Elisaia a Göeëne La Itre Ikariota Eë—Ame Epuni Ke?

Kola thele Elisaia perofeta hnene la joxu ne Suria matre troa othi angeic. Drenge ju hi joxu ka hape, Elisaia e Dothana, ketre traone hna xupi hagen ka të hune la wetr. Ame hnei nyidrëti a upe pi e jidr la itre soce i nyidrë Dothana eë, memine la itre hoos, me itre ikariota ne isi. Ame ju hi la kola fetra la jö, angatre fe hë a cile xötreithe la traon.—2 Ite jo. 6:13, 14.

Ame la kola hlë hnene la hlue i Elisaia, me tro kuhu trön, öhne ju hi angeic la itre soce ithupëjia, ame hnei angeice hna xou. Öni angeice e sue: “Ekölö hi ni, joxung, tro sha tune ka ?” Öni Elisaia: “The qou kö, ke ala nyimu shë, nge ala xalaithe pe hi angat.” Thupene lai, ame hna thithi hnene la perofeta me hape: “Iehova fe, epi ahlëne la lue meke i nyën, mate öhn.” Kola qeje pengöne e thupen, ka hape: “Ame hnei Iehova hna ahlëne la lue meke ne la thupëtesij, nge nyën’ a öhn, nge hana wang, pepetë hë la wete hnei ite hose me ite ikariota eë xoteithi Elisaia.” (2 Ite jo. 6:15-17) Nemene la ini nyine tro sa xome qa ngön?

Ngacama hna cile xötreithi Elisaia hnene la isoce i angetre Suria, ngo tingetinge la hni angeic. Angeice a mejiune koi Iehova, me öhne laka Iehova a thupë angeic. Tha easë kö a treqene matre traqa pi la itre iamamanyikeu enehila, ngo mama hnyawa hi koi së ka hape, Iehova a thupëne la nöje i Nyidrë. Kösë fe lo kola cile xötreithi së hnene la itre hoos me itre ikariota eë. Maine xecie koi së ka hape, Iehova a thupëne la nöje i Nyidrë, nge hne së pala hi hna mejiune koi Nyidrë, tro ha lapa hnyawa la itre hni së, me lapa atre ka hape, hna kepe së hnei Nyidrë. (Sal. 4:8) Tro sa ce ithanatane la itre eloine hne së hna kapa qa ngöne la itre xa ewekë ka traqa ngöne la mele i Elisaia.

ELISAIA A NYIQAANE NYI HLUE I ELIA

Ame la ketre drai, ngöne la Elisaia a eëny, traqa pi hi Elia koi angeic, me xetrë angeice la ixetre i nyidrë. kolo hi lai a nyi hatrene laka, Elia a hë angeice troa nyi hlue i nyidrë. Hnei Elisaia hna hëne la itre sinee i angeice troa ce xeni ne iahni me keme me thine i angeic, nge thupene lai, angeice a cile me xötrethenge Elia. (1 Ite jo. 19:16, 19, 21) Pine laka aja i Elisaia troa kuca asë la hnei Iehova hna upi angeice troa kuca, haawe, tha jole kö koi Iehova troa eatrëne la itre xa ewekë hna jëne angeic, nge ame pë hë e thupen, hna acili angeice troa hane perofeta, nyine hnai Elia.

 Sikisi lao macatre ne nyi hlue i Elia hnei Elisaia. Ame ngöne la ijine cili, Tusi Hmitrötre a qaja ka hape, Elisaia la “ate fie timine la lue ime i Elia.” (2 Ite jo. 3:11) Kola hapeue lai? Hna majemine ekö troa xome hnei iwanakoime la göxen ngöne la angatr a xen. Ame hë thupen, kola fie hnene la ketre hlue la iwanakoime ne la maseta i angeic. Haawe, kola mama laka, tha nyipi huliwa kö la itre xa huliwa i Elisaia. Ngo ame pe, ka tru koi angeice la troa nyi hlue i Elia.

Ketre tune mina fe, nyimutre la itre Keresiano enehila ka ajane troa kuca la nöjei aqane troa huliwa i Akötresie o drai. Pine nemen? Pine laka angatre a lapaune koi Iehova, nge angatre a pi hamëne asë la hnei angatre hna atrein. Itre xane a nue la hnalapa i angatre troa huliwa ngöne Bethela, maine troa xupi uma thatraqane la huliwa ne cainöj. Maine jë, ame koi itre ka ala nyim, tre, tha itre nyipi huliwa kö lai. Ngo tha tro pi kö sa mekune tune lai. Iehova a wangatrune catrëne la nöjei huliwa hna kuca hnene la itre hlue i Nyidrë.—Heb. 6:10.

THA NUETRIJE KÖ ELISAIA LA HNËQA I ANGEIC

Qëmekene tro Akötresieti a a xomi Elia “hnengödrai’ë jëne la udeli,” hnei Nyidrëti hna pane upe la perofeta troa trongëne la itre gojeny. Hnei Elia hna qaja koi Elisaia ka hape, tha tro kö angeice a hane ce tro me nyidrë, ngo hnei Elisaia hna sa me hape: “Tha tro kö ni a nue cilie.” Ame la ijine kola trongëne la itre gojeny, alua qaja hnei Elia koi angeice troa lapa pe, ngo thipëne pi kö Elisaia. (2 Ite jo. 2:1-6) Hna nyipici hnei Elisaia koi Elia, tune la aqane nyipici Rutha koi Naomi. (Rutha 1:8, 16, 17) Ame koi Elisaia, ketre ewekë ka tru la troa hlue i Elia, ke, huliwa lai hnei Akötresieti hna ahnithe koi angeic.

Elisaia la ketre tulu ka lolo koi së. Maine tro pala hi sa mekune hnyawa laka easa nyi hlue i Iehova, tro hë sa wangatrune la nöjei huliwa hne së hna kuca thatraqane la organizasio i Nyidrë. Pëkö ketre ewekë ka tru hune la.—Sal. 65:4; 84:10.

“QAJAJË LA EWEKË TRO NI A KUCA THATRAQAI NYIPË”

Ame la kola tro hnei nyidro, öni Elia jë hi koi Elisaia: “Qajajë la ewekë tro ni a kuca thatraqai nyipë e tha ase pete kö xomi ni qa thei nyipë.” Öni Elisaia e sa: “Epi troa a lu a hamëne la u i cilie koi ni.” Tune lo hna kuca ha hnei Solomona, hnei Elisaia hna sipone la ketre ewekë ka troa xatua angeice troa nyi hlue i Iehova hnyawa. (1 Ite jo. 3:5, 9; 2 Ite jo. 2:9) Nemene la hna sipone hnei Elisaia? Thenge la Trenge Wathebo i angetre Isaraela, troa hamëne kowe la haetra la lue edrö. (Deu. 21:15-17) Haawe, Elisaia hi lai a sipone koi Elia troa kapa la edrö i Elia, ene la troa xome la huliwa ne perofeta, nyine nyihnai Elia. Ketre, hnei angeice hna sipone troa hetrenyi la u i Elia, ene la aqane ujë i nyidrë, ke, aja i angeice troa hetrenyi la aqane catre i Elia kowe la nyipi hmi.—1 Ite jo. 19:13, 14.

Nemene la aqane sa Elia kowe la sipo ne la hlue i angeic? Önine la perofeta e sa: “Ewekë ka hace la hnei nyipëti hna sipon, ngo maine nyipëti a goeë ni e kola xomi ni qa thei nyipë, troa tune koi nyipë, ngo maine pëkö, tha tro kö a tun.” (2 Ite jo. 2:10) Lue aliene la trenge ewekë i Elia. Ame la hnapan, tre, Akötresieti kö la ka troa amekötine maine troa kapa maine tha kapa pena hnei Elisaia lo hnei angeice hna sipon. Ame la hnaaluen, tre, maine kola ajane hnei Elisaia troa kapa la sipo i angeic, nyipi ewekë tro pala hi a ce huliwa me Elia, ngacama traqa ju hë la itre jol.

EWEKË HNA GOEËNE HNEI ELISAIA

Hnei Akötresieti kö hna kapa lo sipo i Elisaia? Kola qaja hnei Tusi Hmitrötre ka hape: “Nyidoti pala kö a tro, me ithanata, nge hana wange la ikariota eë, me ite hose eë, mate iananyi nyido ; nge Elia a elë hnengödrai ’ë jëne la udeli. Nge Elisaia a goeën, me hë draië, ka hape, Kaka, kaka, ikariota i Isaraela memine la itete ti hose ne ej. Nge tha öhnyi nyidëti hmaca kö hnei angeic.” a Celë hi aqane sa hnei Iehova la sipo i Elisaia. Hnei Elisaia hna öhne la kola xomi Elia hnengödrai eë, nge angeice pë hë a kapa ju fe la lue edrö i Elia ngöne la götrane u, me nyihnai nyidrë troa perofeta i Akötresie.—2 Ite jo. 2:11-14.

Hnei Elisaia hna hleme la ixetre i Elia ka mala pe, me xetrën. Ame la kola öhne hnene la itre atr la Elisaia a xetrëne la ixetre i Elia, atre ju hi angatre e cili ka hape, angeice hë enehila la perofeta i Akötresie. Ame hë e thupen, hnei angeice hna thawaluëne la Hneopegejë e Ioridano, ene pe mama hmaca pi hi laka, angeice la perofeta i Akötresie.

Thatreine kö troa thëthëhmine hnei Elisaia lo kola xomi Elia hnengödrai eë jëne la udreli. Pëkö ka tha troa sesëkötre ngöne la kola öhne la itre ikariota ne isi, me itre hoose eë! Itre ewekë lai ka anyipicine koi Elisaia ka hape, ase hë Iehova kapa la sipo i angeic. Ame la Akötresieti a sa la itre thithi së, tre, tha öhne kö së la itre hoose me itre ikariota eë. Ngo, mama hnyawa pala hi koi së la hatrene laka,  Akötresieti a xome la mene i Nyidrë troa xatua së, me eatrëne hnyawa la aja i Nyidrë. Ame la easa öhne la aqane amanathithine Iehova la organizasio i Nyidrë e celë fen, kösë lo easa goeëne lo ikariota i Nyidrë e hnengödrai, a tha mano kö nyinyap.—Ezek. 10:9-13.

Nyimutre la itre ewekë hnei Elisaia hna melëne ka anyipicine koi angeice la mene atraqatre i Iehova. Eje hi, hna aijijë angeic, atre perofeta, troa kuca la 16 lao iamamanyikeu, kösë alu qa ngöne lo lai itre iamamanyikeu hna kuca hnei Elia. b Ame la hnaaluene ijine Elisaia a öhne la itre hoosi me itre ikariota eë, kolo angeice e Dothana, lo kola cile xötreithi angeice hnene la itre soce i angetre Suria.

ELISAIA A MEJIUNE KOI IEHOVA

Ngacama, hna cile xötreithi Elisaia hnene la itre soce i angetre Suria, ngo tha enienije menu kö angeic. Pine nemen? Pine laka, ka catre lapaune i angeice koi Iehova. Nyipi ewekë mina fe tro sa catre lapaun. Loi e tro sa sipone la uati hmitrötre i Akötresie jëne la thith, matre amamane la lapaune së, memine la itre xa thiina, wene ne la ua.—Luka 11:13; Gal. 5:22, 23.

Ame la ewekë ka traqa e Dothana, tre, hna acatrene la mejiune i Elisaia koi Iehova me kowe la itre soce i Nyidrë, ene la itre angela. Hnei Akötresieti hna upe la itre angela i Nyidrëti troa cile xötreithe la traone me thupë angeice qa ngöne la itre ithupëjia. Thupene lai, hnei Akötresieti hna atimekëne la itre ithupëjia, me amele Elisaia memine la hlue i angeic. (2 Ite jo. 6:17-23) Ame ngöne la ijine ngazo cili, me itre xa ijine ju kö, tre, hnei Elisaia pala hi hna amamane la lapaune me mejiune i angeice koi Iehova.

Loi e tro fe sa hane mejiune koi Iehova Akötresie, tui Elisaia. (Ite edomë 3:5, 6) Maine tro sa ujë tune lai, tro Akötresieti a kepe së me amanathithi së. (Sal. 67:1) Nyipici laka, tha hna cile xötreithi së kö hnei hoos me ikariota eë, ngo ame pe kola thupëne hnei Iehova la nöje i Nyidrë enehila. Nge ame ngöne la itre drai ka troa xulu, tro fe Nyidrëti a amelene la nöje i Nyidrë qa ngöne la “aköte atraqat.” (Mat. 24:21; Hna ama. 7:9, 14) Uti hë la troa traqa la ijine cili, tha tro kö sa thëthëhmine ka hape, “Akötesieti la hnāpo shë.”—Sal. 62:8.

[Ithueamacany]

[Iatr ne la götran 28]

[Hna cinyhan ne la götran 30]

KOLA HUN LA ITRETRE ANYIPICI IEHOVA

243 — La etrune la hna hun hnene la Itretre Anyipici Iehova ngöne la itre hnaakootre ka tru e cailo fen uti hë enehila

Faras — 764 878 477 F Nyine Të

Etrune la mani nyine të hnene la musi angetre Faras kowe la Itretre Anyipici Iehova lo 11 Diseba 2012 thupene la 15 lao macatre ne isi ngöne mus

Heleni — Conseil d’État

Hnene la Conseil d’État hna kapa lo 2 Nofeba 2012, ka hape, tro fe a hetre uma ne hmi ne la Itretre Anyipici Iehova, ketre hmi hna atre hnyawa e cailo fen

20 — La etrune la hna hun hnene la Itretre Anyipici Iehova ngöne la hnakootr hna hëne ka hape Cour européenne des droits de l’homme qaane lo Eiperem 2000

Kore Götrane Kolojë — Comité des droits de l’homme des Nations unies

Hna amekötine lo 25 Okotropa 2012 - kowe la Kore götrane kolojë troa të la hnei angatr hna tha trongëne la itre hna amekötine thatraqane la ala 388 la Itretre Anyipici Iehova ka xele ma soc pine la lapaune i angatr