‘Huliwa i Iehova Jë Tune La Hlue’
‘Huliwa i Iehova Jë Tune La Hlue’
“The witi kö ngöne la huliwa. . . . Nyi hluenejë la Joxu [Iehova].”—ROM. 12:11.
NEMENE LA MEKUNA I EPUN?
Nemene pengöne hlue la hna qaja ngöne Roma 12:11?
Tune kaa la aqane tro sa thupëne matre tha tro kö sa itre hlue i Satana memine la fene i angeic?
Nemene la itre manathithi hnene la itre hlue hna kapa qaathei Iehova?
1. Ame kowe la itre atr, ke nemene la hlue, nge nemene la eisapengönene lai memine lo hna qaja ngöne Roma 12:11?
ALANYIMU la itre atr ka mekune ka hape, ame la hlue, tre, ketre atr hna musinën me akötrëne hnene la maseta i angeic. Ngo isa pengöne catre lai memine la hlue i Akötresie. Kola qaja hnene la Wesi Ula i Akötresie ka hape, ijije hi troa iëne hnene la ketre Keresiano troa hlue ne la ketre Maseta ka ihnim. Pine laka ka hnime Akötresieti la itre Keresiano, ene pe Paulo a ithuecatre jë koi angatr troa ‘itre hlue i Iehova’. (Rom. 12:11) Nemene pengöne hlue lai? Troa xecie tune kaa koi së laka, tha itre hlue i Satana kö së memine la fene i angeic? Nge nemene la itre manathith hne së hna kapa qa ngöne laka itre hlue i Iehova fe së, nge easa fe a hane mele nyipici koi Nyidrë?
“INI A HNINE LA TIXENG”
2. (a) Pine nemene matre kolo pala pë hë a mekune troa nyi hlue hnene la atre Isaraela? (b) Nemene la hna amamane hnene la hlue ngöne la angeic a ajane troa kuje la hnangenyë i angeic?
2 Kola xatua së hnene la Trenge Wathebo i Akötresie hna hamëne koi angetre Isaraela, troa trotrohnine la hna thele the së matre tro sa ketre hlue i Iehova. Hna majemine nue hmaca la hlue atre Heberu, thupene la hnaasevenene macatre ne huliwa angeice kowe la maseta. (Eso. 21:2) Ngo maine atraqatre la ihnimi angeic koi maseta, nge tha ajane kö angeic troa nue nyidrë, haawe, ijije hi tro angeic a lapa. Celë hi hna amekötine lai hnene la Trenge Wangebo i Iehova. Tro hë maseta lai a tro sai angeic kowe la thingene qëhnelö maine sinete qëhnelö, me kuje la ihnangenyë i angeic. (Eso. 21:5, 6) Pine nemen matre kola kuca tune lai hnene la maseta? Ame qene Heberu, tre, ame la troa drengethenge, ke, ka ce tro memine la mekun, ene la troa dreng me hnangenyëne hnyawa. Haawe, ame hi lai kola kuje la hnangenyë ne la hlue, ke kolo hi lai a amamane laka aja i angeic pala pë hë troa nyi hlue me drengethenge la maseta i angeic. Ceitune hi lai memine la easa sa xepu. Ame hi la easa isa sa xepu koi Iehova, ke, easë hi lai a qaja koi Nyidrë ka hape, easë hë a troa hane drengethenge Nyidrë, pine laka tru hë la ihnimi së koi Nyidrë.
3. Pine nemene matre easa isa nue la mele së koi Akötresie?
3 Qëmekene tro sa xome la bapataiso, hne së hna axecië mekune troa nyi hlue i Iehova, ene la troa ketre hlue i Nyidrë. Ame la easa nue la mele së koi Nyidrë, tre easë hi lai a sisinyi troa drengethenge Nyidrë me kuca la aja i Nyidrë. Pëkö atr ka musinë së troa axeciëne la mekune cili. Kola mama fe thene la itre thöth laka, tha angatre kö a xomi bapataiso matre tro hi a amadrinëne la itre keme me thine i angatr, ngo sipu aja i angatre kö. Pine laka easa hnimi Iehova la Maseta së e koho hnengödrai, haawe hne së asë hi hna isa sipu axecië mekune troa nue la mele së koi Nyidrë. Hnei Ioane aposetolo hna cinyihane ka hape: “Dei lola aja koi Akötesie, laka eësha denge thenge la ite wathebo i nyidë.”—1 Ioane 5:3.
ASE HË NUE SË, NGO ITRE HLUE PALA HI SË
4. Nemene la nyine tro sa kuca matre ‘itre hluene së la thiina ka meköt’?
4 Easa olene atraqatre koi Iehova la hnei Nyidrëti hna aijijë së matre tro sa itre hlue i Nyidrë! Kola aijijë së hnene la lapaune së kowe la thupene mele i Keriso, troa utretr qa ngöne la ngazo, ene pe tha pexeje hë la aqane musinë së hnene la ngazo. Kolo lai a hape, ngacama itre atr ka tha pexeje pala kö së, ngo ijije hi tro sa iëne troa drengethenge Iehova me Iesu lo lue Maseta së. Hnei Paulo hna qeje pengöne hnyawa lai hnine la ketre tusi nyidrë. Öni nyidrë: “mekuneju laka meci hë nyipunie kowe la ngazo, ngo mele kö nyipunie koi Akötesie göi Iesu Keriso.” Thupene lai nyidrëti a hmekë angatr, ka hape: “Tha ’te kö nyipunie laka ame la hnei nyipunie hna nue nyipunie kowe troa nyi hluene me denge thenge, ite hlue i angeice nyipunie lo hnei nyipunie hna denge kow ; maine ngazo uti hë la mec, maine idei uti hë la thina ka meköt ? Ngo olenepi koi Akötesie, laka nyipunie lo itete nyi hlue ne la ngazo ekö, ngo enehila nyipunie a denge thenge qa kuhu hni, la tulu ne la tenge ewekë hna nue nyipunieti kow. Gufa ha nyipunie ene la ngazo, ngo ite hluenë hë la thina ka meköt.” (Rom. 6:11, 16-18) Drei la hna qaja hnei Paulo, laka, loi e tro sa “denge thenge qa kuhu hni.” Haawe ame hi la easa nue la mele së koi Akötresie, tre, ‘itre hluene hë së la thiina ka meköt.’
5. Nemene la hne së hna isi memin, nge pine nemene?
5 Qa ngöne laka itre hlue i Akötresieti hë së, haawe, luetre la lue ewekë nyine tro sa isi memin. Ame la hnapan, tre ene la ngazo ka eje the së. Hnei Paulo fe hna hane isi memine la ngazo ka eje thei nyidrë. Öni nyidrë: “Ke ini a madine la wathebo i Akötesie thenge la ate e kuhu hning ; ngo öhnë hë ni la kete wathebo ngöne la ite hnepe ngöneteing, kola ishi memine la wathebo e kuhu hning, me aponyi ni kowe la wathebo ne la ngazo ate lapane la ite hnepe ngöneteing.” (Rom. 7:22, 23) Pine laka itre atr ka tha pexeje kö së, nyipi ewekë tro pala hi sa isi memine la itre aja ne la ngönetrei së; kola qaja lo itre hna ajane troa kuca hnene la atr, ngo hna xelene pe hnei Akötresie. Hnei Peteru hna ithuecatre koi së, ka hape: “Tune la nöjei ate gufa kö, ngo tha kolo kö a celohmëne la gufa i nyipunie nyine he la iangazo, ngo loi pe tune la ite hlue i Akötesie.”—1 Pet. 2:16.
6, 7. Nemene la aqane kuca i Satana matre tro sa piin la fen?
6 Ame la hnaaluene, tre, easa isi memine la fen hna musinëne hnene la itre demoni. Satana la tan ne la fen, nge angeic a huliwane la nöjei jia ne isi matre troa thë la aqane nyipici së koi Iehova me Iesu. Satana a ajane tro sa itre hlue i angeic, ene pe angeic a tupathi së matre tro fe sa hane sine la fene i angeic. (E jë la Efeso 6:11, 12.) Ame la ketre aqane tupathi së hnei angeic, tre ene la troa kuca matre tro sa piin la fen, jëne la ketre ewekë hne së hna ajan. Hnei Ioane aposetolo fe hna hmekë së, ka hape: “Maine kete ate a ajane la fen, pëkö aja koi Tetetro e kuhu hni angeic. Ke ame la nöjei ewekë asëjëihë e celë fen, ene la meciunyi ewekë i ngönetei, memine la meciune ne la lue mek, memine la nyi döne la mele celë, tha qa thei Tetetroti kö, ngo qa hi la fen.”—1 Ioane 2:15, 16.
7 Ala nyimu la itre atr e cailo fen ka thele pala hi troa tru hnei mo i angatr. Satana a kuca matre tro la itre atr a mekune ka hape, e tru la manie i angatr, haawe, tro hë angatr a madrin. Tiqa asë hë cahu hnei setroa. Itre publicité a aciane la ketre aqane mekune laka, ame la ka nyipi ewekë, ke troa tiqa pala hi hnei mo nge tro ha tru la madrin. Drei la ketre ceitun, kola acone la thupene avio e hna ce tro alanyim me itre atr ne fen. Ame asë hi xötreithi së, ke, kola iupi troa saze la aqane mel, ngo thenge pe la aqane emuemune la fen.
8, 9. Nemene la ewekë ka hetre ethan nge ka mama hnyawa enehila, nge pine nemen?
8 Ame ngöne lo hneijine i Iesu, hnei Peteru hna hmekëne la itre Keresiano göne la itre atrene la ekalesia ka nango nyiqaane epe kowe la fen. Öni nyidrë: “angat’ a mekune laka ka loi troa madine ngöne la lai. Ite thuthune angate me ite ethan, kola madine la ite thoi angat, lo angate pete kö a ce pui ne xeni me nyipunie; Ke angat’ a ewekë nyi tru me kusë, ame hna amenu angete kötene la angete lapa ngöne la ngazo, hnene la nöjei aja ne ngönetei me qene tratraij; angat’a thinge hnaeane koi angate troa gufa, ngo angate pe la ite hlue ne la thina ka sis; ke ame la ka xom’ acone la ate, te, celë hi hnei angeice hna nyi hlue kow.”—2 Pet. 2:13, 18, 19.
9 Maine tro sa kei thenge la “meciune la lue mek,” ene la troa hetrenyi the së la nöjei ewekë hne së hna piin, haawe, tro hë itre eje lai a othi së. Nge tro hë së lai a itre hlue i Satana Diabolo, maseta ne la fene celë. (1 Ioane 5:19) Ketre ewekë ka mama hnyawa nge ka hetre ethane catr la troa nyi hlue ne aja mo. Maine troa traqa tune lai koi nyipunie, troa jole catr elanyi troa utretr.
KETRE HULIWA KA HETRE THANGAN
10, 11. Drei lo la itre pi tha i Satana? Tune kaa la aqane tro la itre ini ka tru a ajolëne la itre thöth?
10 Satana a ajojezine la itre ka kucakuca. Pi tha i angeic enehila la itre thöth. Tha madrine kö angeic la kola axecië mekune hnene la ketre thöth maine ketre atr pena, troa ketre hlue i Iehova. Satana a ajane troa nanazij la aqane mele nyipici me aqane catre nyi hlu ne la itre ka sa xepu koi Iehova.
11 Ka akötr la kola kuje la hnangenyën la hlu. Ngo e thupene hë, kolo ha mama la hatren laka, ase hë angeic mekune ekuhu hni angeic troa lapa palua me maseta i angeic. Troa jole catre me akötr kowe la itre thöth troa ië ewekë, e traqa ju isapengöne la mekuna i angatr memine la mekunene la itre atr ka mele xötreithi angatr. Drei la ketre ceitun, Satana a aciane la mekune laka, ame la troa huliwa kowe la fene celë, ke, celë hi ewekë ka tru kowe la mel. Ngo tha eje kö lai, ame la ka nyipi ewekë, tre, troa sisitria hnei Iehova ekuhu hni së, ene pe tro ha hetre nyipi aliene la mele së. Hnei Iesu hna qaja ka hape: “Manathithi la ite ka pë ewekë ngöne la u.” (Mat. 5:3) Kola nue hnene la itre Keresiano la mele i angatr troa kuca la aja i Iehova, ngo tha ene kö la aja i Satana. Angatr a e la Tusi Hmitrötr me sine thel ej “e lai me jid.” (E jë la Salamo 1:1-3.) Ngo pine laka kola sisedrëne la itre ini ka tru enehila, haawe, tha tru hmaca kö hnei traeme ne la hlue Akötresie troa hane sine thele la Wesi Ula me nyi hlue i Iehova.
12. Nemene enehila la hna iëne hnene la itre thöth ka alanyim?
12 Ame la itre maseta enehila, tre angatr a akötrëne la mele ne la hlue Keresiano. Ngöne lo pane tusi Paulo koi angetre Korinito, hnei nyidrë hna qaja ka hape: “Hape u, hna hë eö nge hlue ? the mekune kö kow ; ngo e ateine eö tro gufa, jele nyipi ewekëne jë lai.” (1 Kor. 7:21) Maine atre ne fen la maseta ne la hlue nge ka akötrëne la mele i angeic, haawe, ma nyipi loi kowe la hlue troa uke qaathei maseta. Ame enehila, nyimutre la itre nöj ka acile la wathebo göi etrune la itre macatre ne troa ini la nekönatr. Thupene la itre macatre cili, isa qanyi angeice pë hë iën. Maine tro angeic a sisedrën, maine tro pena a hmaca e cili. Ka jole catr nge troa hnöthe la ketre Keresino troa nyi hlue i Iehova ngöne la drai ka pexej, e traqa ju angeice iëne troa sisedrën la itre ini ka tru me thele troa huliwa meci kowe la fene celë.—E jë la 1 Korinito 7:23.
INI KA TRU MAINE INI KA SISITRIA?
13. Nemene la ini ka troa xatuane hnyawa la itre hlue i Iehova?
13 Hnei Paulo hna hmekëne la itre Keresiano ka mele e Kolose, ka hape: “Wange kö ke thöeë nyipunie hnei kete ate hnene la pi inamacane me tenge iaö nyine amenun, thenge la edomë i ate, me ite ini hnapane ne la fen, nge tha thenge Keriso kö.” (Kol. 2:8) Nyimutre la itre ka hamë ini ka inine la “tenge iaö nyine amenun, thenge la edomë i ate.” Kolo hi a hamëne la itre mekune cili jëne la ini ka tru, ngo tha ka tro kö a xatua angatre troa atreine huliwa maine hnëkë angatre pena kowe la mele i angatr elany. Ngo ame la itre Keresiano, ke, angatr a iëne la ketre ini ka aijijë angatre troa ahmaloeëne la mele i angatr, ene ijiji angatre hë troa hane nyi hlue i Akötresie. Angatr a wangatrune hnyawa la eamo hnei Paulo hna ahnithe koi Timoteo, kola hape: “Ngo mo ka tru alamekene la thina ka ijiji Akötesie ce me mejihnin. Nge e hetenyi hë shë la xeni me ixete, ea mejihnineju hë lai.” (1 Tim. 6:6, 8) Tha tro kö la itre nyipi Keresiano a sisedrëne la itre ini matre troa hetrenyi la itre pepa, me göi troa ahlemune la itre ëje i angatr, ngo tro pe angatr a catre huliwa troa hetrenyi la “ite tusi nyine qaja aloine koi [angatr]” hnene la hna kuca la hnei angatr hna atrein troa cainöje trootro.—E jë la 2 Korinito 3:1-3.
14. Ame ngöne la easa e la Filipi 3:8, nemene la ini hne së hna kapa qa ngöne la aqane mekuna i Paulo göi troa ketre hlue i Akötresie me Keriso?
14 Ijije hi tro sa xome la tulu i Paulo. Hnei nyidrë hna kapa la ini qaathei Gamaliela ketre atre hamë ini i angetre Iudra. Ceitune la ini hnei nyidrë hna kapa memine la itre ini hna hamëne jëne la itre ini ka tru enehila. Ngo nemene la mekuna i Paulo ngöne la nyidrëti a qaja la ini cili memine la elolone la troa hlue i Akötresie me Keriso? Hnei nyidrë hna cinyihane ka hape: “Ini a tha nyipi ewekëne la nöjei ewekë asëjëihë qa ngöne la esisitia ne la wangate hmekunyi Keriso Iesu Joxung.” Öni nyidrëti fe ka hape: “Göi nyidëti hnenge hna tha nyipi ewekëne la nöjei ewekë asëjëihë, nge mekune ni laka ite ka sisi it’ej, mate hetenyi hë ni Keriso.” (Fil. 3:8) Hnene la aqane mekune i Paulo hna xatuane la itre thöth Keresiano memine la itre keme me thine i angatr, troa axecië mekune hnyawa göi ini. (Wange ju la itre iatr.)
MANATHITH QA NGÖNE LA INI KA SISITRIA
15, 16. Nemene la ini hna eköthe hnene la organizasio i Iehova, nge nemene la nyipi kepin matre kola xome la ini cili?
15 Nemene la hna öhne ngöne la itre götrane hna ini ka tru? Ka tiqa hnei ka icilekeu me amamane la trenge elëhni i angatre kowe la itre mus. (Efe. 2:2) Ngo organizasio i Iehova pe a hamëne la ini ka sisitria e hine la ekalesia gaa tingeting. Easë asë hi a sine ngöne la nöjei wiik la Ini Ne Cainöj Qaathei Akötresie. Hetrenyi fe la itre xa ini hna eköth e hnine la ekalesia. Ka tune la ini hna hnëkëne thatraqane la itre trejine trahmanyi ka pionie nge ka tha faipoipo kö hna hëne ka hape, (Ini Thatraqane La Itre Trejine Trahmanyi Ka Tha Faipoipo Kö) me ini thatraqane la itre pionie ka faipoipo hë, hna hëne ka hape, (Ini Thatraqane La Itre Trefëne Keresiano). Kola xatua së hnene la itre ini cili troa drengethenge Iehova lo Maseta së ekoho hnengödrai.
16 Ijije hi tro sa kapa la itre ini ka sisitria qa hnine la: Index des publications des Témoins de Jéhovah memine lo logiciel Watchtower Library ngöne CD-ROM. Ame la nyipi kepine matre easa ini la Tusi Hmitrötr, tre, göne la tro sa thili koi Iehova. Ketre, kolo fe a aijijë së hnene la ini cili troa xatuane la itre xan matre tro fe angatr a hane itre enehmu i Akötresie. (2 Kor. 5:20) Thupene lai, tro pena ha la itre atr cili a hane hamë ini koi itre xan.—2 Tim. 2:2.
THUPENE KOWE LA HLUE
17. Nemene la itre manathith hne së hna kapa, e hne së hna iëne la ini ka sisitria?
17 Ame ngöne la ceitune hnei Iesu hna hamën göne la itre talan, tre, hna qaja aloine la lue hlue ka huliwa nyipici. Madrine catre nyidro, nge tune mina fe la maseta i nyidro. Qa ngöne laka madrine maseta, haawe, hnei nyidrëti hna acili nyidro hune la itre xa ewekë i maseta. (E jë la Mataio 25:21, 23.) Tro sa madrin nge troa hetre aliene la mele së, e hne së hna iëne la ini ka sisitria. Hane la pengöi Mikael, ketre thöth ka tro loi la hna ini. Hna hë angeic hnene la itre ka hamë ini matre troa ce ithanatane la eloine la tro angeic a hane sisedrëne la itre ini ka tru. Sesëkötre asë hi angatre la angeic a qaja ka hape, tha ini cili kö la hnenge hna ajan. Hnei angeice pe hna xome lo itre ini ka canga saqe hi troa fenes matre troa atreine huliwa. Kolo hi lai a aijijë angeice troa hetre thupene xen me troa hane pionie. Hnei angeice kö hna mekune ka hape ngazo la hnei angeice hna axecië mekun? Angeice pe a qaja ka hape, ame la ini hnei angeice hna kapa qa ngöne la Tusi Hmitrötr me qaathene la itre qatre thup e hnine la ekalesia, ke, ka nyipi ewekë catre kö. Öni angeic: “Ame la itre lolo me itre manathith hnenge hna kapa, tre, sisitria catre pala kö hune la manie hnenge hna kapa maine eni ju a huliwa. Tru la madrinenge laka, tha hnenge ju kö hna iëne la itre ini ka tru.”
18. Pine nemene matre nyipi ewekë troa iëne la ini ka sisitria?
18 Kola ini së la aja i Akötresie hnene la ini ka sisitria, me xatua së troa itre hlue i Iehova. Ej a hamë së la mejiun, ene laka “hna nue la ite ewekë hna xupe qa ngöne la hna othe hnene la ka hnyeqet” nge troa eje the së la “hna nue gufane ka hadehadeu ne la ite nekö i Akötesie.” (Rom. 8:21) Celë hi ini ka nyipi ewekë catre lai, nge aqane ujë ka sisitria matre troa amamane laka, easa hnimi Iehova hnyawa lo Maseta së.—Eso. 21:5.
[Thying]
[Iatr ne la götran 12]
[Iatr ne la götran 14, 15]
Drei maseta la hnei epuni hna troa nyi hlue kow?
