Huliwa Ne Pionie A Acatrene La Imelekeu Së Me Akötresie
Huliwa Ne Pionie a Acatrene La Imelekeu Së Me Akötresie
“Loi la troa nyima kowe la Akötesi shë.”—SAL. 147:1.
TROA MEKUNE HNYAWANE LA ITRE HNYINGE CELË
Nemene la aqane tro la huliwa ne pionie a acatrene la aqane imelekeu i epuni me Iehova?
Maine ka pionie epun, nemene la ka troa xatua epuni tro pala hi a kuca la huliwa cili?
Maine tha ka pionie pala kö epun, nemene la nyine tro epuni a kuca matre troa xome la huliwa cili?
1, 2. (a) Nemene la ewekë ka traqa e tro sa mekune la ketre atr hne së hna hnim, me qeje angeic? (Wange ju la pane iatr.) (b) Nemene la itre hnyinge nyine tro sa ithanatan?
AME la easa mekune la ketre atr hne së hna hnim, me qeje angeic, tre, kolo pala hi a catre la aqane imelekeu së me angeic. Ceitune hi lai memine la aqane imelekeu së me Iehova Akötresie. Davita la ketre atre thupë mamoe, hnei angeice hna lapa ngöne la itre jidri me goeëne la itre wëtresij, me mekune la edraiëne la Atre Xup. Öni angeic: “E ini a goeëne la hnengödrai i cilie, huliwa ne la iwanakothemie i cilie, ene la teu me ite wëtesiji lo hnei cilieti hna isa amë ; ka ue la ate, mate tro cilieti a mekune koi angeic ? memine la nekö i ate, mate tro cilieti a wai angeic ?” (Sal. 8:3, 4) Ketre, Ame la Paulo aposetolo a qaja la aqane eatrëne Iehova la aja i Nyidrë kowe la itre Keresiano hna iën, öni angeic: “Ekölö hi ni la ejuine la inamacane ka sisitia memine la ate pengöne i Akötesie !”—Rom. 11:17-26, 33.
2 Ame ngöne la easa cainöj, easa meku Iehova, nge easë fe a qeje Nyidrë. Kolo lai a acatrene la aqane imelekeu së me Nyidrë. Nyimutre la itre pionie ka öhne laka, kola catre la ihnimi angatre koi Akötresie, pine laka hnei angatre hna nue la itre traeme i angatre ngöne la hna cainöje trootro. Tro la tane mekune celë a xatuane la pionie me itre ka ajane troa pionie troa mekune hnyawane la itre hnyinge celë: Nemene la aqane tro la huliwa ne pionie a acatrene la aqane imelekeu i epuni me Iehova? Maine ka pionie epun, nemene la ka troa xatua epuni tro pala hi a kuca la huliwa cili? Maine tha ka pionie pala kö epun, nemene la nyine tro epuni a kuca matre troa nyiqaan? Tro sa pane ce ithanatane la itre aqane tro la huliwa ne pionie a acatrene la aqane imelekeu së me Akötresie.
AQANE TROA ACATRENE LA IMELEKEU SË ME AKÖTRESIE HNENE LA HULIWA NE PIONIE
3. Nemene la ixatua hne së hna troa kapa e hne së hna ithanatane la itre manathithi ka troa xulu qa ngöne la Baselaia?
3 Ame la easa ithanatane la itre manathithi ka troa xulu qa ngöne la Baselaia, easa easenyi catre koi Iehova. Nemene la xötre hnei epuni hna majemine xome ngöne la epuni a cainöje ngöne la itre hnalapa trootro? Maine jë Salamo 37:10, 11; Daniela 2:44; Ioane 5:28, 29; maine Hna Amamane 21:3, 4. Ame la nöjei ijine easa qaja la itre hna thingehnaeane celë kowe la itre atr, kolo fe a amekunë së ka hape, “Ame la nöjei ahnahna ka loi asë, memine la ite hna hamëne gufane ka lolo asë,” tre, ka xulu qaathei Iehova, Akötresi së ka ham. Celë hi ka aeasenyi së catre koi Nyidrë.—Iako. 1:17.
4. Pine nemene matre kola kökötre la hni ne ole së kowe la elolo i Akötresie ngöne la easa cainöje kowe la itre atr?
4 Ame la easa öhne la aqane hleuhleune la mele ne la itre atr ka nyimutre, nge pë pena kö mejiune i angatr, kola kökötre the së la hni ne ole kowe la nyipici. Ame la itre atr ngöne la fen, tre, pëkö ixatua hnei angatre hna kapa matre troa hetrenyi la mele madrin. Nyimutre la itre ka hnehengazone la itre drai elany, nge pëkö mejiune i angatr. Angatre a thele la sipu aliene la mel. Nge ame mina fe la ka ala nyimu qaathene la itre ka hmi, tre, thatre pengöne hnyawa kö angatre la aliene la Tusi Hmitrötr. Ceitu i angatre me itre atre Nineve. (E jë la Iona 4:11.) Ame la easa catre nue la traeme së troa ithanata kowe la itre atr ngöne la hna cainöj, ketre easë fe a öhne la aqane thupë së hnei Iehova. (Is. 65:13) Ngo tha Iehova hmekuje kö a thupëne la nöje i Nyidrë. Ngo Nyidrëti fe a aijijëne la nöjei atr troa kapa la iakeukawany, me troa hetrenyi la nyipi mejiun. Kolo lai a amekunë së la elolo i Iehova.—Hna ama. 22:17.
5. E tro sa inine la nyipici kowe la itre atr, nemene la aqane wange së la itre jole ka traqa koi së?
5 Ame la easa inine la itre atr la nyipici, easë lai a inine matre tha tro kö sa hnehengazone menu la itre jole ka traqa koi së. Hnei Trisha, ketre pionie lapa, hna qaja ka hape, tha madrine kö angeice la kola sei hna cile hnene la keme me thine i angeic. Ame la ketre ijin, hleuhleu catre angeic, nge tha pi tro kö angeice a tro troa cainöj. Ngo tro pi kö angeice troa inine la Tusi Hmitrötre memine la ketre atr. Köni nekönatre hnei angeice hna ini Tusi memin, nge ka tru ngöne la ketre hnepe lapa ka cile kowe la itre jole ka nyimutre. Hna nuetriji nyudren hnei kem, nge hna qanangazon hnene la trejine me nyudreni trahmanyi haetra. Öni Trisha: “Ame la nöjei jole ka traqa koi eni memine la itre akötre ne la hning, tre, pëkö pengöne itre eje qëmekene la itre jole ka traqa koi nyudren. Ame la eahuni a ini Tus, tre, kola mama la madrine thei nyudren, me hnyimahnyima. Ketre ahnahna qaathei Iehova la itre nekönatre celë, ene ngöne la drai ce.”
6, 7. (a) Kola acatrene tune kaa la lapaune së ngöne la easa inine kowe la itre atr la itre nyipici qa hnine la Tusi Hmitrötr? (b) Nemene la thangane koi së ngöne la easa öhne la aqane xatuane hnene la itre trepene meköti ne la Tusi Hmitrötr la itre ka ini Tusi me easë troa saze la mele i angatr?
6 Ame ngöne la easa inine la itre nyipici qa hnine la Tusi Hmitrötre kowe la itre atr, kolo fe a acatrene la lapaune së kowe la itre nyipici cili. Hnei Paulo aposetolo hna cinyihane göne la itre xa angetre Iudra ka tha trongëne kö la ini hnei angatre hna hamëne koi itre xan, kola hape: “Nge eö a inine la kete, tha hna ini eö kö, hunikö ?” (Rom. 2:21) Nyimu ijine ka ijije kowe la itre pionie troa inine la nyipici kowe la itre atr, me ini Tusi Hmitrötre me angatr. Ngo nyipi ewekë tro angatre a pane ini angatre kö matre atreine angatre troa inine la itre atr. Nyipi ewekë tro angatre a hnëkëne la itre ini hna troa hamëne kowe la itre atr, me hane sine thele la itre mekune matre troa sa la itre hnying. Hnei Janeen, ketre pionie, hna qeje pengöne laka, ame la nöjei ijine angeice a inine la nyipici kowe la itre atr, tre, kolo fe a acatrene la lapaune i angeice kowe la itre nyipici cili.
7 Ame la easa öhne laka hnene la itre trepene meköti ne la Tusi Hmitrötre hna sazene la mele ne la itre ka ini Tusi me easë, easë fe a wangatrune catrëne la inamacane i Akötresie. (Is. 48: 17, 18) Kolo fe lai a thue aja së troa catre trongëne la itre trepene meköti cili ngöne la sipu mele së. Hnei Adriana, ketre pionie hna qaja ka hape: “Tru catre la itre jole ka traqa ngöne la mele ne la itre atr ngöne la angatre a qale kowe la sipu inamacane i angatre kö. Ngo ame hë la angatre a nyiqaane qale kowe la inamacane i Iehova, canga saqe hi angatre kapa la itre manathith.” Öni Fil, ketre pionie, ka hape, angeice a haine la aqane atreine la itre atr troa saze la mele i angatre jëne la ixatua i Iehova.
8. E tro sa ce huliwa memine la itre trejine ngöne la hna cainöj, tro lai a xatua së tune kaa?
8 Kola ithuecatre së hnene la hna ce huliwa memine la itre trejine me easë, itre trahmanyi me föe ngöne la hna cainöje trootro. (Ite edomë 13:20) Nyimu traeme hna xome hnene la itre pionie matre troa ce cainöje memine la itre trejin. Kolo lai a aijijë angatre troa “ce akeukawanyi [angatr] me [itre trejin].” (Rom. 1: 12; e jë la Ite Edomë 27:17.) Hnei Lisa, ketre pionie hna qeje pengöne laka, ame ngöne la hna huliwa i angeic, kola izalukeu la itre atr, nge pëkö ka troa sewe angatre troa wajahuje la itre xan. E nöjei drai, angeice a drenge la kola qeje gelene la itre xan, me ixöjetrij. Öni angeice e sisedrëne ka hape: “Ame itre xa ijin, kola ahmahmanyi epuni me hnyimasai epun, ke epuni a catre ujë tune la ketre Keresiano. Ngo, ixatua catre koi së la troa ce huliwa memine la itre Keresiano ngöne la hna cainöj. Ame hë la kola traqa kowe la pune la drai, ngacama eni a kucakuca, ngo ame pe tru la madrineng.”
9. Ame la kola ce pionie hnene la trahmanyi me föi angeic, tro lai a xatuane tune kaa la faipoipo i nyidro?
9 Ame la easa pionie memine la föe së, tre, kolo fe a acatrene la faipoipo së. (Ate cai. 4:12) Öni Madeline, ka pionie memine la föi angeic, ka hape: “Hetre traemenge me föenge troa porotrikëne la hnei nyiho hna kuca ngöne la drai ngöne la hna cainöj, maine troa qaja pena la ketre mekune nyine troa trongëne ngöne la huliwa ne cainöj, mekune hna xome qa ngöne la hna ce e la Tusi Hmitrötr. Ame ngöne la nöjei macatre ne nyiho a ce xome la huliwa ne pionie, kolo fe a acatrene la aqane imelekeu i nyiho.” Hnei Trisha, ketre pionie hna qaja ka hape, hnei angeice me föi angeice hna cengöne mekune ka hape, tha tro kö nyidroti a xomi ewekë, nge tha ijije kö la manie i nyidro. Ame hë la thangane lai, tha nyidroti kö a iwesitrë pi mani. Ketre, nyidroti a wange hmaca la itre atr hnei nyidroti hë hna cainöje kow, me ini Tusi Hmitrötre me angatr. Celë hi ka acatrene catrëne la faipoipo i nyidro.
10. E tro sa amë panëne la Baselaia, me drenge la ixatua qaathei Akötresie, nemene hë la thangane kowe la mejiune së koi Iehova?
10 Kola acatrene la mejiune së koi Iehova ngöne la easa amë panëne la Baselaia, me drenge la ixatua i Iehova, me öhne la aqane sa Nyidrëti la itre thithi së. Nyipici laka, ka mejiune asë hi la itre nyipi Keresiano koi Iehova. Ngo kola öhne hnene la itre pionie ka hape, e ajane angatre troa catre pala hi ngöne la huliwa ne pionie, nyipi ewekë tro angatre a mejiune koi Iehova. (E jë la Mataio 6:30-34.) Hna kapa hnei Curt, ketre trejine ka pionie nge ka inyihnai ngöne la huliwa ne iwai trootro, troa wange la ketre ekalesia, lue hawa nge sin la enanyin qa ngöne la hnalapa i angeic. Ame angeice me föi angeic, lue pionie nyidro, tha tru kö hnei saasi nyidro matre ijije hi göi troa tro kowe la ekalesia ngo tha ijije pe hë göi bëek, nge ca wiike pala kö matre traqa pi la thupe i angeic qaathei maseta. Öni Curt, tha nyipi mama kö ka hape, tro nyidroti a tro. Ngo hnei nyidroti hna thithi me mekune laka tro hë nyidroti a kuca la hnëqa. Eje thei nyidroti la mejiune laka tro kö Akötresieti a hamëne la ka ijije koi nyidro. Qëmekene la tro nyidroti a tro, hë jë hi la ketre trejine föe, me hape, hetre ahnahna nyine tro eahlo a hamë nyidro. Kolo hnyawa hi lo etrune la mani hnei nyidroti hna ajane thatraqane la tronge i nyidro. Öni Curt, e traqa la itre ewekë ka tune lai e itre xa ijin, tha jole kö tro sa goeëne ka hape, Iehova hi la ka hamë së la ka ijij.
11. Pine nemene matre qaja jë së ka hape, ka hamë manathithi la huliwa ne pionie?
11 Hna majemine qaja hnene la itre pionie ka hape, angatre pala hi a easenyi catre koi Akötresie, nge kola tru catre fe la hnei angatre hna kuca ngöne la huliwa i Nyidrë, nge nyimu manathithi fe hnei angatre hna kapa. (Deu. 28:2) Ngo tha ka hmaloi kö la huliwa ne pionie. Easë asë hi a akötre hnene la ngazo ka eje the së, nge hnene fe la fene celë ka ngazo. Ame itre xa ijin, hnene la itre xa jole ka traqa matre hnei itre xan hna nango nue la huliwa ne pionie. Ngo ijije hi troa nyinyin la itre jole cili, me nëene itre ej. Nemene la ka troa xatuane la itre pionie troa cile huti ngöne la huliwa ka lolo hnei angatre hna kuca?
AQANE TROA CATRE NGÖNE LA HULIWA NE PIONIE
12, 13. (a) Nemene la nyine tro la ketre pionie a kuca e nango jole koi angeice troa eatrëne la itre hawa i angeic? (b) Pine nemene matre nyipi ewekë catre troa e la Tusi Hmitrötre o drai, me ketre ini Tus cas, me hane mekune ajuine la hna inin?
12 Tru catre la huliwa ne la itre pionie. Tha hmaloi kö troa kuca la nöjei huliwa asë, haawe, nyipi ewekë troa hnëkë me eköthe hnyawa itre ej. (1 Kor. 14:33, 40) Maine nango jole kowe la ketre pionie troa eatrëne la itre hawa i angeic, loi e tro angeice mekune hnyawa la aqane troa huliwane hnyawa la traeme i angeic. (Efe. 5:15, 16) Tro angeice a thele ka hape: ‘Hapeu, tru kö la traeme hnenge hna xome thatraqane la itre nyine iamadrinë? Tro kö ni a saze la porogarame ne cainöjeng? Tru kö la traeme hnenge hna xome kowe la itre huliwa ka tha nyipi ewekë kö?’ Nyipi ewekë tro pala hi la itre pionie a isa hnyingëne thele la itre mekune celë, me xome amekötine la mele i angatr.
13 Loi e tro la pionie a ami ijine ngöne la porogarame i angeice troa e la Tusi Hmitrötre o drai, me ketre ini Tus cas, me hane mekune ajuine la hna inin. Ketre, nyipi ewekë tro angeice a wange hnyawa ka hape, tha hnene kö la itre huliwa ka tha nyipi ewekë hna thapa la traeme i angeice qa ngöne la itre ewekë ka sisitria. (Fil. 1:10) Pane mekune jë së la ketre pionie, kola traqa qa hna cainöje ngöne la drai ka pexej. Angeice a mekune troa hnëkëne ngöne la heji cili la porogarame ne icasikeu. Ngo angeice a pane goeëne la itre ithuemacanyi hna kapa ngöne e-mail. Angeic a amelene jë la ordinatöre i angeic, me e la itre e-mail. Pine laka angeice hë ngöne Ëternet, ame hnei angeice hna canga wange ju la thupene la ketre ewekë hnei angeice hna pi itön. Ame hë la angeice a mekune lo nyine tro angeice a kuca ngöne la hej, lue hawa ha ka tro, nge tha ase pala kö angeice nyiqaane hnëkëne la icasikeu i angeic. Pine nemene matre traqa pi la jole celë? Maine kola ajane hnene la ketre atr ka nyenyape troa nyenyape aqeany ngöne la mele i angeic, nyipi ewekë tro pala hi angeice a xeni ka loi. Ketre tune mina fe, nyipi ewekë tro pala hi la pionie a ini Tusi matre tro angeice a cile huti ngöne la huliwa ne pionie.—1 Tim. 4:16.
14, 15. (a) Pine nemene matre loi e tro pala hi la itre pionie a ahmaloeëne la mele i angatr? (b) E traqa ju la itre jole kowe la ketre pionie, nemene la nyine tro angeice a kuca?
14 Hnene la itre pionie hna catre ahmaloeëne la mele i angatr. Celë hi ewekë hnei Iesu hna upe la itretre drei nyidrë troa kuca. (Mat. 6:22) Hnei nyidrëti hna ahmaloeëne pala hi la mele i nyidrë matre troa nue asë la mele i nyidrë kowe la huliwa ne cainöj. Ame la ketre ijin, öni nyidrë, hetre uma ne la itre alope me itre waco, “ngo tha hetenyi kö la Nekö i ate la nyine tane he.” (Mat. 8:20) Kola mekune hmaca hnene la itre pionie, itre ka melëne la tulu i Iesu, ka hape, ame lo angatre a hetrenyi la itre xa mo, kolo lai a hape koi angatr, tro angatre a nyidrawane me nyihnyawane itre ej, e traqa ju ngazo, maine nyihnane pena.
15 Trotrohnine hnyawa hi la itre pionie ka hape, ka lolo la huliwa i angatr, ngo tha tro kö angatre a mekune ka hape, ka sisitria kö angatre hui itre xan. Tro pe angatre a atre laka, ketre ahnahna qaathei Iehova la huliwa ne pionie. Celë hi matre nyipi ewekë tro la itre pionie asë a mejiune koi Iehova matre troa cile huti ngöne la huliwa cili. (Fil. 4:13) Troa traqa la itre jol. (Sal. 34:19) E traqa ju itre ej, loi e tro la itre pionie a thele ixatua thei Iehova, me nue Nyidrëti troa xatua angatr, ngo tha tro pe a nyimenyime nuetrije la huliwa ne pionie. (E jë la Salamo 37:5.) Ame la angatre goeëne la aqane thupë angatre hnei Iehova, kola acatrene catrëne la aqane imelekeu i angatre me Nyidrë.—Is. 41:10.
IJIJE KÖ TRO EPUNI A HANE PIONIE?
16. Maine epuni a ajane troa hane pionie, nemene la nyine tro epuni a kuca?
16 Maine epuni ajane troa hane pionie, me kapa la itre manathithi ka eje thei angatr, thithi fë jë koi Iehova. (1 Ioane 5:14, 15) Ithanatane jë memine la itre ka pionie. Eköthe amë jë la itre mekune nyine tro epuni a eatrën; tro lai a xatua epuni troa hane pionie. Celë hi hna kuca hnei Keith me Erika. Tune la itre xa trefëne ka ce macatre me nyidro, hnei nyidroti hna huliwa i maseta ngöne la drai ka pexej, me itö uma, me loto ka hnyipixe thupene la faipoipo i nyidro. Öni nyidro: “Nyiho pe kö a mekune ka hape, e hetrenyi hë nyiho la itre ewekë celë, tre, tro hë nyiho a hetrenyi la nyipi madrine ngöne la mele i nyiho, ngo pëkö.” Thupene la hna luzi la huliwa i Keith, angeice a nyiqaane xome jë la huliwa ne pionie ka ixatua. Öni angeic: “Hna amekunë ni hnene la huliwa ne pionie laka ka xulu la nyipi madrine qa ngöne la huliwa ne cainöj.” Hnei nyidroti hna ce sinee memine la lue xa trefëne ka pionie, nge ka xatua nyidroti troa trotrohnine laka, tru catre kö la madrine hna kapa qa ngöne la hna pionie, me hna ahmaloeëne la aqane mel. Nemene la hna kuca hnei Keith me Erika? Hnei nyidroti hna cinyihane wengëne la itre mekune nyine troa eatrën, me afedrene ngöne la qëhnelo ne la ikalepany, me sija trij la ketre mekune e ase hë eatrën. Ame hë e thupen, nyidroti hë a hane pionie.
17. Pine nemene matre ka loi e troa mekune hnyawa ka hape, ijiji epuni kö troa hane pionie?
17 Ijije kö tro epuni a hane pionie? Maine öhne hi epuni laka tha ijiji epuni kö troa hane pionie enehila, kuca asë jë la hnei epuni hna atreine troa easenyi catre koi Iehova hnene la hna catre cainöj. Maine tro epuni a thithi koi Iehova me mekune hnyawa la pengöne la mele i epun, maine jë tro epuni a öhne laka, e tro epuni a nango amekötine la mele i epun, tro ha aijijë epuni troa hane pionie. Ame hë la epuni xome la huliwa ne pionie, tro ha sisitria catre kö la madrine i epuni hune la itre jole nyine tro epuni a cile kow. Pine laka, epuni a amë panëne la Baselaia i Akötresie ngöne la mele i epun, nge tru la hnei epuni hna hamëne koi itre xan, haawe, troa tru catre la madrine i epun. (Mat. 6:33) Nyimutre fe hë la itre ijine tro epuni a meku Iehova me qeje Nyidrë, nge tro fe lai a acatrene catrëne la ihnimi epuni koi Nyidrë me amadrinë Nyidrë.
[Thying]
[Iatr ne la götran 27]
[Iatr ne la götran 29]
Ame la easa catre huliwa i Akötresie ngöne la drai ka pexej, tre, hetrenyi the së la mele ka hetre aliene me ka madrin (Wange ju la paragarafe 9)
