Imekunekeune Jë Me Ithuecatrekeu
Imekunekeune Jë Me Ithuecatrekeu
“Tro sha imekunekeune mate troa aciane la ihnimi me ite huliwa ka loi.”—HEB. 10:24.
NEMENE LA AQANE TRO NYIPUNIETI A SA?
Kola hapeue la kola hape, troa “imekunekeune”?
Kola hapeue la kola hape, “troa aciane la ihnimi me ite huliwa ka loi”?
Nemene la aqane tro sa ithuecatrekeu?
1, 2. Nemene la ka xatuane la ala 230 lae Itretre Anyipici Iehova troa mele pe qa ngöne lo trongene mec, lo pune lo Hnaaluene Isi Ka Tru?
TRAQA ha kowe la pune la Hnaaluene Isi Ka Tru. Ase hë ngaane la isoce i Hitler. Hnene la musi Nazi hna amekötine la aqane troa humuthe la itre thauzane lao hna othe ngöne la itre iuma ne kalabus. Troa xome la itre hna umëne e Sachsenhausen kowe la ketre götrane hna xepe hnei he, nge troa ati angatre hune la itre he nge nyinyape fë jë hë matre troa alöne nyipine ihnagejë. Hna ati ëjene la tro cili ka hape, trongene mec.
2 Ala la ala 33 000 lao hna akalabusine hna upe troa trongëne la 250 kilomete qa ngöne lo itre iuma ne kalabus e Sachsenhausen a tro Lübeck, ketre hna xepe hnei he ne Alema. Ame qaathei angatr, hetre 230 Atre Anyipici Iehova ka qa ngöne la sikisi lao nöj. Hnene la itre soci hna qaja kowe la Itretre Anyipici Iehova troa icacaxenyi matre ce tro. Kucakuca asë hi la itre hna akalabusine hnei mec, me pë xen. Ngo pëkö trejine me easë ka mec ngöne la tro cili. Hna tune kaa matre mele asë kö angatr? Önine la ketre e angatr, “Hnei eahuni pala hi hna ithuecatrekeu matre tha tro kö a patre la ala cas.” Hnene la ihnimikeu ka eje thei angatre memine la “etrune la men” hna kapa qaathei Akötresie hna xatua angatre troa mel.—2 Kor. 4:7.
3. Pine nemene matre nyipi ewekë tro sa ithuecatrekeu?
3 Ngacama tha hane fe kö së enehila sine la trongene mec, ngo easë pala hi a xomihnine la itre jole ka nyimutre. Thupene jë hi lo kola acile la Baselaia i Akötresie lo 1914, helë Satana pi hi qa hnengödrai kowe la fen. Tru catre la trenge elëhni nyën, ke, atre hë nyëne ka hape, “xoxopate hi la ijine i nyën.” (Hna ama. 12:7-9, 12) Kola easenyi catre hnei Amagedo, nge Satana a xome la nöjei pengöne itupathe troa ananazijëne la aqane imelekeu së me Iehova. Ketre, hna akötrë së fe hnene la itre ewekë ka traqa koi së o drai. (Iobu 14:1; Ate cai. 2:23) Ame itre xa ijin, kola akucakucanyi së hnene la nöjei jole cili, matre kuca ju hë së la itre huliwa, ngo ka kucakuca pala hi së. Tune la ketre trejine ngöne la itre macatre ka ase hë, hnei nyidrëti pala hi hna thuecatrene la itre trejine matre catre angatre mele nyipici koi Iehova. Ngo ame hë la nyidrëti a qatr, nge kola tithe la ifëneköi nyidrë hnei mec, tre, kolo fe hë traqa koi nyidrë la kucakuca. Tune la ka traqa kowe la trejine cili, nyipi ewekë troa hetrenyi the së asë la “etrune la men” qaathei Iehova. Ka nyipi ewekë fe koi së troa kapa la ithuecatre qaathei itre xan, me ithuecatrei angatre fe.
4. Maine aja së fe troa thuecatrene la itre xan, nemene la eamo i Paulo aposetolo nyine tro sa xötrethenge?
4 Maine aja së fe troa thuecatrene la itre xan, ka loi e tro sa xötrethenge la eamo i Paulo aposetolo hna hamëne kowe la itre Keresiano ne Heberu. Öni angeic: “Tro sha imekunekeune mate troa aciane la ihnimi me ite huliwa ka loi ; tha tro kö a tije la icasikeu shë tune la thina i ite xan ; ngo loi pe [“troa ithuecatrekeu,” MN] nge nue catëne jë e tro nyipunie a goeëne la drai a eashenyi hë.” (Heb. 10:24, 25) Nemene la aqane tro sa trongëne la eamo ka nyipi ewekë celë?
“TRO SHA IMEKUNEKEUNE”
5. Kola hapeu, lai kola hape “tro sha imekunekeune”? Nemene la aqane tro sa melëne lai?
5 Ame la troa “imekeunekeune,” tre, kola hape, troa mekune la hna ajane hnei itre xan. Thatreine jë kö tro sa atre la hna ajane hnene la itre trejine me easë, e tro hi sa ibozu me angatre ngöne la Uma Ne Basealaia, maine tro pena a porotrikëne la itre ithanata ka pë alien. Eje hi laka, tha tro kö sa thele troa atre menune la pengöne la mele ne la atr. (1 Thes. 4:11; 1 Tim. 5:13) Ngo ame la aja së, tre troa atrepengöne la itre trejine me easë. Easa ajane troa atre la pengöi angatr, me itre thiina ka loi angatr, memine la itre ewekë hnei angatre hna atreine kuca, maine hna thatreine pena, memine la hnei angatre hna mekune göne la nyipici. Aja i angatre troa atre ka hape, easë la itre sinee i angatr, nge easa hnimi angatr. Tro sa thele ijine tro sa wai angatr, tha ene hmekuje kö la kola traqa koi angatre la itre jol, maine angatr a nanazij, ngo ngöne la nöjei pengöne ijin.—Rom. 12:13.
6. Nemene la ka troa xatuane la ketre qatre thupe troa ‘imeku,’ ene la troa mele goeëne la itre atrene la ekalesia?
6 Önine la Tusi Hmitrötr, qa ne la itre qatre thup troa hetre hni ne ajane troa thupëne la itre atrene la ekalesia. (1 Pet. 5:1-3) Tro la itre qatre thupe a atreine kuca lai e tro angatre a atrepengöne la itre trejin. (E jë la Ite Edomë 27:23.) Maine troa amamane hnene la itre qatre thupe la aja i angatre troa hamë ixatua, me madrine i angatre troa wange la itre trejin, haawe, tha tro kö la itre trejine cili a cile hnö troa thele ixatua thei angatre ngöne la ijine angatre a ajan. Ketre, tha tro fe kö lai a jole koi angatre troa ithanatane memine la itre qatre thupe la itre mekuna i angatr, me itre ewekë ka ajolëne la hni angatr. Haawe, tro hë la itre qatre thupe lai a atreine troa isa hamë ixatua thenge la aja ne la atr.
7. Nemene la nyine tro sa mekune hnyawa e qaja pi la itre ithanata ka “menu” hnene la itre ka meci hni me mekun?
7 Hnei Paulo hna qaja kowe la ekalesia ne Thesalonika ka hape: “Xatuanejë la ite ka kucakuca.” (E jë la 1 Thesalonika 5:14.) Ame la itre “kucakuca,” tre, kola qaja fe la itre hna akötrëne la mekune me hni. Kola qaja hnei Ite Edomë 24:10 ka hape: “E eö a kucakuca ngöne la drai ne aköt, te, co hi la tenge cate i ’ö.” Maine easa ajane troa xatuane la itre atr cili, tha tro pi kö sa thëthëhmine ka hape, ‘menu la tenge ewekë i angatr’ e itre xa ijin. (Iobu 6:2, 3) Tro angatre lai a qaja la itre ithanata ka pëkö alien. Atre hnyawa hi Rakela la pengöne la mele cili, pine laka hna tithe la thine i angeice hnei meci hni me mekun. Öni Rakela: “Nyimu ijine Nenë a qaja la itre ithanata ka iakötrë. Ame ngöne la itre ijine cili, hnenge hna thele troa mekune lo itre pengöi eahlo ekö, ka ihnim, nge ka lolo la thiina, nge ka ham. Eni lai a atre ka hape, ame la itre hna tithe hnene la kucakuca cili, tre, ngacama ngazo la itre ithanata i angatr, ngo tha qa kö kuhu hni. Ame la ewekë tha nyine tro pi kö a kuca, tre, ene la troa isakeune maine troa itëkeun.” Öni Ite Edomë 19:11: “Ame la inamacane ne la ate, te, ate ahmitene la elëhni angeic ; nge nyine alolo angeice troa tha mekune la hna shashaith.”
8. Drei la nyine tro sa “acatene” la ihnimi së kow, nge pine nemen?
8 Nemene la aqane tro sa a amamane la ‘imeku’ së kowe la atr ka kucakuca pine la itre ewekë hnei angeice hna kuca ekö? Ngacama saze hë la mele i angeice enehila, ngo eje pala kö la hmahma thei angeice pine la itre ewekë hnei angeice hna kuca ekö. Hnei Paulo hna cinyihane kowe la angetre Korinito göne la ketre atr ka ietrane la itre ngazo i angeice ekö. Öni nyidrë: “Tro nyipunie a qeje loi angeic, me aupunyi angeic, wanga ulumeju la ate ka tune lai hnene la hleuhleu ka nyipi atraqat. Qa ngöne lai ini a sipo nyipunie, troa acatene la ihnimi nyipunie koi angeic.” (2 Kor. 2:7, 8) Ame la hnaewekë hna hape, “acatene,” tre, kola hape, “troa amaman,” maine “troa anyipicin.” Tro lai trejine a drenge ka hape, easa hnimi angeice me meku angeic, ke hna amamane hnene la aqane ithanata së me itre huliwa së.
“TROA ACIANE LA IHNIMI ME ITE HULIWA KA LOI”
9. Kola hapeue la kola hape, “troa aciane la ihnimi me ite huliwa ka loi”?
9 Hnei Paulo hna cinyihane ka hape: “Tro sha imekunekeune mate troa aciane la ihnimi me ite huliwa ka loi.” Maine tro sa xötrethenge la aqane ujë celë, tre, easë hi lai a thuecatrene la itre trejine troa melëne la ihnim me troa kuca la itre huliwa ka loi. Hanawange la ketre ceitun: Maine easa ajane tro pala hi a mele hnyawa la eë, loi e tro së lai a ipicon, me uf. (2 Tim. 1:6) Ketre tune mina fe, hetrenyi la itre ewekë nyine tro sa kuca matre xatuane la itre trejine troa hetre trenge catre i angatre me catre angatre nyi hlue i Iehova. Ame la ketre nyine kuca ka sisitria, tre, ene la tro sa qaja la madrine së kowe la itre trejine pine la itre ewekë ka loi hnei angatre hna kuca.
10, 11. (a) Drei la ka ajane troa qaja aloin la huliwa i angeic? (b) Hamëne pi la ketre ceitune ka amamane la eloine e troa qaja aloine la hna kuca hnene la ketre atr, matre xatua angeice troa kuca la meköt.
10 Ngacama ka kucakuca së maine tha ka kucakuca pena kö, ngo lolo koi së la tro la ketre a qaja la madrine i angeice pine la itre huliwa hne së hna kuca. Hna cinyihane hnene la ketre trejine ka hape, “Tha ase fe kö ni drenge la kemenge a hane qaja koi ni la madrine i nyidrë pine la itre ewekë ka loi hnenge hna kuca.” Celë hi matre ame hë la kola thupëtresije hnene la trejine celë, angeice a mekune ka hape, ame la nöjei ewekë hnei angeice hna kuca, tre, pëkö eloin. Ngacama 50 hë lao macatre i angeice enehila, ngo ka madrine pala hi angeice la ketre a qaja aloine la huliwa ka loi hnei angeice hna kuca ngöne la hnëqa ne qatre thup. Pine la itre ewekë hnei angeice hna melëne ekö, öhne hë angeice la enyipiewekëne la troa ithuecatrene la itre xan, celë hi matre, saqe i angeice pala hi troa qaja amamane la madrine i angeice kowe la itre atr pine la itre huliwa ka loi i angatr. Ithuecatre koi së asë la easa drenge la ketre atr a qaja ka hape, ka loi la itre huliwa së. Celë hi ka ithuecatrene fe la itre pionie, me itre qatre me qatre föe, me itre ka kucakuca.—Rom. 12:10.
11 Ame la itre qatre thupe a thele jëne troa xatuane la ketre atr pine la tria i angeic, nge e troa nyiqaane qaja aloine la itre ewekë hnei angeice hna kuca ka loi ekö, haawe, tro lai a xatua angeice troa saze la mekuna i angeic, me kuca la loi. (Gal. 6:1) Celë hi ixatua hna kapa hnene la ketre trejine föe, Miriam la ëjen. Hnei angeice hna cinyihane ka hape: “Ase petre hi traqa la ketre ijine jole koi ni, lo kola nuetrije la nyipici hnene la itre sineenge hnenge hna epe catre kow, nge ngöne la ijine cili, kolo fe hi lai a traqa la meci kowe la kemeng, hna xeci la none la he i nyidrë. Tru la hleuhleu e kuhu hning.” Hnei angeice hna nyiqaane iatre memine la ketre atr ka tha nyi hlue i Iehova kö, ke angeice a mekune ka hape, ma ixatua ka loi jë koi angeic. Ngo ngazo pe, angeice hmaca pena ha mekune ka hape, trianyi angeice hë la ihnimi Iehova, ame hnei angeice hna mekune troa tro trije la nyipici. Ngo hnene la ketre qatre thupe hna amekunë angeice la nöjei ewekë ka loi hnei angeice hna kuca ngöne la huliwa i Iehova, nge hnei nyidrëti fe hna amamane hnyawa koi angeice ka hape, Iehova pala hi a hnimi angeic. Ame hë la thangan, acatrene hmaca jë hi la ihnimi angeice koi Iehova. Ame hnei angeice hna qeje fenesi kowe lo atr hnei angeice hna iatre memin, me catre nyi hlue i Iehova.
12. Maine tro sa aceitunëne la itre trejine me easë me itre xan, me waiengazonyi angatr, me qaja acone la hna huliwa hnei angatr, nemene ju hë la thangan?
12 Wange hnyawa kö së la aqane tro sa “aciane” catrëne la aja thene la itre trejine me easë troa catre nyi hlue i Akötresie. Tha tro kö sa aceitunëne la huliwa i angatre me itre xan, me tro pena a waiengazonyi angatr, ke tha xötrethenge kö la aqane waiewekë së, maine tro pena ha qaja koi angatre ka hape, co hi la hna huliwa, loi e troa atrun. Maine jë tro la aqane ujë së celë a ithuecatre i angatre troa catre huliwa koi Akötresie, ngo tha ka tro kö lai a hut. Ame la nyipi aqane troa “aciane” la ajane thene la itre trejin, tre ene la troa qaja aloine la huliwa i angatr, me troa xatua angatre troa trotrohnine ka hape, ihnimi Iehova la ka sisitria matre easa catre huliwa koi Nyidrë.—E jë la Filipi 2:1-4.
‘TROA ITHUECATREKEU’
13. Kola hapeue la kola hape, troa ithuecatre koi itre xan? (Wange ju la pane iatr.)
13 Öni Paulo fe, “loi e [“troa ithuecatrekeu,” MN].” Tro sa aceitunëne la kola ithuecatre koi itre xan, memine la kola fi karesinëne la eë, matre tro pala hi eje a mel, maine troa tru catre hmaca kö la ukahlokin. Ame la kola ithuecatrene la itre trejin, tre kola hape, kola thue trenge catre i angatr, matre catre pala hi angatre nyi hlue i Akötresie. Ame la easa thele troa xatuane la itre atr ka kucakuca, nyipi ewekë tro sa ithanata cememine la ihnim, me menyik. (Ite edomë 12:18) Ketre, ka loi la tro sa saqe “dreng” me “hnöthe troa ewekë.” (Iako. 1:19) Maine tro sa drenge la trejine me easë, me thele troa trotrohnine la itre mekuna i angeic, tro hë së lai a atre la kepine matre angeice a kucakuca, nge atreine hë së troa hamë angeice la ithanata ka ijije göi troa xatua angeic.
14. Hnene la qatre thupe hna xatuane tune kaa la trejine ka nanazij?
14 Tro sa ce wange la aqane xatuane la ketre trejine ka nanazij, a nyimu macatre hë hnene la ketre qatre thupe ka menyik. Ame la kola drei angeice hnene la qatre thup, mama pi hi ka hape, tru pala hi la ihnimi angeice koi Iehova. Ka inine pala hi angeice la nöjei Ita Ne Thup, nge tha patre kö ngöne la itre icasikeu. Ngazo pe, hnene la itre xa atr ngöne la ekalesia hna kuca la itre xa ewekë ka athixötrë angeic. Hnene la qatre thupe hna drei angeice hnyawa, me thele troa trotrohnine la aliene la itre mekuna i angeic, ngo tha hna thele kö troa waigele i angeic, me amamane hnyawa fe koi angeice ka hape, ka tru pala hi angeice kowe la itre trejin. Kolo pala hi a tro la itre drai, nge öhne hnyawa ha lai trejine ka hape, ame la itre ewekë hnei angeice hna kuca ekö, tre itre ka thingijë i angeice troa nyi hluene la Akötresie hnei angeice hna hnim. Hnene la qatre thupe hna hëne lai trejine matre ce tro me nyidrë kowe la hna cainöje trootro. Qa ngöne la ixatua hna hamëne hnene la qatre thup, nyiqaane hmaca jë hi hnene lai trejine troa cainöje trootro, nge thupene hë, ame hnei angeice hna xome hmaca la hnëqa ne qatre thup.
15. Nemene la ini nyine tro sa xome qa ngöne la aqane xatuane Iehova la itre atr?
15 Maine jë, ame la kola xatuane la atr ka kucakuca, tre, tha canga öhnyi eloine kö angeice ngöne la xötrei, maine tha canga kapa kö la ixatua qaathe së. Ngo the mano kö troa xatua angeic. Öni Paulo: “Xatuanejë la ite ka kucakuca, xomi hnine ahoeane ju la nöjei ate asëjëihë.” (1 Thes. 5:14) The canga nue kö la itre ka kucakuca, ngo ‘xatua’ angatre jë, the mano kö. Ame ekö, hnei Iehova hna xomihni ahoeanyi la itre hlue i Nyidrë ka kucakuca. Ka tune lo Akötresieti a xomihnine ahoeanyi Elia, me wangatrune la itre mekuna i angeic. Hnei Nyidrëti hna hamë Elia la ka nyipi ewekë koi angeice göi troa sisedrëne la hnëqa i angeic. (1 Ite jo. 19:1-18) Ka tune mina fe göi Davita, atre ietrane la itre ngazo i nyidrë. Öhne hi Iehova la hni nyidrë, ame hnei Nyidrëti hna nue la itre ngazo i Davita. (Sal. 51:7, 17) Hnei Akötresieti fe hna xatuane la atre cinyihane la Salamo 73, lo ka tro ha nuetriji Nyidrë. (Sal. 73:13, 16, 17) Iehova pala hi a hnimi së me xomihnine ahoeanyi së, ngöne fe lo itre ijine easa kucakuca. (Eso. 34:6) Önine la Tusi Hmitrötr, “hnyipixe [la trenge ihnimi Nyidrë] o hmakany,” nge “tha asejë kö” itre ej. (Ite teije 3:22, 23) Aja i Iehova tro sa xötrethenge la tulu i Nyidrë, me troa hnime la itre ka kucakuca.
ITHUECATREKEU JË MATRE CILE HUTI NGÖNE LA GOJENYI NE MEL
16, 17. Pine laka saqe catre hë la pune la fene celë, nemene la nyine tro sa kuca, nge pine nemen?
16 Ame qaathene la ala 33 000 hna akalabusin, ka tro qa ngöne la iuma ne kalabus e Sachsenhausen, traqa kö koi itre thauzane lao ka mec. Ngo ame asë hi la 230 lao Itretre Anyipici Iehova, pëkö ala casi ka mec. Thatreine jë kö tro angatre a mel, e tha hnei angare kö hna itö ithuecatrekeu me itö ixatua.
17 Easë fe enehila ngöne “la gojenyi ne tro kowe la mel.” (Mat. 7:14) Tha hmitre kö matre tro la nöjei ka nyi hlue i Iehova asë a mele pe matre lö kowe la fene ka hnyipixe nge e cili la meköt. (2 Pet. 3:13) Pine laka saqe catre hë la ijine matre nyipune pi la fene ka ngazo i Satana, haawe, ithawakeune jë la ixatua matre cile huti kö së ngöne la gojenyi ne mel.
[Thying]
[Iatr ne la götran 18]
[Iatr ne la götran 20]
Thuecatrene jë la itre xan, ene la troa ce huliwa me angatre ngöne la hna cainöje trootro
[Iatr ne la götran 20]
Aciane jë la ihnimi me itre huliwa ka loi
[Iatr ne la götran 21]
Xomi ijine jë matre troa atre la itre trejin
[Iatr ne la götran 22]
Drenge hnyawa ju la ketre atr ka aja ixatua (Wange ju la paragarafe 14, 15)
