Inamacane Jë La Isa Aqane Axecië Mekun

“Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.”—ITE EDOMË 3:5.

NEMENE LA AQANE TRO NYIPUNITI A SA?

Nemene la aliene la hna hape troa hni ka wië ngöne la easa axecië mekun?

Nemene la aqane tro sa inine axecië mekune ka lolo?

Nemene la ka xatua së troa kuca la hne së hna axeciëne troa kuca?

1, 2. Aja i epuni kö troa axecië mekun? Tune kaa la itre xa mekune hnei epuni hna xome hë?

 AME ngöne la drai, tre, nyimutre catre la itre mekune nyine tro sa axeciën. Nemene fe la mekuna i epun? Ame itre xa atr, tre, canga saqe i angatre hi isa axecië mekun. Angatr a mekune ka hape, ketre isa qanyi angatre kö troa isa xomi mekun, nge tha ketre kö a troa axecië mekun thatraqai angatr. Ame itre xan, xou i angatre fe troa hane xome la itre mekune ka tru. Itre xan a thele eamo e hnine la itre itus maine thene pena la itre ka hamë eamo, maine pena, angatr a hamëne la itre manie ka tru matre troa kapa la ixatua göi tro angatr a axecië mekun.

² Alanyimu së itre ka kapa ka hape, ngacama tha qa së kö e itre xa ijine troa axecië mekun, ngo ame pe, tre nyimutre pala kö la itre mekune nyine tro sa isa xome ngöne la mele së. (Gal. 6:5) Ngo atre hnyawa hi së laka, tha hna xome kö cememine la inamacan maine pena tha ka hetre thangane ka loi asë la itre mekune hne së hna axeciën.

3. Nemene la itre hna amekötine ka troa xatua së matre tro sa axecië mekune hnyawa? Pine nemene matre tha ka hmaloi kö troa atre la mekune hne së hna troa xom?

³ Madrine hi së itre hlue i Iehova laka, tha jole kö tro sa trotrohnine la itre hnei Nyidrëti hna amekötine göne la itre götrane ka tru ne la mele së. Nge atre hnyawa hi së laka, maine tro sa xötrethenge la itre hnei Nyidrëti hna amekötin, tro hë sa nyimenyime xome la itre mekune ka troa amadrinë Iehova nge ka troa hetre thangane ka loi kowe la mele së. Ngo tha Tusi Hmitrötre kö a amamai gojenyi kowe asë hi la nöjei jole me aqane mele asë. Matre, nemene hö la nyine tro sa kuca e traqa ju koi së la ewekë cili? Hanawange la ketre ceitun, öni Tusi Hmitrötr ka hape, tha tro kö a atrekënö. (Efe. 4:28) Ngo ame itre xan, öni angatr, ka hape, tha ka ngazo kö e troa atrekënö, ke tha mo ka tru alamekene kö la hna xom, maine pena, ka nyipi ewekë kowe la mel. Tro sa axecië mekune tune kaa, e qaja jë hnei itre xan ka hape, tha mama kö la nyine troa kuca, ke, pëkö hna amekötin ka troa köja gojenyi së hnyawa? Nemene la ka troa xatua së?

 AXECIË MEKUNE JË CEMEMINE LA HNI KA WIË

4. Nemene la eamo hne së hna kapa lapane ngöne la easë a troa axecië mekun?

⁴ Ame la easa qaja kowe la ketre trejine Keresiano ka hape, nyipi ewekë catre la mekune hne së hna troa axeciën, maine jë hnei angeice hna qaja koi së ka hape troa xomi mekun cememine la hni ka wië. Eamo ka lolo catre lai, ke, kola ithuecatre hnei Tusi Hmitrötr, ka hape: “ite mekune ne la ate sasaqe kola apë ewekën,” haawe, tha tro kö a canga sesë troa xomi mekun. (Ite edomë 21:5) Ngo kola hapeue lai hna hape, troa axecië mekune cememine la hni ka wië? Hapeu, kolo lai a hape, tro sa pane mekune hnyawa, me atreine tuluthe la itre ewekë, me thele troa trotrohnine la nöjei ewekë asë qëmekene tro sa xomi mekun? Ka nyipi ewekë asë hi la itre mekune celë, ngo hetre nyine tro pala kö sa kuca matre troa hni ka wië.—Rom. 12:3; 1 Pet. 4:7.

5. Pine nemen matre tha ka wië hnyawa kö la hni së?

⁵ Pëkö atr hna hnahon fë la hni ka wië. Pine laka itre ka ngazo asë hi së nge itre ka tha pexeje kö së, haawe, easa wezipo nge ngazo la itre mekuna së. (Sal. 51:5; Rom. 3:23) Ketre, alanyimu easë ekö, itre hna “atimekën” hnei Satana uti hë lo easa atre Iehova me itre hnei Nyidrëti hna amekötin. (2 Kor. 4:4; Tito 3:3) Celë hi matre, maine kola mekune hnene la ketre atr ka hape, ka loi nge lolo la aqane tuluth angeic la itre mekune hnei angeice hna troa xom, ngo ame pe, tro pala kö a ngazo la mekune hnei angeic hna axeciën.—Ite edomë 14:12.

6. Nemene la ka xatua së troa hni ka wië?

⁶ Maine ame easë, tre, tha ka pexeje kö së, ngo ame Iehova, ke ka pexeje asë hi la itre jë i Nyidrë. (Deu. 32:4) Hnei Nyidrëti hna hamë së la ka nyipi ewekë koi së matre tro sa saze la aqane mekune së, nge troa hane wië fe la itre hni së. (E jë la 2 Timoteo 1:7.) Ame la aja së itre Keresiano, tre, ene la troa mekun, me ithanatan la itre mekun, me atreine cile kowe la itre jol. Matre nyipi ewekë tro sa thupëne la itre mekuna së me itre aliene hni së me xome la itre aqane mekune i Iehova, me itre aqane ujë i Nyidrë.

7, 8. Nemene la ceitune ka amamane koi së ka hape ijije hi tro sa xome hnyawa la ketre mekun, ngacama kola tupathi së maine traqa pena la itre jol?

⁷ Drei la ketre ceitun. Hna majemine hnene la itre xa atr ka tro troa mele ngöne la ketre nöj, troa upe la itre neköi angatr medreng kowe la itre sinee i angatr ka lapa pëhë ngöne lo lai sipu nöje i angatr. Kolo hi matre tha jole koi keme me thin troa ce huliwa me thele manie ngöne la nöje hnei nyidroti hna mele ngön enehila. Hnene la ketre föe ka mele ngöne la ketre nöje trehnyiwa hna hnaho, mingöminge la neköi eahlo trahmany. Ame pena ngöne la ijine cili, tre, hnei eahlo hë hna nyiqane inine la Tusi Hmitrötr me trongëne la itre hnei eahlo hna inin. Hnene la itre sinee i nyidro hna amexeje la aqane mele ne la nöje i angatr, ene la troa upe la itre nekönatr koi lue qaqa a hmunë matre tro nyidro a hia nyudren. Ngo hna inine hë hnene la föe ka hape qâ ne la lue trefën qaathei Iehova la troa hetrun la neköi nyidro. (Sal. 127:3; Efe. 6:4) Hapeu, tro jë kö eahlo a xötrethenge la hna majemin, ke hna mekune me qaja hnei ketre ka hape celë hi nyine tro lai a kuca? Maine tro pena eahlo a trongëne la hnei eahlo hna inine hnine la Tusi Hmitrötr, ngacama jole ju hë göi mani, maine pena troa xöjetriji eahlo? Maine epuni ju fe lai, nemene jë la hnei epuni hna troa kuca?

⁸ Tha tingetinge kö la hni ne la föe, ke, kola upe iele eahlo hnene la itre xan. Eahlo a thithi jë koi Iehova matre troa atre la mekuna i Nyidrë me sipo ixatua. Ame hë la eahlo a pane ce ithanatane lai memine la atre hamë ini koi eahlo me kowe la itre xa atrene la ekalesia, ene pe, eahlo ha trotrohnine hnyawa la mekuna i Iehova göne la jole ka eje thei eahlo. Eahlo fe a atrehmekune ka hape maine tha tro kö nyidro lue trefën lue ka hnaho a hetrune la neköi nyidro trahmany, eje hi lai laka, troa hetre ethane elanyi lai kowe la mele nyën. Thupene la hnei eahlo hna pane mekune hnyawa la hna qaja hnei Tusi Hmitrötr göne la jol ka eje thei eahlo, axeciëne jë hi eahlo ka hape, tha ka loi kö troa upe  la nekönatr koi lue qatr. Ame la kola öhne hnene la trahmanyi la aqane nyenyape nyimenyimene la itre atrene la ekalesia troa xatua nyidro, nge egöcatre la nekönatr, ene pe, nyidrëti a kapa ju troa hane ini tus me nyiqane troa hane ce sin me föe la itre icasikeu.

9, 10. Nemene la aliene la hna hape troa hni ka wië? Nemene la nyine tro sa kuca matre troa hetrenyi la hni ka wië?

⁹ Maine casi hi la ceitun, ngo ame pe kola amamane koi së laka, ka lolo catre kö e tro sa hni ka wië hune la tro sa sipu kuca la mekuna së, me mekune ka hape ka sisitria kö nge tha ka jole kö la mekuna ne la itre xan. Kola ceitune la mekuna së me hni së ka ngazo memine la ketre wac ka emo nyimenyim maine ka hmitre catre pena. Maine tro sa mejiune kowe lai wac nge ka ngazo pe, tro hë lai a traqa koi së la itre jole ka tru. (Iere. 17:9) Maine easa ajane troa neëne la itre jol, nyipi ewekë troa xecie hnyawa koi së laka, hna nyi trepene pala hi la itre mekuna së me itre aliene hni së hnene la itre trepene meköti Akötresie.—E jë la Isaia 55:8, 9.

¹⁰ Ej e hnine la Tusi Hmitrötr la eamo cili, kola hape: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö.” (Ite edomë 3:5, 6) Drei la hna qaja ka hape “the lapa qale kowe la hnei ’ö hna trotrohnin.” Thupene lai, hape jë hi “mekuneju” koi Iehova. Pëkö ka tui Nyidrë, ka pexeje la mekuna i Nyidrë. Haawe, ame ngöne la easa troa axecië mekun, nyipi ewekë troa xome la Tusi Hmitrötr matre troa atre la mekuna i Akötresie göne la mekune hne së hna troa xom. Maine easa ajane troa wië la hni së, nyipi ewekë tro sa xome la aqane mekune i Iehova.

HULIWANE JË LA ITRE HNI SË

11. Nemene la hna ajane hnene la ketre atr matre troa axecië mekun cememine la inamacan?

¹¹ Tha ka hmaloi kö troa inine troa axecië mekune cememine la inamacan, nge thupene lai troa trongëne lai itre mekune hne së hna xom. Troa jole catre kowe la itre ka xötrei xome la bapataiso, maine kowe lo itre ka nyiqane kökötre ngöne la nyipici. Ngo ijije hi tro angatr a kökötre hnyawa. Kola hë angatre hnei Tusi Hmitrötr ka hape, ‘itre medreng’ pine laka, ceitui angatr me itre nekönatr ka inine troa tro. Ame la kola inine hnene la nekönatr troa tro, nyën a nango nyiqaane feke ca. Ceitune hi lai memine la itre ka inine troa axecië mekun. Hnei Paulo aposetolo hna qaja la itre atr ka macaj me hape “angat’ angete majemine huliwane la hni troa wangate hmekune la loi me ngazo.” Ame la itre  hnëewekë hna hape “majemin” me “huliwane,” ke, lue ej a amamane ka hape tha tro kö a hmacahmaca me cil. Haawe, nyipi ewekë kowe la itre ka xötrei hmi, troa catre inine pala hi troa axecië mekune cememine la inamacan.—E jë la Heberu 5:13, 14.

12. Nemene la aqane tro sa inine troa axecië mekun?

¹² Ame ngöne la nöjei drai, nyimutre la itre mekune nyine tro sa axeciën. Ka co itre xan, nge ka tru itre xan. Kola qaja hnene la itre ka inamacan ka hape, ame la easa axecië mekun, ke, hna nyi trepene la mekune cili ngöne la itre hne së hna majemine kuca, ngo tha hna pane hane kö mekune hnyawa. Drei la ketre ceitun, ame e nöjei hmakany, epuni a axecië mekune göne la aqane tro epuni a heetr. Maine jë mekune ka co lai mekune hnei epuni hna troa axeciën, nge tha epuni kö a troa mekune aqeane ju pë hë. Ngo ame pe, nyipi ewekë koi epuni troa pane mekune la nyine tro epuni amë, ke ame la hlue i Iehova, ka thupëne angeice la aqane tro angeic a heetr. (2 Kor. 6:3, 4) Nge ame ngöne la epuni a troa itö iheetr, maine jë epuni a mekune ju la pengöne la iheetr hna pi hetrëne hnene la itre atr. Ngo tro fe kö epuni a hane mekune tun qëmekene troa itöne la ketre iheetr ka co thupen? Maine tro sa axecië mekune hnyawa ngöne la itre mekune ka co, tro ha xatua së troa huliwane la hni së. Maine tro sa ujë tune lai, haawe, tro ha xatua së troa axecië mekune hnyawa fe ngöne la itre götran ka nyipi ewekë catr.—Luka 16:10; 1 Kor. 10:31.

LOI E EJE LA AJA KA TRU TROA KUCA LA LOI

13. Nemene la ka xatua së troa kuca la itre mekune hne së hna axeciëne hë?

¹³ Maine ka loi ju hë la mekun hne së hna axeciën, ngo ame pe ke tha ka hmaloi kö e itre xa ijin tro sa trongëne la mekun hne së hna xom. Drei la ketre ceitun, ame itre xa atr, tre, angatr a ajane troa triji sixa, ngo ngazo pe hnyapa pala kö la pi ufi sixa, matre jole pi hë koi angatr. Nyipi ewekë troa eje the së la aja ka catr troa eatrëne la itre ewekë hne së hna mekune troa axeciën. Ame itre xan, öni angatre ka hape, ka ceitune la easa acatrene la aja cili memine la easa huliwane la itre ijö së. Tro la itre ijö së a hnyigotr, e hne së hna lapa huliwane me enijën. Ngo maine tha hne së kö hna enijëne la ngönetrei së haawe, tro hë lai pujehnin me ae la itre ijö së. Nemene la ka xatua së matre tro sa acatrene la aja së troa kuca la itre ewekë hne së hna mekune troa kuca? Nyipi ewekë tro sa mejiune koi Iehova matre tro Nyidrëti a xatua së.—E jë la Filipi 2:13.

14. Pine nemene matre hetrenyi jë Paulo la trengecatre matre troa kuca la hnei angeic hna mekune troa kuca?

¹⁴ Hnene laka ase hë Paulo melën la itre ewekë, haawe, atre hi nyidrëti laka, jole catr e troa kuca la loi. Hnei nyidrëti lo hna qaja ka hape, aja i nyidrë troa kuca “la loi” ngo ame itre xa ijin, ke tha ka hmaloi kö koi nyidrë. Atre hnyawa hi nyidrëti la hnei nyidrëti hna ajan maine nyine troa kuca pena, ngo ame itre xa ijin, tre, thatreine kö troa kuca. Öni nyidrëti ka hape: “Ke ini a madine la wathebo i Akötesie thenge la ate e kuhu hning ; ngo öhnë hë ni la kete wathebo ngöne la ite hnepe ngöneteing, kola ishi memine la wathebo e kuhu hning, me aponyi ni kowe la wathebo ne la ngazo ate lapane la ite hnepe ngöneteing.” Ngo ame pe, tre, hetre nyipi kepin matre nyidrëti a mejiun. Öni nyidrë: “Ini a ole koi Akötesie jëne Iesu Keriso Joxu shë !” (Rom. 7:18, 22-25) Hnei nyidrëti fe hna cinyihane ka hape: “Ateine ni troa kuca la nöjei ewekë asëjëihë hnei nyidëti ate aegöcatenyi ni.”—Fil. 4:13.

15. Pine nemene matre easa nue la trengecatre së troa kuca la loi?

¹⁵ Maine easa ajane troa amadrinë Akötresie, nyipi ewekë tro sa axecië mekune ka lolo nge thupene lai, easa nue asë la trengecatre së troa eatrën la mekune hne së hna xom. Mekune hi së lo hna qaja hnei Elisaia kowe lo itretre hmi koi Baala, me kowe lo angetre Isaraela ka hmi thoi hune la Wetr e Karemela: “Uti hë eue la tro nyipunie a luelue ngöne la lue mekun ? Maine Iehova la Akötesie, xöte thenge anganyidë, nge maine Baala, xöte thenge nyidëti pena.” (1 Ite jo. 18:21) Atre hnyawa la itre neköi Isaraela laka, Iehova hmekuje hi lo hnei angatre hna troa thili kow. Ngo angatr a “luelue ngöne la lue mekun” pine laka, angatr a thele troa ce thili koi Iehova me koi Baala. Tha hna tune kö lai hnei Iosua. Ame petre kö lo itre hnepe macatre ka ase hë, hnei nyidrëti hna qaja koi angetre Isaraela, ka hape: “maine ngazo koi nyipunie troa nyi hlue i Iehova, iënejë nyipunie ngöne la drai celë la  tro nyipunie a nyi hlue kow . . . ngo ame ni me lapang, te, tro huni a nyi hlue i Iehova.” (Ios. 24:15) Nemene la manathithi hna kapa hnei nyidrëti me lapa i nyidrë? Hna nue angatr troa lö kowe la Nöj Hna Thingehnaean, “nöje ka di hnei zane thi me hani.”—Ios. 5:6.

MANATHITHI LA ATRE AXECIË MEKUN CEMEMINE LA INAMACAN

16, 17. Nemene la itre manathithi hne së hna kapa qa ngöne la hne së hna axecië mekune troa kuca la hna upi së hnei Iehova?

¹⁶ Köni neköne la lue trefën, ame trahmanyi ke ka xötrei xome angeice la bapataiso. Nge tha ka tru fe kö la thupei angeic, ngo kolo hi a iëne la huliwa cili, ke matre troa hane sine la itre icasikeu e nöjei mecixeni me sabath, me hane ce cainöj memine la hnepe lapa i angeic. Ame ngöne la ketre drai, hna hë angeic hnene la ketre sine huliwa i angeic tro nyidroti a saze huliwa, ke hna nyithupene hnyawa lai huliwa ka hnyipixe nge ka tiqa hnei itre xa eloin ej. Hnene la trejine trahmanyi hna pane mekune me thithi fë la mekune hna troa axeciën. Angeice a pane lapa mekune laka, maine tro angeic a xome lai huliwa ka hnyipixe, tre, tro pala kö angeice lai a huliwa e nöjei mecixeni me sabath. Matre maine epuni ju fe la ka troa axecië mekun, nemene jë la hnei epuni hna troa kuca?

¹⁷ Thupene la hnei angeice hna pane mekune hnyawa la thangane elanyi lai mekune hnei angeic hna troa xom, ngöne la itre aqane imelekeu i angeic me Iehova, angeic a thipëne ju lai huliwa ka tru thupen. Tune kaa, hnei angeice kö hna jolêne laka tha xome ju kö lai huliwa hna nyi thupene atrun? Ohea. Tha hnei angeice kö hna mekune troa kepe manie atrun, ame la ka nyipi ewekë catre koi angeic me hnepe lapa i angeic, ke, ene la troa easenyi catre koi Iehova. Atraqatr la madrinene la lue trefën ngöne la kola qaja hnene la neköi nyidro jajiny ka treene lao macatre ka hape, tru la ihnimi nyën kowe la kem me thine i nyën, me itre trejin trahmanyi me föe, nge tru catre pala kö koi Iehova. Hna qaja fe hnei nyën, ka hape, nyën a ajane troa hane nue la mele i nyën koi Iehova me hane xome la bapataiso. Hetre eloine la tulu ne la keme i nyën, laka, hna amë panëne pala hi ngöne la mele i nyidrë la hmi Iehova.

18. Pine nemene matre nyipi ewekë tro sa inamacane la aqane tro sa axecië mekun o drai?

¹⁸ Tune la aqane eatrongë angetre Isaraela hnei Mose ngöne la hnapapa, nyimu macatre ne kolo fe a hane eatrongëne hnei Iesu la nöje i Akötresie ngöne la fene i Satana. Easenyi hë matre apatrene pi la fene celë. Nge tui Iosua a eatrongë angetre Isaraela ekö kowe lo Nöje Hna Thingehnaean, haawe, Iesu mina fe a troa eatrongëne la itretre drei nyidrë kowe la fene ka hnyipixe, laka, pë hmaca kö atr ka ngazo ka troa hane mele ngön. (2 Pet. 3:13) Pine laka calemi hë la drai cili, tha ka loi kö troa bëeke hmaca kowe lo itre aqane mekune ekö, me itre hna majemin, me itre hna amekötin, me itre aja ekö. Nyipi ewekë tro sa trotrohnine hnyawa fe la aja ka eje thei Akötresie, ene la tro sa mel. (Rom. 12:2; 2 Kor. 13:5) Haawe, catre pi së troa inamacane la aqane axecië mekuna së me ië ewekë së, nge loi e tro fe sa itre atr hna amanathithine hnei Iehova epin, epine palua.—E jë la Heberu 10:38, 39.

[Ithueamacany]

[Thying]

[Iatr ne la götran 22]

[Iatr ne la götran 24]

Ame hi la easa axeciën la itre mekune ka loi ngöne la nöjei drai, easë hi lai a akökötrene la itre aqane mekuna së (Wange ju la paragarafe 11)

[Iatr ne la götran 26]

Inamacane jë la aqane axecië mekun, nge loi e ce madrin memine la nöje i Akötresie (Wange ju la paragarafe 18)