Iehova La ‘Atre Thue La Ehnefenge o Drai’

Maretha du Raan

Ngacama hna tithi ni hnei kucakuca, nge hna akötrëne la meleng, ngo drenge pala hi ni la ihnimi ka tru ne la Tretretro së ene Iehova, kola xatua ni ngöne la meleng. Ase hë sasaithe la truedre lao macatre ne eni a pionie nge atraqatre la madrineng.

Kola hnaho ni ekö lo 1956, nge hetre mecinge hë ngöne la ju meköting (spina bifida). Pine laka, ka thöni la ju meköting, nge tha humu hnyawa kö, ngazo hë la itre none ka tro qa ngön, celë hi matre thatreine kö ni tro, nge hna traqa fe koi ni la itre xa meci ju kö.

Qëmekene troa hnaho ni, hnene la itre mesinare Atre Anyipici Iehova hna ini Tusi Hmitrotre me Kaka me Nenë. Ame la ijine eni a nekönatr, xalaithe catre hi la itre ka cainöje trootro ngöne la traone hne huni hna mele ngön e Usakos, Namibie. Celë hi matre hnepe lapa huni a ce wange la itre porogarame ne icasikeu ne la ekalesia. Ame la eni a sevene lao macatre, kolo hi lai a xöje la ketre götranene la ngötreinge matre troa nyijëne tro ni a zij. Ame la eni ha 14 lao macatreng, hna tithi ni hmaca pena hnene la ketre mec, lo hna hape, ön. Tha umuthe ju kö ni la ining, pine laka nanyi la uma ne ini ka tru qa ngöne la hnalapa hun; tha ijijinge kö troa isa lapa me Kaka me Nenë lue ka atreine troa thupë ni.

Ngo ame koi ni, eje hnyawa e kuhu hninge laka, tro ni a ketre sipu acatrene la lapauneng. Nyimu itusi së tha hna ujëne pala kö ngöne la qene Afirik, qene hlapa hnenge hna ithanatan. Celë hi matre eni a inine jë la qene Papale göi troa inine la itre itusi së ka nyimutre. Hna kepe ni troa cainöje trootro, nge thupene lai hna bapataiso ni lo kola 19 lao macatreng. Ngöne la foa lao macatre thupen, tru hnei meci me jole ka akötrëne la hninge ka traqa koi ni. Ketre mina, hnene la aqane catrehnine la imelekeu ne la itre atrene la götrane hne huni hna mele ngön, matre tru la xoue atr thenge e troa catre cainöje trootro.

Ngöne la kola 20 lao macatreng, hne huni hna feke qaa Namibie troa lapa ngöne la götrane kolo jë ne Afirik, nge eni petre hi lai a troa hane xötrei sine la icasikeu ne la ekalesia. Tha aqane mingöminge kö! Ngazo pe, tro hmaca kö a xöji ni, kolo hmaca pena ha troa xöje la ngöne xelenge göi troa nyijëne tro ni a kötrengönë.

Ame hë e thupen, hnene la atre thupëne la sirkoskripsio hna cile fë la ketre cainöje ka qeje pengöne la huliwa ne pionie. Ketre jë hi la hninge hnene la itre mekune hnei angeice hna qaja. Atre hi ni laka tha ijije kö la trenge catreng, ngo ketre öhne hi ni la aqane xatua ni hnei Iehova ngöne la itre jole ka traqa koi ni. Haawe, eni pë hë a nyialiene ju la ipepa ne sipo göi troa pionie lapa. Ngo ame pe, hnene la kucakucange matre kola luelue la itre qatre thupe troa kapa la sipong.

Ngo hnenge hna tupathe troa kuca la hnenge hna atreine göi troa cainöjëne la Baselaia. Hna xatua ni hnene la thinenge me itre xane ju kö matre atreine ni troa eatrëne la itre hawa ne pionie ngöne la sikisi lao treu. Kolo hi lai a amamane la trenge ajange troa pionie, memine fe la atreinenge troa elë hune la itre kucakucang. Eni hmaca pë hë a sipo ju, ame hna kapa la sipong. Ame lo 1 Semitrepa 1988, eni ha xejë la huliwa ne pionie lapa.

Ame la eni a pionie, eni hi lai a öhne la aqane xatua ni hnei Iehova. Ame la eni a inine la itre atr la nyipici hune la tro ni a wangatrune la pengöng, kösë kolo hi lai a thupë ni, me acatrene catrëne la lapauneng. Ame la ka hamë madrineng, tre, ene la troa xatuane la itre atr matre nue pi angatre la mele i angatre koi Akötresie, me xome la bapataiso.

Ngacama thatre kö ni la ka troa traqa koi ni elany, ngo Iehova la ‘Atre thue la ehnefenge o drai.’ (Sal. 68:19) Tha hnei Nyidrëti hna xatua ni hmekuje troa xomihnine la akötreng, ngo hnei Nyidrëti fe hna amadrinëne la meleng!

[Iatr ne la götran 9]