Tune Kaa Fe La Pengö Së
Tune Kaa Fe La Pengö Së?
“Ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie!”—2 PET. 3:11.
NEMENE LA AQANE TRO NYIPUNIETI A SA?
Nemene la pengöne atr nyine troa traqa kow matre kepe së hnei Akötresie?
Hnei Satana hna amenune tune kaa la itre atr?
Nemene la nyine tro sa kuca matre tro sa thupëne la aqane imelekeu së me Iehova?
1, 2. Nemene la nyine tro sa kuca matre tro Akötresieti a kepe së?
TRU hnei atr ka ajane troa atre la aqane waipengöi angatre hnei itre xan. Ngo ame easë itre Keresiano, aqane waipengö së hnei Iehova la ka sisitria koi së. Eje hi laka, Nyidrëti la ka sisitria ne la hnengödrai me fen, nge thei Nyidrë “la qeqe ne mel.”—Sal. 36:9.
2 Hnei Peteru aposetolo hna qeje pengöne ka hape, e troa kepe së hnei Iehova, nyipi ewekë tro sa hetrenyi “la thina ka hmitöte me thina ka ijiji Akötesie.” (E jë la 2 Peteru 3:11.) Tro la “thiina” së a hmitrötr e troa wië la nöjei götrane la mele së. Kola qaja la aqane mekune së, me huliwa së, me aqane atrunyi Akötresieti hne së. Ketre, nyipi ewekë mina fe tro sa hetrenyi la “thina ka ijiji Akötesie,” ka xulu qa ngöne la ihnimi së me aqane metrötrë Akötresie hne së. Celë hi matre, tha ene hmekuje kö la itre huliwa së la ka nyipi ewekë koi Nyidrë, ngo ene fe la itre pengöi Akötresie e kuhu hni së. Iehova la ka “thele la nöjei hni asë,” haawe, öhne hnyawa hi Nyidrë ka hape, ame la itre huliwa së, tre ka hetre ehmitrötren, maine pë pena kö, nge öhne hnyawa kö Nyidrë ka hape, easë kö a nyipi nyi hlue i Nyidrë hmekuj.—1 A. l. ite jo. 28:9.
3. Nemene la itre hnyinge nyine tro sa mekune catrën?
3 Xele kö Satana Diabolo matre troa kepe së hnei Akötresie. Eje hi laka, angeice a kuca asë la hnei angeice hna atreine troa apatrene la aqane imelekeu së me Iehova. Satana pala hi a sile la nöjei pengöne trenga thoi nyine amenu së, nge matre trije ju së nyi hlue i Iehova. (Ioane 8:44; 2 Kor. 11:13-15) Celë hi matre nyipi ewekë tro sa thele ka hape, ‘Nemene la aqane amenune Satana la itre atr? Nemene la nyine tro ni a kuca matre troa thupëne hnyawa la aqane imelekeunge me Iehova?’
NEMENE LA AQANE AMENUNE SATANA LA ITRE ATR?
4. Nemene la hna thele hnei Satana troa kuca göi troa thë la aqane imelekeu së me Akötresie? Pine nemen?
4 Hna cinyihane hnei Iakobo, ketre atre drenge ka hape: “Hna isa tupathe la nöjei ate e hna huli angate hnene la ite aja i angate kö, me hnihnin. Nge e upune hë la aja, ame hnen’ eje hna hnahonepi la ngazo ; nge e macajë hë la ngazo, ame hnen’ eje hna hnahonepi la mec.” (Iako. 1:14, 15) Satana a thele troa angazone la itre hni së, lo göhnene la itre aja së, matre troa thë la aqane imelekeu së me Akötresie.
5, 6. (a) Nemene la aqane amenune Satana la itre hni së? (b) Nemene lo köni ewekë hna huliwane hnei Satana matre troa aciane la itre aja ka ngazo e kuhu hni së? Nemene la ka amamane la atreine ka eje thei angeice troa huliwane la itre nyinyithiina cili?
5 Nemene la aqane thele Satana troa ajojezine la hni së? Öni Tusi Hmitrötr: “Fene hnengödrai asëjëihë a meköle thene la ate ka ngazo.” (1 Ioane 5:19) “Ite ewekë e celë fen” fe e hnine la itre nyinyithiina i Satana. (E jë la 1 Ioane 2:15, 16.) Traqa ha koi itre thauzane lao macatre ne Satana a eköthe la fene i angeice troa amenune la itre atr. Pine laka easa mele hnine la fene celë, nyipi ewekë tro sa thupë së qa ngöne la itre nyinyithiina i angeic.—Ioane 17:15.
6 Satana a thele troa aciane la itre aja ka ngazo ngöne la itre hni së. Ame göi troa eatrëne lai, köni ewekë hna huliwane hnei angeice qa ngöne la “ite ewekë e celë fen,” itre hna qaja hnei Ioane aposetolo: (1) “meciunyi ewekë i ngönetei,” (2) “meciune ne la lue mek,” nge ame la (3) “nyi döne la mele” celë. Hnei Satana hna huliwane la köni ewekë cili göi troa tupathi Iesu ngöne la hnapapa. Pine laka, nyimutre catre hë la itre macatre ne Satana a huliwane la itre nyinyithiina celë, kösë ka atreine hnyawa ha angeice huliwane itre ej, nge atre kö angeice la nyinyithiina hmeku së isa ala cas. Tro sa pane ce wange lo aqane amenu Eva hnei Satana, ngo thatreine ju fe kö angeice kuca tune kowe la Hupuna i Akötresie, nge thupene lai tro sa ce wange la aqane tro sa thupë së kö.
“MECIUNYI EWEKË I NGÖNETEI”
7. Hnei Satana hna huliwane tune kaa la “meciunyi ewekë i ngönetei” matre troa tupathi Eva?
7 Ka nyipi ewekë kowe la nöjei atr troa xen matre mel. Hnene la Atre Ixupe hna xupe la fene me atiqane hnei xen. Satana a huliwane la aja ka eje the së troa xen, matre troa uku së troa kuca la ketre ewekë nyine ahleuhleunyi Akötresie. Tro sa ce wange la aqane huliwane angeice la aja cili koi Eva. (E jë la Genese 3:1-6.) Hnei Satana hna qaja koi Eva ka hape, tha tro jë kö angeic a mec e tro angeic a xeni wen “la sinöe ne ate hmekune la loi me ngazo.” Nge ketre, e xeni wene hë angeice la sinöe, tro hë angeic a tui Akötresie. (Gen. 2:9) Ame la aliene la hna qaja hnei Diabolo, tre, maine tha tro ju hë angeice a drengethenge Akötresie, ngo tro pala hi angeic a mel. Tha fene trengathoi kö lai! Thupene jë hi lai, hnei Diabolo hna amë la mekune cili hnine la he i Eva, matre lue ewekë hë nyine tro angeice a iën, ene la troa trije lai mekune cili, maine pena tro pala hi a mekune hutine uti hë la troa kökötre la aja cili ngöne la hni angeic. Ngacama hna nue koi angeice troa xeni wene la nöjei sinöe ne la hlapa, ngo ase hë angeice iëne troa mekune hutine la sinöe ngöne la nyipine la hlapa. Ame hë la thangane lai, hnei angeice hna xeni la wenene ej. Eje hi laka, hnei Satana hna aciane thei angeice la aja kowe la ketre ewekë hna wathebone hnene la Atre Xupi angeic.
8. Hnei Satana hna huliwane tune kaa la “meciunyi ewekë i ngönetei” matre troa tupathi Iesu? Pine nemene matre tha ie ju kö la mekuna i Satana?
8 Hnei Satana hna nyinyithiina tune fe lai koi Iesu. Ame la Iesu ekö ngöne la hnapapa, nge tha hnei nyidrëti kö hna xeni ngöne la 40 lae lai me 40 jidr, hnei Satana hna xome la ajane troa xen matre tupathi nyidrë. Öni Satana: “Maine cilieti la Hupuna i Akötesie, ulatinejë kowe la etë celë mate aretopi.” (Luka 4:1-3) Lue ewekë nyine tro Iesu a iën, ene la troa huliwane la mene ka eje thei nyidrë matre troa hetre nyine xen, maine pena tha tro kö a huliwan. Atre hi Iesu ka hape, tha tro kö a xome la mene ka eje thei nyidrë troa kuca la sipu mekuna i nyidrë. Ngacama ka mecijine ju hë Iesu, ngo ame la ka nyipi ewekë koi nyidrë, tre ene la aqane imelekeu i nyidrë me Akötresie. Hnei Iesu hna sa ka hape: “Tha tro kö a mele la ate hnei areto hmekuje hi, ngo hnene la nöjei wesi ula i Akötesie.”—Luka 4:4.
“MECIUNE NE LA LUE MEK”
9. Kola hapeue lai la kola hape, “meciune ne la lue mek”? Nemene la aqane xome Satana la nyinyithiina cili troa amenu Eva?
9 Ame la ketre aqane nyinyithina i Satana hna qaja hnei Ioane, tre, ene la “meciune ne la lue mek.” Hna cia la aja thene la ketre atr qa ngöne la ketre ewekë hnei angeice hna goeën. Hnei Satana hna amenu Eva hnene la aja cili, me hape: “Tro ha maca la lue meke i nyipo.” Goeëne hutine ju pë hë Eva la wene la sinöe cili, nge kolo pala hi a elë catre trootro la aja angeice troa xen. Öhne hë Eva laka, ame la isinöe, “mingeming’ e troa wang.”
10. Nemene la aqane huliwane Satana la “meciune la lue mek” matre troa tupathi Iesu? Hnei Iesu hna sa tune kaa?
10 Hnei Satana hna huliwane tune kaa la “meciune ne la lue mek” troa tupathi Iesu? Hnei Satana hna “amamai nyidëti la nöjei baselaia asëjëihë e celë fen, tune lo samek. Nge diabolo a qaja koi nyidë, ka hape, Tro ni a hamë cilieti la nöjei musi asë cili, memine la lolo ne it’ ej.” (Luka 4:5, 6) Ame la hnei Iesu hna goeën, tre, tha ene kö la itre baselaia ne la fen, ngo itre lolo ne pe itre eje la ka mama koi nyidrë. Ame jë la mekuna i Satana, tre tro Iesu a kei thenge la itre ewekë ka mama koi nyidrë. Ame hnei Satana hna qaja koi Iesu ka hape: “Maine tro cilieti a thiliju koi ni, te, ite ewekë i cilieti asë hë.” (Luka 4:7) Tha ajane pi kö Iesu troa traqa kowe la pengöne atr hnei Satana hna mekun. Hnei nyidrëti hna canga sa me hape: “Ase hë cinyihan, ka hape, Tro eö a thili koi Joxu Akötesi ’ö, me nyi hlue i anganyidëti hmekuje hi.”—Luka 4:8.
“NYI DÖNE LA MELE”
11. Nemene la aqane iaö Eva hnei Satana?
11 Ame la hna qaja pinëne hnei Ioane, tre ene la “nyi döne la mele.” Troa thupëne hnene la Keresiano matre tha tro pi kö a pi mama, me pi haöthe la itre mo i angeic. Ame lo ijine kola mele hnei Adamu me Eva ekö, tre, thatreine kö nyidro troa pi mama fë la itre mo i nyidro, ke pë ju kö xa atr e celë fen. Ngo hnei nyidroti hna pi mama. Hnei Satana hna iaö Eva, me hape koi angeic, hetre ewekë ka sisitria hnei Akötresieti hna cipa angeic. Öni Diabolo, maine tro angeice a xeni “qa ngöne la sinöe ne ate hmekune la loi me ngazo,” tro fe hë angeice a “akötesie [. . .], mate ate hmekune la loi me ngazo.” (Gen. 2:17; 3:5) Ame la aja i Satana, tre, tro Eva a mekune ka hape, tha nyipi ewekë kö Iehova ngöne la mele i angeic. Hnene la pi mama i angeice matre mejiune jë kowe la trengathoi cili. Hnei angeice hna xeni la wene sinöe hna wathebon, me mekune ka hape, tha tro jë kö angeice a mec. Mekune hmo la mekuna i angeic!
12. Nemene la ketre aqane tupathi Iesu hnei Satana? Nemene la aqane sa i Iesu?
12 Isazikeu catre Eva me Iesu, hnei nyidrëti hna hamëne la ketre tulu ka tru, tulu ne ipië! Hnei Satana hna thele troa tupathi nyidrë matre troa kuca la ketre ewekë nyine troa haine hnene la itre xa atr, me nyine tupathi Akötresie. Ngo xele catre Iesu ma kuca la ewekë cili, wanga ujë jë fe nyidrë tune la atre pi mama! Hnei Iesu hna sa mekötine koi angeice me hape: “Ase hë qaja, ka hape, “The tro kö eö a tupathi Joxu Akötesi ’ö.”—E jë la Luka 4:9-12.
NEMENE LA AQANE TRO SA THUPËNE HNYAWA LA AQANE IMELEKEU SË ME IEHOVA?
13, 14. Nemene la aqane amenu së hnei Satana enehila?
13 Ame enehila, casi pala hi la itre nyinyithiina hna xome hnei Satana ka tune ekö lo hna kuca koi Eva me Iesu. Angeice a huliwane la “meciunyi ewekë i ngönetei” matre troa hule la itre atr troa kuca la itre thiina ka sis maine tro pena a sasaithe la tulu ne aqane xeni me ij. Angeice mina fe a huliwane la “meciune la lue mek” matre troa hule la itre atr troa goeëne la itre ewekë ka sis, ka mana ngöne Ëternet. Angeice mina fe a huliwane la ajane troa “nyi döne la mele,” ene la troa haöthe la itre mo i angatr, celë hi ka uku angatre kowe la pi mama, me pi cilëne la itre hnëqa ka tru, me pi hlemu, me mele koi mo.
14 Satana a huliwane la “nöjei ewekë asëjëihë e celë fen” tune la atre nyi i memine itre wana maja i angeic. Ame la ie a goeëne la wana maja, tre kösë ka loi hi, ngo ngazo pe, ge lai e hnin. Ka ceitune hnyawa hi lai memine la aqane huliwane Satana la itre ewekë kösë ka nyipi ewekë kowe la atr, ngo ka ihuli pe troa ena la itre wathebo i Akötresie. Ame la mekune hnei Satana hna pi amë e kuhu hni së, tre, ene la tro hi sa huliwa thatraqane la mele së, me thele tro pala hi a mele ka loi, nge tro la itre ewekë cili a sisitria hune la aja i Akötresie. Tro fe kö a amenu epuni hnei Satana?
15. Tui Iesu, nemene la nyine tro sa kuca matre tha tro kö Satana a amenu së?
15 Hna amenu Eva hnei Satana, ngo tha hna amenu Iesu fe kö. Ame la nöjei ijine Satana a thele troa iaö Iesu, hnei Iesu pala hi hna sa jëne la Itre Hna Cinyihan, tune la kola hape: “Ke ase hë cinyihan, ka hape” maine, “Ase hë qaja, ka hape.” Maine tro sa inine hnyawane la Tusi Hmitrötr, tro së lai a atre hnyawa la Itre Hna Cinyihan, nge canga saqe së hi mekune la itre xötre ka troa xatua së e traqa ju koi së la itupath. (Sal. 1:1, 2) Ame la easa mekune la tulu ne la itre ka mele nyipici koi Akötresie, tre, tro fe lai a xatua së troa hane mele nyipici tui angatr. (Rom. 15:4) E ka tru la xoue Iehova the së, ene la troa hnine la itre ewekë hnei Nyidrëti hna hnine me sisine la itre ewekë hnei Nyidrëti hna sisin, haawe, tro lai a thupë së qa ngöne la ngazo.—Sal. 97:10.
16, 17. Tro la aqane “huliwane la hni” së a hetre menene tune kaa kowe la aqane ujë së?
16 Kola thuecatre së hnei Paulo aposetolo troa “huliwane la hni” së matre tune së la atr ka mekune tui Iehova, ngo tha ka mekune pe tune la fen. (Heb. 5:14) Paulo a amekunë së la enyipiewekëne la tro sa thupëne la itre mekune së. Öni angeic: “Kola auligötrane la nöjei mekune me nöjei ewekë asë ka draië ka ifekethe memine la ate hmekunyi Akötesie, me kola apone la nöjei mekun’ asë mate dengethenge Keriso.” (2 Kor. 10:5) Ka hetre menene catre la itre mekuna së kowe la aqane ujë së, celë hi matre nyipi ewekë tro pala hi sa mekune la itre ewekë nyine amadrinë Akötresie.—Fil. 4:8.
17 Maine easa ajane troa wië, trije pi së la itre mekune me aja ka ngazo. Nyipi ewekë tro sa hnimi Iehova cememine “la hni ka wië.” (1 Tim. 1:5) Ngo ka iaö la hni, celë hi matre thatre una ju kö së e itre xa ijine la kola huli së hnene la “ite ewekë e celë fen.” (Iere. 17:9) Haawe, ka nyipi ewekë tro sa xötrethenge la eamo i Paulo: “Thelejë e kuhu ite hni nyipunieti kö, hape u, nyipunieti hë ngöne la lapaun ; tupathi nyipunieti ju kö.” Ame la easa inine la Tusi Hmitrötr, loi e tro sa sipu thele ka hape, ‘Tune kaa la itre mekunang, me itre ajang, ka loi kö xajawa i Akötresie?’—2 Kor. 13:5.
18, 19. Pine nemene matre tro sa huliwa catre matre troa traqa kowe la pengöne atr ka ihmeku memine la aja i Iehova?
18 Ame la ketre ewekë ka troa xatua së matre tha tro kö la “ite ewekë e celë fen” a akeinyi së, tre, ene la troa mekune hmaca la itre trenge ewekë i Ioane: “Kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.” (1 Ioane 2:17) Kösë ka huti la fene i Satana, ngo hetre drai ne troa nyipune ej. E tro sa mekune ka hape, ame la nöjei ewekë e celë fen, tre, itre ka troa patr, tro lai a hmekë së matre tha tro kö a amenu së hnei Satana.
19 Hnei Peteru aposetolo hna thuecatre së tro sa tune la pengöne atr hna kapa hnei Akötresie, ke easa “teqene me ajane troa traqa la drai Akötesie, lo ka troa manithe la hnengödrai ame hna ahmun, nge troa cici hnei ideuthi la nöjei ewekë.” (2 Pet. 3:12) Saqe catre hë matre traqa pi la drai cili, nge tro Iehova a apatrene la nöjei götrane ne la fene i Satana. Ngo ame petre kö enehila, Satana a huliwane pala hi la “ite ewekë e celë fen” troa tupathi së, tune lo aqane tupathi Eva ekö me Iesu. Tha tro pi kö sa tui Eva, me thele la itre sipu aja së, ke kösë easë lai a xomi Satana nyine akötresi së. Tro pe sa tui Iesu, me cile kowe la itre itupath, ngacama lolo pi hë e troa wange la itre huliwa i Satana. Epi tro së isa ala cas a huliwa catre matre traqa kowe la pengöne atr ka ihmeku memine aja i Iehova.
[Thying]
[Iatr ne la götran 23]
[Iatr ne la götran 24]
Hnei Satana hna huliwane la “meciunyi ewekë i ngönetei” troa iaö Eva (Wange ju la paragarafe 7)
[Iatr ne la götran 25]
Tha hnei Iesu pi kö hna thëthëhmine la ewekë ka sisitria (Wange ju la paragarafe 8)
[Iatr ne la götran 26]
Nemene la itre trepene meköti ne la Tusi Hmitrötre ka troa xatua epuni ngöne la itre jole celë? (Wange ju la paragarafe 13, 14)
