Tro Kö Epuni a Huliwa Catr Göi Troa Thuemacane La Itre Atr?

Hnene la ketre film qene papale ka tha ithanata kö (A Trip Down Market Street) hna ketr la hni ne la itre atr ka goeën, ke kola amamane la aqane mele ekö lo itre macatre 1900 e San Francisco, ketre traone ne Amerika. Hnene la itre ka kuca lai film cili hna acatrene la camera hune la ketre loto; kolo petre kö lo hna uliline hnei manivelle. Nge angatre pë hë a xome jë la itre ewekë e cili gojeny, matre troa amë hnine lai film. Ame la itre hna amamane ngöne lai film tre itre ikaatr hna hule hnei hos, memine lo itre pane loto ekö, me angetre itö, me itre nekönatr a salemë zonale trootro.

Hna ketr catrëne la itre atr, ke hna kuca lai film ngöne lo treu Eiperem 1906. Kolo hnyawa hi lo qëmekene troa lepe lai traone hnei sa me eë, lo drai 18 Eiperem, matre traqa koi itre thauzane lao atr ka mec, nge ketre götrane gaa tru ne la traone la hna angazon. Ame la itre atr hna öhne ngöne lai film, tre ma kolo pe hi lai a öhne tixenuë angatr, ke hna e draine pe hi la mele i angatr. Öni Scott Miles, ketre matrane lo lai ka kuca lo film ka hape: “Ame la eni a goeëne la itre atr cili, tre tru la hnenge hna utipi angatr, ke thatre kö angatr la ewekë ka troa traqa koi angatr.”

Ame la itre ewekë ka traqa ngöne la ijine cili, tre tro hi a ceitu memine la itre ka troa traqa ngöne la hneijine së. Atraqatre mina fe la utipine së kowe la itre atr ka lapa easenyi së. Angatr a isa kuci huliwan, ngo thatre kö angatre la ewekë ka troa traqa koi angatr; ene la troa apatrene la fene celë, me aqane mele ne la itre atr. Isapengö së kö memine lo itre atr hna lepe hnei sa, ke hetre hnepe ijine pala kö koi së troa thuemacane la itre atre lapa easenyi së laka, calemi hë la drai i Iehova. Maine nyipici ka hape, hnei epuni hna xomi ijine troa cainöje trootro e nöjei wiik, ngo hapeu, ijije pala kö tro hmaca fe epuni a hane huliwa catr göi troa thuemacane la itre atr?

KA HULIWA CATRE IESU

Iesu hi la tulu ke ka huliwa catre pala hi nyidrë. Hnei nyidrëti hna cainöje kowe la nöjei pengöne atr hnei nyidrë hna öhn; tune lo telona hna ixelë memin e kuhu gojeny, memine lo föe hnei nyidrëti hna traqa kow ngöne la hnaipajö . (Luka 19:1-5; Ioane 4:5-10, 21-24) Ngacama ijine tro nyidrëti lai a pane mano, ngo tha hnei Iesu kö hna qeje jole e troa hamë ini. Hnene la utipine i nyidrë kowe la itre atr, matre tha hnei nyidrëti kö hna mo i asene la aqane hamë ini. (Mareko 6:30-34) Nemene la aqane tro sa nyitipune la aqane huliwa i Iesu enehila?

NYIDRO A THELE IJINE TROA CAINÖJ

Ame la hnalapa hnei Melika, tre ngöne la ketre iuma hna thupëne hnyawa. Ame la itre xa sine lapa i angeice ngöne lai batima, tre itre ka traqa qa ngöne la  itre xa nöje troa ini, itre ka pë ëjen ngöne annuaire ne telefon, nge tha hna fejane kö la itre ëje i angatre ngöne lo ipepa hna fejane la itre atrene lai iuma. Madrine catre angeic e ithanatane mina ju angeice la Tusi Hmitrötr memine la itre atrene la iuma ngöne la hna lö, maine ngöne lai ascenseur pena. Öni angeic: “Ketre götrane hnë tro hë ni la a cainöj.” Hnei Melika hna xome la itre itus ngöne la itre qene hlapa ka nyimutre, nge nyimu ka xome la itre tarak me itre zonal. Nge hnei angeice fe hna qaja koi angatr ka hape, hetre sit ëternete së, lo hna hape jw.org. Nyimu hnei angeice hna nyiqaane ini Tusi Hmitrötr memin.

Sonia fe la ketre trejine ka thele la itre atr nyine cainöje kow. Ka huliwa angeice ngöne la pital ne la ketre droketre, nge aja i angeic troa cainöje kowe la itre sine huliwa i angeic asë. Ame la hnei angeice hna pane kuca, tre ene la troa atrepengöne la itre aja i angatr me itre ewekë hnei angatre hna lapa mekun. Ame hë la kola xeni hnaipajö, angeic a thele la ketre e angatr troa porotrikë Tusi Hmitrötr memin. Ame hë la thangan, lue hnei angeice hë hna nyiqaane ini Tusi Hmitrötre memin. Ame mina la ketre ewekë hnei angeice hna ajane troa kuca, tre e mano mina ha angeic, tro angeic a tro kowe lo hna itreqe thei droketre matre troa porotrikë Tusi Hmitrötr kowe la itre atr ka itreqe.

THELE IJINE JË TROA CAINÖJ

Önine la ketre ka mele pe ngöne lo kola traqa la sa lo 1906, ka hape: “Pë pala kö ketre hulö ka angazone la traone tune la.” Ngo ame asë la nöjei hulö ka traqa kowe la atr, tre pëkö ca pengöne, hune elany la drai ne elëhni ka troa traqa “koi angete tha ’te Akötesie.” (2 Thes. 1:8) Ame la aja ka tru ka eje thei Iehova, tre loi e troa saze la mekune me hni ne la itre atr, me drenge la itre ithuemacany hna tro fë hnene la itre hlue i Nyidrë.—2 Pet. 3:9; Hna ama. 14:6, 7.

Hna aijijë epuni troa fe la lue meke ne la itre atr ngöne la hneijine së, hneijine ka jol, matre troa xatua angatr troa hmaca qa ngöne la itre sipu mekuna i angatr, me thele Iehova. (Zef. 2:2, 3) Tro kö epuni a thele ijine troa cainöje kowe la itre sine huliwa i epun, me itre sine lapa i epun, me itre hnei epuni hna ixelë memin e nöjei drai? Tro kö epuni a huliwa catr göi troa thuemacane la itre atr?

[Iatr ne la götran 31]

Tru la hna angazone e San Francisco lo macatre 1906 hnei sa me eë, ke pëkö ithuemacany

[Hna xome ngön la foto]

U.S. National Archives photo

[Iatr ne la götran 32]

[Hna cinyihan ne la götran 32]

Tro kö epuni a thele ijine troa cainöje kowe la itre atr hnei epuni hna ixelë memin e nöjei drai?