Loi e Madrine La Hni Epuni Hnene La Itre Eamo i Iehova

“Hetrenyi ni epine palua la itre eamo i cilie ; ke itre eje a amadrinëne la hning.”—SAL. 119:111, MN.

NEMENE LA AQANE TRO NYIPUNIETI A SA?

Nemene la kepine matre tro sa madrine me wangatrune la itre eamo i Iehova?

Nemene la aqane tro sa acatrene la mejiune së koi Iehova?

Pine nemene matre tro pala hi sa catre kuca la itre huliwa ne la Baselaia?

1. (a) Nemene la aqane ujë ne la itre atr kowe la itre eamo, nge pine nemen? (b) Nemene la aqane troa ajojezine la aqane waiewekëne la ketre atr hnene la pi tru?

 NYIMU pengöne aqane ujë ne la itre atr kowe la itre hna amekötin. Tha jole kö e troa kapa la eamo e hna hamëne hnene la atre mus hu së, ngo e hna hamëne la eamo cili hnene la ketre atr ka tu së hi maine hne së hna musi kow, tre, tha hane pë hë së kapa. Ketre, isapengöne kö la aqane drenge la itre atr, la itre ihaji me eamo hna hamën. Itre xan a hleuhleu, maine hmahma, nge itre xan a thele troa trongëne la eamo, me elë hune la itre jol. Pine nemene matre isapengöne kö la itre aqane ujë? Ame la ketre kepin, tre, hnene laka ka pi tru. Eje hi laka ame la atr ka pi tru, tre troa ajojezine la aqane waiewekë i angeic, ene pe tha wangatrune hë angeice la itre eamo, nge tha trongëne hë la itre ini ka tru alameken.—Ite edomë 16:18.

2. Pine nemene matre itre Keresiano a wangatrune la itre eamo qa hnine la Wesi Ula i Akötresie?

² Ame pena ha la itre nyipi Keresiano, angatre a wangatrune la itre eamo ka lolo, nge hna nyitrepene hnene la Wesi Ula i Akötresie. Hnene la itre eamo i Iehova hna aijijë së troa atreine waiewekë, me ini së, me xatua së troa hmekëne la itre hnö, tune la pi aja mo, me kuci ngazo, me kuci dorog, me iji menu la ka haitr. (Ite edomë 20:1; 2 Kor. 7:1; 1 Thes. 4:3-5; 1 Tim. 6:6-11) Ketre, “aciaci la hni” së, thangane la hne së hna trongëne la itre eamo i Akötresie.—Is. 65:14.

3. Nemene la aqane ujë ne la atre cinyihane la salamo nyine tro sa nyitipun?

³ Maine easa ajane troa thupëne la aqane imelekeu së memine la Tretretro së e hnengödrai, nyipi ewekë tro pala hi sa trongëne la itre hna amekötine hnei Iehova ngöne la mele së. Drei la elolone e tro sa ujë tune la aqane ujë ne la atre cinyihane la salamo kola hape: “Hetenyi ni epine palua la itre eamo i cilie ; ke itre eje a amadrinëne la hning”! (Sal. 119:111) Hapeue  fe së, easë kö a hane madrine me wangatrune la itre wathebo i Iehova, maine easë pena a mekune ka hape, hace catre itre ej? E hamë së jë la ketre eamo, maine jë tro sa nango wesitr, ngo catre pi pe së troa trongën. Catre pi së mejiune kowe la inamacane ka sisitria i Akötresie! Tro sa ce wange la köni aqane troa acatrene la mejiune së.

ACATRENE JË LA MEJIUNE I EPUN JËNE LA THITH

4. Nemene la ewekë ka cile huti ngöne la mele i Davita?

⁴ Hetrenyi la itre ijine ngazo me itre ijine loi ka traqa ngöne la mele i Davita Joxu, ngo hetre ewekë ka cile huti thei nyidrë, ene la mejiune i nyidrë kowe la Atre Xupi nyidrë. Öni nyidrë: “Iehova fe, ini a adraiëne la unge koi cilie. Akötesingöti fe, ini a lapaune koi cilie.” (Sal. 25:1, 2) Nemene la ka xatua Davita troa acatrene la mejiune i nyidrë kowe la Tretretro i nyidrë e koho hnengödrai?

5, 6. Nemene la hna qaja hnene la Wesi Ula i Akötresie göne la aqane imelekeu i Davita me Iehova?

⁵ Nyimutre la itre atr ka thithi koi Akötresie ngöne hmekuje hi la angatre a ixelë me itre jol. Maine kolo pala hi a hë epuni hnene la sinee i epuni ngo göi tro hi a sipo mani maine ketre ewekë pena, tro hë epuni lai a pane thele la kepine matre angeice a lapa hë epun. Ngo tha ka tune fe kö Davita lai. Kola mama la aqane imelekeu i nyidrë me Iehova jëne la lapaune me ihnimi nyidrë koi Akötresie ngöne la itre ijine ngazo me itre ijine loi ne la mele i nyidrë.—Sal. 40:8.

⁶ Hanawange la aqane atrunyi Iehova hnei Davita me hni ne ole i angeic koi Nyidrë: “Iehova Joxu huni fe, shemingepi hë la atesiwa i cilie e cailo fen ! hnei cilieti hna amë la lolo i cilieti e koho hune la hnengödrai !” (Sal. 8:1) Drenge fe kö epuni la ecatrene la aqane imelekeu i Davita memine la Tretretro i angeice e hnengödrai? Hnene la hni ne ole i Davita kowe la lolo i Akötresie hna upi angeice troa atrunyi Iehova “o drai.”—Sal. 35:28.

7. Nemene la thangane koi së e tro sa easenyi koi Akötresie jëne la thith?

⁷ Tui Davita, nyipi ewekë tro pala hi sa fe la hni së koi Iehova matre troa acatrene la mejiune së koi Nyidrë. Öni Tusi Hmitrötr: “Eashenyijë koi Akötesie, nge tro nyidëti a eashenyi koi nyipunie.” (Iako. 4:8) Ame la troa easenyi koi Akötresie jëne la thith, tre ketre jëne fe lai ka sisitria matre tro sa hetrenyi la uati hmitrötr.—E jë la 1 Ioane 3:22.

8. Pine nemene matre tro sa thupëne matre tha tro kö sa qaja lapane la itre hnëewekë ka casi la easa thithi koi Nyidrë?

⁸ Hapeu, casi pala hi la itre hnëewekë hnei epuni hna qaja ngöne la epuni a thith? Maine eje hi, pane xome jë la hnepe menetre qëmekene tro epuni a thith matre troa mekune la hnei epuni hna ajane troa qaja. Maine tro pala hi sa qaja la itre hnëewekë ka casi kowe la sinee së la easa ithanata me angeic, tro kö angeice lai a madrin? Tro hë angeice lai a xele ma drei së. Eje hi laka, tha tro pi kö Iehova a thipetrije la thithi ne la ketre hlue i Nyidrë ka nyipici. Ngo loi e tro sa thupëne matre tha tro kö sa qaja lapane la itre hnëewekë ka casi la easa thithi koi Nyidrë.

9, 10. (a) Nemene la nyine tro sa qaja ngöne la itre thithi së? (b) Nemene la ka troa xatua së matre tro sa hane qaja la itre thithi ka xulu qa kuhu hni së?

⁹ Maine easa ajane troa easenyi koi Akötresie, haawe, tha tro pi kö a tëtë la itre thithi së. Ame la easa catre fe la hni së koi Iehova, ketre easë fe hi lai a easenyi catre koi Nyidrë, nge tro fe a catre la mejiune së koi Nyidrë. Matre, nemene la nyine tro sa qaja ngöne la itre thithi së? Wesi Ula i Akötresie a sa ka hape: “Loi e cengöne amamane koi Akötesie la ite aja i nyipunie hnene la thith, me sipo, me ole.” (Fil. 4:6) Haawe, ame la itre ewekë nyine tro sa qaja ngöne la easa thith, tre, itre ewekë ka ketr la aqane imelekeu së me Akötresie, maine ketre ewekë ka ketr la mele së ngöne la easa nyi hlue i Nyidrë.

¹⁰ Nyine ini koi së la troa wange la itre hna ithanata hnene la itre hlue i Akötresie, trahmanyi me föe ngöne la angatre a thith, nge hna fejane hnine la Tusi Hmitrötr. (1 Sam. 1:10, 11; Ite hu. 4:24-31) Hetrenyi e hnine la itre tusi Salamo la itre thithi ka xulu qa kuhu hni, me itre nyima koi Iehova. Kola mama ngöne la itre thithi celë me ngöne la itre nyima, la itre aliene la hni tune la akötr, me madrin. Ame la easa wange la itre hna ithanata celë hna qaja hnene la itre hlue i Iehova ka  nyipici, tre, tro lai a xatua së matre tro fe a hane jui la itre thithi së koi Nyidrë.

MEKUNE AJUINE JU LA ITRE EAMO I AKÖTRESIE

11. Pine nemene matre nyipi ewekë tro sa mekune ajuine la itre ihaji qaathei Akötresie?

¹¹ Öni Davita: “Eje kö la [“eamo,” MN] i Iehova, ate ainamacanëne la ite wangadrapa.” (Sal. 19:7) Ijije hi tro sa inamacane hnene la hna trongëne la itre hna amekötine hnei Akötresie, ngacama itre wangadrapa së. Ngo e ajane së troa kepe eloine qa ngön, nyipi ewekë tro sa mekune ajuine la itre ihaji qa hnine la Tusi Hmitrötr. Kolo fe a qaja la troa mele nyipici ngöne la itre itupath ngöne la hna ini, maine ngöne la hna huliwa së, me sajuëne la hna amekötine göi madra, me catre tha sine la fen, me trongëne la itre trepene meköti göi aqane heetr me isej. Maine tro sa hetrenyi la mekuna i Akötresie ngöne la itre götrane cili, tre, tro lai a xatua së troa neëne la itre jol. Ame hë e cili, xecie hnyawa ha e kuhu hni së la nyine troa kuca, e traqa ju la ketre jol. E tro sa canga mekune la itre jole ka tune lai memine la aqane troa cile kow, haawe, tro hë lai a thupë së matre tha tro kö sa akötr.—Ite edomë 15:28.

12. Nemene la itre mekune nyine troa mekune ajuine matre tro sa trongëne la itre eamo i Akötresie?

¹² Ame ngöne la easa treqene troa eatre la hna thingehnaeane hnei Akötresie, hapeu, kolo kö a amamane hnene la mele së ka hape, easë pala hi a hmeke ngöne la götrane u? Hapeu, easë kö a mejiune laka, easenyi catre hë matre apatrenyi Babulona Atraqatre pi? Hapeu ka mele pala kö the së lo itre ini hne së ekö hna xötrei kapa, ene lo itre manathithi ka troa xulu, tune la mele ka tha ase palua kö e celë fen? Easë kö a catre cainöj, maine easë pena a amë panëne la itre sipu aja së ngöne la mele së? Nge tune kaa fe la mejiune së kowe la mele hmaca, me troa ahmitrötrëne la atresiwa i Iehova, me troa anyipicine la musi cile i Nyidrë? Hapeue la itre ewekë cili, ka sisitria pala hi itre eje kowe la mele së? Maine tro sa mekune ajuine la itre hnyinge celë, tro hë lai a xatua së troa lapa mekune me trongëne “epine palua la itre eamo i” Akötresie.—Sal. 119:111.

13. Pine nemene matre jole kowe la itretre drei Keriso ekö troa trotrohnine la itre xa ewekë? Hamëne jë la ketre ceitun.

¹³ Ame la itre ewekë hna qaja hnine la Tusi Hmitrötr, tre, tha nyipi mama pala kö koi së enehila, ke, tha ijine petre kö koi Iehova tro Nyidrëti a amamane la alien. Hnei Iesu pala hi hna qaja kowe la itretre drei nyidrë ka hape, nyipi ewekë tro nyidrëti a akötre me mec. (E jë la Mataio 12:40; 16:21.) Ngo tha trotrohnine pi kö la ange aposetolo la aliene la hna ithanata i nyidrë. Hnei angatre pe hna trotrohnine lai thupene lo nyidrëti a mec me melehmaca, lo nyidrëti a xome la ngönetrei ne atr, me mama kowe la itretre drenge ka ala nyim, “ame hnei nyidëti hna fepi la ite hni angat, mate tro angate a trotrohnine la hna cinyihan.” (Luka 24:44-46; Ite hu. 1:3) Ketre tune mina fe, uti hë lo kola nenge la uati hmitrötre kowe la itretre drei Keriso lo ijine Penetekos macatre 33 M.K., a tha trotrohnine kö angatre ka hape, troa acile la Baselaia i Akötresie e hnengödrai.—Ite hu. 1:6-8.

14. Ame ngöne lo kola nyiqane lo hneijine i Iesu ekö, Nemene la tulu ka loi hna hamëne hnene la itre trejine ka nyimutre ngacama tria kö la mekuna i angatre göne la itre drai ne la pun?

¹⁴ Ketre tune mina fe, ame ngöne la kola xejë la itre macatre ka truedre hadredre, tria kö la hna trotrohnine hnene la itre nyipi Keresiano göi “ite drai hnapin.” (2 Tim. 3:1) Ame lo 1914, hnei itre xane hna mekune ka hape, easenyi catre hë la tro angatre a elë hnengödrai eë. Tha eatre ju kö la mekuna i angatr, ene pe ame la angatre hmaca a inine la Tusi Hmitrötr, tre mama hnyawa ju hi koi angatre la enyipiewekëne la troa cainöje e cailo fen. (Mar. 13:10) Haawe, ame lo 1922, hnei J. F. Rutherford, atre elemekene la huliwa ne cainöj, hna qaja kowe la itre atrene la icasikeu ngöne la kovasio ka tru e cailo fen e Cedar Point, Ohio, Etazini ka hape: “Hanawang, musi hë la Joxu! Nyipunieti hi la itretre tro fë maca i nyidrë. Celë hi matre ahlemune jë, ahlemune jë, ahlemune jë la Joxu memine la baselaia i nyidrë.” Qaane ju hi la ijine cili uti hë enehila, kola hlemu la itre  hlue i Iehova, ke ka cainöjëne angatr “la maca ka loi ne la baselaia.”—Mat. 4:23; 24:14.

15. Nemene la eloin e tro sa mekune ajuine la aqane ujë i Akötresie kowe la nöje i Nyidrë?

¹⁵ Ame la easa mekune ajuine la aqane ujë i Iehova kowe la nöje i Nyidrë ekö me enehila, tre, kola acatrene la mejiune së kowe la mene i Nyidrë troa eatrëne la aja i Nyidrë me mekuna i Nyidrë kowe la itre drai elany. Ame fe enehila, kola xatua së hnene la itre eamo i Akötresie tro pala hi a mekune me lapa fë e kuhu hni së la itre hna perofetane ka tro pala kö a eatr. Xecie hnyawa koi së laka, e tro sa ujë tune lai, tro lai a acatrene la mejiune së kowe la itre hnei Nyidrëti hna thingehnaean.

ACATRENE JË LA MEJIUNE I EPUNI JËNE LA ITRE HULIWA I AKÖTRESIE

16. Nemene la thangane la hna catre cainöj?

¹⁶ Ame Iehova, Akötresi së, tre ketre Akötresie ka catre huliwa. Hnene la atre cinyihane la salamo hna hnyinge ka hape: “Deti la ka axajai cilieti la ka men ?” Öni angeice e sisedrëne ka hape: “Draië la iwanakothemie maca i cilie.” (Sal. 89:8, 13) Celë hi matre Nyidrëti a wangatrune me amanathithine la trenge catre hna kuca matre troa akökötrene la huliwa ne la Baselaia. Öhne hnyawa hi Nyidrëti laka, itre hlue i Nyidrë, trahmanyi me föe, me itre thöthi me itre qatr a catre huliwa. Tha itre “ate xeni ehlehlei kö,” ene laka tha itre ka genyi kö. (Ite edomë 31:27) Loi e tro sa nyitipune la Atre Xupi së, ene la tro sa catre kuca la itre huliwa i Nyidrë. Tru la thangane hne së hna kapa e tro sa nyi hlue i Akötresie cememine la hni ka meköt, me amadrinë Iehova matre amanathithine Nyidrë la huliwa ne cainöje së.—E jë la Salamo 62:12.

17, 18. Pine nemene matre ijije tro sa qaja ka hape, tro la itre aqane huliwa nyipici së a acatrene la mejiune së kowe la itre hna amekötine hnei Iehova? Hamëne jë la ketre ceitun.

¹⁷ Itre aqane huliwa nyipici së a acatrene tune kaa la mejiune së koi Iehova? Tro sa pane ce wange la aqane qeje pengöne hnei Tusi Hmitrötre  la kola lö hnene la angetre Isaraela kowe la Nöje Hna Thingehnaean. Hnei Iehova hna amekötine kowe la itretre huuje troa thue la aka ne la isisinyikeu matre troa tro sasaithe la Hneopegejë Ne Ioridrano. Ngo, ame la kola easenyi trootro hnene la nöj, öhne ju hi angatre laka, kola kaca la tim. Nemene la nyine tro la angetre Isaraela a kuca? Hapeu, tro angatre a acile la itre iuma mano i angatre e cili, me lapa a itre wiike troa treqene matre uti pi la tim? Ohea, hnei angatre hna mejiune koi Iehova me trongëne la itre hnei Nyidrëti hna amekötin. Nemene ju hë la ewekë ka traqa? Kola qeje pengöne ka hape: “E kete la öline la timi hnene la ite lue ca ne la itete huj . . . ame hna cileju la timi . . . ame hna tro shashaithe hnene la nöje hmekun’e Ieriko. Nge hna cile tha enije la itete huj . . . nge kola tro shashaithe ngöne la ga weliwele hnene la angete Isaraela asëjëihë.” (Ios. 3:12-17) Pane mekune jë së la aqane ketr la hni ne la angetre Isaraela la kola cile la tim, tha neni hë! Eje hi laka, hna acatrene la lapaune i angatre koi Iehova, pine laka hnei angatre hna mejiune kowe la itre hnei Nyidrëti hna amekötin.

¹⁸ Nyipici laka, tha Iehova hmaca kö a kuca la itre iamamanyikeu celë thatraqane la nöje i Nyidrë enehila, ngo Nyidrëti pala hi a amanathithine la itre aqane huliwa nyipici angatr. Hnene la trenge catre i Akötresie hna thuecatre i angatre troa eatrëne la huliwa ne cainöjëne la Baselaia e cailo fen. Ketre, hnei Iesu, Atre Anyipicine i Iehova ka sisitria, lo hna amelene hmaca, hna qaja axeciëne kowe la itretre drei nyidrë ka hape, tro nyidrëti a xatua angare ngöne la huliwa ka tru cili, öni nyidrë: “Qa ngöne lai, trojë nyipunie a inine la nöjei nöj’ asëjëihë . . . nge hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:19, 20) Nyimutre la Itretre Anyipicine ka qaja ka hape, angatre ekö la itre ka meij, me lapa thaup, nge hnene la uati hmitrötre i Akötresie hna hamë angatre la trenge catre troa ithanata kowe la itre trehnyiwa ngöne la hna cainöje trootro.—E jë la Salamo 119:46; 2 Korinito 4:7.

19. Ngacama itre ka kucakuca së, ngo nemene la ka xecie koi së?

¹⁹ Ame la itre xa trejin, trahmanyi me fö, tre, itre ka kucakuca hnei mec, maine hnene laka qatre catre hë angatr. Ngo, loi e xecie koi angatre ka hape, atrepengöne hnyawa hi “Tetetroti ka ihnimi me Akötesieti ate akeukawan’ asë” la pengöne la mele ne la itre Keresiano angatr isa ala cas. (2 Kor. 1:3) Nyidrëti a wangatrune la nöjei ewekë hne së hna kuca matre troa akökötrene la itre huliwa ne Baselaia. Loi e tro asë hi së a amë hnyawa e kuhu hni së laka, ame la ka nyipi ewekë catr, tre, ene la lapaune së kowe la thupene i mele Keriso, ewekë lai ka troa amele së, ke, hne së hna nue asë la hne së hna atrein.—Heb. 10:39.

20, 21. Nemene la aqane tro epuni a amamane la mejiune i epuni koi Iehova?

²⁰ Ame la pengöne la hmi së, tre, troa nue la traeme së, me trenge catre së, me itre mo së thatraqane ej, thenge la hne së hna atrein. Eje hi laka, eje the së la ajane troa ‘kuca la qa ne la ate amamane la maca ka loi.’ (2 Tim. 4:5) Atraqatre la madrine së troa ujë tune lai, ene la troa xatuane la itre atr troa “wangate hmekune la nyipici.” (1 Tim. 2:4) Kola mama hnyawa laka, ame la troa metrötrë Iehova, me atrunyi Nyidrë, tre, kola atrenamo së ngöne la götrane u. (Ite edomë 10:22) Ketre, kolo fe lai a acatrene la mejiune së, a ka tha ukeuke kö, kowe la Atre Xupi së.—Rom. 8:35-39.

²¹ Tune la hne së hë hna ce wang, tha ka traqa xane kö the së la mejiune kowe la itre hna amekötine hnei Iehova, ngo nyipi ewekë tro sa huliwa catre matre troa hetrenyi la mejiune cili. Haawe, qale jë së koi Iehova ngöne la thith. Mekune ajuine jë së la aqane eatrëne Iehova la aja i Nyidrëti ekö, me aqane tro Nyidrëti a eatrëne fe elany. Ketre, acatrene jë la mejiune i epuni koi Iehova hnene la aqane kuca i epuni la itre huliwa i Nyidrë. Tha tro pi kö epuni a thëthëhmine laka, ame la itre eamo i Iehova, tre, itre ka cile huti epuni palua. Haawe, maine tro epuni a hane trongëne hnyawa la itre eamo cili, eje hi lai laka, tro fe hë epuni a hane mele epine palua!

[Ithueamacany]

[Thying]

[Iatr ne la götran 12]

[Iatr ne la götran 15]

Tro kö epuni a amamane la mejiune i epuni tune la hna kuca hnene la nöje i Iehova lo hneijine i Iosua? (Wange ju la paragarafe 17, 18)