lai la itre ewekë hnine la hnalapa.
2 Ame enehila, hna angazone la ihnadro. Ame la dro, me tim, me enyi, tre, itre hna apoizinën. Pi isi, me kuca la itre ewekë ka sis hnene la itre atr. Ngo hne së hna inine ngöne la Tusi Hmitrötre ka hape, tha Iehova kö la atrekë zöne lai. Hnei Nyidrëti hna xupe la ihnadro matre troa paradraiso, nge hnë tro sa mele ngön. (Gen. 2:8, 15) Iehova la Akötresie ka ihnim. (1 Ioane 4:8) Hnene la Tusi Hmitrötre hna qaja koi së ka hape, Satana Diabolo la “tane celë fene hnengödrai,” nge angeice hi la qaane la itre jole ka traqa.—Ioane 14:30; 2 Kor. 4:4.
3. Nemene la aqane troa tria la aqane waipengöne së la itre jole ka traqa koi së?
3 Ngo tha tro pe sa upe zö Satana la nöjei jole asë ka traqa koi së. Pine nemen? Pine laka ame la itre xa jole ka traqa, tre, easë kö a menuëne la itre sipu tria së kö. (E jë la Deuteronomi 32:4-6.) Maine jë aqane mekune së fe hi lai. Ngo pine laka, easë la itre atr ka tha pexej, haawe tro fe hi lai a tria la aqane waipengöne së la itre jole ka traqa koi së, nge tro fe hë lai hetre ethane koi së. (Ite edomë 14:12) Matre tha easë hmaca kö a upe la zöne koi së kö, maine koi Satana, ngo easë pena ha nyiqaane upe koi Iehova la zöne la itre jole ka traqa, uti fe hë la troa “elëhni koi Iehova,” ene la troa wesitre catre koi Nyidrë.—Ite edomë 19:3.
4, 5. Troa traqa tune kaa la “elëhni koi Iehova” thene la ketre Keresiano?
4 Tro kö sa hane “elëhni koi Iehova”? Tha ewekë ka loi kö koi së la troa elëhni koi Nyidrë. (Is. 41:11) Pëkö ala cas ka atreine troa cile koi Akötresie. Nyipici, tha tro jë kö së lai a qaja ka hape, easa elëhni koi Iehova. Ame pe hna qaja hnei Ite edomë 19:3 ka hape, ame la mekune hmo ne la atr, tre “kola aqaline la jë i nyën,” nge “tro la hni nyën’ a elëhni koi Iehova.” Tro lai a nyiqaane mama ngöne la huliwa ne la atr. Ame la enyipicin, tre, tro lai a ae trootro la itre huliwa i angeice koi Iehova maine tha tro hmaca kö angeice a ce atrunyi Iehova memine la ekalesia.
5 Nemene la ka troa huli së troa “elëhni koi Iehova”? Nemene la aqane tro sa neëne la ihnö celë? Nyipi ewekë tro sa atreine sa la itre hnyinge celë matre atreine së thupëne la aqane imelekeu së me Iehova Akötresie!
TROA TRAQA TUNE KAA KOI SË LA “ELËHNI KOI IEHOVA”?
6, 7. Pine nemene matre nyiqaane eetre jë koi Iehova hnene la angetre Isaraela ngöne la hneijine i Mose?
6 Pine nemene matre nyiqaane eetre jë koi Iehova hnene la hlue i Nyidrë e kuhu hni angeic? Tro la tane mekune celë a ithanatane la faifi lao ewekë ka huli së troa wesitr, nge tro sa ce wange mina fe la itre tulu qa hnine la Tusi Hmitrötre ne la itre atr ka “elëhni koi Iehova.”—1 Kor. 10:11, 12.
7 Troa ajojezi së hnene la itre ithanata ka iathixötrë. (E jë la Deuteronomi 1:26-28.) Pane mekune jë lo hnei Iehova hna kuca kowe la angetre Isaraela. Treene lao akötre hnei Nyidrëti hna axulune kowe la angetre Aigupito, nge hnei Nyidrëti fe hna apatrenyi Farao me itre soce i angeice ngöne la Hnagejë Ka Palulu. Ase hë thepe angetre Isaraela! (Eso. 12:29-32, 51; 14:29-31; Sal. 136:15) Kolo ha troa lö la nöje i Akötresie kowe la Nöje Hna Thingehnaean. Ngo hnei angatre hna nyiqaane eetre koi Iehova. Pine nemene matre luzi pi la lapaune i angatre qëmekene tro angatre a kapa la hna thingehnaean? Hna ngazo la aqane qeje pengöne la nöje hnene la treene lao atr hna upe troa alamekën, ame hna akucakucane la mekuna i angatr, me axouenyi angatr. (Num. 14:1-4) Ame hë la pun, tha alö angatre ju kö hnei Iehova kowe “la nöje ka loi” ngöne la ijine cili. (Deu. 1:34, 35) Nemene la ini nyine tro sa xom? Ame la itre ithanata ka iathixötrë, tre itre ka troa akucakucane la lapaune së, me huli së troa eetre pine la aqane amekötine Iehova la nöje i Nyidrë.
8. Pine nemene matre hnene la nöje i Iudra ngöne la hneijine i Isaia hna upe zö Iehova la itre jole ka traqa koi angatr?
8 Tro la itre hulö me itre jole a akucakucanyi së. (E jë la Isaia 8:21, 22.) Ame ngöne la hneijine i Isaia, hna akötre hnene la nöje i Iudra. Hna cile xötreithi angatre hnene la itre ithupëjia. Tru hnei ka mecijine pine laka tha ijije kö la xen. Ngo ca jole ka tru catre kö hune lai. Tha hnei angatre hmaca kö hna drei Iehova, nge hnei angatre hna nue troa nanazije la imelekeu i angatre me Iehova. (Amosa 8:11) Tha sipo ixatua pe angatre koi Iehova, ngo hnei angatre pena ha hna ce upe koi Nyidrë la zöne me kowe la joxu la itre jole ka traqa koi angatr. Ka ceitune hi lai, e traqa ju së nanazije hnene la ketre hulö maine itre jole ka traqa ngöne la mele së, maine jë tro së lai a upe zö Iehova, me mekune ka hape, tha hnei Nyidrëti kö hna xatua së ngöne la easa aja ixatua.
9. Pine nemene matre tha loi kö la aqane waipengöne angetre Isarala ngöne la hneijine i Ezekiela la itre ewekë hna kuca hnei Iehova?
9 Thatre pengöne hnyawa kö së la itre ewekë ka traqa. Hnene laka thatre pengöne hnyawa kö angetre Isaraela ngöne la hneijine i Ezekiela la nöjei ewekë ka traqa, hnei angatre hna mekune ka hape, tha ka loi kö la aqane ujë i Akötresie. (Ezek. 18:29) Angatre a ujë kösë lo ijiji angatre fe troa hane ameköti Akötresie me wange ka hape, ka loi maine ka ngazo la hnei Akötresie hna kuca. Ngo tha trotrohnine hnyawa pe angatre la kepine la aqane ameköti ewekë i Iehova. Nemene fe la aqane tro sa hane tria tui angatr? Hetrenyi e hnine la Tusi Hmitrötre la itre xa edromë nango jole koi së troa trotrohnin. Maine pena tha trotrohnine kö së la ketre ewekë ka traqa kowe la mele së. Haawe, tro hë lai a nyiqaane cia e kuhu hni së la mekune ka hape, tha ka meköti kö la aqane ujë i Iehova, me hape, “Tha ijije kö la thina i Joxu.”—Iobu 35:2.
10. Nemene la aqane tro la ketre atr a xötrethenge la tulu ka ngazo i Adamu?
10 Ma tro jë së lai a xele ma kapa laka, zö së kö la itre ngazo me tria së. Hnei Adamu, pane atr hna upe koi Akötresie la zöne la ngazo hnei angeice hna kuca. (Gen. 3:12) Atre hi Adamu ka hape, hnei angeice hna ena la wathebo i Akötresie, nge tro kö Akötresieti a nyithupene koi angeice thenge la ngazo i angeic. Ngo hnei angeice pe hna upe la zöne koi Iehova; ame koi angeic, Iehova la ka tria, ke, hnei Nyidrëti hna hamëne koi angeice la ketre föe ka ngazo. Hnene la itre xane hna xötrethenge la tulu ka ngazo i Adamu, hnene la hna upe zö Akötresie la itre ngazo i angatr. Loi e tro sa isa sipu thele ka hape, ‘E traqa ju la hace hni me trenge wesitre koi ni pine la itre ngazong, ke, tro jë kö ni a mekune ka hape, ma ka catre pala ha la itre trepene meköti Iehova, nge jole catre e troa trongën?’
11. Nemene la ini nyine tro sa xome qaathei Iona?
11 Ma tro jë së lai a sipu meku së. Hna elëhni hnei perofeta Iona, lo Iehova a utipi angetre Nineve. (Iona 4:1-3) Pine nemen? Xou i angeic e jele perofeta thoi angeice jë, ke, tha apatrene ju kö lo traone nge ase hë angeice qaja ka hape, tro ha apatren. Kösë lo ka hape, ka tru catre kö koi Iona la aqane tro la itre atr a goeë angeice hune la aqane tro angeice a utipi angatr. Tune kaa së, hne së kö hna hane mekune tui Iona, e itre xa ijin? Maine tro hi sa sipu meku së hmekuj, haawe, thëthëhmine pë hë së lo itre ka nyipi ewekë nyine tro sa hane kuca thatraqane la itre xan. Maine jë traqa ha koi nyimu macatre ne easë a hane qaja trongëne ka hape, easenyi catre hë la drai i Iehova. Ngo e qaja angazo së jë hnei itre xan, pine laka tha traqa pala kö la drai cili, tro kö së lai a wesitre koi Iehova me thatreine xomihni ahoeany?—2 Pet. 3:3, 4, 9.
NEMENE LA AQANE TRO SA NEËNE WANGA TRO SA “ELËHNI KOI IEHOVA”?
12, 13. E isazikeu ju la mekuna së memine la ketre ewekë hnei Iehova hna kuca maine hnei Nyidrëti pena hna nue, nemene la nyine tro sa kuca?
12 E isazikeu ju la mekuna së memine la ketre ewekë hnei Iehova hna kuca maine hnei Nyidrëti pena hna nue, nemene la nyine tro sa kuca? Loi e tro sa mekune ka hape, tha aqane ujë ka loi kö lai. Kola amekunë së hnene la Ite Edomë 19:3 ka hape, pine laka thatre hnyawa kö së la pengöne la itre jol ka traqa, tro hë së lai a upe zö Iehova menu, ngo easë pe la atrekë zöne itre ej. Haawe, tro sa mekune la faifi lao ewekë ka troa xatua së matre tha tro kö sa wesitre menu koi Iehova.
13 Acatrene catrëne jë la aqane imelekeu i epuni me Iehova. Maine ka loi la aqane imelekeu së me Iehova, thatreine jë kö tro sa elëhni koi Nyidrë. (E jë la Ite Edomë 3:5, 6.) Nyipi ewekë pe tro sa mejiune koi Iehova. Tha tro pi kö sa mekune ka hape, ka atre kö së hui Nyidrë, maine pena ka sisitria catre kö la itre aja së. (Ite edomë 3:7; Ate cai. 7:16) Tro la aqane waiwekë cili a xatua së matre tha tro kö sa upe zö Nyidrë la itre jole ka traqa koi së.
14, 15. Nemene la ka troa xatua së matre tha tro kö a huli së hnene la itre ithanata hna qaja ka iathixötrë?
14 The nue kö troa huli së hnene la itre ithanata ka iathixötrë. Nyimu kepine ka upe la angetre Isaraela ngöne la hneijine i Mose troa mejiune laka, tro Iehova a alö angatre ngöne la Nöje Hna Thingehnaean. (Sal. 78:43-53) Ngo ame hë la kola qeje pengöne angazone la nöje hnene lo ala treene ka alamekën, öni Tusi Hmitrötr, “tha mekune kö [angetre Isaraela] la ime i nyidë,” ene laka thëthëhmine hë angatre la hnei Iehova hna kuca koi angatr. (Sal. 78:42) Maine tro pe sa mekune hnyawa la itre ewekë ka tru hnei Iehova hna kuca koi së, tro hë së lai a easenyi catre koi Nyidrë. Nge tha tro hë sa nue la hna qaja hnei itre xan troa ananyi së qaathei Iehova.—Sal. 77:11, 12.
15 Tune kaa ju hë e hna ngazo la aqane ujë së kowe la itre trejine me easë? Tro lai a angazone la aqane imelekeu së me Iehova. (1 Ioane 4:20) Ame la ketre ceitun, tre, hmekune lo kola pane nyiulili hnei angetre Isaraela ngöne la kola acili Arona troa atre huuje ka sisitria. Ngo ame koi Iehova, tre kösë angatre hi lai a nyiulili koi Nyidrë. (Num. 17:10) Ketre tu së mina fe, ame hi la easa nyiulili kowe la itre hnei Iehova hna acile troa elemekene la huliwa i Nyidrë e celë fen, maine thatre kö së, ngo easë hi lai a nyiulili koi Iehova.—Heb. 13:7, 17.
16, 17. Pine nemene matre tha tro pi kö sa upe zö Iehova la itre jole ka traqa koi së?
16 Mekune hnyawa kö së laka, tha Iehova kö la qaane la itre jole ka traqa koi së. Ame ngöne la hneijine i Isaia, tha hnene hmaca kö la angetre Isaraela hna nyi hlue i Iehova, ngo tha patre pi kö la aja thei Iehova troa xatua angatr. (Is. 1:16-19) Haawe, ame la kola traqa koi së la itre jole enehila, keukawa la itre hni së e troa atre ka hape, Iehova a kukehni së, nge aja i Nyidrë troa xatua së. (1 Pet. 5:7) Iehova mina fe a thingehnaeane ka hape, tro Nyidrëti a hamë së la trenge catre matre tro pala hi sa mele nyipici koi Nyidrë.—1 Kor. 10:13.
17 Ngacama ka mele nyipici Iobu koi Iehova, ngo hna akötrëne menune la mele i angeic. Haawe, maine tro sa akötr, loi e tro sa mekune hnyawa ka hape, tha Iehova kö la qaane la itre akötre së. Tusi Hmitrötre a qaja ka hape, Nyidrëti a xelene la thiina ka tha meköti kö, me hnine la meköt. (Sal. 33:5) Loi e tro sa tui Eliu sinee i Iobu, atre trotrohnine hnyawa ka hape, ka iananyi Iehova memine la ngazo, ene la thiina ka tha meköti kö. (Iobu 34:10) Iehova a hamë së “la nöjei ahnahna ka loi asë, memine la ite hna hamëne gufane.” Tha Nyidrëti kö la qaane la itre jole ka traqa koi së.—Iako. 1:13, 17.
18, 19. Pine nemene matre tha tro kö sa luelu, ngo tro pe a mejiune koi Iehova? Nemene la ceitune ka aijijë së troa trotrohnine hnyawa lai?
18 The luelue kö, mejiune ju pe koi Iehova. Ka pexeje Akötresie nge ka draië catre kö la itre mekuana i Nyidrë hune la itre mekuna së. (Is. 55:8, 9) Maine ka hni ka ipië së me qahmihmi, tro hi së lai a atremekune me kapa ka hape, thatre asë kö së la itre ewekë. (Rom. 9:20) Nyimu ijine easa cile kowe la itre jol, nge thatre pengöne hnyawa kö së la nöjei götranen. Ma ase fe hë traqa koi epun la hna qaja ngöne la tusi i ite edomë kola hape: “Meköti la ate pa ngöne la ikelikelë i angeic; traqa pe la kete me waja penyi [isenyin] angeic.”—Ite edomë 18:17.
19 Maine jë hnene la ketre ehnemu së hna kuca la ketre ewekë ngo thatre hnyawa kö së la kepin, maine pena ame koi së tha aqane tro kö lai a kuca la ewekë cili. Hapeu, tro jë kö së lai a canga mekune ka hape, ka tria angeic? Ohea. Loi pe tro sa mekune ka hape, thatre pengöne hnyawa kö së la ewekë cili. Maine atreine së ce mele hnyawa memine la itre sinee së ka tha pexeje tu së, haawe, tro pala kö lai a tru la mejiune së kowe la Tretretro së e koho hnengödrai, ke sisitria la itre jë i Nyidrë, nge ka draië catre kö la itre mekuana i Nyidrë hu së!
20, 21. Pine nemene matre tha tro pi kö sa upe zö Iehova la itre jole ka traqa koi së?
20 Tha tro pi kö sa thëthëhmine la sipu qaane la itre jole së. Nyipi ewekë tro sa isa atre hnyawa ka hape, zö së kö la kola traqa la itre jole koi së. (Gal. 6:7) Tha tro pi kö sa upe koi Iehova la zön. Pine nemen? Hanawange la ketre ceitun, nemene la ewekë ka troa traqa e tro la ketre atr ka xomi loto, a nyinyape catr ngöne la ga sisaqali? Tro lai a hna la loto. Ame la mekuna i epun, tre tro kö la ka xomi loto a upe la zöne kowe la atre kuca lai loto? Ohea! Ketre tune mina fe, hnei Iehova hna xupi së memine la atreine troa ië ewekë. Nge hnei Nyidrëti fe a ini së la aqane troa xomi mekune ka loi. Haawe tha tro kö sa upe zö Iehova la itre tria së.
21 Ngo ame la nöjei jole asë ka traqa koi së, tre, tha qa ngöne asë kö la itre tria së me itre huliwa së ka ngazo. Ame la itre xa ewekë ka traqa tre öni Tusi Hmitrötr, “ame la ijine memine la ewekë ka xulu, te, kola traqa koi [nöjei atr] asë.” (Ate cai. 9:11) Ketre tha tro kö së a thëthëhmine laka, Satana Diabolo la sipu qaane la iangazo ka jilapane la fene hnengödrai asë. (1 Ioane 5:19; Hna ama. 12:9) Satana la ithupëjia, ngo tha Iehova kö!—1 Pet 5:8.
THUPËNE HNYAWA KÖ LA AQANE IMELEKEU SË ME IEHOVA
22, 23. Nemene la nyine tro sa mekune hnyawa e akucakucane jë la hni së hnene la itre jole ka traqa?
22 Maine kola traqa koi së la itre jol, mekune hnyawa kö lo pengö i Iosua me Kaleba. Maine ngazo la aqane qeje pengöne la nöje hna thingehnaean hnene la ala tren lao atr hna upe troa alamekëne la nöj, ngo lolo pe la aqane qeje pengöne Iosua me Kaleba la nöj. (Num. 14:6-9) Hnei nyidroti hna amamane la lapaune i nyidro koi Iehova. Ngo ame pe, nyidroti pala kö a troa ce tro kano me angetre Isaraela, 40 lao macatre. Tune kaa Iosua me Kaleba, hnei nyidroti kö hna eetre me wesitr, ke, nyidroti pe hi a xeni pune menune la ewekë cili? Ohea. Hnei nyidroti hna mejiune koi Iehova, ame hna amanathithi nyidro hnei Nyidrë. Ngacama ala nyimu catre la angetre Isaraela ka meci ngöne la hnapapa, ngo hnei Iehova pe kö hna alö Iosua me Kaleba ngöne la Nöje Hna Thingehnean. (Num. 14:30) Ketre tune mina fe, tro Iehova a amanathithi së “e tha kucakuca kö shë” troa kuca la aja i Nyidrë.—Gal. 6:9; Heb. 6:10.
23 Maine troa nango kucakuca la hni së hnene la itre jole ka traqa, maine hnene la itre tria i itre xan, maine sipu hne së kö hna tria, nemene la nyine tro sa kuca? Tha tro kö sa thëthëhmine ka hape, ame Iehova, tre, Akötresieti ka ihnim. Mekune hnyawa jë së la itre ewekë ka mingöminge hnei Iehova hna thingehnaeane thatraqa së. Pane isa mekune jë ka hape, ‘Maine patre ju Iehova theng, tro jë a tune kaa la meleng?’ Qale catre jë së koi Nyidrë, nge hmekëne kö la hni së wanga elëhni jë së me wesitre koi Nyidrë!
[Thying]
[Iatr ne la götran 10]
[Iatr ne la götran 12]
Maine tro epuni a drenge la itre ithanata ka iathixötrë, tro lai a hetre ethanyine koi epun (Wange ju la paragarafe 7)
[Iatr ne la götran 14]
Hnei Iehova hna amanathithi Iosua me Kaleba pine la hnei nyidroti hna mejiune koi Nyidrë (Wange ju la paragarafe 22)
