Nyine Mejiune Kow La Itre Eamo i Iehova
Nyine Mejiune Kow La Itre Eamo i Iehova
“Eamo i Iehova, ate ainamacanëne la ite wangadrapa.”—SAL. 19:7, MN.
NEMENE LA AQANE TRO NYIPUNIETI A SA?
Nemene la itre pengöne eamo hnei Iehova hna hamëne koi së hnine la Tusi Hmitrötr?
Nemene la aqane xatuane la itre Keresiano enehila hnene la itre eamo i Iehova?
Nemene la itre kepine matre easa mejiune kowe la itre eamo i Iehova?
1. Nemene la itre mekune hna ithanatane lapane hnene la itre hlue i Iehova, nge nemene la aqane tro sa kepe thangane e tro sa ce wange hmaca itre ej?
AME la easa hnëkëne la Ita Ne Thup ne Ini, ma öni së jë, ‘Ase fe hë së lo inine la mekune celë?’ Maine hnei epuni hna sine lapane la itre icasikeu ne la ekalesia, ma tro jë epuni lai a wangatrehmekune ka hape, hetre itre mekune hna ithanatane lapan. Ame la kola inine la baselaia i Akötresie, me thupene mel, me huliwa ne troa inine la itre atr, me itre thiina tune la ihnim me lapaun, tre, itre götranene la xeni la u hne së hna kapa lapan. Ame la easa ce wange hmaca la itre mekune cili, celë hi ka xatua së troa catre ngöne la lapaun, me troa ‘kuca thenge la Wesi Ula, nge the denge hi.’—Iako. 1:22.
2. (a) Ame la kola ithanatane itre eamo i Akötresie, tre, nemene la hna majemine amexeje lapan? (b) Nemene la eisapengönene la itre eamo i Akötresie me itre eamo i atr?
2 Ame la hna ithanata qene Heberu hna hape, “eamo,” tre, hna majemine ithanatane la kola qaja la itre wathebo, me itre hna amekötine hna hamëne hnei Akötresie kowe la nöje i Nyidrë. Ame la itre wathebo i Iehova, ke, nyine tro pala hi a mejiune kow; tha ka ceitu kö me wathebo i atr, laka tha ka cile huti kö, ke hetre ijine kola saze eje me ahnyipixen. Maine nyipici laka hetre itre hna hamëne thatraqane la ketre ijine hi, ngo pë jë pi kö troa hetre engazon. Önine la atre cinyihane la salamo: “Meköti palua kö la ite [“eamo,” MN] i cilie.”—Sal. 119:144.
3, 4. (a) Nemene fe la itre hna qaja hnene la itre eamo i Iehova? (b) Nemene la thangane nyine tro angatre a kapa e tro angatre a wangatrune itre ej?
3 Ame la itre xa ijin, ame la itre eamo i Iehova, tre, itre ithuemacanyi nyine hmekë së. Hnene la nöje i Isaraela hna kapa pala hi la itre ithuemacanyi nyine hmekë angatre jëne la itre perofeta i Akötresie. Hanawange la ketre ceitun, tha qea pe kö matre lö jë angetre Isaraela kowe la Nöje Hna Thingehnaean, nge Mose a hmekë angatre me hape: “Wangejë kö nyipunie, wanga iaö la ite hni nyipunie, nge nyipunie a jea, me nyi hluene la ite haze menu me thili kow’ it’ ej, ame hna troa palulu la elëhni Iehova koi nyipunie.” (Deu. 11:16, 17) Kola mama e hnine la Tusi Hmitrötre la nöjei pengöne eamo ka nyipi ewekë hnei Akötresie hna hamëne kowe la nöje i Nyidrë.
4 Nyimu ijine Iehova a amekötine kowe la angetre Isaraela tro angatre a xoue Nyidrë, me denge thenge la aqane ula i nyidë, me ahmitrötrëne la atresiwa i Nyidrë. (Deu. 4:29-31; 5:28, 29) Maine tro angatre a wangatrune la itre eamo celë, eje hi laka tro angatre a kapa la itre manathithi ka tru.—Lev. 26:3-6; Deu. 28:1-4.
AQANE UJË I ISARAELA KOWE LA ITRE EAMO I AKÖTRESIE
5. Pine nemene matre isigöli Hezekia Joxu jë hnei Akötresie?
5 Ngacama traqa ju hë la itre jole kowe la angetre Isaraela, ngo hnei Akötresieti hna nyipici kowe la hnei Nyidrëti hna thingehnaean. Ame la ketre enyipicin, tre kolo angetre Asuria me Saneribi Joxu i angatre a lapa xötreithi Iuda me qaja ka hape, troa apatrene trije la hna nyijoxu i Hezekia Joxu, ngo tha eatrëne ju kö ke hna thingijëne hnene la angela hnei Iehova hna up. Casi hi la jidri ne kola apatrene “la itete cat, me ite meken[e]” qaathene la itre soce i angetre Asuria hnene la angela i Akötresie, ame hna bëeke hnei Saneribi fë la hmahma i angeic. (2 A. l. ite jo. 32:21; 2 Ite jo. 19:35) Pine nemene matre isigöli Hezekia Joxu jë hnei Akötresie? Pine laka “hnei [Hezekia] hna fede cate koi Iehova, nge tha hna jeapi qa thei anganyidë, ngo hnei nyidëti hna thupëne la ite wathebo i anganyidë.”—2 Ite jo. 18:1, 5, 6.
6. Hnei Iosea Joxu hna amamane tune kaa la mejiune i nyidrë koi Iehova?
6 Ame la ketre tulu ne atr ka drengethenge la itre wathebo i Iehova, tre Iosea Joxu. Nyidrëti petre hi a eitre lao macatre, nge “hnei nyidëti hna kuca la meköti xajawa i Iehova . . . , nge tha jea kö kowe la götrane maca me mi.” (2 A. l. ite jo. 34:1, 2) Hnei Iosea hna amamane la mejiune i nyidrëti koi Iehova hnene la hna apatrene qa ngöne la nöje la itre idrola, me acile hmaca la nyipi hmi. Ame la aqane huliwa cili, tre, celë hi ka axulune la itre manathith, a tha thatraqai nyidrëti hmekuj, ngo thatraqane la nöje asë.—E jë la 2 Aqane lapa ite Joxu 34:31-33.
7. E wangacone mina ha Isaraela la itre eamo i Iehova, nemene la thangane koi angatr?
7 Ngazo pe, tha hnene kö la nöje i Akötresie hna mejiune pala hi kowe la itre eamo i Iehova. Ngöne la itre macatre ka nyimu hadredr, nyimu ijine angatre a idrei nge nyimu ijine fe angatre a tha idrei. Ame la kola nanazije la lapaune i angatr, angatre mina hi lai a hna “xom’ [agöne] hnene la enyine’ asë ne la ihaji,” tune la hna qaja hnei Paulo aposetolo. (Efe. 4:13, 14) Nge tune la hna perofetane hë, e tha mejiune mina ha angatre kowe la itre eamo i Akötresie, ame hna traqa koi angatre la itre pune ka ngazo.—Lev. 26:23-25; Iere. 5:23-25.
8. Nemene la aqane tro sa xomi ini qa ngöne la tulu i angetre Isaraela?
8 Nemene la aqane tro sa xomi ini qa ngöne la tulu i angetre Isaraela? Tui angatre ekö, kola kapa hnene la itre hlue i Akötresie enehila la itre eamo me itre ihaji. (2 Pet. 1:12) Ame ngöne la nöjei ijine easa e la Wesi Ula i Akötresie, tre, kolo hi lai a amekunë së la itre eamo i Nyidrë. Jëne la atreine ka eje the së troa ië ewekë, haawe, ijiji së troa xötrethenge la itre hna amekötine hnei Iehova, maine tro pena xötrethenge la itre mekune ka meköti koi së. (Ite edomë 14:12) Tro sa ce wange la itre xa kepine matre tro sa mejiune kowe la itre eamo i Iehova, me itre thangane hne së hna kapa qa ngöne la hna wangatrune itre ej.
DRENGETHENGE AKÖTRESIETI JË MATRE MEL
9. Ame lo angetre Isaraela ngöne la hnapapa, hnei Iehova hna amamane tune kaa koi angatre ka hape, ce Nyidrëti me angatr?
9 Ame lo kola xötrei trongëne hnene la angetre Isaraela la “hnapapa . . . hna qouen” ngöne la 40 lao macatre, tre, tha ase kö Iehova hamë angatre la itre ithuemacanyi nyine troa eatrongë angatr, me thupë angatr, me hamë angatre la ka nyipi ewekë kowe la mele i angatr. Ngo hnei Nyidrëti pala hi hna amamai angatre ka hape, tha tro kö angatre a luelue, ngo ijije tro angatre a mejiune koi Nyidrë me kowe la itre hnei Nyidrëti hna amekötin. Ame la kola eatrongë angatr hnene la iawe e lai, me eë e jidr, tre, Iehova hi lai a amekunë angetre Isaraela ka hape, ce Nyidrëti me angatr, nge Nyidrëti la ixatua koi angatre ngöne la hnapapa ka pë nyine mele ngön. (Deu. 1:19; Eso. 40:36-38) Hnei Nyidrëti mina fe hna hamëne la ka nyipi ewekë kowe la mele i angatr. “Tha hnyeqete kö la ite ixete i angat, nge tha cipa kö la ite waca i angat.” Eje hi laka, “pëkö kete ewekë ka pate koi angat.”—Neh. 9:19-21.
10. Nemene la aqane eatrongëne Iehova la nöje i Nyidrë enehila?
10 Ame enehila, itre hlue i Akötresie a mele ngöne la ijine kola troa lö kowe la fene ka hnyipixe. Hapeu, easë kö a mejiune koi Iehova matre tro Nyidrëti a hamë së la ixatua ka ijije matre tro sa hane mele pe qa ngöne la “aköte atraqate” ka troa xulu? (Mat. 24:21, 22; Sal. 119:40, 41) Nyipici laka, tha hnei Iehova kö hna eatrongë së hnene la iawe me eë kowe la fene ka hnyipixe. Ngo Nyidrëti pe a huliwane la organizasio i Nyidrëti matre troa xatua së troa catre hmek. Hane hi la ketre nyine anyipicin, kolo pala hi a thuecatre koi së troa acatrene la lapaune së jëne la troa isa e Tusi Hmitrötr, me tro pala hi a kuca la Hmi Ne La Hnepe Lapa, me sine lapane la itre icasikeu, me tro kowe la hna cainöje trootro. Hapeu, hne së hë hna hane saze la mele së matre troa trongëne la itre hna amekötine celë? Maine tro sa ujë tune lai, tro lai a acatrene la lapaune së, ewekë lai ka troa aijijë së troa mele ngöne la fene ka hnyipixe.
11. Nemene la itre aqane amamane Akötresie ka hape, Nyidrëti a hnehengazo së?
11 Kola xatua së hnene la itre hna amekötine hne së hna kapa tro pala hi sa hmeke ngöne la götrane u, ngo itre eje fe a xatua së troa cile kowe la itre jole hne së hna melëne o drai. Hane hi la ketre ceitun, hetrenyi la itre hna amekötine hna hamëne koi së matre troa atreine tulu ewekë göi itre mo, me troa maca la alameke së, matre tha tro kö sa hnehengazo menu. Hne së fe hna kapa la itre hna amekötine göi aqane heetr, me isej, me aqane ië nyine iamadrinë, me aqane axecië mekune göi ini. Nge the qaja fe kö la itre eamo göi itre hnalapa së, me itre loto së, me itre Uma Ne Baselaia, matre tha tro kö a hetre ethane kowe la mele së. Kolo fe a qaja la itre nyine hnëkëne e traqa ju la itre jole ka tru. Kola amamane hnene la itre hna amekötine celë ka hape Akötresieti a hnehengazone la mele së.
ITRE EAMO KA XATUANE LA ITRE PANE KERESIANO TROA MELE NYIPICI
12. (a) Nemene la mekune hna qaja lapane hnei Iesu kowe la itretre drei nyidrë? (b) Nemene la aqane ipië i Iesu ka ketr hnyawa la hni Peteru, nge nemene la aqane tro lai a ketri së?
12 Ame lo hneijine i itre pane keresiano, hnene la nöje i Akötresie hna kapa la itre eamo hna amexeje lapan. Tha mano kö Iesu qaja kowe la itretre drei nyidrëti la enyipiewekëne troa eënyine la thiina ka ipië. Ngo, tha hnei nyidrëti hmekuje kö hna qaja la alien, ngo hnei nyidrëti pe hna amamane koi angatre la aqane troa melën. Ame lo drai tixenuë i Iesu e celë fen, hnei nyidrëti hna icasinekeune la itre aposetolo thatraqane la Paseka. Kolo petre kö a xeni hnene la itre aposetolo, nge mejë jë hi Iesu troa hnea la itre waca i angatr, huliwa i hlue lai. (Ioane 13:1-17) Hnene pë hë la aqane ipië i Iesu e celë hna ketr hnyawa la hni angatr. Thötre hë lao macatre thupen, nge Peteru aposetolo, lo ka ce xeni me Iesu lo ijine cili, a hamëne hmaca kowe la itre trejine me angeic, la ketre eamo göi thiina ka ipië. (1 Pet. 5:5) Tro la tulu i Iesu a upi së troa thiina ka ipië ngöne la aqane imelekeu së memine la itre atr.—Fil. 2:5-8.
13. Nemene la thiina ka sisitria hnei Iesu hna amexeje jëne la itretre drei nyidrë troa eënyin?
13 Ame la ketre mekune hnei Iesu hna amexeje lapane kowe la itretre drei nyidrë, tre, ene la enyipiewekëne troa catre lapaun. Thupene la hna thatreine hnene la itretre drenge troa helëne la ketre dremoni qaathene la ketre nekötrahmany, hnyingë Iesu jë hi hnei angatre ka hape: ‘Hnauëne laka thatreine kö nyihunie helën’ ej?’ Öni Iesu e sa ka hape: “Qa ngöne laka co hi la lapaune i nyipunie ; nge nyipici ini a qaja koi nyipunie, maine hetenyi nyipunie la lapaune tune la wene sinapi, . . . nge pëkö ewekë hna troa tha ‘teine hnei nyipunie.” (Mat. 17:14-20) Ame ngöne la ijine Iesu a cainöj, hnei nyidrëti hna inine la itretre drei nyidrë ka hape, ketre thiina ka sisitria la lapaun. (E jë la Mataio 21:18-22.) Easë kö a thele la itre ijine troa acatrene la lapaune së jëne la itre hna amekötine hna hamë së ngöne la itre asabele me itre hna icasikeu? Celë hi itre ijine lai ka nyipi ewekë catr, ke, itre ijine lai ka troa aijijë së troa amamane la mejiune së koi Iehova.
14. Pine nemene matre nyipi ewekë tro sa eënyine enehila la ihnimi ka tui Keriso?
14 Ame e hnine la Itre Hna Cinyihane Qene Heleni, nyimutre catre la itre eamo thatraqa së göi tro sa ihnimikeu. Hnei Iesu lo hna qaja ka hape, ame la hna hnaaluene wathebo ka tru, tre, ene la troa “hnime la ate lapa eashenyi ’ö tui eö hi.” (Mat. 22:39) Ketre tune mina fe, hnei Iakobo, ketre trejine me Iesu, hna qaja la ihnimi cili ka hape, “wathebo ka sisitia.” (Iako. 2:8) Hnei Ioane mina fe hna cinyihane ka hape: “Ange tejine fe, tha ini kö a cinyihane koi nyipunie la wathebo ka hnyipixe, loi pe la wathebo ka hekö, lo hnei nyipunie hna hetenyi qa ngöne la qan.” (1 Ioane 2:7, 8) Nemene la aliene la hna ithanata i Ioane la angeice a qeje “wathebo ka hekö”? Angeice hi lai a qaja la wathebo göi troa ihnim. Ame la kola hape, wathebo “ka hekö,” tre kola hape, hnei Iesu hë hna hamëne lai ngöne la itre macatre ka ase hë, “qa ngöne la qan.” Ngo kola “hnyipixe,” pine laka ame la ihnimi celë, tre tro la atr a huujëne la mele i angeic, tune la hna melëne hnene la itretre drenge ngöne la angatre a cile kowe la itre itupathi ka hnyipi traqa koi angatr. Ame easë itretre drei Keriso, easë kö a wangatrune la itre ithuemacanyi nyine hmekë së wanga hetrenyi jë la hni ka pi tru, thiina ka eje ngöne la fene celë, nge ka angazone la ihnimi së kowe la atre lapa easenyi së?
15. Nemene la pane hnëqa i Iesu e celë fen?
15 Hnei Iesu hna amamane la ihnimi nyidrë kowe la itre atr. Easa öhne la ihnimi nyidrë ngöne la nyidrëti a aloine la meci ne la itre atr, memine la itre sinatr, me amelene hmaca la itre ka mec. Ngo ame pe, ame la pane hnëqa i Iesu, tre tha ene kö la troa aloine la meci ne la itre atr. Sisitria catre kö la huliwa ne cainöje i nyidrë memine la troa inine la itre atr, ke, hetre eloine ka huti ngöne la mele i angatr. Hna tune kaa? Atre hi së laka, ame lo itre atr hnei Iesu hna aloin, me amelene hmaca lo hneijine i nyidrë, tre, qatre trootro pi angatr, me mec, ngo ame kö la itre kapa la maca, angatr a mejiune troa mele palua.—Ioane 11:25, 26.
16. Nemene la aqane kökötrene la huliwa ne cainöjëne la Baselaia e cailo fen, me huliwa ne inine la itre atr enehila?
16 Hna eatrëne enehila e cailo fene la huliwa ne cainöje hna nyiqaane hnei Iesu lo hneijine i nyidrë. Hnei Iesu hna upe la itretre drei nyidrë me hape: “Trojë nyipunie a inine la nöjei nöj’ asëjëihë.” (Mat. 28:19) Eje hi, celë hi hnei angatre hna kuca, nge easë fe enehila! Traqa koi sevene milio nge hetre munën la etrune la Itretre Anyipici Iehova ka catre cainöjëne la Baselaia i Akötresie ngöne la 230 lao nöje nge hetre munën, nge ala milio fe kö la itre atr hnei angatre hna ini Tusi Hmitrötre lapa memin. Kola amamane hnene la huliwa ne cainöje celë ka hape, easë hnyawa hi a melëne la itre drai ne la pun.
MEJIUNE JË KOI IEHOVA ENEHILA
17. Nemene la eamo hna hamëne hnei Paulo me Peteru?
17 Kola mama hnyawa laka, hnene la itre eamo hna xatuane lo itre pane Keresiano troa cile huti ngöne la lapaun. Pane mekune ju la eamo hna kapa hnei Timoteo lo Paulo aposetolo a amekunë angeice qa ngöne la kalabusi e Roma, kola hape: “Ame la ite tulu ne tenge ewekë ne mele hnei ’ö hna denge qatheng, xölehuje catëne ju.” (2 Tim. 1:13) Thupene la hna thuecatrene la itre trejine troa eënyine la itre thiina ka tune la xomihni, me ihnimi trejin, me xome acone maine xomehnöth, öni Peteru: “Tro pala kö ni a amekunë nyipunie la ite ewekë cili, ngacama ate nyipunie, me cile huti kö ngöne la nyipici celë.”—2 Pet. 1:5-8, 12.
18. Nemene la aqane goëene la itre eamo hnene la itre pane Keresiano ekö?
18 Eje hi laka, ame la itre tusi hna cinyihane hnei Paulo me Peteru, tre itre eje a amexeje hmaca “la nöjei wesi ula hna pane ulatine hnene la’ ite perofeta ka hmitöt.” (2 Pet. 3:2) Hapeu, ame lo hneijine i Iesu, ke hnene kö la itre trejine hna eetr la angatre a kapa la itre eamo ka tune lai? Ohea, ke, ketre hatrene ihnimi Akötresieti lai, nge ka xatua angatre troa ‘kökötre ngöne la ihnimi gufa, memine la wangatrehmekune la Joxu së ate amelen, ene Iesu Keriso.’—2 Pet. 3:18.
19, 20. Pine nemene matre tro sa mejiune kowe la itre eamo i Iehova, nge tro sa kepe thangane tune kaa qa ngön?
19 Ame enehila, nyimutre la itre kepine matre easa mejiune kowe la itre eamo i Iehova ka meköle e hnine la Wesi Ula i Nyidrë, ene la Tusi Hmitrötr. (E jë la Iosua 23:14.) Ame e hnine ej, easa öhne la aqane ujë i Akötresie kowe la itre atr ka tha pexeje kö, ngöne la itre macatre ka nyimu thauzane hë. Ame la itre hna cinyihane cili, tre, itre nyine loi koi së. (Rom. 15:4; 1 Kor. 10:11) Easa öhne la aqane eatre la itre hna perofetane hnene la Tusi Hmitrötr. Ceitune hi la itre hna perofetane memine la itre eamo hna canga ahnithe hë koi së. Hane hi la ketre nyine anyipicin, hna icasinekeune la itre atr ka ala milio la etrune ngöne la nyipi hmi, tune la hna perofetane hë, laka troa eatre ngöne la “ite drai hnapine.” (Is. 2:2, 3) Kolo fe a eatre la ketre hna perofetan, laka kolo pala hi a ngazo catre la pengöne la fen. Ketre, kola amamane hnene la aqane kökötre la huliwa ne cainöje e cailo fen laka, eatre hnyawa ha lo trenge ewekë i Iesu.—Mat. 24:14.
20 Hnene la Atre Xupi së hna eköthe la ketre hna cinyihane nyine tro sa mejiune kow. Easë kö a kepe eloine qa ngön? Nyipi ewekë tro sa mejiune kowe la itre eamo i Nyidrë. Celë hi hna kuca hnei Rosellen. Öni angeic: “Ame la eni a nyiqaane mejiune hnyawa koi Iehova, eni hi lai a öhne hnyawa la ihnimi Nyidrë, me iwanakoime i Nyidrë a xatua ni me thuecatreng.” Epi tro fe sa kepe eloine qa ngöne la hna trongëne la itre eamo i Iehova.
[Thying]
[Iatr ne la götran 7]
[Iatr ne la götran 8]
Hnene la itre eamo i Iehova hna upi Iosea troa isigöline la nyipi hmi (Wange ju la paragarafe 6)
[Iatr ne la götran 10]
Ame la troa trongëne la itre eamo i Iehova, tre kolo lai a xatua së matre tha tro kö a jole troa lö kowe la Uma Ne Baselaia, nge tha tro kö a eatre menu la atr (Wange ju la paragarafe 11)
