Itre Keme Me Thine Fe—Inine Jë La Itre Nekö i Epuni e Medrenge Petre Kö Nyudren

ÖNI Tusi Hmitrötr: “Hana wang, edö shë qa thei Iehova la ite nekönat ; nge wene la hni, te, june qa thei nyidë.” (Sal. 127:3) Ketre ijine madrine ka tru catre kowe la itre keme me thine la kola hnahone la ketre medreng.

Ngo, ame mina fe ngöne la ketre götran, tre, hetrenyi la itre xa hnëqa ka tru hna troa xome hnene la keme me thin. Nyipi ewekë tro nyidroti a ithuane la nekönatre o drai matre troa kökötre lolo hnei nyën uti hë la kola thupëtresij. Ngo nyipi ewekë mina fe troa ini nyëne me amekötine la itre jë i nyëne hnene la keme me thine i nyën, matre hane fe catre la aqane imelekeu i nyëne me Iehova. Loi e tro nyidroti a ini nyëne la itre trepene meköti qa hnine la Wesi Ula i Akötresie. (Ite edomë 1:8) Eue la ijine troa nyiqaane inine la itre nekö i nyidro, nge nemene la hnei nyidro hna troa inine koi nyën?

 NYIPI EWEKË LA IXATUA I AKÖTRESIE KOWE LA ITRE KEME ME THIN

Tusi Hmitrötre a qeje pengöne la ketre trahmany, Manoa la ëjen, ka mele ngöne la traone ne Zorea e Isaraela. Pëkö nekö i Manoa me föi angeic, ngo hnene la angela i Iehova hna qaja kowe la föi Manoa ka safëje ka hape, tro hë nyidroti a hnahone la ketre nekönatre trahmany. (A. ame. 13:2, 3) Ngacama tru catre la madrine i nyidroti troa drenge la maca celë, ngo ame pe nyidroti fe a isa hnyinge ka hape, tro jë nyidroti a hiane hnyawane tune kaa la nekö i nyidro. Celë hi matre thithi jë Manoa tune la me hape: “Joxunge fe, epi traqa hmaca koi ho la ate i Akötesie hnei cilieti hna iup, mate ini ho la ewekë tro nyiho a kuca kowe la nekönate ka tro ha hnahon.” (A. ame. 13:8) Hnei Manoa me föi angeice hna inine la itre wathebo i Akötresie kowe la nekö i nyidro, Samasona, nge kola mama laka, hnei nyëne hna kapa la itre ini qaathei nyidro. Kola qaja hnei Tusi Hmitrötre ka hape, hnene la uati hmitrötre i Iehova hna xatua Samasona, ketre atre amekötine e Isaraela, troa kuca la itre ewekë ka tru.—A. ame. 13:25; 14:5, 6; 15:14, 15.

Eue la ijine tro la keme me thine a nyiqaane inine la itre nekö i nyidro? Hna ini Timoteo la pengöi Iehova, nge “nekönate pete kö” hnene la thine i nyën, me qaaqa i nyën, ene Lois. (2 Tim. 1:5; 3:15) Haawe, hnei nyidroti hna nyiqaane ini Timoteo la Itre Hna Cinyihan e nekönatre petre kö.

Ka loi e troa sipone hnene la itre keme me thine Keresiano la ixatua jëne la thith, me axeciëne la itre nyine kuca matre troa nyiqaane inine la itre neköi nyidro “e nekönate pete kö.” Kola qaja hnei Ite Edomë 21:5 ka hape: “Ame la ite mekune ne la ate cate huliwa, te, kola atena mon.” Eje hi laka, qëmekene troa hnahone la medreng, tre, troa pane hnëkë hnyawa hnene la itre keme thin. Maine jë tro nyidroti a cinyihane la itre ewekë nyine troa xome thatraqane la medreng. Ngo, ka nyipi ewekë mina fe tro nyidroti a hnëkëne la aqane troa inine la medrenge la pengöi Iehova. Ame fe la aja ka tru nyine tro nyidroti a traqa kow, tre ene la troa canga inine la medrenge thupene la kola hnahon.

Kola qeje pengöne hnene la ketre itusi la aqane kökötre la itre nekönatre uti hë la kola thupëtresij, me qaja ka hape, kola huliwa nyimenyime la atuate i nyën ngöne la itre treu thupene la kola hnaho nyën. Haawe, nyipi ewekë catre kowe la itre keme me thine troa xome la ijine cili matre troa inine la itre nekönatre la pengöi Iehova memine la itre trepene meköti Nyidrë!

Hna qaja hnene la ketre thine ka pionie lapa göne la nekö i eahlo jajinyi ka co ka hape: ‘Eni a tro sai nyëne ngöne la hna cainöje trootro, nge kolo petre hi a ca treu i nyën. Ngacama thatre pengöne kö nyëne la hna kuca, ngo xecie hnyawa koi ni ka hape, troa hetre thangane ka loi la hnei nyiho hna ce cainöj. Ame hë la kola lue macatre i nyën, nyëne fe hë a hane hamë tarak kowe la itre atr hnei nyiho hna cainöje kow.’

Eje hi laka, troa lolo la itre thangane hna kapa hnene la itre keme me thine qa ngöne la hna hiane la itre nekö i angatr, e co petre kö. Ngo atre hnyawa fe hi angatre ka hape, tha ka hmaloi kö troa eatrëne lai.

‘ANYIPI EWEKËNE JË LA NÖJEI IJIN’

Pine laka, jole catre kowe la itre nekönatre troa ca hna mekune hi, haawe, tha hmaloi kö kowe la itre keme me thine troa ini nyudren. Ka pi atre la itre nekönatr, me thele la pengöne la itre ewekë xötreithi nyudren. Tro la itre keme me thine a xatuane tune kaa la itre nekö i angatre troa drenge hnyawa la itre ini hna hamëne koi nyudren?

Pane mekune ju la hna qaja hnei Mose. Kola qaja ngöne Deuteronomi 6:6, 7 ka hape: “Tro ha eje e kuhu hni ’ö la nöjei tenge ewekë celë ini a ahnithe koi ’ö ngöne la drai celë ; nge tro eö a inin’ it’ eje kowe la ite nekö i ’ö, me ithanatan’ it’ eje e lapa eö hnine la uma i ’ö, me tro e kuhu gojeny, nge eö a meköle me mejë hmaca.” Nemene la aliene lai kowe la itre keme me thine la troa “inin” la itre trepene meköti Akötresie kowe la itre nekö i angatr? Kolo lai a hape, tro angatre a qaja lapane la hnei angatre hna inine koi nuydren. Ceitune la nekönatre memine la ketre feja ka ajane pala hi la hnepe tim. Tune la itre thupëtresije ka canga xome me kapa la ketre mekune e hna qaja lapan, haawe, tro fe la itre nekönatre a canga xome me kapa la itre mekune hna qaja lapane koi angatr.

Nyipi ewekë troa hetre ijine kowe la itre keme me thine troa inine la itre nekö i angatre la nyipici göi Akötresie. Ngo tro lai a nango jol, ke, tru la huliwa i angatr. Hnei Paulo aposetolo hna ithuecatrene la itre Keresiano troa “anyipi ewekëne la nöjei ijin” thatraqane la itre ewekë ka sisitria. (Efe. 5:15, 16) Tro la itre keme me thine a trongëne tune kaa lai? Hnene la trejine qatre thupe ka tru huliwan, nge ka pionie lapa la föi angeic, hna hnëkëne hnyawa la etrune la traeme ne troa inine la nekö i nyidro me etrune la traeme ne troa sajuëne la ekalesia, me etrune la traeme ne huliwa i maseta. Hnei nyidroti hna ami traeme tune kaa matre troa inine la  nekö i nyidro jajiny? Hna qaja hnene la keme ka hape: “Ame e nöjei hmakanyi qëmekene tro ni a tro troa huliwa, hnenge me föenge hna e koi nyëne la ketre edromë qa hnine la itus Trenge Edromë Qa Hnin La Tusi Hmitrötr maine pena la Topike Ne La Drai, Examinons les Écritures chaque jour. Ame e hej, qëmekene tro nyëne a meköl, nyiho a e tusi koi nyën, nge ame göi cainöje trootro, eahuni a ce tro. Nyiho a kuca asë la hnei nyiho hna atrein, troa ini nyëne e co petre kö.”

‘TUNE LA UKE PEHNA LA ITRE NEKÖN’

Easa ajane tro la itre nekö së a tru elany, nge atreine angatre troa isa xomi hnëqa; ngo ame la nyipi kepine matre kola ini angatr, tre matre troa eje e kuhu hni angatre la hnimi koi Akötresie.—Mar. 12:28-30.

Salamo 127:4 a qaja ka hape: “Ame la ite nekö ne thupëtesiji, te, tune la uke pehna ngöne la iwanakoime ne la ate cat.” Tusi Hmitrötre a aceitunëne la itre nekönatre me uke pehna hna huje kowe la ewekë hna thele troa eatrën. Xoxopatre hi la traeme hna xome hnene la atr troa huji pehna, nge e ase hë huj, tre, ka tro hë lai. Ceitune hi lai memine la itre keme me thine laka, xoxopatre hi la ijine angatre a ce mele me itre nekö i angatr, qëmekene tro nyudreni a thupëtresij. Celë hi matre ka nyipi ewekë catre tro angatr a xome la ijine cili, troa inine la itre nekö i angatre troa xötrethenge me hnine la itre wathebo i Akötresie.

Hnei Ioane aposetolo hna xatuane ekö la itre atr troa hane nyi hlue i Iehova, ene pe angeic a qeje angatre ka hape: “Pëkö madinenge ka sisitia hune laka e tro ni a denge la ite nekönge a trongëne la nyipici.” (3 Ioane 4) Ketre tune mina fe, tru la madrine ne la itre keme me thine Keresiano, ngöne la angatre a öhne la itre nekö i angatr “a trongëne la nyipici.”

[Iatr ne la götran 15]

[Iatr ne la götran 17]

Hnei Manoa hna thithi matre troa ini angeice la aqane troa hiane la nekönatre hna troa hnahon