Itre Hnyinge ne la Itre ka e

Pine nemene matre treije jë Iesu qëmekene troa amele Lazaro hmaca, tune la hna qaja ngöne Ioane 11:35?

▪ Ame la kola meci hnene la ketre atr hne së hna hnim, tre, easë lai a treije pi angeic, pine laka, patre hë angeice qaathe së. Ngacama ka tru Lazaro koi Iesu, ngo tha Iesu kö a treije pine la meci Lazaro. Nyidrëti pe a treije hnene la utipine i nyidrë kowe la itre trejine me angeice me itre sinee i angeic, tune la aqane amamane hnene la itre xötre ne la tusi Ioane ka qaja la meci Lazaro.—Ioane 11:36.

Ame la Iesu a xötrei drenge ka hape, kola kucakuca hnei Lazaro, tha hnehengazo menu kö nyidrë troa canga wai angeice matre nyinyine la meci angeic. Öni Ioane ka hape: “Shamatinë hë [Iesu] laka [Lazaro] a mec, ame hnei nyidëti hna munëti pala kö a lue pui ngöne la hnalapa cili.” (Ioane 11:6) Pine nemene matre hmitre ju pë hë Iesu? Hetre mekuna i nyidrë. Öni nyidrë: “Ame la aliene la kucakuca cili, tre tha meci kö, ngo loi pe nyine atrunyi Akötesie, mate tro fe a atrune la Nekö i Akötesie hnen’ ej.” (Ioane 11:4, MN) Hetre “aliene” la kucakuca i Lazaro, a tha meci kö la pun. Iesu a thele matre troa “atrunyi Akötesie” jëne la meci Lazaro. Hna tune kaa? Iesu a troa kuca la ketre iamamanyikeu ka tru, ene la troa amejëne la enehmu i nyidrë qa hnine la hua.

Ame la kola porotrike hnei Iesu memine la itretre drenge ngöne la ijine cili, hnei Iesu hna aceitunëne la meci me kola hmuli zië. Celë hi matre qaja jë nyidrëti koi angatre ka hape, nyidrëti “a tro troa ahlë [Lazaro] jë qa hna meköl.” (Ioane 11:11) Ame la kola ahlë Lazaro qa hna mec, ame koi Iesu, ka tune hi lo keme maine thine a ahlëne la nekö i angeice qa hna meköl. Celë hi matre, tha nyipi ewekë kö troa latresi pine la meci Lazaro.

Ngo hnauëne kö matre treije jë Iesu? Tro hmaca la itre xötre ka qaja la meci Lazaro a sa. Ame la Iesu a ixelë me Maria, me öhnyi angeice me itre xan a treij, ame “hnei nyidëti hna simano e kuhu hnin, me manomano cat.” Qa ngöne la hnei nyidrë hna goeëne la akötre ka eje thei angatr, ame hnei Iesu hna hane akötre uti fe hë la nyidrëti a ‘simano e kuhu hnin.’ Celë hi matre “Iesu a sheitë [treij].” Tru la hleuhleu i nyidrë la kola goeëne la akötre ne la itre enehmu i nyidrë.—Ioane 11:33, 35.

Hnene la hna edromëne celë hna amamane ka hape, hetre mene i Iesu me atreine i nyidrë troa amelene hmaca qa hna meci la itre hne së hna hnim ngöne la fene ka hnyipixe ka troa xulu. Kolo fe a amamane koi së ka hape, ka drei akötre fe hi Iesu la kola öhnyi së e akötre pine la kola meci la sinee së hne së hna hnim. Ame la ketre ini nyine tro sa xome qa ngöne la edromë celë, tre, ene la tro sa hetrenyi la utipine kowe la itre atr hna akötrëne hnene la meci ka apatrene la ketre sinee hne së hna hnim.

Atre hi Iesu ka hape, tro nyidrë a amele Lazaro hmaca. Ngo ame pe, hnene la ihnimi ka jui me utipine ka eje thei nyidrë kowe la itre sinee i nyidrë, ame hnei nyidrëti hna treij. Ketre tune mina fe, hnene la utipine ka eje the së matre easa “ce teijejë me angete teij.” (Rom. 12:15) Ame la easa amamane la hleuhleu së, tre, tha kolo kö lai a hape, pë hë lapaune së kowe la melehmaca. Hane hi la ketre tulu ka loi hna hamëne hnei Iesu, göi troa amamane la utipine i nyidrë kowe la itre atrene la hnepe lapa me itre sinee, matre nyidrëti a hane treij, ngacama atre hi nyidrë ka hape, tro nyidrë a amele Lazaro hmaca.

[Iatr ne la götran 32]