ITRE HNA KUCA EKÖ

Kola Sesëkötre Me Madrine Hnei Joxu!

EWEKË lai ka traqa lo Ogas 1936, e Swaziland, ngöne la götrane hna lapa ngön hnei joxu, hna hëne ka hape, Kraal Royal. Qa ngöne la loto ka hetre ikahon, me nyine ithanata, hnei Robert me George Nisbet hna amë troa drenge la itre miuzik, me itre cainöje i J.F. Rutherford. Kola sesëkötre me madrine hnei Joxu Sobhuza II. Öni George, “Hane hi lai nyiho a jol, ke, kola pi itöne hnene lai joxu la ikaho i nyiho, me sine disk, memine la porte-voix göi troa cainöjëne la maca ka loi!”

Hnei Robert hna pane ipië me hape, tha nyine salemëne kö la itre ewekë celë. Pine nemen? Pine laka hetre atrekë ewekëne la itre ewekë celë. Matre kola pi atre hnei Joxu ka hape, drei la atrekë nyin.

Sa jë hi Robert me hape, “Ame asë hi la itre ewekë celë, tre, itre mo ne la ketre Joxu.” Ame hnei Sobhuza hna hnyingëne ka hape, drei la Joxu cili. Öni Robert, “Iesu Keriso, Joxu ne la Baselaia i Akötresie.”

Ame hnei Sobhuza hna ipië me hape, “Eje hi, nyidrëti la ketre Joxu ka tru. Tha ajane kö ni troa xome la ketre ewekë i nyidrë.”

Hnei Robert hna cinyihane ka hape: ‘Eni a sesëkötre la aqane ujë i Sobhuza, ketre Joxu Ka Tru. Ngacama hnei nyidrëti hna minyine la qene Papale, ngo tha ka pi mama fë kö, nge ka tha qene joxu kö, nge hna pi ithanata memin hnene la nöjei atr. Traqa koi 45 lao menetre hnenge hna lapa me nyidrë ngöne la hnahage ne huliwa i nyidrë, nge George a elo miuzik e kuhu qëhnelö.’

Öni Robert hmaca jë ka hape: “Ame pala hi ngöne la drai cili, hnei nyiho hna ihamë ngöne la Uma Ne Ini Ne La Nöje Ne Swazi, nge e cili hi la hna traqa koi nyiho la ketre ewekë ka pëkö ka ceitu memin. Hnei nyiho hna cainöje kowe la atre musi ngöne la uma ne ini, nge aja i nyidrë troa drei nyiho. Ame la nyiho a amamane koi nyidrë la ikaho i nyiho, me sipo nyidrë matre tro la itre ka ini a hane dreng, madrine catre nyidrë, ame hnei nyidrëti hna hëne la ala wane hadredre lao ka ini troa lapa hune la ihaö matre troa dreng. Hnei nyiho hna drenge ka hape, ame la hna ini ka tru cili, tre hna inine eëny, me kuci hna gatran, me tratrau sinöe, me xupi uma, me qene Papale, me ini ne thele numera kowe la ite nekö trahmany; nge kola inine la ha nekö jajiny troa nyinyine la itre ka akötr, me nyidrawa uma, me itre xa huliwa ka nyipi ewekë. Qatre föe, qaaqa ne lo Joxu Ka Tru la ka acile la uma ne ini.

Ame la kola xejë lo 1933, tru la madrine Sobhuza Joxu la kola drenge la cainöje ne la itre pionie ngöne la Kraal Royal. Ame la ketre ijin, hnei nyidrëti mina fe hna hëne icasinekeune la itre ka thupë nyidrë, ala 100 angatr, troa hane drenge la maca ne la Baselaia  ngöne la ikaho. Hnei nyidrëti hna hane xome la itre itusi së me kapa troa iupi fë koi nyidrë la itre zonale së. Tha qea ju kö nge pexeje fe hë la wenge itusi së thene la Joxu! Ketre, hnei nyidrëti hna thupëne hnyawa la itre itusi së ngacama hna wathebone itre eje hnene la musi angetre Agele ngöne lo hnaaluene isi ka tru.

Hnei Joxu Sobhuza II hna kapa hnyawa pala hi la Itretre Anyipicin ngöne la Kraal Royal e Lobamba, me hëne fe la itre hene hmi troa hane drenge la itre cainöje hna nyitrepene ngöne la Tusi Hmitrötr. Ame la kola ithanatane la Mataio 23 hnei Helvie Mashazi, ketre Atre Anyipicin qa kö ngöne la nöje cili, hnene la ketre lapa ne itre hene hmi ka elëhni hna aca tro mejë troa alapa angeic. Ngo alapa angatre ju hi hnei Joxu me upi Mashazi troa sisedrëne la cainöje i angeic. Ketre, hnene la Joxu hna upe la iatrene la icasikeu troa cinyihane la hnënge xötre ne la Tusi Hmitrötre hna qaja ngöne la cainöj!

Ngöne la ketre ijin, thupene la hna drenge la cainöje hna cile fë hnene la ketre trejine trahmany pionie, hnene la foa lao hene hmi ka hane sin hna qaja ka hape: “Ame enehila, tha itre hene hmi hmaca kö hun, ngo Itretre Anyipici Iehova pë hë.” Nge thupene jë hi lai, hnei angatre hna sipone kowe lai pionie la itre itusi ka tune lo hna hetrenyi hnene lo Joxu Ka Tru.

Qaane la itre macatre thupene 1930 uti hë la nyidrëti a mec lo 1982, hnene pala hi la Joxu Ka Tru hna metrötrëne la Itretre Anyipici Iehova, nge tha hnei nyidrëti kö hna nue troa akötrë angatr, pine la hna tha kuca la itre ewekë thenge la qene nöje i angetre Swazi. Celë hi matre, hetre hni ne ole ne la Itretre Anyipici Iehova koi nyidrë, nge hace pi hë koi angatre la nyidrëti a mec.

Ame la kola xejë la 2013, hna sasaithe la 3 000 lao atre cainöjëne la Baselaia e Swaziland. Ame ngöne la nöje cili, hna sasaithe la ca milio la etrune lae atr, kösë 1 atre cainöje koi 384 lao atr. Hna sasaithe la 260 pionie, angetre catre huliwa ngöne la 90 lao ekalesia, nge ala 7 496 la ka sine lo Drai Ne Amekunën lo 2012. Kola amamane hnyawa laka, ame ngöne la itre drai ka troa xulu, tro hmaca kö a tru catre hnei atr ka troa lö. Eje hi laka, trepene ka catre la hna amë, lo kola xötrei cainöje ekö ngöne la itre macatre 1930.—Itre hna kuca ekö ngöne la Götrane Ailojë Ne Afirik.

[Iatr ne la götran 31]

[Hna xome ngön la foto]

King Sobhuza II taken in 1936 by Robert Nisbet and bequeathed to the Watch Tower Society

[Iatr ne la götran 32]

Itre ka ini ngöne la hna ini ka tru ka traqa troa drenge la cainöje koi nöjei atr e Swaziland lo 1936

[Iatr ne la götran 32]

George Nisbet memine la loto ka hetre ikahon, me nyine ithanata